ក្នុងឱកាសអញ្ជើញជាអធិបតីក្នុងពិធីសម្ពោធស្ពានអាកាសស្ទឹងមានជ័យ នាព្រឹកថ្ងៃទី៣១ ខែកក្កដា ឆ្នាំ២០១៤ ដែលជាស្ពានអាកាសទី៣ ក្នុងរាជធានីភ្នំពេញ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានប្រកាសឲ្យចាប់ផ្តើមការកសាងស្ពានអាកាសទី៤ និងផ្លូវក្រោមដី ដែលជាផ្លូវប្រសព្វរវាងមហាវិថីសហព័ន្ធរុស្ស៊ី មហាវិថីម៉ៅសេទុង និង មហាវិថី គីមអ៊ីលស៊ុង ក្បែរវិទ្យាស្ថានបច្ចេកវិទ្យាកម្ពុជា (តិចណូ) ។
សម្តេចតេជោនាយករដ្ឋមន្ត្រីដែលអមដំណើរដោយ សម្តេចកិត្តិព្រឹទ្ធបណ្ឌិត បានកោតសរសើរ ចំពោះសាលារាជធានីភ្នំពេញ និងក្រុមហ៊ុនវិនិយោគទុនអាណិកជនកម្ពុជា (OCIC) ដែលបានខិតខំជំរុញការសាងសង់ បានសម្រេចជោគជ័យមុនការគ្រោងទុក និងបានថ្លែងអំណរគុណផងដែរ ចំពោះពលរដ្ឋរស់នៅតំបន់ស្ពានអាកាសស្ទឹងមានជ័យ ដែលបានទទួលផលប៉ះពាល់ និងការលំបាកមួយចំនួន ក្នុងអំឡុងពេលសាងសង់កន្លងមក។
សម្តេចតេជោនាយករដ្ឋមន្ត្រី បានអនុញ្ញាតតាមសំណើរបស់សាលារាជធានីភ្នំពេញ ដែលសុំរៀបចំទីតាំងក្រោមស្ពានអាកាសស្ទឹងមានជ័យ ឱ្យក្លាយជាកន្លែងកម្សាន្ត និងកន្លែងហាត់ប្រាណ ដោយត្រូវចាក់គម្រប លើប្រព័ន្ធលូក្រោម ស្ពាន ព្រមទាំងដាំស្មៅ ដាំផ្កា កូនឈើ ដាក់បង់ថ្មសម្រាប់អង្គុយលំហែកាយដែលការសាងសង់នេះជាបន្ទុករបស់ក្រុមហ៊ុន OCIC។
នៅក្នុងឱកាសនោះដែរ សម្តេចតេជោនាយករដ្ឋមន្ត្រីក៏បានមានប្រសាសន៍ឲ្យដឹងពីការរីកចម្រើននៅក្នុងរាជធានីភ្នំពេញ ដែលទាមទារឲ្យមានវិធានការណ៍ដោះស្រាយបញ្ហាប្រឈមជាច្រើននាពេលខាងមុខ។
សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានមានប្រសាសន៍ឲ្យដឹងថា វត្តមានប្រជាពលរដ្ឋកាន់តែច្រើននៅក្នុងរាជធានីភ្នំពេញ ការកសាងបុរីថ្មីមានចំនួនរហូតដល់៧៤បុរី ផ្ទះសម្បែង កសាងយ៉ាងច្រើនបានធ្វើឲ្យទំហំផ្ទៃដីនៅទីក្រុងភ្នំពេញដែលកាលពីមុនជាង៣០០គីឡូម៉ែត្រក្រឡា បច្ចុប្បន្ននេះបានឡើងជិត៧០០ គីឡូម៉ែត្រក្រឡាមានន័យថា ទំហំទីក្រុងភ្នំពេញបានរីកមួយជាពីរ វារីកទាំងទំហំវារីកទាំងជម្រៅ។
សម្តេចតេជោនាយករដ្ឋមន្រ្តីបានពន្យល់ថា អ្វីទៅដែលហៅថា រីកទាំងជម្រៅ រីកទាំងជម្រៅ នៅត្រង់ថាពីដើមដីមួយហិកតាមានសំណង់ត្រឹមតែ៥ ០០០ ម៉ែត្រក្រឡាទេ ប៉ុន្តែឥឡូវក្នុងមួយហិកតានេះ វាមានសំណង់រហូតទៅដល់៥០ ០០០ ឬ១០០ ០០០ ម៉ែត្រការ៉េ ដូចជាធនាគារកាណាឌីយ៉ាជាដើម។ល។
