កិច្ចប្រជុំរដ្ឋមន្ត្រីសេដ្ឋកិច្ចអាស៊ាន និងកិច្ចប្រជុំពាក់ព័ន្ធ គឺជាកិច្ចប្រជុំដ៏មានសារៈសំខាន់សម្រាប់អាស៊ាន និងប្រទេសជាដៃគូរបស់អាស៊ាន ដើម្បីជំរុញកំណើនសេដ្ឋកិច្ច និងឆ្លើយតបនឹងវិបត្តិដែលកំពុងកើតមានលើសាកលលោកនាពេលបច្ចុប្បន្នបណ្តាលមកពីការប្រកួតប្រជែងឥទ្ធិពលនយោបាយ ការរាតត្បាតជំងឺកូវីដ១៩ និងសង្គ្រាមរុស្ស៉ី-អ៊ុយក្រែន។
ក្នុងពិធីបើកកិច្ចប្រជុំនាព្រឹកថ្ងៃនេះដែរ សម្តេចតេជោ ហ៊ុន សែន ក្នុងនាមជាប្រធានអាស៊ាន អញ្ជើញថ្លែងសុន្ទរកថាគន្លឹះ ក៏ដូចជាផ្តល់នូវទស្សនទានមួយចំនួន ដើម្បីជាធាតុចូលសម្រាប់រដ្ឋមន្ត្រីសេដ្ឋកិច្ចអាស៊ាន ក៏ដូចជារដ្ឋមន្ត្រីសេដ្ឋកិច្ចប្រទេសដៃគូ យកទៅជជែកស្វែងរកកាលានុវត្តន៍ភាពសេដ្ឋកិច្ច និងដោះស្រាយវិបត្តិ។
Wednesday, September 14, 2022
ផ្សាយបន្តផ្ទាល់៖ សម្តេចតេជោ ហ៊ុន សែន អញ្ជើញប្រកាសបើកកិច្ចប្រជុំ រដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានអាស៊ាន បានអញ្ជើញជាអធិបតីភាពប្រកាសបើកកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ ដែលរៀបចំឡើងដោយក្រសួងពាណិជ្ជកម្មកម្ពុជា ដែលប្រារព្ធធ្វើឡើងនៅសណ្ឋាគារសុខាខេត្តសៀមរាប ព្រឹកថ្ងៃពុធ ៤រោច ខែភទ្របទ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១៤ ខែកញ្ញា ឆ្នាំ២០២២នេះ។
Tuesday, September 13, 2022
ផ្សាយបន្តផ្ទាល់៖ សម្តេចតេជោ ហ៊ុន សែន អញ្ជើញជួបសំណេះសំណាល ជាមួយប្រជាពលរដ្ឋស្ម័គ្រចិត្តរើសំណង់ចេញពីតំបន់រមណីយដ្ឋានអង្គរ
នៅព្រឹកថ្ងៃអង្គារ ទី១៣ ខែកញ្ញា ឆ្នាំ២០២២ស្អែកនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងអញ្ជើញជួបសំណេះសំណាលជាមួយប្រជាពលរដ្ឋដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា។ កិច្ចសំណេះសំណាលនេះ នឹងធ្វើឡើងនៅភូមិរុនតាឯក ស្ថិតក្នុងស្រុកបន្ទាយស្រី ខេត្តសៀមរាប ដែលជាទីតាំងដែលរាជរដ្ឋាភិបាលផ្តល់ដីជូនពលរដ្ឋជាថ្នូរនឹងការរុះរើសំណង់ចេញពីតំបន់រមណីយដ្ឋានអង្គរ និងតំបន់ស្ថិតក្រោមការគ្រប់គ្រងរបស់អាជ្ញាធរជាតិអប្សរា។
