រដ្ឋបាលរាជធានីភ្នំពេញ ជូនដំណឹង ស្ដីពី ការបញ្ចៀសចរាចរយានយន្ដគ្រប់ប្រភេទ ជាបណ្ដោះអាសន្ន ក្នុងពិធីបើក និងពិធីបិទព្រឹត្ដិការណ៍ប្រកួតកីឡាអាស៊ានប៉ារ៉ាហ្គេម

 រដ្ឋបាលរាជធានីភ្នំពេញ នៅថ្ងៃទី២៩ ខែឧសភា ឆ្នាំ២០២៣នេះ បានចេញសេចក្ដីជូនដំណឹង ស្ដីពី ការបញ្ចៀសចរាចរយានយន្ដគ្រប់ប្រភេទ ជាបណ្ដោះអាសន្ន ក្នុងពិធីបើក និងពិធីបិទព្រឹត្ដិការណ៍ប្រកួតកីឡាអាស៊ានប៉ារ៉ាហ្គេម លើកទី១២ ឆ្នាំ២០២៣ នៅពហុកីឡាដ្ឋានជាតិមរតកតេជោ។

ខាងក្រោមនេះ ជាសេចក្ដីជូនដំណឹង របស់រដ្ឋបាលរាជធានីភ្នំពេញ

ព្រះមហាក្សត្រ បានយាងចាកចេញពីកម្ពុជាហើយ ដើម្បីបំពេញព្រះរាជទស្សនកិច្ចផ្លូវរដ្ឋ នៅប្រទេសឥណ្ឌា

  នៅព្រឹកថ្ងៃ​ទី២៩ ខែឧសភា ឆ្នាំ២០២៣នេះ ព្រះករុណា ព្រះបាទ សម្តេចព្រះបរមនាថ នរោ​ត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានយាង​ចាកចេញពីកម្ពុជាហើយ ដើម្បីបំពេញ​ព្រះរាជ​ទស្សនកិច្ចផ្លូវរដ្ឋនៅប្រទេសឥណ្ឌា។

ព្រះរាជដំណើរបំពេញព្រះរាជទស្សនកិច្ច របស់ព្រះករុណាជាអម្ចាស់ជីវិតលើត្បូង នៅប្រទេសឥណ្ឌានាពេលនេះ មានរយៈពេល៣ថ្ងៃ ចាប់ពីថ្ងៃទី២៩ ដល់ថ្ងៃទី៣១ខែឧសភា ឆ្នាំ២០២៣ តបតាមការរបស់លោកស្រី ដ្រៅផាឌី មួរមូ ប្រធានាធិបតីឥណ្ឌា។

ព្រះរាជដំណើរទស្សនកិច្ចរបស់ព្រះមហាក្សត្រខ្មែរ នៅប្រទេសឥណ្ឌានាពេលនេះ ចំពេលដែលប្រទេសទាំងពីរ កំពុងអបអរសាទរខួបអនុស្សាវរីយ៍លើកទី៧០ នៃការបង្កើតទំនាក់ទំនងការទូត។

បើតាមក្រសួងការបរទេសកម្ពុជាបានឱ្យដឹងថា ក្នុងកំលុងពេលនៃព្រះរាជទស្សនកិច្ចនេះ លោកស្រី ដ្រៅផាឌី មួរមូ ប្រធានាធិបតីឥណ្ឌា និងលោក ណារិនដ្រា ម៉ូឌី (Narendra Modi) នាយករដ្ឋមន្ត្រីឥណ្ឌា នឹងទទួលរៀបចំព្រះរាជពិធីសវនាការថ្វាយព្រះករុណា ព្រះបាទសម្តេចព្រះបរមនាថ នរោត្តម សីហមុនី ដែលក្នុងឱកាសនោះ កិច្ចសហប្រតិ​បត្តិការ​ទ្វេភាគី និងពហុភាគី នឹងត្រូវលើកយកមកពិភាក្សា។

ព្រះករុណា ព្រះបាទសម្តេចព្រះបរមនាថ នរោត្តម សីហមុនី សព្វព្រះរាជហឫទ័យ ព្រះបរ​ម​​រាជានុញ្ញាត ជូនលោក ច៉ាកឌីប ដាន់ខា (Jagdeep Dhankhar) អនុប្រធានាធិបតី និងលោកបណ្ឌិត ស៊ូប្រាម៉ាន់យ៉ាំ ចៃហ្សានកា (Subrahmanyam Jaishankar) រដ្ឋមន្ត្រីការបរទេសឥណ្ឌា ចូលក្រាបបង្គំគាល់ និងសវនាការផងដែរ។

ព្រះករុណា ព្រះបាទសម្តេចព្រះបរមនាថ នរោត្តម សីហមុនី នឹងយាងដាក់កម្រងផ្កា​គោ​រព​វិញ្ញាណក្ខន្ធនៅមណ្ឌប Mahatma Gandhi។ លោកស្រី ដ្រៅផាឌី មួរមូ ប្រធានាធិបតី​ឥណ្ឌា នឹងរៀបចំព្រះរាជពិធីលៀងសាយភោជន៍ផ្លូវរដ្ឋ ថ្វាយព្រះករុណា ព្រះបាទសម្តេច​ព្រះបរមនាថ នរោត្តម សីហមុនី ជាទីគោរពសក្ការៈដ៏ខ្ពង់ខ្ពស់បំផុត។

