សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃប្រះរាជាណាចក្រកម្ពុជាបានថ្លែងក្នុងពិធីបើកសន្និសីទប្រចាំតំបន់លើកទី៨ ស្តីពីការប្រឆាំងអំពើពុករលួយនៃគំនិតផ្តួចផ្តើមប្រឆាំងអំពើពុករលួយ ADB/OECD សម្រាប់តំបន់អាស៊ី ប៉ាស៊ីហ្វិក ដែលមានប្រតិភូមកពី ៣៨ ប្រទេស នាព្រឹកថ្ងៃទី០៣ ខែកញ្ញា ឆ្នាំ២០១៤ ថា ចំពោះ មុខនេះរាជរដ្ឋាភិបាលកម្ពុជានីតិកាលទី៥ នៃរដ្ឋសភានៅតែបន្តប្តេជ្ញាចិត្តក្នុងការប្រយុទ្ធប្រឆាំងអំពើពុក រលួយដូចដែលបាន លើក ឡើងយ៉ាងច្បាស់ក្នុងកម្មវិធីនយោបាយរបស់ខ្លួននោះ។
សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ថា នៅក្នុងការអនុវត្តយុទ្ធសាស្ត្រចតុកោណដំណាក់កាលទី៣នេះ រាជរដ្ឋាភិបាលបានបន្តពង្រឹង និងបង្កើនប្រសិទ្ធភាពនៃវិធានការ ស្នូលទាំង៣ នៃការងារប្រយុទ្ធប្រឆាំងអំពើពុករលួយ ក្នុងនោះរួមមាន ការពង្រឹងការអប់រំមិនឱ្យប្រព្រឹត្តអំពើពុករលួយ ការបង្ការទប់ស្កាត់ការប្រព្រឹត្តអំពើពុករលួយ និងការបង្ក្រាបបទល្មើស បញ្ជូនទៅតុលាការ។
សម្តេចតេជោនាយករដ្ឋមន្ត្រីបានមានប្រសាសន៍ឲ្យដឹងថា ដើម្បីសម្រេចបាននូវគោលបំណងដែលបានដាក់ចេញនេះ យើងបានកែទម្រង់ប្រកបដោយប្រសិទ្ធភាព និងមានផ្លែផ្កាដែលមានតាំងពីអាណត្តិមុនៗ ហើយត្រូវបន្តកែលម្អទៅមុខទៀត ដើម្បីអាចសម្រេចបាននូវលទ្ធផលកាន់តែល្អប្រសើរឡើង។
សម្តេចតេជោថ្លែងថា គោលដៅសំខាន់ក្នុងការសម្រេចចិត្តនៃការកែទម្រង់នេះ គឺធានាថា ក្រសួង ស្ថាប័ននីមួយៗធ្វើការងារ ដើម្បីសម្រេចបាននូវលទ្ធផលទៅតាមគោលនយោបាយ និងកម្មវិធីអភិវឌ្ឍន៍ដែលបានដាក់ចេញ ដើម្បីនាំមកវិញនូវកំណើនសេដ្ឋកិច្ច ជីវភាពរស់នៅល្អប្រសើរ ឱកាសស្មើៗគ្នា និងយុត្តិធម៌សង្គមសម្រាប់មនុស្សគ្រប់រូប ដែលយើងជឿជាក់ថា ការធ្វើបែបនេះ នឹងបង្កើតឡើងនូវបរិយាកាសកាន់តែអំណោយផលសម្រាប់ការប្រឆាំងអំពើពុករលួយ ប្រកបដោយប្រសិទ្ធភាពក្នុងក្រសួង ស្ថាប័ននីមួយៗ រួមទាំងការងារបង្ការទប់ស្កាត់ជាមុន