រាជរដ្ឋាភិបាលកម្ពុជា កាលពីខែសីហា កន្លងទៅនេះ តាមរយៈគណៈកម្មការអន្តរក្រសួងមួយដឹកនាំដោយឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបើកយុទ្ធនាការទ្រង់ទ្រាយធំក្នុងការវាស់វែង កំណត់និយាមកាក្បាលដី និងរមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា ក៏ដូចជារុះរើសំណង់ខុសច្បាប់ចេញពីតំបន់ទាំងនេះ។
ការបើកយុទ្ធនាការនេះ បានធ្វើឡើងបន្ទាប់ពីប្រាសាទក្នុងតំបន់រមណីយអង្គរ បានរងការព្រមានពីអង្គការយូណេស្កូ ក្នុងការដកប្រាសាទតំបន់រមណីយដ្ឋានអង្គរចេញពីបញ្ជីសម្បត្តិបេតិកភណ្ឌពិភពលោក ព្រោះតែសំណង់ជាច្រើនត្រូវបានសង់ឡើងនៅតំបន់រមណីយដ្ឋានអង្គរផ្ទុយពីលក្ខខណ្ឌកំណត់ដោយអង្គការយូណេស្កូ ក្រោយពេលដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោកនាថ្ងៃទី១៤ ខែធ្នូឆ្នាំ១៩៩២។ គិតចាប់ពីថ្ងៃទី១៨ ខែសីហា ដល់ថ្ងៃទី១០ ខែកញ្ញា បានបញ្ចប់ការវាស់វែងក្បាលដី និងស្រង់ព័ត៌មានអ្នកកាន់កាប់ដីនៅភូមិគោលដៅទាំង ១១៤ភូមិ ក្នុងឃុំចំនួន១៧ សង្កាត់ចំនួន៧ ក្រុងចំនួន១ និងស្រុកចំនួន៤ ដោយវាស់វែងក្បាលដីបានសរុប ៩៣,៣៥១ក្បាលដី ទំហំ ១០,៩៤៥ហិកតា។ ក្នុងនោះក្បាលដីមានសំណង់ចំនួន ៣៩,០៤០ក្បាលដី, ក្បាលដីគ្មានសំណង់ចំនួន ៤៧,៣៤០ក្បាលដី និងក្បាលដីជាំដីស្រែចម្ការចំនួន ៦,៩៩១ក្បាលដី។
Monday, September 12, 2022
ផ្សាយបន្តផ្ទាល់៖ សម្តេចតេជោ ហ៊ុន សែន អញ្ជើញជាអធិបតីក្នុងពិធីបើកវេទិកាភាពជាអ្នកដឹកនាំ និងភាពជាដៃគូអាស៊ានឆ្នាំ២០២២ (ASEAN LEADERSHIP AND PARTNERSHIP FORUM)
(ភ្នំពេញ)៖ នៅព្រឹកថ្ងៃចន្ទ ទី១២ ខែកញ្ញា ឆ្នាំ២០២២នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានអាស៊ាន បានអញ្ជើញជាអធិបតីក្នុងពិធីបើកវេទិកាភាពជាអ្នកដឹកនាំ និងភាពជាដៃគូអាស៊ានឆ្នាំ២០២២ (ASEAN LEADERSHIP AND PARTNERSHIP FORUM) ដែលពិធីនេះធ្វើឡើងនៅសណ្ឋាគារ ហៃយ៉ាត់ រីជេនស៊ី ភ្នំពេញ។
