សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍តាមរយះឯកឧត្តមហ៊ុយហ្គូស្វៃរី(HugoSwire)សមាជិកសភានិងជាអនុរដ្ឋមន្ត្រីការបរទេសចក្រភពអង់គ្លេសនៅវិមានសន្តិភាព នាថ្ងៃទី ៣១ខែមករា ឆ្នាំ ២០១៤ ថា ប្រ ទេសទាំងពីរ(អង់គ្លេសនិងកម្ពុជា)គប្បីស្វែងរក ចំណុចដទៃទៀតដើម្បីជាការទាក់ទាញវិនិយោគមកកាន់កម្ពុជាក្នុងពេលដែលទំហំពាណិជ្ជកម្មរវាងប្រទេសទាំងពីរបានកើនឡើង។
ឯកឧត្តមអ៊ាងសុផល្លែត ជំនួយការសម្តេចតេជោនាយករដ្ឋមន្រ្តី បានឲ្យដឹងថា ក្នុងពេលទទួលជួបពិភាក្សាការងារជាមួយឯកឧត្តមហ៊ុយហ្គូស្វៃរី(HugoSwire)នៅវិមានសន្តិភាពសម្តេចតេជោនាយករដ្ឋមន្រ្តីបានសំដែងនូវការរីករាយចំពោះទំនាក់ទំនងល្អនៃប្រទេសទាំងពីរពិសេសការកើនឡើងនូវទំហំពាណិជ្ជកម្មដោយសម្តេចបានមានប្រសាសន៍លើកទឹកចិត្តថាប្រទេសទាំងពីរគប្បីខិតខំរកចំណុចដទៃទៀតដើម្បីធ្វើការទាក់ទាញអ្នកវិនិយោគឲ្យបានកាន់តែច្រើនពីចក្រភពអង់គ្លេសមកកាន់កម្ពុជា ។
សម្តេចតេជោបានថ្លែងអំណរគុណចំពោះរាជរដ្ឋាភិបាលនិងប្រជាជនចក្រភពអង់គ្លេសដែលបានជួយដល់កម្ពុជាលើវិស័យដោះមីនជាពិសេសទៅលើសាលាក្តីខ្មែរក្រហមនិងបានស្នើសុំឲ្យបន្តសហការជួយដល់កម្ពុជាលើវិស័យអភិវឌ្ឍន៍ធនធានមនុស្សដែលជាវិស័យអាទិភាពរបស់រាជរដ្ឋាភិបាលកម្ពុជាផងដែរ។
នៅក្នុងជំនួបនោះឯកឧត្តមហ៊ុយហ្គូស្វារី(HugoSwire)បានមានប្រសាសន៍ឲ្យដឹងពីចេតនាល្អយ៉ាងខ្លាំងចំពោះកម្ពុជាដោយឯកឧត្តមហ៊ុយហ្គូស្វារី(HugoSwire)បានពិភាក្សាជាមួយអ្នកវិនិយោគអង់គ្លេសនៅកម្ពុជាដែលពួកគេមានជំនឿជឿជាក់យ៉ាងខ្លាំងជាមួយរាជរដ្ឋាភិបាលកម្ពុជាដែលជំនឿជាក់នេះនឹងនាំមកនូវអ្នកវិនិយោគថែមទៀតមកកាន់កម្ពុជា។ ឯកឧត្ដមអ៊ាងសុផល្លែតឲ្យដឹងទៀតថាឯកឧត្តម Hugo Swire បានជម្រាបជូន សម្តេចនាយក រដ្ឋមន្រ្តីថា ចក្រភពអង់គ្លេសនឹងផ្តល់ថវិកាប្រមាណ ៥០ ម៉ឺនផោនបន្ថែមទៀតដើម្បីជួយដល់សាលាក្តីខ្មែរក្រហមហើយនឹងបន្តជួយដល់កម្ពុជាលើវិស័យដោះមីននិងយុទ្ធភណ្ឌមិនទាន់ផ្ទុះផងដែរ។
សូមបញ្ជាក់ថាកន្លងមកចក្រភពអង់គ្លេសបានផ្ដល់ជំនួយយ៉ាងច្រើនដល់កម្ពុជាដោយផ្ដោតទៅលើវិស័យសុខាភិបាលការកាត់បន្ថយភាពក្រីក្រសិទ្ធិមនុស្ស និងលទ្ធិប្រជាធិបតេយ្យ ព្រមទាំង អភិបាលកិច្ចល្អ ដោយចាប់ពីឆ្នាំ ២០១០ ដល់ឆ្នាំ ២០១២ ដែលមានទឹកប្រាក់ជាង ៦០ លាន ដុល្លារសហរដ្ឋអាម៉េរិក ។ ជំនួយសម្រាប់សាលាក្ដីខ្មែរក្រហមចាប់តាំងពីឆ្នាំ ២០០៦ ដល់ឆ្នាំ២០១៣ មានទឹកប្រាក់ជិត ៧ លានដុល្លារសហរដ្ឋអាម៉េរិកនោះ ។
ក្នុងឆ្នាំ ២០១៣ កន្លងមកនេះ ទំហំពាណិជ្ជកម្មរវាងប្រទេសទាំងពីរកម្ពុជា-ចក្រភពអង់គ្លេសគឺមានប្រមាណជាង ៧៤២ លានដុល្លារសហរដ្ឋអាម៉េរិក ដែលក្នុងនោះកម្ពុជានាំចេញទៅចក្រភពអង់គ្លេសច្រើនជាងកម្ពុជានាំចូលពីចក្រភពអង់គ្លេស។
No comments:
Post a Comment