អ្នកនាំពាក្យក្រសួងព័ត៌មាន៖ ធម្មនុញ្ញវិជ្ជាជីវៈសារព័ត៌មាន កំពុងត្រូវបានអនុវត្តយ៉ាងពេញលេញសម្រាប់ការងារ និងតម្រូវការប្រចាំថ្ងៃរបស់អ្នកសារព័ត៌មាន

AKP ភ្នំពេញ ថ្ងៃទី២៤ ខែកញ្ញា ឆ្នាំ២០២៤–

ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានបញ្ជាក់នៅព្រឹកថ្ងៃទី២៤ ខែកញ្ញា ឆ្នាំ២០២៤នេះថា ធម្មនុញ្ញវិជ្ជាជីវៈសារព័ត៌មាន កំពុងត្រូវបានអនុវត្តយ៉ាងពេញលេញសម្រាប់ការងារ និងតម្រូវការប្រចាំថ្ងៃរបស់អ្នកសារព័ត៌មាន អង្គភាពសារព័ត៌មាន សមាគមសារព័ត៌មាន ហើយបាននិងកំពុងប្រើប្រាស់ធម្មនុញ្ញវិជ្ជាជីវៈសារព័ត៌មានជាមូលដ្ឋានគ្រឹះរួមនៃក្រមសីលធម៌វិជ្ជាជីវៈសម្រាប់គាំទ្រដល់ការប្រកបសកម្មភាពអាជីពរបស់ខ្លួនប្រចាំថ្ងៃ។ 

ឯកឧត្តម បានបន្ថែមថា នេះជាដំណើរឆ្ពោះទៅមុខក្នុងការប្រតិបត្តិធម្មនុញ្ញវិជ្ជាជីវៈសារព័ត៌មាន ក្រោយធម្មនុញ្ញនេះត្រូវបានប្រកាសដាក់ឱ្យអនុវត្តជាផ្លូវការរួច កាលពីថ្ងៃទី០៦ ខែសីហា ឆ្នាំ២០២៤។ កូនសៀវភៅធម្មនុញ្ញវិជ្ជាជីវៈសារព័ត៌មានសរុបចំនួន ១ ២០០ ក្បាលហើយ ត្រូវបានសមាគមសារព័ត៌មាន និងអ្នកសារព័ត៌មាន (ទាំងអាជីព និងមិនមែនអាជីព) យកទៅប្រើប្រាស់ ដោយពួកគេបានដាក់តាមខ្លួនសម្រាប់ការងារប្រចាំថ្ងៃ។ មិនតែប៉ុណ្ណោះ ក្រោយថ្ងៃប្រកាសដាក់ឱ្យអនុវត្តធម្មនុញ្ញវិជ្ជាជីវៈសារព័ត៌មានរួចមក ក្រសួងព័ត៌មានបានទទួលសំណើសុំកូនសៀវភៅធម្មនុញ្ញវិជ្ជាជីវៈសារព័ត៌មានដើម្បីយកទៅប្រើប្រាស់ ពីអ្នកសារព័ត៌មាន អង្គភាពសារព័ត៌មាន និងសមាគមសារព័ត៌មាន ព្រមទាំងសំណើសុំពីអ្នកផលិតមាតិកាផងដែរ ជាបន្តបន្ទាប់។ 

មកទល់ពេលនេះចំនួនកូនសៀវភៅធម្មនុញ្ញដែលបានស្នើសុំ មានចំនួនសរុប ៨ ០០០ ក្បាលហើយ ខណៈក្រសួងព័ត៌មានកំពុងបន្តទទួលបានការស្នើសុំជាបន្តបន្ទាប់ទៀត។ ក្រសួងព័ត៌មាន នឹងរៀបចំការផ្តល់ជូននូវកូនសៀវភៅធម្មនុញ្ញ ដែលត្រូវបានស្នើសុំទាំងនេះ ក្នុងក្របខណ្ឌនៃការចែកជូនដោយឥតគិតថ្លៃ។

កាយវិការរបស់អ្នកសារព័ត៌មាន អង្គភាពសារព័ត៌មាន និងសមាគមសារព័ត៌មាន ក៏ដូចជាអ្នកផលិតមាតិកាទាំងនេះ ជាការបញ្ជាក់ឱ្យឃើញកាន់តែច្បាស់បន្ថែមទៀត អំពីការទទួលយកនូវធម្មនុញ្ញវិជ្ជាជីវៈសារព័ត៌មាន សម្រាប់ការអនុវត្ត ដែលការណ៍នេះបានធ្វើឡើងដោយផ្អែកលើការឯកភាព និងឆន្ទៈរួមរបស់តួអង្គ ព្រមទាំងអ្នកពាក់ព័ន្ធក្នុងវិស័យព័ត៌មាន និងសោតទស្សន៍កម្ពុជា ក្នុងការប្រតិបត្តិធម្មនុញ្ញវិជ្ជាជីវៈសារព័ត៌មាន ដើម្បីគាំទ្រដល់គោលបំណងរួមគ្នាគឺពង្រឹងការគោរពសីលធម៌វិជ្ជាជីវៈ ធានាការលើកកម្ពស់សណ្តាប់ធ្នាប់ និងគុណតម្លៃវិជ្ជាជីវៈសារព័ត៌មាននៅកម្ពុជា។

