ខ្មែរតែមួយ

Thursday, April 21, 2016

រាជរដ្ឋាភិបាលកម្ពុជា ចេញសារាចរណែនាំ ស្តីពីការគ្រប់គ្រងរថយន្តនាំចូលដោយពន្ធអាករជាបន្ទុករបស់រដ្ឋនិងការកត់ត្រាក្នុងបញ្ជីសារពើភណ្ឌទ្រព្យសម្បត្តិរដ្ឋ

លោកជំទាវ បាន ស្រីមុំ ចាត់កម្លាំងក្រុមការងារ ចុះសិក្សាទីតាំង ជីកអណ្តូងទឹកចំនួន០៤ ជូនប្រជាពលរដ្ឋ ដែលកំពុងខ្វះទឹកប្រើប្រាស់

ដោយមើលឃើញមានកង្វះទឹកនិងតម្រូវប្រើប្រាស់ទឹកប្រចាំថ្ងៃរបស់ប្រជាពលរដ្ឋ នារដូវក្តៅនេះ នៅព្រឹកថ្ងៃទី២០ខែមេសាឆ្នាំ២០១៦នេះ លោកម៉ី វុទ្ធារ៉ា ក្នុងនាមលោកជំទាវ បាន ស្រីមុំ អ្នកតំណាងរាស្ត្រមណ្ឌលប៉ៃលិន និងជាប្រធានសាខាកាកបាទក្រហមកម្ពុជាខេត្ត បានដឹកនាំក្រុមការងារ ចុះសិក្សាទីតាំងអណ្តូងចំនួន៤ទៀត បន្ទាប់ពីបានខួងអណ្តូង២រួច ដែលជាអំណោយដ៏ថ្លៃថ្លាសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា តាមរយៈលោកជំទាវ បាន ស្រីមុំដែលទីតាំង២ស្ថិតក្នុងភូមិសួស្តី និង២ទីតាំងទៀតស្ថិតក្នុងភូមិព្រៃមង្គល សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។

Wednesday, April 20, 2016

រឿងអាស្រូវស្រីញី របស់លោក កឹម សុខា គឺជារឿងពិត

មកដល់ពេលនេះ ការពិតស្តីពីរឿងអាស្រូវផ្លូវភេទរបស់លោក កឹម សុខា ប្រធានស្តីទីគណបក្សសង្គ្រោះជាតិ ត្រូវបានលាតត្រដាងជាសាធារណៈហើយ។ កញ្ញា ខុម ចាន់ដារ៉ាទី ហៅស្រីមុំ បានឆ្លើយសារភាពទទួលស្គាល់សម្លេងនៅក្នុងខ្សែអាត់ ដែលបានបែកធ្លាយកន្លងមកនៅក្នុងប្រព័ន្ធផ្សព្វផ្សាយសង្គម ថាពិតជាសម្លេងរបស់រូបនាងនិយាយសាសងគ្នាជាមួយលោក កឹម សុខា ប្រាកដមែន។

អ្វីដែលសាធារណៈជនចាប់អារម្មណ៍នោះ គឺលោក កឹម សុខា បានប្រើប្រាស់វិធីសាស្ត្រដ៏ស្មោគគ្រោករបស់ខ្លួនបោកប្រាស់ទៅលើក្មេងស្រីរងគ្រោះ ដោយលួងលោមសន្យាផ្តល់ប្រាក់ចំនួន ៣០០០ ដុល្លារអាមេរិក និងសន្យារកទិញផ្ទះមួយនៅកន្លែងស្ងាត់ឲ្យនាង ដើម្បីងាយស្រួលចេញចូលជួបគ្នា។ មិនតែប៉ុណ្ណោះ មេបក្សប្រឆាំងល្មោភកាមរូបនេះ គឺបន្តកុហករូបនាងថានឹងបើកហាងសំអាងការមួយកន្លែងឲ្យនាងថែមទៀត ប៉ុន្តែរហូតមកដល់ពេលនេះ នាងពុំទាន់បានទទួលអ្វីពីលោក កឹម សុខា នៅឡើយនោះទេ។ មានន័យថា នាងបានបាត់បង់ទាំងខ្លួនប្រាណ និងកិត្តិយស ដូចពាក្យចាស់បុរាណពោលថា «ប្រាក់ក៏បង់ ថង់ក៏ដាច» ដូច្នេះដែរ។

