កាលពីថ្ងៃទី១៣ ខែធ្នូឆ្នាំ២០១៧ កន្លងមកនេះ ឧបការីរងរដ្ឋមន្ត្រីការបរទេសអាមេរិកលោក W. Patrick Murphy បានថ្លែងដោយហៅការចោទប្រកាន់រដ្ឋាភិបាលកម្ពុជា ថាកំពុងបានប្រើប្រាស់ “ទ្រឹស្តីឃុបឃិតប្រឌិតឡើង” និងជា “ការចោទប្រកាន់មិនពិត” ជាវោហារស័ព្ទប្រឆាំងអាមេរិក របស់រដ្ឋាភិបាលកម្ពុជា ក្នុងគោលដៅ “ទាញសហរដ្ឋអាមេរិក ឱ្យចូលទៅក្នុងផ្លូវមួយដែលទាំងអស់គ្នា មានការភ្ញាក់ផ្អើល និងមិនចង់បាន”។ តើប្រាកដទេថា អាមេរិកមិនឋិតនៅពីក្រោយផែនការផ្តួលរំលំរាជរដ្ឋាភិបាលស្របច្បាប់កម្ពុជា? តើការថ្លែងទំលាក់កំហុសបែបការទូតគ្មានសុច្ចរិតភាពរបស់លោក W.Patrick Murphy គឺពិតជាជំហររបស់រដ្ឋការ ដូណាល់ ត្រាំ ឬ ជាជំហរបស់រដ្ឋការចាស់មុនៗរបស់អាមេរិក។ តើអាមេរិកប្រាកដច្បាស់ទេថា ទង្វើរបស់ខ្លួនមិនបានជ្រៀតជ្រែកចូលក្នុងកិច្ចការផ្ទៃក្នុងរបស់កម្ពុជា?
សម្រាប់ប្រជាជនកម្ពុជាទាំងមូលមានការសោកស្តាយយ៉ាងខ្លាំង ចំពោះការអត្ថាធិប្បាយគ្មានការទទួលខុសត្រូវរបស់លោក W. Patrick Murphy ដែលបានចោទរាជរដ្ឋាភិបាលកម្ពុជាប្រើប្រាស់ទ្រឹស្តី ឃុបឃិតប្រឌិតឡើងដែលជាចេតនាដោះសារ និងគេចពីការទទួលខុសត្រូវក្នុងសេណារីយ៉ូដ៏ទុច្ចរិតដែលនឹងឈានទៅផ្តួលរំលំរាជរដ្ឋាភិបាលស្របច្បាប់។ វាប្រាកដណាស់ថា លោក កឹម សុខា ផ្ទាល់ បានអះអាងយ៉ាងច្បាស់ថា គ្មានអ្នកណាដឹងទេ ក្រៅពីរូបលោកដែលអាមេរិកបានអញ្ជើញរូបលោកឱ្យទៅអាមេរិកមុនគេជាលើកដំបូង ដើម្បីរៀនសូត្រ និងទទួលផែនការជាយុទ្ធសាស្រ្ត ដើម្បីផ្តួលរំលំរដ្ឋអំណាចស្របច្បាប់ ដឹកនាំដោយគណបក្សប្រជាជនកម្ពុជា។
វាពិតជាមានភាពច្បាស់ប្រាកដណាស់តាមរយៈវីឌីអូឃ្លីបចេញផ្សាយដោយបណ្តាញព័ត៌មាន CBN របស់អូស្រ្តាលី ដែលបានបង្ហាញនូវពាក្យសំដីចេញពីមាត់របស់លោក កឹម សុខាផ្ទាល់ថា តាំងពីឆ្នាំ១៩៩៣ សហរដ្ឋអាមេរិក ពិតជាបាននៅពីក្រោយផែនការជាយុទ្ធសាស្រ្ត ដើម្បីរំលំរាជរដ្ឋាភិបាលកម្ពុជា ហើយចាប់តាំងពីឆ្នាំ២០០២ ដើម្បីឱ្យមានការផ្លាស់ប្តូរនៅកម្ពុជា សហរដ្ឋអាមេរិកបានជួយជ្រោមជ្រែងឱ្យលោក កឹម សុខា បង្កើតមជ្ឈមណ្ឌលសិទ្ធិមនុស្សកម្ពុជា ដើម្បីបំផុសគំនិតឱ្យប្រជាជននៅថ្នាក់មូលដ្ឋានចងកំហឹង ជាមួយនឹងរដ្ឋអំណាច ដើម្បីឈានដល់ការផ្តួលរំលំរដ្ឋអំណាចស្របច្បាប់មួយតាមរយៈយុទ្ធសាស្រ្តផ្លាស់ប្តូរជាវិជ្ជមានតាមគំរូបដិវត្តពណ៌នៅយូហ្គោស្លាវី និងស៊ែបប៊ី។
