រាជធានីភ្នំពេញ ថ្ងៃទី០៣ ខែមិថុនា ឆ្នាំ២០១៤
ឯកឧត្តម លោកជំទាវ អស់លោក លោកស្រី
ថ្ងៃនេះ ខ្ញុំមានកិត្តិយសដ៏ខ្ពង់ខ្ពស់ តំណាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងពិធីស្វាគមន៍ការវិលត្រឡប់មកវិញនៃបដិមាទាំងបីនេះមកកាន់មាតុភូមិរបស់យើង នាពេលនេះ។ ដំណើររឿងនេះបានចាប់ផ្ដើមតាំងពីជាងមួយពាន់ឆ្នាំមុនម្ល៉េះ នៅពេលដែលព្រះបាទជ័យវរ្ម័នទី៤ បានសម្រេចឱ្យគេឆ្លាក់រូបពិព័ណ៌នាអំពីឈុតឆាកប្រយុទ្ធដ៏ល្បីល្បាញមួយ នៅក្នុងរឿងទេវកថាសាសនាហិណ្ឌូ មហាភារតៈនៅលើប្រាសាទចិន ដែលជាប្រាសាទមួយក្នុងចំណោមប្រាសាទនានារបស់ព្រះអង្គ។ បន្ទាប់ពីដំណើរដ៏វែងឆ្ងាយជាង៤០ឆ្នាំ ឆ្លងកាត់សង្គ្រាមស៊ីវិល ការលួច ការជួញដូរខុសច្បាប់ និងការធ្វើដំណើរទូទាំងពិភពលោក នៅពេលនេះ បដិមាទាំងបីបានទទួលនូវសេរីភាពនិងបានត្រឡប់មកកាន់ទីឋានកំណើតរបស់ខ្លួនវិញហើយ។
បដិមាដ៏ធំនៃដៃគូប្រយុទ្ធគ្នាគឺ ទុរយោធន៍ និង ភីម រួមជាមួយនឹង ពលរាម ដែលជាសាក្សីនៃឆាកប្រយុទ្ធដ៏អស្ចារ្យនោះ បានត្រឡប់មកកាន់ទីឋានកំណើតរបស់ខ្លួនវិញ ដោយសារកិច្ចខិតខំប្រឹងប្រែងប្រកបដោយជោគជ័យរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន ដោយមានការចូលរួមជាដៃគូជាមួយរដ្ឋាភិបាលសហរដ្ឋអាមេរិក អង្គការយូណេស្កូ សាលាបារាំងចុងបូព៌ា(EFEO) និងអ្នកជំនាញដទៃទៀតជាច្រើននាក់។
បដិមា ទុរយោធន៍ ត្រូវបានប្រគល់ជូនរាជរដ្ឋាភិបាលកម្ពុជាវិញកាលពីខែមុននៅទីក្រុងញូវយ៉ក បន្ទាប់ពីជោគជ័យនៃការតស៊ូក្ដីដែលរៀបចំឡើងដោយការិយាល័យអគ្គរដ្ឋអាជ្ញាសហរដ្ឋអាមេរិកប្រចាំតំបន់ Southern District of New York រួមជាមួយនឹងការគាំទ្រយ៉ាងសកម្មរបស់ក្រុមអ្នកច្បាប់កម្ពុជា ដែលដឹកនាំដោយឯកឧត្តម ច័ន្ទ តានី។
រីឯបដិមា ភីម ដែលសារមន្ទីរ Norton Simon នៅទីក្រុង Pasadena រដ្ឋ California បានទិញនៅក្នុងឆ្នាំ១៩៧៦ ក៏ត្រូវបានបញ្ជូនត្រឡប់មកទីឋានកំណើររបស់ខ្លួនវិញដែរ បន្ទាប់ពីមានកិច្ចចរចារដោយផ្ទាល់ ដ៏វែងអន្លាយ ប៉ុន្តែប្រកបដោយភាពយោគយល់គ្នាជាមិត្តភាព រវាងរាជរដ្ឋាភិបាលកម្ពុជា និងសារមន្ទីររួចមក។ ទន្ទឹមនឹងនេះដែរ បដិមា ពលរាម ក៏បានត្រឡប់ មកវិញ តាមរយៈការព្រមព្រៀងគ្នារវាងរាជរដ្ឋាភិបាលកម្ពុជា និងក្រុមហ៊ុនដេញថ្លៃ Christie’s។
