អ្នកជំនាញអារ្យធម៌ខ្មែរ៖ មកយល់ទស្សនៈវិជ្ជារបស់សម្ដេចធិបតី ហ៊ុន ម៉ាណែត ពោលថាក្នុងកិច្ចការអភិវឌ្ឍសហគមន៍ទាំងអស់គឺ «Leave No One and No Place Behind-មិនត្រូវបោះបង់ចោលអ្នកណាម្នាក់ ឬទីកន្លែងណាមួយ» តើបានអង្រួនរង្គើនិងចាក់ចំបេះដូងប្រមុខ UN យ៉ាងណា?

FN- (ភ្នំពេញ)៖ អ្នកជំនាញអារ្យធម៌ខ្មែរ លោក រ័ត្ន សណ្តាប់ បានថ្លែងថា នៅក្នុងតំបន់អាស៊ីអាគ្នេយ៏យើងនេះ ចំពោះកិច្ចប្រជុំកំពូលអាស៊ានលើកទី៤៣ពិសេស អាស៊ាន-អង្គការសហប្រជាជាតិ ដែលទើបបានបិទបញ្ចប់នាថ្ងៃទី ៧ ខែកញ្ញា ឆ្នាំ ២០២៣ នៅទីក្រុងហ្សាការតា រដ្ឋធានីនៃប្រទេសឥណ្ឌូណេស៊ី ថ្មីៗនេះ គឺ ចំពោះទស្សនៈវិជ្ជារបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានរំលេចពាក្យពេចន៍មួយឃ្លាដ៏សាមញ្ញតែបង្កប់នូវអត្ថន័យយ៉ាងជ្រាលជ្រៅថា ក្នុងកិច្ចការអភិវឌ្ឍសហគមន៍ទាំងអស់គឺ «Leave No One and No Place Behind គឺមិនត្រូវបោះបង់ចោលអ្នកណាម្នាក់ ឬទីកន្លែងណាមួយ» គឺពិតជាបានអង្រួនរង្គើនិងចាក់ចំរបេះដូងប្រមុខUN លោក អាន់តូនីញ៉ូ ហ្គូទែរ៉េស Antonio Guterres អគ្គលេខាធិការអង្គការសហប្រជាជាតិ ដោយផ្ទុះនូវការពេញចិត្តនិងកោតសរសើរ ហើយចង់យកឃ្លាដ៏មានអត្ថន័យយ៉ាងជ្រាលជ្រៅនេះ ធ្វើជាពាក្យស្លោករបស់UN ដើម្បីទុកជាទ្រព្យសម្បត្ដិដល់មេដឹកនាំនានានៅជុំវិញពិភពលោក។

លោក រ័ត្ន សណ្តាប់ យល់ថា ចំពោះប្រមុខ UN មានបំណងចង់យកទស្សន:វិជ្ជារបស់សម្ដេចធិបតី ចារឹកជាពាក្យស្លោករបស់អង្គការសហប្រជាជាតិនេះ គឺពិតជាមោទនភាពសម្រាប់ប្រជាជាតិខ្មែរទាំងក្នុង និងក្រៅប្រទេស ក៏ដូចជាប្រជាជាតិនៅក្នុងតំបន់អាស៊ានទាំងមូល ព្រោះចាប់តាំងពីប្រវត្ដិនៃការកកើតអាស៊ានពីឆ្នាំ១៩៦៧ មក នេះជាលើកទី១ហើយដែលទស្សន:វិជ្ជារបស់មេដឹកនាំអាស៊ាន ត្រូវបានយកទៅចារឹកជាពាក្យស្លោករបស់ពិភពលោក។

បើពោលឲ្យចំ សម្ដេចធិបតី ដែលទើបទ្បើងកាន់អំណាចជានាយករដ្ឋមន្ត្រីនៃកម្ពុជា បាន១៥ថ្ងៃប៉ុណ្ណោះ ក្នងការបំពេញភារកិច្ចជូនជាតិ មាតិភូមិ និងប្រជាជន និងជាលើកទី១ ដែលសម្ដេច បានចេញទៅបំពេញបេសកកម្មជាផ្លូវការនៅក្រៅប្រទេសក្នុងនាមជាមេដឹកនាំនៃកម្ពុជា ហើយទស្សនៈវិជ្ជានយោបាយរបស់សម្ដេចធិបតី ត្រូវបានសាយភាយពេញទ្វីបលោក គួរឲ្យមោទនភាពនិងអស្ចារ្យបំផុត។