ព្រះរាជទស្សនកិច្ចផ្លូវរដ្ឋរបស់ព្រះករុណា ព្រះបាទសម្តេចព្រះបរមនាថ នរោត្តម សីហ​មុនី នៅប្រទេសឥណ្ឌា គឺជាព្រឹត្តិការណ៍ដ៏មានសារសំខាន់មួយក្នុងទំនាក់ទំនង​ដ៏យូរអង្វែង​រវាង​ប្រទេសទាំងពីរ ព្រមទាំងរួមចំណែកក្នុងការធ្វើឱ្យកាន់តែស៊ីជម្រៅ​នូវចំណងមិត្តភាព​ដ៏​ប្រ​សើរ និងកិច្ចសហប្រតិបត្តិការដ៏ជិតស្និទ្ធដែលចាក់ឫស​យ៉ាងជ្រៅនៅក្នុងបេតិក​ភណ្ឌ​វប្ប​ធម៌ សាសនា និងប្រវត្តិសាស្ត្ររួម ដើម្បីជាប្រយោជន៍ទៅវិញទៅមកសម្រាប់​ប្រជា​ជនទាំងពីរ៕

គណបក្សប្រជាជនកម្ពុជា មានលេខរៀងទី១៨ សម្រាប់ប្រកួតប្រជែងក្នុងការបោះឆ្នោតជ្រើសតាំងតំណាងរាស្រ្ត អាណត្តិទី៧, ខាងក្រោមនេះជាបញ្ជីលំដាប់លេខរៀងនៃគណបក្សទាំងអស់

 គណបក្សប្រជាជនកម្ពុជា បានទទួលលេខរៀងទី១៨ សម្រាប់ប្រកួតប្រជែង ក្នុងការបោះឆ្នោតជ្រើសតាំងតំណាងរាស្ត្រ អាណត្តិទី៧ ក្នុងខែកក្កដា ឆ្នាំ២០២៣ ខាងមុខនេះ។

ការចាប់ឆ្នោតកំណត់លំដាប់លេខរៀង ឈ្មោះគណបក្សនយោបាយឈរឈ្មោះបោះឆ្នោតលើសន្លឹកឆ្នោតសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ត្រូវបានរៀបចំដោយ គណៈកម្មាធិការជាតិរៀបចំការបោះឆ្នោត (គ.ជ.ប) នៅព្រឹកថ្ងៃទី២៩ ខែឧសភា ឆ្នាំ២០២៣នេះ ក្រោមព្រះវត្តមានសម្តេចសង្ឃរាជទាំងពីរគណៈ ព្រមទាំងមានការចូលរួមពី សំណាក់តំណាងគណបក្សនយោបាយទាំង១៨ ដែលបានចុះបញ្ជីនៅ គ.ជ.ប រួចរាល់។

ខាងក្រោមនេះជាលំដាប់លេខរៀងគណបក្សនយោបាយ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧៖

១៖ សំបុកឃ្មុំ
២៖ គណបក្សខ្មែរតែមួយ
៣៖ សញ្ជាតិកម្ពុជា
៤៖ ខ្មែររួបរួមជាតិ
៥៖ កម្លាំងប្រជាធិបតេយ្យ
៦៖ កសិករ
៧៖ ស្រ្តីដើម្បីស្ត្រី
៨៖ គណបក្សខ្មែរឈប់
៩៖ ហ្វ៊ុនស៉ិនប៉ិច
១០៖ ធម្មាធិបតេយ្យ
១១៖ គណបក្សមូលដ្ឋាន
១២៖ បំណងប្រជាពលរដ្ឋ
១៣៖ គណបក្សខ្មែរអភិវឌ្ឍន៍សេដ្ឋកិច្ច
១៤៖ ឯកភាពជាតិខ្មែរ
១៥៖ ខ្មែរអភិរក្ស
១៦៖ យុវជនកម្ពុជា
១៧៖ ជនជាតិដើមប្រជាធិបេតយ្យ
១៨៖ គណបក្សប្រជាជនកម្ពុជា

វិភាគអន្តរជាតិ៖ តើជប៉ុន នឹងបាញ់កម្ទេចមីស៊ីលបាលិស្ទីគកូរ៉េខាងជើង ឬ?

 

(តូក្យូ)៖ ក្រសួងការពារជាតិជប៉ុន នៅថ្ងៃចន្ទ ទី២៩ ខែឧសភានេះ បានចេញបទបញ្ជាមួយឱ្យកងកម្លាំងរបស់ខ្លួន ត្រៀមលក្ខណៈបាញ់កម្ទេចមីស៊ីលបាលិស្ទីគ ឬគ្រាប់រ៉ុក្កែតណាមួយរបស់កូរ៉េខាងជើង ដែលបំពាន ឬគំរាមកំហែងដល់ទឹកដីជប៉ុន។ ការចេញបទបញ្ជានេះកើតមានឡើងតែប៉ុន្មានម៉ោងប៉ុណ្ណោះ បន្ទាប់ពីកូរ៉េខាងជើង បានជូនដំណឹងដល់ទីក្រុងតូក្យូ ពីផែនការបាញ់បង្ហោះផ្កាយរណប ដែលត្រូវបានក្រុមអ្នកវិភាគជឿថាជាផ្កាយរណបស៊ើបការណ៍យោធាដំបូងបំផុតរបស់ទីក្រុងព្យុងយ៉ាង នៅចន្លោះថ្ងៃទី៣១ ខែឧសភា ដល់ថ្ងៃទី១១ ខែមិថុនា។

នៅក្នុងសេចក្ដីថ្លែងការណ៍មួយ ក្រសួងការពារជាតិជប៉ុនបានគូសបញ្ជាក់ដូច្នេះថា «យើងនឹងចាត់វិធានការបំផ្លាញប្រឆាំងនឹងមីស៊ីលបាលិស្ទីគ និងមីស៊ីលដទៃទៀត ដែលបានបំពានចូលទឹកដីរបស់យើង»។