យើងមានក្ដីសោមនស្សរីករាយជាខ្លាំង ដោយមានការចូលរួមនៅក្នុងពិធីថ្ងៃនេះពី លោក Jeff Daigle អនុប្រធានបេសកកម្មនៃស្ថានទូតសហរដ្ឋអាមេរិក លោក Walter Timoshuk ប្រធានសារមន្ទីរ Norton Simon និងពីលោក Martin Wilson សហប្រធានសាកលផ្នែកកិច្ចការច្បាប់និងហានិភ័យ លោកស្រី Sandra Cobden អគ្គមេធាវី និងលោកស្រី Dadhya Jain-Patel ប្រធានលក់ផ្នែកវត្ថុសិល្បៈឥណ្ឌានិងអាស៊ីអាគ្នេយ៍ នៃក្រុមហ៊ុន Christie’s អន្តរជាតិ។
បដិមាពីរទៀត នៅក្នុងក្រុមតែមួយនេះគឺ សហទេព និង នកុល ដែលជាទេវរូបពីរអង្គក្នុងចំណោមបងប្អូន បណ្ឌវ ត្រូវបានបញ្ជូនត្រឡប់មកកាន់ប្រទេសកម្ពុជាវិញ ដោយសារមន្ទីរ Metropolitan នៅទីក្រុងញូវយ៉ក កាលពីខែមិថុនា ឆ្នាំ២០១៣ កន្លងទៅ នៅអំឡុងសម័យប្រជុំលើកទី៣៧នៃគណៈកម្មាធិការបេតិកភណ្ឌពិភពលោក។ បដិមាទាំងបីដែលទើបបញ្ជូនមកថ្មីនេះនឹងត្រូវដាក់បង្ហាញជាសាធារណៈ រួមជាមួយនឹងបដិមាទាំងពីរ នៅសារមន្ទីរជាតិកម្ពុជា ដោយតភ្ជាប់ទៅនឹងជើងទម្ររៀងៗខ្លួន។
ឥឡូវនេះ ការពិតនានាត្រូវបានរកឃើញ ហើយដំណើរផ្សងព្រេងដ៏វែងឆ្ងាយត្រូវបានបញ្ចប់នៅទីនេះ។ និមិត្តរូបដ៏មានតម្លៃនៃបេតិកភណ្ឌរបស់យើងនេះ បានជួបម្ចាស់ដើមពិតប្រាកដរបស់ខ្លួនវិញហើយ។
ថ្ងៃនេះ គឺពិតជាថ្ងៃមួយដ៏វិសេសវិសាល ដែលឆ្លុះបញ្ចាំងអំពីសមិទ្ធផលមួយដ៏សំខាន់នៃគោលនយោបាយរបស់យើងដើម្បីការពារសម្បត្តិបេតិកភណ្ឌវប្បធម៌ ដែលរាជរដ្ឋាភិបាលកម្ពុជាបាននិងកំពុងអនុវត្តយ៉ាងសកម្មនិងខ្ជាប់ខ្ជួន នៅក្នុងក្របខ័ណ្ឌនៃ «អនុសញ្ញាអង្គការយូណេស្កូឆ្នាំ១៩៧០ស្ដីពីការហាមប្រាមនិងការទប់ស្កាត់ការនាំចូល ការនាំចេញ និងការបញ្ជូនដោយខុសច្បាប់នូវសម្បត្តិវប្បធម៌។»
កាលពីពីរឆ្នាំកន្លងទៅនេះ យើងបានដាក់ជើងទម្រនៃបដិមា ទុរយោធន៍ និង ភីម នៅផ្លូវចូលទីស្នាក់ការអាជ្ញាធរអប្សរានៅខេត្តសៀមរាប រួមជាមួយនឹងរូបថតនៃបដិមាដែលត្រូវបានគេលួច ដើម្បីបង្ហាញអំពីការប្តេជ្ញាចិត្តក្នុងការយកត្រឡប់មកវិញឱ្យបាននូវបដិមាទាំងនោះ។ ថ្ងៃនេះ បន្ទាប់ពីកិច្ចខិតខំប្រឹងប្រែងដ៏លំបាក បដិមាទាំងពីរនិងជើងទម្រ ឈរជាមួយគ្នានៅចំពោះមុខយើងទាំងអស់គ្នា ដោយត្រៀមខ្លួនរួចរាល់សម្រាប់ការតភ្ជាប់គ្នាវិញ ដោយក្រុមជំនាញនៃសារមន្ទីរជាតិកម្ពុជា។
