ផ្អែកតាមការវាយតម្លៃនៃស្ថានភាពសេដ្ឋកិច្ចសកល និងក្នុងតំបន់ របស់ស្ថាប័នសេដ្ឋកិច្ចអន្តរជាតិធំៗដូចជា មូលនិធិរូបិយវត្ថុអន្តរជាតិ (IMF) ធនាគារពិភពលោក (WB) និងធនាគារអភិវឌ្ឍអាស៊ី (ADB) ជាដើម សុទ្ធតែបានធ្វើការសន្និដ្ឋានថាសេដ្ឋកិច្ចពិភពលោក និងតំបន់ក្នុងឆ្នាំ២០២០នេះ នឹងមានការពិបាក ហើយថាសេដ្ឋកិច្ចពិភពលោក និងក្នុងតំបន់នឹងមានការធ្លាក់ចុះទាំងអស់គ្នា។ ការធ្លាក់ចុះនេះគឺបណ្តាលមកពីបញ្ហាជាច្រើន ពិសេសសង្គ្រាមពាណិជ្ជកម្មរវាងអាមេរិក-ចិននៅតែបន្តដែលអាចនឹងជះឥទ្ធិពលខ្លាំងដល់សេដ្ឋកិច្ចសកល និងសេដ្ឋកិច្ចក្នុងតំបន់នេះ។ ទី២ គឺកត្តាភូមិសាស្ត្រនយោបាយ ពិសេសតំបន់មជ្ឈិមបូព៌ា ដែលកំពុងមានភាពមិនច្បាស់លាស់លើបញ្ហាវិបត្តិនៃសង្គ្រាមដែលអាចនឹងកើតមានឡើង ធ្វើឱ្យអ្នកវិនិយោគពិបាករកស៊ី ដោយសារមានភាពប្រឈមខ្លាំង។និងទី៣ គឺបញ្ហាការរាតត្បាតនៃវីរុសរលាកផ្លូវដង្ហើម(COVID-19)នៅប្រទេសចិននេះតែម្តង ពីព្រោះប្រទេសចិនគឺជាដៃគូរកស៊ីលេខមួយជាមួយស្ទើរតែគ្រប់ប្រទេសទាំងអស់ក្នុងពិភពលោក។ បន្ថែមលើនេះក៏នៅមានវិបត្តិនៃបរិស្ថានសកល លើផ្នែកអាកាសធាតុនៃការឡើងកំដៅផែនដីធ្វើឱ្យមានបញ្ហាភ្លើងឆេះព្រៃកំពុងកើតមាននៅប្រទេសអូស្ត្រាលីដែលពិបាកគ្រប់គ្រង និងហេតុការណ៍ផ្សេងៗនៅអាហ្វ្រិកធ្វើឲ្យប៉ះពាល់ដល់បញ្ហាសេដ្ឋកិច្ចពិភពលោក និងសេដ្ឋកិច្ចក្នុងតំបន់នេះផងដែរ។
បញ្ហាប្រឈមនៃការធ្លាក់ចុះសេដ្ឋកិច្ចសកលនេះ បានធ្វើឱ្យរដ្ឋាភិបាលនៅក្នុងតំបន់ដាក់ចេញនូវវិធានការឆ្លើយតបមួយចំនួនផងដែរ។ រដ្ឋាភិបាលនៅក្នុងតំបន់បានវាយតម្លៃខ្ពស់ថាក្នុងចំណោមវិស័យដែលរងផលប៉ះពាល់ខ្លាំងជាងគេគឺវិស័យទេសចរណ៍ និងវិស័យវាយនភ័ណ្ឌដែលកំពុងរងនូវកង្វះខាតការផ្គត់ផ្គង់វត្ថុធាតុដើមដែលភាគច្រើនផ្គត់ផ្គង់មកពីប្រទេសចិន។ សម្រាប់សេដ្ឋកិច្ចប្រទេសកម្ពុជា ការរីករាលដាលនៃជំងឺ COVID-19 ក៏អាចនឹងប៉ះពាល់ដល់វិស័យចំនួន២របស់កម្ពុជាដែរ គឺវិស័យទេសចរណ៍ និងវិស័យកាត់ដេរ។
