មុនមួយថ្ងៃនៃពិធីបើកកិច្ចប្រជុំកំពូលលើកទី៨ ស្តីពីកិច្ចសហប្រតិបត្តិការអភិវឌ្ឍន៍តំបន់ ត្រីកោណ កម្ពុជា-ឡាវ-វៀតណាម (CLV) នៅរសៀលថ្ងៃទី២៤ វិច្ឆិកា សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញជួប ពិភាក្សាការងារទ្វេភាគីជាមួយ ឯកឧត្តម ថងស៊ីង ថាំម៉ាវង្ស នាយករដ្ឋមន្រ្តីនៃសាធារណរដ្ឋ ប្រជាធិបតេយ្យប្រជាមានិតឡាវ។ នៅក្នុងជំនួបនោះ ឯកឧត្តម ថងស៊ីង ថាំម៉ាវង្ស មានប្រសាសន៍ថ្លែង អំណរគុណយ៉ាងជ្រាលជ្រៅបំផុត ជូនចំពោះសម្តេចតេជោ នាយករដ្ឋមន្រ្តី និងគណៈប្រតិភូ រាជរដ្ឋាភិបាលកម្ពុជាទាំងអស់ ដែលបានអញ្ជើញមកចូលរួមកិច្ចប្រជុំកំពូល កម្ពុជា ឡាវ វៀតណាម លើក ទី៨ នៅទីក្រុងវៀងច័ន្ទ ប្រទេសឡាវ ដែលបង្ហាញឲ្យឃើញ កាន់តែច្បាស់ពីការយកចិត្តទុកដាក់ របស់សម្តេច និងរាជរដ្ឋាភិបាលកម្ពុជា ក្នុងការអភិវឌ្ឍ តំបន់ត្រីកោណនៃប្រទេសទាំងបី កម្ពុជា ឡាវ វៀតណាម ឲ្យកាន់តែមានការរីកចំរើន ទ្វេឡើងថែមទៀត។ ឯកឧត្តមនាយករដ្ឋមន្រ្តីមានប្រសាសន៍បន្តថា កិច្ចប្រ ជុំកំពូលរបស់ យើងនៅពេលនេះ បានប្រារព្ធធ្វើឡើង ស្របពេលនឹងការប្រារព្ធមហាសន្និបាតរបស់គណបក្ស ប្រជាជនឡាវ ដែលនឹងប្រារព្ធធ្វើឡើងនៅពេលដ៏ខ្លីខាងមុខ។ ក្នុងជំនួបពិភាក្សាគ្នានោះដែរ សម្តេចតេជោនាយករដ្ឋមន្រ្តី បានស្នើដល់ភាគីឡាវឲ្យបន្តផ្តល់ អាហារូបករណ៍ដល់និស្សិតនៃ
ប្រទេសកម្ពុជា និងប្រទេសឡាវ មានការកើនឡើងពីចំនួន ១២០នាក់ក្នុងពេលបច្ចុប្បន្នឲ្យកើន ដល់១៥០នាក់
ក្នុងពេលខាងមុខ សំដៅធ្វើយ៉ាងណា ពង្រឹងការតភ្ជាប់រវាងប្រជាជននិង ប្រជាជននៃប្រទេសទាំងពីរ។ ឯកឧត្តមនាយករដ្ឋមន្រ្តី ឡាវបានឯកភាពទៅនឹងសំណើរ របស់សម្តេចតេជោនាយករដ្ឋមន្រ្តី ដោយបានស្នើឲ្យក្រសួងការបរទេសនៃប្រទេសទាំងពីរ រៀបចំឯកសារ ក្នុងការបង្កើនចំនួនអាហារូបករណ៍ដល់និស្សិត នៃប្រទេសទាំងពីរ។ បើទោះបីជាបញ្ហាព្រំដែននៃប្រទេសទាំងពីរ នៅមិនទាន់បានដោះស្រាយចប់សព្វគ្រប់ក៏ពិត មែន តែសម្តេចតេជោនាយករដ្ឋមន្រ្តីបានស្នើ ដល់ភាគីឡាវ ជំរុញឲ្យមានការកសាង ស្ពានឆ្លងកាត់ទន្លេរពៅ ឆ្លងកាត់ព្រំដែននៃប្រទេសទាំងពីរឲ្យបានឆាប់តាមតែអាចធ្វើទៅបាន