ផ្សាយបន្តផ្ទាល់៖ សន្និសីទសារព័ត៌មាន សម្តេចតេជោ ហ៊ុន សែន ស្តីពីបច្ចុប្បន្នភាព និងវិធានការនានារបស់រាជរដ្ឋាភិបាលក្នុងកាប្រយុទ្ធប្រឆាំងជំងឺកូវីដ-១៩

ប្រសាសន៍ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ថ្លែងក្នុងសន្និសីទសារព័ត៌មានស្តីពីបច្ចុប្បន្នភាព និងវិធានការនានារបស់រាជរដ្ឋាភិបាលក្នុងកាប្រយុទ្ធប្រឆាំងជំងឺកូវីដ-១៩ នៅព្រះរាជាណាចក្រកម្ពុជា

អ្នកជំងឺកូវីដ-១៩ ៥នាក់ថ្មីទៀតជាសះស្បើយ ធ្វើឲ្យអ្នកជាសះស្បើយកើនដល់៥៨នាក់

នៅថ្ងៃនេះក្រសួងសុខាភិបាល បានបន្តប្រកាសនូវដំណឹងល្អជូនប្រជាពលរដ្ឋថា អ្នកជំងឺកូវីដ-១៩ បានជាសះស្បើយ ៥នាក់បន្ថែមធ្វើឲ្យចំនួនអ្នកជាសះស្បើយកើនឡើងរហូតដល់៥៨នាក់ ហើយរកឃើញករណីឆ្លងតែម្នាក់ប៉ុណ្ណោះ។

ចំណែកអ្នកកំពុងសម្រាកព្យាបាលជំងឺកូវីដធ្លាក់ចុះមកត្រឹមចំនួន៥៧នាក់ នៃអ្នកឆ្លងសរុប១១៥នាក់។ បើគិតត្រឹមព្រឹកថ្ងៃទី៧ ខែមេសា ឆ្នាំ២០២០នេះ។ នេះបើតាមការប្រកាសរបស់ក្រសួងសុខាភិបាល ដែលទទួលបានមុននេះបន្តិច។
អ្នក៥នាក់ដែលជាសះស្បើយរួមមាន៖
១៖ ស្ត្រីជនជាតិខ្មែរអាយុ៦១ឆ្នាំ រស់នៅរាជធានីភ្នំពេញ បានព្យាបាលជាសះស្បើយ ដោយទទួលបានការធ្វើតេស្តអវិជ្ជមានវីរុសកូវី១៩ ចំនួន២លើក ត្រូវបានអនុញ្ញាតឲ្យចេញពីមណ្ឌលសុខភាពចាក់អង្រែក្រោម។
២៖ បុរសខ្មែរអាយុ៤០ ឆ្នាំ រស់នៅសង្កាត់ច្រាំងចំរេះ ខណ្ឌឬស្សីកែវ រាជធានីភ្នំពេញ បានជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន២លើក បានចេញពីមន្ទីរពេទ្យមិត្តភាពខ្មែរសូវៀតរួចហើយ។
៣៖ បុរសជនជាតិខ្មែរអាយុ២៨ឆ្នាំ នៅភូមិច្រករមៀត ឃុំអូរឬស្សី ស្រុកកំពង់ត្រឡាច ខេត្តកំពង់ឆ្នាំង បានជាសះស្បើយ ដោយលទ្ធផលធ្វើតេស្តអវិជ្ជមាន២លើក ត្រូវបានអនុញ្ញាតឲ្យចេញពីមន្ទីរពេទ្យខេត្តកំពងឆ្នាំង។
៤៖ ស្ត្រីជនជាតិខ្មែរ អាយុ៣៩ឆ្នាំ នៅសង្កាត់សំបូរ ក្រុងសៀមរាប បានជាសះស្បើយ ដោយអវិជ្ជមានវីរុសកូវីដ១៩ ចំនួន២លើក ត្រូវបានអនុញ្ញាតឲ្យចេញពីមន្ទីរពេទ្យខេត្តសៀមរាប។
៥៖ បុរសជនជាតិខ្មែរអាយុ៣០ឆ្នាំ ជាអ្នកបម្រើការនៅស្តាធីវី (Star TV) ច្រកប៉ោយប៉ែត បានជាសះស្បើយ ដោយអវិជ្ជមានវីរុសកូវី១៩ ចំនួន២លើក ត្រូវបានអនុញ្ញាតឲ្យចេញពីមន្ទីរពេទ្យ ខេត្តបន្ទាយមានជ័យ ៕