ស្ថិតក្នុងន័យនេះចំពោះទស្សនៈវិជ្ជារបស់សម្ដេចធិបតី ថ្លែងនៅក្នុងកិច្ចប្រជុំអាស៊ានលើកនេះ គឺជាការឆ្លុះបញ្ចាំងអំពីរឿងរ៉ាវប្រវត្តិរបស់សម្ដេចផ្ទាល់ ក៏ដូចជាប្រវត្តិសាស្ត្ររបស់ប្រជាជនកម្ពុជា ដែលបានឆ្លងកាត់នូវប្រវត្តិដ៏ជូរចត់កាលពីអតីតកាល ដែលសម្ដេចប្រសូត្រមកចំរបបវាលពិឃាត ពុំបានជួបមុខលោកឪពុកជាទីគោរពស្រឡាញ់ គួរឲ្យខ្លោចផ្សារជាទីបំផុត ដូចយើងឃើញនៅក្នុងខ្សែភាពយន្តរឿងភាគ កូនប្រុសក្រោមពន្លឺព្រះចន្ទពេញបូណ៌មីជាភស្ដុតាង។

ចំពោះទស្សនៈវិជ្ជារបស់សម្តេចធិបតីខាងលើនេះ គឺជាគំនិតនិងប្រយោគផុសឡើងពីជីវិតពិតៗរបស់សម្ដេចផ្ទាល់តំណាងឲ្យកុលបុត្ររងគ្រោះ ក្នុងចំណោមមនុស្សដែលត្រូវរងគ្រោះដោយសារសង្គ្រាមនៅកម្ពុជា ក៏ដូចជាតំណាងឲ្យមនុស្សនៅជុំវិញពិភពលោកដែលទទួលរងគ្រោះដោយសារបញ្ហាសង្គ្រាមកើតឡើងផងដែរ។

ដូច្នេះសម្ដេចធិបតី សូមអំពាវនាវឲ្យបណ្ដារដ្ឋសមាជិកទាំងអស់ ត្រូវបន្តកសាងតំបន់នេះឲ្យក្លាយជាទីកន្លែងសន្តិភាព និងវិបុលសុ៕

សម្តេចធិបតី ហ៊ុន ម៉ាណែត ជួបសន្ទនាតាមទូរស័ព្ទជាមួយប្រធានាធិបតីគុយបា សន្យាពង្រីកកិច្ចសហប្រតិបត្តិផ្នែកសេដ្ឋកិច្ចឱ្យរស់រវើក

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក មីហ្គែល ឌីយ៉ាស-ខាណែល ប៊ឺមូដេស (Miguel Diaz-Canel Bermudez) ប្រធានាធិបតីគុយបា បានជួបសន្ទនាគ្នាតាមទូរស័ព្ទ ដើម្បីសម្តែងការគួរសម និងស្វាគមន៍សម្តេចធិបតី ក្លាយជា​នាយក​រដ្ឋមន្ត្រីកម្ពុជា និងជជែកលើការពង្រីកកិច្ចសហប្រតិបត្តិការ និងទំនាក់ទំនង​រវាង​ប្រទេសទាំងពីរឱ្យកាន់តែរស់រវើក។

ជំនួបដែលធ្វើឡើងនាល្ងាចថ្ងៃទី៩ ខែកញ្ញា ឆ្នាំ២០២៣ ប្រធានាធិបតីគុយបា បានសម្តែងការ​អប​អរសាទរជូនចំពោះសម្តេចធិបតី ដែលទទួលបានការគាំទ្រពីប្រជាពលរដ្ឋ និងរដ្ឋសភា​ឱ្យ​ដឹក​នាំរាជរដ្ឋាភិបាលកម្ពុជា និងបានផ្តាំផ្ញើនូវការសួរសុខទុក្ខ និងអបអរសាទរជូនសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដែលទទួល​បានជ័យជម្នះក្នុងការបោះ​ឆ្នោតជ្រើស​តាំង​តំណាងរាស្ត្រ សម្រាប់នីតិកាលទី៧ នៃរដ្ឋសភា កាលពីថ្ងៃទី២៣ ខែកក្កដា ឆ្នាំ២០២៣ កន្លងទៅ។