ឯកឧត្តម លោកជំទាវ អស់លោក លោកស្រី
តាងនាមឱ្យរាជរដ្ឋាភិបាល និងប្រជាជនកម្ពុជាទាំងមូល ខ្ញុំសូមសម្តែងនូវការកោតសរសើរយ៉ាងជ្រាលជ្រៅ ចំពោះភាគីពាក់ព័ន្ធទាំងអស់ដែលបានរួមចំណែកធ្វើឱ្យសម្រេចបាននូវសមិទ្ធិផលដ៏វិសេសវិសាលនេះ។
ជាបឋម ខ្ញុំសូមកោតសរសើរជាពិសេស ចំពោះកិច្ចការរបស់លោក Simon Warrack ដែលនៅក្នុងឆ្នាំ២០០៧ ជាមនុស្សទីមួយរកឃើញនូវទំនាក់ទំនងរវាងជើងទម្រនៅឯប្រាសាទចិន នៃរមណីយដ្ឋានកោះកេរ ដែលស្ថិតនៅតំបន់ដាច់ស្រយាលភាគខាងជើងនៃប្រទេសកម្ពុជា ជាមួយនឹងបដិមាដែលបានបាត់បង់។
ខ្ញុំក៏សូមអបអរសារទរផងដែរចំពោះសាលាបារាំងចុងបូព៌ា(EFEO) ជាពិសេសលោកបណ្ឌិត Eric Bourdonneau និងលោកបណ្ឌិត Bertrand Porte ដែលបានធ្វើការងារជាច្រើន ពាក់ព័ន្ធនឹងប្រាសាទចិន ដែលបាននាំទៅដល់ការបញ្ជាក់យ៉ាងជាក់ច្បាស់នូវភាពជាម្ចាស់កម្មសិទ្ធិរបស់កម្ពុជាលើបដិមា ទុរយោធន៍។
យើងក៏មិនត្រូវភ្លេចឡើយថា ការប្តេជ្ញាចិត្តនិងសមត្ថភាពជំនាញរបស់អង្គការយូណេស្កូគឺជាជំនួយដ៏ចាំបាច់ មិនមែនត្រឹមតែនៅក្នុងរឿងក្ដីនេះមួយប៉ុណ្ណោះទេ ប៉ុន្តែថែមទាំងសម្រាប់ការអភិរក្សវប្បធម៌ផ្សេងៗទៀតរបស់កម្ពុជាផងដែរ។
ខ្ញុំក៏សូមថ្លែងអំណរគុណយ៉ាងជ្រាលជ្រៅផងដែរដល់រដ្ឋាភិបាលសហរដ្ឋអាមេរិក ជាពិសេសស្ថានទូតសហរដ្ឋអាមេរិកប្រចាំនៅភ្នំពេញ ចំពោះការគាំទ្រនៅក្នុងការប្រយុទ្ធប្រឆាំងនឹងការជួញដូរខុសច្បាប់ និងឆន្ទៈដ៏មុះមុតក្នុងការលើកកម្ពស់មិត្តភាព និងសហប្រតិបត្តិការរវាងប្រជាជាតិយើងទាំងពីរ។ ខ្ញុំក៏សូមសម្តែងនូវការអបអរសាទរផងដែរចំពោះអ្នកទាំងឡាយ ដូចជា ក្រុមការងារនៃក្រសួងសន្តិសុខជាតិសហរដ្ឋអាមេរិកនៅក្នុងដំណើរការសើបអង្កេតរបស់ខ្លួន និងការិយាល័យរដ្ឋអាជ្ញាសហរដ្ឋអាមេរិកប្រចាំតំបន់ Southern District of New York ដែលដឹកនាំដោយលោកស្រី Sharon Levine នៅក្នុងដំណើរការជម្រះក្ដីនៅតុលាការ ដែលបានធានាយ៉ាងម៉ឺងម៉ាត់នូវការអនុវត្តច្បាប់ស្ដីពីការជួញដូរសម្បត្តិវប្បធម៌ដោយខុសច្បាប់។ មនសិការវិជ្ជាជីវៈរបស់ពួកគេគឺជាគំរូដ៏ល្អដែលស័ក្តិសមនឹងទទួលបានកោតសរសើរ។
