ដោយ៖
សួន ចំរើន
ក្នុងរយៈពេលកន្លងមកប្រធានគណបក្សប្រឆាំងលោក
សម រង្ស៊ី បានដឹកនាំបាតុកម្មជាច្រើនលើកច្រើនសារក្រោមប្រធានបទខុសៗគ្នា
ហើយការដឹកនាំបាតុកម្មរបស់គណបក្សសង្គ្រោះជាតិកន្លងមកធ្លាប់មានបញ្ហាជាច្រើនដែលបានកើតឡើងជាហូរហែរ
ក៏ប៉ុន្តែ លោក សម រង្ស៊ី អាចទប់សភាពការណ៍ មិនដូចស្នាដៃ លោក កឹម សុខា
នាពេលនេះទេ។ ក្នុងរយៈពេលចុងក្រោយនេះ អាចថា លោកប្រធាន សម
រង្ស៊ី សាកល្បងនូវសមត្ថភាពដឹកនាំរបស់លោក កឹម សុខា
ដោយយកលេសធ្វើជាមានបេសកកម្មនៅក្រៅប្រទេសរហូតដល់ជិត ១ខែ
ហើយមកដល់ពេលនេះក៏បានឃើញ នូវភាពកម្សោយក្នុងការដឹកនាំរបស់លោក កឹម
សុខា យ៉ាងពិតប្រាកដ។ ជាលទ្ធផល នៃការដឹកនាំរបស់លោក កឹម សុខា
តែក្នុងរយៈពេលមិនដល់១ខែនេះ គឺតំណាងរាស្ត្ររបស់បក្សប្រឆាំង
ដែលមានការចង្អុលបង្ហាញផ្លូវឲ្យអនុវត្ត ដោយលោក កឹម សុខា
ត្រូវបានចាប់ខ្លួន
ដោយសារការអនុវត្តផែនការញុះញង់របស់ខ្លួនជ្រុលហួសពីសំណាញ់ច្បាប់។
ដោយអស់ការគាំទ្រ ពីតំណាងរាស្ត្រជាប់ឆ្នោតរបស់ខ្លួននៅក្នុងប្រទេស
លោក កឹម សុខា
ក៏ប្រកូកប្រកាសប្រមែប្រមូលបេក្ខជនជាប់ឆ្នោតរបស់ខ្លួនឲ្យចូលមកក្នុងប្រទេសវិញជាការប្រញាប់
ដើម្បីជួយមកតំរែតម្រង់ផ្លូវគាត់ឡើងវិញ។ ជាក់ស្តែង
នៅក្នុងសភាពការណ៍ចុងក្រោយនេះ លោក សម រង្ស៊ី មិនបានជួយ
ឬផ្តល់យោបល់អ្វីទាំងអស់ គឺទុកឲ្យលោក កឹម សុខា ឈ្លក់ទឹកតែម្នាក់ឯង
ហើយទីបំផុតស្រែករកជំនួយដោយខ្លួនឯង។
បើតាមប្រភពព័ត៌មាន
ពីផ្ទៃក្នុងគណបក្សនេះបានឲ្យដឹងថា ការធ្លាក់ចុះនូវសកម្មភាពនយោបាយរបស់គណបក្សសង្គ្រោះជាតិនេះ
គឺដោយសារមានបញ្ហាជាច្រើន ដូចជា
ការមិនចុះសម្រុងគ្នារវាងមេបក្សទាំងពីរ គឺរវាងលោក សម រង្ស៊ី និងលោក
កឹម សុខា
វិបត្តិនៃប្រភពថវិកា
និងជាពិសេសការបាត់បង់ជំនឿរបស់ប្រជាពលរដ្ឋ ទាំងនៅក្នុងប្រទេស និងនៅក្រៅប្រទេស
តែម្តង។
ទាក់ទងនឹងភាពមិនចុះសម្រុងនឹងគ្នា រវាងលោក សម រង្ស៊ី និង
លោក កឹម សុខា វិញ ត្រូវបានប្រភពបង្ហើបឲ្យដឹងថា លោកប្រធាន សម
រង្ស៊ី មានការខកចិត្តជាខ្លាំង
ក្រោយពីលោកប្រធានបានខិតខំធ្វើការចរចា ជាមួយសម្តេច ហ៊ុន សែន
បានសម្រេចរហូតដល់ទៅ៨០% ទៅហើយបែរជាលោក កឹម សុខា
ដែលជាអនុប្រធានបក្សសោះ ហ៊ានជំទាស់។ ដូច្នោះហើយ
ទើបលោក សម រង្ស៊ី លែងរវល់
ក៏យកលេសធ្វើជាមានបេសកៈកម្មនៅបរទេសរហូតដល់១ខែ ហើយទុកឲ្យលោក កឹម
សុខា ដើរតួក្នុងប្រទេសក្នុងការចរចាជាមួយគណបក្សប្រជាជនកម្ពុជាវិញម្តង។
ប៉ុន្តែ សមត្ថភាពចរចា របស់លោក កឹម សុខា គឺនៅខ្សោយខ្លាំងណាស់
