តាមរយៈសេចក្តីបំភ្លឺ ដែលចេញផ្សាយនៅថ្ងៃទី៨ ខែតុលា ឆ្នាំ២០១៥នេះ អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានបញ្ចេញប្រតិកម្មខ្លាំងៗ ដោយអះអាងថា ក្រោយពីបានឮការផ្តល់កិច្ចសម្ភាសន៍ របស់អ្នកតំណាងរាស្ត្រគណបក្សសង្គ្រោះជាតិមណ្ឌលសៀមរាប ឯកឧត្តម អ៊ុំ សំអាន ជាមួយវិទ្យុអាស៊ីសេរីកាលពីយប់ថ្ងៃទី៧ ខែតុលា ឆ្នាំ២០១៥ ដែលបាន និងកំពុងបន្តចិញ្ចឹមនូវឧបាយកលទុចរិត បំពុលបរិយាកាស អំពីបញ្ហាអធិបតេយ្យជាតិ និងបូរណភាពទឹកដី ក្រោយពីរាជរដ្ឋាភិបាលបានបញ្ចប់នូវការផ្ទៀងផ្ទាត់ផែនទីផ្លូវការ និងស្របច្បាប់របស់ខ្លួន ជាមួយនឹងផែនទីដែលបានខ្ចីពីអង្គការសហប្រជាជាតិ និងពីសាធារណរដ្ឋបារាំងរួចមកហើយនោះ។
អ្នកនាំពាក្យអង្គភាពព័ត៌មាន និងប្រតិកម្មរហ័ស ក៏បានបញ្ជាក់ជាឧឡារិកជូនសាធារណមតិជាតិ និងអន្តរជាតិ ឲ្យបានជ្រាបច្បាស់សារជាថ្មីម្តងទៀតថា ៖ ចាប់តាំងពីក្រោយថ្ងៃរំដោះ ៧ មករា ឆ្នាំ១៩៧៩ រហូតមកដល់បច្ចុប្បន្ននេះ រដ្ឋាភិបាល នៃអតីតសាធារណរដ្ឋប្រជាមានិតកម្ពុជា រដ្ឋាភិបាលនៃអតីតរដ្ឋកម្ពុជា ក៏ដូចជារាជរដ្ឋាភិបាល នៃព្រះរាជាណាចក្រកម្ពុជាទី២ បាននិងកំពុងបន្តគោរព និងអនុវត្តយ៉ាងខ្ជាប់ខ្ជួនឥតងាករេ និងម៉ឺងម៉ាត់ តាមគោលការណ៍ខ្សែព្រំដែនមិនកែប្រែ ជាពិសេស ការយកផែនទីបោន ខ្នាត ១/១០០ ០០០ បោះពុម្ពដោយក្រុមភូមិសាស្ត្រឥណ្ឌូចិន ដែលធ្វើនៅចន្លោះឆ្នាំ១៩៣៣ ១៩៥៣ ហើយដែលសម្តេចព្រះនរោត្តម សីហនុ ព្រះប្រមុខរដ្ឋ នៃព្រះរាជាណាចក្រកម្ពុជា ធ្លាប់បានមានព្រះរាជបន្ទូលថា បានយកទៅតម្កល់ទុកនៅអង្គការសហប្រជាជាតិនៅឆ្នាំ១៩៦៤ ហើយដែលត្រូវបានទទួលស្គាល់ជាអន្តរជាតិនៅចន្លោះឆ្នាំ១៩៦៣ ១៩៦៩។
សេចក្តីបំភ្លឺបានបន្តថា រាល់ផែនទីដែលរាជរដ្ឋាភិបាលទទួលស្គាល់ជាផ្លូវការ និងមានតម្លៃគត្តិយុត្ត គឺជាផែនទីដែលមានចែងក្នុងមាត្រា២ នៃរដ្ឋធម្មនុញ្ញ ឆ្នាំ១៩៩៣ ពោល គឺរាជរដ្ឋាភិបាលស្នើទៅអង្គការសហប្រជាជាតិ នូវផែនទីដែលស្របតាមរដ្ឋធម្មនុញ្ញ ដែលបានតម្កល់ទុកនៅ អ.ស.ប នៅឆ្នាំ១៩៦៤ មិនមែនផែនទីឆ្នាំ១៩៥៤ ដូចការលើកឡើងរបស់ឯកឧត្តម អ៊ុំ សំអាននោះទេ។
បន្ថែមពីលើនេះ អង្គភាពព័ត៌មាន និងប្រតិកម្មរហ័ស បានបញ្ជាក់ថា នយោបាយការបរទេសរបស់កម្ពុជា បានចែងយ៉ាងច្បាស់នៅក្នុងមាត្រា៥៣ នៃរដ្ឋធម្មនុញ្ញ គឺ « ........ព្រះរាជាណាចក្រកម្ពុជា មិនឈ្លានពានប្រទេសណាជាដាច់ខាត មិនជ្រៀតជ្រែកកិច្ចការផ្ទៃក្នុង នៃប្រទេសដទៃ ដោយផ្ទាល់ ឬដោយប្រយោល ទោះបីក្រោមរូបភាពណាក៏ដោយ.......