ក្រោយពេលពិនិត្យឃើញយ៉ាងម៉ត់ចត់នូវបញ្ហាប្រឈមចំពោះមុខនេះ លោកនាយករដ្ឋមន្ត្រី ហ៊ុន សែន បានប្រកាសដាក់ចេញនូវវិធានការមួយចំនួនភ្លាមៗនាព្រឹកថ្ងៃទី២៤ ខែកុម្ភៈ ឆ្នាំ២០២០ នេះ ដើម្បីជួយដោះស្រាយដល់តួអង្គទាំងអស់ដែលពាក់ព័ន្ធផង និងដើម្បីជួយជំរុញដល់ក្រុមហ៊ុនវិនិយោគឱ្យមានដំណើរការជាធម្មតាផង។
នៅលើវិស័យកាត់ដេរ ដោយសាររោងចក្រផលិតវត្ថុធាតុដើមនៅប្រទេសចិនមិនទាន់ដំណើរការឡើងវិញទាំងអស់នៅឡើយធ្វើឱ្យវត្ថុធាតុដើម ជាពិសេសការផ្គត់ផ្គង់ក្រណាត់សម្រាប់រោងចក្រមួយចំនួននៅកម្ពុជាមិនអាចមកទាន់ពេល ដែលរោងចក្រមួយចំនួននោះចាំបាច់ត្រូវផ្តើមព្យួរការងារកម្មករនៅក្នុងរយៈពេលខ្លី ដូច្នេះលោកនាយករដ្ឋមន្ត្រី ហ៊ុន សែន បានដាក់វិធានការជួយសង្គ្រោះទាំងកម្មករ និងថៅកែរោងចក្រនៅក្នុងរយៈពេលអន្តរកាលនេះដោយ៖
ទី១.ផ្តល់នូវការលើកលែងពន្ធប្រចាំខែក្នុងរយៈពេលពី៦ខែទៅ១ឆ្នាំ សម្រាប់រោងចក្រដែលប៉ះពាល់ធ្ងន់ធ្ងរលើបញ្ហាកង្វះវត្ថុធាតុដើមនេះ ដោយសារនៅប្រទេសចិនកំពុងមានការរាតត្បាតដោយវីរុស COVID-19 ហើយពន្ធដែលលើកលែងនោះគឺរដ្ឋជាអ្នកបង់ជំនួស។
ទី២.រោងចក្រមួយចំនួនដែលផ្អាកសកម្មភាពក្នុងរយៈពេលខ្លីដោយមូលហេតុខ្វះវត្ថុធាតុដើមទាំងនោះនៅតែមានកាតព្វកិច្ចត្រូវផ្តល់ប្រាក់ខែដល់កម្មករ-កម្មការិនីចំនួន៤០% ហើយរាជរដ្ឋាភិបាលទទួលរ៉ាប់រងចេញចំនួន២០%បន្ថែមទៀត ដូច្នេះ កម្មករ-កម្មការិនី ដែលត្រូវព្យួរការងារក្នុងរយៈពេលខ្លីនោះនឹងទទួលបានចំនួន៦០%នៃប្រាក់ខែគោលរបស់ពួកគេ ដែលប្រហាក់ប្រហែលនឹង១២០ដុល្លារអាមេរិកក្នុងមួយខែ ទម្រាំរោងចក្រមានវត្ថុធាតុដើមអាចដំណើរការជាធម្មតាឡើងវិញ។
ទី៣.ក្រសួងការងារ និងរោងចក្រត្រូវបង្កើតវគ្គបណ្តុះបណ្តាលបំប៉នជំនាញដល់កម្មករ-កម្មការិនី នៅតាមរោងចក្រដែលព្យួរការងារ ដើម្បីបង្កើនជំនាញវិជ្ជាជីវៈដល់កម្មករ-កម្មការិនីឱ្យកាន់តែមានកំរិតខ្ពស់ដើម្បីបង្កើនសង្វាក់ផលិតកម្មនាពេលអនាគត។
ទី៤.ក្រសួងការងារ ត្រូវសហការគ្នាជាមួយរោងចក្រដើម្បីពន្យល់ និងផ្សព្វផ្សាយដល់ក្រុមហ៊ុនបញ្ជាទិញ ដើម្បីបង្ហាញអំពីលក្ខខណ្ឌការងារកាន់តែប្រសើររបស់កម្មករ-កម្មការិនី។