លោកប្រធានាធិបតី ក៏បានគូសបញ្ជាក់ឡើងវិញអំពីការប្តេជ្ញាចិត្តក្នុងការបន្តកិច្ចសហប្រតិបត្តិ​ការ​ល្អជាមួយកម្ពុជា ដោយផ្អែកលើទំនាក់ទំនងជាប្រវត្តិសាស្ត្រដ៏យូរលង់ និងអំពីការបន្តគាំ​ទ្រ​គ្នា​ទៅវិញទៅមក នៅក្នុងវេទិកាពហុភាគីនានា។ លោកប្រធានាធិបតី ក៏បានរំឭក​នូវអនុស្សាវរីយ៍​ល្អៗ ក្នុងអំឡុងពេលនៃដំណើរទស្សនកិច្ចផ្លូវការរបស់សម្តេចតេជោ ទៅកាន់ប្រទេសគុយបា កាល​ពីខែកញ្ញា ឆ្នាំ២០២២ ដែលត្រូវបានចាត់ទុកជាឆ្នាំដ៏សំខាន់​នៃការលើកកម្ពស់​ទំនាក់​ទំនង​រវាងប្រទេសទាំងពីរ ដូចស្តែងឡើងតាមរយៈការចុះអនុស្សរណៈនៃការយោគយល់គ្នា លើវិស័យ​ជាច្រើន ដូចជាកសិកម្ម, សុខាភិបាល, អប់រំ និងកីឡាជាដើម។

សម្តេចធិបតី ហ៊ុន ម៉ាណែត បាថ្លែងអំណរគុណចំពោះការផ្តួចផ្តើមឱ្យមានជំនួបតាមទូរស័ព្ទ, ការ​អបអរសាទរ និងបានជម្រាបជូនលោកប្រធានាធិបតីផងដែរ នូវការផ្តាំផ្ញើសួរសុខ​ទុក្ខ​ពី​សំណាក់សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ។ បន្ថែមលើ​ទំនាក់​ទំនងប្រវត្តិសាស្ត្រល្អៗ, សម្តេចធិបតី បានថ្លែងអំណរគុណចំពោះជំនួយឧបត្ថម្ភ និងការ​គាំទ្រ​របស់គុយបា ក្នុងអំឡុងពេលកម្ពុជា ជួបប្រទះការលំបាកបំផុត ជាពិសេស​នៅក្រោយថ្ងៃ​រំដោះចេញពីរបបខ្មែរក្រហម ដែលទាំងអស់នេះពិតជាបានឆ្លុះបញ្ចាំងអំពីទំនាក់​ទំនង​ប្រកប​ដោយសាមគ្គីភាព និងមិត្តភាពដ៏រឹងមាំរវាងប្រទេស និងប្រជាជនទាំងពីរ។

ក្នុងជំនួបនេះ សម្តេចធិបតី ហ៊ុន ម៉ាណែត បានអះអាងអំពីស្មារតីនៃការបន្ត និងពង្រឹងកិច្ច​សហ​ប្រត្តិការល្អនៅក្នុងវិស័យដែលមានស្រាប់ ព្រមជាមួយនឹងទិសដៅក្នុងពង្រីកបន្ថែមក្នុង​វិស័យ​សក្តានុពលផ្សេងៗទៀត។ ក្នុងន័យនេះ សម្តេចធិបតី បានគាំទ្រ និងជំរុញឱ្យមានការរៀប​ចំកិច្ច​ពិគ្រោះយោបល់នយោបាយលើកទី៣ រវាងក្រសួងការបរទេសនៃប្រទេសទាំងពីរ នៅក្នុងពេល​ឆាប់ៗខាងមុខ ដើម្បីជំរុញការអនុវត្តអនុស្សរណៈនៃការយោគយល់គ្នា និងកិច្ចព្រមព្រៀងនានា ដែលត្រូវបានចុះហត្ថលេខារួច ឱ្យមានប្រសិទ្ធភាព និងប្រសិទ្ធផលខ្ពស់។

