សម្តេចធិបតី ហ៊ុន ម៉ាណែត៖ ការខិតខំដើរទាក់ម៉ូយ គឺដើម្បីជំរុញកំណើនសេដ្ឋកិច្ចជាតិ និងបង្កើតឱកាសការងារ

 

ក្នុងឱកាសអញ្ជើញជាអធិបតីដឹកនាំកិច្ចប្រជុំពេញអង្គគណៈរដ្ឋមន្រ្តី នៅព្រឹកថ្ងៃទី១៥ ខែមីនា ឆ្នាំ២០២៤ ដែលប្រារព្ធនៅវិមានសន្តិភាព សម្តេចធិបតី ហ៊ុន ម៉ាណែត បានគូសបញ្ជាក់ថា រាជរដ្ឋាភិបាល កំពុងខិតខំប្រឹងប្រែងដើរទាក់ម៉ូយ ក្នុងគោលបំណងដើម្បីជំរុញកំណើនសេដ្ឋកិច្ចជាតិ និងបង្កើតឱកាសការងារជូនប្រជាពលរដ្ឋ។

សម្តេចធិបតី ហ៊ុន ម៉ាណែត បានគូសបញ្ជាក់បន្ថែមថា កន្លងមក សម្តេចតែងតែបានជួបជាមួយតំណាងក្រុមហ៊ុន វិនិយោគិននៅក្រៅប្រទេសជាច្រើន ដើម្បីផ្សព្វផ្សាយពីឱកាសនិងសក្តានុពលនៃការវិនិយោគនៅកម្ពុជា ប៉ុន្តែការសម្រេចចិត្តណាមួយនោះមិនអាចធ្វើឡើងដោយភ្លាមៗនោះទេ។

សម្តេចធិបតី ហ៊ុន ម៉ាណែត ក៏បានគូសបញ្ជាក់ថា ការវាយតម្លៃខុសណាមួយនោះគឺដោយសារមិនបានទទួលព័ត៌មានគ្រប់ជ្រុងជ្រោយ ហើយបើសិនជាប្រជាពលរដ្ឋចង់ដឹងពីដំណើរវិវត្តនៃគម្រោងវិនិយោគផ្សេងៗ សូមចូលមើលក្នុងការផ្សាយរបស់ CDC និងក្រសួងស្ថាប័នផ្លូវការរបស់រាជរដ្ឋាភិបាល៕