-សូមគោរព ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្ត្រីទទួលបន្ទុក ទីស្តីការគណៈរដ្ឋមន្ត្រី និង លោកជំទាវ ជាទីគោរពដ៏ខ្ពង់ខ្ពស់
-លោកសាស្ត្រាចារ្យ Ian Lilley អគ្គលេខាធិការសមាគមបុរេប្រវត្តិឥណ្ឌូប៉ាស៊ីហ្វិក ជាទីគោរពរាប់អាន
-លោក ផុន កសិកា ប្រធានសន្និសីទអន្តរជាតិលើកទី២០ នៃសមាគមបុរេប្រវត្តិឥណ្ឌូ ប៉ាស៊ីហ្វិក និង ប្រធានផ្នែកបុរាណវត្ថុវិទ្យា នៃរាជបណ្ឌិត្យសភាកម្ពុជា
-ឯកឧត្តមបណ្ឌិតសភាចារ្យ ឯកឧត្តមបណ្ឌិត ឯកឧត្តម លោកជំទាវជាភ្ញៀវកិត្តិយស ជាតិ និងអន្តរជាតិទាំងអស់ ជាទីគោរពរាប់អាន
-ឯកឧត្ដម លោកជំទាវ លោកសាស្រ្តាចារ្យ លោក លោកស្រី ជាវាគ្មិនជាតិ និង អន្តរជាតិ ទាំងអស់ជាទីរាប់អាន
-អង្គសន្និសីទទាំងមូលជាទីមេត្រី!
ថ្ងៃនេះ ជាព្រឹត្តិការណ៍ប្រវត្តិសាស្រ្ត ដែលព្រះរាជាណាចក្រកម្ពុជា បានទទួលជាម្ចាស់ផ្ទះក្នុងការរៀបចំសន្និសីទអន្តរជាតិ លើកទី២០នៃសមាគមបុរេប្រវត្តិឥណ្ឌូប៉ាស៊ីហ្វិកនៅលើទឹកដីអង្គរអតីតរាជធានី នៃមហានគរខ្មែរដ៏រុងរឿង។
ក្នុងនាមរាជបណ្ឌិត្យសភាកម្ពុជា ជួសមុខឲ្យគណៈកម្មការរៀបចំសន្និសីទអន្តរជាតិនាពេលនេះ និងក្នុងនាមខ្លួនខ្ញុំផ្ទាល់ ខ្ញុំសូមសម្តែងគារវកិច្ចស្វាគមន៍យ៉ាងកក់ក្តៅជាទីបំផុត ចំពោះវត្តមានដ៏ឧត្តុង្គឧត្តមរបស់ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និង លោកជំទាវ ដែលបានផ្តល់កិត្តិយសដ៏ខ្ពង់ខ្ពស់ អញ្ជើញជាអធិបតីក្នុងពិធីបើក សន្និសីទអន្តរជាតិលើកទី២០នៃសមាគមបុរេប្រវត្តិឥណ្ឌូប៉ាស៊ីហ្វិក នាពេលនេះ ដែលញ៉ាំងឲ្យពិធី នេះ កាន់តែមានតម្លៃជាប្រវត្តិសាស្ត្រថែមទៀតសម្រាប់ រាជបណ្ឌិត្យសភាកម្ពុជាយើងខ្ញុំ។
ឆ្លៀតឱកាសនេះ ខ្ញុំសូមសម្តែងអំណរគុណយ៉ាងស្មោះស្ម័គ្រ ចំពោះគណៈកម្មាធិការសមាគមបុរេប្រវត្តិឥណ្ឌូប៉ាស៊ីហ្វិក ដែលបានជ្រើសរើសយកព្រះរាជាណាចក្រកម្ពុជា សម្រាប់ការរៀបចំសន្និសីទ លើកទី២០ របស់ខ្លួន នាពេលនេះ។
ខ្ញុំសូមថ្លែងអំណរគុណ ចំពោះវត្តមានឯកឧត្តមគណៈអធិបតី ឯកឧត្តមបណ្ឌិតសភាចារ្យ ឯកឧត្តមបណ្ឌិត ឯកឧត្តម លោកជំទាវ ជាភ្ញៀវកិត្តិយសជាតិ និងអន្តរជាតិ ឯកឧត្តម លោកជំទាវ លោកសាស្ត្រាចារ្យ លោក លោកស្រី ជាវាគ្មិនជាតិនិងអន្តរជាតិ ដែលបានអញ្ជើញមកចូលរួមក្នុងសន្និសីទអន្តរជាតិដ៏មានសារៈសំខាន់នាពេលនេះ។
ទន្ទឹមនឹងនេះ យើងខ្ញុំក៏សូមថ្លែងអំណរគុណចំពោះរាជរដ្ឋាភិបាលកម្ពុជា ដែលបានអនុញ្ញាតឱ្យរាជបណ្ឌិត្យសភាកម្ពុជា ធ្វើជាម្ចាស់ផ្ទះរៀបចំសន្និសីទអន្តរជាតិលើកទី២០នៃសមាគមបុរេប្រវត្តិឥណ្ឌូប៉ាស៊ីហ្វិក ដ៏ធំនេះឡើង។
- ឯកឧត្តមគណៈអធិបតីជាទីគោរព!