ក្នុងជំនួបសំណេះសំណាលនេះ លោកប្រធានាធិបតីគុយបា បានអញ្ជើញសម្តេចធិបតី ធ្វើទស្សន​​កិច្ចផ្លូវការនៅគុយបា ក្នុងពេលសមស្របណាមួយ។ ជាការឆ្លើយតប​នឹងការអញ្ជើញនេះ សម្តេចធិបតី បានថ្លែងអំណរគុណ និងបានគូសបញ្ជាក់ថា គុយបា ជាប្រទេសដែលសម្តេចធិបតី មានបំណងចង់អញ្ជើញទៅ ហើយសម្តេចធិបតី នឹងកំណ​ត់ពេលវេលាសមស្របណាមួយក្នុងពេលឆាប់ខាងមុខ៕

កិត្យានុភាពនៃរាជរដ្ឋាភិបាលអាណត្តិទី៧ ត្រូវបានលើកស្ទួយយ៉ាងខ្ពស់ត្រដែតនិងឆាប់រហ័សលើឆាកតំបន់និងអន្តរជាតិ

វត្តមាននិងសកម្មភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជានៅឯកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធចន្លោះពីថ្ងៃទី ០៤ ដល់ទី ០៧ ខែកញ្ញា ឆ្នាំ ២០២៣ គឺជាវិញ្ញាសាសាកល្បងដ៏ធំដើម្បីវាស់ស្ទង់កម្រិតសមត្ថភាពដឹកនាំនិងចាត់ចែងរបស់នាយករដ្ឋមន្ត្រីវ័យក្មេងនៃកម្ពុជាក្នុងវិស័យនយោបាយការទូតកម្រិតតំបន់និងអន្តរជាតិ ខណៈដែលរាជរដ្ឋាភិបាលថ្មីទើបតែចាប់កំណើតឡើងត្រឹមតែពីរសប្តាហ៍ប៉ុណ្ណោះ។ 

សំណួរសំខាន់បំផុតនៅមុនកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនៅទីក្រុងហ្សាការតា នោះគឺ តើនាយករដ្ឋមន្ត្រីថ្មីវ័យក្មេងរបស់កម្ពុជា មានសមត្ថភាពអាចប្រឈមក្នុងក្នុងព្រឹត្តិការណ៍ដ៏ធំកម្រិតតំបន់និងកម្រិតអន្តរជាតិនេះបានដែរឬទេ? 

ទីបំផុត វិញ្ញាសាដ៏ធំមួយនេះត្រូវបានប្រមុខដឹកនាំរាជរដ្ឋាភិបាលបន្តវេនឆ្លងកាត់ដោយជោគជ័យហួសពីការរំពឹងទុក។ បេសកកម្មដ៏ធំនិងដំបូងបំផុតលើឆាកតំបន់និងអន្តរជាតិរបស់សម្តេចធិបតីហ៊ុន ម៉ាណែត ក៏បានលើកស្ទួយកិត្យានុភាពរបស់រាជរដ្ឋាភិបាលស្របច្បាប់និងស្របតាមឆន្ទៈរបស់ប្រជាពលរដ្ឋខ្មែរឲ្យល្បីរន្ទឺលើឆាកតំបន់និងអន្តរជាតិ។

