ឯកឧត្តម លី ធុជ៖ កម្ពុជា បានធ្វើការបោសសម្អាតបានជា៣ពាន់គីឡូម៉ែត្រឡា ដែលមានទំហំធំជាងគេក្នុងចំណោមប្រទេស ដែលកំពុងបោសសម្អាតគ្រាប់មីននៅលើពិភពលោក

ឯកឧត្ដមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន និងជាប្រធានគណៈកម្មការអន្តរក្រសួង រៀបចំធ្វើជាម្ចាស់ផ្ទះកិច្ចប្រជុំកំពូលសៀមរាប-អង្គរ ស្តីពីពិភពលោកមួយដែលគ្មានមីន បានថ្លែងប្រាប់អ្នកសារព័ត៌មាន នៅខេត្តសៀមរាប កាលពីរសៀលថ្ងៃទី0៧ ខែកុម្ភៈ ឆ្នាំ២០២៤ ថា កាលពីខែវិច្ឆិកា ឆ្នាំ២០២៣កន្លងទៅ ប្រទេសកម្ពុជាត្រូវបានបោះឆ្នោតជ្រើសរើសជាប្រធានអនុសញ្ញាអូតាវ៉ា (ស្តីពីការហាមឃាត់ប្រើប្រាស់មីនប្រឆាំងមនុស្ស) ដែលអនុញ្ញាអូតាវ៉ានេះ គឺមានគោលដៅបញ្ចប់នូវការឈឺចាប់ទុក្ខវេទនារបស់ប្រជាពលរដ្ឋពិភពលោក ក៏ដូចជាកម្ពុជា ដោយសារសំណល់ជាតិផ្ទុះពីសង្គ្រាម។

ឯកឧត្តមបន្តថា ការបោះឆ្នោតជ្រើសរើសកម្ពុជាធ្វើជាប្រធានអនុសញ្ញាអូតាវ៉ា និងម្ចាស់ផ្ទះកិច្ចប្រជុំកំពូលសៀមរាប-អង្គរ ស្តីពីពិភពលោកមួយ ដែលគ្មានមីននេះ គឺដោយសារកត្តាសន្តិភាព ស្ថិរភាពនយោបាយ សន្តិសុខសណ្ឋាប់ធ្នាប់គ្រប់គ្រាន់ទាំងអស់។ ហើយដែលពិសេសនោះ គឺកម្ពុជាបានផ្សព្វផ្សាយទៅពិភពលោកថា កម្ពុជាចប់ពីសង្គ្រាមហើយ មានសន្តិភាព ប្រជាពលរដ្ឋរស់នៅដោយសម្បូរសប្បាយ។ 

បន្ថែមពីលើនេះ ឯកឧត្តមបានបន្ថែមថា ដោយកាលពីមុនកម្ពុជាជាប្រទេសមានសំណល់ជាតិផ្ទុះពីសង្គ្រាមច្រើន ឥឡូវរាជរដ្ឋាភិបាលបានធ្វើការបោសសម្អាតបានជា៣ពាន់គីឡូម៉ែត្រឡា ដែលមានទំហំធំជាងគេក្នុងចំណោមប្រទេស ដែលកំពុងបោសសម្អាតគ្រាប់មីននៅលើពិភពលោក។

ឯកឧត្តម លី ធុជ បានបន្តថា កិច្ចប្រជុំកំពូលសៀមរាប-អង្គរ ស្តីពីពិភពលោកមួយ ដែលគ្មានមីននេះ នឹងធ្វើឡើងនៅខែវិច្ឆិកា ឆ្នាំ២០២៤ នៅខេត្តសៀមរាប ដែលមានគណៈប្រតិភូនៃរដ្ឋភាគី អនុសញ្ញាអូតាវ៉ា ចំនួន ១៦៤ប្រទេស និងអង្គការអន្តរជាតិនានាជាច្រើនទៀតអញ្ជើញមកចូលរួម។ 

ដើម្បីឱ្យការទទួលបដិសណ្ឋារកិច្ចគណៈប្រតិភូបានល្អ គណៈប្រតិភូអន្តរក្រសួងនៅថ្ងៃនេះ បានចុះពិនិត្យទីតាំងព្រលានយន្តហោះអន្តរជាតិសៀមរាបអង្គរ និងសណ្ឋាគារសុខាសៀមរាប ដើម្បីត្រៀមរៀបចំទទួលស្វាគមន៍ និងបដិសណ្ឋារកិច្ចគណៈប្រតិភូឱ្យបានល្អប្រសើរ។

សូមបញ្ជាក់ថា ប្រទេសកម្ពុជាយើងរហូតមកដល់ពេលនេះមានខេត្តចំនួន ១៨ ក្នុងចំណោម ២៥រាជធានី ខេត្ត បានអស់មីន ដែលនេះជាជោគជ័យដ៏ធំមួយ ហើយនៅសល់ ០៧ ខេត្តទៀត ដែលជាខេត្តនៅជាប់ព្រំដែនថៃ ដែលកំពុងធ្វើការបោសសម្អាតជាបន្តបន្ទាប់ទៀត និងគ្រោងបញ្ចប់ទាំងអស់នៅត្រឹមឆ្នាំ២០២៥៕