សម្តេចធិបតី ហ៊ុន ម៉ាណែត ថ្លែងថា អ្នកនយោបាយចាស់វស្សានៅបារាំង លែងហ៊ានរិះគន់ថា «សម្តេចជាក្មេងមិនទន់ជ្រុះពន្លៃពីក្បាល» ទៀតហើយ ព្រោះប្រធានាធិបតីបារាំង អាយុប្អូនសម្តេច ២ខែ

ក្នុងពិធីជួបសំណេះសំណាលជាមួយបងប្អូនខ្មែរដែលកំពុងរស់នៅ ធ្វើការ និងសិក្សា ប្រមាណ ២៥០០នាក់ នៅទ្វីបអឺរ៉ុប ដែលធ្វើឡើងនៅទីក្រុងប៉ារីស ប្រទេសបារាំង នៅយប់ថ្ងៃទី១៤ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា អ្នកនយោបាយចាស់វស្សាមួយរូបដែលរស់នៅប្រទេសបារាំង លែងហ៊ានចេញមករិះគន់ថា សម្តេចនៅវ័យក្មេងទៀតហើយ ព្រោះប្រធានាធិបតីបារាំង អាយុប្អូនសម្តេច ២ខែ ដោយឡែកនាយករដ្ឋមន្រ្តីថ្មីរបស់ប្រទេសបារាំង អាយុតិចជាងសម្តេចរហូតដល់ទៅ១២ឆ្នាំ។

សម្តេចធិបតី ហ៊ុន ម៉ាណែត បានគូសបញ្ជាក់ថា វាជារឿងគួរឱ្យអស់សំណើចដែលក្នុងនាមជាអ្នកនយោបាយចាស់វស្សាមួយរូប បែរជាចេញមកនិយាយញុះញង់ ដើម្បីកុំឱ្យមេដឹកនាំប្រទេសទាំងពីរចចារគ្នាដើម្បីស្វែងរកផលប្រយោជន៍ជូនជាតិ។

សម្តេចធិបតី ហ៊ុន ម៉ាណែត ក៏បានគូសបញ្ជាក់ថា អ្នកនយោបាយចាស់វស្សារូបនោះ មានសញ្ជាតិពីរ គឺសញ្ជាតិខ្មែរ និងសញ្ជាតិបារាំង គាត់គួរតែអបអរសាទរនៅពេលដែលមេដឹកនាំប្រទេសខ្មែរ និងប្រទេសបារាំង ជួបគ្នា ដើម្បីពង្រឹងនូវទំនាក់ទំនង ដើម្បីបានផលប្រយោជន៍ដល់ប្រជាជនយើងទាំងពីរ៕

សម្តេចធិបតី ហ៊ុន ម៉ាណែត៖ ចាប់តាំងពីឆ្នាំ២០២០មក រាជរដ្ឋាភិបាលបានឧបត្ថម្ភសាច់ប្រាក់ដល់ពលរដ្ឋរងគ្រោះនិងងាយរងហានិភ័យ អស់ប្រមាណជិត ១៣០០លានដុល្លារ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានមានប្រសាសន៍ឲ្យដឹងថា ក្នុងរយៈពេល ៤២ខែកន្លងមកនេះ ពោលគឺចាប់តាំងពីឆ្នាំ២០២០មក រាជរដ្ឋាភិបាលបានឧបត្ថម្ភសាច់ប្រាក់អស់ចំនួនជិត ១៣០០លានដុល្លារអាមេរិក ជួយដល់ប្រជាពលរដ្ឋកម្ពុជាទូទាំងប្រទេសប្រមាណ ៧ម៉ឺនគ្រួសារ ឬជាង ២លាននាក់ ដែលរងគ្រោះដោយសារជំងឺរាតត្បាតកូវីដ-១៩ និងរងគ្រោះដោយសារបញ្ហាផ្សេងៗ។

សម្តេចធិបតីនាយករដ្ឋមន្ត្រី បានថ្លែងបែបនេះ ក្នុងឱកាសដែលសម្ដេចអញ្ជើញសំណេះសំណាល ជាមួយបងប្អូនសហគមន៍ខ្មែររស់នៅក្នុងទ្វីបអឺរ៉ុប នៅវេលាម៉ោង៥ល្ងាច ត្រូវនឹងម៉ោង១១យប់ ថ្ងៃទី១៤ ខែមករា ឆ្នាំ២០២៤ ម៉ោងនៅកម្ពុជា។