ទី១៖ អំពីភាពស្របច្បាប់៖ រាជរដ្ឋាភិបាលអាណត្តិទី៧នៃរដ្ឋសភា កើតឡើងដោយការបោះឆ្នោតតាមបែបប្រជាធិបតេយ្យសេរី ពហុបក្ស ដែលមានគណបក្សចំនួន ១៨ ចូលរួម។ មានពលរដ្ឋខ្មែរដែលមានឈ្មោះក្នុងបញ្ជីអ្នកបោះឆ្នោតជាង ៨៤% បានទៅបោះឆ្នោតកាលពីថ្ងៃទី ២៣ កក្កដា ឆ្នាំ ២០២៣ ក្នុងនោះជាង ៨២% បានបោះឆ្នោតគាំទ្រគណបក្សប្រជាជនកម្ពុជា។ ក្រោយការប្រកាសលទ្ធផល សម្តេចធិបតី ហ៊ុន ម៉ាណែត ត្រូវបានព្រះមហាក្សត្រចាត់តាំងជានាយករដ្ឋមន្ត្រីតាមសំណើររបស់ប្រធានគណបក្សឈ្នះឆ្នោតស្របតាមមាត្រា១១៩(ថ្មី)២ នៃរដ្ឋធម្មនុញ្ញ។ នាយករដ្ឋមន្ត្រីចាត់តាំងក៏បានបង្កើតគណៈរដ្ឋមន្ត្រី ហើយត្រូវបានរដ្ឋសភាបោះឆ្នោតគាំទ្រជាឯកច្ឆ័ន្ទនៅថ្ងៃទី ២២ សីហា ឆ្នាំ ២០២៣។ នៅរសៀលថ្ងៃដដែល សមាជិករាជរដ្ឋាភិបាលទាំងអស់ក៏បានចូលធ្វើសច្ចាប្រណិធានក្នុងព្រះបរមរាជវាំង។ នេះគឺជាដំណើរការនីតិវិធីស្របតាមច្បាប់កម្ពុជាទាំងស្រុងដែលធ្វើឲ្យរាជរដ្ឋាភិបាលអាណត្តិទី៧មានលក្ខណៈស្របច្បាប់យ៉ាងពេញលេញដោយមិនអាចប្រកែកបាន។

ទី២៖ អំពីកិត្យានុភាពនៃរាជរដ្ឋាភិបាលអាណត្តិទី៧៖ ចាប់តាំងពីក្រោយការជ្រើសតាំងសម្តេចធិបតី ហ៊ុន ម៉ាណែត ជានាយករដ្ឋមន្ត្រី សារអបអរសាទរពីសំណាក់ប្រទេសជាមិត្តបានធ្លាក់មកជាបន្តបន្ទាប់ពីគ្រប់ជ្រុងជ្រោយនៃពិភពលោក។ រហូតមកទល់ពេលនេះ មានមេដឹកនាំបរទេសជាង ៥០ ប្រទេសនិងស្ថាប័នរាប់ទាំងប្រទេសមហាអំណាចនិងអគ្គលេខាធិការអង្គការសហកប្រជាជាតិផងបានបន្តផ្ញើសាអបអរសាទរដល់សម្តេចធិបតីនាយករដ្ឋមន្ត្រីកម្ពុជា។ នៅឯកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធនៅហ្សាការតា មេដឹកនាំអាស៊ានក៏ដូចជាមេដឹកនាំប្រទេសធំៗផ្សេងទៀតសុទ្ធតែបានសម្តែងការសាទរនិងស្វាគមន៍សម្តេចធិបតី ហ៊ុន ម៉ាណែត ក្នុងនាមជានាយករដ្ឋមន្ត្រីកម្ពុជា។ ម្យ៉ាងទៀត ការចូលរួមប្រជុំស្មើមុខមាត់គ្នាជាមួយប្រទេសដទៃគឺជាតម្លៃដែលប្រទេសក្នុងតំបន់និងពិភពលោកផ្តល់ជូនកម្ពុជាក្នុងនាមជារាជរដ្ឋាភិបាលស្របច្បាប់និងជារដ្ឋអធិបតេយ្យមួយដោយគ្មានអ្នកណាអាចកាឡៃបានឡើយ។ 

សរុបមកវិញ លើសពីភាពស្របច្បាប់ដែលខ្លួនទទួលបានយ៉ាងពេញលេញស្របតាមឆន្ទៈរបស់ប្រជាពលរដ្ឋនិងនីតិវិធីច្បាប់របស់កម្ពុជា កិត្យានុភាពរបស់រាជរដ្ឋាភិបាលដឹកនាំដោយសម្តេចមហាបវរធិបតី ហ៊ុន ម៉ាណែត ត្រូវបានលើកស្ទួយយ៉ាងខ្ពស់ត្រដែតនិងយ៉ាងឆាប់រហ័សនៅលើឆាកតំបន់និងអន្តរជាតិ ដោយសារសមត្ថភាពក្នុងការចាត់ចែងនិងដឹកនាំដ៏ប៉ិនប្រសប់របស់នាយករដ្ឋមន្ត្រីវ័យក្មេងនៃកម្ពុជា៕ 