វេទិកាភាពជាអ្នកដឹកនាំ និងភាពជាដៃគូអាស៊ានឆ្នាំ២០២២ សហការរៀបចំដោយវិទ្យាស្ថានយុទ្ធសាស្ត្រដើម្បីអាស៊ី-ប៉ាស៊ីហ្វិក (KSI) វិទ្យាស្ថានចក្ខុវិស័យអាស៊ី (AVI) ក្រុមប្រឹក្សាធុរកិច្ចអាស៊ាន (ASEAN-BAC) និងសភាពាណិជ្ជកម្មកម្ពុជា។
វេទិកានេះ នឹងប្រារព្ធធ្វើឡើងក្រោមប្រធានបទ «ភាពជាដៃគូស្អិតរមួត និងការឆ្លើយតបរហ័សរបស់អាស៊ាន» ដោយមានការអញ្ជើញចូលរួមពីឥស្សរជន ថ្នាក់ដឹកនាំស្ថាប័នអ្នករៀបចំខាងលើ ស្ថាប័នធុរកិច្ច ក្រុមហ៊ុន វិនិយោគិន ធនាគារ វិទ្យាស្ថានសិក្សាស្រាវជ្រាវ និងតំណាងអង្គទូតនានា។
កម្មវិធីថ្ងៃស្អែកនេះ ក្រៅតែពីការប្រកាសបើកវេទិកាភាពជាអ្នកដឹកនាំ និងភាពជាដៃគូអាស៊ានឆ្នាំ២០២២ហើយនោះ ក៏មានការប្រកាសបើកជាផ្លូវការ «ក្លឹបសេដ្ឋកិច្ចអាស៊ាន» ដែលបង្កើតឡើងដោយវិទ្យាស្ថានយុទ្ធសាស្ត្រដើម្បីអាស៊ី-ប៉ាស៊ីហ្វិក (KSI) ផងដែរ៕
Sunday, September 11, 2022
អតីតបុគ្គលិកក្រុមហ៊ុនណាហ្គាវើលដ៏ដែលបានបញ្ឈប់ពីការងារ ដឹកនាំដោយឈឹម ស៊ីថរ បង្កភាពអានាធិបតេយ្យកាន់តែខ្លាំងឡើងៗ ក្នុងរាជធានីភ្នំពេញ
ក្រុមបាតុករខុសច្បាប់ប្រមាណជាង១០០នាក់ ជាអតីតបុគ្គលិកក្រុមហ៊ុនណាហ្គាវើលដ៏ ដឹកនាំដោយមេសហជីពផុតអាណត្តិ ឈឹម ស៊ីថរ ដែលបានបញ្ឈប់ពីការងារអស់ពេលជាច្រើនខែមកហើយ នៅព្រឹកថ្ងៃអាទិត្យទី១១ ខែកញ្ញា ឆ្នាំ២០២២នេះ ដែលជាថ្ងៃឈប់សម្រាករបស់មន្ត្រីរាជការ បែរជាពួកគេធ្វើការប្រមូលផ្តុំគ្នា និងដើរស្រែកតវ៉ាយ៉ាងអានាធិបតេយ្យនៅតាមសងផ្លូវសាធារណៈក្នុងរាជធានីភ្នំពេញ និងពុំបានស្នើសុំច្បាប់អនុញ្ញាតពីសាលារាជធានីភ្នំពេញទៀតផង។
ប្រជាពលរដ្ឋដែលធ្វើដំណើរនៅតាមដងផ្លូវមួយចំនួន
បានរិះគន់ចំពោះសកម្មភាពអានាធិបតេយ្យនេះយ៉ាងខ្លាំង និងចាត់ទុកថាជាទង្វើបង្កភាពប៉ះពាល់ដល់សណ្តាប់ធ្នាប់
សន្តិសុខ និងជាការញុះញង់ បង្កភាពវឹកវរចលាចលក្នុងសង្គម
ដែលជាទង្វើរំលោភបំពានម្តងហើយម្តងទៀតលើគោលការណ៍ច្បាប់។
តាមរយៈការដើរស្រែកតវ៉ា
