ព្រឹទ្ធសភា នឹងបើកកិច្ចប្រជុំពេញអង្គ នៅថ្ងៃទី២៩ មិថុនា ដើម្បីប្រកាសទទួលស្គាល់សមាជិកព្រឹទ្ធសភាថ្មី

ព្រឹទ្ធសភា នឹងបើកសម័យប្រជុំពេញអង្គ នៅថ្ងៃទី២៩ ខែមិថុនា ឆ្នាំ២០១៧ ខាងមុខនេះ ក្រោមអធិបតីភាព លោក សាយ ឈុំ ប្រធានព្រឹទ្ធសភា ដោយពិភាក្សាលើរបៀបវារៈចំនួន២ នេះបើតាមការប្រកាសរបស់អគ្គលេខាធិការដ្ឋានព្រឹទ្ធសភានៅថ្ងៃទី២៧ ខែមិថុនា ឆ្នាំ២០១៧នេះ។

អគ្គលេខាធិការដ្ឋានព្រឹទ្ធសភា បានអោយដឹងថា របៀបវារៈ២នោះ រួមមាន៖
១៖ ការប្រកាសទទួលស្គាល់សមាជិកព្រឹទ្ធសភាថ្មី
២៖ ពិនិត្យ និងអោយយោបល់លើសេចក្តីស្នើច្បាប់ ស្តីពីការបោះឆ្នោតជ្រើសតាំងសមាជិកព្រឹទ្ធសភា៕

លោក​នាយក​រដ្ឋមន្រ្តី​ ហ៊ុន​ សែន៖​ ការ​លើក​ឡើង​ថាការបោះឆ្នោត​មិនទាន់​មាន​សេរីភាព​ និងយុត្តិធម៌​គ្រប់គ្រាន់​​ព្រោះ​តែ​ផែនការ​ដណ្តើមយកព្រឹទ្ធសភាត្រូវបរាជ័យ

លោក​នាយក​រដ្ឋមន្រ្តី​ ហ៊ុន​ សែន​ បាន​ថ្លែងថា​ ការលើក​ឡើងថា​ ការបោះ​ឆ្នោត​នៅកម្ពុជា​មិនទាន់មាន​សេរីភាព និង​យុត្តិធម៌​គ្រប់គ្រាន់​នោះ​ ក៏ព្រោះតែ​ផែនការ​ដណ្តើមយក​ព្រឹទ្ធសភា​ត្រូវបរាជ័យ។ លោក​ បានថ្លែង​ដូចនេះ ​នៅក្នុងពិធីប្រគល់វិញ្ញាបនបត្រជូនសិស្សសាលាភូមិន្ទរដ្ឋបាលសរុប ៧៥១អង្គ/នាក់ នៅវិទ្យាស្ថានជាតិអប់រំ នៅថ្ងៃទី២៦ ខែមិថុនា ឆ្នាំ២០១៧។

លោកនាយករដ្ឋមន្រ្តី ហ៊ុន សែន បានបញ្ជាក់ថា គណៈកម្មាធិការជាតិរៀបចំការបោះឆ្នោត បានប្រកាសលទ្ធផលផ្លូវការហើយ គណបក្សប្រជាជនកម្ពុជា បានប្រកាសទទួលយកលទ្ធផលបោះឆ្នោតនេះ ហើយចាត់ទុកថាការបោះ​ឆ្នោតនេះ គឺជាការបោះឆ្នោតសេរី ត្រឹមត្រូវ និងយុត្តិធម៌ ប៉ុន្តែបែរជាបក្សនយោបាយ និងអង្គការរដ្ឋាភិបាលមួយចំនួន ចាត់ទុកថាមិនទាន់សេរីទៅវិញ ការលើកឡើងនេះព្រោះផែនការដណ្តើមយកព្រឹទ្ធសភា ដើម្បីក្លាយទៅជាប្រមុខរដ្ឋស្តីទី ត្រូវបានរលាយផុតទៅហើយ ដូចនេះហើយបានជាគេថា មិនសេរីនោះ។

