ព្រះមហាក្សត្រី នរោត្តម មុនិនាថ សីហនុ ផ្ញើព្រះរាជសារជូនពរលោកស្រី ប៊ុន រ៉ានី ហ៊ុនសែន ក្នុងឱកាសខួបចម្រើនជន្មាយុ

ក្នុងឱកាសខួបចម្រើនជន្មាយុរបស់ លោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី១៥ ខែធ្នូ ឆ្នាំ២០១៧នេះ ព្រះមហាក្សត្រី ព្រះវររាជមាតា នរោត្តម មុនិនាថ សីហនុ បានផ្ញើព្រះរាជសារជូនពរ និងប្រោសប្រទាននូវព្រះរាជទ្រព្យចំនួន ៥ពាន់ដុល្លារអាមេរិក ព្រមទាំងកន្ត្រកផ្កាដ៏ស្រស់ស្អាត ជូន លោកស្រី ប៊ុន រ៉ានី ហ៊ុនសែន ដែលជាអ្នកស្នេហាជាតិដ៏ឧត្តុង្គឧត្តម បានបរិច្ចាគកម្លាំងកាយ-ចិត្ត និងធនធានចូលរួមក្នុងសកម្មភាពកសាងជាតិ មាតុភូមិ និងប្រជារាស្ត្រកម្ពុជា។
សូមអានព្រះរាជសារ ដែលមានខ្លឹមសារទាំងស្រុងដូចខាងក្រោម ៖

លោកនាយករដ្ឋមន្រ្ដី ហ៊ុន សែន ផ្ញើសារជូនជនអគតិមួយចំនួនដែលបំផ្លើសព័ត៌មានមិនពិត

នៅថ្ងៃទី១៥ ខែធ្នូ ឆ្នាំ២០១៧នេះ ក្នុងហ្វេសប៊ុកផេករបស់លោកនាយករដ្ឋមន្រ្ដី ហ៊ុន សែន បានបង្ហោះសារខ្លី មួយ​ដែលមានខ្លឹមសារដូចខាងក្រោម៖

ដោយសារមានការបង្ហោះព័ត៌មានមិនពិតជាដដែលៗខ្ញុំសូមបញ្ជាក់សារជាថ្មីអោយបងប្អូនជនរួមជាតិបានជ្រាបថា ខ្ញុំគ្មានប្រាក់លាក់ទុកនៅបរទេសដូចការបំប៉ោងដ៏អាក្រក់បំផុតរបស់ជនខិលខូចមួយចំនួនទេ។ បើបរទេសណាចង់បង្កកប្រាក់មេដឹកនាំគណបក្សប្រជាជន ឬមន្រ្តីរាជរដ្ឋាភិបាល គឺខ្ញុំសូមលើក​ទឹកចិត្តបន្ថែម​អោយធ្វើចុះ។

ទ្រព្យសម្បត្តិខ្ញុំ គឺអាចមើលឃើញនៅតាមវត្តអារាម សាលារៀន មជ្ឈមណ្ឌលកុមារកំព្រា បណ្ណាល័យ ស្រះទឹក អណ្តូងទឹក ស្ពាន ផ្លូវថ្នល់ កូនក្មួយចៅៗសិស្សានុសិស្ស និងកូនក្មួយកីឡាករកីឡាការិនី និងសម្រាប់សង្រ្គោះ និងព្យាបាលអ្នកជំងឺនៅក្នុងប្រទេសកម្ពុជាប៉ុណ្ណោះ។
សូមជូនពរបងប្អូនកូនក្មួយជនរួមជាតិទូទាំងប្រទេសជួបតែសេចក្តីសុខ និងសំណាងល្អគ្រប់ៗគ្នា ៕

ដោយមានការគាំទ្រពីលោក Putin យោធារុស្ស៊ីត្រូវបានដាក់បញ្ចូល នៅក្នុងគោលនយោបាយបរទេស

រាប់ចាប់តាំងពីរដ្ឋាភិបាលទីក្រុងដាម៉ាស់ ទៅទីក្រុងដូហា រដ្ឋមន្ត្រីការពារជាតិរុស្ស៊ីលោក Sergei Shoigu បានបង្ហាញខ្លួននៅក្នុងកន្លែងដែលមិនបានរំពឹងទុក ជាសញ្ញាមួយនៃការកើនឡើងឥទ្ធិពលយោធារបស់រុស្ស៊ីក្រោមការដឹកនាំរបស់លោក Vladimir Putin ។

