វិភាគអន្តរជាតិ៖ Facebook ចង់ធ្វើរឿងល្អៗ, តែចុងបញ្ចប់ធ្វើឱ្យអាមេរិក មានឈ្មោះអាក្រក់

(វ៉ាស៊ីនតោន)៖ សាស្ត្រាចារ្យអាមេរិកផ្នែកច្បាប់មកពីសាកលវិទ្យាល័យ University of Chicago លោក Eric Posner បាននិយាយថាបណ្ដាញ ទំនាក់ទំនងសង្គម Facebook មានជាប់ពាក់ព័ន្ធដោយប្រយោលនឹងអំពើឃោរឃៅមួយចំនួននៅជុំវិញពិភពលោក។ នាយកប្រតិបត្តិ (CEO) ក្រុមហ៊ុន Facebook លោក Mark Zuckerberg ធ្លាប់បានអះអាងថាបណ្ដាញទំនាក់ទំនងសង្គមរបស់លោកបាន និងកំពុងប្រឹងប្រែងនាំនូវរឿងល្អៗសម្រាប់ ពិភពលោក។

ប៉ុន្តែ ក្រុមអ្នកជំនាញដូចជាលោក Eric Posner យល់ថាព្រមពេលជាមួយការផ្ដល់រឿងល្អៗ Facebook ក៏បានចូលរួមចំណែកដោយប្រយោលបង្កឱ្យ មានការប្រព្រឹត្តទង្វើឃោរឃៅផងដែរ។

*ធ្វើរឿងល្អៗជាច្រើនដើម្បីពិភពលោក?

ជាការពិតណាស់, Facebook ពិតជាបានផ្ដល់ប្រយោជន៍យ៉ាងច្រើនដល់អ្នកប្រើប្រាស់។ ប៉ុន្តែរឿងដែលគេមិនអាចប្រកែកបាន នោះគឺក្រៅពីរឿងល្អ វាក៏មានរឿងអាក្រក់ច្រើនណាស់ដែរ។ ជាឧទាហរណ៍ នៅប្រទេសអេត្យូពី, ការបង្ហោះសារជាច្រើននៅលើ Facebook ដែលមានលក្ខណៈញុះញង់ឱ្យ មានការប្រព្រឹត្តអំពើហិង្សា, ជម្លោះពូជសាសន៍ និងការបង្រ្កាបលើសារព័ត៌មានឯករាជ្យ ឬសេរីភាពបញ្ចេញមតិ។

នៅក្នុងប្រទេសនីហ្សេរីយ៉ា, អ្នកប្រើប្រាស់ Facebook ជាច្រើនបានបង្ហោះរូបភាពសាកសពមនុស្សជាច្រើនដែលបង្កឱ្យមានការយល់ច្រឡំ និងការសន្មត់ខុសថាក្រុមពូជសាសន៍មួយបានសម្លាប់រង្គាលក្រុមពូជសាសន៍ដែលជាគូប្រជែង រហូតដល់ធ្វើឱ្យមានរលកនៃការសម្លាប់រង្គាលមនុស្ស ដ៏គួរឱ្យតក់ស្លុត។ ក្នុងប្រទេសនីហ្សេរីយ៉ាដែលមានអ្នកលេង Facebook ជាង ២៤លាននាក់, Facebook ត្រូវបានគេរាយការណ៍ថាបានជួលបុគ្គលិក តែ៤នាក់ប៉ុណ្ណោះ ដើម្បីត្រួតពិនិត្យរាល់ការបង្ហោះមាតិកានៅលើបណ្ដាញទំនាក់ទំនងសង្គមរបស់ខ្លួន។

នៅឯប្រទេសមីយ៉ាន់ម៉ាវិញ, គណនីអ្នកលេងបណ្ដាញទំនាក់ទំនងសង្គមត្រូវបានប្រើប្រាស់បង្កើតជាជម្លោះពូជសាសន៍ប្រឆាំងនឹងជនជាតិដើមភាគតិច មូស្លីមរ៉ូហ៊ីងយ៉ា ដោយក្នុងចំណោមពួកគេមានមនុស្សរាប់ពាន់នាក់ត្រូវបានសម្លាប់ និងរាប់សែននាក់ទៀតក្លាយជាជនភៀសខ្លួន។ ដោយឡែក នៅឥណ្ឌា Facebook បានក្លាយជាមធ្យោបាយមួយរបស់ក្រុមជ្រុលនិយមមួយក្ដាប់តូចប្រើប្រាស់ញុះញង់ឱ្យមានអំពើហិង្សា និងការស្អប់ខ្ពើមប្រឆាំងនឹង ជនមូស្លីម។