ការពង្រឹងគណនេយ្យភាព និងពង្រឹងសមត្ថភាពស្ថាប័ន ការគាំទ្រ និងការចូលរួមពី សាធារណជន ការចូលរួមពីវិស័យឯកជន និងការពង្រឹងការអនុវត្តច្បាប់។ ”ក្រសួងស្ថាប័ននីមួយៗត្រូវតែធ្វើការកែទម្រង់ផ្ទៃក្នុងរបស់ខ្លួនដោយ «ឆ្លុះកញ្ចក់ ងូតទឹក ដុសក្អែល និងព្យាបាល» ហើយធ្វើការងារនេះឱ្យកាន់តែមានប្រសិទ្ធភាព តម្លាភាព និងគណនេយ្យ ភាពចំពោះរាជរដ្ឋាភិបាល ជាពិសេសចំពោះប្រជាពលរដ្ឋរបស់ខ្លួន”។
សម្ដេចតេជោនាយករដ្ឋមន្ត្រី ក៏បានថ្លែងសង្កត់ធ្ងន់ផងដែរ អំពីភាពចាំបាច់ដែលវិស័យសាធារណៈ និងវិស័យឯកជនត្រូវតែរួមដៃគ្នាក្នុងការប្រឆាំងអំពើពុករលួយ។ សម្តេចតេជោមានប្រសាសន៍ថា វិស័យសាធារណៈ និងវិស័យឯកជនចាំបាច់ ត្រូវតែធ្វើការរួមដៃគ្នាក្នុងការប្រឆាំងអំពើពុករលួយ ពីព្រោះកម្មវិធីគោលនយោបាយ ប្រយុទ្ធប្រឆាំងអំពើពុករលួយដែលដាក់ចេញដោយរាជរដ្ឋាភិបាលនឹងមិនដំណើរការ បានអស់សក្ដានុពលនោះទេ ប្រសិនបើវិស័យឯកជនមិនចូលរួម។ ហើយរឹតតែសំខាន់ជាងនេះទៀតប្រសិនបើវិស័យឯកជនមិនចូលរួម ក៏នឹងបង្ហាញថា វិស័យឯកជនមិនមានការទទួលខុសត្រូវចំពោះខ្លួនឯង និងចំពោះសង្គមជាតិក្នុងការអនុវត្តអាជីវកម្មរបស់ខ្លួន។ ចំណុចនេះសម្ដេចតេជោពន្យល់ហេតុផល ដែលវិស័យឯកជន និងវិស័យសាធារណៈ ត្រូវតែសហការគ្នា។ សម្ដេចតេជោលើកឡើងថា ក្នុងពេលធ្វើធុរកិច្ចក៏កុំភ្លេចថា វិស័យឯកជនជាអ្នកសូក, បើវិស័យឯកជនមិនសូកទេ តើអ្នកមន្ត្រីរាជការនោះបានលុយពីណា។ ដោយមានការពាក់ព័ន្ធគ្នាដូច្នេះ ទើបទាមទារឱ្យវិស័យឯកជនចូលរួមធ្វើសហប្រតិបត្តិការក្នុងនោះ គឺយកគោលការណ៍មិនសូក, ការសុំធ្វើការវិនិយោគដោយត្រឹមត្រូវ...។ ទោះជាយ៉ាងណា សម្ដេចតេជោបានមានប្រសាសន៍ផ្តល់ជាអនុសាសន៍ថា ក្នុងវិស័យឯកជនខ្លួនឯងក៏ត្រូវតែមានភាពច្បាស់លាស់... គឺត្រូវតែមានសុចរិតភាព ហើយមានតម្លាភាព។ មានពេលខ្លះមន្ត្រីរាជរដ្ឋាភិបាលគ្រាន់តែទទួលការស្ដីបន្ទោសតែប៉ុណ្ណោះ ក៏ប៉ុន្តែពួកគេមិនបានទទួលនូវសំណូកនោះទេ ផ្ទុយទៅវិញបុគ្គលិកក្រុមហ៊ុន