ក្នុងរយៈពេលប៉ុន្មានខែកន្លងមកនេះ រដ្ឋមន្ត្រីការពារជាតិរូបនេះបានស្លៀកសម្លៀកបំពាក់ ឯកសណ្ឋានយោធា បានជួបពិភាក្សាជាមួយប្រធានាធិបតីស៊ីរីនៅទីក្រុងដាម៉ាស់ និងបានជួបនាយករដ្ឋមន្ត្រីរបស់អ៊ីស្រាអែលនៅទីក្រុងចេរុយសាឡិម ហើយគាត់ក៏ត្រូវបានទទួលស្វាគមន៍ដោយអ្នកគ្រប់គ្រងនៅក្នុងប្រទេសកាតា នៅក្នុងទីក្រុងដូហា។

ជំហររបស់ក្រសួងការពារជាតិផ្តោតទៅលើវិស័យនេះ ត្រូវបានចាត់ទុកដ៏យូរមកហើយរបស់ក្រសួងការបរទេសរុស្ស៊ីនៅក្នុងការគាំទ្ររបស់ប្រទេសរុស្ស៊ី ដែលយុទ្ធសាស្ត្រមានភាពរឹតត្បិតមានន័យថា រដ្ឋមន្រ្តីទាំងឡាយអាចជួយពិភាក្សាដោយត្រង់បានជាមួយសមភាគីបរទេសរបស់ពួកគេ។

យោធាកំពុងទាញផលប្រយោជន៍ពីការបែកបាក់ផ្នែកនយោបាយនូវអ្វីដែលរុស្ស៊ី បានមើលឃើញថា ជាជ័យជម្នះដ៏ធំរបស់ខ្លួននៅគ្រីមា ដែលជាប់នឹងប្រទេសអ៊ុយក្រែន បន្ទាប់ពីទាហានរុស្ស៊ី បានចាប់យកការគ្រប់គ្រងនៅក្នុងឧបទ្វីបនេះ កាលពីឆ្នាំ២០១៤ និងនៅស៊ីរីដែលកំលាំងទ័ពរុស្ស៊ីបានគាំទ្រប្រធានាធិបតីលោក Assad នៅក្នុងសង្គ្រាមនៅស៊ីរី។

មន្ត្រីបម្រើការរុស្ស៊ីរយៈពេលវែងម្នាក់ដែលធ្វើការជាមួយក្រសួងការពារជាតិ ហើយសុំមិនបញ្ចេញឈ្មោះ ដោយសារតែគាត់គ្មានសិទ្ធិនិយាយទៅកាន់សារព័ត៌មានថា «នយោបាយនោះត្រូវបានគេដាក់ឱ្យអនុវត្តនៅក្នុងរបៀបវារៈយុទ្ធសាស្ត្រដែលមានឥទ្ធិពលបន្ថែមទៀត»។

នៅក្នុងទីក្រុងគ្រឹមឡាំង ឯណោះវិញ ក្រសួងការពារជាតិ និងការបរទេសរុស្ស៊ី មិនបានឆ្លើយតបចំពោះការស្នើសុំយោបល់បញ្ជាក់ឱ្យបានលម្អិតចំពោះអត្ថបទដែលបានចុះផ្សាយនេះ ក៏ប៉ុន្តែប្រភពព័ត៌មាន ៣ ដែលស្គាល់ក្រសួងទាំងពីរនេះបានបញ្ជាក់យ៉ាងច្បាស់អំពីអត្ថបទនេះ។

ការរីកចម្រើនឥទ្ធិពលយោធារបស់រុស្ស៊ី បានធ្វើឱ្យមិនសប្បាយចិត្តក្នុងចំណោមអ្នកការទូត រុស្ស៊ីមួយចំនួន ហើយធ្វើឱ្យខឹងសម្បាដល់មន្ត្រីបស្ចិមប្រទេសអំពីយុទ្ធសាស្ត្រកាន់តែខ្លាំងឡើងនេះ ដែលនយោបាយការបរទេសរុស្ស៊ីកំពុងតែប្រកាន់យក។