លោកផាន់ ចាន់ធុល ដឹកនាំក្រុមការងារបន្តផ្សព្វផ្សាយវិធានការបង្ការ ទប់ស្កាត់ជម្ងឺកូវីដ-១៩ និងនាំយកអំណោយឧបត្ថម្ភដល់គ្រួសារមានជីវភាពខ្វះខាត

ប៉ៃលិន៖ នៅថ្ងៃទី០៥ ខែមេសា ឆ្នាំ២០២០ លោក ផាន់ ចាន់ធុល ប្រធានគណបក្សប្រជាជនកម្ពុជាខេត្តប៉ៃលិន អមដំណើរដោយថ្នាក់ដឹកនាំគណបក្សគ្រប់ជាន់ថ្នាក់ ព្រមទាំងក្រុមការងារបានបន្តចុះសួរសុខទុក្ខ និងផ្សព្វផ្សាយអំពីវិធានការបង្ការ និងទប់ស្កាត់ការរីករាលដាលជម្ងឺកូវីដ-១៩ នៅតាមខ្នងផ្ទះ ព្រមទាំងឧបត្ថម្ភស្បៀងដល់ប្រជាពលរដ្ឋដែលមានជីវភាពខ្វះខាត នៅក្នុងស្រុកសាលាក្រៅ ខេត្តប៉ៃលិន ចំនួន ១០៣គ្រួសារ បន្ទាប់ពីពួកគាត់រងផលប៉ះពាល់សេដ្ឋកិច្ចគ្រួសារ ដោយការផ្ទុះឡើងនៃជម្ងឺ Covid-19។

លោក ផាន់ ចាន់ធុល បានលើកឡើង ថា ដោយសារការព្រួយបារម្ភចំពោះជម្ងឺកូវីត-១៩ ធ្វើឱ្យក្រុមហ៊ុន សហគ្រាស និងកន្លែងការងារមួយចំនួនត្រូវបានបិទទ្វារ បណ្តាលឱ្យប្រជាពលរដ្ឋខ្លះអត់ការងារធ្វើ ហើយពលរដ្ឋខ្លះទៀត ដែលធ្វើជាពលករ នៅក្រៅប្រទេសត្រូវបង្ខំចិត្តវិលត្រឡប់មកកាន់ស្រុកកំណើត និងលំនៅដ្ឋានវិញ ដូច្នេះធ្វើឱ្យប៉ះពាល់ដល់សេដ្ឋកិច្ចក្រុមគ្រួសាររបស់ពួកគាត់។

ជាក់ស្តែងក្រុមការងារគណបក្សប្រជាជនកម្ពុជាខេត្ត បាននាំយកអំណោយស្បៀងមកឧបត្ថម្ភដល់ពួកគាត់នៅតាមខ្នងផ្ទះហើយបើទោះបីជាអំណោយស្បៀងទាំងនេះមិនបានបំពេញតាមតំរូវការរបស់បងប្អូនក៏ពិតមែន តែក៏អាចដោះស្រាយបានមួយកំរិតផងដែរ ដូច្នេះបងប្អូនទាំងអស់ត្រូវខិតខំប្រឹងប្រែងប្រកបមុខរបរចិញ្ជឹមជីវិត និងបង្កបង្កើតផលដាំដំណាំឱ្យបានកាន់ច្រើនដើម្បីបង្កើនជីវភាពឱ្យបានធូធារជាងមុន ជាពិសេសត្រូវរស់នៅស្អាត ហូបស្អាត មានអនាម័យ ដោយត្រូវពាក់ម៉ាស់នៅកន្លែងសាធារណៈ និងលាងសម្អាតដៃឱ្យបានជាប្រចាំ ក្នុងន័យចូលរួមបង្ការ និងទប់ស្កាត់ការរីករាលដាលនៃជម្ងឺកូវីត ១៩។

នៅក្នុងឱកាសនោះផងដែរ លោក ផាន់ ចាន់ធុល ក៏បានក្រើនរំលឹកដល់អជ្ញាធរមូលដ្ឋានគ្រប់ជាន់ថ្នាក់ និងក្រុមគ្រូពេទ្យជំនាញ ត្រូវបន្តធ្វើការផ្សព្វផ្សាយអប់រំ នៅតាមមូលដ្ឋាន ជាពិសេសនៅតាមទីប្រជុំជន និងទីសាធារណៈឲ្យបានផុលផុសអំពីវិធានការបង្ការ និងទប់ស្កាត់ការរីករាលដាលជម្ងឺកូវីដ-១៩ផងដែរ។

