កម្ពុជា និងហ្វីលីពីន បានសំដែងនូវការពេញ ចិត្ត ចំពោះ ទំនាក់ទំនង កិច្ច សហ ប្រតិ បត្តិការ ដ៏ល្អរវាងគ្នានិងគ្នា ភាគីទាំងពីរ ក៏បាន ឯកភាព គ្នាក្នុង ការជំរុញបង្កើនទំនាក់ទំនងឲ្យបានកាន់តែរីកចំរើនបន្ថែមទៀតទាំងខាងវិស័យកសិកម្ម ពាណិជ្ជកម្ម វិនិយោគ និងទេសចរណ៏បន្ថែមពីលើវិស័យការទូត។
នៅក្នុងជំនួបជំរាបលារ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីនៅល្ងាចថ្ងៃទី ១៥ ខែ កញ្ញា ឆ្នាំ ២០១៤ នាវិមានមិត្តភាព នៃទីស្តីការគណៈរដ្ឋមន្រ្តី ឯកឧត្តមណូអេ អេវង្ស (NOE A. Wong) ឯកអគ្គរដ្ឋទូតវិសាមញ្ញនិងពេញសមត្ថភាព នៃសាធារណរដ្ឋហ្វីលីពីន ប្រចាំព្រះរាជាណាចក្រកម្ពុជានិងឯ.ឧបណ្ឌិតសភាចារ្យសុខ អានសុទ្ធតែបានបង្ហាញពីការពេញចិត្តជាមួយនិងលទ្ធផលនៃកិច្ចសហប្រតិបត្តិការដ៏ល្អរវាងប្រទេសទាំងពីនៅក្នុងអាណត្តិការទូតរបស់ឯ,ឧ ឯកអគ្គរដ្ឋទូតហ្វីលីពីនត្រូវបានបញ្ចប់ទៅនេះ។
នៅក្នុងកិច្ចពិភាក្សាការងារនេះ ភាគីទាំងពីរបានលើកឡើងអំពីទស្សនៈរៀងៗខ្លួន គឺចង់ធ្វើធ្វើយ៉ាងណា ជំរុញ បង្កើនទំនាក់ទំនងលើវិស័យផ្សេងៗជាច្រើនទៀតបន្ថែមពីលើវិស័យការទូតឲ្យបានកាន់តែប្រសើរឡើង ក្នុងនោះមាន វិស័យកសិកម្ម ពាណិជ្ជកម្ម វិនិយោគ ទេសចរណ៏ និងវិស័យហោះហើរ។
ឯ.ឧណូអេ អេវង្ស (NOE A. Wong) មានការពេញចិត្តយ៉ាងខ្លាំងនៅក្នុងការបំពេញបេសកកម្មការទូតប្រចាំនៅកម្ពុជា អំឡុងពេល៦ឆ្នាំកន្លងមកនេះ ដោយបានធ្វើកិច្ចសហប្រតិបត្តិការយ៉ាងល្អជាមួយកម្ពុជាជាពិសេស ឯ.ឧ បានខិតខំអំពាវនាវឲ្យវិនិយោគទុនហ្វីលីពីនមកកាន់កម្ពុជាបានកាន់តែច្រើនបន្ថែមទៀត ដើម្បីធ្វើយ៉ាងណាជួយធ្វើឲ្យទំហំពាណិជ្ជកម្ម និងការវិនិយោគរវាងប្រទេសទាំងពីរទទួលបានការរីកចំរើន។ ឯកអគ្គរដ្ឋទូតក៏ចង់ឲ្យមានការបង្កើនទំនិញសម្រាប់ការនាំចេញ ពិសេសអង្ករពីកម្ពុជាទៅហ្វីលីពីន ។ រីឯវិស័យទេសចរណ៏ ឯ.ឧ ឯកអគ្គរដ្ឋទូតហ្វីលីពីនមានប្រសាសន៏ថា៖កំណើនអ្នកទេសចរណ៏ហ្វីលីពីនមកកាន់កម្ពុជាមានការកើនឡើងជាលំដាប់ គឺបន្ទាប់ពីភ្ជាប់ការហោះហើរត្រង់ពីក្រុមម៉ានីលមកសៀមរាបចាប់តាំងពីឆ្នាំ២០១២មក គឺមានការហោះហើរ៤ដងក្នុង១សប្តាហ៏ ហើយនៅក្នុងពេលខាងមុខនេះ នឹងមានភ្ជាប់ការហោះហើរត្រង់ពីទីក្រុងម៉ានីល មកកាន់រាជធានីភ្នំពេញនៃព្រះរាជាពណាចក្រកម្ពុជាផងដែរ ដើម្បីជួយជំរុញការរីកចំរើនខាងវិស័យទេសចរណ៏រវាងប្រទេសទាំងពីរ ។