ចាប់ពីពេលនេះតទៅ កម្ពុជាមានធម្មនុញ្ញវិជ្ជាជីវៈសារព័ត៌មានដែលជាក្រមសីលធម៌កំពូល ហើយកំណត់អំពីនិយាមអប្បបរមានៃក្រមសីលធម៌វិជ្ជាជីវៈសារព័ត៌មាន សម្រាប់អ្នកសារព័ត៌មាន អង្គភាពសារព័ត៌មាន សមាគមសារព័ត៌មាន យកធ្វើជាមូលដ្ឋានដើម្បីលើកកម្ពស់តម្លៃវិជ្ជាជីវៈ ព្រមទាំងពង្រឹងគុណភាពការងារប្រកបដោយមនសិការវិជ្ជាជីវៈ ការទទួលខុសត្រូវដោយអនុលោមតាមសិទ្ធិនិងករណីកិច្ចក្នុងក្របខណ្ឌច្បាប់ជាធរមាន ដើម្បីធានាជំនឿទុកចិត្តរបស់សង្គមមកលើសារព័ត៌មាននៅកម្ពុជា៕

ប្រធានរដ្ឋសភាកម្ពុជា-ចិន ប្តេជ្ញាជំរុញការពង្រឹងកិច្ចសហប្រតិបត្តិការកម្ពុជា-ចិន កាន់តែរឹងមាំ ស៊ីជម្រៅបន្ថែមទៀត ដើម្បីនាំមកនូវផលប្រយោជន៍ដល់ប្រជាពលរដ្ឋកាន់តែច្រើនឡើង

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា និងឯកឧត្តម ចាវ ឡឺជី (Zhao Leji) ប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនចិន បានប្តេជ្ញារួមគ្នា បន្តពង្រឹងពង្រីកកិច្ចសហប្រតិបត្តិការសភានៃប្រទេសទំាងពីរឱ្យកាន់តែរឹងមាំ ស៊ីជម្រៅនិងគ្រប់ជ្រុងជ្រោយឡើងថែមទៀត ទាំងក្នុងក្របខណ្ឌទ្វេភាគី និងពហុភាគី ដោយយកប្រជាជនជាស្នូល សំដៅធ្វើយ៉ាងណាគាំទ្រ និងជំរុញកិច្ចព្រមព្រៀងដែលរដ្ឋាភិបាលប្រទេសទំាងពីរបានដាក់ចេញ ឱ្យសម្រេចជាលទ្ធផលជាក់ស្តែង។ 

ការប្តេជ្ញាចិត្តរបស់ថ្នាក់ដឹកនាំរដ្ឋសភាកម្ពុជា-ចិន បានធ្វើឡើងនៅក្នុងជំនួបពិភាក្សាទ្វេភាគីជាមួយគ្នា នៅវិមានសភាតំណាងប្រជាជនចិន នៅរសៀលថ្ងៃទី២៣ ខែកញ្ញា ឆ្នាំ២០២៤នេះ ក្នុងពេលដែលសម្តេចរដ្ឋសភាធិបតី ឃួន សុដារី បានកំពុងដឹកនាំគណៈប្រតិភូជាន់ខ្ពស់រដ្ឋសភាកម្ពុជា បំពេញទស្សនកិច្ចផ្លូវការនៅប្រទេសចិន។ 

នៅក្នុងជំនួបនេះ ថ្នាក់ដឹកនាំរដ្ឋសភាប្រទេសទាំងពីរបានវាយតម្លៃខ្ពស់ចំពោះចំណងមិត្តភាពជាប្រពៃណី មិត្តភាពដែកថែប និងកិច្ចសហប្រតិបត្តិការភាពជាដៃគូយុទ្ធសាស្រ្តគ្រប់ជ្រុងជ្រោយ ដើម្បីសម្រេចបានសហគមន៍ជោគវាសនារួមកម្ពុជា-ចិន ប្រកបដោយគុណភាពខ្ពស់ ស្តង់ដាខ្ពស់ និងកម្រិតខ្ពស់។ 

ឆ្លៀតឱកាសនេះ សម្តេចប្រធានរដ្ឋសភា បានថ្លែងអំណរគុណយ៉ាងជ្រាលជ្រៅ ចំពោះសភាតំណាងប្រជាជនចិនដែលបានទទួលស្វាគមន៍ដល់គណៈប្រតិភូជាន់ខ្ពស់រដ្ឋសភាកម្ពុជាយ៉ាងកក់ក្តៅ និងស្និទ្ធស្នាលជាទីបំផុត ដែលនេះបានបង្ហាញឱ្យឃើញពីចំណងមិត្តភាពជាប្រពៃណី និងកិច្ចសហប្រតិបត្តិការដ៏រឹងមាំដ៏យូរលង់នៃប្រទេសទំាងពីរ។ សម្តេចបានលើកឡើងថាទំនាក់ទំនងកម្ពុជា-ចិន ជាគំរូនៃទំនាក់ទំនងអន្តរជាតិ ដោយឈរលើគោលការណ៍នៃការគោរពគ្នាទៅវិញទៅមក ការឱ្យតម្លៃគ្នា ស្មោះត្រង់ សាមគ្គីភាព ដើម្បីផលប្រយោជន៍រួម។