- ឯកឧត្តម លោកជំទាវ លោក លោកស្រី នៃអង្គពិធីទាំងមូលជាទីមេត្រី!
ក្នុងរយៈពេលជាងដប់ឆ្នាំនៃការបង្កើតរាជបណ្ឌិត្យសភាកម្ពុជា ដែលមានឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីមន្ត្រីទទួលបន្ទុកទីស្តីការគណៈរដ្ឋមន្ត្រី ជារដ្ឋមន្ត្រីអាណាព្យាបាលផងនោះ បានបង្កលក្ខណៈឱ្យរាជបណ្ឌិត្យសភាកម្ពុជា មានសមត្ថភាព និងលទ្ធភាពក្នុងការរៀបចំសន្និសីទអន្តរជាតិជាច្រើនលើកនិងច្រើនវិស័យ ដែលមានការចូលរួមពីអ្នកស្រាវជ្រាវមកពីប្រទេសនានាក្នុងតំបន់និងសាកលលោក។ ជាពិសេសនៅពេលនេះ ការរៀបចំសន្និសីទអន្តរជាតិដ៏ធំលើវិស័យបុរាណវត្ថុវិទ្យាដែលពុំធ្លាប់មានកន្លងមក ជាព្រឹត្តិការណ៍ប្រវត្តិសាស្ត្រថ្មីមួយទៀតរបស់រាជបណ្ឌិត្យសភាកម្ពុជា ដែលមានវាគ្មិនអន្តរជាតិរហូតដល់៧២៩នាក់ មកពីបណ្តាប្រទេសចំនួន៤០ បានមកចូលរួម ដែលជាអ្នកវិទ្យាសាស្ត្រ ជំនាញខាងបុរាណ វត្ថុវិទ្យា និងបានធ្វើការស្រាវជ្រាវនៅតំបន់ឥណ្ឌូប៉ាស៊ីហ្វិកនិងតំបន់អាស៊ីអាគ្នេយ៍យើងនេះ។ ជាមួយនេះផងដែរ យើងមានវាគ្មិនជាអ្នក ស្រាវជ្រាវជាតិ ចំនួន៣២នាក់ មកពីក្រសួងនិងស្ថាប័នជាតិ ដូចជា ក្រសួងវប្បធម៌និងវិចិត្រសិល្បៈ រាជបណ្ឌិត្យសភាកម្ពុជា អាជ្ញាធរអប្សរា អាជ្ញាធរជាតិព្រះវិហារ សាកលវិទ្យាល័យភូមិន្ទវិចិត្រសិល្បៈ សារមន្ទីរជាតិភ្នំពេញ សាលាបារាំងចុងបូព៌ា និងអង្គការគាំពារបេតិកភណ្ឌ ជាដើម ក៏បានចូលរួមនៅក្នុងសន្និសីទអន្តរជាតិនេះផងដែរ។
សន្និសីទអន្ដរជាតិលើកទី២០ នៃសមាគមបុរេប្រវត្តិឥណ្ឌូប៉ាស៊ីហ្វិក នេះជាវេទិកា វិទ្យាសាស្រ្តអន្តរជាតិដ៏ធំសម្រាប់វិស័យបុរាណវត្ថុវិទ្យា ដែលនឹងផ្តល់ឱកាសដល់អ្នកស្រាវជ្រាវផ្នែកបុរាណវត្ថុវិទ្យាទាំងជាតិ និងអន្ដរជាតិ មកជួបជុំចែករំលែកបទពិសោធន៍ និងផ្តោះប្តូរពិភាក្សា ការស្រាវជ្រាវរកឃើញថ្មីៗ នូវលទ្ធផលពីតំបន់ឥណ្ឌូប៉ាស៊ីហ្វិកនិងតំបន់អាស៊ីអាគ្នេយ៍ដល់គ្នាទៅវិញទៅមក ។
ក្នុងឆ្នាំ២០០៩ សន្និសីទអន្តរជាតិសមាគមបុរេប្រវត្តិឥណ្ឌូប៉ាស៊ីហ្វិក លើកទី១៩ បានប្រារព្ធធ្វើនៅទីក្រុងហាណូយ ប្រទេសវៀតណាម ដែលមានវាគ្មិនជាសមាជិកមកចូលរួមប្រមាណ៦០០នាក់។ហើយក្រោយការបញ្ចប់សន្និសីទអន្តរជាតិលើកទី១៩នោះ គណៈកម្មាធិការសមាគមបុរេប្រវត្តិឥណ្ឌូប៉ាស៊ីហ្វិក