មហាអំណាចចិនចេញមុខប្រឆាំងដាច់ខាតចំពោះការកៀបសង្កត់របស់អាមេរិកលើកម្ពុជា ហើយថ្លែងថាគំនិតអាក្រក់នេះនឹងបរាជ័យ

(ភ្នំពេញ)៖ រដ្ឋាភិបាលនៃមហាអំណាចចិន បានចេញមុខប្រឆាំងដាច់ខាត លើការកៀបសង្កត់មកលើរាជរដ្ឋាភិបាលកម្ពុជា ដោយចិនលើកឡើងថា គំនិតអាក្រក់របស់អាមេរិកចំពោះទំនាក់ទំនងចិន និងកម្ពុជា នឹងត្រូវទទួលបរាជ័យ។ នេះបើតាមលោក Wang Wenbin អ្នកនាំពាក្យក្រសួងការបរទេសចិន ថ្លែងក្នុងសន្និសីទសារព័ត៌មានប្រចាំថ្ងៃ នៅថ្ងៃទី៩ ខែធ្នូ ឆ្នាំ២០២១ និងផ្សព្វផ្សាយបន្ត ដោយស្ថានទូតចិនប្រចាំកម្ពុជានៅថ្ងៃនេះ។

ការចេញមុខការពារកម្ពុជារបស់ចិន បានធ្វើឡើងបន្ទាប់ពី ក្រសួងពាណិជ្ជកម្មអាមេរិក នៅថ្ងៃទី៨ ខែធ្នូ ឆ្នាំ២០២១ បានប្រកាសថា អាមេរិកនឹងបន្ថែមវិធានការកំណត់ថ្មី ដោយហាមឃាត់លក់អាវុធ និងសម្ភារៈយោធាដល់កម្ពុជា ក្រោមហេតុផលសិទ្ធិមនុស្ស និងនយោបាយ។

លោក Wang Wenbin អ្នកនាំពាក្យក្រសួងការបរទេសចិន បានបញ្ជាក់ថា «ថ្មីៗនេះ អាមេរិកបន្តបង្ខូចឈ្មោះ និងលាបពណ៌លើទំនាក់ទំនងនិងកិច្ចសហប្រតិបត្តិការរវាងចិននិងកម្ពុជា គំរាមកំហែង ដាក់សម្ពាធ និងការដាក់ទណ្ឌកម្មមកលើកម្ពុជា។ នេះគឺជាទង្វើ ដែលប្រើអំណាចគៀបសង្កត់លើអ្នកដទៃយ៉ាងពិតប្រាកដ និងច្បាស់លាស់ នេះបានល្មើសនឹងក្រមប្រតិបត្តិមូលដ្ឋាននៃទំនាក់ទំនងអន្តរជាតិផងដែរ។ ភាគីចិន ប្រឆាំងជាដាច់ខាតចំពោះទង្វើបែបនេះ»។

បើតាមលោក Wang Wenbin, ចិននិងកម្ពុជា គឺជាដៃគូកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយ ជាមិត្តដែកថែបនិងជាសហគមន៍វាសនារួម។ ចំណងមិត្តភាពជាប្រពៃណីនៃប្រទេសទាំងពីរឆ្លងកាត់ការសាកល្បងតាមគ្រប់រូបភាព ធ្វើឱ្យកាន់តែរឹងមាំមិនអាចបំបែកបាន។

លោកបន្តថា «គំនិតអាក្រក់ប៉ុនប៉ងរបស់អាមេរិកលើ ទំនាក់ទំនង ចិន និង កម្ពុជា នឹងទទួលបរាជ័យ ។ ភាគីចិនគាំទ្រកម្ពុជាយ៉ាងម៉ឺងម៉ាត់ ក្នុងការការពារអធិបតេយ្យភាពជាតិ និងសេចក្តីថ្លៃថ្នូរនៃជាតិ នឹងគាំទ្រឈរជាមួយប្រជាជនកម្ពុជាជារៀងរហូត»។

សូមជម្រាបថា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នៅថ្ងៃទី១០ ខែធ្នូ ឆ្នាំ២០២១នេះ ក៏ប្រតិកម្មខ្លាំងទៅផងដែរ ដោយសម្តេចបានបញ្ជាដល់អង្គភាពប្រដាប់អាវុធទាំងអស់ ឱ្យធ្វើការត្រួតពិនិត្យឡើងវិញជាបន្ទាន់អំពីអាវុធ និងសម្ភារៈយោធាអាមេរិក ហើយបើមានត្រូវយកទៅរក្សាទុកក្នុងឃ្លាំង ឬយកទៅកំទេចចោលតាមការជាក់ស្តែង។

សម្រាប់សម្តេចតេជោ ហ៊ុន សែន បានផ្តាំកូនខ្មែរ ដែលគ្រប់គ្រងរាជរដ្ឋាភិបាលជំនាន់ក្រោយថា បើចង់មានឯករាជ្យភាពលើវិស័យការពារជាតិ សូមកុំប្រើប្រាស់អាវុធ របស់អាមេរិក៕

ដោយ៖ Fresh News