។ នៅក្នុងស្មារតីនេះ ក៏ដូចជាផ្អែកលើលិខិតផ្លូវការរបស់ឯកឧត្តម បាន គីមូន អគ្គលេខាធិការអង្គការសហប្រជាជាតិ ចុះថ្ងៃទី៥ ខែសីហា ឆ្នាំ២០១៥ ដែលបានឆ្លើយតបចំពោះសំណើរបស់សម្តេចតេជោ ហ៊ុន សែន នាយករដ្ឋមន្ត្រី ចុះថ្ងៃទី៦ ខែកក្កដា ឆ្នាំ២០១៥ មានការបញ្ជាក់យ៉ាងច្បាស់ថា « ......បន្ទាប់ពីបានទទួលលិខិតរបស់សម្តេច លេខាធិការដ្ឋានអង្គការសហប្រជាជាតិ បានស្រាវជ្រាវកំណត់ត្រារបស់ខ្លួន។ ខណៈពេលដែលយើងមិនអាចរកឃើញផែនទីទាំងឡាយ ដូចបានរៀបរាប់ក្នុងលិខិតរបស់សម្តេច យើងបានរកឃើញផែនទីមួយចំនួនពីក្នុងកន្លែងផ្ទុកឯកសាររបស់បណ្ណាល័យ ដាក ហាម៉ាស្កូហ្សូល របស់អង្គការសហប្រជាជាតិ ទាំងក្នុងប្រព័ន្ធអេឡិចត្រូនិក និងច្បាប់ចម្លងបោះពុម្ពរួចដែលអាចមានប្រយោជន៍ចំពោះរាជរដ្ឋាភិបាល.....។ ដូច្នេះ ផែនទីចំនួន១៨ផ្ទាំង ខ្នាត ១/១០០ ០០០ ដែលបារាំងបានបោះពុម្ព ដោយប្រើប្រព័ន្ធ UTM ហើយដែលអង្គការសហប្រជាជាតិបានប្រគល់ជូន គឺជាផែនទីដែលរាជរដ្ឋាភិបាលបានទទួលយក និងបានធ្វើការផ្ទៀងផ្ទាត់ជាមួយនឹងផែនទីដែលគណៈកម្មាធិការកិច្ចការព្រំដែនកម្ពុជា បានប្រើប្រាស់រហូតមកដល់ពេលនេះ ហើយម៉្យាងវិញទៀតរាជរដ្ឋាភិបាល ក៏គ្មានសិទ្ធិ និងកាតព្វកិច្ចណាមួយឡើយ ក្នុងការចាត់ចែង ឬជ្រៀតជ្រែកចូលក្នុងកិច្ចការផ្ទៃក្នុងរបស់អង្គការសហប្រជាជាតិ ដូចការលើកឡើងបំពុលដោយឯកឧត្តម អ៊ុំ សំអាន នោះទេ។
សេចក្តីបំភ្លឺដដែលនេះ បានហៅ ទង្វើ និងព័ត៌មានដែលបានផ្សព្វផ្សាយដោយឯកឧត្តម អ៊ុំ សំអាន ទាំងក្នុងពេលកន្លងមក ក៏ដូចជាក្នុងពេលបច្ចុប្បន្ននេះ គឺបង្កប់ដោយឧបាយកលទុចរិត ក្នុងការបំផុសគំនិតជាតិនិយមជ្រុល បំបែកបំបាក់ការឯកភាពជាតិ បង្កឲ្យមានការភ័ន្តច្រឡំនៅក្នុងសាធារមតិជាតិ និងអន្តរជាតិ អំពីបញ្ហាអធិបតេយ្យជាតិ និងបូរណភាពទឹកដីកម្ពុជា។ ធ្ងន់ធ្ងរជាងនេះទៅទៀត ដើម្បីកេងចំណេញនយោបាយរបស់ក្រុម និងបក្សរបស់ខ្លួន អ្នកតំណាងរាស្ត្ររបស់គណបក្សសង្គ្រោះជាតិរូបនេះ ក៏មិនញញើតក្នុងការបន្តជាន់ឈ្លីលើរដ្ឋធម្មនុញ្ញ និងច្បាប់ ដែលមានជាធរមានទេ ជាពិសេស បន្តប្រមាថមាក់ងាយលើស្ថាប័នកំពូលរបស់ជាតិ ដែលក្នុងនោះ រួមមាន រដ្ឋសភា ព្រឹទ្ធសភា រាជរដ្ឋាភិបាល និងព្រះមហាក្សត្រ។
ចំពោះការបន្តឥតឈប់ឈរនូវទង្វើដ៏គឃ្លើនរបស់ឯកឧត្តម អ៊ុំ សំអាន ក្នុងការញុះញង់បង្កនូវអស្ថិរភាពសង្គម អសន្តិសុខ និងបំបែកបំបាក់ការឯកភាពជាតិ តាមរយៈការបំពានច្បាប់យ៉ាងកំរោល និងជាក់ស្តែងនេះ រាជរដ្ឋាភិបាលមានកាតព្វកិច្ចពិចារណាយ៉ាងម៉ឺងម៉ាត់នូវវិធានការផ្លូវច្បាប់ ដើម្បីការពាររដ្ឋធម្មនុញ្ញ ក៏ដូចជាសេចក្តីសុខក្សេមក្សាន្តរបស់ប្រជាជាតិ និងប្រជាជនកម្ពុជាទាំងមូល៕
No comments:
Post a Comment