ប្រភពព័ត៌មានមួយដែលសុំមិនបញ្ចេញឈ្មោះនិយាយថា «បើសិនជាអស់លោកអ្នកអនុញ្ញាត ឱ្យក្រសួងការពារប្រទេសកាន់តែមានឥទ្ធិពលធំនៅក្នុងនយោបាយការបរទេសនោះ វានឹងមានបញ្ហាកើតឡើង»។

ក្រោមការដឹកនាំរបស់លោក Putin ដែលជាអតីតភ្នាក់ងារ KGB ហើយឥឡូវនេះប្រធានាធិបតីគឺជាអគ្គមេបញ្ជាការកងកម្លាំងប្រដាប់អាវុធបានបង្កើតឥទ្ធិពលរបស់ខ្លួន។ ការចំណាយរបស់វិស័យការពារជាតិបានកើនឡើង កំលាំងយោធាត្រូវបានគេរាយបណ្តាក់នៅហ្សកហ្ស៊ី អ៊ុយក្រែន ស៊ីរី ហើយទង្វើរបស់ខ្លួនត្រូវបានប្រើប្រាស់ដើម្បីនាំឱ្យមានគំនិតស្នេហាជាតិ។

កំលាំងនយោបាយការបរទេស និងការកើនឡើងឥទ្ធិពលនយោបាយយោធារបស់រុស្ស៊ីត្រូវបានគេមើលឃើញជាការកត់សម្គាល់ដ៏ខ្លាំងនៅក្នុងករណីស្ថានភាពនៅស៊ីរី។

បន្ទាប់ពីការធ្វើដំណើរទៅកាន់ទីក្រុងដាម៉ាស់ សម្រាប់ការពិភាក្សាពីរដងនៅឆ្នាំនេះជាមួយលោក Assad រដ្ឋមន្ត្រីការពារជាតិរបស់រុស្ស៊ីលោក Shoigu បានអមដំណើរជាមួយលោក Putin នៅសប្តាហ៍នេះ នៅពេលដែលប្រធានាធិបតីរូបនេះបានជិះយន្តហោះទៅជួបមេដឹកនាំស៊ីរី។ រដ្ឋ មន្ត្រីការបរទេសលោក Sergei Lavrov មិនដែលបានទៅទស្សនកិច្ចនៅស៊ីរីទាល់តែសោះនៅឆ្នាំ២០១៧នេះ។

រដ្ឋមន្ត្រីការពារជាតិលោក Shoigu មានការចូលរួមនៅក្នុងការខិតខំប្រឹងប្រែង តាមរយៈការទូតដើម្បីនាំសន្តិភាពទៅកាន់ប្រទេសស៊ីរី។ នៅក្នុងតួនាទីរបស់គាត់គាត់បាននិយាយអំពីសារៈសំខាន់នៃពង្រាងរដ្ឋធម្មនុញ្ញមួយសម្រាប់ប្រទេសស៊ីរី ហើយគាត់ក៏បានជួបបេសកជនពិសេសរបស់អង្គការសហប្រជាជាតិស្តីពីកិច្ចការស៊ីរី និងបានជួយនាយករដ្ឋមន្ត្រីអ៊ីស្រាអែលលោក Benjamin Netanyahu និងមេដឹកនាំនៅប្រទេសកាតា គឺព្រះអង្គម្ចាស់ Sheikh Tamim bin Hamad al-Thani ។

មន្ត្រីមួយចំនួននិយាយថា «មានការទុកចិត្តគ្នាទៅវិញទៅមកដ៏ខ្លាំងរវាងយោធារុស្ស៊ី និងមន្ត្រី ជាន់ខ្ពស់នៅទីក្រុងដាម៉ាស់ ដោយសារតែរុស្ស៊ីបានជួយស្រោចស្រង់ទ្រព្យសម្បត្តិរបស់ពួកគេ និងប្រជាជនស៊ីរី៕