ដូចគ្នាដែរ នៅស្រីលង្កា, យេម៉ែន, អ៉ីរ៉ាក់ និងបង់ក្លាដែស បណ្ដាញទំនាក់ទំនងសង្គមមួយនេះក៏ត្រូវបានគេប្រើប្រាស់ដើម្បីញុះញង់ឱ្យមានការប្រពឹត្ត ទង្វើឃោរឃៅផងដែរ ខណៈនៅតាមប្រទេសជាច្រើនទៀត រាប់ចាប់ពីវៀតណាម រហូតដល់ប៉ូឡូញ មនុស្សមួយចំនួនបានប្រើ Facebook ក្នុងការ បង្រ្កាបសំឡេងអ្នកប្រឆាំង និងជនជាតិដើមភាគតិចជាដើម។

*គោលដៅជាសកលប្រកបដោយមហិច្ឆតារបស់ Facebook

នៅក្នុងអត្ថបទមួយចុះផ្សាយដោយសារព័ត៌មាន New York Times, លោក Zuckerberg បានអះអាងថារឿងដែលបានកើតឡើង គឺវាអាស្រ័យលើ សមត្ថភាពនៃអ្នកប្រើប្រាស់អ៉ិនធើណិត មិនមែន Facebook ខ្លួនឯងនោះទេ។ ប៉ុន្តែ សព្វថ្ងៃអ្វីដែលគេដឹងគឺសមត្ថភាពនៃអ្នកប្រើប្រាស់អ៉ិនធើណិត និង Facebook មានភាពប្រទាក់ក្រឡាគ្នា ដែលនេះអាចនិយាយបានថាវាស្ថិតក្រោមផែនការរបស់លោក Zuckerberg និងធាតុពិតជាក់ស្ដែង។

នៅតាមបណ្ដាប្រទេសជាច្រើន, Facebook និងក្រុមហ៊ុនជាបុត្រសម្ព័ន្ធដូចជា Instagram និង WhatsApp បានគ្របដណ្ដប់លើបណ្ដាញទំនាក់ទំនង សង្គមដទៃ។ ពោលគឺទាំងអ៉ិនធើណិត និង Facebook បានដឹងយ៉ាងច្បាស់ចំពោះរាល់អត្ថបទ ឬមាតិកាដែលត្រូវបានចុះផ្សាយ។ រាប់ចាប់ពីឆ្នាំ២០១៥ មកទល់សព្វថ្ងៃ ចំនួនភាគរយនៃប្រជាជនពិភពលោកដែលមានសមត្ថភាពប្រើប្រាស់អ៉ិនធើណិតបានកើនឡើងពី ៤១ភាគរយ ដល់៦៦ភាគរយ ខណៈ អ្នកប្រើប្រាស់សកម្មប្រចាំខែរបស់ Facebook បានកើនឡើងពី ១.៤៩ពាន់លាននាក់ ដល់ ២.៨៩ពាន់លាននាក់។

ការចូលរួមចំណែករបស់ Facebook នៅក្នុងសកម្មភាពលុបបំបាត់ប្រធិបតេយ្យ និងសិទ្ធិមនុស្ស មិនមានភស្ដុតាងបញ្ជាក់ឱ្យច្បាស់ទេ តែបណ្ដាញ ទំនាក់ទំនងសង្គមមួយនេះមានជាប់ពាក់ព័ន្ធដោយប្រយោលនឹងទង្វើឃោរឃៅជាច្រើននៅជុំវិញពិភពលោក។ គោលដៅរបស់លោក Zuckerberg នោះគឺ «កសាងសហគមន៍សកលមួយ» ដែលលោកបានលើកឡើងកាលពីឆ្នាំ២០១៧ វាមានលក្ខណៈស្រដៀងគ្នាទៅនឹងគោលនយោបាយ ការបរទេសរបស់សហរដ្ឋអាមេរិក ឬយ៉ាងហោចណាស់ស្រដៀងគ្នាទៅនឹងគោលនយោបាយការបរទេសរបស់អាមេរិក មុននឹងរលាយក្លាយជាផេះ នៅក្នុងប្រទេសអ៉ីរ៉ាក់ និងអាហ្វហ្កានីស្ថាន។ Facebook ជាក្រុមហ៊ុនឯកជនមួយ តែច្បាស់ណាស់ក៏ស្ថិតនៅក្រោមយុត្តាធិការរបស់សហរដ្ឋអាមេរិក ដែរ។

*តើអាមេរិកមានទំនួលខុសត្រូវចំពោះពិភពលោកក្នុងការគ្រប់គ្រង Facebook ឬទេ?