តាមការពិតទៅ ក្រសួងការពារជាតិជប៉ុន បានចេញបញ្ជាបែបនេះតាំងតែពីខែមេសាមកម្ល៉េះ នៅក្រោយមេដឹកនាំកូរ៉េខាងជើង លោក គីម ជុងអ៊ុន បានអំពាវនាវឱ្យយោធារបស់ លោកបាញ់បង្ហោះផ្កាយរណបស៊ើបការណ៍យោធា តាមផែនការដែលត្រូវបានគ្រោងទុក និងបន្ទាប់ពីទីក្រុងព្យុងយ៉ាង បាញ់មីស៊ីលបាលិស្ទីគ ICBM មួយគ្រាប់ហោះរំលង ប្រទេសជប៉ុន។ បើតាមក្រុមអ្នកជំនាញខាងគ្រាប់រ៉ុក្កែត ខុសប្លែកពីការធ្វើតេស្ដបាញ់ មីស៊ីលបាលិស្ទីគ កូរ៉េខាងជើង លើកនេះនឹងបាញ់បង្ហោះផ្កាយរណបទៅកាន់ ទីអវកាស ដែលនេះមានន័យថាគ្រាប់រ៉ុក្កែតនេះអាចនឹងត្រូវបានបាញ់ចេញពីតំបន់ឧបទ្វីបកូរ៉េ ឆ្ពោះទៅទិសខាងត្បូង ដែលនេះបើមានឧប្បត្តិហេតុណាមួយកើតឡើង គ្រាប់រ៉ុក្កែត នេះអាចនឹងធ្លាក់ចំកោះ Nansei នៃខេត្តអូគីណាវ៉ា។

ក្រសួងការពារជាតិជប៉ុន បានឱ្យដឹងថាទីក្រុងតូក្យូ នឹងប្រើប្រាស់ប្រព័ន្ធមីស៊ីល Standard Missile-3 (SM-3) ឬ ប្រព័ន្ធមីស៊ីល Patriot ដើម្បីបាញ់កម្ទេចមីស៊ីល ឬគ្រាប់រ៉ុក្កែតកូរ៉េខាងជើង។ មីស៊ីល Standard Missile-3 ត្រូវបានបំពាក់លើនាវាពិឃាដ Aegis នៃកងកម្លាំងជើងទឹកស្វ័យការពារជប៉ុន ដែលធ្វើប្រតិបត្តិការជុំវិញដែន ទឹកនៃប្រទេស ខណៈប្រព័ន្ធមីស៊ីល Patriot ឬ PAC-3 ត្រូវបានដាក់ពង្រាយនៅផ្នែកខ្លះនៃខេត្តអូគីណាវ៉ា។ មីស៊ីល Standard Missile-3 មានតួនាទីបាញ់ទម្លាក់មីស៊ីល បាលិស្ទីគ នៅខាងក្រៅដែនបរិយាកាស រីឯ PAC-3 មានសមត្ថភាពស្ទាក់ចាប់មីស៊ីលនៅរយៈចម្ងាយ ៣០គីឡូម៉ែត្រ ក្នុងករណីដែលមីស៊ីលសត្រូវអាចទម្លុះប្រព័ន្ធមីស៊ីល Standard Missile-3 ឬជាទូទៅ PAC-3 គេហៅថាខ្សែការពារចុងក្រោយ។

ក្រុមអ្នកវិភាគខ្លះ យល់ថាកន្លងមក ជប៉ុនមានការស្ទាក់ស្ទើរលាយឡំជាមួយការព្រួយបារម្ភ ចំពោះការប៉ុនប៉ង ឬព្យាយាមបាញ់ទម្លាក់មីស៊ីល និងឬគ្រាប់រ៉ុក្កែតពាំផ្កាយរណប របស់កូរ៉េខាងជើង ព្រោះការធ្វើបែបនេះអាចនឹងត្រូវបានកូរ៉េខាងជើងចាត់ទុកថាជាទង្វើប្រកាសសង្រ្គាមដោយបើកចំហ ហើយមិនតែប៉ុណ្ណោះ វាក៏អាចក្លាយជាការបង្ហាញពី សមត្ថភាពចាប់សញ្ញា និងស្ទាក់ចាប់កម្ទេចមីស៊ីលរបស់ជប៉ុន ដែលមេដឹកនាំក្នុងទីក្រុងព្យុងយ៉ាង ទនឹ្ទងរង់ចាំមើលជាយូរណាស់មកហើយ។ ជាឧទាហរណ៍ ប្រសិនបើជោគជ័យ ភាពតានតឹងក្នុងតំបន់អាចនឹងកាន់តែឡើងកម្ដៅ។ តែបើបរាជ័យវិញ នោះអាចនឹងមានផលវិបាកធ្ងន់ធ្ងរ ដោយបើប្រព័ន្ធការពារដែនអាកាសជប៉ុនបរាជ័យក្នុងការស្ទាក់ចាប់ បំផ្លាញគោលដៅ នោះវានឹងបង្កជាការសង្ស័យពីសមត្ថភាពនៃប្រព័ន្ធការពារដែនអាកាសដែលជប៉ុនបានជះលុយយ៉ាងច្រើនសន្ធឹកសន្ធាប់ដើម្បីពង្រឹងសមត្ថភាព ហើយក៏បង្ក ការសង្ស័យដល់ទីក្រុងវ៉ាស៊ីនតោន ឬសម្ព័ន្ធមិត្ត រួមទាំងប្រទេសជាដៃគូដែលកំពុងប្រើប្រាស់ប្រព័ន្ធការពារដែនអាកាស Standard Missile-3 និង PAC-3 ផលិតដោយ សហរដ្ឋអាមេរិក។