ប្រភព : Reuters ចុះថ្ងៃទី១៤ ខែធ្នូ ឆ្នាំ២០១៧

ការជួបពិភាក្សារបស់មេដឹកនាំចិន និងកូរ៉េខាងត្បូងសង្ឃឹមថា នឹងធ្វើឱ្យស្ថានភាពធូរស្រាល

ប្រធានាធិបតីកូរ៉េខាងត្បូង Moon Jae-In និងជួបពិភាក្សាជាមួយប្រធានាធិបតីចិនលោក Xi Jinping នៅថ្ងៃព្រហស្បតិ៍នេះ ដើម្បីស្វែងរកការផ្សះផ្សាទំនាក់ទំនងដែលមានស្ថានភាពលំបាក ដោយសារតែកូរ៉េខាងត្បូងទទួលធ្វើជាម្ចាស់ផ្ទះសម្រាប់ប្រព័ន្ធមីស៊ីលអាមេរិក។

ការិយាល័យលោក Moon បាននិយាយថា គាត់សង្ឃឹមថា នឹងមានប្រក្រតីភាពចំណងទាក់ទងឡើងវិញ អំឡុងពេលដំណើរទស្សនកិច្ចនេះ ក្រោយពីចិនខឹងសម្បាជាមួយនឹងការបំពាក់ប្រព័ន្ធការពារមីស៊ីលនៅដើមឆ្នាំនេះ ដែលជាការការពារកូរ៉េខាងត្បូងពីការគំរាមកូរ៉េខាងជើងដែលមានអាវុធនុយក្លេអ៊ែរ។

ចិនមើលឃើញប្រព័ន្ធខែលការពារនេះ ជាការគំរាមសន្តិសុខខ្លួន ហើយក៏បានចាត់វិធានការណ៍ប្រឆាំងធុរកិច្ចកូរ៉េខាងត្បូង ថែមទាំងហាមឃាត់ដំណើរទេសចរណ៍ជាក្រុមទៅកាន់កូរ៉េខាងត្បូងផងដែរ ដែលទង្វើនេះត្រូវបានគេមើលឃើញថា ជាការសងសឹកបែបសេដ្ឋកិច្ច។

ជម្លោះការទូតបានកើតមានឡើង បន្ទាប់ពីក្រុមហ៊ុនផលិតសព្វាវុធកូរ៉េខាងត្បូងជាច្រើនបានផ្តល់ទីកន្លែងសម្រាប់ទទួលប្រព័ន្ធមីស៊ីលរបស់អាមេរិកដ៏ខ្លាំងនេះ។

នៅក្នុងដំណើរទស្សនកិច្ចទៅកាន់ចិន លោក Moon ក៏នាំទៅជាមួយនូវប្រតិភូធុរកិច្ច រាប់បញ្ចូលទាំងនាយកប្រតិបត្តិមកពីក្រុមហ៊ុន Samsung ក្រុមហ៊ុយ Hyundai និងក្រុមហ៊ុន LG ផងដែរ ហើយនេះគឺជាដំណើរទស្សនកិច្ចផ្លូវរដ្ឋរបស់គាត់ទៅកាន់ប្រទេសចិន ចាប់តាំងពីគាត់ចូលកាន់តំណែងកាលពីខែឧសភា មកម៉េ្លះ។

លោក Zhu Feng ជាសាស្ត្រាចារ្យសិក្សាផ្នែកអន្តរជាតិនៅសាកលវិទ្យាល័យប៉េកាំងនិយាយថា គ្រាន់តែដំណើរទស្សនកិច្ចនេះ ជាសញ្ញាដ៏សំខាន់រួចទៅហើយនៃប្រក្រតីកម្មសម្រាប់ទំនាក់ទំនងទ្វេភាគី។ លោក Zhu បាននិយាយថា ទំនាក់ទំនងសេដ្ឋកិច្ចកំពុងតែត្រឡប់មករកភាពដើមវិញ ប៉ុន្តែជាការសំខាន់នោះ គឺលោក Moon ត្រូវតែដកចេញប្រព័ន្ធការពារមីស៊ីលចេញពីបញ្ហាសេដ្ឋកិច្ច។