បើតាមលោក Eric Posner សភាអាមេរិកគួរតែអនុម័តច្បាប់មួយដែលតម្រូវឱ្យក្រុមហ៊ុនបណ្ដាញទំនាក់ទំនងសង្គមអាមេរិក លះបង់ធនធានរបស់ខ្លួន ដើម្បីតាមដាន និងត្រួតពិនិត្យលើមាតិកាទាំងឡាយដែលត្រូវបានបង្ហោះនៅបណ្ដាញទំនាក់ទំនងសង្គមរបស់ពួកគេនៅឯបរទេស ឱ្យសមាមាត្រទៅនឹង ធនធានដែលពួកគេបានចំណាយលើសកម្មភាពបែបនេះនៅក្នុងសហរដ្ឋអាមេរិក។

លោក Eric Posner បន្ថែមទៀតថាច្បាប់មួយផ្សេងទៀត នោះគឺអនុញ្ញាតឱ្យជនបរទេសដាក់ពាក្យបណ្ដឹងទៅកាន់តុលាការអាមេរិក នៅពេលដែល ក្រុមហ៊ុនបណ្ដេញទំនាក់ទំនងសង្គមអាមេរិកមានជាប់ពាក់ព័ន្ធនឹងការចែកចាយព័ត៌មានបង្កការយល់ច្រឡំ ឬព័ត៌មានមិនពិត និងមាតិការ ឬសារដែល មានបង្កប់អត្ថន័យបង្កឱ្យមានការស្អប់ខ្ពើម ដូចដែលបានកំណត់នៅក្រោមច្បាប់អាមេរិក៕

ប្រភព៖ Project Syndicate (ថ្ងៃចន្ទ ទី១៥ ខែវិច្ឆិកា ឆ្នាំ២០២១)

ដោយៈ Fresh News

ព្រះមហាក្សត្រកម្ពុជា មានព្រះរាជឱង្ការស្នើអង្គការយូណេស្កូ ដាក់បញ្ចូល «គុណល្បុក្កតោ ក្បាច់គុណបុរាណខ្មែរ» និង «រមណីយដ្ឋានបុរាណវិទ្យាកោះកេរ្តិ៍» ក្នុងបញ្ជីសម្បត្តិបេតិកភណ្ឌវប្បធម៌ពិភពលោក

(បារាំង)៖ ព្រះករុណាជា អម្ចាស់ជីវិតលើត្បូង ព្រះបាទ សម្តេចព្រះបរមនាថ ព្រះមហាក្សត្រនៃកម្ពុជា ជាទីសក្ការៈដ៏ខ្ពង់ខ្ពស់បំផុត ក្នុងឱកាសគង់បំពេញព្រះរាជកិច្ច នៅទីក្រុងប៉ារីស ប្រទេសបារាំង ព្រះអង្គសព្វព្រះរាជហឬទ័យប្រោសព្រះរាជទាន លោកស្រី Audrey AZOULAY អគ្គនាយិកានៃអង្គការយូណេស្កូ អញ្ជើញចូលថ្វាយបង្គំគាល់ សម្តែងការគួរសម នៅថ្ងៃទី១៣ ខែវិច្ឆិកា ឆ្នាំ២០២១។

ក្នុងកិច្ចសវនការដ៏មានសារៈសំខាន់នេះដែរ កម្ពុជាបានជូនដំណឹងដល់អង្គការយូណេស្កូថា កម្ពុជាមានឯកសារចំនួន២ ដែលកំពុងដំណើរការមាន «គុណល្បុក្កតោ ក្បាច់គុណបុរាណខ្មែរ» ក្នុងប្រភេទបេតិកភណ្ឌវប្បធម៌អរូបី និង «រមណីយដ្ឋានបុរាណវិទ្យាកោះកេរ្តិ៍» របស់កម្ពុជា ក្នុងប្រភេទបេតិកភណ្ឌពិភពលោក ដែលនឹងសុំបញ្ចូលទៅក្នុងបញ្ជីសម្បត្តិបេតិកភណ្ឌវប្បធម៌ពិភពលោក។

