ក្រសួងធនធានទឹក៖ ចាប់ពីថ្ងៃនេះដល់ថ្ងៃទី១០ ខែសីហា ខេត្តជាប់សមុទ្រ និងខេត្តជាប់ព្រំដែនវៀតណាម នឹងមានភ្លៀងធ្លាក់ខ្លាំង ពិសេសខេត្តក្រចេះ និងត្បូងឃ្មុំ ប្រឈមជំនន់ទឹកភ្លៀង

ក្រសួងធនធានទឹក និងឧតុនិយម នៅថ្ងៃទី០៧ ខែសីហា ឆ្នាំ២០១៩នេះ បានចេញសេចក្តីជូនដំណឹងថ្មីមួយបន្ថែមទៀត ស្តីពីស្ថានភាពអាកាសធាតុនៅកម្ពុជា ចាប់ពីថ្ងៃនេះដល់ថ្ងៃទី១០ ខែសីហា ដោយបញ្ជាក់ថា នៅរយៈពេល៤ថ្ងៃនេះ ខេត្តជាប់សមុទ្រ និងខេត្តជាប់ព្រំដែនវៀតណាម ពិសេសខេត្តក្រចេះ និងត្បូងឃ្មុំ អាចនឹងមានជំនន់ទឹកភ្លៀង។

ក្រសួងធនធានទឹកបានបញ្ជាក់ថា ដោយសារឥទ្ធិពលនៃប្រព័ន្ធសម្ពាធទាប ធ្វើឲ្យស្ថានភាពអាកាសធាតុនៅកម្ពុជាមានលក្ខណៈ៖
– ភ្លៀងនៅតែបន្តធ្លាក់ដដែល គ្រាន់តែនៅតំបន់មាត់សមុទ្រ ភ្លៀង ខ្យល់ នៅតែបន្តកើតមាន និងស្ថិតក្នុងការប្រុងប្រយ័ត្នខ្ពស់។
– បណ្តាខេត្តដែលស្ថិតនៅជាប់នឹងព្រំប្រទល់វៀតណាម បរិមាណភ្លៀង នឹងកើនឡើងខ្លាំង ពិសេសខេត្តក្រចេះ និងត្បូងឃ្មុំ ដែលអាចបង្កមាន ជាជំនន់ទឹកភ្លៀង។
– កម្លាំងខ្យល់នៅមានកម្រិតខ្លាំងដដែល គឺ១៥-២០ ម៉ែត្រក្នុងមួយវិនាទី។

ក្រសួងក៏បានអំពាវនាវឲ្យប្រជាពលរដ្ឋ បន្តមានការប្រុងប្រយ័ត្នខ្ពស់ចំពោះបញ្ហាអាកាសធាតុផងដែរ ៕

អគ្គិសនីខេត្តស្វាយរៀងជូនដំណឹងស្តីពីការទទួលពាក្យបន្តចរន្តថ្មី

ស្វាយរៀង៖ នៅថ្ងៃទី៧ ខែសីហា ឆ្នាំ២០១៩ អគ្គិសនីខេត្តស្វាយរៀង បានចេញជូនដំណឹងស្តីពីការទទួលពាក្យបន្តចរន្តថ្មី នៅថ្ងៃទី១២ ខែសីហា ឆ្នាំ២០១៩ នៅតំបន់មួយចំនួនទៅតាមពេលវេលា និង ទីកន្លែងដូចខាងក្រោម៖

លោក អ៊ូ ច័ន្ទរ័ត្ន៖ គណបក្សថ្មីបង្កើតថ្ងៃណាក៏បានឱ្យតែនៅមានជាតិតែជាតិមិនអាចបង្កើតបា នទេ