បានគិតគូរជ្រើសរើសប្រទេសដែលនឹងត្រូវធ្វើជាម្ចាស់ផ្ទះរៀបចំសន្និសីទអន្តរជាតិ លើកទី២០នាឆ្នាំ២០១៤ របស់ខ្លួន។ នៅខែកញ្ញា ឆ្នាំ២០១១ គណៈកម្មាធិការសមាគមបុរេប្រវត្តិឥណ្ឌូប៉ាស៊ីហ្វិកបានបោះឆ្នោតសម្រេចជ្រើសរើសប្រទេសកម្ពុជាធ្វើជាម្ចាស់ផ្ទះ សម្រាប់រៀបចំសន្និសីទអន្តរជាតិលើកទី២០នាឆ្នាំ២០១៤ នេះឡើង ដោយជ្រើសរើសលោក ផុន កសិកា ប្រធានផ្នែកបុរាណវត្ថុវិទ្យានៃវិទ្យាស្ថានវប្បធម៌និងវិចិត្រសិល្បៈ ធ្វើជាប្រធានសន្និសីទរបស់សមាគមបុរេប្រវត្តិឥណ្ឌូប៉ាស៊ីហ្វិកលើកទី២០ ប្រចាំនៅប្រទេសកម្ពុជា។
ការជ្រើសរើសរៀបចំសន្និសីទអន្តរជាតិនៅកម្ពុជា ជាការផ្តល់នូវកិត្យានុភាពថ្មីមួយបន្ថែមទៀត ដល់ព្រះរាជាណាចក្រកម្ពុជាលើឆាកអន្តរជាតិ ដោយហេតុថា ប្រទេសកម្ពុជាស្ថិតនៅក្នុងតំបន់អាស៊ីអាគ្នេយ៍ដីគោក ហើយជាប្រទេសដែលមានអារ្យធម៌ដ៏ល្បីល្បាញនាសម័យបុរាណ ដែលបានបន្សល់នូវ មរតកវប្បធម៌រូបី តាមស្ថានីយបុរាណ រមណីយដ្ឋានប្រវត្តិសាស្ត្រ និងបុរាណវត្ថុសិល្បៈគ្រប់ប្រភេទ ជាច្រើននៅពាសពេញប្រទេស ពិសេសនៅតំបន់អង្គរ នៃខេត្តសៀមរាបនេះតែម្តង។
គណៈអធិបតី និងអង្គសន្និសីទទាំងមូល ជាទីគោរព និងជាទីមេត្រី !
ចាប់តាំងពីចុងឆ្នាំ២០១១ មក វិទ្យាស្ថានវប្បធម៌និងវិចិត្រសិល្បៈនៃរាជបណ្ឌិត្យសភាកម្ពុជា បានត្រៀមរៀបចំដំណើរការនេះយ៉ាងសកម្ម ដោយសហការនិងទំនាក់ទំនងជាប្រចាំជាមួយលេខាធិការដ្ឋានសមាគមបុរេប្រវត្តិឥណ្ឌូប៉ាស៊ីហ្វិក ប្រចាំនៅសហរដ្ឋអាមេរិក។ ជាលទ្ធផលសន្និសីទអន្តរជាតិសមាគមបុរេប្រវត្តិឥណ្ឌូប៉ាស៊ីហ្វិកលើកទី២០នេះ បានសម្រេចតាមការគ្រោងទុក ក្រោមប្រធាន បទចម្បងចំនួន ៦៣ និងប្រធានបទរងចំនួន៥៨០ ដោយចែកជាវគ្គ(session) ចំនួន១៤០។
ក្នុងដំណើរការអង្គសន្និសីទដែលត្រូវប្រព្រឹត្តទៅរយៈពេល៧ថ្ងៃនេះ នៅថ្ងៃទី១២ ខែមករា នេះ ជាកម្មវិធីប្រារព្ធពិធីបើកសន្និសីទក្រោមអធិបតីភាពរបស់ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី ហើយបន្តសន្និសីទពេញអង្គដោយវាគ្មិនកម្ពុជា។ ចាប់ពីថ្ងៃទី១៣ ខែមករានិងថ្ងៃបន្តបន្ទាប់ សន្និសីទពេញអង្គនឹងប្រព្រឹត្តទៅនៅបន្ទប់សន្និសីទប្រាំពីរ(៧)ផ្សេងគ្នាក្នុងពេលតែមួយដោយវាគ្មិនអន្តរជាតិ។ ក្នុងរយៈពេលនៃដំណើរការរៀបចំសន្និសីទអន្តរជាតិនេះ នឹងមានដំណើរទស្សនកិច្ចរយៈពេលមួយថ្ងៃគឺថ្ងៃទី១៥ ខែមករា នេះនៅតំបន់អង្គរ។