លោកស្រីអគ្គនាយិកានៃអង្គការយូណេស្កូ បានថ្លែងអំណរព្រះរាជគុណយ៉ាងជ្រាលជ្រៅ ថ្វាយព្រះករុណាជា អម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឬទ័យប្រោសព្រះរាជទានលោកស្រី បានចូលក្រាបថ្វាយបង្គំគាល់ ថ្វាយព្រះពរ ក្នុងឱកាសដ៏ថ្លៃថ្លានេះ។

លោកស្រីអគ្គនាយិកា នៃអង្គការយូណេស្កូ បានសម្តែងនូវសេចក្តីរំភើបរីករាយ និងអំណរព្រះរាជគុណដ៏ជ្រាលជ្រៅថែមទៀត ថ្វាយចំពោះព្រះរាជវត្តមានដ៏ឧត្តុងឧត្តមនៃព្រះករុណាជា អម្ចាស់ជីវិតលើត្បូង ស្តេចយាង ប្រោសព្រះរាជទាន ព្រះរាជសុន្ទរកថា ប្រកបដោយអត្ថន័យដ៏ខ្ពង់ខ្ពស់ នៅក្នុងពិធីបើកកិច្ចប្រជុំ មហាសន្និបាតលើកទី៤១ ក្នុងឱកាសបុណ្យខួប គម្រប់៧៥ឆ្នាំ របស់អង្គការយូណេស្កូ នៅថ្ងៃទី១២ ខែវិច្ឆិកា ឆ្នាំ២០២១ បានញាំងឲ្យ មហាសន្និបាត និងពិធីបុណ្យខួបរបស់អង្គការយូណេស្កូ បានប្រព្រឹត្តទៅដោយជ័យមង្គល។

ព្រះករុណាជា អម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត មានព្រះរាជឱង្ការ សម្តែងនូវការចូលរួមអបអរស្វាគមន៍យ៉ាងកក់ក្តៅចំពោះ លោកស្រីអគ្គនាយិកា ដែលបានជាប់ឆ្នោតយ៉ាងត្រចះត្រចង់សាជាថ្មីជាអគ្គនាយិកានៃអង្គការ យូណេស្កូ។

ព្រះករុណាជា អម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត សូមចូលរួមអបអរសាទរ និងថ្លែងអំណរគុណ ចំពោះកិច្ចសហប្រតិបត្តិការរបស់អង្គការយូណេស្កូនៅកម្ពុជា លើវិស័យវប្បធម៌ ដោយរាប់បញ្ចូលពីភាពជោគជ័យ នៃយន្តការនៃគណៈកម្មាធិការសម្របសម្រួលអន្តរជាតិ (ICC) អង្គរ ដែលនឹងប្រារព្ធខួបលើកទី៣០ នៅឆ្នាំ ២០២៣ ខាងមុខនេះ។

ព្រមជាមួយនេះព្រះអង្គ សូមសម្តែងនូវការដឹងគុណដ៏ជ្រាលជ្រៅ និងចង់ចាំជានិច្ច ចំពោះសេចក្តីខិតខំប្រឹងប្រែងរបស់ គណៈកម្មាធិការអន្តរជាតិ សម្របសម្រួល ដើម្បីគាំពារ និងអភិវឌ្ឍន៍អង្គរ ហៅកាត់ថា ICC អង្គរ ដែលមានប្រទេសបារាំង និងប្រទេសជប៉ុន ជាសហប្រធាន រួមជាមួយ និងការគាំទ្រយ៉ាងសកម្មពីអង្គការយូណេស្តូ ដោយមានការខិតខំប្រឹងប្រែង រួម សហប្រតិបត្តិការល្អពី រាជរដ្ឋាភិបាលកម្ពុជា ក្នុងការជួសជុលកែលំអ ប្រាង្គប្រាសាទ នៅតំបន់រមណីយដ្ឋានប្រវត្តិសាស្ត្រអង្គរ បន្ទាប់ពីព្រះករុណាព្រះបាទ សម្តេចព្រះនរោត្តមសីហនុ ព្រះមហាវីរក្សត្រ ព្រះវររាជបិតាវប្បធម៌ជាតិខ្មែរ ព្រះអង្គមានព្រះរាជតម្រិះដ៏ភ្លឺស្វាងបំផុត ក្នុងការដាក់បញ្ចូលប្រាង្គប្រាសាទក្នុងតំបន់ប្រវត្តិសាស្ត្រអង្គរ ទៅក្នុងបញ្ជីសម្បត្តិបេតិកភណ្ឌពិភពលោក កាលពីក្នុងខែធ្នូ ឆ្នាំ ១៩៩២ នោះមក។

