បទអត្ថាធិប្បាយ
មេបក្សប្រឆាំងមិនចេះទទួលស្គាល់ការពិត!
ប្រទេសកម្ពុជា
បានបោះឆ្នោតជ្រើសតាំងតំណាងរាស្ត្រនីតីកាលទី៥ នៃរដ្ឋសភា
កាលពីថ្ងៃទី២៨ ខែកក្កដា ឆ្នាំ២០១៣ កន្លងទៅ ដែលប្រជាពលរដ្ឋខ្មែរទូទាំងប្រទេសបានសំដែងឆន្ទៈរបស់ខ្លួន
ក្នុងការបោះឆ្នោតឲ្យគណបក្សដែលខ្លួនស្រឡាញ់ ពេញចិត្ត ប្រកបដោយសេរី
និងរក្សាការសម្ងាត់។
ក្នុងនោះមានគណបក្សពីរក្នុងចំណោមគណបក្សនយោបាយចំនួន៨
បានទទួលអាសនៈនៅក្នុងសភា គឺគណបក្សប្រជាជនកម្ពុជា ទទួលបាន៦៨អាសនៈ
រីឯគណបក្សសង្រ្គោះជាតិ ទទួលបាន ត្រឹមតែ៥៥អាសនៈប៉ុណ្ណោះ។
ប៉ុន្តែមេគណបក្សសង្រ្គោះជាតិ មិនបានទទួលស្គាល់ថា ខ្លួនពិតជាចាញ់ឆ្នោតនោះទេ
ថែមទាំងបានចោទប្រកាន់ទាំងបំភ្លៃការពិតថា
គណបក្សប្រជាជនកម្ពុជា និង គ.ជ.ប.
បានលួចបន្លំសន្លឹកឆ្នោត
បានលួចជ័យជម្នះរបស់គេទៅវិញ។
មិនត្រឹមតែប៉ុណ្ណោះ សម រង្ស៊ី និង កឹម សុខា ព្រមទាំងថ្នាក់ដឹកនាំរបស់គណបក្សប្រឆាំង
បានដើរទៅប្រកាសប្រាប់ប្រជាពលរដ្ឋ នៅតាមភូមិ ឃុំ គ្រប់ខេត្ត ក្រុងដោយឥតអៀនខ្មាសថា គណបក្សខ្លួនជាអ្នកឈ្នះឆ្នោត ប៉ុន្តែគ.ជ.ប.បានលួចសន្លឹកឆ្នោត
ដែលជាឆន្ទៈរបស់ប្រជាពលរដ្ឋ បោះឲ្យគណបក្សសង្រ្គោះជាតិទៅវិញ។
មេបក្សប្រឆាំង និងកូនកនបាន និងកំពុងព្យាយាមរកគ្រប់មធ្យោបាយ
គ្រប់ល្បិចកល ធ្វើយ៉ាងណាឲ្យប្រជាពលរដ្ឋយល់សថាជាខ្មៅ ជឿទៅតាមពាក្យភូតភរ
កុហក បំភាន់មតិជាតិ និងអន្តរជាតិ ដោយគ្មានមូលដ្ឋានច្បាស់លាស់។
តើទង្វើអស់ទាំងនេះ វាសមជាអ្នកដឹកនាំ
ដែលពោរពេញទៅដោយចំណេះដឹងដែរ ឬទេ? បើចេះតែដើរនិយាយាយបំផ្លើសការពិត
ដើរនិយាយឲ្យតែរួចពីមាត់ ហើយប្រើអស់គ្រប់មធ្យោបាយ
ដើម្បីបោកប្រាស់ប្រជាពលរដ្ឋ ឲ្យជឿលើពាក្យប្រឌិតរបស់ខ្លួនបែបនេះនោះ។
បើតាមសៀវភៅសរបស់ គ.ជ.ប.