ដែលគម្រោងនោះត្រូវបានការឯកភាព យល់ព្រមពីភាគីឡាវ ដោយប្រគល់កិច្ចការនេះជូន រដ្ឋមន្រ្តីក្រសួងសាធារណការ នៃប្រទេសទាំងពីរធ្វើការសិក្សាឲ្យបានហ្មត់ចត់ មុននឹងធ្វើការ សាងសង់។ ក្នុងជំនួបពិភាក្សាគ្នានោះដែរ ប្រមុខដឹកនាំនៃប្រទេសទាំងពីរកម្ពុជាឡាវ ក៏បានពិភាក្សាគ្នាផងដែរ ទាក់ទិនទៅនឹងទំនាក់ទំនងទ្វេភាគីពហុភាគី និងបញ្ហាតំបន់ ដែលមានការយកចិត្តទុកដាក់ដូចគ្នា។ ជាមួយគ្នានេះប្រមុខដឹកនាំទាំងពីរបានឯកភាពរួមគ្នា ក្នុងការរៀបចំប្រារព្ធខួប៦០ឆ្នាំ នៃទំនាក់ទំនងការទូតរបស់ប្រទេសទាំងពីរ ឲ្យបានអធឹកអធម នៅពេលខាងមុខ។
បន្ទាប់មករសៀលថ្ងៃដដែលនោះដែរ សម្តេចអគ្គមហាសេនាបតីតេជោ ហ៊ុន សែន
បានទទួលជួបពិភាក្សាការងារទ្វេភាគីជាមួយ ឯកឧត្តម ង្វៀន តាន់យ៉ុង នាយករដ្ឋមន្រ្តី នៃ សាធារណរដ្ឋសង្គមនិយមវៀតណាម។
ក្នុងជំនួបពិភាក្សាគ្នានោះប្រមុខថ្នាក់ដឹកនាំនៃប្រទេសទាំងពីរកម្ពុជា វៀតណាម បានឯកភាព គ្នា ក្នុងការបញ្ចូលខ្លឹមសារសំខាន់ៗ ដែលទាក់ទិនទៅនឹងការជំរុញការតភ្ជាប់នៅក្នុងតំបន់ ត្រីកោណអភិវឌ្ឍន៍ កម្ពុជា ឡាវ វៀតណាម។ នៅក្នុងសេចក្តីថ្លែងការណ៍នៃកិច្ចប្រជុំកំពូល កម្ពុជា ឡាវ វៀតណាម លើកទី៨ ដែល និងប្រកាសដាក់ចេញនៅថ្ងៃទី២៥វិច្ឆិកាឆ្នាំ២០១៤។ ក្នុងជំនួបពិភាក្សាគ្នានោះដែរប្រមុខរដ្ឋាភិបាលនៃប្រទេសទាំងពីរ ក៏បានពិភាក្សាគ្នាយ៉ាងយក ចិត្តទុកដាក់បំផុត ក្នុងការខិតខំរកគ្រប់មធ្យោបាយដើម្បីធ្វើយ៉ាង ជំរុញពាណិជ្ជកម្មនៃប្រទេស ទាំងពីរឲ្យឈានដល់ ៥ពាន់លានដុល្លាអាមេរិក
នៅឆ្នាំ២០១៥។ សម្តេចតេជោនាយករដ្ឋមន្រ្តី មានប្រសាសន៍ថា ទំហំពាណិជ្ជកម្មនៃប្រទេសទាំងពីរនៅពេលបច្ចុប្បន្ននេះ ហាក់នៅមិនទាន់ ពេញចិត្តនៅឡើយទេ តាមរយៈនេះសម្តេចស្នើដល់ភាគីវៀតណាម ឲ្យបង្កើតឡើងនូវច្រក ចេញចូលតែមួយ ដូចអ្វីដែលកម្ពុជាបានធ្វើ សំដៅជំរុញកំណើនពាណិជ្ជកម្មនៃប្រទេសទាំង ក៏ដូចជាការជំរុញដល់វិស័យទេសចរណ៍ និងការវិនិយោគនៃប្រទេសទាំងពីរ ឲ្យកាន់តែមាន សន្ទុះកើនឡើងបន្ថែមទៀត។
ក្នុងជំនួបពិភាក្សាគ្នានោះដែរ ប្រមុខរដ្ឋាភិបាលនៃប្រទេសទាំងពីរ