កម្ពុជាសូមជូនពរគណៈកម្មាធិការអន្តរជាតិ សម្របសម្រួលដើម្បីគាំពារ និងអភិវឌ្ឍន៍អង្គរ ICC អង្គរ ដែលមានប្រទេសបារាំង និងប្រទេសជប៉ុន ជាសហប្រធាន និងបណ្តាប្រទេសផ្សេងទៀតក្នុងអង្គការយូណេស្កូ សម្រេចទទួលបានជោគជ័យជាបន្តទៅទៀត ក្នុងការបំពេញបេសកម្មដ៏វិសេសវិសាលនៅកម្ពុជា។

កម្ពុជាសូមចូលរួមអបអរសាទរអង្គការយូណេស្កូ ចំពោះយុទ្ធសាស្រ្តរបស់ខ្លួនក្នុងវិស័យអប់រំ ក្នុងក្របខណ្ឌ នៃគោលដៅអភិវឌ្ឍន៍ប្រកបដោយចីរភាព ការអប់រំរួមបញ្ចូល និងការរៀនសូត្រជាប្រចាំ ដើម្បីកំណត់ផលប៉ះពាល់នៃមេរោគកូវីដ ដើម្បីការពារវិស័យអាទិភាពទាំង៣ របស់រាជរដ្ឋាភិបាល លើ ការលើកកម្ពស់គុណភាពអប់រំ ពង្រឹងសមត្ថភាពគ្រូបង្រៀន ការពង្រឹងការអប់រំក្រៅប្រព័ន្ធ តាមរយៈការសិក្សាពេញមួយជីវិត។

កម្ពុជាសូមថ្លែងអំណរគុណយ៉ាងជ្រាលជ្រៅថែមទៀត ចំពោះជំនួយដែលអង្គការយូណេស្កូបាន ផ្តល់ក្នុងការអភិវឌ្ឍន៍ប្រព័ន្ធផ្សព្វផ្សាយ សេរីភាពនៃការបញ្ចេញមតិ ការចូលប្រើព័ត៌មានដោយឥតគិត ថ្លៃ ក្រមសីលធម៌ព័ត៌មាន ការអភិរក្ស និងការធ្វើបេតិកភណ្ឌឯកសារជាលក្ខណៈ ឌីជីថល។

ព្រះករុណាជា អម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត សព្វព្រះរាជហឬទ័យអញ្ជើញលោកស្រី Audrey AZOULAY អគ្គនាយិកានៃអង្គការយូណេស្កូ មកបំពេញទស្សនៈកិច្ចជាថ្មីម្តងទៀត នៅព្រះរាជាណាចក្រកម្ពុជា ក្នុងពេលវេលា ដ៏សមស្របណាមួយ៕

បទ «សូរិយារះហើយ» និពន្ធដោយសម្តេចតេជោ ហ៊ុន សែន បង្ហាញពីការវិលត្រឡប់ចូលប្រទេសកម្ពុជាវិញរបស់ព្រះបរមរតនកោដ្ឋ និងសម្តេចម៉ែ អមដង្ហែដោយសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត កាលពី៣០ឆ្នាំមុន

 ចម្រៀងមួយបទដែលមានចំណងជើងថា «សូរិយារះហើយ» បានច្រៀងរៀបរាប់អំពីការ យាងវិលត្រឡប់ចូលមកប្រទេសកម្ពុជាវិញរបស់ ព្រះបរមរតនកោដ្ឋ និងសម្ដេចម៉ែ ដែលអមដង្ហែដោយ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន កាលពីឆ្នាំ១៩៩១ ដែលព្រឹត្តិការណ៍ប្រវត្តិសាស្ដ្ររបស់មាតុភូមិកម្ពុជា។

