ទស្សនៈវិភាគ៖
ដោយ ពង្ស សុក្រឹត្យ
ដើម្បីយុត្តិធម៌ជូនម្ចាស់ឆ្នោត
ឬដើម្បីអំណាច?
វាគឺជារឿងមួយដែលចម្លែក
ខុសពីប្រទេសដែលប្រកាន់លទ្ធិប្រជាធិបតេយ្យនានា លើពិភពលោក
ដោយសារតែគណបក្សជំទាស់នៅកម្ពុជា លើកយកការទាមទារឲ្យមានការបោះឆ្នោតឡើងវិញ
មកតវ៉ាជាប្រធានបទថ្មី នៅពេលដែលការបោះឆ្នោត និងលទ្ធផលឆ្នោត ត្រូវបានដោះស្រាយចប់សព្វគ្រប់ដោយស្ថាប័នជាតិកំពូលៗ
រួមមាន គណៈកម្មា ធិការជាតិរៀបចំការបោះឆ្នោត ( គ ជ ប ) និង
ក្រុមប្រឹក្សាធម្មនុញ្ញ រួចហើយក្តី។ បើគិតមកទល់ពេលនេះ គឺមានរយៈពេលជាង ៣ខែ ទៅហើយ
ក្រោយពីថ្ងៃប្រកាសលទ្ធផលផ្លូវការ ។ បញ្ហា គឺគណបក្សជំទាស់
មានជំហរ និងឆន្ទៈ មិនប្រាកដប្រជាទាល់តែសោះ ក្នុងការចរចា
ដើម្បីរកដំណោះស្រាយ បើទោះបីជាបក្សកាន់អំណាចបានបន្ទន់ឥរិយាបទ ក្នុងការកែទម្រង់ប្រព័ន្ធបោះឆ្នោតសម្រាប់អាណត្តិខាងមុខហើយក៏ដោយ។
ចំណុចនេះហើយ ដែលធ្វើឲ្យប្រជាពលរដ្ឋ និងអ្នកតាមដានស្ថានការណ៍នយោបាយ
ដែលមានជំហរជាកណ្តាលនៅកម្ពុជា គិតឡើងវិលក្បុងតាមមិនទាន់។
ចំពោះបញ្ហានេះ
បើយើងក្រឡេកមើលអំពីប្រវត្តិ នៃចរឹតរបស់បក្សជំទាស់ កាលពីមុនបោះឆ្នោត
បានអះអាងថា នឹងមិនចូលរួមចុះឈ្មោះបោះឆ្នោតទេ បើ ស្ថាប័ន គ ជ ប
មិនមានការផ្លាស់ប្តូរ ឬបើមិនមានការចុះឈ្មោះបោះឆ្នោតឡើងវិញទេ។ ពេលនោះអ្នកវិភាគបានយល់ថា
វាជាការត្រឹមត្រូវដែលបក្សជំទាស់ធ្វើពហិកា បែបនេះ។ ប៉ុន្តែ
លុះដល់ថ្ងៃ ចុងក្រោយនៃការចុះឈ្មោះ
ក៏ស្រាប់តែមកចុះឈ្មោះចូលរួមប្រកួតប្រជែងការបោះឆ្នោតនឹងគេដែរ
ដែលធ្វើឲ្យចំនួនគណបក្សនយោបាយប្រកួតប្រជែង ឡើងដល់ចំនួន ៨ គណបក្សនយោបាយ។
ចំណុចនេះចង់បញ្ជាក់ថា រាល់គណបក្សនយោបាយ ដែលបានចុះបញ្ជីឈ្មោះ
ចូលរួមប្រកួតប្រជែងការបោះឆ្នោត គឺមានន័យថា ព្រមទទួលស្គាល់
ស្ថាប័នច្បាប់ ដែលមាន គ ជ ប និងក្រុមប្រឹក្សាធម្មនុញ្ញ ជាអាជ្ញាកណ្តាល
សម្រាប់ការប្រកួតរួចទៅហើយ ប៉ុន្តែក្រោយការប្រកាសលទ្ធផលឆ្នោត បក្សជំទាស់ដែលចាញ់ឆ្នោតបែរជាមិនទទួលស្គាល់លទ្ធផល
ហើយថែមទាំងចោទប្រកាន់ថា ស្ថាប័នអាជ្ញាកណ្តាលនេះ មិនអព្យាក្រឹត្យទៅវិញ។
អញ្ចឹង បើអ្នកដែលចាញ់ការបោះឆ្នោត មិនទទួលស្គាល់លទ្ធផល ពេលនោះ ជម្លោះនឹងគ្មានទីបញ្ចប់ឡើយ
ហើយអ្នកដែលរងគ្រោះ គឺប្រជាពលរដ្ឋ និងសង្គមខ្មែរ
នឹងក្លាយជាចំណាប់ខ្មាំង របស់បក្សនយោបាយដែលចាញ់ ហើយទីបំផុត សង្គម
និងសេដ្ឋកិច្ចរបស់ប្រទេស ជាពិសេសជីវភាពរបស់ប្រជាពលរដ្ឋ កាន់តែក្រីក្រថែមទៀតជាមិនខាន។
ចំណុចមួយទៀត
គឺក្រោយពីមានជំនួបកំពូលរវាងអ្នកនយោបាយ កាលពីថ្ងៃទី ១៦ ខែកញ្ញា ឆ្នាំ២០១៣ បក្សជំទាស់បានព្រមព្រៀងគ្នាលើចំនុចអាទិភាព៣