សូមបញ្ជាក់ថា៖ នៅឆ្នាំ២០១៣កន្លងមកកំណើនភ្ញៀវទេសចរណ៏ពីហ្វីលីពីនមកកាន់កម្ពុជាមានការកើនឡើងរហូតជិតដល់១១៩ពាន់នាក់ ហើយបើគិតត្រឹម១ត្រីមាសដើមឆ្នាំ២០១៤នេះ ភ្ញៀវទេសចរណ៏ហ្វីលីពីនមកកម្ពុជាបានកើនឡើងជា៥ម៉ឺន៦ពាន់នាក់។ រីឯជញ្ជីងពាណិជ្ជកម្មទ្វេភាគីរវាងកម្ពុជានិងហ្វីលីពីន នៅក្នុងឆ្នាំ២០១៣កន្លងមកនេះ មានទំហំទឹកប្រាក់រហូតទៅដល់ជាង២១លានដុល្លារ ក្នុងនោះទំនិញនាំចេញពីកម្ពុជាទៅហ្វីលីពីនមានទឹកប្រាក់ប្រមាណជា១៤លានដុល្លារ និងផលិតផលទំនិញនាំពីហ្វីលីពីនចូលមកកម្ពុជាវិញមានជាង៧លានដុល្លារ។ ក្នុងរយៈពេល៣ខែដំបូងសម្រាប់ឆ្នាំ២០១៤នេះ ទំហំពាណិជ្ជកម្មទ្វេភាគីមានប្រមាណជាង៥លានដុល្លារ ក្នុងនោះ ទំនិញនាំពីកម្ពុជាទៅហ្វីលីពីនមានទឹកប្រាក់ជាង១លានដុល្លារ និងហ្វីលីពីននាំចូលមកកម្ពុជាមានទឹកប្រាក់ជាង៤លានដុល្លារ។
ឯ.ឧ ឧបនាយករដ្ឋមន្ត្រី សុខ អាន មានប្រសាសន៏ថា៖ ឯ.ឧ ចង់ឃើញឲ្យមានការវិនិយោគ និងពាណិជ្ជកម្មកាន់តែមានទំហំកើនឡើងបន្ថែមទៀតរវាងកម្ពុជា និងហ្វីលីពីន ហើយកម្ពុជាក៏ចង់នាំអង្ករចេញទៅហ្វីលីពីនឲ្យបានច្រើនប្រសើរជាងការនាំស្រូវពីព្រោះកម្ពុជាចង់ឲ្យមានការបង្កើតរោងម៉ាស៊ីនកិនស្រូវ ដើម្បីជួយបង្កើតការងារនៅក្នុងស្រុក ក៏ដូចជាទទួលបានផលិតផលបន្ថែមទៀតពីការកិនយកអង្ករនេះ។ ចំពោះសក្តានុពលរបស់កម្ពុជាផ្នែកវិស័យកសិកម្មឯ.ឧ ឧបនាយករដ្ឋមន្ត្រី សុខ អាន ចង់ឲ្យមានការវិនិយោគពីក្រុមហ៊ុនបរទេសមកលើរោងចក្រកិនស្រូវ ដើម្បី បង្កើនគុណភាពក្នុងការកែច្នៃអង្ករសម្រាប់ការនាំចេញទៅកាន់ទីផ្សារក្រៅប្រទេសក៏ដូចទៅកាន់ហ្វីលីពីនផងដែរ ដោយសារកម្ពុជាមានសក្តានុពលខ្ពស់លើវិស័យកសិកម្ម ក្នុងមួយឆ្នាំៗ គឺកម្ពុជាមានសល់ស្រូវប្រមាណ៤លានតោន។ ជារួម គឺកម្ពុជាចង់ឲ្យមានការផ្លាស់ប្តូរទំនិញរវាងគ្នានិងគ្នាក្នុងនោះ គឺកម្ពុជានាំអង្ករទៅហ្វីលីពីន ហើយហ្វីលីពីននាំទំនិញមកកម្ពុជាវិញដើម្បីជួយបង្កើនទំហំពាណិជ្ជកម្មឲ្យបានធំឡើងបន្ថែមទៀត ៕
No comments:
Post a Comment