តែងតែទៅប្រាប់ថៅកែក្រុមហ៊ុនថា គេត្រូវការលុយប៉ុណ្ណោះដើម្បីយកទៅសូកនៅកន្លែងនេះ, សូកនៅកន្លែងនោះ ដូច្នេះមន្ត្រីរាជរដ្ឋាភិបាលបានត្រឹមតែខូចឈ្មោះ ប៉ុន្តែអ្នកដែលទទួលសំណូកពិតប្រាកដ គឺបុគ្គលិករបស់ក្រុមហ៊ុនដែលទៅយកលុយមកសូកនោះ យកលុយដាក់ហោប៉ៅរបស់គាត់។
សម្ដេចតេជោនាយករដ្ឋមន្ត្រីថ្លែងដែរថា ដើម្បីប្រយុទ្ធប្រឆាំងអំពើពុករលួយបានបញ្ហាធំជាងគេ គឺសុំតែការពិតមិនឱ្យលើសមិនឱ្យខ្វះ, ហើយក្នុងនេះ សម្ដេចបានសុំអ្នកសារព័ត៌មាន, អង្គការក្រៅរដ្ឋាភិបាល និងសុំពីបណ្ដាបក្សមិននៅក្នុងរដ្ឋាភិបាល ឱ្យនិយាយអ្វីដែលជាការពិត, និយាយត្រង់កុំឱ្យលើសកុំឱ្យខ្វះ ដើម្បីឱ្យអង្គភាពប្រឆាំងអំពើពុករលួយ និងផ្នែកពាក់ព័ន្ធដទៃទៀតចាត់វិធានការបានត្រឹមត្រូវ។ សម្ដេចតេជោមានប្រសាសន៍បញ្ជាក់ថា វិស័យ ព័ត៌មាន មានតួនាទីសំខាន់ ប៉ុន្តែវិស័យព័ត៌មាន ក៏អាចធ្វើឱ្យមានភាពច្របូកច្របល់កើតឡើងដែរ នៅត្រង់ថា នៅពេលដែលរឿងពិតវាបានកើត បើសិនជាគេផ្សាយរឿងនេះពិតប្រាកដ វាជារឿងល្អណាស់ ដែលធ្វើឱ្យអង្គភាពប្រឆាំងអំពើពុករលួយ ឬក៏ផ្នែកពាក់ព័ន្ធចាត់វិធានការបានត្រឹមត្រូវ ប៉ុន្តែផ្ទុយទៅវិញ បើសិនជាមានចេតនាមួលបង្កាច់នូវព័ត៌មាននោះ មិនអាចធ្វើឱ្យមានការស៊ើបអង្កេតមួយបានត្រឹមត្រូវទេ។
សម្ដេចតេជោនាយករដ្ឋមន្ត្រី ក៏បានមានប្រសាសន៍ស្នើផងដែរ ទៅដល់ស្ថាប័នបរទេសដែលតែងតែចាត់ចំណាត់ថ្នាក់ប្រទេសនានានោះ កុំឱ្យវាយតម្លៃប្រទេសនីមួយៗដោយយកនយោបាយធ្វើជាគោល។ សម្ដេចតេជោមានប្រសាសន៍ថា ការដាក់ពិន្ទុចំណាត់ថ្នាក់ប្រទេសនោះដាក់ខ្លះត្រឹមត្រូវ តែដាក់ខ្លះវាមានចំណុចនយោបាយរបស់វាទៅជាមួយ គឺមិនចូលចិត្តរដ្ឋាភិបាលប្រទេសហ្នឹង គឺដាក់ឱ្យធ្ងន់សម្លាប់គេជានយោបាយតែម្ដង!។ សម្ដេចបន្ថែមថា ប្រទេសខ្លះ ប៉ះពាល់អត់បានទេទម្លាក់ចំណាត់ថ្នាក់ប្រទេសគាត់តែបន្តិចគាត់ប្រតិកម្មឆាវតែម្ដង ប៉ុន្តែបើប្រទេសទាំងនោះ គាត់ដើរទៅដាក់ពិន្ទុឱ្យគេគាត់ដាក់ស្រេចនឹងចិត្ត, ឥឡូវនេះបើសូម្បីតែការដាក់ពិន្ទុវាពាំត្រណោត ដោយសាររឿងនយោបាយ តើយើងប្រយុទ្ធប្រឆាំងអំពើពុករលួយបែបណាទៅ?!»