តែទោះជាបែបនេះក្ដី លោក Masashi Murano ជាអ្នកវិភាគជាន់ខ្ពស់ម្នាក់មកពីវិទ្យាស្ថាន Hudson មានមូលដ្ឋានក្នុងទីក្រុងវ៉ាស៊ីនតោន ធ្លាប់បានប្រាប់សារព័ត៌មានជប៉ុន Japan Times កាលពីខែមេសាថា ហានិភ័យនៃការផ្ទុះជម្លោះនឹងមិនស្ថិតនៅក្នុងកម្រិតខ្ពស់ឡើយ ដ្បិតការស្ទាក់ចាប់បំផ្លាញមីស៊ីលដោយកងកម្លាំងស្វ័យការពារជប៉ុន ធ្វើឡើងតែនៅក្នុងករណីមានគ្រោះថ្នាក់ណាមួយកើតឡើង ដូចជាគ្រាប់រ៉ុក្កែត ឬកំណាត់គ្រាប់រ៉ុក្កែតធ្លាក់មកចំទឹកដីជប៉ុនវិញតែប៉ុណ្ណោះ។

លោក Murano បានបន្ថែមថាការប៉ុនប៉ងបាញ់ទម្លាក់ឱ្យបានជោគជ័យ គឺអាស្រ័យទៅលើពេលវេលា និងទីតាំងដំឡើងប្រព័ន្ធមីស៊ីល ព្រមទាំងទីតាំងនៃគ្រាប់រ៉ុក្កែតដែលឆេះ អស់ថាមពល។ ពីព្រោះថាទាំង Standard Missile-3 និង PAC-3 មិនអាចស្ទាក់ចាប់បំផ្លាញមីស៊ីល ឬក៏គ្រាប់រ៉ុក្កែត អំឡុងដំណាក់ជំរុញនោះទេ។ «ប្រសិនបើប្រព័ន្ធមីស៊ីល ត្រូវបានដំឡើងនៅទីតាំងដ៏ត្រឹមត្រូវ នោះការស្ទាក់បំផ្លាញអាចនឹងធ្វើទៅរួច។ ក៏ប៉ុន្តែ បទបញ្ជារបស់ក្រសួងការពារជាតិជប៉ុន គឺបញ្ជាត្រឹមតែស្ទាក់ចាប់ក្នុងករណីមីស៊ីល ឬគ្រាប់រ៉ុក្កែតកូរ៉េខាងជើងធ្លាក់ចំទឹកដីជប៉ុន និងអាចបង្កការគំរាមកំហែងដល់ប្រជាជនជប៉ុនតែប៉ុណ្ណោះ។ ឬក៏អាចនិយាយមួយបែបទៀត ប្រសិនបើគ្រាប់រ៉ុក្កែតមិនធ្លាក់ចំទឹកដី ជប៉ុនទេ នោះការស្ទាក់ចាប់បំផ្លាញនឹងមិនត្រូវបានធ្វើឡើងទេ»។ នេះជាការកត់សម្គាល់របស់លោក Murano។

កាលពីថ្ងៃទី១៣ ខែមេសាកន្លងទៅ កូរ៉េខាងជើង បានធ្វើតេស្ដមីស៊ីលបាលិស្ទីគអន្តរទ្វីប ICBM ឥន្ធនៈរឹងថ្មីមួយ ដែលលោក គីម ជុងអ៊ុន ចាត់ទុកថាជារបកគំហើញនៅក្នុង ការអភិវឌ្ឍសមត្ថភាពវាយបកដោយប្រើអាវុធនុយក្លេអ៊ែរ។ ការធ្វើតេស្ដនៅពេលនោះ ក៏បានបង្ខំឱ្យអាជ្ញាធរជប៉ុន ប្រកាសអាសន្នឱ្យប្រជាជនរស់នៅលើកោះហុកកៃដូ រត់រក កន្លែងជ្រកកោនផងដែរ។ ដោយឡែក កាលពីខែមីនាកន្លងទៅ ប្អូនស្រីបង្កើតរបស់លោក គីម ជុងអ៊ុន អ្នកនាង គីម យ៉ូជុង បានចេញមុខធ្វើការព្រមានត្រង់ៗថា ការបាញ់ទម្លាក់អាវុធយុទ្ធសាស្ត្រណាមួយរបស់កូរ៉េខាងជើងពីសំណាក់សហរដ្ឋអាមេរិក ឬក៏ប្រទេសដទៃណាមួយ នៅក្នុងដែនអាកាសអន្តរជាតិ នឹងត្រូវបានចាត់ទុកថា ជាទង្វើប្រកាសសង្រ្គាមជាមួយទីក្រុងព្យុងយ៉ាង។