សម្រាប់មជ្ឈដ្ឋានជាតិ និងអន្តរជាតិទាំងឡាយដែលបានមើលឃើញវីឌីអូឃ្លីបខាងលើនោះ ពិតជាមានអារម្មណ៍ភ្ញាក់ផ្អើលស្ទើរតែមិនគួរឱ្យជឿថា លោក កឹម សុខា អាចលាតត្រដាងនូវសេណារីយ៉ូជាយុទ្ធសាស្រ្តដ៏ជាក់លាក់មួយ ដែលទំនងជាផែនការផ្តួលរំលំនេះ រៀបចំឡើង តាមរូបភាពបដិវត្តពណ៌នៅយូហ្គោស្លាវី និងស៊ែបប៊ី។ លោក កឹម សុខាបានឆ្លើយប្រាប់ថា មានអ្នកជំនាញ និងសាស្រ្តាចារ្យរបស់អាមេរិក និងកាណាដា បានជួយលោក ក្នុងការតម្រង់ទិសនៃការអនុវត្តផែនការឱ្យមានប្រសិទ្ធភាព តាមរយៈការគាស់ពីក្រោមឡើងទៅលើ ដែលក្នុងយុទ្ធសាស្រ្តនោះ គឺបំផុសចលនាចងគំហឹងនៅថ្នាក់ក្រោមឱ្យមានការស្អប់ខ្ពើមរដ្ឋអំណាច។ វាជាការពិត បដិវត្តន៍មួយនេះ ត្រូវបានគេមើលឃើញលេចចេញជាសកម្មភាព និងរូបភាពផ្សេងៗ ដែលជាសញ្ញាឈានទៅរកការផ្តួលរំលំក្រោយការបោះឆ្នោតឆ្នាំ២០១៣ ដែលពួកអតីតមេដឹកនាំបក្សប្រឆាំងជាអ្នកបញ្ជា និងអាមេរិក រួមទាំងអង្កការអន្តរជាតិមួយចំនួនដូចជា NDI, IRI, CANVAS ជាដើម ជាអ្នកនៅពីក្រោយ និងបន្ទរដោយវិទ្យុអាស៊ីសេរី និងវីអូអេ។
ត្រង់ចំណុចទាំងនេះ វាបានសរបញ្ជាក់ឱ្យឃើញថា កម្ពុជា មិនបានចោទអាមេរិក ជាអ្នកសមគំនិត ជាមួយអតីតបក្សប្រឆាំងចង់ផ្តួលរំលំរដ្ឋាភិបាលកម្ពុជា នោះទេ។ ហើយកម្ពុជា ក៏មិនបានចោទប្រកាន់សហរដ្ឋអាមេរិកនៅពីក្រោយផែនការផ្តួលរំលំរាជរដ្ឋាភិបាលកម្ពុជានោះទេ។ ការពិតជាក់ស្តែង គឺលោក កឹម សុខាខ្លួនឯងទេ ៉ុណោះីបានមើលជើជាអ្នកបានបង្ហាញថា សហរដ្ឋអាមេរិក ពិតជាបានជួយជ្រោមជ្រែងក្នុងការរៀបចំគោលនយោបាយ និងផែនការយុទ្ធសាស្រ្ត ដើម្បីការផ្លាស់ប្តូរពិតប្រាកដនៅកម្ពុជាង់ចំណុចទាំងនេះាប់ដែលនាំអោយមានកាណាដាទួលផែក។
ប្រធានាធិបតីអាមេរិក ដូណាល់ ត្រាំ បានថ្លែងអះអាងថា រដ្ឋការរបស់លោកនឹងមិនប្រើប្រាស់នយោបាយ ដើម្បីជ្រៀតជ្រែកចូលក្នុងកិច្ចការផ្ទៃក្នុងនៃរដ្ឋណាមួយទេ គឺលោក បានប្រកាសគោរពអធិបតេយ្យ ឯករាជ្យ និងបូរណភាពទឹកដីនៃរដ្ឋនីមួយៗ ដោយគោរពផលប្រយោជន៍ទៅវិញទៅមក។ ប៉ុន្តែជាអកុសល នៅមានសល់អ្នកនយោបាយអាមេរិកក្នុងរដ្ឋការមុនៗមួយចំនួនរាប់ទាំងលោក