ឯកឧត្តម កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី មានប្រសាសន៍ឲ្យដឹងកាលពីរសៀលថ្ងៃទី១៧ ខែធ្នូ ឆ្នាំ ២០១៣ ថា ដំណើរទស្សនកិច្ចផ្លូវការរបស់សម្តេចអគ្គមហាសេនាបតីតេជោ ហ៊ុន សែន នៅរាជាណាចក្រជប៉ុន ទទួលបានផលផ្លែផ្កាយ៉ាងត្រចះត្រចង់ ដោយរដ្ឋាភិបាលទាំងពីរកម្ពុជា-ជប៉ុន ឯកភាពក្នុងការតម្លើងឋានៈទំនាក់ទំនងទ្វេភាគីជាដៃគូយុទ្ធសាស្រ្ត។
នៅក្នុងសន្និសីទសារព័ត៌មាននៅអាកាសយានដ្ឋានអន្តរជាតិភ្នំពេញ បន្ទាប់ពីការធ្វើមាតុភូមិនិវត្តន៍ដោយសុវត្ថិភាពរបស់ប្រតិភូជាន់ខ្ពស់នៃរាជរដ្ឋាភិបាលកម្ពុជា ដឹកនាំដោយសម្តេចតេជោនាយករដ្ឋមន្រ្តី ពីប្រទេសជប៉ុន ឯកឧត្តម កៅ គឹមហួន បានមានប្រសាសន៍ឲ្យដឹងថា សម្តេចតេជោនាយករដ្ឋមន្រ្តី និងឯកឧត្តម ស៊ិនហ្សូ អាបេ នាយករដ្ឋមន្រ្តីជប៉ុន បានឯកភាពគ្នាក្នុងការកំណត់ភាពជាដៃគូយុទ្ធសាស្រ្ត និងបានជំរុញការផ្លាស់ប្តូរកិច្ចសហប្រតិបត្តិការលើវិស័យយោធា រវាងប្រទេសទាំងពីរ ដែលកិច្ចសហប្រតិបត្តិការទាំងពីរនេះមិនធ្លាប់មានពីមុនមកទេ។
ឯកឧត្តមនាយករដ្ឋមន្រ្តីជប៉ុន ក៏បានឯកភាពតាមសំណើរបស់សម្តេចតេជោក្នុងការបញ្ជូនក្រុម ការងារបច្ចេកទេសជប៉ុនមក ដើម្បីសិក្សាក្នុងការជួយកែទម្រង់ប្រព័ន្ធបោះឆ្នោត និងបានឯក ភាពបន្តជួយដល់តុលាការកាត់ទោសអតីតមេដឹកនាំខ្មែរក្រហម (អវតក) ផងដែរ។ រដ្ឋាភិបាលជប៉ុនក៏បានឯកភាពទៅដល់ការជួយបណ្តុះបណ្តាលកម្មករកម្ពុជាអាចធ្វើការងារផ្នែកផលិតកម្ម និងខាងធុរកិច្ចផងដែរ ដោយសារថា សព្វថ្ងៃនេះមានអ្នកវិនិយោគជប៉ុនជាច្រើន បាន និងកំពុងមកបណ្តាក់ទុនជាបន្តបន្ទាប់នៅកម្ពុជា ដែលបញ្ហានេះ បានធ្វើឡើងតាមសំណើរបស់សម្តេចតេជោនាយករដ្ឋមន្រ្តី ក្នុងដំណើរទស្សនកិច្ចរបស់ឯកឧត្តមនាយករដ្ឋមន្រ្តីជប៉ុនមកកាន់កម្ពុជាកាលពីខែវិច្ឆិកា។
ឯកឧត្តម កៅ គឹម ហួន បានបញ្ជាក់ថា រដ្ឋាភិបាលទាំងពីរបានឯកភាពគ្នាលើការសម្រួលទិដ្ឋាការសម្រាប់ប្រជាពលរដ្ឋ នៃប្រទេសទាំងពីរ (ជប៉ុន-កម្ពុជា) ដើម្បីជំរុញធ្វើយ៉ាងណាឲ្យ ប្រជាពលរដ្ឋអាចធ្វើដំណើរទៅវិញទៅមក ជាពិសេសទេសចរជប៉ុនអាចមកកាន់កម្ពុជាកាន់តែច្រើនឡើង។ ចំពោះការហោះហើរវិញរដ្ឋាភិបាលជប៉ុន បានឯកភាពនៅក្នុងការធ្វើការចរចាទៅលើអាកាសចរណ៍ស៊ីវិលនេះ ក្នុងទិសដៅឲ្យមានការហោះហើរត្រង់ពីប្រទេសជប៉ុនមកកាន់កម្ពុជានៅពេលខាងមុខនេះ។ ពាក់ព័ន្ធនឹងការផ្លាស់ប្តូរ ឬការពិគ្រោះយោបល់នេះ ភាគីទាំងពីរមានយន្តការរួចហើយ គឺកម្រិតឧត្តមមន្រ្តី ដែលនឹងធ្វើការជាបន្តបន្ទាប់រវាងប្រទេសទាំងពីរ ដែលនឹងមានការប្រជុំជាទៀងទាត់។
ឯកឧត្តមរដ្ឋមន្ត្រីប្រតិភូអមនាយករដ្ឋមន្ត្រីបានឲ្យដឹងថា សម្តេចតេជោបានស្នើធ្វើយ៉ាងណាឲ្យប្រជាពលរដ្ឋកម្ពុជា អាចទៅធ្វើការបាននៅប្រទេសជប៉ុន ដែលនេះជាសំណើមួយត្រូវបានភាគីជប៉ុនយកទៅពិចារណា។