សម្តេចប្រធានរដ្ឋសភា និងឯកឧត្តម ចាវ ឡឺជី បានអបអរសាទរចំណងមិត្តភាពជាប្រពៃណីនៃប្រទេសទាំងពីរដែលបានពូនជ្រំឡើងដោយ ព្រះករុណា ព្រះបាទសម្ដេចព្រះនរោត្តម សីហនុ ព្រះបរមរតនកោដ្ឋ ជាមួយនឹងអតីតប្រមុខដឹកនាំចិនមាន ឯកឧត្តម ម៉ៅ សេទុង និងឯកឧត្តម ជូ អេងឡាយ  ហើយនៅពេលបច្ចុប្បន្នក្រោមការដឹកនាំរបស់ ឯកឧត្តមប្រធានាធិបតី ស៊ី ជិនពីង និងសម្តេចអគ្គមហាសេនាបតីតេជោ ហ៊ុន សែន ទំនាក់ទំនងកម្ពុជា-ចិន បានឈានដល់កម្រិតខ្ពស់ នៃភាពជាដៃគូយុទ្ធសាស្រ្តគ្រប់ជ្រុងជ្រោយ និងបានឈានដល់កម្រិតពិសេសមួយទៀតគឺ «កិច្ចសហប្រតិបត្តិការត្បូងពេជ្រ» នៅក្រោមការដឹកនាំ សម្តេចមហាបវរធិបតី ហ៊ុន ម៉ាណែត ឥស្សរជនបន្តវេនរបស់កម្ពុជា ជានាយករដ្ឋមន្រ្តីនៃនីតិកាលទី៧នៃរដ្ឋសភា ។ 

ឯកឧត្តម ចាវ ឡឺជី បានគូសបញ្ជាក់តាមរយៈការអនុវត្តកិច្ចសហប្រតិបត្តិការ “ច្រករបៀងឧស្សាហកម្ម និងបច្ចេកវិទ្យា” និង“ច្រករបៀងមច្ឆានិងអង្ករ” ប្រទេសចិននឹងបង្កើនការនាំចូលកសិផលពីកម្ពុជា ជំរុញការ វិនិយោគលើវិស័យថាមពល លើកកម្ពស់ការអភិវឌ្ឍវិស័យសុខភាពសាធារណៈ ផ្លូវថ្នល់ជនបទ វិស័យធនធានទឹក វិស័យអប់រំ និងទេសចរណ៍។ 

ឯកឧត្តមបានគូសបញ្ជាក់ថា នៅឆ្នាំនេះកំណើនទេសចរចិនទៅទស្សនានៅកម្ពុជាបានកើនឡើងប្រមាណ៤៥% ហើយសភាតំណាងប្រជាជនចិន នឹងផ្សព្វផ្សាយ ទាក់ទាញអ្នកវិនិយោគ និងទេសចរចិនឱ្យទៅទស្សនា និងបណ្តាក់ទុននៅកម្ពុជាបន្ថែមទៀត។

ទំនាក់ទំនងរវាងរដ្ឋសភាប្រទេសទាំងពីរបានឈានដល់កម្រិតមួយខ្ពស់មិនធ្លាប់មាន ស្របពេលឆ្នាំ២០២៤ ជាឆ្នាំនៃការផ្លាស់ប្តូរប្រជាជន និងប្រជាជននៃប្រទេសទំាងពីរ។ សម្តេចរដ្ឋសភាធិបតី បានគូសបញ្ជាក់ថា “ដើម្បីសម្រេចបានសហគមន៍ជោគវាសនារួម យើងត្រូវមានគុណតម្លៃរួម និងគោលដៅរួម។ គុណតម្លៃរួមសំដៅលើតម្លៃសន្តិភាព វិបុលភាព យុត្តិធម៌ សមភាព និងសុខដុមរមនា។ ជាមួយគ្នានេះ គោលដៅរួមសំដៅលើការបន្ស៊ីគ្នារវាងចក្ខុវិស័យកម្ពុជា ២០៥០ និងគោលដៅសតវត្សរ៍លើកទី២ របស់ចិន ជាពិសេសការជួយគ្នាទៅវិញទៅមក ដើម្បីសម្រេចបាននូវគោលដៅទាំងនេះ“។ 