ប្រមុខរាជរដ្ឋាភិបាលកម្ពុជា ក៏បានបញ្ជាក់ថា លោកគឺជាមនុស្សដំបូង ដែលស្នើសុំជំនួយបរទេស សម្រាប់ការកែទម្រង់ការបោះឆ្នោតនៅកម្ពុជា ដែលក្នុងនោះមានទាំងការចុះឈ្មោះឡើងវិញផងដែរ។ ចំណែកខាងគណបក្សប្រឆាំង ស្នើសុំតែកែទម្រង់ គ.ជ.ប ប៉ុណ្ណោះ។

សូមបញ្ជាក់ថា កាលពីថ្ងៃទី២៤ ខែមិថុនា ឆ្នាំ២០១៧ បន្ទប់ស្ថានការណ៍បោះឆ្នោត ក្នុងនោះមានអង្គការសង្គមស៊ីវិលមួយចំនួន បានវាយតម្លៃ ចុងក្រោយមួយថា ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ នៅកម្ពុជា មានភាពវិជ្ជមាន និងប្រសើរជាងមុន។ ប៉ុន្ដែទោះជាយ៉ាងណា បន្ទប់ស្ថានការណ៍នៅតែអះអាងថា មានភាពមិនប្រក្រតី ហើយរឹតត្បិតសេរីភាព។ គណបក្សប្រជាជនកម្ពុជា រួមទាំងគណបក្សផ្សេងៗមួយចំនួនទៀត បានប្រកាសទទួលយកនូវលទ្ធផលផ្លូវការ ដែលផ្សព្វផ្សាយដោយគ.ជ.ប។ គណបក្សខ្មែររួបរួមជាតិរបស់លោក ញឹក ប៊ុនឆៃ បានកត់សម្គាល់ថា កិច្ចដំណើរការបោះឆ្នោតបានប្រព្រឹត្តទៅដោយរលូន និងគ្មានអំពើហិង្សា៕

មន្ទីរពេទ្យរុស្ស៊ី ​បានពិនិត្យ​ និងព្យាបាល​អ្នកជំងឺ​ជាង៧ពាន់នាក់​ ក្នុងរយៈពេល​១សប្តាហ៍​

បើតាមរបាយការណ៍របស់មន្ទីរពេទ្យមិត្តភាពខ្មែរ-សូវៀត (មន្ទីរពេទ្យរុស្ស៊ី) បានឲ្យដឹងថា រយៈពេល៧ថ្ងៃចាប់ពីថ្ងៃទី១៦ ដល់ថ្ងៃទី២២ ខែមិថុនា ឆ្នាំ២០១៧ មានអ្នកជំងឺទាំងអស់៧,៥២៣នាក់ បានចូល និងចេញពិនិត្យ ព្យាបាលជំងឺ នៅមន្ទីរពេទ្យមិត្តភាពខ្មែរ-សូរៀត។

ក្នុងរយៈពេល៧ថ្ងៃនេះ មានអ្នកជំងឺមកទទួលសេវាពិនិត្យព្យាបាល ផ្នែកពិគ្រោះជំងឺក្រៅមានចំនួន ៦,៨៥៥នាក់ និងអ្នកជំងឺចូលសម្រាក និងព្យាបាលជាចេញពីមន្ទីរពេទ្យទៅផ្ទះវិញមានចំនួន ៦៦៨នាក់។