ឯកឧត្តម កៅ គឹមហួន មានប្រសាសន៍ថា ក្នុងដំណើទស្សនកិច្ចនេះមានឯកសារសំខាន់ៗ ចំនួន៤ ត្រូវចុះហត្ថលេខា ក្នុងនោះទី ១ លិខិតប្តូរសារ ស្តីពីគម្រោងកែលម្អផ្លូវជាតិលេខ១ ទី ២ លិខិតប្តូរសារស្តីពីគម្រោងការធ្វើឲ្យប្រសើរឡើងនូវមន្ទីរពេទ្យបង្អែកខេត្តព្រះសីហនុ ទី៣ លិខិតប្តូរសារស្តីពីគម្រោងកែលម្អសម្ភារសម្រាប់ការជួសជុលស្ពានហាលខាងលិច នៃប្រាសាទអង្គរវត្ត ដែលចុះហត្ថលេខារវាងឯកឧត្តម ឡុង វិសាលោ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិជាមួយ ឯកឧត្តម គូម៉ាម៉ារូ យូជី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា និងទី៤ អនុស្សរណៈស្តីពីការផ្លាស់ប្តូរ និងកិច្ចសហប្រតិបត្តិការយោធារវាងក្រសួងការពារជាតិជប៉ុន និងក្រសួងការពារជាតិនៃព្រះរាជាណាចក្រកម្ពុជា ដែលចុះហត្ថលេខារវាងឯកឧត្តម នាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិនៃព្រះរាជាណាចក្រកម្ពុជា ជាមួយឯក ឧត្តម អីស៊ួណូរី អូណូដេរ៉ា (Itsunori ONODERA) រដ្ឋមន្រ្តីការពារជាតិជប៉ុន។
ឯកឧត្តម កៅ គឹមហួន បានឲ្យដឹងថា ឯកឧត្តមនាយករដ្ឋមន្រ្តីជប៉ុនបានថ្លែងអំណរគុណចំពោះសម្តេចតេជោនាយករដ្ឋមន្ត្រី ដែលបានជួយជំរុញធ្វើយ៉ាងណាឲ្យកិច្ចប្រជុំកំពូលរំលឹកខួបអនុស្សាវរីយ៍អាស៊ាន-ជប៉ុនលើកទី៤០ បានទទួលជោគជ័យ ហើយដោយសារកម្ពុជា ជាប្រទេសសម្របសម្រួលអាស៊ាន-ជប៉ុននោះ សម្តេចតេជោបានចាត់ទុកទស្សនកិច្ចរបស់ឯកឧត្តមនាយករដ្ឋមន្រ្តីជប៉ុននៅកម្ពុជា និងទស្សនកិច្ចរបស់សម្តេចនៅប្រទេសជប៉ុននេះ គឺបានបញ្ជាក់ អំពីការពង្រឹងនូវទំនាក់ទ្វេភាគីរវាងកម្ពុជា-ជប៉ុន ជាពិសេសដោយសារ ឆ្នាំនេះជាខួបទី៦០ ឆ្នាំនៃការបង្កើតទំនាក់ទំនងការទូតរវាងប្រទេសទាំងពីរ។
ក្នុងឱកាសអញ្ជើញទៅធ្វើទស្សនកិច្ច នៅខេត្តក្យូតូ សម្តេចតេជោនាយករដ្ឋមន្ត្រីបានជំរុញឲ្យខេត្តនេះ ចងសម័្ពន្ធភាពជាមួយខេត្តសៀមរាបនៃព្រះរាជាណាចក្រកម្ពុជា។ មូលហេតុត្រូវបានសម្តេចតេជោមានប្រសាសន៍បញ្ជាក់ថា ខេត្តសៀមរាបក៏ជាអតីតរាជធានីរបស់កម្ពុជា រីឯខេត្តក្យូតូក៏ជាអតីតរាជធានីរបស់ជប៉ុន មិនតែប៉ុណ្ណោះខេត្តសៀមរាបមានបេតិកភណ្ឌពិភពលោក ហើយខេត្តក្យូតូក៏ជាខេត្តដែលមានបេតិកភណ្ឌដែរ ដូច្នេះខេត្តទាំងពីរគួរតែអាចចងសម្ព័ន្ធភាពជាមួយគ្នាបាន។
ឯកឧត្តម កៅ គឹមហួន បានមានប្រសាសន៍ឲ្យដឹងថា សម្តេចតេជោបានឯកភាពជាមួយឧត្តមនាយករដ្ឋមន្រ្តីជប៉ុន អំពីការហោះហើរត្រង់ (ជប៉ុន-កម្ពុជា) ដែលតាមរយៈនៃការហោះហើរនេះវារឹតតែនឹងជំរុញការផ្លាស់ប្តូរវប្បធម៌ និងទេសចររវាងខេត្តសៀមរាប និងខេត្តក្យូតូបានល្អ៕
No comments:
Post a Comment