នៅយប់ថ្ងៃទី៦ ខែសីហា ឆ្នាំ២០១៩ អតីតមន្ត្រីជាន់ខ្ពស់អតីតគណបក្សសង្គ្រោះជាតិ (CNRP) លោក អ៊ូ ច័ន្ទរ័ត្ន បានបង្ហោះសារ៥លើទំព័រ Facebook ដោយបានលើកឡើងថា បក្សអាចបាត់បង់បាន តែជាតិ និងទឹកដីមិនអាចបាត់បង់បាននោះទេ។ លោកបានបន្ថែមទៀតថា បក្សបង្កើតថ្មីថ្ងៃណា ក៏បានឱ្យតែនៅមានជាតិ។ សារដែលហាក់បង្ហាញពីចេតនារម្មណ៍ថ្មីលើវិថីនយោបាយរបស់លោក អ៊ូ ច័ន្ទរ័ត្ន បាននាំឱ្យមានការភ្ញាក់ផ្អើលខ្លាំងពីអ្នកតាមដានស្ថានការណ៍នយោបាយ។

លោក អ៊ូ ច័ន្ទរ័ត្ន ជាបុគ្គលមួយរូបក្នុងចំណោមបុគ្គលទាំង១១៨រូបរបស់អតីតគណបក្សសង្គ្រោះជាតិ ដែលត្រូវបានហាមឃាត់មិនឱ្យធ្វើសកម្មភាពនយោបាយ។ ប៉ុន្តែកាលពីប៉ុន្មានខែមុននេះ លោកក៏បានសុំព្រះរាជទានលើកលែងទោសពីព្រះមហាក្សត្រសុំសិទ្ធិធ្វើនយោបាយឡើងវិញ។ ក្រោយការសុំសិទ្ធិធ្វើនយោបាយជាថ្មីនេះ លោក អ៊ូ ច័ន្ទរ័ត្ន បានរងការចោទប្រកា ន់ និងវាយប្រហារយ៉ាងខ្លាំងពីក្រុមដែលធ្លាប់រួមដំបូលបក្សជាមួយគ្នា។

អតីតមេដឹកនាំ និងសមាជិកអតីតគណបក្សសង្គ្រោះជាតិ ពួកគេហាក់នៅបង្ហាញក្តីសង្ឃឹមថា អតីតគណបក្សសង្គ្រោះជាតិអាចនឹងមានដង្ហើមឡើងវិញ តាមរយៈចលនាទាមទាររបស់ពួកគេ។ តែសាររបស់លោក អ៊ូ ច័ន្ទរ័ត្ន ហាក់បានបង្ហាញថា លោកលែងមានក្តីរំពឹងក្នុងការប្រោសអតីតគណបក្សដែលផុតដង្ហើម ដោយអំណាចសាលក្រមរបស់តុលាការកំពូលកាលពីឆ្នាំ២០ ១៧ឱ្យរស់ឡើងវិញ ដូចអតីតមេដឹកនាំ និងសមាជិកដទៃទៀតនោះឡើយ។

តាមរយៈសាររបស់លោក អ៊ូ ច័ន្ទរ័ត្ន នេះដែរ ត្រូវបានអ្នកវិភាគនិងជាអ្នកតាមដានស្ថានការណ៍នយោបាយ យល់ឃើញថា សារនេះបានដៀមដាមទៅដល់ទណ្ឌិត សម រង្ស៉ី ដែលកំពុងរត់គេ ចខ្លួនពីសំណាញ់ច្បាប់ ហើយបាននិងកំពុងប្រកាសស្រែកឲ្យអន្តរជាតិ បំផ្លាញសេដ្ឋកិច្ចកម្ពុជា តាមរយៈដាក់ទណ្ឌកម្ម និងអំពាវនាវឲ្យអឺរ៉ុប កាត់ផ្តាច់ EBA ដែលទង្វើអាក្រក់នេះនឹងធ្វើបាបទៅលើកម្មករ-កម្មការិនី ធ្វើការតាមរោងចក្រ ដែលកំពុងទទួលបាននូវប្រាក់បៀរវត្សរ៍សមរម្យ និងរស់នៅក្នុងសន្តិភាពដែលកម្ពុជាកំពុងមាន៕