សម្តេចធិបតី ហ៊ុន ម៉ាណែត បានមានប្រសាសន៍បន្តឲ្យដឹងទៀតថា បច្ចុប្បន្នពិភពលោកកំពុងមានបញ្ហា២ ផ្ទួនគ្នា គឺបញ្ហាជំងឺរាតត្បាត និងបញ្ហាសេដ្ឋកិច្ច ដោយសារតែសង្គ្រាមរុស្ស៉ី-អ៊ុយក្រែន ហើយបន្តដល់សង្គ្រាមនៅមជ្ឈឹមបូព៌ា។ សម្តេចថា នៅក្នុងឆ្នាំនេះ គ្រប់ប្រទេសទាំងអស់កំពុងព្យាកររឿងបាតុភូតកម្តៅ អ៊ែលនីញ៉ូ (El Nino) និងរឿងស្រូវឡើងថ្លៃជាដើម ខណៈដែលកម្ពុជាក៏កំពុងត្រៀមវិធានការដោះស្រាយផងដែរ។

សម្តេចធិបតីនាយករដ្ឋមន្ត្រីបានថ្លែងបន្តថា ទោះជាយ៉ាងណា សម្ពាធអតិផរណាបានធ្វើប៉ះពាល់ទៅដល់សេដ្ឋកិច្ចពិភពលោក រួមទាំងកម្ពុជាផងដែរ ហេតុដូច្នេះហើយទើបរាជរដ្ឋាភិបាលមានគោលការឧបត្ថម្ភសាច់ប្រាក់បន្ថែមទៀត សម្រាប់គ្រួសារងាយរងហានិភ័យដោយសម្ពាធអតិផរណា ដែលបានអនុវត្តពីចុងឆ្នាំ២០២២ មកដល់ពេលនេះ គឺអ្នកដែលទទួលបានផលប្រយោជន៍ពីការជួយនេះ មានចំនួនជាង ៤៩ម៉ឺនគ្រួសារ គិតជាប្រជាពលរដ្ឋប្រមាណ ១,៨លាននាក់ ដែលជួបការលំបាក។ សម្តេចថា «រដ្ឋមិនមែនជាអ្នកមានទេ តែរដ្ឋមានទឹកចិត្តក្នុងការជួយដល់ប្រជាពលរដ្ឋរបស់ខ្លួន»។

សម្តេចធិបតី ហ៊ុន ម៉ាណែត បានគូសបញ្ជាក់ថា បញ្ហាសុខភាពប្រជាពលរដ្ឋក៏សំខាន់ដែរ ហេតុដូច្នេះហើយបានជារាជរដ្ឋាភិបាលបានដាក់ឲ្យអនុវត្តនូវមូលនិធិសប្បុរសធម៌ (មូលនិធិសុខាភិបាល) គឺប្រជាពលរដ្ឋក្រីក្រទៅព្យាបាលជំងឺនៅមន្ទីរពេទ្យរដ្ឋ រដ្ឋចេញថវិកាជួយគាត់ ដើម្បីកាត់បន្ថយការចំណាយ។ សម្តេចបានឲ្យដឹងបន្តថា ក្នុងរយៈពេលកន្លងនេះ មូលនិធិសប្បុរសធម៌បានជួយទៅដល់ប្រជាពលរដ្ឋប្រមាណ ៧០ម៉ឺនគ្រួសារ ឬ ស្មើនឹងប្រជាពលរដ្ឋប្រមាណ ២,៨លាននាក់។

សម្តេចធិបតីនាយករដ្ឋមន្ត្រី បានគូសបញ្ជាក់ថា ជីវភាពនិងសុខភាពរបស់ប្រជាពលរដ្ឋ គឺជាបញ្ហាអាទិភាពសម្រាប់រាជរដ្ឋាភិបាលដែលត្រូវយកចិត្តទុកដាក់។ សម្តេចថា នៅពេលដែលប្រជាពលរដ្ឋជួបការលំបាក ដាច់ខាតត្រូវមានការជួយពីរដ្ឋ ដោយរដ្ឋបានយកចិត្តទុកដាក់គ្រប់ពេលវេលា និងបានចំណាយទុនច្រើនណាស់ដើម្បីជួយប្រជាពលរដ្ឋ ទោះបីជារដ្ឋមានទុនតិច តែបើគិតពីអ្វីដែលរដ្ឋបានចេញរួចហើយនេះ គឺមានច្រើនហើយ។ តែទោះយ៉ាងណា ការចំណាយទុនគឺជាភាពចាំបាច់ដើម្បីជួយដល់ប្រជាពលរដ្ឋ ទោះជាការចំណាយនោះអស់ប៉ុន្មាន ក៏រដ្ឋត្រូវតែធ្វើដែរ៕