ជាការពិត ការបញ្ជូនត្រឡប់មកវិញនូវបដិមាទាំងប្រាំរូបនេះ នឹងមិនអាចសម្រេចបានឡើយ ប្រសិនបើគ្មានកិច្ចខិតខំប្រឹងប្រែង ដោយមិនខ្លាចនឿយហត់របស់ក្រុមការងារកម្ពុជាយើងនោះទេ។ ខ្ញុំសូមថ្លែងអំណរគុណជាពិសេសចំពោះឯកឧត្តម ច័ន្ទ តានី ពីទីស្ដីការគណៈរដ្ឋមន្ត្រី ឯកឧត្តម ហាប់ ទូច ពីក្រសួងវប្បធម៌និងវិចិត្រសិល្បៈ អាជ្ញាធរអប្សរា ក្រុមអភិរក្សនៃសារមន្ទីរជាតិ និងក្រុមអ្នកច្បាប់ដែលដឹកនាំដោយលោក Bretton Sciaroni ។
បដិមាទាំង៥នេះ នឹងត្រូវចូលរួមដោយបដិមាទី៦មួយទៀតមកពីក្នុងឈុតឆាកតែមួយនេះ ដែលស្ថិតនៅក្នុងប្រទេសកម្ពុជា។ យើងនឹងបន្តយុទ្ធនាការទាមទារយកត្រឡប់មកវិញនូវបដិមាចំនួន៣ទៀតដែលនៅបាត់នៅឡើយ ដើម្បីបង្គ្រប់ឈុតឆាកនេះឡើងវិញ។
ខ្ញុំក៏សូមសម្តែងនូវការវាយតម្លៃខ្ពស់ផងដែរ ចំពោះប្រព័ន្ធផ្សព្វផ្សាយព័ត៌មានជាតិនិងអន្តរជាតិទាំងអស់ ដែលបានចូលរួមចំណែកក្នុងការលើកកម្ពស់ការយល់ដឹងអំពីភាពធ្ងន់ធ្ងរនៃបញ្ហាលួចវត្ថុបុរាណនៅលើពិភពលោកនាសម័យទំនើបយើងនេះ។
ខ្ញុំជឿជាក់ថា មិនមែនគ្រាន់តែប្រទេសកម្ពុជាប៉ុណ្ណោះទេ ប៉ុន្តែគឺពិភពលោកទាំងមូល ដែលនឹងមានសេចក្តីរីករាយ ចង់ឃើញនូវទីបញ្ចប់នៃការបែកខ្ញែកនៃក្រុមបដិមាដ៏មានសារសំខាន់ និងការវិលត្រឡប់មកទីឋានកំណើតរបស់បដិមាទាំងនេះ។
ជាទីបញ្ចប់ រាជរដ្ឋាភិបាលកម្ពុជាសូមអំពាវនាវដល់សារមន្ទីរដទៃទៀត និងអ្នករក្សាទុកវត្ថុបុរាណនៅទូទាំងពិភពលោកទាំងអស់ សូមធ្វើតាមគំរូនេះ ដោយប្រគល់វត្ថុបុរាណដែលត្រូវបានលួចទៅឱ្យម្ចាស់ដើមពិតប្រាកដវិញ ជាផ្នែកមួយនៃយុទ្ធនាការសកលដើម្បីការពារសម្បត្តិបេតិកភណ្ឌវប្បធម៌។
ឯកឧត្តម លោកជំទាវ អស់លោក លោកស្រី
ខ្ញុំសូមអរគុណជាអនេកចំពោះ ឯកឧត្តម លោកជំទាវ អស់លោក លោកស្រី ដែលបានចូលរួមសប្បាយរីករាយជាមួយយើងខ្ញុំ និងដែលបានអញ្ជើញមកចូលរួមនៅក្នុងការប្រារព្ធពិធីនេះ។
ជាទីបញ្ចប់ ខ្ញុំសូមជូនពរ ឯកឧត្តម លោកជំទាវ អស់លោក លោកស្រី ភ្ញៀវកិត្តិយស ជាតិនិងអន្តរជាតិ សូមមានសុខភាពល្អ ជោគជ័យក្នុងការងារ និងសុភមង្គលក្នុងគ្រួសារ។
សូមអរគុណ!
No comments:
Post a Comment