សម្តេចមហាបវរធិបតី ហ៊ុន ម៉ាណែត អញ្ជើញចុះជួបសំណេះសំណាលជាមួយកម្មករ និយោជិត នៅស្រុកសំរោងទង ខេត្តកំពង់ស្ពឺ

នៅព្រឹកថ្ងៃសៅរ៍ ៩រោច ខែស្រាពណ៍ ឆ្នាំថោះ បញ្ចស័ក ព.ស. ២៥៦៧  ត្រូវនឹងថ្ងៃទី៩ ខែកញ្ញា ឆ្នាំ២០២៣ នេះ សម្តេចមហាបវរធិបតី នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញចុះជួបសំណេះសំណាលជាមួយកម្មករ និយោជិត តាមរោងចក្រ សហគ្រាស ចំនួន ១៨,២៦៥នាក់ មកពីរោងចក្រសហគ្រាសចំនួន១៤ ដែលមានមូលដ្ឋាននៅក្នុងស្រុកសំរោងទង ខេត្តកំពង់ស្ពឺ។ រោងចក្រ សហគ្រាសទាំង១៤នេះ ជាប្រភេទរោង​ចក្រកាត់ដេរសម្លៀកបំពាក់ ចំនួន ៣, ផលិតផលិតផលធ្វើដំណើរ និងកាបូប ចំនួន ៧, ដេរស្បែកជើង ចំនួន ២ បោះពុម្ពលើសម្លៀកបំពាក់ ចំនួន ១ និងផលិតគ្រឿងអេឡិចត្រូនិច ចំនួន ១។

សម្តេចមហាបវរធិបតី ហ៊ុន ម៉ាណែត បានមានប្រសាសន៍ថា ៖

ជំនួបជាមួយកម្មករ និយោជិត មិនត្រឹមតែ១០កម្មវិធីទេ គឺនឹងជួបជាបន្តបន្ទាប់ទៀត ហើយក៏នឹងជួបជាមួយអ្នកប្រកបរបរក្រៅប្រព័ន្ធផងដែរ នាពេលខាងមុខក្នុងគោលបំណងដើម្បីទទួលបាន​ព័ត៌មានមួយច្បាស់លាស់ពាក់ព័ន្ធការរស់នៅរបស់ប្រជាពលរដ្ឋ។

នៅថ្ងៃនេះ សម្តេចធិបតី ហ៊ុន ម៉ាណែត បានថ្លែងអំណរគុណដល់បងប្អូនប្រជាពលរដ្ឋខ្មែរទាំងអស់ដែលបានបោះឆ្នោតជូនគណបក្សប្រជាជនកម្ពុជា។ ការបោះឆ្នោតនេះ បានបង្ហាញឱ្យឃើញពីការស្រឡាញ់របស់ប្រជាពលរដ្ឋចំពោះសម្តេចតេជោ ហ៊ុនសែន និងថ្នាក់ដឹកនាំរបស់គណបក្សប្រជាជនកម្ពុជា។សម្តេចបន្តថា ក្នុងឋានៈជាអ្នកដឹកនាំប្រទេសដែលកើតចេញពីការគាំទ្ររបស់ប្រជាពលរដ្ឋនោះ សម្តេចនឹងប្រឹងប្រែងបម្រើជាតិ និងប្រជាពលរដ្ឋអោយបានល្អ។ 

ទាក់ទងនឹងកិច្ចប្រជុំអាស៊ាននៅឥណ្ឌូនេស៊ីថ្មីៗនេះ សម្តេចធិបតី បានមានប្រសាន៍ថា សមិទ្ធផលជោគជ័យនៃបេសកកម្មការងាររបស់ម្តេចនៅឥណ្ឌូនេស៊ី គឺជាសមិទ្ធផលសម្រាប់ប្រជាពលរដ្ឋខ្មែរទាំងមូល មិនមែនជាសមិទ្ធផលផ្ទាល់ខ្លួនរបស់សម្តេចតែម្នាក់ឯងនោះទេ។ សម្តេចធិបតី ក៏បានបញ្ជាក់ថា ការទៅប្រជុំនៅឥណ្ឌូនេស៊ី មិនមែនទៅដើម្បីសម្ញែងនោះទេ គឺជាបេសកកម្មដើម្បីផលប្រយោជន៍ជាតិ និងប្រជាជន។ 