សូមអញ្ជើញដាក់ពាក្យចូលរួម កម្មវិធីប្រកួតប្រជែងកម្មករនិយោជិតឆ្នើម២០១៩

ក្រសួងការងារ និងបណ្តុះបណ្តាលវិជ្ជាជីវៈ សហការជាមួយសមាគមរោងចក្រកាត់ដេរនៅកម្ពុជា នឹងរៀបចំកម្មវិធីប្រកួតប្រជែងបុគ្គលិកកម្មករនិយោជិតឆ្នើមឆ្នាំ២០១៩ ដើម្បីជម្រុញការយល់ដឹង និងលើកកម្ពស់ផលិតភាពនៅកម្ពុជា ព្រមទាំងចូលរួមអបអរកម្មវិធីពិព័រណ៍ការងារ និងផលិតភាពជាតិ ឆ្នាំ២០១៩ ដែលនឹងប្រព្រឹត្តទៅនៅមជ្ឈមណ្ឌលសន្និបាត និងពិព័រណ៍កោះពេជ្រ នាថ្ងៃទី០២-០៣ ខែវិច្ឆិកា ឆ្នាំ២០១៩ ខាងមុខនេះ។

ការប្រកួតប្រជែង បុគ្គលិក កម្មករនិយោជិតឆ្នើមនេះ មានមុខតំណែងចំនួន៥ប្រភេទ១. អ្នកគ្រប់គ្រង ២.មេកាបុគ្គលិកជាន់ខ្ពស់ ៣.ប្រធានក្រុម ៤.អ្នកដេរ ឬបុគ្គលិកការិយាល័យ ៥.បុគ្គលិក ឬកម្មករទូទៅ (អ្នកបើកឡាន អ្នកថែសួន អ្នកសម្អាត) ចាប់ទទួលពាក្យពីថ្ងៃទី០១ ខែសីហា រហូតដល់ថ្ងៃទី១០ ខែតុលា ឆ្នាំ២០១៩។

ក្រុមហ៊ុន រោងចក្រ សហគ្រាស ដែលមានបំណងចូលរួមសូមបញ្ជូនឈ្មោះ និងប្រវត្តិរូបសង្ខេបរបស់បុគ្គលិក កម្មកររបស់ខ្លួនមកកាន់ទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ ឬសមាគមរោងចក្រកាត់ដេរនៅកម្ពុជាដើម្បីចូលរួមប្រកួតប្រជែង។ អត្ថប្រយោជន៍អ្នកដែលជាប់ ជ័យលាភីទាំងអស់នឹងទទួលបានវិញ្ញាបនបត្របុគ្គលិក កម្មករបុគ្គលិកឆ្នើមពីក្រសួងការងារ និងបណ្តុះបណ្តាលវិជ្ជាជីវៈជាមួយនឹង៖

– ជ័យលាភីលេខ១ ទទួលបានប្រាក់៣០០ដុល្លារ និងប័ណ្ណតម្លៃ៥០០ដុល្លារសម្រាប់វគ្គបណ្តុះបណ្តាលនៅវិទ្យាស្ថានCGTI
– ជ័យលាភីលេខ២ ទទួលបានប្រាក់២០០ដុល្លារ និងប័ណ្ណតម្លៃ៥០០ដុល្លារសម្រាប់វគ្គបណ្តុះបណ្តាលនៅវិទ្យាស្ថានCGTI
– ជ័យលាភីលេខ៣ ទទួលបានប្រាក់១០០ដុល្លារ និងប័ណ្ណតម្លៃ៥០០ដុល្លារសម្រាប់វគ្គបណ្តុះបណ្តាលនៅវិទ្យាស្ថានCGTI

សម្រាប់ព័ត៌មានបន្ថែមសូមទំនាក់ទំនងៈ Tel:០១៧ ៤៦៧ ៤២៣/០១៧ ៩៨៥ ៧៩៥/០១៥ ៨៨៨ ១៥៣ ទីកន្លែង៖ ទីភ្នាក់ងារជាតិមុខរបរ និងការងារៈ ក្រសួងការងារ និងបណ្តុះបណ្តាលវិជ្ជាជីវៈ អគារលេខ៣ មហាវិថីសហព័ន្ធរុស្សី សង្កាត់ទឹកល្អក់១ ខណ្ឌទួលគោក រាជធានីភ្នំពេញ៕