សម្រាប់ដោះស្រាយបញ្ហារបស់ជាតិ ក្នុងនោះរួមមាន៖ ទី១ គណបក្សទាំងពីរប្តេជ្ញា
អនុវត្តដោយហ្មត់ចត់តាមព្រះរាជសាររបស់ព្រះមហាក្សត្រ
ដែលបានអំពាវនាវដល់ជនរួមជាតិទាំងមូលឲ្យមានការអត់ធ្មត់ជាអតិបរិមា
ដើម្បីបញ្ចៀសអស្ថិរភាពនៃជាតិ ព្រមទាំងរក្សាភាពថ្លៃថ្នូរ
និងភាពស្ងប់ស្ងៀម ដើម្បីទុកឱកាសរកដំណោះស្រាយបញ្ហាជាតិទាំងអស់គ្នា។
ទី២ បក្សទាំងពីរក៏បានព្រមព្រៀងគ្នាផងដែរថា នឹងបង្កើតយន្តការមួយដើម្បីកែទម្រង់ការបោះឆ្នោតនាពេលខាងមុខ។ ទី៣ គណបក្សនយោបាយទាំងពីរ នឹងបន្តជួបចរចាគ្នាតទៅទៀត តាមគ្រប់កម្រិតដើម្បីដោះស្រាយបញ្ហារបស់ជាតិ។
ប៉ុន្តែ រហូតមកដល់ពេលនេះ
បក្សជំទាស់មិនបានអនុវត្តតាមព្រះរាជតំរិៈព្រះមហាក្សត្រឡើយ។ ទី១
គឺមេបក្សបែរជាដឹកនាំធ្វើបាតុកម្ម ដោយហែរក្បួនយ៉ាងអាណាធិបតេយ្យក្នុងទីក្រុង
ទីប្រជុំជន និងនៅតាមបណ្តាខេត្តនានា បង្កចលាចលក្នុងសង្គម
ដែលផ្ទុយពីព្រះរាជសាររបស់ព្រះមហាក្សត្រទាំងស្រុង។
ទាក់ទងនឹងការកែទម្រង់ការបោះឆ្នោតនាពេលខាងមុខ គណបក្សជំទាស់ បែរជាទាមទារឲ្យមានការបោះឆ្នោតឡើងវិញ
ហើយបែរជាស្រែកសុំឲ្យឆាចោលការបោះឆ្នោត របៀបដូចជាល្បែងស៊ីសងទៅវិញ។
នយោបាយដែលគ្មានគោលការណ៍ច្បាស់លាស់
ធ្វើតាមអារម្មណ៍រវើរវាយ ម្តងគិតឃើញចង់ធ្វើនេះ ម្តងគិតឃើញចង់ធ្វើនោះ
តាមតែអំពើចិត្តបែបនេះ បានធ្វើឲ្យប្រជាពលរដ្ឋ
និងអ្នកតាមដានស្ថានការណ៍នយោបាយ ដែលមានជំហរជាកណ្តាលនៅកម្ពុជា បានរិះគន់ត្រង់ៗចំពោះមេដឹកនាំបក្សប្រឆាំងថា កំពុងលេងល្បែងនយោបាយប្រកបដោយគ្រោះថ្នាក់ចំពោះខ្លួនឯង។
គ្រោះថ្នាក់នោះ គឺការភ្លេចគិតអំពីផលវិបាកត្រឡប់មកពួកខ្លួនវិញ
ឬក៏អាចនឹងកើតមានឡើងនូវបញ្ហាធ្ងន់ធ្ងរដល់ប្រជាពលរដ្ឋដែលគាំទ្រខ្លួន
នៅពេលដែលសកម្មភាពនៃបាតុកម្មតវ៉ា
ឈានដល់បទល្មើសព្រហ្មទណ្ឌ បទល្មើសកុបកម្ម តាមរយៈអំពើញុះញង់ បះបោរ ចលាចល ប៉ះពាល់ដល់សណ្តាប់ធ្នាប់សាធារណៈ
និងសន្តិសុខជាតិ ខណៈដែលអាជ្ញាធរមានសមត្ថកិច្ចអនុវត្តវិធានការច្បាប់។
ដូច្នេះ ការទាមទារ តាមអំពើចិត្ត របៀបឡាំប៉ា
ឲ្យមានការបោះឆ្នោតឡើងវិញបែបនេះ គឺមិនអាចធ្វើឲ្យជម្លោះនយោបាយបញ្ចប់បាននោះទេ។
ប្រការដែលគណបក្សទាំងពីរ ត្រូវគិត គឺផលប្រយោជន៍ជាតិជាធំ។
គឺមានតែការងាកមករកតុចរចាគ្នាតែប៉ុណ្ណោះ ទើបអាចរកដំណោះស្រាយ
និងរួបរួមគ្នា កសាងជាតិបាន។ ការទាមទារអំណាច
តាមបែបផ្តួលរំលំដោយការធ្វើបដិវត្តន៍ប្រជាជន គឺមិនអាចទៅរួចដូចបណ្តាប្រទេសនៅអារ៉ាប់ឡើយ
ពីព្រោះកម្ពុជាធ្លាប់បានឆ្លងកាត់នូវសង្គ្រាមវិនាសកម្ម
រាប់ទស្សវត្សកន្លងមកហើយ ។ យើងមិនចង់ឃើញប្រទេសយើង ជួបនូវវិបត្តិនោះសារជាថ្មីទៀតឡើយ៕
No comments:
Post a Comment