តុលាការខ្មែរក្រហម បានចាប់ផ្តើមសវនាការវគ្គទី២ ក្នុងសំណុំរឿង ០០២ ដោយផ្តោតទៅលើការដ្ឋានការងារ

លោក នេត្រ ភក្ត្រា មន្ត្រី​នាំពាក្យ​នៃអង្គ​ជំនុំ​ជម្រះ​វិសាមញ្ញក្នុង​តុលាការ​កម្ពុជា បាន​មានប្រសាសន៍​ឲ្យដឹង​ថា អង្គ​ជំនុំជម្រះ​សាលា​ដំបូង​នៃអង្គជំនុំ​ជម្រះ​វិសាមញ្ញ​ក្នុងតុលាការ​កម្ពុជា បាន​ចាប់​ផ្តើម​សវនាការ​វគ្គទី២ហើយ នៅថ្ងៃទី ១៩ ខែឧសភា ឆ្នាំ២០១៥ ដែល​ផ្តោត​ទៅលើការដ្ឋាន​ការងារ​ហើយ ។

លោក នេត្រ ភក្ត្រា បាន​បន្តឲ្យ​ដឹងថា អង្គ​ជំនុំ​ជម្រះសាលា​ដំបូង​នឹង​ធ្វើ​សវនាការ​លើ ការដ្ឋានការងារ​ចំនួន​បី តាម​លំដាប់​លំដោយ​ដូចតទៅ៖ ទំនប់ ១ មករា, ការដ្ឋាន​ព្រលាន​​យន្តហោះខេត្តកំពង់​ឆ្នាំង និងទំនប់​ត្រពាំង​ថ្ម។ អង្គ​ជំនុំ​ជម្រះនឹង​រៀបចំ​ស្តាប់ការផ្តល់​សក្ខីកម្ម​ពី​ដើម​បណ្តឹងរដ្ឋប្បវេ​ណី និងសាក្សីចំនួន ១០ រូប សម្រាប់​អង្គ​ហេតុទាក់​ទងនឹង​ការដ្ឋាន​ការងារ​ទំនប់ ១ មករា នៅក្នុងខេត្ត​កំពង់​ធំ។ សាក្សីទី១ ដែល​ត្រូវ​បាន​កោះ ហៅ មកផ្តល់សាក្សីកម្មនៅចំពោះមុខអង្គ​ជំនុំ​ជម្រះសាលា​ដំបូង គឺលោក ឱ ហូ អតីតកម្មា​ភិបាល​ខ្មែរ​ក្រហមដែល​បាន​ធ្វើការ​នៅនៅតំបន់​នោះ។

គួរបញ្ជាក់​ថា សវនាការ​លើអង្គហេតុ​ថ្មី​ក្នុង​វគ្គ​ទី២​នៃ​សំណុំរឿង ០០២ វគ្គ០២ នេះធ្វើឡើងបន្ទាប់​ពីអង្គ​ជំនុំ​ជម្រះ​សាលា​ដំបូងបាន បញ្ចប់​សវនាការវគ្គទី១ លើអង្គហេតុ​សហករណ៍​ត្រាំ​កក់ និងមន្ទីរសន្តិសុខ​ក្រាំង​តាចាន់​។ ចាប់​តាំង​ពីបើក​សវនាការ ​ស្តាប់​សក្ខីកម្ម​នៅថ្ងៃទី៨​ ខែមករា ឆ្នាំ ២០១៥ រហូតមក​ដល់ថ្ងៃទី១៨ ខែឧសភា អង្គជំនុំជម្រះសាលាដំបូង  បានបើកសវនាការរយៈពេល ៥៩០ ថ្ងៃ និងបានស្តាប់បការផ្តល់បសក្ខីកម្មរបស់​សាក្សី អ្នក​ជំនាញ និងដើម បណ្តឹង​រដ្ឋប្បវេណី​ចំនួន ៣៧ រូប ក្នុង​នោះ​សាក្សី ១៨ រូប ដើម​បណ្តឹង​រដ្ឋប្បវេណី​ចំនួន ១៨ រូប និងអ្នកជំនាញ ១ រូប៕

អត្ថបទ៖ ច័ន្ទ ទេវី