ក្រ​សួងប​រិស្ថាន និង​គណៈកម្មការ ជំនាញរ​ដ្ឋសភា ពិនិត្យ​លើសេច​ក្តី ព្រាង​ច្បាប់​ការ ប្រែ​ប្រួលអាកាស​ធាតុ

ក្រសួងបរិស្ថាន និងគណៈកម្មការជំនាញរដ្ឋសភាចំនួនពីរ បានជួបប្រជុំពិនិត្យសិក្សាសេចក្តីព្រាងច្បាប់ ស្តីពី ការអនុម័ត យល់ព្រមលើកិច្ចព្រមព្រៀង ទីក្រុងប៉ារីស ស្តីពី ការប្រែប្រួលអាកាសធាតុ ។ លោក សាយ សំអាល់ រដ្ឋមន្ត្រីក្រសួងបរិស្ថាន មានប្រសាសន៍ក្នុងកិច្ចប្រជុំ កាលពីព្រឹកថ្ងៃទី១២ ខែតុលា នៅវិមានរដ្ឋសភាថា ប្រទេស១៩៧ រួមទាំងកម្ពុជា បានផ្តល់សច្ចាប័នលើអនុសញ្ញានេះ ហើយកម្ពុជា ក៏បានចុះហត្ថលេខាលើលិខិតតូបករណ៍នៃពិធីសារក្យូតូ ដែលបានអនុម័តក្នុងសន្និសីទបណ្តាភាគីលើកទី៣ (GHG ) ឆ្នាំ១៩៩៧ នៅប្រទេសជប៉ុនផងដែរ។ លោកបន្តថា កិច្ចព្រមព្រៀងទីក្រុងប៉ារីសនេះ បានបន្ថែមទៅលើកាតព្វកិច្ចដែលមានចែងនៅក្នុងអនុសញ្ញា (UNFCCC) ដែលជំរុញឲ្យភាគីទាំងអស់ ខិតខំប្រឹងប្រែងអនុវត្តកាតព្វកិច្ច របស់ខ្លួនក្នុងការដោះស្រាយ ការប្រែប្រួលអាកាសធាតុ និងបន្សំទៅនឹងឥទ្ធិពលនៃការប្រែប្រួលអាកាសធាតុ។ លោករដ្ឋមន្រ្តីបញ្ជាក់ថា «ការផ្តល់សច្ចាប័នលើកិច្ចព្រមព្រៀងនេះ កម្ពុជានឹងទទួលបានអត្ថប្រយោជន៍ជាច្រើន ក្នុងនោះគឺសហគមន៍អន្តរជាតិ បានទទួលស្គាល់ឆន្ទៈនយោបាយ ការប្តេជ្ញាចិត្ត និងការខិតខំប្រឹងប្រែង របស់កម្ពុជាក្នុងការចូលរួមដោះស្រាយបញ្ហាប្រែប្រួលអាកាសធាតុ។ ជាមួយគ្នានេះ កិច្ចព្រមព្រៀងនេះ កម្ពុជានឹង មានកាតព្វកិច្ចដូចបណ្តាប្រទេសអភិវឌ្ឍតិចតូច និងប្រទេសកំពុងអភិវឌ្ឍដទៃទៀត ក្នុងការចូលរួមអនុវត្ត ផែនការស្តីពីការចូលរួមចំណែក របស់រដ្ឋភាគី ក្នុងការអនុវត្តអនុសញ្ញា»។ គូរបញ្ជាក់ថា កិច្ចប្រជុំបានពិនិត្យសិក្សាលើកិច្ចព្រមព្រៀង និងលើខ្លឹមសារ និងទម្រង់ នៃសេចក្តីព្រាងច្បាប់ ទៅតាមនីតិវិធីរបស់រដ្ឋសភា ហើយបានសម្រេចថា នឹងបញ្ជូនសេចក្តីព្រាងច្បាប់នេះ ជូនគណៈកម្មាធិការ អចិន្រ្តៃយ៍នៃរដ្ឋសភា ដើម្បីពិនិត្យ និងសម្រេចបញ្ចូលក្នុងរបៀបវារៈ នៃសម័យប្រជុំពេញអង្គរដ្ឋសភា នាពេលខាងមុខនេះ។ សេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀងទីក្រុងប៉ារីសស្តីពីការប្រែប្រួលអាកាសធាតុ រួមមាន២មាត្រា។ សេចក្តីព្រាងច្បាប់នេះ តាក់តែងឡើងអនុលោមតាមអនុសញ្ញាក្របខណ្ឌសហប្រជាជាតិស្តីពី ការប្រែប្រួលអាកាសធាតុ (UNFCCC) ដែលបានអនុម័តក្នុងកិច្ចប្រជុំកំពូលស្តីពី ភពផែនដី នៅទីក្រុងរីយ៉ូ ប្រទេសប្រេលស៊ីល ឆ្នាំ១៩៩២ បានចូលជាធរមាន នៅឆ្នាំ១៩៩៤។ សន្និសីទប្រចំាឆ្នាំនៃបណ្តាភាគីអនុសញ្ញា UNFCCC លើកទី២១ នៅទីក្រុងប៉ារីស កាលពីចុងឆ្នាំ២០១៥។ គណៈកម្មការជំនាញរបស់រដ្ឋសភា ចូលរួមក្នុងកិច្ចប្រជុំនេះ មានគណៈកម្មការកិច្ចការបរទេស សហប្រតិបត្តិការ អន្តរជាតិ ឃោសនាការ និងព័តមាន ដឹកនាំដោយ លោកឈាង វុន ប្រធានគណៈកម្មការ និងគណៈកម្មការ ផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក ដឹកនាំដោយ លោកហ៊ូ ស្រ៊ី ប្រធានស្តីទី៕