អង្គភាពអ្នកនាំពាក្យរាជរដ្ឋាភិបាលនឹងរៀបចំសន្និសីទសារព័ត៌មានស្តីពី «ចម្ងល់ពាក់ព័ន្ធនឹងកុងទ័រភ្លើង»

នៅថ្ងៃទី៦ ខែសីហា ឆ្នាំ២០១៩ អង្គភាពអ្នកនាំពាក្យរាជរដ្ឋាភិបាល បានចេញសេចក្តីជូនដំណឹងថា អង្គភាពនឹងរៀបចំសន្និសីទសារព័ត៌មានស្តីពី «ចង្ងល់ពាក់ព័ន្ធនឹងកុងទ័រភ្លើង» ដែលនឹងប្រព្រឹត្តទៅនៅថ្ងៃទី៨ ខែសីហា ឆ្នាំ២០១៩ខាងមុខនេះ វេលាម៉ោង ៩និង៣០នាទីព្រឹកនៅជាន់ផ្ទាល់ដី សាលប្រជុំ B នៃទីស្តីការគណៈរដ្ឋមន្រ្តី។

សូមអានសេចក្តីជូនដំណឹងខាងក្រោម៖

លោក ទៀ បាញ់ រំលឹកអំពីទុក្ខវេទនាក្នុងសម័យសង្រ្គាមដោយ «ដាច់បាយ និងដួលសន្លប់»

តាមរយៈ Facebook ផ្លូវការ នៅព្រឹកថ្ងៃទី០៦ ខែសីហា ឆ្នាំ២០១៩ លោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅថ្ងៃទី០៦ ខែសីហា ឆ្នាំ២០១៩ បានបង្ហាញអំពីទុក្ខវេទនា ក្នុងឆាកជីវិតរបស់លោកក្នុងពេលដែលប្រទេសកម្ពុជាមានសង្រ្គាម។ ជាមេដឹកនាំម្នាក់ដែលធ្លាប់ឆ្លងកាត់ការលំបាកនានា ក្នុងសម័យសង្រ្គាម លោក ទៀ បាញ់ បានថ្លែងដូច្នេះថា៖ «ភាពអត់ឃ្លានលំបាកវេទនារបស់ប្រជាជននៅតាមបណ្តាប្រទេសដែលកំពុងមានសង្គ្រាម ធ្វើឱ្យខ្ញុំនឹកឃើញពេលដែលខ្ញុំត្រូវបង្ខំចិត្តរត់ចូលព្រៃដើម្បីគេចពីការតាមសម្លាប់របស់អាជ្ញាធរអប្រិយកាលពីសម័យមុន។ គ្រានោះខ្ញុំមិនបានហូបបាយអស់រយៈពេល ៣ថ្ងៃ៣យប់។ ដល់ពេលមានអង្ករដាំបាយហូប គ្រាន់តែហុតទឹកបាយមួយស្លាបព្រាក៏ធ្វើឱ្យខ្ញុំសន្លប់បាត់ដែរ ព្រោះតែមិនបានហូបយូរថ្ងៃពេក»។

គួរបញ្ជាក់ថា កម្ពុជាបានឆ្លងកាត់សង្រ្គាមរ៉ាំរ៉ៃជាច្រើនទសវត្ស។ សង្រ្គាមស៊ីវិលបានចាប់ផ្តើមពីការធ្វើរដ្ឋប្រហារទម្លាក់សម្តេចនរោត្តម សីហនុ នៅថ្ងៃ១៨ មីនា ១៩៧០ បណ្តាលប្រទេសជាតិធ្លាក់ទៅក្នុងរបបប្រល័យពូជសាសន៍ប៉ុលពត ថ្ងៃ១៧ មេសា ឆ្នាំ១៩៧៥ ដោយសម្លាប់មនុស្សជាង២លាននាក់ និងប្រជាពលរដ្ឋរាប់លាននាក់ផ្សេងទៀត រងទុក្ខវេទនា។ សង្គ្រាមបានកើតឡើងជាបន្តបន្ទាប់ទោះបីជារបបខ្មែរក្រហមដួលរំលំ នៅថ្ងៃទី៧ មករា ១៩៧៩។