សូមបញ្ជាក់ថា៖ ប្រជាពលរដ្ឋមានជីវភាពខ្វះខាតក្នុងស្រុកសាលាក្រៅ ដែលបានទទួលអំណោយស្បៀងពីក្រុមការងារ គណបក្ស ប្រជាជនកម្ពុជាខេត្តប៉ៃលិន មានចំនួន ១០៣គ្រួសារ ក្នុងនោះឃុំសាលាក្រៅ ចំនួន២៧គ្រួសារ និងឃុំស្ទឹងត្រង់ ចំនួន៧៦គ្រួសារ ដោយក្នុង ១គ្រួសារ ទទួលបានអង្ករ២៥គីឡូក្រាម ត្រីខ ១យួរ និងទឹកត្រី១យួរ ផងដែរ៕

លោក ឈឿន ប៊ុនណ្ណារ័ត្ន រដ្ឋលេខាធិការក្រសួងមុខងារសាធារណៈ ចូលរួមបរិច្ចាគថវិការចំនួន១លានរៀល រយៈពេល៦ខែដល់គណៈកម្មការជាតិប្រយុទ្ធនឹងជំងឺកូវីដ១៩

ក្នុងស្មារតីនៃការចែករំលែក សាមគ្គីភាព និងការគោរពតាមគំរូវីរភាពរបស់លោកនាយរដ្ឋមន្ត្រី ហ៊ុន សែន ក្នុងស្ថានភាពនៃជំងឺរលាកផ្លូវដង្ហើមធ្ងន់ធ្ងរ(កូវីដ១៩) បាននិងកំពុងរីករាលដាលនៅកម្ពុជា លោក ឈឿន ប៊ុនណ្ណារ័ត្ន រដ្ឋលេខាធិការក្រសួងមុខងារសាធារណៈ បានចូលរួមបរិច្ចាគថវិការចំនួន១,០០០,០០០រៀល រយៈពេល៦ខែ នៃប្រាក់បៀវត្សប្រចាំខែ ចាប់ពីខែឧសភា ដល់ខែតុលា ឆ្នាំ២០២០ ដល់គណៈកម្មការជាតិប្រយុទ្ធនឹងជំងឺកូវីដ១៩ ៕

(Video)៖ ក្រសួងសុខាភិបាលប្រកាសថាមិនមានអ្នកឆ្លងជំងឺកូវីដថ្មីទេ ខណៈមានអ្នកជាសះស្បើយចំនួន៣នាក់បន្ថែមទៀត សរុបអ្នកជាសះស្បើយកើនដល់៥៣នាក់ហើយ!

លោកបណ្ឌិត ទី នរិន្ទ ចុះសួរសុខទុក្ខប្រជាពលរដ្ឋ និងផ្សព្វផ្សាយវិធានការបង្ការ និងទប់ស្កាត់ការរីករាលដាលជំងឺឆ្លងកូវីដ-១៩

ពោធិ៍សាត់៖ លោកបណ្ឌិត ទី នរិន្ទ ប្រធានក្រុមការងារថ្នាក់កណ្តាលចុះជួយស្រុកភ្នំក្រវាញ និងសហការី លោក គង់ សារាជ ប្រធានគណៈកម្មការទី ៩ ព្រឹទ្ធសភា បានអញ្ជើញចុះសាកសួរសុខទុក្ខ ផ្សព្វផ្សាយវិធានការបង្ការ និងទប់ស្កាត់ការរីករាលដាលជំងឺឆ្លង កូវីដ-១៩ ដល់បងប្អូនប្រជាជនក្រីក្រនៅឃុំលាច គ្រួសារក្រីក្រចំនួន ៩គ្រួសារ និងក្រុមការងារជាងស្ថាបនាស្ពាន ៨គ្រួសារ។