កាលពីខែមុខ ប្រទេសទាំងពីរនេះបានចេញសេចក្តីថ្លែងការណ៍ដែលមានពាក្យសម្តីដូចគ្នាបេះបិតស្តីពីគោលបំណងទៅវិញទៅមកក្នុងការធ្វើឱ្យប្រសើរនូវទំនាក់ទំនងទ្វេភាគីនេះ។

ពួកគេមិនបាននិយាយឱ្យបានចំៗណាមួយ ក៏ប៉ុន្តែចិនបានទាមទារឱ្យកូរ៉េខាងត្បូងសន្យាជាផ្លូវការដោយកុំរាយបណ្តាក់នូវប្រព័ន្ធការពារបាញ់មីស៊ីលណាបន្ថែមទៀត ហើយកុំឱ្យចូលរួមប្រព័ន្ធការពារមីស៊ីលរបស់អាមេរិកនៅក្នុងតំបន់នេះ។

អ្នកនាំពាក្យក្រសួងការបរទេសចិនលោក Lu Kang បាននិយាយកាលពីថ្ងៃអង្គារថា ប្រទេសទាំងពីរបានឈានដល់ការព្រមព្រៀងគ្នាមួយចំនួនទៅហើយស្តីពីប្រព័ន្ធការពារមីស៊ីលនេះ ។

លោក Lu បាននិយាយថា «យើងសង្ឃឹមថា បញ្ហានេះអាចបន្តដោះស្រាយដោយសមរម្យបាន ហើយភាគីទាំងសងខាងអាចនាំទំនាក់ទំនងចិន-កូរ៉េខាងត្បូងត្រឡប់ទៅរកផ្លូវល្អ និងការអភិវឌ្ឍដ៏រ៉ឹងមាំ»។

ចិនក៏បានទាមទារអាមេរិក ជប៉ុន និងកូរ៉េខាងត្បូងដើម្បីផ្អាកសមយុទ្ធយោធារួមនៅក្នុងតំបន់នេះ ជាការដោះដូរសម្រាប់កូរ៉េខាងជើងដើម្បីបញ្ឈប់សកម្មភាពនុយក្លេអ៊ែររបស់ខ្លួន ក៏ប៉ុន្តែគំនិតនេះត្រូវបានអាមេរិក និងកូរ៉េខាងត្បូងបដិសេធ។

ដំណើរទស្សនកិច្ចរបស់លោក Moon ទៅកាន់ទីក្រុងប៉េកាំង បានកើតមានឡើងបន្ទាប់ពីរដ្ឋ មន្ត្រីការបរទេសអាមេរិក Rex Tillerson និយាយថា អាមេរិកបានត្រៀមខ្លួនជាស្រេចដើម្បីពិភាក្សាជាមួយកូរ៉េខាងជើងដោយមិនមានលក្ខខណ្ឌជាមុន បើទោះបីជាអាមេរិកនៅតែប្តេជ្ញាចិត្តដើម្បីបង្ខំកូរ៉េខាងជើងឱ្យបោះបង់ចោលសព្វាវុធនុយក្លេអ៊ែរនេះក៏ដោយ។ ចិនបានដាក់សម្ពាធឱ្យមានការពិភាក្សាសម្រាប់ដំណោះស្រាយដោយសន្តិវិធី ចំពោះវិបត្តិនេះ៕

ប្រភព : AFP/Channel News Asia ចុះថ្ងៃទី១៤ ខែធ្នូ ឆ្នាំ២០១៧

អ្នកនាំពាក្យក្រសួងការបរទេសកម្ពុជា លើកឡើងថា មិនទាន់មានការសំរេចណាមួយរបស់សហភាពអឺរ៉ុប បិទការនាំទំនិញពីកម្ពុជាចូលទីផ្សារអឺរ៉ុប ឬព្យួរប្រព័ន្ធពន្ធអនុគ្រោះEBA ចំពោះកម្ពុជា ក៏ដូចជាការកម្រិតទិដ្ឋាការ (Visa) លើមន្រ្តីរដ្ឋាភិបាលទេ