ក្នុងពេលជាមួយគ្នាវត្តមានរថយន្តប្រមាណជាង៣០០ ០០០គ្រឿងនិងទោចក្រយានយន្តប្រមាណជិត ១លានគ្រឿង វាបានធ្វើឲ្យទីក្រុងភ្នំពេញបង្កើតឡើងនូវស្ថានភាពលំបាកសម្រាប់យើងដោះស្រាយបញ្ហាចរាចរនៅក្នុងទីក្រុងនេះ។
សម្តេចតេជោមានប្រសាសន៍ថា បញ្ហាក្រៅពីរឿងការកកស្ទះដោយសារមធ្យោបាយកាន់តែ ច្រើនទៅៗ នៅមានអ្នកបំពានច្បាប់ អ្នកមិនគោរពច្បាប់ចរាចរណ៍ និងអ្នកបើកបរក្រោមឥទ្ធិពលជាតិស្រវឹង បើទោះបីជាមានការអំពាវនាវយ៉ាងណា ប៉ុន្តែវាហាក់ដូចជានៅតែមានប្រសិទ្ធភាពនៅទាបនោះឡើយ។ ដូច្នេះបញ្ហានេះជាបញ្ហាដែលយើងត្រូវដោះស្រាយ ត្រូវគោរពជីវិត ខ្លួនឯង និងគោរពជីវិតអ្នកដទៃ ហើយខ្ញុំសូមអំពាវនាវឲ្យប្រជាពលរដ្ឋគោរពច្បាប់ចរាចរណ៍ ទាំងអស់គ្នា។
ជាមួយនឹងការប្តេជ្ញាចិត្តធ្វើឲ្យសម្រេចបានជោគជ័យ នូវការបម្រើសេវាដឹកជញ្ជូនសាធារណៈ ដែលស្ទើរតែមិនទទួលជោគជ័យសោះ នៅពេលដែលការធ្វើអាជីវកម្ម នេះជាមួយផ្នែកឯកជននាពេលកន្លងមក សម្តេចតេជោនាយករដ្ឋមន្ត្រីក៏បានប្រកាសឲ្យដឹងថា រាជរដ្ឋាភិបាលកម្ពុជាបានសម្រេចបង្កើតរដ្ឋាករដឹកជញ្ជូនសាធារណៈ ។
សម្តេចនាយករដ្ឋមន្ត្រីថ្លែងថា ថ្ងៃនេះខ្ញុំចង់ប្រកាសចេញនូវបញ្ហា មួយគឺការដាក់ចេញនូវរដ្ឋាករដឹកជញ្ជូនសាធារណៈ ដែលយើងត្រូវវិនិយោគខ្លួនឯង តាមរយៈទ្រឹស្ដីយក «ក្រុងចិញ្ចឹមក្រុង» មានន័យថា យើងត្រូវយកចំណូលពីផ្នែកណាមួយរបស់សាលាក្រុង មកវិនិយោគលើគម្រោងការនេះ ហើយសូមស្ថាប័នហិរញ្ញវត្ថុអន្តរជាតិនានាកុំមកនិយាយថា ធ្វើនេះខុសពីគោលការណ៍នោះ។
សម្តេចអគ្គមហាសេនាបតីតេជោ ហ៊ុន សែន បានមានប្រសាសន៍បញ្ជាក់ថា នេះនយោបាយដឹកជញ្ជូនក្នុងក្រុង ដែលយើងត្រូវធ្វើឲ្យទទួលបានជោគជ័យ ដោយរដ្ឋអនុញ្ញាតិឲ្យរួចពន្ធសម្រាប់ការនាំចូលរថយន្តក្រុង និងការមិនយកប្រាក់ ចំពោះជនពិការ សិស្សានុសិស្សដែលមានអត្តសញ្ញាណត្រឹមត្រូវ ព្រមទាំងព្រះសង្ឃផងដែរ។
ដោយយោងតាមការព្យាករណ៍របស់ក្រសួងធនធានទឹក និងឧតុនិយមស្តីពីស្ថានភាពជំនន់ទឹកភ្លៀង ដែលបង្កឡើងដោយខ្យល់ព្យុះទី៩ ឈ្មោះរ៉ាម៉ាសាន សម្តេចតេជោនាយករដ្ឋមន្ត្រី បានអំពាវនាវនៅព្រឹកថ្ងៃ៣១ ខែកក្កដា ឆ្នាំ២០១៤ ដល់អាជ្ញាធរ និងប្រជាពលរដ្ឋនៅតាមដងទន្លេត្រៀម លក្ខណៈក្នុងការជួយជម្លៀស និងប្រុងប្រយ័ត្នដោយខ្លួនឯងចំពោះស្ថានភាពទឹក ជំនន់ ដែលនឹងកើតមានឡើងក្នុងពេលឆាប់ៗនេះ។
