សម្ដេចតេជោ ហ៊ុន សែន ថ្លែងអំណរគុណដល់គ្រិស្តបរិស័ទទាំងអស់ដែលបានចូលរួមការពារសន្តិភាពនៅកម្ពុជា

ក្នុងពិធីអបអរសាទរខួប១០០ឆ្នាំនៃគ្រិស្តសាសនា «មរតកដំណឹងល្អ ១០០ឆ្នាំ (១៩២៣-២០២៣)» នៅកម្ពុជា ដែលពិធីនេះ ត្រូវរៀបចំធ្វើឡើង នៅបរិវេណមជ្ឈមណ្ឌលកោះពេជ្រ នាព្រឹកថ្ងៃទី២៧ ខែមករា ឆ្នាំ២០២៣ សម្តេចតេជោ ហ៊ុន សែន បានថ្លែងអំណរគុណដល់គ្រិស្តបរិស័ទទាំងអស់ដែលបានចូលរួមការពារសន្តិភាពនៅកម្ពុជា និងចូលរួមប្រយុទ្ធនឹងជំងឺកូវីដ-១៩នាពេលកន្លងទៅ និងក៏បានចូលរួមក្នុងការអភិវឌ្ឍព្រះរាជាណាចក្រកម្ពុជាផងដែរ។

សម្ដេចតេជោ ហ៊ុន សែន បានគូសបញ្ជាក់ថា ការខុសគ្នារវាងជាតិសាសន៍ និងសាសនា មិនមែនជាឧបសគ្គក្នុងការអភិវឌ្ឍប្រទេសជាតិនោះទេ សុំកុំនាំគ្នាចាប់បង្ខំឱ្យជឿសាសនាណាមួយ ឬនិកាយណាមួយ វាមិនអាចទៅរួចទេ។

សម្ដេចតេជោ ហ៊ុន សែន ក៏បានគូសបញ្ជាក់ថា គ្រប់សាសនា និងជាតិសាសន៍ទាំងអស់ដែលនៅលើទឹកដីកម្ពុជា បានឆ្លងកាត់នូវសុខទុក្ខជាមួយគ្នារាប់មិនអស់ ដូចជា ឆ្លងកាត់នូវសង្រ្គាម និងអំពើប្រល័យពូជសាសន៍ជាដើម និងក៏ទទួលបាននូវសុខសន្តិភាពនិងការអភិវឌ្ឍគ្រប់ៗគ្នាពីថ្ងៃ៧មករាផងដែរ៕