មកដល់ចំណុចនេះ គេនៅចាំបានថា លោក កឹម សុខា ក៏ធ្លាប់បានប្រើប្រាស់វិធីបោកប្រាស់បែបសន្យានេះជាមួយប្រជាពលរដ្ឋនូវចំណុចជាច្រើន ដូចជាការផ្តល់លុយ៤ម៉ឺនរៀលដល់ចាស់ៗ ដាក់ធ្មេញមាសឲ្យតាៗ យាយៗ រកប្តីឲ្យស្រីម៉េម៉ាយ ជាដើម។ល។ រាប់មិនអស់។

ការបន្តបោកគ្រប់ទីកន្លែង គ្រប់ស្ថានភាព និងការប្រព្រឹត្តិនូវអំពើអសីលធម៌ មើលងាយនារីវ័យក្មេងជាបន្តបន្ទាប់រាប់មិនអស់របស់លោក កឹម សុខា បានធ្វើឲ្យសង្គមកម្ពុជាមិនអាចទទួលយកមេដឹកនាំបែបនេះបានឡើយ។ លោក កឹម សុខា ត្រូវហ៊ានចេញមុខសារភាពនូវកំហុសរបស់ខ្លួនដែលបានប្រព្រឹត្តិជាសាធារណៈ នឹងត្រូវលាលែងពីតំណែងជាអ្នកតំណាងរាស្ត្ររបស់ខ្លួនទើបត្រឹមត្រូវ ហើយរដ្ឋសភាជាតិ គួររិះរកនីតិវិធី សួរដេញដោលនៅក្នុងសម័យប្រជុំពេញអង្គរបស់សភា ដើម្បីឱ្យលោក កឹម សុខា ឆ្លើយបំភ្លឺជូនប្រជាពលរដ្ឋបានស្ងប់ចិត្តក្នុងរឿងនេះ។

ដើម្បីស្វែងរកយុត្តិធម៌ជូនស្ត្រីរងគ្រោះ កញ្ញា ស្រីមុំ បានស្នើសុំឲ្យតំណាងអយ្យការ មេត្តាជួយរកយុត្តិធម៌ឲ្យរូបនាងតាមផ្លូវច្បាប់។ ក្នុងនោះ ព្រះរាជអាជ្ញាអមសាលាដំបូងរាជធានីភ្នំពេញក៏បានបញ្ជាក់ថា លោកនឹងពិនិត្យមើលករណីនេះទៅតាមនីតិវិធី។ ទន្ទឹមនឹងនោះ ប្រធានអង្គការសីលការ (Silka) ក៏បានជំរុញឲ្យលោក កឹម សុខា ប្រធានស្តីទីគណបក្សសង្រ្គោះជាតិ ចេញមុខបកស្រាយចំពោះរឿងអាស្រូវកន្លងមក ដើម្បីកុំឲ្យតែតួអង្គ ស្រីមុំ ចេញមុខតែម្នាក់ឯងបែបនេះផងដែរ។ ដូច្នេះ គេសង្ឃឹមថាលោក កឹម សុខា នឹងមិនកំសាកមិនហ៊ានទទួលខុសត្រូវនូវទង្វើអសីធម៌របស់ខ្លួននោះទេ។

កន្លងមក មុនការសារភាពរបស់កញ្ញា ខុម ចាន់ដារ៉ាទី មានក្រុមអ្នកវិភាគមួយចំនួនដែលអះអាងថាខ្លួនជាអ្នកវិភាគឯករាជ្យនោះ បែរជាយល់ថារឿងអាស្រូវស្រីញីម្តងហើយម្តងទៀត របស់លោក កឹម សុខា គឺជាការរៀបចំឆាកល្ខោនរបស់គណបក្សកាន់អំណាច ដើម្បីបង្ខូចកេរ្តិ៍ឈ្មោះគណបក្សប្រឆាំងទៅវិញ ប៉ុន្តែពេលនេះ រឿងពិតត្រូវបានលាតត្រដាងដោយនារីរងគ្រោះទៅហើយ តើពួកគេត្រូវបកស្រាយយ៉ាងណា? បើតាមការសន្និដ្ឋានរបស់ប្រជាពលរដ្ឋភាគច្រើន ពួកគេបានយល់ថា ក្រុមអ្នកវិភាគដែលតែងតាំងខ្លួនឯងថាជាអ្នកវិភាគឯករាជ្យទាំងនោះ គឺពិតជាកូនជឹងរបស់គណបក្សប្រឆាំងមួយនេះយ៉ាងពិតប្រាកដ ពីព្រោះពួកគេតែងតែបកស្រាយពីការពិតទៅជារឿងប្រឌិត ឬជារឿងល្ខោន ហើយពេលខ្លះក្រុមមួយនេះហ៊ានចោទប្រកាន់ថាគឺជារឿងនយោបាយថែមទៀត បើទោះបីជាជនដែលបានប្រព្រឹត្តិបានបង្ហាញនូវបទល្មើសដែលជាភស្តុតាងជាក់ស្តែងក៏ដោយ។