ទី៥.ក្រសួងការងារ ត្រូវសហការជាមួយភ្នាក់ងារមុខរបរដើម្បីខិតខំជួយស្វែងរកការងារបន្ថែមទៀតដល់កម្មករ-កម្មការិនី នៅក្នុងរយៈពេលដែលកម្មករព្យួរការងារនេះ និងត្រូវបន្តបណ្តុះបណ្តាលទាំងជំនាញទន់ និងជំនាញរឹង ដល់កម្មករ។
សម្រាប់វិស័យទេសចរណ៍វិញ លោកនាយករដ្ឋន្ត្រី ហ៊ុន សែន បានសម្រេចដោះស្រាយនូវវិធានការជាក់ស្តែងមួយចំនួនដូចជា៖
ទី១.ចំពោះវិស័យផ្ទះសំណាក់ និងសណ្ឋាគារ គឺអនុវត្តតែនៅខេត្តសៀមរាបប៉ុណ្ណោះ ដោយលើកលែងមិនយកពន្ធប្រចាំខែរយៈពេល៤ខែហើយពន្ធទាំងអស់ក្នុងរយៈពេលនេះគឺជាបន្ទុករបស់រដ្ឋ។
ទី២.រាជរដ្ឋាភិបាលសម្រេចមិនធ្វើសវនកម្មលើអាជីវកម្មសណ្ឋាគារទាំងអស់នៅខេត្តសៀមរាប។
ទី៣.ជំរុញឱ្យមានការធ្វើសិក្ខាសាលា និងវគ្គបណ្តុះបណ្តាលដល់បុគ្គលិកសណ្ឋាគារ ពិសេសនៅខេត្តសៀមរាប។ ក្នុងនោះកិច្ចប្រជុំផ្សេងៗរបស់រដ្ឋាភិបាល រួមទាំងកិច្ចប្រជុំគណៈរដ្ឋមន្ត្រីផងត្រូវធ្វើនៅខេត្តសៀមរាប ដើម្បីជួយជំរុញវិស័យទេសចរណ៍ឱ្យមានសន្ទុះឡើងវិញ។
ទី៤.ជំរុញឱ្យម្ចាស់សណ្ឋាគារទាំងអស់បន្ថយតំលៃស្នាក់នៅ ដើម្បីលើកទឹកចិត្តឱ្យភ្ញៀវជាតិទៅកំសាន្ត និងស្នាក់នៅឱ្យបានច្រើន និងក្នុងរយៈពេលយូរ។
ទី៥.សម្រាប់ភ្ញៀវទេសចរណ៍បរទេសត្រូវរក្សាតំលៃចូលទស្សនាប្រាសាទនានានៅតំបន់អង្គរ ឱ្យនៅដដែល ប៉ុន្តែត្រូវបង្កើនចំនួនថ្ងៃឱ្យភ្ញៀវអាចចូលទស្សនាបានច្រើនថ្ងៃជំនួសវិញ ដែលជាការបញ្ចុះតំលៃរហូតដល់៥០% សម្រាប់ភ្ញៀវបរទេសអាចស្នាក់នៅបានយូរថ្ងៃ។
វិធានការសំខាន់ៗទាំងនេះ ត្រូវបានលោកនាយករដ្ឋមន្ត្រី ហ៊ុន សែន ប្រកាសគាំទ្រចំពោះអ្នកវិនិយោគ កម្មករ-កម្មការិនី និងជួយទ្រទ្រង់ដល់ក្រុមហ៊ុន សហគ្រាសខ្នាតតូច និងមធ្យមទាំងអស់ហើយលោកនាយករដ្ឋមន្ត្រី ក៏បានអះអាងចំពោះអ្នកពាក់ព័ន្ធទាំងអស់ថា សូមឱ្យអ្នកវិនិយោគទាំងអស់មានទំនុកចិត្ត និងជឿជាក់ចំពោះរាជរដ្ឋាភិបាល ពីព្រោះសេដ្ឋកិច្ចរបស់កម្ពុជានៅតែមានភាពរឹងមាំ និងគួរឱ្យទុកចិត្ត ដោយសារប្រទេសជាតិកំពុងមានសុខសន្តិភាពពេញលេញ និងមានស្ថេរភាពនយោបាយ និងសង្គមជាធម្មតា៕
ដោយ៖ ពង្ស សុក្រឹត្យ
No comments:
Post a Comment