នៅក្នុងពិធីសួរសុខទុក្ខ សំណេះសំណាលនេះដែរ លោកប្រធាន បានផ្ដាំផ្ញើទៅបងប្អូន ប្រជាជនទាំងអស់សូមចូលរួមទប់ស្តាត់ ការពារការរីករាលដាលនៃជំងឺឆ្លងនេះ ដោយត្រូវអនុវត្តឲ្យបានជាប់លាប់អនាម័យតាមការណែនាំរបស់ក្រសួងសុខាភិបាល ដើម្បីថែរក្សា សុខភាពផ្ទាល់ខ្លួន សមាជិកក្រុមគ្រួសាររបស់បងប្អូនឲ្យបានល្អ ក៏ដូចជាសហគមន៍ ដែលបងប្អូនរស់នៅ ដោយត្រូវប្រើប្រាស់ក្រមា ឬម៉ាសឲ្យបានត្រឹមត្រូវ ត្រូវលាងដៃនឹងសាប៊ូឲ្យបានស្អាតបាតញឹកញាប់។

លោកបានបន្តថា ក្នុងករណីដែលបងប្អូនមានអាការៈក្តៅខ្លួន ក្អក ឈឺបំពង់ក ពិបាកដកដង្ហើម ឬមានការសង្ស័យ សូមធ្វើការទំនាក់ទំនងលេខទូរស័ព្ទ ១១៥ មន្ទីរពេទ្យបង្អែកស្រុកភ្នំក្រវាញ ឬអាជ្ញាធរដែនដីជាដើម។ ក្នុងពិធីផ្សព្វផ្សាយនេះ ក៏មានការអញ្ជើញចូលរួមរបស់ក្រុមការងារស្រុក ឃុំ និងអាជ្ញាធរដែនដីផងដែរ។

លោកប្រធាន និងក្រុមការងារ ក៏បានឧបត្ថម្ភជូនបងប្អូនប្រជាជននូវគ្រឿងឧបភោគ-បរិភោគដែលក្នុងមួយគ្រួសារទទួលបាន ៖ អង្ករចំនួន ២៥គីឡូក្រាម មីជាតិ ០២កេស ទឹកត្រី ០២យួរ ទឹកស៊ីអ៊ីវ ០២យួរ ត្រីខកំប៉ុង ០២យួរ ទឹក ដោះគោខាប់ ០៦កំប៉ុង សាប៊ូលាងដៃ ០៥ដុំ ក្រមា ០១ ព្រមទាំងថវិកាចំនួន ៥ម៉ឺនរៀលថែមទៀតផង៕

ក្រសួងសុខាភិបាលប្រកាសថាមិនមានអ្នកឆ្លងជំងឺកូវីដថ្មីទេ ខណៈមានអ្នកជាសះស្បើយចំនួន៣នាក់បន្ថែមទៀត សរុបអ្នកជាសះស្បើយកើនដល់៥៣នាក់ហើយ!

នៅព្រឹកថ្ងៃទី៦ ខែមេសា ឆ្នាំ២០២០នេះ ក្រសួងសុខាភិបាល បានប្រកាសថា មិនមានអ្នកឆ្លងជំងឺកូវីដថ្មីទេ មានតែករណីជាសះស្បើយចំនួន៣នាក់ថ្មីទៀត ធ្វើឲ្យអ្នកជាសះស្បើយសរុបកើនដល់៥៣នាក់។

សូមជម្រាបផងដែរថា អ្នកកំពុងសម្រាកព្យាបាលជំងឺកូវីដធ្លាក់ចុះមកត្រឹមចំនួន៦១នាក់ នៃអ្នកឆ្លងសរុប១១៤នាក់។ បើគិតត្រឹមព្រឹកថ្ងៃទី០៦ ខែមេសា ឆ្នាំ២០២០នេះ។
ករណីជាសះស្បើយ៣នាក់ថ្មីទៀតនេះ មានបរុសជនជាតិម៉ាឡេស៊ី អាយុ៣៩ឆ្នាំ បុរសជនជាតិម៉ាឡេស៊ី អាយុ២៦ឆ្នាំ និងបុរសជនជាតិម៉ាឡេស៊ី អាយុ៤០ឆ្នាំ ដែលត្រឡប់មកពីធ្វើបុណ្យសាសនា នៅស្រុកកងមាស ខេត្តកំពង់ចាម។ ពេលនេះ ពួកគេត្រូវបានអនុញ្ញាតឱ្យចាកចេញពីមន្ទីរពេទ្យខេត្តកំពង់ចាម ត្រឡប់ទៅផ្ទះវិញហើយ៕