ក៏បានពិភាក្សាយ៉ាង យកចិត្តទុកដាក់ និងជំរុញអ្នកវិនិយោគវៀតណាម មកកាន់កម្ពុជាឲ្យកាន់តែច្រើនឡើង ថែមទៀត។ នៅក្នុងជំនួបពិភាក្សាគ្នានោះដែរ ឯកឧត្តមនាយករដ្ឋមន្រ្តីវៀតណាមមាន ប្រសាសន៍ជំរាបជូន សម្តេចតេជោនាយករដ្ឋមន្រ្តីផងដែរថា នៅថ្ងៃទី២២ដល់ ថ្ងៃទី២៤ ខែធ្នូ ឆ្នាំ២០១៤ខាងមុខ ប្រមុខរដ្ឋវៀតណាម នឹងអញ្ជើញទៅបំពេញទស្សនកិច្ចជាលក្ខណៈ ផ្លូវរដ្ឋ នៅកម្ពុជា ហើយជាមួយគ្នានេះឯកឧត្តមប្រមុខរដ្ឋវៀតណាម នឹងសុំយាងព្រះករុណាព្រះ មហាក្សត្រនៃព្រះរាជាណាចក្រកម្ពុជា និងសម្តេចសម្តេចព្រះវររាជមាតាជាតិខ្មែរ ស្តេចយាង ទៅបំពេញទស្សនកិច្ចជាផ្លូវរដ្ឋ នៅសាធារណរដ្ឋសង្គមនិយមវៀតណាម នៅដើមឆ្នាំ២០១៥។ ក្នុងជំនួបពិភាក្សានោះដែរ សម្តេចតេជោក៏បានស្នើដល់ភាគីវៀតណាម ជំរុញការកសាង កំណាត់ផ្លូវជាតិលេខ៧៨ដែលនៅសេសសល់ ឲ្យបានហើយរួចរាល់ ដើម្បីរួមចំណែកដល់ ការតភ្ជាប់នៃប្រទេសទាំងពីរ ក៏ដូចជាការតភ្ជាប់សំរាប់ប្រទេសក្នុងតំបន់ ត្រីកោណអភិវឌ្ឍន៍ ទាំងមូលផងដែរ។ ក្នុងជំនួបពិភាក្សាគ្នានោះដែរ ប្រមុខដឹកនាំនៃប្រទេសទាំងពីរ កម្ពុជា វៀតណាម ក៏បានពិភាក្សាគ្នាផងដែរទាក់ទិនទៅនឹងទំនាក់ទំនងទ្វេភាគីពហុភាគី និងបញ្ហាតំបន់ ដែលមានការយកចិត្តទុកដាក់ដូចគ្នា។
បន្ទាប់មកនៅរាត្រីថ្ងៃដដែលនោះដែរ សម្តេចអគ្គមហាសេនាបតីតេជោ ហ៊ុន សែន នាយក រដ្ឋមន្រ្តីនៃព្រះរាជាណាចក្រកម្ពុជា ឯកឧត្តម ង្វៀន តាន់យ៉ុង នាយករដ្ឋមន្រ្តីនៃសាធារណរដ្ឋ សង្គមនិយមវៀតណាម
និងគណៈប្រតិភូនៃប្រទេស CLV ទាំងអស់អញ្ជើញចូលរួមក្នុង ពិធីលៀងសាយភោជន៍ជាមហាកិត្តិយសដ៏ខ្ពង់ខ្ពស់បំផុត ដែលរៀបចំដោយឯកឧត្តម ថងស៊ីង ថាំម៉ាវង្ស នាយករដ្ឋមន្រ្តីនៃសាធារណរដ្ឋប្រជា ធិបតេយ្យប្រជា មានិតឡាវ និងជាប្រធាន កិច្ចប្រជុំកំពូលលើកទី៨ ស្តីពីកិច្ចសហប្រតិបត្តិការអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម។
ថ្លែងនៅក្នុងពិធីលាងសាយភោជន៍ជាមហាកិត្តិយសនោះ ឯកឧត្តម ថងស៊ីង ថាំម៉ាវង្ស មានប្រសាសន៍ថ្លែងអំណរគុណយ៉ាងជ្រាលជ្រៅបំផុត ជូនចំពោះសម្តេច ឯកឧត្តមប្រមុខរដ្ឋា ភិបាលនៃប្រទេសកម្ពុជា វៀតណាម និងគណៈប្រតិភូជាន់ខ្ពស់ទាំងអស់ ដែលបានចំណាយ ពេលវេលាដ៏មានតំលៃបំផុត