ជំងឺទាំងនោះបានមកពិនិត្យ និងព្យាបាលដែលមានផ្នែកដូចជា៖ ផ្នែកជំងឺបេះដូង និងលោហិតសាស្ត្រ ផ្នែកជំងឺប្រព័ន្ធរំលាយអាហារ ផ្នែកជំងឺទូទៅ និងសន្លាក់ ផ្នែកជំងឺឆ្លង ផ្នែកប្រពោធនកម្មវេជ្ជសាស្ត្រ ផ្នែកជំងឺសរសៃប្រសាទ ផ្នែកជំងឺសួត និងរបេង ផ្នែកជំងឺមហារីក ផ្នែកជំងឺពិគ្រោះផ្លូវចិត្ត ផ្នែកជំងឺកុមារ ផ្នែកជំងឺសង្គ្រោះបន្ទាន់ ផ្នែកជំងឺវះកាត់ពោះ និងទ្រូង ផ្នែកជំងឺវះកាត់បាក់បែក និងសរសៃរប្រសាទ ផ្នែកជំងឺវះកាត់កុមារ និងកែលម្អ ផ្នែកជំងឺវះកាត់ប្រព័ន្ធទឹកនោម ផ្នែករោគស្ត្រី ផ្នែកសម្ពព ផ្នែកជំងឺត្រចៀក បំពង់ក ច្រមុះ ផ្នែកចក្ខុរោគ ផ្នែកទន្តសាស្ត្រ ផ្នែកជំងឺមុន និងក្រោយវះកាត់ និងមណ្ឌលព្យាបាលមនុស្សចាស់ ព្រះសីហនុរាជ៕

អភិបាល​ខេត្តកំពង់​ចាមថ្មី ត្រូវបាន​ប្រកាសចូល​កាន់តំណែង​ផ្លូវការ ជំនួសលោ​ក លន់ លឹមថៃ នៅព្រឹកនេះ

អភិបាលខេត្តកំពង់ចាមថ្មី លោក គួច ចំរើន ដែលត្រូវបានព្រះមហាក្សត្រ ចេញព្រះរាជក្រឹត្យត្រាស់បង្គាប់ តែងតាំងជាអភិបាលខេត្ត ជំនួសលោក លន់ លឹមថៃ ដែលចូលនិវត្តន៍នោះ ត្រូវបានប្រកាសចូលកាន់តំណែងជាផ្លូវការ នៅព្រឹកថ្ងៃទី២៧ ខែមិថុនា ឆ្នាំ២០១៧នេះ ក្រោមអធិបតីភាព លោកឧបនាយករដ្ឋមន្ដ្រី ស ខេង ។

នៅរសៀលថ្ងៃនេះដែរ លោក ស ខេង នឹងអញ្ជើញទៅប្រកាសតែងតាំងអភិបាលខេត្តត្បូងឃ្មុំថ្មី លោក លី ឡេង ជំនួសលោក ប្រាជ្ញ ច័ន្ទ ដែលចូលនិវត្តន៍។
ចំណែកនៅព្រឹកថ្ងៃទី២៨ ខែមិថុនា ឆ្នាំ២០១៧ស្អែកនេះ លោក ស ខេង នឹងចូលរួមកម្មវិធីប្រកាសផ្លូវការ ឲ្យលោក ឃួង ស្រេង ចូលកាន់តំណែងជាអភិបាលរាជធានីភ្នំពេញ ជំនួសលោក ប៉ា សុជាតិវង្ស ផងដែរ៕

លោកនាយក​រដ្ឋមន្ត្រី​ ហ៊ុន​ សែន​ និទានរឿង​ «មន្រ្តីគ្រាប់ល្ពៅ»​ ជាគតិ​បណ្ឌិត​សម្រាប់​មន្រ្តី​ដែល​នឹងចេញទៅ​បម្រើការងារ​ជូនជាតិ​ និង​ប្រជាពលរដ្ឋ​