ការសារភាពរបស់ស្រីមុំនៅពេលនេះ គឺបានបង្ហាញយ៉ាងគ្រប់គ្រាន់ និងច្បាស់ក្រឡែត ពីទំនាក់ទំនងយ៉ាងស៊ីជម្រៅរវាងនាង និងលោក កឹម សុខា។ ក្នុងនាមលោក កឹម សុខា ជាអ្នកនយោបាយម្នាក់ដែលជាបុគ្គលសាធារណៈ ហើយត្រូវទទួលការជ្រើសរើសជាតំណាងប្រជាពលរដ្ឋផងនោះ បែរជាមានអំពើផិតក្បត់ប្រពន្ធ កូន ប្រព្រឹត្តិអំពើអសីលធម៌ដែលសង្គមស្អប់ខ្ពើមបែបនេះ តើបុគ្គលនោះគួរគប្បីជាបុគ្គលដែលត្រូវជ្រើសរើសមកដឹកនាំប្រទេសដែរឬយ៉ាងណា?

ឆ្លើយតបចំពោះការអំពាវនាវស្វែងរកយុត្តិធម៌របស់កញ្ញា ខុម ចាន់ដារាទី ដែលជានារីរងគ្រោះនោះ មហាជន បានគិតថាវាគ្រប់គ្រាន់ហើយសម្រាប់ព្រះរាជអាជ្ញា បន្តនីតិវិធីការងាររបស់ខ្លួន ដើម្បីឲ្យតុលាការចាត់ការជនល្មោភតណ្ហារូបនេះតាមផ្លូវច្បាប់ជាធរមាន៕

អាប៉ោង បើកគ្របហើយ

កញ្ញា ខុម ចាន់តារាទី ហៅស្រីមុំ បានចេញមុខទំលាយការពិតរឿងខ្សែអាត់សម្លេងស្នេហាលួចលាក់ដែលត្រូវបានបែកធ្លាយតាមបណ្តាញសង្គមហ្វេសប៊ុក និងបានធ្វើឲ្យកក្រើកក្នុងស្រទាប់មហាជនរយៈពេលជាង ១ខែចុងក្រោយនេះថា គឺជាសម្លេងរូបនាង និងលោក កឹម សុខា ប្រធានស្តីទីគណបក្សសង្គ្រោះជាតិ ពិតប្រាកដមែន។

ថ្លែងប្រាប់ព្រះរាជអាជ្ញារងអមសាលាដំបូងរាជធានីភ្នំពេញលោក សៀង សុខ កាលពីថ្ងៃទី១៩ ខែមេសា ឆ្នាំ២០១៦ ស្រីមុំបានឆ្លើយយ៉ាងក្បោះក្បាយពីទំនាក់ទំនងស្នេហាលួចលាក់រវាងរូបនាង និងលោក កឹម សុខា រហូតឈានដល់ការណាត់ជួបគ្នានៅក្រៅប្រទេសជាច្រើនលើក។ មិនត្រឹមតែប៉ុណ្ណេះ លោក កឹម សុខា នៅបានសន្យាជាមួយស្រីមុំថា នឹងទិញផ្ទះ និងបង្កើតមុខរបរឲ្យនាងថែមទៀតផង។

ការចេញមុខមកសារភាពរបស់ស្រីមុំ បានបិទបញ្ចប់មន្ទិលសង្ស័យរឿងខ្សែអាត់សម្លេងរបស់ប្រធានស្តីទីគណបក្សសង្គ្រោះជាតិលោក កឹម សុខា និងស្រីក្មេងជាច្រើនរូបថា ពិត ឬមិនពិត។ ការពិតលោក កឹម សុខា នៅមុនការទំលាយខ្សែអាត់សម្លេងតាមបណ្តាញសង្គមហ្វេសប៊ុក បានមានទំនាក់ទំនងស្នេហាលួចលាក់ជាមួយស្រីក្មេងជាច្រើនរូប មានប្រពន្ធចុងជាជនជាតិវៀតណាម ថែមទាំងមានកូនទៀតផងជាមួយជនជាតិវៀតណាម ដែលជាសត្រូវស៊ូពូជតែនៅលើបបេរមាត់របស់លោកប្រធានស្តីទីបក្សសង្គ្រោះជាតិរូបនេះ។