សម្តេចធិបតីបានមានប្រសាសន៍ថា រាល់ជំនួបជាមួយមិត្តភក្តិបរទេសនៅឥណ្ឌូនេស៊ី គឺទទួលសម្តេចក្នុងឋានៈនាយករដ្ឋមន្ត្រី ហើយអត់មានមេដឹកនាំបរទេសណាមិនទទួលស្គាល់នោះឡើយ។បេសកកម្មរបស់សម្តេចនៅប្រទេសឥណ្ឌូនេស៊ី ក៏ដើម្បីបង្ហាញជំហររបស់កម្ពុជា លើបញ្ហានានាទាំងក្នុងតំបន់ និងលើពិភពលោកផងដែរ។

នៅថ្ងៃនេះ សម្តេចធិបតី ហ៊ុន ម៉ាណែត បានមានប្រសាសន៍ថា ដំណើរទៅកាន់សហរដ្ឋអាមេរិកនៅចុងខែកញ្ញាខាងមុខនេះ សម្តេចនឹងមានជួបជាមួយមន្ត្រីជាន់ខ្ពស់អាមេរិក អ្នកធ្វើធុរកិច្ចរបស់អាមេរិក ដើម្បីបញ្ជាក់ជំហរនយោបាយលើបញ្ហាអន្តរជាតិ ក៏ដូចជាការបើកកិច្ចសហប្រតិបត្តិការផ្នែកសេដ្ឋកិច្ច វិនិយោគ ពាណិជ្ជកម្ម។ សម្តេចធិបតីក៏បានកោតសរសើរ និងថ្លែងអំណរគុណដល់ប្រមុខការទូតកម្ពុជា ក៏ដូចជាមន្ត្រីក្រសួងការបរទេស និងមន្ត្រីស្ថានទូត ដែលធ្វើការងារបានយ៉ាងល្អប្រសើរ។ ថ្ងៃនេះ សម្តេចធិបតីក៏បានបញ្ជាក់ថា រូបភាពដែលសន្តិសុខឥណ្ឌូនេស៊ី រារាំងមន្ត្រីខ្មែរ គឺជាការយល់ច្រឡំលើពិធីការ។

សម្តេចធិបតីបានមានប្រសាន៍បន្ត ថា ដំណើរទៅកាន់ឥណ្ឌូនេស៊ី សម្តេចទាញបានប្រយោជន៍ផ្នែកសេដ្ឋកិច្ចបានច្រើនណាស់រួមមានការលើកយកនូវអង្ករឱ្យឥណ្ឌូនេស៊ី បាន២៥ម៉ឺនតោនក្នុងមួយឆ្នាំ, ការបើកការហោះហើរជាមួយឥណ្ឌូនេស៊ី ជាមួយហ្វីលីពិននិងការសាងសង់បណ្តាញបញ្ជូនថាមពលទៅសិង្ហបុរីជាដើម។ សម្តេចក៏បានជួប ជជែកជាមួយមេដឹកនាំវ្រទេសចិន ជប៉ុន និងកូរ៉េខាងត្បូងផងដែរ ដើម្បីបើកទីផ្សារពាណិជ្ជកម្ម ក្នុងនោះប្រទេសហ្វីលីពិន ក៏គ្រោងនឹងទិញអង្ករពីកម្ពុជាផងដែរ។សម្តេចធិបតីបានថ្លែងថា ក្នុងជំនួបជាមួយប្រធានាធិបតីកូរ៉េខាងត្បូង សម្តេចបានស្នើឱ្យកូរ៉េបង្កើនកូតាការងារសម្រាប់ពលករកម្ពុជាយើងទៀតផង។