។ សម្ដេចតេជោបញ្ជាក់ជាថ្មីទៀតថា អ្វីៗទាំងអស់ត្រូវចាប់ផ្ដើមពីការពិតមួយទើបរកឃើញបញ្ហា ហើយសម្ដេចចង់ឱ្យរកវិធីនៃការដាក់ពិន្ទុចាត់ចំណាត់ថ្នាក់ប្រទេសនេះឱ្យមានស្តង់ដារអន្តរជាតិមួយ។
ទាក់ទងនឹងការរៀបចំសន្និសីទប្រចាំតំបន់លើកទី៨ ស្តីពីការប្រឆាំងអំពើពុករលួយនៃគំនិតផ្តួចផ្តើមប្រឆាំងអំពើពុករលួយ ADB/OECD សម្រាប់តំបន់អាស៊ី ប៉ាស៊ីហ្វិក នៅកម្ពុជា ដែលមានប្រតិភូមកពី ៣៨ប្រទេសចូលរួម សម្តេចតេជោបានមានប្រសាសន៍ចាត់ទុកវត្តមានរបស់ភ្ញៀវកិត្តិយសជាតិ និងអន្តរជាតិទាំងអស់នៅទីនេះ នឹងជួយបន្តពង្រឹងបន្ថែមទៀត ដល់កិច្ចសហប្រតិបត្តិការ និងការប្តេជ្ញាចិត្តរួមគ្នាបំពេញការងារប្រយុទ្ធប្រឆាំងអំពើពុករលួយ ទាំងក្នុងកម្រិតជាតិនីមួយៗ និងក្នុងចំណោមប្រទេសនានានៅក្នុងតំបន់អាស៊ី និងប៉ាស៊ីហ្វិក ដើម្បីសម្រេចឱ្យបាននូវគោលដៅរួមមួយ ដែលជាតួនាទីរបស់រដ្ឋ ក្នុងការបង្កើនទំនុកចិត្តរបស់ប្រជាពលរដ្ឋ លើកកម្ពស់សុចរិតភាព ធុរកិច្ច យុត្តិធម៌សង្គម និងប្រសិទ្ធភាពនៃការងារអភិវឌ្ឍសង្គមសេដ្ឋកិច្ចជាតិ។
សម្តេចតេជោមានប្រសាសន៍ថា ពិតណាស់ការជួបជុំគ្នានាពេលនេះ នឹងនាំមកនូវកិច្ចពិភាក្សាគ្នាយ៉ាងផុលផុស ដើម្បីផ្លាស់ប្តូរបទពិសោធន៍ ផ្លាស់ប្តូរទស្សនៈ ចែករំលែកចំណេះដឹងថ្មីៗ និងឧត្តមានុវត្តន៍ ដែលអាចកែច្នៃ និងយកទៅអនុវត្តក្នុងប្រទេសរបស់យើងរៀងៗខ្លួន ទៅតាមមូលដ្ឋាននៃប្រធានបទដ៏មានសារៈសំខាន់នីមួយៗ ក្នុងការប្រយុទ្ធប្រឆាំងអំពើពុករលួយ។ សម្តេចតេជោបានមានប្រសាសន៍បញ្ជាក់ថា យើងក៏បានដឹងហើយថា នៅក្នុងចរន្តនៃសកលភាវូបនីយកម្ម បទឧក្រិដ្ឋជាច្រើន រាប់ទាំងអំពើពុករលួយផង មានវិសាលភាពឆ្លងដែន ពីកំរិតជាតិ ទៅកំរិតតំបន់ និងសកល។ ដូច្នេះ ជំរើសជាក់ស្តែងដែលយើងមាននៅក្នុងការប្រឆាំងនឹងបទល្មើសទាំងនេះ គឺគ្មានអ្វីក្រៅពីការរួមគ្នាក្នុងរូបភាពជាពហុភាគីតំបន់ និងជាសកលនោះទេ។