សម្តេចធិបតី ហ៊ុន ម៉ាណែត បង្ហាញការហួសចិត្តចំពោះអ្នកដែលដាស់តឿនប្រធានាធិបតីបារាំងថា "ប្រយ័ត្នចាញ់បោកសម្តេច"

 

ក្នុងពិធីជួបសំណេះសំណាលជាមួយបងប្អូនខ្មែរដែលកំពុងរស់នៅ ធ្វើការ និងសិក្សា ប្រមាណ ២៥០០នាក់ នៅទ្វីបអឺរ៉ុប ដែលធ្វើឡើងនៅទីក្រុងប៉ារីស ប្រទេសបារាំង នៅយប់ថ្ងៃទី១៤ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត បានបង្ហាញការហួសចិត្តយ៉ាងខ្លាំងចំពោះបុគ្គលមួយរូបដែលបានផ្ញើលិខិតដាស់តឿនប្រធានាធិបតីបារាំងថា "ប្រយ័ត្នចាញ់បោកសម្តេច"។

សម្តេចធិបតី ហ៊ុន ម៉ាណែត បានគូសបញ្ជាក់ថា មុននឹងប្រធានាធិបតីបារាំងអញ្ជើញសម្តេចមកបំពេញទស្សនកិច្ចនេះ គឺមានការគិតគូរពិចារណាខ្លាំងណាស់ ពិសេសគឺមានការវាយតម្លៃពីទីប្រឹក្សា និងឥស្សរជនជាន់ខ្ពស់របស់បារាំង។ សម្តេចបានបន្តថា ប្រសិនបើប្រធានាធិបតីប្រទេសមហាអំណាចមួយអាចឱ្យសម្តេចបោកបាន នោះគឺពិតជារឿងអស់សំណើចណាស់។

សម្តេចធិបតី ហ៊ុន ម៉ាណែត ក៏បានគូសបញ្ជាក់ដែរថា ពុំមានរឿងអ្វីត្រូវបោកនោះទេ កិច្ចការទាំងអស់ដែលត្រូវធ្វើសម្រាប់ប្រធានាធិបតីនិងរូបសម្តេចដែលជាប្រមុខរាជរដ្ឋាភិបាលនោះ គឺជាកាតព្វកិច្ចដើម្បីជាតិនិងប្រជាជន ពោលគឺពុំមែនដើម្បីផលប្រយោជន៍បុគ្គលនោះទេ៕

សម្តេចធិបតី ហ៊ុន ម៉ាណែត៖ បារាំងបានផ្តល់តម្លៃខ្ពស់ចំពោះទំនាក់ទំនងការទូត និងទំនាក់ទំនងនយោបាយនិងសេដ្ឋកិច្ច ជាមួយកម្ពុជា

ក្នុងពិធីជួបសំណេះសំណាលជាមួយបងប្អូនខ្មែរដែលកំពុងរស់នៅ ធ្វើការ និងសិក្សា ប្រមាណ ២៥០០នាក់ នៅទ្វីបអឺរ៉ុប ដែលធ្វើឡើងនៅទីក្រុងប៉ារីស ប្រទេសបារាំង នៅយប់ថ្ងៃទី១៤ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា តាមរយៈការអញ្ជើញរបស់ប្រធានាធិបតីបារាំង បានឆ្លុះបញ្ចាំងឱ្យឃើញថា បារាំង បានផ្តល់តម្លៃ និងវាយតម្លៃខ្ពស់ចំពោះទំនាក់ទំនងការទូត ទំនាក់ទំនងនយោបាយនិងសេដ្ឋកិច្ច រវាងកម្ពុជា និងបារាំង ដែលនេះគឺជាមោទនភាពរបស់យើង ហើយយើងក៏ផ្តល់ការឆ្លើយតបដោយស្មើភាពគ្នាផងដែរ។

សម្តេចធិបតី ហ៊ុន ម៉ាណែត បានគូសបញ្ជាក់ថា ទំនាក់ទំនងកម្ពុជា-បារាំង ដែលមានជាយូរមកហើយ ហើយក៏ជាទំនាក់ទំនងជាប្រវត្តិសាស្រ្តដែលយើងត្រូវបន្តពូនជ្រុំផងដែរ៕

