ប្រជាពលរដ្ឋចំនួន៣ឃុំ ក្នុងស្រុកសំបូរ ទទួលបានអំណោយពីសប្បុរសជន

ក្រចេះ ៖ នៅថ្ងៃទី២៩ ខែឧសភា ឆ្នាំ២០២០នេះ ប្រជាពលរដ្ឋចំនួន១០០គ្រួសារ មកពីឃុំចំនួន០៣ ក្នុងស្រុកសំបូរ គឺឃុំក្បាលដំរី ឃុំអូរគ្រៀង និងឃុំសំបូរ ទទួលបានអំណោយសប្បុរស សង្រ្គោះជីវភាព និងសុខភាព ពីលោកស្រី សេង វួចលាង លោក បេ គឹមលី លោកស្រី ខាំ សុភាព អភិបាលរងខេត្ត រួមនិងឧត្តមសេនីយ៍ទោ ឈុន ហុង និងលោកស្រី ស៊ុន សុវណ្ណានី និងលោកស្រីប្រធានសាលាដំបូងខេត្ត រួមនឹងសហការី មានជាគ្រឿងបរិភោគ សម្ភារៈ និងថវិកា មួយចំនួនជូនដល់បងប្អូនប្រជាពលរដ្ឋ ដើម្បីចូលរួមចំណែកសម្រួលសង្រ្គោះ និងលើកកម្ពស់ដល់ជីវភាព-សុខភាពប្រចាំថ្ងៃ របស់បងប្អូនប្រជាពលរដ្ឋក្នុងអំឡុងពេលជម្ងឺកូវីដ-១៩ រីករាលដាលជាសកល។

អំណោយដែលផ្ដល់ជូននាពេលនោះក្នុងម្នាក់ទទួលបានអង្គរ២០គីឡូក្រាម -ក្រណាត់ប៉ាតង់ ប្លាស្ទិក១ដុំ -ទឹកត្រី ២ដប -ទឹកស៊ីអ៊ីវ២ដប -ឆៃពៅ១គីឡូក្រាម -ខ្ទឹមសកន្លះគីឡូក្រាម -ត្រីខ១០កំប៉ុង -កន្ទេល ១ -មុង១ -ក្រម៉ា១ នឹងថវិកាចំនួន២ម៉ឺនរៀល។ មានប្រសាសន៍បញ្ជាក់ឲ្យដឹងពីលោកស្រី សេង វួចលាង ដោយក្តីស្រឡាញ់ និងអាណិតបងប្អូនប្រជាពលរដ្ឋដែលរស់នៅក្នុងខេត្តក្រចេះ ជាពិសេសស្រុកសំបូរតែម្តង ដែលជាស្រុកកំណើតរបស់ស្វាមីលោកស្រី ដែលបច្ចុប្បន្នបងប្អូនកំពុងជួបនូវបញ្ហា ដោយសារការរាតត្បាតពីជំងឺកូវីដ-១៩ ដែលរីករាលដាលជាសកល ក្នុងនោះធ្វើឲ្យប៉ះពាល់ដល់ជីវភាព និងសុខភាពប្រចាំថ្ងៃរបស់បងប្អូនប្រជាពលរដ្ឋនៅតាមមូលដ្ឋាន ទើបលោកស្រី នាំយកនូវអំណោយសប្បុរសជន មកប្រគល់ជូនបងប្អូននៅពេលនេះ ។

ក្នុងឱកាសនោះ លោកស្រីក៏បានអោយបងប្អូនប្រជាពលរដ្ឋរួមគ្នាទប់ស្កាត់នូវការរីករាលដាលជំងឺកូវីដ-១៩ រលកទី២ គឺបងប្អូនត្រូវបន្តពង្រឹងការរក្សាអនាម័យសុខភាព អាយុជីវិតសម្រាប់ខ្លួនឯងផ្ទាល់ និងសម្រាប់កូនចៅជាទីស្រលាញ់ កុំឲ្យឆ្លងមេរោគឲ្យសោះ និងសូមកុំឲ្យមានវិប្បដិសារីកើតឡើង ព្រោះតែការធ្វេសប្រហែស និងមើលស្រាលចំពោះស្ថានការណ៍បច្ចុប្បន្ន ទោះបីចំនួនអ្នកឆ្លងជំងឺកូវីដ-១៩ ក្នុងប្រទេសយើងមានតិចក៏ពិតមែន។ ដើម្បីបង្កាជំងឺនេះ ប្អូនប្រជាពលរដ្ឋត្រូវពាក់ម៉ាស ហើយត្រូវដុសលាងសម្អាតដៃជាប្រចាំ ដោយប្រើសាប៊ូ ទឹកអាកុល ឬជែលសម្លាប់មេរោគ និងត្រូវខ្ទប់មាត់ជាមួយក្រម៉ា ក្រដាស ម៉ាស់ ឬកែងដៃ នៅពេលក្អក ឬកណ្ដាស់ ជាពិសេសនៅក្នុងចំណោមក្រុមមនុស្សច្រើន។

លើសពីនោះដែរ លោកស្រី រួមនឹងក្រុមការងារ ក៏បានបន្តនាំយកនូវសម្ភារៈសិក្សា រួមនឹងបច្ច័យមួយចំនួន ប្រគេនជូនព្រះសង្ឃ សមណសិស្ស ក្នុងវត្តព្រះវិហារធំសសរ១០០ ចំនួន៧១ អង្គផងដែរ៕