និងសៀវភៅសរបស់ទីស្តីការគណៈរដ្ឋមន្ត្រី ស្តីពីការបោះឆ្នោត បានឲ្យដឹងថា
ការបោះឆ្នោតប្រព្រឹត្តទៅក្រោមការឃ្លាំមើលរបស់អ្នកសង្កេតការណ៍អន្តរជាតិចំនួន២៩២នាក់
អ្នកសង្កេតការណ៍ជាតិចំនួន៤០១៤២នាក់
រួមទាំងអ្នកសង្កេតការណ៍របស់អង្គការខុមហ្វ្រែល
ដែលមានវត្តមាននៅគ្រប់ការិយាល័យបោះឆ្នោត ។
ចំពោះការរាប់សន្លឹកឆ្នោតនៅតាមការិយាល័យនីមួយៗ
គឺស្ថិតនៅក្រោមការសង្កេតឃ្លាំមើល របស់ភ្នាក់ងារសង្កេតការណ៍ ទាំងអស់
រួមទាំងអ្នកសង្កេតការណ៍របស់គណបក្សខ្លួន និងរបស់អង្គការសង្គមស៊ីវិល
ដែលមាននិន្នាការប្រឆាំងទៀតផង ព្រមទាំងបានចុះហត្ថលេខាទទួលស្គាល់ពីលទ្ធផល
នៃការរាប់សន្លឹកឆ្នោត មុនពេលបិទការិយាល័យបោះឆ្នោតនីមួយៗ ដែលនេះមានន័យថា
ការរាប់សន្លឹកឆ្នោតពិតជាត្រឹមត្រូវ មិនមានភាពមិនប្រក្រតីទេ ។
សួរថា បើគណបក្សប្រឆាំងចោទថា ការបោះឆ្នោតជ្រើសតំណាងរាស្ត្រនីតិកាលទី៥
នៃរដ្ឋសភានេះ មានភាពមិនប្រក្រតីច្រើន មានការលួចបន្លំសន្លឹកឆ្នោត តើនេះមិនមែនមានន័យថា
គណបក្សប្រឆាំងមិនទុកចិត្តលើអ្នកសង្កេតការណ៍ទាំងនោះ
ឬក៏សង្ស័យទៅលើសមត្ថភាពអ្នកសង្កេតការណ៍ទាំងនោះទេឬ ?
គួរបញ្ជាក់ថា នៅថ្ងៃបោះឆ្នោត
មានអ្នកសង្កេតការណ៍អន្តរជាតិ ដូចជាអតីតប្រធានរដ្ឋសភាហ្វីលីពីន
អតីតអនុប្រធានាធិបតេយ្យឥណ្ឌូនេស៊ី អតីតឧបនាយករដ្ឋមន្ត្រីកាណាដា
អតីតឧបនាយករដ្ឋមន្ត្រីកូរ៉េ ប្រធានគណៈកម្មការរៀបចំការបោះឆ្នោតហ្វីលីពីន
។ល។ គេបានវាយតម្លៃស្ថានការណ៍បោះឆ្នោតនៅកម្ពុជាថា
ការបោះឆ្នោតដំណើរការណ៍ដោយសេរី យុត្តិធម៌ ត្រឹមត្រូវ
គ្មានហិង្សា និងប្រព្រឹត្តទៅដោយរលូន ។
ការចោទប្រកាន់ដោយគ្មានមូលដ្ឋានច្បាស់លាស់របស់គណបក្សប្រឆាំង
ជាទង្វើមួយបញ្ជាក់ឲ្យឃើញថា មេបក្សប្រឆាំងមិនបានឲ្យតម្លៃទៅលើអ្នកសង្កេតការណ៍ជាតិ
និងអន្តរជាតិ ជាពិសេសអ្នកសង្កេតការណ៍របស់គណបក្សខ្លួន។ ហើយទង្វើទាំងនេះ
ក៏បានឆ្លុះបញ្ចាំងនូវចរិតមិនចេះទទួលការពិត ខ្លួនឯងចាញ់ប្រាកដហើយ បែរជាឡាំប៉ា
ដើរចោទគេចោទឯងយ៉ាងវក់វី រហូតស្ទើតែជាន់កែងខ្លួនឯងទៅហើយ។
ដូចនេះ មេបក្សប្រឆាំងត្រូវតែចេះទទួលស្គាល់ការពិត
ថាគណបក្សខ្លួនពិតជាមិនអាចមានលទ្ធភាពគ្រប់គ្រាន់
ក្នុងការទទួលបានជ័យជម្នះលើគណបក្សប្រជាជនកម្ពុជាទេ។
អត្ថបទៈ សៀន វិបុត្រ
No comments:
Post a Comment