សម្តេចធិបតី ហ៊ុន ម៉ាណែត៖ មានអ្នកខ្លះចោទថា ប្រជាពលរដ្ឋដែលមកជួបសម្តេចត្រូវបានទិញទឹកចិត្ត

ក្នុងពិធីជួបសំណេះសំណាលជាមួយបងប្អូនខ្មែរដែលកំពុងរស់នៅ ធ្វើការ និងសិក្សា ប្រមាណ ២៥០០នាក់ នៅទ្វីបអឺរ៉ុប ដែលធ្វើឡើងនៅទីក្រុងប៉ារីស ប្រទេសបារាំង នៅយប់ថ្ងៃទី១៤ ខែមករា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងថា មានអ្នកខ្លះចោទថា ប្រជាពលរដ្ឋដែលមកជួបសម្តេច ត្រូវបានគេទិញទឹកចិត្ត ដែលប្រការនេះពុំមែនជារឿងត្រឹមត្រូវទាល់តែសោះហើយការលើកឡើងបែបនេះគឺជាការមើលស្រាលប្រជាពលរដ្ឋខ្មែរយើងនៅក្រៅប្រទេស។

សម្តេចធិបតី ហ៊ុន ម៉ាណែត បានគូសបញ្ជាក់ថា ស្មារតីនៃការរួមគ្នាក្នុងនាមជាជាតិខ្មែរ ទោះបីនៅទីណាក៏ដោយ សុខចិត្តរត់ស្កាត់រកគ្នាដើម្បីបានជួបគ្នា ដែលនេះបង្ហាញពីស្មារតីការស្រឡាញ់រាប់អានគ្នា។

សម្តេចធិបតី ហ៊ុន ម៉ាណែត ក៏បានគូសបញ្ជាក់ថា ប្រជាពលរដ្ឋខ្មែរនៅក្រៅប្រទេស ក៏ចង់ដឹងពីសុខទុក្ខរបស់ប្រទេសជាតិរបស់ខ្លួន បើទោះបីជាពួកគាត់បានមករស់នៅក្រៅប្រទេសក៏ដោយ ក៏តែងតែគិតគូរពីប្រទេសជាតិទាំងអស់។ សម្តេចបានបន្តថា ការមកជួបជុំគ្នានៅពេលនេះ ក៏ដើម្បីចង់ដឹងពីស្ថានភាពរបស់ប្រទេសជាតិ ចង់ដឹងពីសកម្មភាពដែលរាជរដ្ឋាភិបាលបាននិងកំពុងធ្វើ ពិសេសគឺចង់ដឹងពីសុខទុក្ខរបស់ប្រជាពលរដ្ឋ៕

ផ្សាយបន្តផ្ទាល់៖ សម្តេចធិបតី ហ៊ុន ម៉ាណែត អញ្ជើញសំណេះសំណាលជាមួយបងប្អូនសហគមន៍ខ្មែររស់នៅក្នុងទ្វីបអឺរ៉ុប

ផ្សាយបន្តផ្ទាល់៖ សម្តេចធិបតី ហ៊ុន ម់ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត អញ្ជើញសំណេះសំណាលជាមួយ បងប្អូនសហគមន៍ខ្មែររស់នៅក្នុងទ្វីបអឺរ៉ុប ។

ថ្ងៃអាទិត្យ ៤ កើត ខែបុស្ស ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៤ ខែមករា ឆ្នាំ២០២៤

ទស្សនារូបភាព៖ បងប្អូនសហគមន៍ខ្មែររស់នៅក្នុងទ្វីបអឺរ៉ុប សម្តែងការគាំទ្រ និងស្វាគមន៍ចំពោះដំណើរអញ្ជើញរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត នៅលើទឹកដីទីក្រុងប៉ារីស ប្រទេសបារាំង

បងប្អូនសហគមន៍ខ្មែររស់នៅក្នុង ទ្វីបអឺរ៉ុប លើករូបថតព្រះមហាក្សត្រ សម្តេចម៉ែ សម្តេចតេជោ ហ៊ុន សែន ក្នុងឱកាសមកទទួលវត្តមាន សម្តេចមហាបវរធិបតី នាយករដ្ឋមន្ត្រីនៃកម្ពុជា និង លោកជំទាវបណ្ឌិត នៅលើទឹកដីទីក្រុងប៉ារីស សាធារណរដ្ឋបារាំង នៅថ្ងៃទី១៤ ខែមករា ឆ្នាំ២០២៤។ ថ្ងៃអាទិត្យ ៤ កើត ខែបុស្ស ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៤ ខែមករា ឆ្នាំ២០២៤