ដើម្បីពង្រឹងកិច្ចសហប្រតិបត្តិការជាមួយគ្នាឱ្យកាន់តែស៊ីជម្រៅ ស្របតាមសភាពការណ៍ជាក់ស្តែង សំដៅបម្រើផលប្រយោជន៍ដល់ប្រជាជនបានកាន់តែច្រើនបន្ថែមទៀតនោះ រដ្ឋសភានៃប្រទេសទំាងពីរ បានចុះហត្ថលេខារួមគ្នាលើកិច្ចព្រមព្រៀមស្តីពីកិច្ចសហប្រតិបត្តិការសភាប្រទេសទំាងពីរ និងការចុះហត្ថលេខាលើអនុស្សរណៈនៃការយោគយល់គ្នារវាងអគ្គលេខាធិការដ្ឋសភាប្រទេសទំាងពីរផងដែរ ដើម្បីជំនួសឯកសារចាស់ដែលបានចុះហត្ថលេខា តាំងពីឆ្នាំ២០១៦ មកម្ល៉េះ។ 

ថ្នាក់ដឹកនាំរដ្ឋសភាសភាប្រទេសទាំងពីរបានគូសបញ្ជាក់ថា កិច្ចព្រមព្រៀង និងអនុស្សរណៈយោគយល់គ្នា ដែលបានចុះហត្ថលេខានាពេលនេះ ពិតជាបានឆ្លុះបញ្ចាំងពីវឌ្ឍនភាពនៃចំណងការទូតសភាប្រទេសទាំងពីរ និងបានបញ្ជាក់ពីការប្តេជ្ញាចិត្តយ៉ាងមោះមុតរបស់រដ្ឋសភាប្រទេសទាំងពីរ ក្នុងការពង្រឹង  និងពង្រីកការផ្លាស់ប្តូរបទពិសោធន៍ការងារសភា ជាអាទិ៍ការងារនីតិកម្ម និងវិស័យឌីជីថល លើកិច្ចសហប្រតិបត្តិការនៅគ្រប់កម្រិត គ្រប់វិស័យ ដើម្បីនាំផលប្រយោជន៍ជូនប្រទេសទាំងសងខាង ឱ្យបានច្រើនបន្ថែមទៀត៕

ឯកឧត្តម សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ អញ្ជើញថ្លែងសុន្ទរកថាក្នុងកិច្ចប្រជុំកំពូលស្តីពីអនាគត

ឯកឧត្តម សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ តំណាងដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានចូលរួមថ្លែងសុន្ទរកថាក្នុង កិច្ចប្រជុំកំពូលស្តីពីអនាគត នៅថ្ងៃទី២៣ ខែកញ្ញា ឆ្នាំ២០២៤ នៅទីស្នាក់ការអង្គការសហប្រជាជាតិ ទីក្រុងញ៉ូវយក។

 

ឯកឧត្តមឧបនាយករដ្ឋមន្ត្រី បានលើកឡើងនូវចំណុចគន្លឹះចំនួន៥ រួមមាន៖ (១)  ភាពកាន់តែផុយស្រួយនៃសន្តិភាព និងសន្តិសុខអន្តរជាតិ (២) តម្រូវការហិរញ្ញប្បទានសម្រាប់ការអភិវឌ្ឍប្រកបដោយចីរភាព (៣) ដំណោះស្រាយ និងហានិភ័យនៃការរីកចម្រើននៃវិទ្យាសាស្ត្រ បច្ចេកវិទ្យាឌីជីថល និងនវានុវត្តន៍ចំពោះការអភិវឌ្ឍមនុស្សជាតិ (៤) សារៈសំខាន់នៃការចូលរួមរបស់យុវជននៅក្នុងការអភិវឌ្ឍ និង (៥) សារៈសំខាន់នៃការផ្លាស់ប្តូរអភិបាលកិច្ចសកលសម្រាប់សន្តិភាព ស្ថិរភាព និងការសម្រេចបាននូវគោលដៅអភិវឌ្ឍន៍ប្រកបដោយចីរភាព។

 

 His Excellency Mr. SOK Chenda Sophea, Deputy Prime Minister and Minister of Foreign Affairs and International Cooperation  delivered a statement at the Summit of the Future

---

As the High Representative of Samdech Moha BorvorThipadei HUN Manet, Prime Minister of the Kingdom of Cambodia, His Excellency Mr. SOK Chenda Sophea, Deputy Prime Minister and Minister of Foreign Affairs and International Cooperation  delivered a statement at the Summit of the Future on 23 September 2024 at the United Nations Headquarters in New York. 

His Excellency Deputy Prime Minister highlighted 5 key points: (1) the fragile state of international peace and security; (2) the need for financing in sustainable development; (3) the solutions and risks presented by the advancement of science, digital technologies and innovation to human development; (4) the need to engage youth in development; and (5) the importance of transforming global governance in maintaining peace, stability and achieving sustainable development goals.