នៅ​ព្រឹក​ថ្ងៃទី២៦​ ខែមិថុនា​ ឆ្នាំ២​០១៧នេះ លោកនាយករដ្ឋ​មន្រ្តី ​ហ៊ុន សែន បាននិទានរឿង​ «មន្រ្តីគ្រាប់ល្ពៅ» ជា​គតិ​សម្រាប់​មន្រ្តីដែលនឹងចេញ​ទៅបម្រើការងារ​ជូនជាតិ​ និង​ប្រជាពលរដ្ឋ។​ លោក​ បាន​ថ្លែងដូចនេះ​ក្នុង​ឱកាសអញ្ជើញជាអធិបតីក្នុងពិធីប្រគល់វិញ្ញាបនបត្រជូនដល់កម្មសិក្សាការីជាន់ខ្ពស់-មធ្យម របស់សាលាភូមិន្ទរដ្ឋបាលចំនួន ៧៥១អង្គ/នាក់ ដែលក្នុងនោះមានព្រះសង្ឃ ១៣អង្គ និងនារី ៩៨នាក់ នៅវិទ្យាស្ថានជាតិអប់រំ។

លោកនាយករដ្ឋមន្រ្តី ហ៊ុន សែន បានបញ្ជាក់ថា រឿងនិទាននេះ គឺព្រះមហាក្សត្រ ដើម្បីចង់ដឹងពីមន្រ្តីណាស្មោះត្រង់ជាមួយព្រះអង្គនោះ ព្រះអង្គបានហៅមន្រ្តី ឱ្យយកគ្រាប់ល្ពៅស្ងោរ ទៅដាំ។ ចុងក្រោយទទួលបានមន្រ្តី ៤ប្រភេទចេញពីការពិសោធន៍ទឹកចិត្តជាមួយនឹងការផ្តល់គ្រាប់ល្ពៅទៅដាំនេះ។ មន្រ្តីប្រភេទទី១ បានទូលស្តេចថា គ្រាប់ល្ពៅ ដែលស្តេចប្រទាន គឺផ្លែល្អណាស់ ហើយបានដឹកមកថ្វាយព្រះមហាក្សត្រដែរ ប៉ុន្តែកងការពារព្រះរាជវាំងមិនឱ្យចូល។ មន្រ្តីប្រភេទទី២ បានទូលស្តេចថា គ្រាប់ល្ពៅ ដែលស្តេចប្រទាន គឺផ្លែល្អណាស់ តែអត់បានដឹកមកនោះទេ។ មន្រ្តីប្រភេទទី៣ បានទូលស្តេចថា គ្រាប់ល្ពៅ ដែលស្តេចប្រទាន ត្រូវកណ្តុរស៊ីអស់ អត់បានដាំទេ។ ចុងក្រោយ មន្រ្តីប្រភេទទី៤ បានទូលស្តេចដោយត្រង់ៗថា គ្រាប់ល្ពៅ ដែលស្តេចប្រទាន គឺជាគ្រាប់ល្ពៅស្ងោរ មិនអាចដាំដុះបានទេ។

ប្រមុខរាជរដ្ឋាភិបាលកម្ពុជា ក៏បានថ្លែងថា ប្រភេទមន្រ្តីទី១ គឺជាមន្រ្តីដ៏គ្រោះថ្នាក់បំផុត មិនអាចទុកមន្រ្តីប្រភេទមនេះធ្វើការនោះទេ ព្រោះមិនត្រឹមតែមិនស្មោះត្រង់នោះទេ ថែមទាំងទម្លាក់កំហុសទៅលើអ្នកដទៃថែមទៀត។ សម្រាប់មន្រ្តីប្រភេទទី២ ក៏មិនត្រូវទុកនោះដែរ ព្រោះជាមន្រ្តីភូតកុហកមិនអាចយកប្រើបាននោះទេ។ ចំពោះមន្រ្តីប្រភេទទី៣ ត្រូវតែខិតខំបណ្តុះបណ្តាលបន្ថែម ព្រោះមិនដឹងថា គ្រាប់ល្ពៅនោះ ពិតជាកណ្តុរស៊ីមែន ឬយ៉ាងណា។ ដោយឡែក សម្រាប់មន្រ្តីប្រភេទទី៤ ត្រូវប្រឹងប្រែងបណ្តុះបណ្តាលបន្ថែម ព្រោះហ៊ាននិយាយការពិតនិយាយត្រង់ ការនិយាយត្រង់នេះ អាចឱ្យថ្នាក់លើបានដឹងពីការពិតនៅតាមមូលដ្ឋាន៕