ចម្រៀងដែលបង្កប់ទៅដោយអត្ថន័យយ៉ាងជ្រាលជ្រៅនេះ និពន្ធដោយសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បកស្រាយដោយ លោក យិន សារិន ហើយត្រូវបានចាក់ផ្សាយលើកដំបូងនៅវេលាម៉ោង៦ល្ងាច ថ្ងៃទី១៤ ខែវិច្ឆិកា ១៩៩១ ក្រោយការវិលត្រឡប់របស់សម្តេចព្រះនរោត្តម សីហនុ និងសម្តេចម៉ែ កាលពី៣០ឆ្នាំមុន។

សម្តេចតេជោ ហ៊ុន សែន សម្រេចអនុញ្ញាតឲ្យអ្នកដំណើរចូលកម្ពុជា ដែលបានចាក់វ៉ាក់សំាងពេញលេញ មិនតម្រូវឲ្យធ្វើចត្តាឡីស័កទៀតទេ (Sound Inside)

(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅរសៀលថ្ងៃទី១៤ ខែវិច្ឆិកា ឆ្នាំ២០២១នេះ បានសម្រេចអនុញ្ញាតឲ្យអ្នកដំណើរទាំងជនជាតិខ្មែរ និងជនជាតិបរទេសទាំងដែលធ្វើដំណើរចូលកម្ពុជា ហើយបានចាក់វ៉ាក់សាំងពេញលេញ (២ដូស) គឺមិនតម្រូវឲ្យធ្វើចត្តាឡីស័កទៀតទេ។ លើកលែងតែអ្នកដែលមិនទាន់ចាក់វ៉ាក់សាំង គឺត្រូវឲ្យធ្វើចត្តាឡីស័ក១៤ថ្ងៃដដែល។

សម្តេចតេជោនាយករដ្ឋមន្ត្រី បានបញ្ជាក់យ៉ាងដូច្នេះថា «ដោយសារកម្ពុជារបស់យើង គឺបានចាក់វ៉ាក់សាំងពេញលេញ អត្រាគ្របដណ្តប់រហូតដល់ជិត៨៨ភាគរយនៃចំនួនប្រជាជន១៦លាននាក់ ដូច្នេះមិនត្រូវការឲ្យធ្វើចត្តាឡីស័កទៀតទេ លើកលែងតែអ្នកមិនទាន់បានចាក់វ៉ាក់សាំង។ អ្នកដែលមិនទាន់បានចាក់វ៉ាក់សាំងត្រូវធ្វើចត្តាឡីស័ករយៈពេល១៤ថ្ងៃដដែល ប៉ុន្តែសម្រាប់អ្នកបានចាក់វ៉ាក់សាំង២ដូសរួចរាល់ ទាំងជនជាតិខ្មេរ ទាំងជនជាតិបរទេសដែលចូលមកព្រះរាជាណាចក្រកម្ពុជា មិនតម្រូវឲ្យធ្វើចត្តាឡីស័កទៀតទេ»។

សម្តេចតេជោ ហ៊ុន សែន បានបញ្ជាក់ទៀតថា សម្រាប់អ្នកដំណើរដែលធ្វើដំណើរតាមផ្លូវអាកាសទាំងភ្នំពេញ ខេត្តព្រះសីហនុ និងខេត្តសៀមរាប, តាមផ្លូវទឹក និងតាមផ្លូវគោកជាដើម ត្រូវធ្វើតេស្តរហ័ស ដែលត្រូវរង់ចាំរយៈពេលត្រឹមតែ១៥នាទីប៉ុណ្ណោះ គឺអាចដឹងលទ្ធផលបាន។

សម្តេចបន្ថែមថា បន្ទាប់ពីទទួលបានលទ្ធផលធ្វើតេស្តអវិជ្ជមានហើយនោះ អ្នកដំណើរចូលកម្ពុជា ទាំងអស់អាចធ្វើដំណើរដោយសេរីទូទាំងប្រទេសកម្ពុជា ដោយមិនកម្រិតតំបន់ ឬខេត្តសម្រាប់ដើរហើយនោះទេ។

សម្តេចតេជោ ហ៊ុន សែន បានសង្កត់ធ្ងន់ថា សម្រាប់អ្នកដែលមិនទាន់បានចាក់វ៉ាក់សាំងហើយចូលមកកម្ពុជា តម្រូវឲ្យធ្វើតេស្តដោយម៉ាស៉ីន PCR និងធ្វើចត្តាឡីស័ករយៈពេល១៤ថ្ងៃដដែល។