ឧបនាយករដ្ឋមន្ត្រីប្រចាំការ វង្សី វិស្សុត ដឹកនាំគណៈប្រតិភូទៅចូលរួមពិព័រណ៍ចិន-អាស៊ាន លើកទី២១ នៅប្រទេសចិន

តាមការចាត់តាំងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា, កាលពីព្រឹកថ្ងៃទី២៣ ខែកញ្ញា ឆ្នាំ២០២៤នេះ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានដឹកនាំគណៈប្រតិភូទៅចូលរួមពិព័រណ៍ចិន-អាស៊ាន លើកទី២១ នៅទីក្រុងណាននីង តំបន់ស្វយ័តក្វាងស៊ី ប្រទេសចិន ដោយមានការចូលរួមអមដំណើរដោយលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងមន្រ្តីជាន់ខ្ពស់នៃទីស្តីការគណៈរដ្ឋមន្ត្រី និងក្រសួងពាណិជ្ជកម្ម។ ពិព័រណ៍ចិន-អាស៊ាន លើកទី២១ ឆ្នាំ២០២៤នេះ នឹងប្រព្រឹត្តទៅចាប់ពីថ្ងៃទី២៤-២៨ ខែកញ្ញា ឆ្នាំ២០២៤ ក្រោមប្រធានបទ «លើកកម្ពស់មិត្តភាព, ស្មោះត្រង់រួមគ្នា, អភិវឌ្ឍន៍ និងចែករំលែកផលប្រយោជន៍ ប្រកបដោយបរិយាប័ន្ន ក្នុងក្របខណ្ឌសហប្រតិបត្តិការត្បូងពេជ្រ ដើម្បីអនាគតថ្មី និងជំរុញការអភិវឌ្ឍតំបន់ពាណិជ្ជកម្មសេរី ៣.០ រវាងចិន-អាស៊ាន ដើម្បីកំណើនក្នុងតំបន់»។

តាមកម្មវិធី ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត នឹងឡើងថ្លែងសុន្ទរកថាបើកពិព័រណ៍ចិន-អាស៊ាន លើកទី២១។ ឯកឧត្តមឧបនាយករដ្ឋមន្ត្រីប្រចាំការ ក៏នឹងកាត់ខ្សែបូសម្ពោធស្តង់ពិព័រណ៍កម្ពុជា និងកាត់ខ្សែបូសម្ពោធពន្លាជាតិ កម្ពុជាផងដែរ ដោយមានការចូលរួមពីថ្នាក់ដឹកនាំ និងមន្រ្តីជាន់ខ្ពស់ក្រសួងពាណិជ្ជកម្ម ព្រមទាំងវិនិយោគិន ធុរជន ពាណិជ្ជករ និងអាជីវករជាច្រើននាក់។ ក្នុងឱកាសនោះដែរ ឯកឧត្តមឧបនាយករដ្ឋមន្ត្រីប្រចាំការ ក៏នឹងមានជំនួបពិភាក្សាការងារជាមួយឯកឧត្តម Ding Xuexiang ឧបនាយករដ្ឋមន្ត្រី នៃសាធារណរដ្ឋប្រជាមានិតចិន និងឯកឧត្តម Lan Tianli អភិបាលនៃតំបន់ស្វយ័តក្វាងស៊ីផងដែរ។

ការចូលរួមពិព័រណ៍ចិន-អាស៊ាននេះ ក្នុងគោលបំណងដើម្បីផ្សព្វផ្សាយពីផលិតផលសក្តានុពលរបស់កម្ពុជាស្វែងរកទីផ្សារនាំចេញទំនិញពីកម្ពុជា និងពង្រឹងភាពជាម្ចាស់នៃវិស័យឯកជនឱ្យមានបណ្តាញជាអន្តរជាតិ, ទាក់ទាញវិនិយោគិនឱ្យមកវិនិយោគនៅកម្ពុជា តាមរយៈការរៀបចំវេទិកាធុរកិច្ច និងកិច្ចពិភាក្សាធុរកិច្ច, ពង្រឹងកិច្ចសហប្រតិបត្តិការល្អលើវិស័យសេដ្ឋកិច្ច ពាណិជ្ជកម្ម ការទូតរវាងកម្ពុជា-ចិន និងរវាងកម្ពុជាជាមួយបណ្តាប្រទេសនានាក្នុងតំបន់ ជាពិសេសប្រទេសក្នុងតំបន់អាស៊ាន និងផ្សព្វផ្សាយវប្បធម៌ អរិយធម៌ និងទាក់ទាញភ្ញៀវទេសចរ។ ដូចនេះ ការចូលរួមពិព័រណ៍ពាណិជ្ជកម្មចិន-អាស៊ានលើកទី២១នេះ គឺជាឱកាសដ៏ល្អសម្រាប់កម្ពុជា ក្នុងការចូលរួមវេទិកាពាណិជ្ជកម្មនានា និងរៀបចំវេទិកាជំរុញសកម្មភាពពាណិជ្ជកម្ម និងវិនិយោគរបស់កម្ពុជា។ តាមការគ្រោងទុកកម្ពុជានឹងមានការរៀបចំវេទិកាជំរុញធុរកិច្ច វិនិយោគ និងទេសចរណ៍កម្ពុជា-ចិន និងពិធីចុះកិច្ចសន្យាពាណិជ្ជកម្មរវាងក្រុមហ៊ុនចិន និងក្រុមហ៊ុនកម្ពុជា ក្នុងអំឡុងពេលកម្ពុជាចូលរួមពិព័រណ៌ដ៏មានសារសំខាន់នេះ៕ 