លោកឧបនាយករដ្ឋមន្រ្តី ទៀ បាញ់ បានរំលឹកទៀតថា ក្នុងនាមជាជនរងគ្រោះដែលធ្លាប់ឆ្លងកាត់នូវការឈឺចាប់ខ្លោចផ្សានេះ សម្តេចពិតជាបានយល់ច្បាស់អំពីទុក្ខលំបាកវេទនា របស់ប្រជាជនដែលកំពុងរងនូវភាពអត់ឃ្លានដោយសារសង្គ្រាម។ លោកសង្ឃឹមថា សង្គ្រាមនៅតាមបណ្តាប្រទេសនានានឹងត្រូវបានបញ្ចប់ក្នុងពេលឆាប់ៗខាងមុខ ដើម្បីឱ្យប្រជាពលរដ្ឋគ្រប់រូប អាចទទួលបាននូវជីវិតដែលពោរពេញដោយសុខសន្តិភាព។ ក្រៅអំពីបំណងចង់ឱ្យពិភពលោកបញ្ចប់សង្រ្គាម លោក ទៀ បាញ់ បានបង្ហាញក្តីសង្ឃឹមមួយទៀត ដោយចង់ឱ្យកម្ពុជារក្សាបានសន្តិភាពយូរអង្វែង។ លោក បានថ្លែងថា៖ «ខ្ញុំក៏កាន់តែសង្ឃឹមថា កម្ពុជាអាចរក្សាសន្តិភាពរបស់ខ្លួនបានគង់វង្ស និងបន្តអភិវឌ្ឍលើគ្រប់វិស័យដើម្បីសម្រួលដល់ការរស់នៅរបស់ប្រជាពលរដ្ឋឱ្យកាន់តែរុងរឿងបន្ថែមទៀត»៕

ស្វែងយល់ពីប្រវត្តិរបស់ប្រធានាធិបតីស្រីលង្កា លោក ម៉ៃទ្រីប៉ាឡា ស្រ៊ីសេនា ដែលនឹងបំពេញទស្សនកិច្ចមកកម្ពុជា

ប្រធានាធិបតីស្រីលង្កា ម៉ៃទ្រីប៉ាឡា ស្រ៊ីសេនា (Maithripala Sirisena) នឹងអញ្ជើញមកបំពេញទស្សនកិច្ចផ្លូវរដ្ឋមកកាន់ប្រទេសកម្ពុជាចាប់ពីថ្ងៃទី០៧ ដល់ថ្ងៃទី១០ ខែសីហា ឆ្នាំ២០១៩ តបតាមការអញ្ជើញរបស់ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា។

ខាងក្រោមគឺជាប្រវត្តិរូបត្រួសៗរបស់លោកប្រធានាធិបតី៖
ប្រវត្តិរូបផ្ទាល់ខ្លួន៖
លោក Sirisena កើតនៅថ្ងៃទី០៣ ខែកញ្ញា ឆ្នាំ១៩៥១ នៅភូមិឈ្មោះថា Yagoda ដែលបច្ចុប្បន្នស្ថិតក្នុងក្រុង Gampaha ភាគខាងជើងរដ្ឋធានីកូឡុំបូ។ គ្រួសាររបស់លោកមានកម្រិតជីវភាពមធ្យម ខណៈឪពុកលោកឈ្មោះ Albert Sirisena ដែលជាទាហាន និង ម្តាយឈ្មោះ Dona Nandawathi ជាគ្រូបង្រៀន។ គួ្រសារលោកបានផ្លាស់ទីលំនៅពីក្រុង Gampaha ទៅក្រុង Polonnaruwa ហើយនៅឆ្នាំ១៩៥៥ លោកក៏បានចាប់ផ្តើមទទួលការ សិក្សានៅទីនោះ។ នៅឆ្នាំ១៩៧៣ លោក Sirisena បានបញ្ចប់ការសិក្សាថ្នាក់បរិញ្ញាបត្រផ្នែកកសិកម្ម ក្នុងប្រទេស ខណៈនៅឆ្នាំ១៩៨០ លោកទទួលបានបរិញ្ញាបត្រ ផ្នែកវិទ្យាសាស្រ្តនយោបាយ មកពីប្រទេសរុស្ស៊ី។ សព្វថ្ងៃ លោកមានភរិយាឈ្មោះ Jayanthi Pushpa Kumari និងបុត្រ៣នាក់ (ស្រីពីរនាក់ និងប្រុសម្នាក់)។

