កត្តា៥យ៉ាងដើម្បីលើកកម្ពស់ការងារ និងជំរុញវិស័យឧស្សាហកម្មឱ្យកាន់តែល្អប្រសើរ!

នៅព្រឹកថ្ងៃទី៣០ ខែសីហា ឆ្នាំ២០១៧  លោកនាយករដ្ឋមន្រ្តី ហ៊ុន សែន បានបញ្ជាក់ជាថ្មីថារាជរដ្ឋាភិបាល បាននិងកំពុងធ្វើកិច្ចការគ្រប់បែបយ៉ាងដើម្បីលើកកម្ពស់វិស័យការងារ និងឧ​ស្សាហកម្មដើម្បីធានាជីវភាពល្អប្រសើររបស់បងប្អូនកម្មករ កម្មការិនី ក្នុង​នោះ​ លោក ហ៊ុន សែន  បាន​លើក​ឡើង​នូវ​កត្តា​៥យ៉ាង​ដើម្បី​សម្រេចជោគ​ជ័យ​។

ចំ​ណុចគន្លឹះ​៥យ៉ាងដែល​លោក ហ៊ុន សែន​ ចង់​បញ្ជាក់​នោះ រួម​មាន​​ ទី១-ត្រូវរួមគ្នាថែរក្សាសន្តិភាព ស្ថិរភា​ព និងសុវត្ថិភាពសណ្តាប់ធ្នាប់សង្គមឱ្យបានល្អ​ ទី២- រួមគ្នារក្សាការងារចាស់ និងបង្កើតការ​ងារថ្មីៗច្រើនថែមទៀតដោយធ្វើការពង្រីកនិងបង្កើនទីផ្សារបន្ថែម​ ទី៣- រួមគ្នាបង្កើនប្រាក់ចំណូ​លដោយការខិតខំបណ្តុះបណ្តាលចំណេះដឹងបន្ថែមដល់កម្មករ និងកុំឱ្យកម្មករភ័យខ្លាចពីការបាត់បង់ការងារ និងប្រាក់ចំណូល​ ទី៤- ផ្តល់របបគាំពារសន្តិសុខសង្គមដល់កម្មករ គឺចាប់ពីខែ មករា ២០១៨ តទៅ និយោជក (ម្ចាស់ក្រុមហ៊ុន) នឹងបង់ថ្លៃរបបសន្តិសុខសង្គម ១០០% ដល់កម្មករ​  គឺបងប្អូនអាចចំណេញ ថវិកា ៨,០០០៛ ទៅ ១២,០០០៛ ក្នុង១ខែ និង​ទី៥- ផ្តល់កិច្ចគាំពារ និងយកចិត្តទុកដាក់ចំពោះកម្មករ កម្មការនីដែលធ្វើការនៅក្រៅប្រទេសតាមរយៈការគាំទ្រ និង​ជួយជ្រោមជ្រែងពីរាជរដ្ឋាភិបាល ក្នុងការធ្វើការទំនាក់ទំនងល្អជាមួយបណ្តាប្រទេសជាដៃគូដើម្បីផ្តល់ការងារដែលមានប្រាក់ចំណូលខ្ពស់ និងលក្ខខណ្ឌការងារល្អៗដល់ក្មួយៗកម្មករ។

ក្នុង​ឱកាសជួប​ជាមួយ​កម្មករ កម្មការីនីនៅសួន​ឧស្សាហកម្ម​វឌ្ឍនៈកាលពី​ព្រឹក​ថ្ងៃទី​៣០ ខែសីហា ឆ្នាំ​២០១៧នេះ​ដែរ លោកនាយករដ្ឋមន្រ្តី ហ៊ុន សែន ក៏បានសម្តែងនូវសេចក្តីសប្បាយរីករាយជាខ្លាំង​ដែលបានអញ្ជើញជួបជុំជាមួយបងប្អូនកូនក្មួយកម្មករ កម្មការនីទាំង​អស់​គ្នា​ ដើម្បី​ស្វែងយល់ពីតម្រូវការ និងបង្កើនប្រសិទ្ធភាពការងារឱ្យកាន់តែល្អប្រសើរឡើង ជាពិសេសដើម្បីជំរុញគោលន​យោ​​បាយឧស្សាហកម្ម ២០១៥-២០២៥ របស់រាជរដ្ឋាភិបាលកម្ពុជាឱ្យបានជោគជ័យ៕