ឯកឧត្តមឧបនាយករដ្ឋមន្ត្រីប្រចាំការ ទទួលជួប ឯកឧត្តមឯកអគ្គរដ្ឋទូតអូស្ត្រាលីប្រចាំនៅព្រះរាជាណាចក្រកម្ពុជា ដើម្បីពិភាក្សាការងារ

នៅព្រឹកថ្ងៃទី២០ ខែកញ្ញា ឆ្នាំ២០២៤ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានទទួលជួប ឯកឧត្តម Derek Yip ឯកអគ្គរដ្ឋទូតអូស្ត្រាលីប្រចាំនៅព្រះរាជាណាចក្រកម្ពុជា ដើម្បីពិភាក្សាការងារ។ 

ជាកិច្ចចាប់ផ្តើម ឯកឧត្តមឧបនាយករដ្ឋមន្ត្រីប្រចាំការបានសម្តែងនូវការអបអរសាទរ និងការស្វាគមន៍ចំពោះ ឯកឧត្តមឯកអគ្គរដ្ឋទូត ដែលបានទទួលការតែងតាំងថ្មី និងបានបង្ហាញនូវស្មារតីសុទិដ្ឋិនិយមចំពោះកិច្ចសហការរវាងប្រទេសទាំងពីរ ដែលកន្លងមកតែងតែមានផ្លែផ្កាទាំងក្នុងក្របខ័ណ្ឌទេ្វភាគី និងក្របខ័ណ្ឌអាស៊ាន និងបានរួមចំណែកយ៉ាងសំខាន់ក្នុងការអភិវឌ្ឍសង្គម សេដ្ឋកិច្ចកម្ពុជា តាមរយៈការផ្តល់ជំនួយអភិវឌ្ឍន៍ផ្លូវការ (ODA) នាពេលកន្លងមក។ ជាមួយគ្នានេះ ឯកឧត្តមឧបនាយករដ្ឋមន្ត្រីប្រចាំការ ក៏បានថ្លែងអំណរគុណដល់ស្ថានទូតអូស្ត្រាលី និងរដ្ឋាភិបាលអូស្ត្រាលី ដែលបានជួយសម្របសម្រួលឱ្យគណៈប្រតិភូនៃទីស្តីការគណៈរដ្ឋមន្ត្រី បានចូលរួមដំណើរទស្សនកិច្ចសិក្សា នៅប្រទេសអូស្ត្រាលីស្តីពី “ការឈ្វេងយល់អំពីប្រតិបត្តិការការងាររបស់ក្រសួងសម្របសម្រួលកិច្ចការរបស់នាយករដ្ឋមន្ត្រី និង គណៈរដ្ឋមន្ត្រីអូស្រ្តាលី ដើម្បីពង្រឹងការអនុវត្តការងាររបស់ទីស្តីការគណៈរដ្ឋមន្ត្រីនៅកម្ពុជា” ក្នុងអំឡុងខែឧសភាកន្លងមកនេះ។

ឯកឧត្តមឯកអគ្គរដ្ឋទូត បានសម្តែងនូវការអបអរសាទរចំពោះសមិទ្ធផលនានារបស់រាជរដ្ឋាភិបាលនីតិកាលទី៧ និងបានរំលឹកអំពីទំនាក់ទំនងការទូតរវាងកម្ពុជា និងអូស្ត្រាលី ដែលមានរយៈកាលប្រមាណ ៧២ឆ្នាំមកហើយ ជាពិសេសបានរំលឹកអំពីការចូលរួមរបស់ប្រទេសអូស្ត្រាលី ក្នុងតួនាទីជាអ្នកថែរក្សាសន្តិភាពក្នុងក្របខណ្ឌអាជ្ញាធរបណ្តោះអាសន្ននៃអង្គការសហប្រជាជាតិប្រចាំកម្ពុជា ដែលហៅកាត់ថា UNTAC។ ក្នុងស្មារតីនេះ ឯកឧត្តមឯកអគ្គរដ្ឋទូត បានបង្ហាញនូវការប្តេជ្ញាចិត្តខ្ពស់ក្នុងការបន្តគាំទ្រដល់ការអភិវឌ្ឍសង្គម-សេដ្ឋកិច្ចប្រទេសកម្ពុជា ដែលត្រូវបានចាត់ទុកជាដៃគូយ៉ាងសំខាន់របស់ប្រទេសអូស្ត្រាលី។ 