“ខ្ញុំសូមលើកទឹកចិត្តឱ្យអ្នកចូលរួមទាំងអស់ ដែលរួមមានអ្នកធ្វើសេចក្តីសម្រេចចិត្ត អ្នកជំនាញ និងអ្នកអនុវត្តន៍ផ្ទាល់លើការងារប្រយុទ្ធប្រឆាំងអំពើពុករលួយ ដែលអញ្ជើញមកពីទូទាំងតំបន់ និងពីបណ្តាប្រទេសនានា មេត្តារួមចំណែកជាមតិយោបល់ តាមរយៈបទពិសោធន៍ និងមេរៀន ដែលបានជួបប្រទះនាពេលកន្លងមក ដើម្បីផ្តល់ជាគោលគំនិត ឆ្លើយតបឱ្យបានសក្តិសមបំផុតទៅនឹងបញ្ហាប្រឈម នៃការងារប្រយុទ្ធប្រឆាំងអំពើពុករលួយនេះ ហើយបង្កើតឡើងនូវកាលានុវត្តភាពថ្មីៗ បន្ថែមទៀតសម្រាប់ប្រជាជាតិរបស់យើងនីមួយៗ”។
លោកស្រី Clare Wee ប្រធានការិយាល័យប្រឆាំងអំពើពុករលួយ និងសុចរិតភាព នៃធនាគារអភិវឌ្ឍន៍អាស៊ី(ADB) ប្រចាំនៅប្រទេសហ្វីលីពីន បានថ្លែងអំណរគុណចំពោះរាជរដ្ឋាភិបាលកម្ពុជា និងជាពិសេសអង្គភាពប្រឆាំងអំពើពុករលួយ ដែលសហការរៀបចំសន្និសីទប្រចាំតំបន់លើកទី៨ ស្តីពីការប្រឆាំងអំពើពុករលួយនៃគំនិតផ្តួចផ្តើមប្រឆាំងអំពើពុករលួយ ADB/OECD សម្រាប់តំបន់អាស៊ី ប៉ាស៊ីហ្វិក។
លោកស្រី Clare Wee បានអះអាងថា ក្នុងនាមជាដៃគូអភិវឌ្ឍន៍របស់តំបន់ ADB នឹងបន្តធ្វើការយ៉ាងជិតស្និទ្ធជាមួយនឹងដៃគូរបស់យើងទាំងអស់ ដើម្បីដោះស្រាយបញ្ហាប្រឈមក្នុងអភិបាលកិច្ច និងអំពើពុករលួយ ដែលតំបន់របស់យើងប្រឈមសព្វថ្ងៃនេះ។ លោកស្រី Clare Wee មានប្រសាសន៍ថា យើងទាំងអស់គ្នាដឹងថា យើងមិនអាចប្រយុទ្ធប្រឆាំងនឹងអំពើពុក រលួយ ដោយគិតតែពីប្រយុទ្ធប្រឆាំងនឹងអំពើពុករលួយដោយផ្ទាល់តែមួយមុខ ហើយភ្លេចគិតដល់ការបង្កើតនូវថ្នាលមួយ ដែលអំពើពុករលួយមិនអាចកើត មិនអាចរីកឡើងបាន និងមិនត្រូវបានទទួលការអត់ឱនបាន តាមរយៈសកម្មភាពអប់រំ បណ្តុះសីលធម៌ស្អាតស្អំ វិធានការបង្ការទប់ស្កាត់ និងការដាក់ទោសទណ្ឌ។