ឆ្លៀតឱកាសដ៏វិសេសវិសាលនេះ ក្នុងនាមរាជបណ្ឌិត្យសភាកម្ពុជា នាងខ្ញុំសូមគោរពថ្លែងអំណរគុណយ៉ាងជ្រាលជ្រៅចំពោះ សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានឧបត្ថម្ភគាំទ្រឱ្យមានការរៀបចំសន្និសីទអន្ដរជាតិសមាគមបុរេប្រត្តិឥណ្ឌូប៉ាស៊ីហ្វិក លើកទី២០នេះឡើង។
យើងខ្ញុំក៏សូមគោរពថ្លែងអំណរគុណយ៉ាងជ្រាលជ្រៅផងដែរ ចំពោះឯកឧត្តមបណ្ឌិតសភាចារ្យសុខ អាន ឧបនាយករដ្ឋមន្ដ្រី រដ្ឋមន្រ្ដីទទួលបន្ទុកទីស្ដីការគណៈរដ្ឋមន្រ្ដី និង លោកជំទាវ ដែលជានិច្ចកាលតែងតែគាំទ្រនិងលើកទឹកចិត្តដល់រាល់គ្រប់សកម្មភាពសិក្សាស្រាវជ្រាវរបស់រាជបណ្ឌិត្យសភាកម្ពុជា ជាពិសេសការរៀបចំសន្និសីទអន្ដរជាតិ ជារៀងរហូតមក។
ជាថ្មីម្តងទៀត ខ្ញុំសូមថ្លែងអំណរគុណ ដោយក្តីមោទនភាពក្រៃលែង ចំពោះគណៈកម្មាធិការសមាគមបុរេប្រត្តិឥណ្ឌូប៉ាស៊ីហ្វិក ដែលបានជ្រើសយកព្រះរាជាណាចក្រកម្ពុជា សម្រាប់ការរៀបចំសន្និសីទអន្តរជាតិដ៏មានអត្ថន័យជាប្រវត្តិសាស្ត្រនៅលើទឹកដី ដែលពោរពេញទៅដោយសម្បត្តិវប្បធម៌សម្បូណ៌បែប ជាពិសេសក្នុងទឹកដីតំបន់អង្គរ នៃខេត្តសៀមរាបនេះ។
ជាមួយនេះផងដែរ ខ្ញុំសូមកោតសរសើរដល់ថ្នាក់ដឹកនាំ និងមន្ត្រីទាំងអស់នៃវិទ្យាស្ថានវប្បធម៌ និងវិចិត្រសិល្បៈ ព្រមទាំងគណៈកម្មការរៀបចំពិធីទាំងអស់ ដែលបានខិតខំយកអស់ពីកម្លាំងកាយ និងចិត្ត រៀបចំព្រឹត្តិការណ៍ដ៏ឱឡារិកនេះតាំងពីឆ្នាំ២០១១ មករហូតបានលេចចេញជារូបរាងនាពេលនេះ។
នាងខ្ញុំ តាងនាមរាជបណ្ឌិត្យសភាកម្ពុជា និងតាងនាមគណៈកម្មការរៀបចំសន្និសីទអន្តរជាតិ លើកទី២០នៃសមាគមបុរេប្រវត្តិឥណ្ឌូប៉ាស៊ីហ្វិក នាពេលនេះ សូមគោរពថ្លែងអរគុណយ៉ាងជ្រាល ជ្រៅចំពោះវត្តមានរបស់គណៈអធិបតី ឯកឧត្តម លោកជំទាវ ភ្ញៀវកិត្តិយសជាតិនិងអន្តរជាតិ វាគ្មិន ជាតិនិងអន្តរជាតិ លោក លោកស្រី ដែលបានអញ្ជើញមកចូលរួមក្នុងពិធីបើកនេះ។
ជាទីបញ្ចប់ ខ្ញុំសូមគោរពជូនពរ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ដ្រី រដ្ឋមន្រ្ដីទទួលបន្ទុកទីស្ដីការគណៈរដ្ឋមន្រ្ដី និង លោកជំទាវ ព្រមទាំងអង្គសន្និសីទទាំងមូល សូម ទទួលបាននូវពុទ្ធពរទាំងបួន ប្រការគឺ អាយុ វណ្ណ សុខៈ និង ពលៈ និង សូមបានជោគជ័យក្នុងគ្រប់ ភារកិច្ចការងារ។
សូមអរគុណ!
No comments:
Post a Comment