នៅក្នុងជំនួបនេះផងដែរ ឯកឧត្តមឧបនាយករដ្ឋមន្ត្រីប្រចាំការ និងឯកឧត្តមឯកអគ្គរដ្ឋទូត បានផ្លាស់ប្តូរមតិយោបល់ទៅវិញទៅមកអំពីស្ថានភាពសេដ្ឋកិច្ច ពាណិជ្ជកម្ម ការវិនិយោគ វិស័យហិរញ្ញវត្ថុ និងធនាគារ វិស័យទេសចរណ៍ និងវិស័យផ្សេងៗទៀតនៃសង្គម-សេដ្ឋកិច្ចកម្ពុជា។ ជាពិសេស ឯកឧត្តមឧបនាយករដ្ឋមន្ត្រីប្រចាំការ និងឯកឧត្តមឯកអគ្គរដ្ឋទូត បានឯកភាពគ្នាចំពោះភាពចាំបាច់ក្នុងការលើកកម្ពស់ពាណិជ្ជកម្ម និងការវិនិយោគរវាងប្រទេសទាំងពីរ។ ក្នុងស្មារតីនេះ ឯកឧត្តមឧបនាយករដ្ឋមន្ត្រីប្រចាំការ បានសង្កត់ធ្ងន់អំពីការប្តេជ្ញាចិត្តរបស់រាជរដ្ឋាភិបាលនីតិកាលទី៧ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលបានដឹកនាំផ្ទាល់ លើការដ្ឋានការងារកែទម្រង់សំខាន់ៗ ដូចជាក្នុងវិស័យទេសចរណ៍ ក៏ដូចជានៅក្នុងការលើកកម្ពស់បរិយាកាសធុរកិច្ច, ការសម្រួលពាណិជ្ជកម្ម តាមរយៈការកាត់បន្ថយកម្រៃដឹកជញ្ជូន ចំណាយនិងបន្ទុកអនុលោមភាពមិនចាំបាច់នានា និងការលើកកម្ពស់សមត្ថភាពកម្លាំងពលកម្ម និងជាពិសេសកំពុងគិតគូរអំពីការរៀបចំក្របខ័ណ្ឌទាក់ទាញវិនិយោគិនពីក្រៅប្រទេស រួមទាំងប្រទេសអូស្ត្រាលីផងដែរ ដើម្បីលើកកម្ពស់ជីវភាពរបស់ប្រជាជន ដែលជាអាទិភាពខ្ពស់បំផុតរបស់រាជរដ្ឋាភិបាល។ 

សម្រាប់កិច្ចសហប្រតិបត្តិការទៅមុខ ឯកឧត្តមឧបនាយករដ្ឋមន្ត្រីប្រចាំការ បានជំរុញឱ្យមានការសហការបន្ថែមលើការតាមដាន ត្រួតពិនិត្យ និងវាយតម្លៃ ការអនុវត្តយុទ្ធសាស្ត្រ និងគោលនយោបាយរបស់រាជរដ្ឋាភិបាល, គម្រោងវាយតម្លៃលើផលប៉ះពាល់នៃលិខិតបទដ្ឋានគតិយុត្ត (Regulatory Impact Assessment) ព្រមទាំងការលើកកម្ពស់ធនធានមនុស្ស សំដៅពង្រឹងអភិបាលកិច្ចក្នុងក្រសួង ស្ថាប័ន ដែលជាកត្តាចាំបាច់សម្រាប់ការអភិវឌ្ឍសង្គម-សេដ្ឋកិច្ចកម្ពុជាទៅថ្ងៃមុខ៕

ឯកឧត្តម គួច ចំរើន អភិបាលខេត្តកណ្តាល ដឹកនាំមន្ត្រី និងពុទ្ធបរិស័ទជិតឆ្ងាយ ប្រារព្វពិធីកាន់បិណ្ឌ នៅវត្តប៉ាកណាម ដែលក្រុមប្រឆាំងចោទប្រកាន់ថា វត្តស្ថិតក្នុងទឹកដីប្រទេសវៀតណាម

កាលពីរសៀលថ្ងៃទី១៩ ខែកញ្ញា ឆ្នាំ២០២៤ ឯកឧត្តម គួច ចំរើន អភិបាលនៃគណៈអភិបាលខេត្តកណ្តាល និងលោកជំទាវ ព្រមទាំងថ្នាក់ដឹកនាំក្រុមប្រឹក្សាខេត្ត មន្ត្រីរាជការ ឯកឧត្តម លោកឧកញ៉ា លោក លោកស្រី សីលវ័ន សិលវតី ប្រជាពុទ្ធបរិស័ទ្ធជាច្រើនកុះករ បានផ្តួចផ្តើមគំនិតនាំយកនូវបច្ច័យ និងទេយ្យវត្ថុនានាយកទៅប្រគេនព្រះសង្ឃ ក្នុងពិធីកាន់បិណ្ឌវេនទី២ ក្នុងទីអារាមវត្ត ប៉ាកណាម ស្ថិតនៅសង្កាត់ព្រែកជ្រៃ ក្រុងសំពៅពូន ។

ឯកឧត្តម គួច ចំរើន និងអ្នកចូលរួម បានអុជទាន ធូប ថ្វាយផ្កាភ្ញី និងការសូត្រធម៌ស្វាធ្យាយ ជយន្តោ សូត្រមន្ត និងការប្រោះព្រំចំរើនព្រះបរិត្ត តាមគន្លងព្រះពុទ្ធសាសនា ដែលមានព្រះសង្ឃនិមន្តចូលរួមប្រមាណជិត៤០អង្គ បានញ៉ាំងឱ្យបរិវេនវត្តប៉ាកណាម មានសភាព អ៊ូអរ អធិកអធ័មជាខ្លាំង។