បន្ទាប់ពីបញ្ចប់ដំណើទស្សនកិច្ចប្រកបដោយផ្លែផ្កា នៅប្រទេសឡាវ និងវៀតណាម ប្រធានរដ្ឋសភាកម្ពុជា បានត្រឡប់មកដល់កម្ពុជាវិញហើយ

លោក ហេង សំរិន ប្រធានរដ្ឋសភា បានដឹកនាំគណៈប្រតិភូរដ្ឋសភា ត្រឡប់មកដល់កម្ពុជាវិញហើយ នៅវេលាម៉ោង១០:៥០នាទីព្រឹកថ្ងៃទី២៦ ខែមិថុនា ឆ្នាំ២០១៧នេះ ក្រោយបញ្ចប់ទស្សនកិច្ចផ្លូវការ និងមិត្តភាពនៅប្រទេសឡាវ និងប្រទេសវៀតណាមរយៈពេល៥ថ្ងៃ។

ការត្រឡប់មកដល់របស់លោក ហេង សំរិន ក៏មានការទទួលស្វាគមន៍ពីមន្ដ្រីជាន់ខ្ពស់នៃរដ្ឋសភា និងមន្ដ្រីពាក់ព័ន្ធជាច្រើនរូបទៀតផងដែរ នៅអាកាសយាន្ដអន្ដរជាតិភ្នំពេញ។

សូមជម្រាបថា ដំណើរទស្សនកិច្ចរបស់លោក ហេង សំរិន ប្រធានរដ្ឋសភា នៅប្រទេសឡាវនាពេលនេះ ក្នុងគោលបំណងរឹតចំណងមិត្តភាព និងកិច្ចសហប្រតិបត្តិការរវាងប្រទេស កម្ពុជា-ឡាវ ឱ្យកាន់តែរឹងមាំ ឡើងថែមទៀត ជាពិសេសការពង្រឹងពង្រីកកិច្ចសហប្រតិបត្តិការ នៃស្ថាប័ននីតិប្បញ្ញត្តិ ប្រទេសទំាងពីរ។ លោក ហេង សំរិន បានបំពេញទស្សនកិច្ច នៅប្រទេសឡាវ ពីថ្ងៃទី២១ ដល់ថ្ងៃទី២៣មិថុនា។

ដោយឡែក បន្ទាប់ពីបញ្ចប់ដំណើរទស្សនកិច្ចផ្លូវការ និងមិត្តភាព នៅសាធារណរដ្ឋប្រជាធិបតេយ្យ ប្រជាមានិតឡាវ នៅព្រឹកថ្ងៃទី២៣ ខែមិថុនា លោកប្រធានរដ្ឋសភា បានបន្តដំណើរទស្សនកិច្ចផ្លូវការ និងមិត្តភាព នៅសាធារណរដ្ឋសង្គមនិយមវៀតណាម។

ការបំពេញទស្សនកិច្ចផ្លូវការ និងមិត្តរបស់គណៈប្រតិភូរដ្ឋសភាកម្ពុជា ទៅកាន់ប្រទេសឡាវ និងប្រទេសវៀតណាម បញ្ចប់ទៅដោយភាពផ្លែផ្កាបំផុត៕

តំណាងអង្គការយូណេស្កូប្រចាំកម្ពុជាសម្តែងការគាំទ្រចំណាត់ការទប់ស្កាត់ការរីករាលដាលសំណង់ខុសច្បាប់ក្នុងតំបន់រមណីយដ្ឋានអង្គរ