សម្តេចនាយករដ្ឋមន្ត្រី ក៏បានណែនាំដល់ក្រសួងស្ថាប័នពាក់ព័ន្ធ សូមធ្វើការជាបន្ទាន់នូវការសម្រេចរបស់រាជរដ្ឋាភិបាល ដើម្បីអាចដំណើរការការសម្រេចនេះ ចាប់ពីថ្ងៃទី១៥ ខែវិច្ឆិកា ឆ្នាំ២០២១តទៅ។ សម្រាប់បងប្អូនដែលកំពុងធ្វើចត្តាឡីស័ក បន្ទាប់ពីទទួលបានការសម្រេចថ្មីនេះ សូមឲ្យមានការលើកលែងការធ្វើចត្តាឡីស័ក ចាប់ពីថ្ងៃទី១៥ ខែវិច្ឆិកា ឆ្នាំ២០២១។

សម្តេចតេជោ ហ៊ុន សែន បានបញ្ជាក់ទៀតថា ការសម្រេចអនុញ្ញាតការមិនតម្រូវធ្វើចត្តាឡីស័ក ចំពោះអ្នកចាក់វ៉ាក់សាំងពេញលេញរួចនេះ គឺត្រូវជាមួយប្រទេសថៃ ឡាវ និងវៀតណាមផងដែរ។

សម្តេចតេជោ ហ៊ុន សែន បន្ថែមថា ការមិនតម្រូវឲ្យធ្វើចត្តាឡីស័កនេះ គឺឆ្លើយតបទៅនឹងបរិបទថ្មី ដែលយើងត្រូវបានដំណើរការសេដ្ឋកិច្ចឡើងវិញ ខណៈប្រជាពលរដ្ឋខ្មែរយើងត្រូវការធ្វើដំណើរចេញចូលប្រទេស ប៉ុន្តែព្រួយបារម្ភអំពីការធ្វើចត្តាឡីស័ក នៅពេលនេះបងប្អូនប្រជាពលរដ្ឋលែងព្រួយបារម្ភ ពីការធ្វើចត្តាឡីស័កទៀតហើយ៕

រាជរដ្ឋាភិបាលកម្ពុជា សម្រេចដាក់ឲ្យប្រើប្រាស់នូវយុទ្ធសាស្ដ្រស្ដីពី «ការរស់នៅតាមបែបគន្លងប្រក្រតីភាពថ្មី ក្នុងបរិបទនៃជំងឺកូវីដ១៩»

(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានចេញសេចក្ដីសម្រេចដាក់ឲ្យប្រើប្រាស់ជាផ្លូវការនូវយុទ្ធសាស្ដ្រស្ដីពី «ការរស់នៅតាមបែបគន្លងប្រក្រតីភាពថ្មី ក្នុងបរិបទនៃជំងឺកូវីដ១៩»។

សៀវភៅយុទ្ធសាស្ដ្រស្ដីពី «ការរស់នៅតាមបែបគន្លងប្រក្រតីភាពថ្មី ក្នុងបរិបទនៃជំងឺកូវីដ១៩» មានកំរាស់៣៦ទំព័រ ដែលមានគោលបំណង គ្រប់គ្រងហានិភ័យក្នុងសុខភាពសាធារណៈ ឲ្យនៅទាបបំផុត ជាពិសេសការធ្លាក់ខ្លួនឈឺ និងការបាត់បង់ជីវិត ខណៈដែលសកម្មភាពសង្គម-សេដ្ឋកិច្ចនៅក្នុងប្រទេស គ្រប់ផ្នែក-គ្រប់វិស័យត្រូវបានចាប់ផ្ដើមបើកដំណើរការពេញលេញឡើងវិញជាបណ្ដើរៗ។

ដើម្បីសម្រេចបានគោលបំណងនេះ យុទ្ធសាស្ដ្របានកំណត់នូវគោលដៅចំនួន៣ រួមមាន៖

*ទី១៖ ការពារអាយុជីវិត និងការពារសុវត្ថិភាពក្នុងការរស់នៅ និងក្នុងការចូលរួមរបស់ប្រជាពលរដ្ឋគ្រប់រូប នៅក្នុងសកម្មភាពសង្គម-សេដ្ឋកិច្ច