អញ្ជើញមកចូលរួមកិច្ចប្រជុំកំពូលលើកទី៨ ស្តីពីកិច្ចសហប្រតិ បត្តិការអភិវឌ្ឍន៍តំបន់ត្រីកោណ កម្ពុជា-ឡាវ-វៀតណាម (CLV) នៅទីក្រុង វៀងច័ន្ទ ដ៏ស្រស់ប្រិមប្រិយនេះ។ ឯកឧត្តមមានប្រសាសន៍បន្តថា វត្តមានរបស់ថ្នាក់ដឹកនាំទាំងអស់ នៅពេលនេះ គឺបានបង្ហាញពីការយកចិត្តទុកដាក់ និងទទួលខុសត្រូវរួមគ្នា ក្នុងការខិតខំ ប្រឹងប្រែងរិៈរកដំណោះស្រាយ និងបញ្ហាប្រឈមនានា ដែលកើតមានឡើងក្នុងតំបន់ត្រីកោណ នៃប្រទេស ទាំងបីកម្ពុជា ឡាវ វៀតណាម សំដៅធ្វើយ៉ាងណា អភិវឌ្ឍន៍តំបន់ត្រីកោណ ដ៏ក្រខ្សត់នេះ ឲ្យក្លាយទៅជាតំបន់មួយដែលមាន ការអភិវឌ្ឍប្រកបដោយនិរន្តរភាព និងការ រីកចំរើនលើគ្រប់វិស័យ។ ឯកឧត្តមនាយករដ្ឋមន្រ្តី និងជាប្រធានកិច្ចប្រជុំកំពូលលើកទី៨ មាន ប្រសាសន៍បន្តថា ឯកឧត្តមមានការរីករាយ និងសូមថ្លែងអំណរគុណយ៉ាងជ្រាល ជ្រៅបំផុត ជូនចំពោះ សម្តេចតេជោនាយករដ្ឋមន្រ្តី ដែលបានផ្តួចផ្តើមគំនិតបង្កើតនូវតំបន់ ត្រីកោណ CLV នេះឡើង កាលពីឆ្នាំ ១៩៩៩ នៅទីក្រុងវៀងច័ន្ទ ប្រទេសឡាវ។ ឯកឧត្តមនាយករដ្ឋមន្រ្តី មានប្រសាសន៍បញ្ជាក់បន្ថែមថា ចាប់តាំងពីកិច្ចប្រជុំកំពូលលើកទី១ មកដល់កិច្ចប្រជុំកំពូល លើកទី៨នេះ ប្រមុខរដ្ឋាភិបាលនៃប្រទេសទាំងបី កម្ពុជា-ឡាវ-វៀតណាម បានឯកភាពបង្កើន ល្បឿននៃការអនុវត្តកិច្ចព្រមព្រៀងទ្វេភាគី និងពហុភាគី ដើម្បីបង្កើតលក្ខខណ្ឌល្អសម្រាប់ ការបម្លាស់ទីមនុស្សនិងទំនិញ ជាពិសេសកិច្ចព្រមព្រៀងស្តីពីការ ដឹកជញ្ជូនឆ្លងដែននៅក្នុង ក្របខណ្ឌនៃមហាអនុតំបន់មេគង្គ (GMS) នៅក្រោមកិច្ច
ព្រមព្រៀងស្តីពីការពិនិត្យគយ នៅតាមបញ្ជារត្រួតពិនិត្យតែមួយ ការត្រួតពិនិត្យរួមគ្នា តែមួយកន្លែង នៅតាមព្រំដែនអន្តរជាតិ និងក្រោមកិច្ចព្រមព្រៀងពាណិជ្ជកម្ម កិច្ចព្រមព្រៀងវិនិយោគ និងកិច្ចព្រមព្រៀងដឹកជញ្ជូន ទ្វេភាគី។ ឯកឧត្តមប្រធានក៏បាន ជូនពរដល់ការស្នាក់នៅរបស់ សម្តេច ឯកឧត្តមនាយក រដ្ឋមន្រ្តី និងប្រតិភូជាន់ខ្ពស់ទាំងអស់ សូមទទួលបាននូវសុខភាពល្អ
និងជោគជ័យថែមទៀត ដើម្បីជានិម្មិតរូបនៃភាពរីកចំរើនរបស់ប្រទេសក្នុងតំបន់ត្រីកោណ និងសំរាប់តំបន់ទាំងមូលផងដែរ។
.JPG)
No comments:
Post a Comment