ការប្រឡូកចូលឆាកនយោបាយ៖
លោក Maithripala Sirisena បានចាប់ផ្តើមចូលប្រឡូកក្នុងឆាកនយោបាយនៅឆ្នាំ១៩៨៩ ក្នុងនាមជាសមាជិកសភា នៃប្រទេសស្រីលង្កា ហើយបានកាន់តួនាទីជាអនុរដ្ឋមន្រ្តី និងរដ្ឋមន្រ្តី នៅក្នុងក្រសួងមួយចំនួនរបស់រដ្ឋាភិបាលស្រីលង្កា ចាប់តាំងពីឆ្នាំ១៩៩៤មក រួមមានក្រសួងធារាសាស្រ្ត ក្រសួងកសិកម្ម និងក្រសួងសុខាភិបាលជាដើម។ លោកក៏ធ្លាប់បានកាន់តួនាទីផ្សេងៗ នៅក្នុងគណៈកម្មាធិការនៃសភាស្រីលង្កាផងដែរ។ លោក Sirisena ជាប្រធានគណបក្ស Sri Lanka Freedom Party (SLFP)។

ក្លាយជាប្រធានាធិបតី៖
នៅខែវិច្ឆិកា ឆ្នាំ២០១៤ លោក Maithripala Sirisena ត្រូវបានជ្រើសរើសជាបេក្ខជនតំណាងឲ្យសម្ព័ន្ធក្រុមបក្សប្រឆាំង ដើម្បីទៅប្រជែងក្នុងការបោះឆ្នោតជ្រើសរើស ប្រធានាធិបតីស្រីលង្កា ដែលបានប្រព្រឹត្តទៅកាលពីថ្ងៃទី០៨ ខែមករា ឆ្នាំ២០១៥។ លទ្ធផលឆ្នោតបានបង្ហាញថា លោក Sirisena បានទទួលជ័យជម្នះលើលោក Mahinda Rajapaksa ដែលកាលនោះជាប្រធានាធិបតី។ នៅថ្ងៃបន្ទាប់គឺថ្ងៃទី០៩ ខែមករា ឆ្នាំ២០១៥ លោក Sirisena ក៏បានឡើងកាន់អំណាចជាប្រធានាធិបតី ទី០៧ នៃប្រទេសស្រីលង្កា។ លោក Sirisena ក៏មានតួនាទីជាប្រមុខការពារជាតិស្រីលង្កាផងដែរ។

គួរបញ្ជាក់ថា ប្រទេសស្រីលង្កា ជាប្រទេសដែលស្ថិតនៅក្នុងទ្វីបអាស៊ី ភាគខាងត្បូង មានទំហំ៦៥,៦១០គីឡូម៉ែត្រាការ៉េ, ប្រជាពលរដ្ឋគិតឆ្នាំ២០១៨ មានចំនួនជាង២១លាននាក់, ចំណែកប្រាក់ចំណូល (GDP) ប្រជាពលរដ្ឋម្នាក់៤២៦៥ក្នុងមួយឆ្នាំ។ សម្រាប់ការបើកបរលើផ្លូវសាធារណប្រកាន់ឆ្វេង៕