ពិធីប្រកាសក្រុមការងារយុវជនគណបក្សប្រជាជនកម្ពុជាឃុំចំនួន០២ក្នុងស្រុកសាមគ្គីមានជ័យ

 កំពង់ឆ្នាំង៖ នៅថ្ងៃទី២១ ខែកុម្ភៈ ឆ្នាំ២០២១នេះ នៅស្នាក់ការគណបក្សប្រជាជនកម្ពុជាឃុំខ្នាឆ្មារ មានរៀបចំកិច្ចប្រជុំផ្សព្វផ្សាយរបាយការណ៍ ស្តីពីសភាពការណ៍ទូទៅ និងការងារគណបក្សឆ្នាំ២០២០ និងទិសដៅភារកិច្ចឆ្នាំ២០២១ និងប្រកាសសមាសភាពក្រុមការងារយុវជនគណបក្សឃុំ ភូមិ ព្រមទាំងប្រកាសបែងចែកសមាសភាពក្រុមការងារថ្នាក់កណ្តាល ថ្នាក់ខេត្ត ថ្នាក់ស្រុក និងគណៈសាខាគណបក្សឃុំ ដើម្បីទទួលខុសត្រូវ និងពង្រឹងការងារគណបក្សនៅតាមបណ្តាមូលដ្ឋានភូមិ នៃឃុំខ្នាឆ្មារ និងធ្លកវៀន ក្រោមអធិបតីភាព លោក ចាន់ ដារ៉ុង អនុប្រធានក្រុមការងារគណៈកម្មាធិការកណ្តាលចុះពង្រឹងស្រុកសាមគ្គីមានជ័យ និងជាប្រធានក្រុមការងារថ្នាក់កណ្តាលចុះពង្រឹងឃុំខ្នាឆ្មារ និងឃុំធ្លកវៀន។

ដោយមានការអញ្ជើញចូលរួមពីលោក ស៊ីវ រុន អនុប្រធានក្រុមការងារថ្នាក់ខេត្តចុះពង្រឹងឃុំ ខ្នាឆ្មារ ក្រុមការងារគណបក្សថ្នាក់កណ្តាល ខេត្ត ចុះពង្រឹងឃុំ ប្រធាន អនុប្រធានគណបក្សស្រុក អនុប្រធានយុវជនគណបក្សស្រុក និងសមាជិក សមាជិកា។ ជាមួយគ្នានេះដែរ លោករួមនឹងក្រុមការងារបានចែកជូននូវក្រមាបង់ក ដែលមានរំលេចដោយទង់ជាតិ និងនិមិត្តសញ្ញាគណបក្ស ក្នុងម្នាក់ៗចំនួន១ សរុប ៥២ក្រមា និងជូនថវិកាដល់អ្នកចូលរួមផងដែរ។
លោក ស៊ីវ រុន អនុប្រធានក្រុមការងារថ្នាក់ខេត្តចុះពង្រឹងឃុំ ខ្នាឆ្មារ បានផ្សព្វផ្សាយនូវខ្លឹមសារ “របាយការណ៍ស្តីពីសភាពការណ៍ទូទៅ និងការងារគណបក្សទូទៅឆ្នាំ២០២០ និងទិសដៅភារកិច្ចឆ្នាំ២០២១” របស់គណៈកម្មាធិការកណ្តាលជូនដល់សមាជិក សមាជិកាដែលបានចូលរួមក្នុងកិច្ចប្រជុំ។
លោក មុំ សុរ័ត្ន អនុប្រធានយុវជនគណបក្សប្រជាជនកម្ពុជាស្រុកសាមគ្គីមានជ័យ បានអានសេចក្តីសម្រេចរបស់គណៈកម្មាធិការគណបក្សស្រុក ដែលប្រកាសតែងតាំងក្រុមយុវជនគណបក្សឃុំ ចំនួន ០២ឃុំគឺៈ ឃុំខ្នាឆ្មារ និងឃុំធ្លកវៀន និងក្រុមយុវជនគណបក្សភូមិ មានចំនួន ១៤ភូមិ ដែលមានសមាសភាពសរុបចំនួន ៤២រូប ស្រីចំនួន ៦រូប។ បន្ទាប់មកគណៈអធិបតី បានប្រគល់សេចក្តីសម្រចដល់ក្រុមយុវជនគណបក្សប្រជាជនកម្ពុជាក្នុងឃុំដែលទើបប្រកាសថ្មី និងតំណាងក្រុមយុវជនទាំង ៤២រូប ទើបនិងប្រកាសថ្មីបានធ្វើការប្តេជ្ញាចិត្ត។

មានប្រសាសន៍ក្នុងឱកាសនោះលោក ចាន់ ដារ៉ុង បានកោតសរសើរដល់គណបក្សឃុំដែលបានខិតខំប្រឹងប្រែងអនុវត្តការងារកន្លងបានល្អ។ លោកក៏បានធ្វើការណែនាំដល់ក្រុមការងារយុវជនគណបក្សក្នុងឃុំទាំងពីរ ទើបនិងប្រកាសថ្មីត្រូវចូលរួមឱ្យបានកាន់តែខ្លាំងក្លា តាមរយៈសកម្មភាពជួយដល់សង្គម និងការកៀរគរកសាងកម្លាំងយុវជនថ្មី។ ត្រូវបង្កើនសមត្ថភាពចំណេះដឹង ចំណេះធ្វើដើម្បីដណ្តើមយកជ័យជម្នះក្នុងការបោះឆ្នោតឆ្នាំ២០២២ ឆ្នាំ២០២៣ និងអាណត្តិក្រោយៗទៀត។

លោកបណ្ឌិត ក៏បានផ្តាំផ្ញើឱ្យក្រុមការងារយុវជនគណបក្ស ត្រូវបន្តខិតខំបំពេញមុខនាទីការងារយុវជនគណបក្ស ធ្វើយ៉ាងណាបំផុស អប់រំឱ្យប្រជាពលរដ្ឋ មានជំនឿជឿជាក់លើការដឹកនាំរបស់រាជរដ្ឋាភិបាលកម្ពុជា ដែលបាន និងកំពុងដឹកនាំដោយគណបក្សប្រជាជនកម្ពុជា ជាពិសេសត្រូវថែរក្សា ការពារ និងពង្រីកបន្ថែមនូវរាល់សមិទ្ធផលរូបវន្តនិងការរីកចម្រើនក្នុងសង្គមជាតិ និងនៅមូលដ្ឋាន ស្រុក ឃុំ ភូមិ ក្រោមម្លប់នៃសន្តិភាព និងការអភិវឌ្ឍ។ ចូលរួមគ្រប់សកម្មភាពស្របច្បាប់ ដណ្ដើមឱ្យបានជោគជ័យដាច់ខាត រាល់ការបោះឆ្នោតសកល និងអសកល គាំទ្រជារៀងរហូត បេក្ខភាព លោកនាយករដ្ឋមន្រ្តី ហ៊ុន សែន ធ្វើជានាយករដ្ឋមន្រ្តីអាណត្តិរដ្ឋសភានីតិកាលទី៧ និងអាណត្តិបន្តទៀត ប្រឆាំងដាច់ខាតរាល់ឧបាយកលរបស់ពួកប្រឆាំងទាំងក្នុងនិងក្រៅប្រទេស ៕