*ទី២៖ ពង្រឹងសមត្ថភាពស្នូលនៃប្រព័ន្ធសុខាភិបាល ដើម្បីបង្ការ និងគ្រប់គ្រងការឆ្លងរាលដាលជំងឺកូវីដ១៩ផង និងផ្ដល់សេវាសុខាភិបាលជាសារវ័ន្ដជាប្រចាំផង

*ទី៣៖ រក្សាកិច្ចដំណើរការឡើងវិញ នៃសកម្មភាព-សេដ្ឋកិច្ច ប្រកបដោយសុវត្ថិភាព និងនិរន្ដរភាព។

ខាងក្រោមនេះ ជាសៀវភៅយុទ្ធសាស្ដ្រស្ដីពី «ការរស់នៅតាមបែបគន្លងប្រក្រតីភាពថ្មី ក្នុងបរិបទនៃជំងឺកូវីដ១៩»៖

រដ្ឋបាលរាជធានីភ្នំពេញ កែសម្រួលការអនុញ្ញាតឱ្យរៀបចំពិធីមង្គលការ បុណ្យប្រពៃណី ពិធីសាសនា ការជួបជុំ និងកម្មវិធីផ្សេងៗបែបសាសនា

(ភ្នំពេញ)៖ រដ្ឋបាលរាជធានីភ្នំពេញ នាថ្ងៃទី១២ ខែវិច្ឆិកា ឆ្នាំ២០២១នេះ បានចេញសេចក្ដីសម្រេចស្ដីពីការកែសម្រួលចំពោះការអនុញ្ញាតឱ្យរៀបចំពិធីអាពាហ៍ពិពាហ៍ ពិធីបុណ្យប្រពៃណី ពិធីសាសនា ការជួបជុំ និងកម្មវិធីផ្សេងៗបែបសាសនា ដោយមិនកំណត់ចំនួនអ្នកចូលរួម ប៉ុន្តែអាស្រ័យទៅតាមទីតាំងប្រារព្ធពិធី ដែលអាចធានាបាននូវការរក្សាគម្លាតសុវត្ថិភាពសង្គម-បុគ្គល និងវិធានសុខាភិបាល ចាប់ពីថ្ងៃទី១២ ខែវិច្ឆិកានេះតទៅ៕

ក្រសួងសុខាភិបាល ចេញសេចក្ដីណែនាំស្ដីពីការពង្រឹងការអនុវត្តវិធានការសុខាភិបាល ក្នុងការរៀបចំពិធីនានា និងកិច្ចការសង្គមនៅកម្ពុជា

(ភ្នំពេញ)៖ ក្រសួងសុខាភិបាល នាថ្ងៃទី១២ ខែវិច្ឆិកា ឆ្នាំ២០២១នេះ បានចេញសេចក្ដីណែនាំស្ដីពីការពង្រឹងការអនុវត្តវិធានការសុខាភិបាល ក្នុងការរៀបចំពិធីនានា និងកិច្ចការសង្គមនៅកម្ពុជា។

នៅក្នុងបរិការណ៍ដែលកម្ពុជាកំពុងបើកដំណើរការជាបណ្តើរៗនូវសេដ្ឋកិច្ចនិងសង្គមឡើងវិញ និងអនុញ្ញាតឱ្យប្រជាពលរដ្ឋរស់នៅទៅតាមគន្លងប្រក្រតីភាពថ្មី ក្នុងបរិបទនៃការប្រយុទ្ធនឹងជំងឺកូដ-១៩ ការរៀបចំពិធីនានា និងកិច្ចការសង្គមទាំងឡាយ រួមមាន សេដ្ឋកិច្ច សង្គម វប្បធម៌ ប្រពៃណី សាសនា នយោបាយ និងការជួបជុំទូទៅផ្សេងទៀតជាដើម ត្រូវបន្តអនុវត្តវិធានការសុខាភិបាលឱ្យបានខ្ជាប់ខ្លួន ដើម្បីចូលរួមកាត់បន្ថយឱ្យបានជាអតិបរមានូវហានិភ័យជាយថាហេតុ ដែលអាចនាំឱ្យមានការផ្ទុះឡើងវិញនូវការឆ្លងរាលដាលនៃជំងឺកូវីដ-១៩ គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ បានណែនាំដូចខាងក្រោម៖