ចម្លើយសារភាពដែលកើតចេញពីឆន្ទៈពិតៗរបស់ស្រីមុំនេះ បានធ្វើឲ្យសាធារណៈជន ជាពិសេសអ្នកគាំទ្រគណបក្សសង្គ្រោះជាតិ យល់ច្បាស់ពីចរិតល្មោភស្រីរបស់លោក កឹម សុខា ដែលជាអំពើអសីលធម៌ ស្មោកគ្រោក រំលោភច្បាប់ និងជាការប្រមាថមួយយ៉ាងធ្ងន់ធ្ងរចំពោះស្រ្តីភេទ។

ជារួមការពិតរឿងអាស្រូវផ្លូវភេទរបស់លោក កឹម សុខា ត្រូវបានលាតត្រដាងយ៉ាងច្បាស់ក្រឡែត ប្រៀបដូចជា អាប៉ោង បើកគ្របឲ្យចាក់ ដូច្នោះដែរ។ លោក កឹម សុខា ត្រូវតែចេញមុខមកធ្វើការសូមទោសនៅចំពោះមុខមហាជន ហើយក៏ត្រូវលាលែងតំណែងពីប្រធានស្តីទីគណបក្សសង្គ្រោះជាតិផងដែរ ដើម្បីទុកឲ្យមនុស្សដែលមានភាពស្អាតស្អំពិតប្រាកដដឹកនាំវិញម្តង។

ដូច្នេះសមាជិក សមាជិកា សកម្មជន និងអ្នកគាំទ្រគណបក្សសង្គ្រោះជាតិ គួរពិចារណាក្នុងការរុះរើក្បាលម៉ាស៊ីនដឹកនាំបក្សឡើងវិញ ប្រសិនបើមិនចង់ឲ្យបក្សសង្គ្រោះជាតិរលាយបាត់រូបរាងនៅមុនការបោះឆ្នោតឆ្នាំ២០១៧ និងឆ្នាំ២០១៨ ខាងមុខនេះ៕

Tuesday, April 19, 2016

កត្តាចំបងៗចំនួន២ គឺសន្តិភាព និងស្ថេរភាពជាគ្រឹះដ៏រឹងមាំរបស់កម្ពុជាដើម្បីការអភិវឌ្ឍន៏ប្រទេសឱ្យរីកចម្រើនទៅមុខ

ឆ្លើយតបទៅនឹងសំនួរ នៅក្នុងកិច្ចសម្ភាសន៍ជាមួយទូរទស្សន៍ BloombergTV (Canada) នៅថ្ងៃទី១៩ ខែមេសា ឆ្នាំ២០១៦នេះ ដែលសួរថា តើអ្វីទៅជាទស្សនវិស័យរបស់ប្រទេសកម្ពុជា? តើលោកចង់ឃើញប្រទេសកម្ពុជាក្លាយជាប្រទេសបែបណានៅអាស៊ី? លោក ហ៊ុន ម៉ាណែត បានបញ្ជាក់ថាកត្តាចំបងៗចំនួន០២គឺ សន្តិភាព និងស្ថេរភាពដែលជាគ្រឹះដ៏រឹងមាំរបស់កម្ពុជាដើម្បី ការអភិវឌ្ឍន៏ប្រទេសឱ្យរីកចម្រើនទៅមុខ និងជាការបង្កឱកាស សម្រាប់មនុស្សជំនាន់ក្រោយៗ ដែលចង់ឃើញយើងទាំងអស់គ្នារស់នៅក្នុងការអភិវឌ្ឍន៏ប្រកបដោយសន្តិភាពនិង ស្ថេរភាព។