ចន ម៉ាក់ខេន លោក ថេត គ្រូស និងប្រហែលលោក ប៉ាទ្រីក ម័រហ្វី ឧបការីរងរដ្ឋមន្ត្រីក្រសួងការបរទេសអាមេរិកផង ដែលកំពុងតែបន្តនយោបាយចាស់ ដើម្បីផ្តួលរំលំមេដឹកនាំ ឬ រដ្ឋអំណាចស្របច្បាប់នៅកម្ពុជា ដែលក្រុមអ្នកនយោបាយមួយក្តាប់តូចទាំងនោះ តែងតែប្រើលេសចោទប្រកាន់រដ្ឋអំណាចកម្ពុជា ថាផ្តាច់ការ មិនគោរពសិទ្ធិមនុស្ស និងគ្មានប្រជាធិបតេយ្យ។ ល។ ជាពិសេស ក្នុងប្រវត្តិសាស្រ្តដ៏ជូរចត់ក្នុងឆ្នាំ១៩៦០ និង១៩៧០ ប្រជាជនកម្ពុជាទាំងមូលពិតជាទទួលបានការឈឺចាប់ និងមហន្តរាយកើតចេញពីកំហុសនៃការជ្រៀតជ្រែករបស់អាមេរិកចូលក្នុងកិច្ចការផ្ទៃក្នុងកម្ពុជា ដែលបាននាំឱ្យកម្ពុជាមានការផ្លាស់ប្តូររបបនយោបាយមួយក្រោមឥទ្ធិពលអាមេរិកនាពេលនោះ។ ហើយប្រជាជនខ្មែរទាំងមូលមិនបានពេញចិត្តនឹងការផ្លាស់ប្តូររបបនយោបាយនោះទេ តែផ្ទុយទៅវិញប្រជាជន និងប្រជាជាតិកម្ពុជាទាំងមូលពិតជាទទួលបានការឈឺចាប់ និងមហន្តរាយកើតចេញពីផលវិបាកនៃការជ្រៀតជ្រែករបស់អាមេរិកចូលក្នុងកិច្ចការផ្ទៃក្នុងរបស់កម្ពុជាយ៉ាងប្រាកដ។
ជាងពីរទសវត្សមកនេះប្រជាជនកម្ពុជាពិតមានមោទនភាពដែលប្រទេសមានសុខសន្តិភាពរឹងមាំដែលកំពុងបោះជំហ៊ានឆ្ពោះទៅរកការរីកចម្រើន និងការកាត់បន្ថយភាពក្រីក្រនិងការលើកកម្ពស់ជីវភាពរស់កាន់តែប្រសើរឡើងជាបន្តបន្ទាប់ ជាក់ស្តែង ភាពក្រីក្ររបស់ប្រជាជនបានធ្លាក់មកត្រឹមរង្វង់១២% ក្នុងចំណាត់ថ្នាក់មួយ ដែលមានប្រជាជនបានឈានដល់ឋានៈអ្នកមានមធ្យមកំរិតទាប ក្នុងកំរិតកំណើនសេដ្ឋកិច្ចប្រចាំឆ្នាំក្នុងរង្វង់៧%។
ដូច្នេះ ប្រជាជនកម្ពុជាទាំងមូលមិនចង់ឃើញស្រមោលអតីតកាល និងការហិនហោចជាតិកម្ពុជាទាំងមូល ដូចក្រោយព្រឹត្តិការណ៍នៃការផ្តួលរំលំរាជរដ្ឋាភិបាលរបស់សម្តេចព្រះបរមរតនៈកោដ្ឋឡើយ។ ហើយប្រជាជនកម្ពុជាសង្ឍឹមថា រដ្ឋការអាមេរិកថ្មីនឹងមិនបំផ្លាញសន្តិភាព និងការអភិវឌ្ឍនៅកម្ពុជា ដោយយកលេសចោទប្រកាន់ដោយទុច្ចរិត និងឃុបឃិតជាមួយអតីតបក្សប្រឆាំង ដើម្បីផ្តួលរំលំរដ្ឋអំណាចនៅកម្ពុជា ដោយមើលឃើញថា រដ្ឋអំណាចនៅកម្ពុជាមិនរណបជាមួយអាមេរិក ហើយរណបជាមួយនឹងចិនក្នុងផលប្រយោជន៍ភូមិសាស្រ្តនយោបាយមួយដែលអាមេរិកយល់ឃើញនោះទេ៕
ដោយ ឡុង បូរិតា