លោកស្រីAnne Lemaistre តំណាងអង្គការយូណេស្កូប្រចាំកម្ពុជា បានថ្លែង ក្នុងសន្និសីទ សារព័ត៌មានក្រោយកិច្ចប្រជុំបច្ចេកទេសលើកទី២៨ នៃគណៈកម្មាធិការICC-Angkorថា “និយាយអំពីសំណង់ថ្មីៗនៅក្នុងតំបន់ ១និង តំបន់២ តាមពិតទៅ សំនួរមួយនេះត្រូវបាន អគ្គនាយកអាជ្ញាធរជាតិអប្សរា ឆ្លើយយ៉ាងក្បោះក្បាយល្អរួចហើយ តែយើងគ្រាន់តែ ចង់ បន្ថែមបន្តិច ពួកយើងសូមសំដែងការសាទរ ដល់អាជ្ញាធរជាតិអប្សរាដែលបានចាត់ វិធាន ការ ទប់ស្កាត់ និងធ្វើការរុះរើរសំណង់ថ្មីៗខុសច្បាប់ នៅក្នុងតំបន់១ និង តំបន់២។ នេះគឺជា ការងារ ដែលមានក្នុងកិច្ចព្រមព្រៀងរវាងប្រទេសកម្ពុជា និងអង្គការUNESCO”។

ស្របពេលដែលសំណង់ខុសច្បាប់បានរីករាលដាលយ៉ាងគំហុកក្នុងរយៈពេលចុងក្រោយនេះ បានធ្វើឲ្យរមណីយដ្ឋានអង្គរដែលជាសម្បត្តិបេតិកភណ្ឌពិភពលោកអាចនឹងប្រឈមនឹងបញ្ហា បើទប់ស្កាត់មិនបានទាន់ពេលទេនោះ។
ឆ្លើយតបនឹងបញ្ហានេះ អាជ្ញាធរជាតិអប្សរាក្នុងឋានៈជាស្ថាប័នគ្រប់គ្រងរមណីយដ្ឋានអង្គរ បាន ព្យាយាមសម្របសម្រួលជាមួយប្រជាពលរដ្ឋ ដែលបានលួចសាងសង់សំណង់ខុសច្បាប់ ដោយសុំឲ្យពួកគាត់រុះរើសំណង់ខុសច្បាប់ទាំងនោះដោយខ្លួនឯងវិញ។
ចំពោះករណីដែល ប្រជាពលរដ្ឋមួយចំនួនទៀតមិនបានរុះរើដោយស្ម័គ្រចិត្តទេ ដើម្បីបំពេញ កាតព្វកិច្ចរបស់ខ្លួនក្នុងការថែរក្សាឲ្យបាននូវបេតិកភណ្ឌពិភពលោកអង្គរ អាជ្ញាធរជាតិអប្សរាមានភាពចាំបាច់ដើម្បីប្រើប្រាស់គោលការណ៍រដ្ឋបាលចុះរុះរើសំណង់ខុសច្បាប់ទាំងនោះចេញ។
លោកស្រីបន្ថែមថា “ដូច្នេះយើង សូមលើកទឹកចិត្តដល់អាជ្ញាធរ អប្សរាឲ្យបន្តក្នុងកិច្ច ការពារ តំបន់១ និងតំបន់២ និងការពារច្បាប់ ឲ្យបានខ្លាំងតាមដែរអាចធ្វើទៅបាន។ អ្វីដែលយើង ត្រូវ និយាយ និងសម្រេចចិត្តគឺនៅខែធ្នូ ក្នុងកិច្ចប្រជុំ ICC-Angkor លើកក្រោយ ពួកយើងអាចនឹង មានរៀបចំសិក្ខាសិលាមួយស្ដីអំពីកិច្ចការអភិរក្សហើយខ្ញុំគិតថា សម្រាប់ពេលនេះ យើងកំពុង មាន ដំណើរការល្អប្រសើរហើយ ដូច្នេះយើងពិតជាពេញចិត្តចំពោះដំណើរការនេះ”៕