សូមបញ្ជាក់ថា បន្ទាប់ពីបំពេញទស្សនកិច្ច ប្រកបដោយជោគជ័យ ដ៏ត្រចះត្រចង់នៅលើទឹកដី សហរដ្ឋអាមេរិកជាមួយបងប្អូនប្រជាពលរដ្ឋខ្មែរនៅក្នុងឱកាសពិធីបុណ្យចូលឆ្នាំថ្មីប្រពៃណីខ្មែរ និងជួបពិភាក្សាការងារជាមួយថ្នាក់ដឹកនាំសំខាន់ៗ នៅតាមបណ្តារដ្ឋមួយចំនួនរួចមកឯកឧត្តម ហ៊ុន ម៉ាណែតបានដឹកនាំគណៈប្រតិភូបំពេញទៅទស្សនកិច្ចនៅលើទឹកដីនៃប្រទេសកាណាដាជាបន្តទៀត ដើម្បីជួបជាមួយបងប្អូនប្រជាពលរដ្ឋខ្មែរ នៅក្នុងឱកាសពិធីបុណ្យចូលឆ្នាំថ្មីប្រពៃណី ខ្មែរនៅទីនោះ។

ឯកឧត្តម ហ៊ុន ម៉ាណែត ក៏បានលើកឡើងអំពីបញ្ហាពាក់ព័ន្ធនឹងជំហររបស់កម្ពុជានៅក្នុងជម្លោះសមុទ្រចិនខាងត្បូង ដោយឯកឧត្តមបានបញ្ជាក់ថា ចំពោះជំហររបស់កម្ពុជានៅក្នុងជម្លោះសមុទ្រចិនខាងត្បូងនោះ យើងមានទស្សនវិស័យថា ដំណោះស្រាយនានា គួរតែឈរលើគោលការណ៍សន្តិភាព និងការយោគយល់គ្នាទៅវិញទៅមក ដើម្បីចៀសវាងការប្រឈមមុខដាក់គ្នាដូចអតីតកាល។ កម្ពុជាគាំទ្រ និងលើកទឹកចិត្តឲ្យប្រជាជាតិអាស៊ានទាំងអស់ សហការជាមួយចិន ដើម្បីធ្វើការដោះស្រាយ បញ្ហាប្រឈមនានាឲ្យបានទាន់ពេលវេលា មុននឹងវារីករាលដាល់កាន់តែធំ។

ឯកឧត្តម ហ៊ុន ម៉ាណែត បានបន្តទៀតថា កម្ពុជាតែងបានអំពាវនាវឲ្យគ្រប់គ្នាដោះស្រាយបញ្ហាដោយសន្តិវិធី និងពិភាក្សាដោយបើកចំហជាមួយគ្នាដើម្បីចៀសវាងការប្រើប្រាស់យោធា ដែលអាចដុតបញ្ហាឲ្យកាន់តែ ខ្លាំងជាងមុនថែមទៀត។ គោលដៅកម្ពុជាទៅថ្ងៃអនាគតនោះ គឺការរក្សាឲ្យបាននូវសុខសន្តិភាពដែលជារឿងសំខាន់បំផុត ដែលអនុញ្ញាតឲ្យកម្ពុជាទទួលបានភាពរុងរឿង៕

កញ្ញា ស្រីមុំ ទទួលស្គាល់នូវសារសម្លេងឆ្លើយឆ្លងជាមួយលោក កឹម សុខា ថា ជាការពិត!

នៅល្ងាចថ្ងៃទី១៩ ខែមេសា ឆ្នាំ២០១៦នេះ លោក សៀង សុខ ព្រះរាជអាជ្ញារង សាលាដំបូង រាជធានីភ្នំពេញ បានបញ្ជាក់ប្រាប់អ្នកសារព័ត៌មានក្រោយបញ្ចប់ការសាកសួរ កញ្ញា ខុម ចាន់តារ៉ាទី ហៅ ស្រីមុំ នៅសាលាដំបូងរាជធានីភ្នំពេញថា៖ នៅក្នុងអំឡុងពេលសាកសួរ កញ្ញា ស្រីមុំ បាន ទទួល ស្គាល់ថា សារសម្លេងឆ្លើយឆ្លង ដែលបែកធ្លាយលើបណ្តាញសង្គមនោះគឺពិតជាសារសន្ទនារវាងកញ្ញា និងលោក កឹម សុខា ប្រធានស្តីទីគណបក្សសង្គ្រោះជាតិពិតប្រាកដមែន។

លោក សៀង សុខ បានបន្ថែមថា បើទោះបីមានការសារភាពពីសំណាក់ កញ្ញា ខុម ចាន់ដារ៉ាទី ហៅស្រីមុំ យ៉ាងណាក្តីក៏មិនទាន់មានចំណាត់ការទៅលើកញ្ញាស្រីមុំ យ៉ាងណានោះទេដោយបាន អនុញ្ញាតឲ្យកញ្ញា ស្រីមុំ ត្រឡប់ទៅផ្ទះវិញ ហើយព្រះរាជអាជ្ញានឹងពិនិត្យនីតិវិធីបន្តទៀត។