សម្តេចធិបតី ហ៊ុន ម៉ាណែត បានមានប្រសាស៍ទៀតថា ការចូលរួមជាមួយប្រទេសនានាក្នុងការទប់ស្កាត់សង្គ្រាមនោះ គឺវាបានរក្សានូវសន្តិសុខ សន្តិភាព ដែលជាផ្នែកដល់កម្ពុជា ជាក់ស្តែងបើតំបន់ទាំអស់នោះមានសង្គ្រាម គឺកម្ពុជាយើងក៏រងគ្រោះ រងផលប៉ះពាល់ពផងសង្គ្រាមនោះផងដែរ។ 

សម្តេចធិបតី ហ៊ុន ម៉ាណែត បានមានប្រសាសន៍ថា គោលការណ៍របស់បក្សប្រជាជនកម្ពុជា គឺនៅជាមួយពលរដ្ឋពេលមានទុក្ខលំបាក ពេលពលរដ្ឋមានទុក្ខ គឺមានមុខបក្សប្រជាជនកម្ពុជា។

នៅថ្ងៃនេះ សម្តេចធិបតី ហ៊ុន ម៉ាណែត បានប្រកាសសម្រេចអនុញ្ញាតឱ្យរៀបចំធ្វើលិខិតឆ្លងដែនជូនពលករខ្មែរនៅកូរ៉េខាងត្បូងដោយផ្ទាល់តែម្តង។ សម្តេចក៏បានណែនាំអោយឧបនាយករដ្ឋមន្ត្រី កើត រិទ្ធ ឱ្យរៀបចំប្រព័ន្ធអនឡាញ ដើម្បីស្នើសុំលិខិតថ្កោលទោស។ សម្តេចធិបតីក៏ណែនាំផងដែរដល់ក្រសួងការបរទេសបង្កើតកុងស៊ុលកម្ពុជា នៅភាគខាងត្បូងប្រទេសថៃ ដើម្បីផ្តល់សេវានានាជូនពលរដ្ឋខ្មែរ ដែលកំពុងធ្វើការនៅទីនោះ។

ពាក់ព័ន្ធនឹងសន្តិសុខសណ្តាប់ធ្នាប់ សម្តេចធិបតីក៏បានណែនាំឧបនាយករដ្ឋមន្ត្រី នេត សាវឿន ឱ្យដោះស្រាយរឿងកម្រៃក្រៅសេវាពាក់ព័ន្ធការធ្វើលិខិតស្នាម សម្រាប់ការឆ្លងដែនទៅប្រទេសជិតខាង។ នៅថ្ងៃនេះផងដែរ សម្តេចធិបតី ហ៊ុន ម៉ាណែត ក៏បានប្រកាសធ្វើកំណែទម្រង់ការប្រលងចូលក្របខណ្ឌរដ្ឋ ដោយត្រូវឈរលើគោលការណ៍ «អ្នកចេះ គឺជាប់»។

សម្តេចបញ្ជាក់ថា សម្តេចទើបបង្កើតអនុក្រឹត្យមួយពង្រីកវិសាលភាពគ្រប់គ្រង និងប្រយុទ្ធប្រឆាំងគ្រឿងញៀន ដឹកនាំដោយឧបនាយករដ្ឋមន្ត្រីមួយរូប អមដោយឧបនាយករដ្ឋមន្ត្រី៣រូប និងមានការចូលរួមពីរដ្ឋមន្ត្រីពីបណ្តាក្រសួងស្ថាប័ននានា ហើយមានរដ្ឋមន្ត្រីមួយរូបប្រចាំការដឹកនាំអនុវត្តន៍ផងដែរ។ សម្តេចធិបតី ហ៊ុន ម៉ាណែត បានបានមានប្រសាន៍ថា នយោបាយការបរទេសរបស់រាជរដ្ឋាភិបាល​នីតិកាលថ្មី គឺបន្តអនុវត្តន៍ដូចអ្វីដែលបក្សប្រជាជនកម្ពុជាដាក់ចេញ គឺគោលការណ៍ស្មើភាព ឯករាជ្យផ្អែកលើច្បាប់។ 

មុននឹងបញ្ចប់ សម្តេធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក៏បានជូនពរដល់បងប្អូនកម្មករ កម្មការិនីទាំងអស់នាថ្ងៃនេះ ជួបតែសែសក្តីសុខ សេចក្តីសម្រើនគ្រប់ៗគ្នា៕