លោកស្រី Clare Wee បានមានប្រសាសន៍ឲ្យដឹងថា ក្នុងពិភពលោកមានប្រជាជន ១.៦ពាន់លាននាក់ រស់នៅដោយទឹកប្រាក់តិចជាង ២ដុល្លារក្នុងមួយថ្ងៃ ក្នុងនោះប្រជាជនចំនួន ៧៣៨លាននាក់ កំពុងរស់តស៊ូដោយទឹកប្រាក់តិចជាង ១.២៥ដុល្លារក្នុងមួយថ្ងៃ។ ធនាគារអភិវឌ្ឍន៍អាស៊ីជឿជាក់ថា ដើម្បីកាត់បន្ថយភាពក្រីក្រ និងធ្វើឲ្យការអភិវឌ្ឍន៍កាន់តែមានប្រសិទ្ធភាព វាមានសារៈសំខាន់ណាស់ក្នុងការដោះស្រាយ អំពោះពុករលួយ និងធ្វើឲ្យប្រសើរឡើងនូវអភិបាលកិច្ច។
លោកស្រី Clare Wee បានមានប្រសាសន៍ថា ដើម្បីអនុវត្តន៍កិច្ចការនេះបាន យើងត្រូវតែបង្កើតឱ្យមានរួចជាស្រេចនូវក្របខណ្ឌច្បាប់ដែលល្អ និងអនុវត្តន៍បានជាក់ស្តែង។ យើងត្រូវមានយុទ្ធសាស្ត្រ ដែលអាចអនុវត្តន៍បាន ដោយបើកទូលាយចំពោះការចូលរួមពីគ្រប់ភាគីពាក់ព័ន្ធនានា រួមទាំងវិស័យសាធារណៈ វិស័យឯកជន សង្គមស៊ីវិល និងប្រព័ន្ធផ្សព្វផ្សាយដោយធានាឱ្យបាននូវការអភិវឌ្ឍស្ថាប័នប្រកបដោយនិរន្តរភាព និងបន្តអនុវត្តន៍កំណែទម្រង់ដែលផ្តោតលើភាពរឹងមាំ គត់មត់ជាបន្តបន្ទាប់ ដើម្បីបង្កើតបាននូវបរិយាកាសអំណោយផលដល់ប្រសិទ្ធភាព ប្រសិទ្ធផលការងារប្រកបដោយតម្លាភាព និងគណនេយ្យភាព។
ឯកឧត្តមទេសរដ្ឋមន្ត្រី ឱម យិនទៀង ប្រធានអង្គភាពប្រឆាំងអំពើពុករលួយនៃព្រះរាជាណាចក្រកម្ពុជា បានមានប្រសាសន៍ឲ្យដឹងថា ១១ឆ្នាំហើយដែលកម្ពុជាក្លាយ ជាសមាជិកនៃគំនិត ផ្ដួចផ្ដើមប្រឆាំងអំពើពុករលួយនៃ ADB/OECD ប្រចាំតំបន់អាស៊ី ប៉ាស៊ីហ្វិក ហើយចាប់តាំងពីពេលនោះមក កម្ពុជាបានបន្តនូវកិច្ចខិតខំប្រឹងប្រែងជា បន្តបន្ទាប់នៅក្នុងគំនិតផ្ដួចផ្ដើមនេះជាមួយនឹងកាតព្វកិច្ចនានា ដែលតម្រូវឱ្យបំពេញ ដោយគំនិចផ្ដួចផ្ដើមនេះ។ ច្បាប់ប្រឆាំងអំពើពុករលួយកម្ពុជាបានអនុម័តនៅឆ្នាំ២០១០ ហើយតាមរយៈច្បាប់នេះស្ថាប័នប្រឆាំងអំពើពុករលួយត្រូវបានបង្កើតឡើងជាមួយនឹងរចនាសម្ព័ន្ធជាស្ថាប័នឯករាជ្យ ដែលមានពីរកម្រិតរួមមានក្រុមប្រឹក្សាជាតិប្រឆាំងអំពើពុករលួយ និងអង្គភាពប្រឆាំងអំពើពុករលួយ។