ក្រោយបញ្ចប់ការសាកសួរលោកស្រីមេធាវី ធាន ឈូន មេធាវីរបស់កញ្ញាស្រីមុំបានបញ្ចាក់ថា តុលាការនាពេលនេះមិនមានការចោទប្រកាន់ទៅលើកញ្ញាស្រីមុំនៅឡើយនោះទេព្រោះកញ្ញាគឺជាជនរង គ្រោះ។

សូមជំរាបថានាព្រឹកថ្ងៃដដែល លោកស្រី ធីតា ឃឹះ នាយិកាអង្គការសីលការ (Silka) បានជំរុញឱ្យ លោក កឹម សុខា ចេញមុខបកស្រាយចំពោះរឿង អាស្រូវកន្លងមក ដើម្បីកុំឱ្យតែតួអង្គ ស្រីមុំ ចេញ មុខ តែម្នាក់ឯងពេក។

នាព្រឹកនោះផងដែរលោកស្រី ឡាក់ សុភាព ប្រធានគណបក្សខ្មែរសាមគ្គីបាននិយាយថាលោក កឹម សុខា ជាមេដឹកនាំដែលគ្មានការទទួលខុសត្រូវទេ សូម្បីបញ្ហាដែលតូចបែបនេះហើយ លោកស្រី នឹង សរសរលិខិតមួយនៅថ្ងៃខាងមុខសំណូមពរឱ្យតុលាការកោះហៅលោក កឹម សុខា មកឆ្លើយបំភ្លឺ ជុំវិញបញ្ហារឿងអាស្រូវផ្លូវភេទមួយនេះ បន្ថែមពីលើនេះលោកស្រីក៏បានអំពាវនាវដល់ស្ត្រីទាំងអស់ មេត្តាផ្តល់នូវកិត្តិយសដល់ស្ត្រីក្នុងសង្គមខ្មែរកុំឲ្យថ្នាក់ដឹកនាំយកកិត្តយសស្ត្រីមកជាន់ឈ្លីបែបនេះទៀត៕

រដ្ឋមន្រ្តីការបរទេសនៃសាធារណរដ្ឋប្រជាមានិតចិន នឹងដឹកនាំគណៈប្រតិភូអញ្ជើញមកបំពេញទស្សនកិច្ចជាផ្លូវការនៅកម្ពុជា ពីថ្ងៃទី២១ ដល់ថ្ងៃទី២២ ខែមេសាខាងមុខនេះ

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី១៩ ខែមេសា ឆ្នាំ២០១៦នេះ បានឲ្យដឹងថា ឯកឧត្តម វ៉ាង យី រដ្ឋមន្រ្តីការបរទេសនៃសាធារណរដ្ឋប្រជាមានិតចិន នឹងដឹកនាំគណៈប្រតិភូ អញ្ជើញមកបំពេញទស្សនកិច្ចជាផ្លូវការនៅកម្ពុជា ចាប់ពីថ្ងៃទី២១ ដល់ថ្ងៃទី២២ ខែមេសា ឆ្នាំ២០១៦ខាងមុខនេះ ដើម្បីពង្រឹងបន្ថែមទៀតនូវទំនាក់ទំនងល្អ និងពង្រីកកិច្ចសហប្រតិបត្តិការ ប្រកបដោយផ្លែផ្ការវាងប្រទេសទាំង ពីរ។

សេចក្តីប្រកាសព័ត៌មាន បានបន្ថែមថា ក្នុងអំឡុងពេលទស្សនកិច្ច ឯកឧត្តម វ៉ាង យី រដ្ឋមន្រ្តីការបរទេសនៃសាធារណរដ្ឋប្រជាមានិតចិននឹងចូលបង្គំគាល់ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងជួបសំដែងការគួរសមជាមួយ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងឯកឧត្តម ហោ ណាំហុង ឧបនាយករដ្ឋមន្រ្តី និងជួបពិភាក្សាផ្លូវការជាមួយឯកឧត្តម ប្រាក់ សុខុន ទេសរដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិផងដែរ។

ដំណើរទស្សនកិច្ចនេះ ធ្វើឡើងតបតាមការអញ្ជើញរបស់ឯកឧត្តម ប្រាក់ សុខុន ទេសរដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិនៃកម្ពុជា៕