ឆ្លើយតបនឹងការលើកឡើងបំផ្លើសរបស់ទណ្ឌិត សម រង្ស៊ី ដែលបានសរសេរនៅលើបណ្តាញទំនាក់ទំនងសង្គម Facebook ថា សហភាពអឺរ៉ុបបិទទីផ្សារមិនឲ្យនាំទំនិញពីកម្ពុជាចូល ទីផ្សារអឺរ៉ុប និងការផ្អាកការផ្តល់ទិដ្ឋាការដល់មន្រ្តីរាជរដ្ឋាភិបាលកម្ពុជានោះ នៅព្រឹកថ្ងៃទី១៥ ខែធ្នូ ឆ្នាំ២០១៧នេះ លោក ជុំ សុន្ទរី អ្នកនាំពាក្យក្រសួងការបរទេសកម្ពុជា បានថ្លែងប្រាប់បណ្តាញព័ត៌មាន ឲ្យដឹងថា រហូតដល់ពេលនេះ មិនទាន់មានការសំរេចរបស់សហភាពអឺរ៉ុប បិទការនាំទំនិញពីកម្ពុជាចូលទីផ្សារអឺរ៉ុបនោះទេ, ពោលគឺកម្ពុជានៅតែអាចនាំទំនិញចូលទីផ្សារអឺរ៉ុបដដែល។

យោងតាមញត្តិរបស់សភាអឺរ៉ុបចេញផ្សាយថ្ងៃទី១៤ ខែធ្នូ ឆ្នាំ២០១៧ សភាអឺរ៉ុបគ្រាន់តែអំពាវនាវឲ្យគណៈកម្មការអឺរ៉ុប «ធ្វើការពិនិត្យលើករណីភាពអនុគ្រោះពាណិជ្ជកម្មសម្រាប់កម្ពុជា និងលទ្ធភាពនៃការកម្រិតទិដ្ឋាការ» ប៉ុណ្ណោះ មិនមែនចេញសេចក្តីប្រកាសឲ្យបិទនោះទេ។

លោក ជុំ សុន្ទរី បានបន្ថែមថា ចំពោះបញ្ហាការផ្តល់ទិដ្ឋាការដល់មន្រ្តីរាជរដ្ឋាភិបាលកម្ពុជា សភាអឺរ៉ុបក៏មិនបានអំពាវនាវឲ្យផ្អាកនោះដែរ គ្រាន់តែអំពាវនាវឲ្យពិនិត្យពីលទ្ធភាពនៃ «ការកម្រិតទិដ្ឋាការ» ប៉ុណ្ណោះ ពោលគឺមិនបានផ្អាកដូចការលើកឡើងនោះទេ។

ការឆ្លើយតបតាមរយៈបណ្តាញព័ត៌មាន នៅពេលនេះរបស់អ្នកនាំពាក្យក្រសួងការបរទេសកម្ពុជា ធ្វើឡើងបន្ទាប់ពីទណ្ឌិត សម រង្ស៊ី បានសរសេរព័ត៌មាន បំផ្លឹសការពិត នៃញត្តិរបស់សភាសហភាពអឺរ៉ុប ដែលបានចេញផ្សាយនៅថ្ងៃទី១២ ខែធ្នូ ឆ្នាំ២០១៧។ ទណ្ឌិតដែលកំពុងរត់គេច ពីសំណាញ់ច្បាប់បានសរសេរថា៖ «ផ្អាកជំនួយទាំងអស់ ក្នុងក្របខណ្ឌនៃកិច្ចសន្យាសហប្រតិបត្តិការ រវាងសហភាពអឺរ៉ុប និងកម្ពុជា។ បិទទីផ្សារមិនឲ្យនាំទំនិញពីកម្ពុជា ចូលមកលក់នៅក្នុងប្រទេស ទាំង២៧នៃសហភាពអឺរ៉ុប។ ផ្អាកការផ្តល់ទិដ្ឋាការ (Visa) ចេញចូលសហភាពអឺរ៉ុប ចំពោះថ្នាក់ដឹកនាំនៃប្រទេសកម្ពុជា ព្រមទាំងក្រុមគ្រួសារ និងគូកន ហើយវិធានការនេះ អាចឈានទៅដល់ ការរឹបអូសទ្រព្យសម្បត្តិ របស់ជនទាំងនោះ ដែលបានយកលុយកាក់បានមកពីអំពើពុករលួយរបស់ខ្លួន មកលាក់ទុកនៅទ្វីបអឺរ៉ុប»។