សម្រាប់អ្នកវិភាគ ដូចជាលោក Murano ការចេញបទបញ្ជារបស់ក្រសួងការពារជាតិជប៉ុន គឺជាការសម្រេចចិត្តខាងនយោបាយ និងដើម្បីកុំឱ្យប្រជាជនជប៉ុនភ័យស្លន់ស្លោរ ជាជាងជាការសម្រេចចិត្តខាងយោធា។ លោក Murano បានគូសបញ្ជាក់ដូច្នេះថា «ដោយសារតែការព្រួយបារម្ភរបស់ប្រជាជននៅលើកោះ Nansei ជាកត្តាមួយជំរុញឱ្យ កងកម្លាំងស្វ័យការពារជប៉ុនត្រូវតែបង្ហាញពីឆន្ទៈការពារ និងធានាសុវត្ថិភាពចំពោះពួកគេ បើទោះជាមានហានិភ័យតិច ឬច្រើនក៏ដោយ...ដូច្នេះខ្ញុំគិតថានេះជាការធានាដល់ ប្រជាជន ក៏ដូចជាការបញ្ជាក់ពីការត្រៀមលក្ខណៈរបស់កងកម្លាំងស្វ័យការពារ»។

ក្រុមអ្នករៀបចំគោលនយោបាយការពារជាតិជប៉ុន បាន និងកំពុងផ្ដោតលើការពង្រឹងប្រព័ន្ធការពារនៅឯតំបន់ដែនកោះស្ថិតនៅភាគនិរតីនៃប្រទេស ដែលនេះជាការត្រៀមទុក បង្ការខ្លាចក្រែងមានផ្ទុះជម្លោះជាមួយចិន ហើយនេះទើបជាគោលដៅចម្បងដែលជប៉ុនកំពុងផ្តោត។ ម្យ៉ាងវិញទៀត ការចេញបញ្ជា និងត្រៀមលក្ខណៈបាញ់ទម្លាក់មីស៊ីល ឬគ្រាប់រ៉ុក្កែតនៅពេលនេះ មានលក្ខណៈស្រដៀងគ្នាទៅនឹងបទបញ្ជាដែលទីក្រុងតូក្យូ បានដាក់ចេញនៅមុនកូរ៉េខាងជើងបាញ់បង្ហោះផ្កាយរណបក្នុងឆ្នាំ២០១២ និងឆ្នាំ២០១៦។

គួរបញ្ជាក់ថា ការប្រកាសពីកាលបរិច្ឆេទបាញ់បង្ហោះផ្កាយរណបរបស់កូរ៉េខាងជើង កើតមានឡើងក្រោយកូរ៉េខាងត្បូង កាលពីពេលថ្មីៗនេះបានប្រកាសពីជោគជ័យ ក្នុងការបាញ់បង្ហោះផ្កាយរណបស៊ីវិល ដោយប្រើប្រាស់គ្រាប់រ៉ុក្កែតផលិតនៅក្នុងស្រុកដំបូងបំផុតរបស់ខ្លួន៕

អ្នកវិភាគចៅចាក់ស្មុក៖ សម្តីសារភាពរបស់ ថេង សាវឿន និងភស្តុតាងនានាជាមេរៀនគ្រប់គ្រាន់សម្រាប់សមាគម និងអង្គការសង្គមស៊ីវិលមួយចំនួនកុំចាញ់បោកជនបរទេស និងក្រុមអ្នកនយោបាយប្រឆាំង ក្បត់ជាតិខ្លួនឯង

(ភ្នំពេញ)៖ ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា CCFC និងបក្ខពួកពីរនាក់ទៀត ត្រូវបានសាលាដំបូងខេត្តរតនគិរីចោទប្រកាន់ពីបទ «រួមគំនិតក្បត់ និងញុះញង់ឲ្យមានការប្រព្រឹត្តបទឧក្រិដ្ឋជាអាទិ៍» នៅថ្ងៃទី២៧ ខែឧសភា បានសារភាពថា «តាំងពីបង្កើតសមាគមនិងធ្វើការរហូតមកដល់ពេលបច្ចុប្បន្ននេះ ខ្លួនបានជឿតាមការចង្អុលរបស់បរទេសមួយចំនួន និងក្រុមនយោបាយប្រឆាំងមួយចំនួន ក្នុងរូបភាពញុះញង់បង្កចលាចលធ្វើឲ្យបាត់បង់ និងប៉ះពាល់សណ្ដាប់ធ្នាប់សង្គម និងសាធារណៈ ប្រមូលផ្ដុំសមាជិក ក្នុងគោលបំណងផ្ដួលរំលំរាជរដ្ឋាភិបាលដោយមិនដឹងខ្លួន»។

ក្រោយពីទទួលស្គាល់កំហុសដែលប្រព្រឹត្តកន្លងមកទាំងឡាយនេះ ថេង សាវឿន បានសន្យាចំពោះមុខច្បាប់ និងអាជ្ញាធរ មានសមត្ថកិច្ចថា នឹងមិនប្រព្រឹត្តសកម្មភាពទាំងឡាយ ដែលខុសពីលក្ខន្ដិកៈតម្កល់នៅក្រសួងមហាផ្ទៃ ច្បាប់សមាគម និងអង្គការមិនមែនរដ្ឋាភិបាល ព្រមទាំងលិខិតបទដ្ឋានគតិយុត្តនានាជាធរមាន។ ថេង សាវឿន ក៏បានសន្យាដកខ្លួនចេញពីសកម្មភាពផ្ទះសាមគ្គីនិងសកម្មភាពនយោបាយ ដែលមានគោលដៅផ្ដួលរំលំរាជរដ្ឋាភិបាលស្របច្បាប់។ នេះគឺជាសម្តីសារភាពដែលចេញពីមាត់ផ្ទាល់របស់ប្រធានអង្គការសមាគមសម្ព័ន្ធសហគមន៍កសិករកម្ពុជា ដែលតែងសកម្មបំផុតក្នុងការកៀរគរប្រមូលផ្តុំមនុស្សតវ៉ាផ្សេងនាពេលកន្លងមក។