ហើយមិនបានចេញជាលទ្ធផលអ្វីបន្តិចសោះឡើយ។ មកដល់ពេលនេះ លោក កឹម
សុខា ក៏បានទទួលស្គាល់នូវភាពកម្សោយក្នុងការដឹកនាំរបស់ខ្លួនផងដែរ
ហើយមិនហ៊ានលើកគម្រោងចេញតវ៉ាអ្វីដោយខ្លួនឯងផ្ទាល់នោះទេ
ទើបលើកផែនការឲ្យមន្ត្រីក្រោមឱវាទទៅធ្វើវិញ
ព្រោះខ្លាចចូលអន្ទាក់របស់លោកប្រធានរបៀបជាយុទ្ធសាស្ត្រ « រុញស៊ីក្លូចូលឡាន » ។
ចំណែក បញ្ហាវិបត្តិថវិកាវិញ
គឺដោយសារប្រភពជំនួយពីបណ្តាប្រទេសដែលគាំទ្រជាប្រយោលមួយចំនួនលែងមានទំនុកចិត្តដល់ការប្រើប្រាស់ថវិកា
ដែលបានផ្តល់ឲ្យកាលពីពេលកន្លងមក រួមនិងអំពើពុករលួយរបស់មេបក្ស និងមន្ត្រីដែលទទួលបន្ទុកធ្វើចំណូល
និងចំណាយថវិកា។ ការបែកធ្លាយនេះ
ក៏ព្រោះតែមន្ត្រីដែលគ្មានលទ្ធភាពទៅរៃអង្គាសថវិកាមិនបានទទួលផលប្រយោជន៍
និងមិនមែនជាបក្ខពួករបស់ក្រុមមន្ត្រីដែលកាន់ថវិកា ហើយមានការឈឺចាប់
ក៏បានត្រឹមតែបង្ហើបព័ត៌មាន តែប៉ុណ្ណោះ។ ចំណែក មន្ត្រី
និងមេបក្សទាំងពីរដែលចែកវេនគ្នាចេញទៅប្រមូលថវិកានោះ
តែងតែកឹបកេងថវិកាដែលប្រមូលបានយកទៅប្រើប្រាស់ជាប្រយោជន៍ផ្ទាល់ខ្លួន
និងក្រុមគ្រួសារ ហើយធ្វើបញ្ជីចំណាយក្នុងន័យប្រើប្រាស់ជាការងារគណបក្ស
ដើម្បីឲ្យការប្រព្រឹត្តរបស់ខ្លួនក្លាយជាការ « ស៊ីស្របច្បាប់ »។ ម្យ៉ាងទៀត
ការចេញទៅរៃអង្គាសពីប្រជាពលរដ្ឋដែលជាអនិកជនរស់នៅក្រៅប្រទេស
ក៏ត្រូវបានពួកគេអស់ជំនឿ ពីការសន្យា ដែលថានឹងផ្តល់តួនាទីនេះ
ឬតួនាទីនោះដល់ពួកគេ តែទីបំផុតគឺបាននៅត្រឹមតែជាការសន្យា
ដូចពាក្យបុរាណពោលថា៖ « ប្រាក់ក៏បង់ ថង់ក៏ដាច » តែប៉ុណ្ណោះ។
មកដល់តំណាក់កាលនេះ បក្សសង្គ្រោះជាតិបានឈានដល់ការប្រេះឆាផ្ទៃក្នុងយ៉ាងធ្ងន់ធ្ងរ
ដោយសារទំនាស់ផលប្រយោជន៍ រវាងលោកប្រធាន និងលោកអនុប្រធាន
និងមួយផ្នែកទៀតរវាងមន្ត្រី និងមន្ត្រីគណបក្ស
នៅក្នុងជួរគណៈកម្មាធិការនាយក។ ដូច្នេះហើយ
ទើបមន្ត្រីមួយចំនួនចេញទៅក្រៅប្រទេសមិនរវល់នឹងការដឹកនាំរបស់គណបក្ស
ជាពិសេសការដឹកនាំរបស់លោក កឹម សុខានាពេលចុងក្រោយនេះ។ បើតាមប្រភព
បានបង្ហើបបន្ថែមថា
នៅពេលដែលលោកប្រធានត្រឡប់មកពីបារាំងវិញនៅថ្ងៃទី១៩ កក្កដា
ខាងមុខនេះ ប្រសិនបើ ការលើកសំណើរបស់លោកប្រធានបក្ស
ដើម្បីចរចាជាមួយគណបក្សប្រជាជន នៅក្នុងការធ្វើសមាជនាពេលខាងមុខនេះ
លោកអនុប្រធានមិនព្រមធ្វើតាមនោះទេ គឺប្រាកដជា
អាចនឹងមានព្រឹត្តិការណ៍សំខាន់គួរជាទីចាប់អារម្មណ៍របស់អ្នកយកព័ត៌មាន
ជាក់ជាមិនខាន៕
No comments:
Post a Comment