បន្ទាប់ពីបានប្រគេនបច្ច័យកាន់បិណ្ឌរួចហើយ ឯកឧត្តម គួច ចំរើន ក៏បានផ្តល់នូវកិច្ចសម្ភាសន៍ពិសេសជូនសារព័ត៌មានជាច្រើនស្ថាប័នដែលបានចុះទៅថតផ្តិតផ្ទាល់នៅក្នុងពិធីបុណ្យ ជាមួយនឹងការបញ្ជាក់យ៉ាងច្បាស់លាស់ នូវទីតាំងវត្តប៉ាកណាម ដែលជាវត្តខ្មែរ គឺស្ថិតក្នុងអធិបតេយ្យភាពទឹកដីខ្មែរ និងមានការសាងសង់ព្រះវិហារ និងសាលាធម្មសភា  និងមានទាំងពុទ្ធកសិក្សាជាថ្នាលពង្រឹងនូវព្រះធម៌ ព្រះវិន័យ សម្រាប់ព្រះសង្ឃសិក្សា បដិបត្តិ និងថែមទាំងមានការទំនុកបម្រុងព្រះសង្ឃរៀនសូត្រ ដោយព្រះចៅអធិការវត្ត និងសប្បុរសជនបានដ៏ល្អបំផុត។

វត្តមាននៃការរួបរួមជួបជុំគ្នាធ្វើបុណ្យកាន់បិណ្ឌ ក៏ជាសារមួយដ៏មានសារៈសំខាន់ បញ្ជាក់ជូនសាធារណជនទាំងក្នុងនិងក្រៅប្រទេសថា សូមកុំបន្តចាញ់បោកការបង្ហោះផ្សាយ ភូតកុហក បោកប្រាស់របស់ក្រុមប្រឆាំងមួយចំនួនដែលបានប្រឌិតរឿងថា វត្តប៉ាកណាម ត្រូវបានបាត់បង់ ដោយសារប្រទេសជិតខាងរំលោភទន្ទ្រានកាន់កាប់  តែការពិត វត្តប៉ាកណាម នៅតែជាវត្តរបស់ខ្មែរ និងបង្គោលព្រំដែនដែលនៅចម្ងាយពីវត្តជិត១គីឡូម៉ែត្រ មានបង្គោលព្រំដែនច្បាស់លាស់ ដែលបានបន្សល់ទុកនៅតាំងពីសម័យបារាំងមកម៉្លេះ គឺបង្គោល កម្ពុជា - កូសាំងស៊ីន ដ៏រឹងមាំ គ្មានប្រទេសណាមួយរំលោភលើអធិបតេយ្យប្រទេសណាបានឡើយ៕

ឯកឧត្តម ប៉ែន បូណា បានបញ្ជាក់ច្បាស់ៗថា វត្តប៉ាកណាម មិនត្រូវបានវៀតណាមកាន់កាប់ដូចការចោទប្រកាន់របស់ក្រុមប្រឆាំងជ្រុលនិយមនោះទេ

ឯកឧត្តម ប៉ែន បូណា រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានអង្គភាពអ្នកនាំពាក្យរាជរដ្ឋាភិបាល ក្នុងឱកាសអញ្ជើញចូលរួមពិធីកាន់បិណ្ឌ២ នៅវត្តប៉ាកណាម ដែលស្ថិតនៅសង្កាត់ព្រែកជ្រៃ ក្រុងសំពៅពូន ខេត្តកណ្តាល បានថ្លែងថា វត្តប៉ាកណាម គឺជាវត្តរបស់ប្រទេសកម្ពុជាយើង ហើយមិនមានវៀតណាមណាកាន់កាប់ ដូចការចោទប្រកាន់របស់ក្រុមប្រឆាំងជ្រុលនិយមនោះទេ។

ឯកឧត្តម ប៉ែន បូណា ក៏បានអំពាវនាវដល់ប្រជាពលរដ្ឋទាំងអស់ កុំឱ្យជឿតាមការឃោសនាកុហកបោកប្រាស់របស់ក្រុមប្រឆាំងជ្រុលនិយមមួយក្តាប់តូចនៅក្រៅប្រទេស ដែលនិយាយថា វត្តប៉ាកណាម ត្រូវបានវៀតណាមកាន់កាប់ ដែលជារឿងមិនពិតនោះទេ ពោលគឺតាមការពិតជាក់ស្តែង វត្តប៉ាកណាម មានព្រះសង្ឃខ្មែរគង់នៅ និងមានប្រជាពុទ្ធបរិស័ទខ្មែរយើងអញ្ជើញទៅធ្វើបុណ្យទានយ៉ាងច្រើនកុះករផងដែរ។

ឯកឧត្តម ប៉ែន បូណា ក៏បានបញ្ជាក់ជាថ្មីម្តងទៀតថា វត្តប៉ាកណាម គឺស្ថិតក្នុងទឹកដីខ្មែរ កាន់កាប់ដោយភាគីកម្ពុជាយ៉ាងពេញលេញ ដូច្នេះ សូមក្រុមប្រឆាំងឈប់ធ្វើនយោបាយភូតកុហកតទៅទៀត៕