បើតាមការពិនិត្យ ប្រសិនបើសមាគមដែលគោរពតាមវិជ្ជាជីវៈ និងស្របតាមលក្ខន្តិកៈរបស់ខ្លួន សមាគមសម្ព័ន្ធសហគមន៍កសិករកម្ពុជា គឺសំដៅលើការបណ្តុះបណ្តាលវិជ្ជាជីវៈបច្ចេកទេសជូនកសិករដើម្បីមានវិជ្ជាជីវៈជំនាញបង្កបង្កើនផល ផលិតនូវផលិតផលកសិកម្មដើម្បីធ្វើឱ្យប្រជាកសិករមានចំណូល និងចូលរួមពង្រឹងសន្តិសុខស្បៀងសម្រាប់ជាតិ។ ប៉ុន្តែផ្ទុយទៅវិញ សកម្មភាពទាំងឡាយរបស់សមាគម រួមនឹងមេដឹកនាំរបស់ខ្លួនគឺ ថេង សាវឿន ជ្រកក្រោមស្លាកអង្គការនេះ មានចរិតញុះញង់តាំងពីការកកើតឡើងម៉្លេះ។ បង្កើតឡើងនៅឆ្នាំ២០១១ សមាគមសម្ព័ន្ធសហគមន៍កសិករកម្ពុជាដឹកនាំដោយ ថេង សាវឿន បានចូលរួមយ៉ាងសកម្មក្នុងការតវ៉ានានាដឹកនាំដោយអតីតគណបក្សសង្គ្រោះជាតិ រហូតដល់ត្រូវចាប់ខ្លួន ចោទប្រកាន់និងផ្តន្ទាទោសនៅដើមឆ្នាំ ២០១៤ ក្រោយចូលរួមអនុវត្តផែនការបដិវត្តន៍ពណ៌ដឹកនាំដោយគណបក្សសង្គ្រោះជាតិ ធ្វើកុបកម្មនៅផ្លូវ វ៉េង ស្រេង។

ក្រោយការដួលរលំនៃអង្គការចាត់តាំងគាំទ្រដោយបរទេស សមាគមសម្ព័ន្ធសហគមន៍កសិករកម្ពុជារួមនឹងសមាគម និងអង្គការមិនមែនរដ្ឋាភិបាលផ្សេងៗទៀតនៅតែបន្តសកម្មភាព ហើយក៏មានអង្គការមួយចំនួនបន្តសកម្មភាពនេះ យ៉ាងសកម្មក្រោមទម្រង់ផែនការចាស់ សកម្មភាពថ្មីដែលក្នុងនោះ គេដឹងថាមានអង្គការសង់ត្រាល់ដឹកនាំដោយ មឿន តុលា សមាគមឯករាជ្យនៃសេដ្ឋកិច្ចក្រៅប្រព័ន្ធដឹកនាំដោយ វន ពៅ អង្គការបណ្តាញយុវជនកម្ពុជា និងអង្គការ និងចលនាខុសច្បាប់មួយចំនួនទៀត។ បណ្តាញសមាគមនិងអង្គការក្រៅរដ្ឋាភិបាលទាំងនេះដែលទទួលបានគោលការណ៍បញ្ជា និងជំនួយហិរញ្ញវត្ថុពីបរទេសបានបង្កើតជាសហភាពផ្ទះសាមគ្គី ដើម្បីធ្វើសកម្មភាពទុច្ចរិតផ្សេងៗក្នុងការឈានទៅការផ្តួលរំលំរាជរដ្ឋាភិបាលកម្ពុជា។

ចរន្តទាំងនេះមិនមានចេតនាចូលរួមអភិវឌ្ឍប្រទេសតាមបែបប្រជាធិបតេយ្យដែលកម្ពុជាកំពុងតែអនុវត្តនោះទេ ប៉ុន្តែពួកគេចង់អភិវឌ្ឍប្រទេសតាមរយៈបដិវត្តន៍ពណ៌ផ្តួលរំលំរដ្ឋាភិបាល ឡើងកាន់អំណាចតាមបែបមិនប្រជាធិបតេយ្យដូចបណ្តាប្រទេសមួយចំនួន ដែលគេប្រើវិធីសាស្ត្របដិវត្តន៍ពណ៌ជោគជ័យ។ ពួកគេបានបង្កហិង្សា កុបកម្ម និងការញុះញង់ បញ្ឆេះកំហឹងវណ្ណៈធ្វើឱ្យបែកបាក់សង្គមជាតិ និងងាយស្រួលឱ្យបរទេសដែលជាចៅហ្វាយនាយរបស់ខ្លួនលូកដៃកកូរកកាយបញ្ហាផ្ទៃក្នុងកម្ពុជាដូចពីអតីតកាល, នាំជាតិនិងប្រជាជនធ្លាក់ចូលក្នុងសោកនាដកម្មសព្វបែបយ៉ាង។

ដើម្បីសម្រេចនូវមហិច្ឆាភូមិសាស្ត្រនយោបាយរបស់ចៅហ្វាយនាយបរទេសរបស់ពួកគេ ពួកគេតែងតែប្រើប្រាស់ខ្លឹមសារដែលមានចរិតបំផុសបំផុលស្អប់ខ្ពើម ចងអាឃាដ ព្យាបាទ ដោយមិនបានឈរនៅលើគោលការណ៍កណ្តាលនោះឡើយ ហើយពួកគេតែងតែលាបពណ៌ដល់រដ្ឋាភិបាល និងលាបពណ៌អង្គការ និងគ្រប់មជ្ឈដ្ឋានគាំទ្ររដ្ឋាភិបាលឱ្យមើលឃើញខ្មៅងងឹត និងជាសត្រូវរហូតមក។