សម្តេចតេជោបានមានប្រសាសន៍ថា «ខ្ញុំ សូមនិយាយទៅកាន់ប្រជាពលរដ្ឋ ដែលកំពុងរស់នៅតាមដង ទន្លេមេគង្គ ដងទន្លេសាប និងតាមទីកន្លែងដទៃទៀត អំពីការត្រៀមរៀបចំខ្លួន ចំពោះស្ថានភាពទឹកជំនន់ព្រោះកម្រិតនៃការប្រកាសអាសន្នកំពុងតែ កើតមាន ឡើងស្ទើរតែនៅគ្រប់ខេត្តនៅតាមដងទន្លេមេគង្គនោះ»។
សម្តេចតេជោថ្លែងថា អាជ្ញាធរមានសមត្ថកិច្ចនៅតាមដងទន្លេមេគង្គ ទន្លេបាសាក់ ទន្លេសាបត្រូវតែ មានការប្រុងប្រយ័ត្នក្នុងការត្រៀមជម្លៀសប្រជាពលរដ្ឋក្នុងករណីចាំបាច់។
សម្តេចតេជោនាយករដ្ឋមន្ត្រីបានថ្លែងថា គណៈកម្មាធិការជាតិគ្រប់គ្រងគ្រោះមហន្តរាយត្រូវសហការជាមួយក្រសួងធនធានទឹក ដើម្បីធ្វើការផ្សព្វផ្សាយតាមគ្រប់មធ្យោបាយចំពោះស្ថានភាព គ្រោះធម្មជាតិដែលនឹងកើតមាននេះ ដើម្បីឲ្យបងប្អូនប្រជាពលរដ្ឋបានដឹងជាមុននោះ។ «ខ្ញុំ សូមអំពាវនាវចំពោះប្រជាពលរដ្ឋ សូមប្រុងប្រយ័ត្នដោយខ្លួនឯង ហើយស្ថានីយវិទ្យុ ទូរទស្សន៍ សូមផ្សព្វផ្សាយអំពី ព័ត៌មានធាតុអាកាសឲ្យបានច្រើន ដើម្បីបញ្ចៀសគ្រោះថ្នាក់ជាយថាហេតុ»។
សម្តេចបានរំឭកថា ជំនន់ទឹកភ្លៀងនៅតាមតំបន់មួយចំនួនដូចជា ស្ទឹងសែន ខេត្តកំពង់ធំ ស្ទឹងពោធិ៍សាត់ និងស្ទឹងដទៃៗទៀត នឹងកើតមានឡើង ដូច្នេះត្រូវតែមានការប្រុងប្រយ័ត្នខ្ពស់ ព្រោះរដូវនេះជារដូវដែលត្រូវមានការប្រុងប្រយ័ត្ន ហើយព្រះករុណាព្រះមហាក្សត្រជាទីគោរពសក្ការៈដ៏ខ្ពង់ខ្ពស់បំផុត ក៏ដូចជាសម្តេចព្រះមហាក្សត្រី ព្រះវររាជមាតាជាតិខ្មែរ ព្រះអង្គតែងយកព្រះទ័យតាមដាន និងយកចិត្តទុកដាក់ខ្លាំងណាស់ទៅលើបញ្ហាអស់ទាំងនេះ។
ឯកឧត្តម ប៉ា សុជាតិវង្ស អភិបាលរាជធានីភ្នំពេញ បានមានប្រសាសន៍ឲ្យដឹងថា ស្ពានអាកាសស្ទឹងមានជ័យ គឺជាស្ពានអាកាសទី៣ និងជាសមិទ្ធផលថ្មីមួយទៀត បន្ទាប់ពីស្ពាន អាកាសក្បាលថ្នល់ និងស្ពានអាកាស ៧មករា ដែលបានកើតឡើងក្នុងរយៈពេល ត្រឹមតែ២ឆ្នាំ ប៉ុណ្ណោះ។ សមិទ្ធផលទាំងអស់នេះ បានកើតចេញពីមនុញ្ញផលនៃសុខសន្តិភាព ស្ថិរភាព នយោបាយ និងការអភិវឌ្ឍលើគ្រប់វិស័យរបស់រាជរដ្ឋាភិបាល ក្រោមការដឹកនាំប្រកបដោយភាពឈ្លាសវៃ និងគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ស្ពានអាកាសស្ទឹងមានជ័យ ស្ថិតនៅក្នុងភូមិសាស្ត្រមុំនៃសង្កាត់ចំនួន៣ គឺសង្កាត់មានជ័យ នៃខណ្ឌមានជ័យ, សង្កាត់ទំនប់ទឹក នៃខណ្ឌចំការមន និងសង្កាត់បឹងសាឡាង នៃខណ្ឌទួលគោក ដែលបានអនុវត្តការសាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC)។