ផ្អែកលើយុទ្ធសាស្ត្រព្រួញមុខបី រួមមាន ការអប់រំ ការបង្ការ និងទប់ស្កាត់ និងការអនុវត្តច្បាប់ ដោយមានភាពជាដៃគូជាលក្ខណៈជាតិ អន្តរជាតិដើរតួជាគន្លឹះអង្គភាពប្រឆាំងអំពើពុករលួយសម្រេចបានជោគជ័យផ្សេងៗកន្លងមកដូចជា ការចូលរួមលើកស្ទួយ ប្រសិទ្ធភាពនៃការផ្ដល់ សេវាសាធារណៈ តាមរយៈការបង្កើននូវសេវាសាធារណៈ សម្រាប់ក្រសួងស្ថាប័នចំនួន២១ ដែលមានសេវាផ្ដល់ជូនសាធារណជនទូទៅ, ការអប់រំ អំពើពុករលួយ ជាពិសេសក្នុងចំណោម យុវជនត្រូវបានជំរុញឱ្យមានការដាក់បញ្ចូល អំពីអំពើពុករលួយចូលទៅក្នុងប្រព័ន្ធអប់រំ ទូទៅសម្រាប់សិស្សថ្នាក់ទី១០, ទី១១ និង ទី១២ ដោយចាប់ផ្ដើមពីឆ្នាំសិក្សា ២០១៤-២០១៥ តទៅ, ការចូលរួមជាមួយវិស័យឯកជនក្នុងការកសាងទំនុកចិត្ត និងបង្កើនការចូលរួមប្រយុទ្ធប្រឆាំងអំពើពុករលួយពីសំណាក់វិស័យឯកជន ដើម្បីទទួលបានបរិយាកាសអាជីវកម្មដែលស្អាតស្អំប្រកបដោយការទទួលខុសត្រូវក្នុងប្រទេសកម្ពុជា។
សូមបញ្ជាក់ថា ក្នុងឆ្នាំ២០០៧ ប្រទេសកម្ពុជាបានចូលជាសមាជិកនៃអនុសញ្ញា អង្គការសហប្រជាជាតិប្រឆាំងអំពើពុករលួយ (United Nation Convention Against Corruption: UNCAC) ។ នៅក្នុងតំបន់ ក្រៅពីជាសមាជិកនៃគំនិតផ្ដួចផ្ដើមប្រឆាំងអំពើពុករលួយនៃ ADB/OECD កម្ពុជា ជាសមាជិកនៃភាគីអាស៊ីអាគ្នេយ៍ប្រឆាំងអំពើពុករលួយ (Southeast Asia Parties Against Corruption: SEA-PAC) ដែលមានប្រទេសនៅតំបន់អាស៊ីអាគ្នេយ៍ចំនួន ១០ ជាសមាជិក និងជាសមាជិកនៃសមាគមន៍អន្តរជាតិ នៃអាជ្ញាធរប្រឆាំងអំពើពុករលួយ (International Association of Anti-Corruption Authorities: IAACA) ក៏ជាសមាជិកបណ្ឌិតសភាប្រឆាំងអំពើពុករលួយ (International Anti-Corruption Academy: IACA)។ ក្នុងនាមជាដៃគូទ្វេភាគីកម្ពុជាបានចុះអនុស្សរណៈនៃការយោគយល់គ្នា (MOU) ស្តីពីបត្យាប័នជាមួយប្រទេសចិន កូរ៉េខាងត្បូង ឡាវ និងថៃ។ ដោយឡែកនៅក្នុងសន្និសីទនេះកម្ពុជា បានចុះអនុស្សរណៈនៃការយោគយល់គ្នា ស្តីពីការប្រយុទ្ធប្រឆាំងអំពើពុករលួយ ជាមួយប្រទេសឡាវ និងជាមួយប្រទេសថៃ៕
No comments:
Post a Comment