នៅចំពោះមុខនៃគ្រោះថ្នាក់សម្រាប់ជាតិដូច្នេះហើយ ទោះបីជាបញ្ហាខ្លះតូចតាច តែវាពិតជាមានគ្រោះថ្នាក់បំផុតចំពោះជាតិនិងប្រជាជនកម្ពុជា។ ផ្កាភ្លើងតូចមួយក៏អាចនឹងបង្កើតជាអគ្គិភ័យដ៏មហាវិនាសកម្មដែរ។ អ្វីដែលពលរដ្ឋខ្មែរបានឃើញ សមាគមនិងអង្គការមិនមែនរដ្ឋាភិបាលមួយចំនួនដែលតាំងខ្លួនជាអ្នកស្រឡាញ់សិទ្ធិមនុស្ស លទ្ធិប្រជាធិបតេយ្យ សេរីភាពសារព័ត៌មាន​ អ្នកស្រឡាញ់បរិស្ថាននិងធនធានធម្មជាតិ គឺបាននិងកំពុងតែចាញ់បោកបរទេសដែលតែងតែមក និងបំពាក់គំនិតស្មារតីឱ្យពលរដ្ឋខ្មែរក្បត់ជាតិជាតិខ្លួនឯង​ បម្រើភូមិសាស្ត្រនយោបាយរបស់ខ្លួន តាមរយៈការផ្តល់ជំនួយហិរញ្ញវត្ថុ និងការបណ្តុះមនោគមវិជ្ជាផ្សេងៗ លើកទឹកចិត្តឱ្យបំពានច្បាប់ បំផ្លាញសន្តិភាពនិងការអភិវឌ្ឍ និងលើកតម្កើងក្រុមជនល្មើសទៅជាវីបរុស វីរជន។ តែតាមពិតពួកគេបាននិងកំពុងធ្វើវិទ្ធង្សនាប្រឆាំងនឹងកម្ពុជា បំផ្លាញភាពសុខសាន្តរបស់ជាតិ និងប្រជាជនកម្ពុជាប៉ុណ្ណោះ។

ដូច្នេះ សមាគមនិងអង្គការមិនមែនរដ្ឋាភិបាលមួយចំនួន ដែលកំពុងតែលង់ចាញ់បោកឧបាយកលទុច្ចរិតរបស់ជនបរទេស និងអ្នកនយោបាយប្រឆាំងមួយចំនួនគួរភ្ញាក់ខ្លួន និងដើរចេញពីឧបាយកលទុច្ចរិត និងបំផ្លាញជាតិខ្មែរនេះ ដើម្បីកុំឱ្យខកខ្លួន និងប្រឈមមុខច្បាប់ដូចក្រុមជនមួយចំនួន ដែលបានប្រព្រឹត្តខុសច្បាប់ និងភស្តុតាងក៏បានបង្ហាញ សម្តីសារភាពក៏មានថាពួកគេបានធ្វើតាមការចង្អុលបង្ហាញរបស់ជនបរទេស និងក្រុមអ្នកនយោបាយប្រឆាំង។ ក្រុមនយោបាយប្រឆាំងដែល ប្រើល្បិចកលថ្មី នយោបាយចាស់ដើម្បីឱ្យពួកបរទេសជាចៅហ្វាយនាយរបស់ពួកគេគាបសង្កត់និងដាក់សម្ពាធលើកម្ពុជា ដើម្បីផលប្រយោជន៍របស់ពួកគេ៕

ដោយចៅចាក់ស្មុក

រាជធានីភ្នំពេញ, ថ្ងៃទី២៨ ខែឧសភា ឆ្នាំ២០២៣

ព្រះករុណា ព្រះបាទសម្តេចព្រះបរមនាថ នរោត្តម សីហមុនី នឹងយាងបំពេញព្រះរាជទស្សនកិច្ចផ្លូវរដ្ឋនៅសាធារណរដ្ឋឥណ្ឌា

ភ្នំពេញ៖ តបតាមការសូមយាងរបស់លោកជំទាវ ដ្រៅផាឌី មួរមូ (Droupadi Murmu) ប្រធានាធិបតីនៃសាធារណរដ្ឋឥណ្ឌា ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នឹងយាងបំពេញព្រះរាជទស្សនកិច្ចផ្លូវរដ្ឋនៅសាធារណរដ្ឋឥណ្ឌា ពីថ្ងៃទី២៩ ដល់ថ្ងៃទី៣១ ខែឧសភា ឆ្នាំ២០២៣ ខណៈប្រជាជាតិទាំងពីរកំពុងអបអរសាទរខួបអនុស្សាវរីយ៍លើកទី៧០ នៃការបង្កើតទំនាក់ទំនងការទូត។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៦ ខែឧសភា ឆ្នាំ២០២៣។

ក្រសួងការបរទេស និងសហប្រតិបត្តិការអន្តរជាតិបានបន្តថា ក្នុងអំឡុងពេលនៃព្រះរាជទស្សនកិច្ចនេះ លោកជំទាវ ដ្រៅផាឌី មួរមូ ប្រធានាធិបតីនៃសាធារណរដ្ឋឥណ្ឌា និងឯកឧត្ដម ណារិនដ្រា ម៉ូឌី (Narendra Modi) នាយករដ្ឋមន្រ្ដីនៃសាធារណរដ្ឋឥណ្ឌា នឹងទទួលរៀបចំព្រះរាជពិធីសវនាការថ្វាយ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ដែលក្នុងឱកាសនោះ កិច្ចសហប្រតិបត្តិការទ្វេភាគី និងពហុភាគី នឹងត្រូវលើកយកមកពិភាក្សា។