ការសរសេរទាំងនេះរបស់ទណ្ឌិត សម រង្ស៊ី ត្រូវបានលោក ជុំ សុន្ទរី ប្រតិកម្មឆ្លើយតបវិញថា ទណ្ឌិត សម រង្ស៊ី បានសរសេរលើស ការពិត នៃញតិ្តពិតរបស់សភាអឺរ៉ុប ដែលនេះជាទង្វើញុះញង់ចង់បង្កបញ្ហាដល់ស្ថេរភាពនៅកម្ពុជា៕

រដ្ឋបាលខេត្តសៀមរាប រៀបចំពិធីអបអរសាទរខួប​លើកទី២៥​ នៃការដាក់​បញ្ចូល​រមណីយដ្ឋានអង្គរ ​ទៅក្នុង​បញ្ជីបេតិកភណ្ឌ​ពិភពលោក​

សៀមរាប៖ ដើម្បីអបអរសាទរ នៃការដាក់រមណីយដ្ឋានអង្គរចូលជាសម្បត្តិបេតិកភណ្ឌពិភពលោក រដ្ឋបាលខេត្តសៀមរាប និងអាជ្ញាធរអប្សរា បានសហការណ៍គ្នារៀបចំថតរូបជាព្រឹត្តិការណ៍ប្រវត្តិសាស្រ្តមួយ ដែលបានប្រារព្ធនៅប្រាសាទអង្គរ។

ព្រឹត្តិការណ៍នេះ គឺធ្វើឡើងដើម្បីចូលរួមអបអរសាទរខួបលើកទី២៥ នៃការដាក់បញ្ចូលរមណីយដ្ឋានអង្គរ ក្នុងបញ្ជីបេតិកភណ្ឌពិភពលោក (១៤ ធ្នូ ១៩៩២ – ១៤ ធ្នូ ២០១៧)។ ជាមួយនឹងការផ្តិតយករូបភាពនេះដែរ ក៏ជាបង្ហាញអោយពិភពលោកបានឃើញនូវភាពស្ញប់ស្ញែងរបស់ប្រាសាទអង្គរវត្ត ជាពិសេសក្នុងការទាក់ទាញភ្ញៀវទេចរជាតិ អន្តរជាតិអោយមកទស្សនារមណីដ្ឋានអង្គរ។ ម្យ៉ាងទៀត ក៏បានបង្ហាញអោយបងប្អូនបានយល់ដឹង និងចេះស្រឡាញ់ ព្រមទាំងថែរក្សានូវប្រាង្គប្រាសាទ ដែលជាកេរ្តិ៍តំណែលរបស់ដូចតារបស់យើងបានបន្សល់ទុកតាំងពីយូរលង់ណាស់មកហើយ។

ខួបលើកទី២៥ នៃការដាក់បញ្ជូនរមណីយដ្ឋានអង្គរជាសម្បត្តិបេតិកណ្ឌនេះ គឺមានការយកចិត្តទុកដាក់ខ្ពស់ក្នុងការថែរក្សានូវសម្បត្តិវប្បធម៌ដែលមានរាជរដ្ឋាភិបាលកម្ពុជាក្រោមការដឹកនាំរបស់លោកនាយករដ្ឋ ហ៊ុន សែន៕

អភិបាលខេត្តតាកែវ​ ស្នើដល់​សាធារណរដ្ឋឆែក​ បន្តជួយគាំទ្រ​ដល់មន្ទីរពេទ្យ​ភ្នែកខេត្តតាកែវ​ ជាបន្តទៀត​

ក្នុងឱកាសអមដំណើរលោក Ivo Barak អនុប្រធានព្រឹទ្ធសភានៃសាធារណរដ្ឋឆែក និងប្រតិភូធ្វើទស្សនកិច្ចនៅមន្ទីរពេទ្យភ្នែកខេត្តតាកែវ នៅថ្ងៃទី១៤ ខែធ្នូ ឆ្នាំ២០១៧ លោក ឡាយ វណ្ណៈ អភិបាលខេត្តតាកែវ បានស្នើសុំដល់សាធារណរដ្ឋឆែក បន្តផ្តល់ការគាំទ្រដល់មន្ទីរពេទ្យភ្នែក ទៅលើផ្នែកកសាងសមត្ថភាព ដល់បុគ្គលិកមន្ទីរពេទ្យរយៈពេល ៣ឆ្នាំបន្តទៀត។