ស្ពានអាកាសនេះ ផ្អែកតាមកិច្ចសន្យា គឺត្រូវប្រើរយៈពេល ២៨ខែ ដើម្បីសាងសង់ ដោយចាប់ផ្តើមពីថ្ងៃទី២៦ ខែវិច្ឆិកា ឆ្នាំ២០១២ ហើយគ្រោងបញ្ចប់នៅថ្ងៃទី២៦ ខែមីនា ឆ្នាំ២០១៥ ប៉ុន្តែជាក់ស្តែងដោយមានកិច្ចខិតខំប្រឹងប្រែង ក្នុងការស្ថាបនា ទាំងថ្ងៃទាំងយប់ ធ្វើឱ្យការសាងសង់នេះ ប្រើរយៈពេល ត្រឹមតែ២០ខែប៉ុណ្ណោះ ដោយចំណាយថវិកាសាងសង់សរុប ១៨.៩៧៦. ៦៧៨ដុល្លារអាម៉េរិក ជាកញ្ចប់ថវិកាដែលបានមកពីការវិនិយោគដី ជ្រោយចង្វាររបស់ក្រុមហ៊ុនវិនិយោគទុនអាណិកជនកម្ពុជា (OCIC)។
ស្ពានអាកាសស្ទឹងមានជ័យ រួមមាន ស្ពានចំនួន៥ ក្នុងនោះមាន ស្ពានមេ១ស្ពាន តូច៣ និងផ្លូវក្រោមដី១។ ចំពោះលក្ខណៈបច្ចេកទេសនៃការសាងសង់ស្ពាននេះ គឺ ជាស្ពានបេតុងអាមេអាចទទួលទម្ងន់សរុប ២៥តោន ក្នុងនោះស្ពានមេ មានសសរ ២ ឯស្ពានតូច មានសសរ១ ដោយចន្លោះសសរពីមួយទៅមួយ មានគម្លាត ពី២០ ទៅ៣០ម និងមានបង្កាន់ដៃស្ពាន កម្ពស់ ជាង១ម។
យោងតាមរបាយការណ៍របស់សាលារាជធានីភ្នំពេញ បានបង្ហាញអំពីអត្ថប្រយោជន៍ដែលបានមកពីការស្ថាបនាស្ពានអាកាសស្ទឹងមានជ័យ និងការពង្រីកផ្លូវចាប់ពីស្ពានអាកាស ស្ទឹងមានជ័យ រហូតដល់ផ្លូវចូលមជ្ឈមណ្ឌលប្រល័យពូជសាសន៍ជើងឯក ដែលនឹងធ្វើឱ្យតំបន់នេះ កាន់តែមានសក្តានុពលក្នុងការអនុវត្តលើគ្រប់វិស័យ ដូចជា វិស័យលំនៅស្ថានពាណិជ្ជកម្ម និងឧស្សាហកម្ម។ បន្ថែមលើនេះ ស្ពានអាកាសថ្មីនេះ នឹងបានប្រើប្រាស់ ដូចជា៖ ការលើកកម្ពស់សោភ័ណភាព រាជធានីភ្នំពេញ ការដោះស្រាយបញ្ហាការកកស្ទះចរាចរ ដែលកើតឡើងពីលំហូរចរាចរ នៃចំណុចប្រសព្វមុំបី រវាងខណ្ឌមានជ័យ ចំការមន និងខណ្ឌទួលគោក។ ស្ពានអាកាសស្ទឹងមានជ័យក៏ជាច្រកចេញ ចូលសេដ្ឋកិច្ច ដ៏សំខាន់ ដែលតភ្ជាប់ រវាងខេត្តកណ្តាល ខេត្តតាកែវ ខេត្តកំពត ខេត្តព្រះសីហនុ មកកាន់រាជធានីភ្នំពេញ ហើយម៉្យាងទៀត នេះក៏ជាយុទ្ធសាស្ត្រមួយ ក្នុងការលុបបាត់សំណង់អានាធិបតេយ្យ និងបញ្ហាអសន្តិសុខ ដែលធ្លាប់តែកើតមាននៅតំបន់នេះ ស្របតាមគោលនយោបាយ ភូមិឃុំ មានសុវត្ថិភាព៕
No comments:
Post a Comment