ព្រះករុណា ព្រះបាទសម្តេចព្រះបរមនាថ នរោត្តម សីហមុនី សព្វព្រះរាជហឫទ័យ ព្រះបរមរាជានុញ្ញាត ជូនឯកឧត្ដម ច៉ាកឌីប ដាន់ខា (Jagdeep Dhankhar អនុប្រធានាធិបតី និងឯកឧត្ដមបណ្ឌិត ស៊ូប្រាម៉ាន់យ៉ាំ ចៃហ្សានកា (Subrahmanyam Jaishankar) រដ្ឋមន្រ្ដីការបរទេស ចូលក្រាបបង្គំគាល់ និងសវនាការ។

ព្រះករុណា ព្រះបាទសម្តេចព្រះបរមនាថ នរោត្តម សីហមុនី នឹងយាងដាក់កម្រងផ្កាគោរពវិញ្ញាណក្ខន្ធនៅមណ្ឌប Mahatma Gandhi។ លោកជំទាវ ដ្រៅផាឌី មួរមូ ប្រធានាធិបតីនៃសាធារណរដ្ឋឥណ្ឌា នឹងរៀបចំព្រះរាជពិធីលៀងសាយភោជន៍ផ្លូវរដ្ឋ ថ្វាយព្រះករុណា ព្រះបាទសម្តេចព្រះបរមនាថ នរោត្តម សីហមុនី ជាទីគោរពសក្ការៈដ៏ខ្ពង់ខ្ពស់បំផុត។

ព្រះរាជទស្សនកិច្ចផ្លូវរដ្ឋរបស់ព្រះករុណា ព្រះបាទសម្តេចព្រះបរមនាថ នរោត្តម សីហមុនី នៅសាធារណរដ្ឋឥណ្ឌា គឺជាព្រឹត្តិការណ៍ដ៏មានសារៈសំខាន់មួយក្នុងទំនាក់ទំនងដ៏យូរអង្វែងរវាងប្រទេសទាំងពីរ ព្រមទាំងរួមចំណែកក្នុងការធ្វើឱ្យកាន់តែស៊ីជម្រៅនូវចំណងមិត្តភាពដ៏ប្រសើរ និងកិច្ចសហប្រតិបត្តិការដ៏ជិតស្និទ្ធដែលចាក់ឫសយ៉ាងជ្រៅនៅក្នុងបេតិកភណ្ឌវប្បធម៌ សាសនា និងប្រវត្តិសាស្ត្ររួម ដើម្បីជាប្រយោជន៍ទៅវិញទៅមកសម្រាប់ប្រជាជនទាំងពីរ៕

ដោយ៖ពលជ័យ

រាជរដ្ឋាភិបាល ចេញអនុក្រឹត្យស្ដីពីការប្រមូល និងបែងចែកផលប្រយោជន៍ពីការប្រើប្រាស់ធនធានពន្ធុ

(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានចេញអនុក្រឹត្យស្ដីពីការប្រមូល និងបែងចែកផលប្រយោជន៍ពីការប្រើប្រាស់ធនធានពន្ធុ។ 

អនុក្រឹត្យនេះកំណត់អំពីបែបបទ នីតិវិធី និងលក្ខខណ្ឌនៃការបែងចែកផលប្រយោជន៍ដោយសមភាព និងសមធម៌ពីការប្រមូលធនធានពន្ធុ និស្សន្ទវត្ថុរបស់ធនធានពន្ធុ ឬចំណេះដឹងជាប្រពៃណីពាក់ព័ន្ធក្នុងគោលបំណងបង្កើតនូវយន្តការជាក់លាក់ ដើម្បីអនុវត្តពិធីសារណាហ្គូយ៉ានៃអនុសញ្ញាសហប្រជាជាតិស្តីពីជីវៈចម្រុះសំដៅរួមចំណែកដល់ការអភិរក្សជីវៈចម្រុះ និងការប្រើប្រាស់សមាសភាគជីវៈចម្រុះដោយនិរន្តរភាព។

អនុក្រឹត្យនេះមានវិសាលភាពអនុវត្តលើការប្រមូលធនធានពន្ធុ និស្សន្ទវត្ថុរបស់ធនធានពន្ធុ និងចំណេះដឹងជាប្រពៃណីពាក់ព័ន្ធ ដែលមានប្រភពដើមឬកំពុងមានវត្តមាននៅក្នុងព្រះរាជាណាចក្រកម្ពុជា ឬបានទទួលយកដោយព្រះរាជាណាចក្រកម្ពុជា ឬដោយបុគ្គលណាម្នាក់ដែលស្ថិតក្រោមយុត្តាធិការរបស់ខ្លួនសម្រាប់គោលបំណងនៃការប្រើប្រាស់ធនធានពន្ធុនិងចំណេះដឹងជាប្រពៃណីពាក់ព័ន្ធ។

អនុក្រឹត្យនេះមិនមានវិសាលភាពអនុវត្តលើការប្រមូលធនធានពន្ធុ និងនិស្សន្ទវត្ថុរបស់ធនធានពន្ធុ ក្នុងគោលបំណងប្រើប្រាស់សម្រាប់ការធ្វើជាទំនិញដោយផ្ទាល់ ប៉ុន្តែការធ្វើជាទំនិញដោយផ្ទាល់នោះមិនត្រូវបានប្រើប្រាស់ក្នុងគោលបំណងសិក្សាស្រាវជ្រាវ ឬអភិវឌ្ឍធនធានពន្ធុឡើយ៕