លោក ឡាយ វណ្ណៈ ស្នើបែបនេះ ក្រោយពីបានស្តាប់នូវបទបង្ហាញពីការរីកចម្រើនរបស់តំណាងមន្ទីរពេទ្យទាំងការផ្តល់សេវាកម្ម និងសមត្ថភាពរបស់បុគ្គលិកពេទ្យក្រោមកិច្ចសហការ និងការគាំទ្រពីអង្គការ Caritas នៃសាធារណរដ្ឋឆែក ហើយការគាំទ្រដែលមានរយៈពេល ៣ឆ្នាំនឹងត្រូវបានបញ្ចប់នាពេលដ៏ខ្លីខាងមុននេះ។

លោកអភិបាលខេត្តបានសង្កត់ធ្ងន់ថា ការកសាងសមត្ថភាពនេះគឺមានសារៈសំខាន់ខ្លាំងណាស់ សម្រាប់មន្ទីរពេទ្យក៏ដូចជាបុគ្គលិកមន្ទីរពេទ្យទាំងមូលក្នុងកិច្ចដំណើរការមន្ទីរពេទ្យ ក៏ដូចជាបណ្តុះបណ្តាលបន្តដល់បុគ្គលិកថ្មីៗបន្ថែមទៀត សំដៅពង្រឹងដល់ការបម្រើសេវាកម្មកាន់តែប្រសើរ និងមានប្រសិទ្ធភាពជូនប្រជាពលរដ្ឋបន្ថែមទៀត។

ជាកិច្ចឆ្លើយតប លោក Ivo Barak បានថ្លែងអំណរគុណដល់អាជ្ញាធរខេត្ត មន្ទីរសុខាភិបាល ក៏ដូចជាមន្ទីរពេទ្យភ្នែកខេត្តតាកែវ ដែលបានសម្របសម្រួលឱ្យមានដំណើរទស្សនកិច្ចកើតឡើង ព្រមទាំងធ្វើការកោតសរសើរ និងវាយតម្លៃខ្ពស់ចំពោះលទ្ធផលការងាររបស់មន្ទីរពេទ្យ ដែលបានខិតខំកន្លងមក។ លោកក៏បានបង្ហាញពីអារម្មណ៍សប្បាយរីករាយ ដែលការគាំទ្ររបស់សាធារណរដ្ឋឆែកបានទទួលលទ្ធផលល្អប្រសើរ និងបានជួយដល់ប្រជាពលរដ្ឋកម្ពុជាជាច្រើន។ ដោយឡែកចំពោះសំណើររបស់អភិបាលខេត្តតាកែវ ភាគីឆេក និងយកទៅពិនិត្យ ពិភាក្សាគ្នាជាមុនសិនហើយនឹងជូនដំណឹងត្រឡប់មកវិញនៅពេលក្រោយ។

សូមបញ្ជាក់ថា មន្ទីរពេទ្យភ្នែកខេត្តតាកែវ បាននឹងកំពុងផ្តល់សេវាកម្មពិនិត្យព្យាបាលជម្ងឺភ្នែកជូនដល់ប្រជាពលរដ្ឋសរុបប្រមាណជាង ៣ម៉ឺននាក់ក្នុងមួយឆ្នាំ ដោយគិតជាមធ្យមប្រមាណ ១៥០នាក់ក្នុងមួយថ្ងៃ ក្នុងនោះ ៦០ភាគរយជាអ្នកជម្ងឺនៅក្នុងខេត្ត ១០ភាគរយមកពីខេត្តកំពត ១០ភាគរយមកពីកំពង់ស្ពឺ ១០ភាគរយមកពីខេត្តកណ្តាល និង១០ភាគរយទៀតមកពីបណ្តាខេត្តផ្សេងៗ៕