ប្រមូលផ្តុំគ្នាធ្វើបាតុកម្មខុសច្បាប់ ដឹកនាំដោយមេសហជីពដែលគេដឹងថាមានការពាក់ព័ន្ធនឹងរបៀបវារៈនយោបាយបម្រើក្រុមប្រឆាំងនៅពីក្រោមខ្នង
ឈ្មោះ ឈឹម ស៊ីថរ និងបក្ខពួកមួយចំនួននៅថ្ងៃនេះ
ពួកគេបានធ្វើការចោទប្រកាន់ និងទម្លាក់កំហុសមកលើក្រសួងការងារនិងបណ្តុះបណ្តាលវិជ្ជាជីវៈ
ដោយពុំមានហេតុផលត្រឹមត្រូវ
និងបង្កការរំខានដល់សណ្តាប់ធ្នាប់ក្នុងរាជធានីភ្នំពេញ
ក្រោមលេសទាមទារសិទ្ធិបង្កើតសហជីព ខណៈដែលពួកក្រុមបាតុករខុសច្បាប់ទាំងនេះ
ត្រូវបានក្រុមហ៊ុនណាហ្គាវើលដ៏បញ្ឈប់ពីការងារជាយូរមកហើយ។ អ្វីដែលហួសចិត្តជាងនេះទៅទៀតនោះ
វាជាការគួរឱ្យខ្មាស់អៀនជាទីបំផុត នៅពេលបានឮនាង ឈឹម ស៊ីថរ
មេសហជីពក្លែងក្លាយនិយាយទាំងបំផ្លើស បំភ័ន្តសាធារណមតិ និងប្រាស់ចាកពីការពិតដោយចេតនាទុចរិត
ដែលអះអាងថា « ពួកគេតស៊ូណាស់
ប្រឹងណាស់ សុខចិត្តអត់ប្រាក់ខែ៩ខែ...»
និងខំធ្វើសកម្មភាពសព្វបែបយ៉ាងដើម្បីទាមទារចង់បង្កើតសហជីព»។
សម្តីរបស់នាង ឈឹម ស៊ីថរ
តវ៉ាក្នុងបញ្ហានេះ ពិតជាការបោកប្រាស់ដ៏អាក្រក់ ពីព្រោះនៅលើលោកនេះ
តើមានក្រុមហ៊ុនណានៃប្រទេសណាមួយ ដែលបន្តបើកប្រាក់ខែទៅដល់បុគ្គលិកដែលត្រូវបានបញ្ឈប់ពីការងារហើយនោះ?
ចម្លើយ គឺប្រាកដជាគ្មានទេ។
តាមច្បាប់ការងារ
ក្រុមបាតុករអតីតបុគ្កលិកណាហ្គាវើលដ៏ដែលកំពុងតវ៉ាអស់ទាំងនេះ
គ្មានសិទ្ធិដើម្បីបង្កើតសហជីព ឬមានអ្នកតំណាងថ្មីណាទៀត
ដើម្បីបង្កើតនូវភាពអានាធិបតេយ្យ អុកឡុក រំខានកិច្ចការងារប្រកបអាជីវកម្មរបស់ក្រុមហ៊ុនណាហ្គាវើលដ៏បានទៀតឡើយ
ពីព្រោះពួកគេសព្វថ្ងៃនេះមិនមែនជាបុគ្កលិករបស់ក្រុមហ៊ុនណាហ្គាវើលដ៏
ហើយក្រុមហ៊ុនក៏មិនអាចទទួលយកសំណូមពររបស់ពួកគេ
ដែលសុំទាមទារប្រាស់ចាកពីគោលការណ៍ដែលមានចែកក្នុងច្បាប់ការងារបានឡើយ
។ ដូចនេះ ក្រុមបាតុករដែលដឹកនាំដោយនាង ឈឹម ស៊ីថរ គឺពុំអាចធ្វើសកម្មភាពណាមួយក្នុងការបន្តស្រែកតវ៉ា
ការប្រមូលផ្តុំគ្នា ឬក៏ប្រើភាពជាតំណាងរបស់បុគ្គលិកក្រុមហ៊ុនណាហ្គាវើលដ៏ស្របច្បាប់បានទៀតនោះឡើយ។
ផ្ទុយទៅវិញ ពួកគេគប្បីទៅស្វែងរកការងារថ្មី ដែលជាជម្រើសល្អ ដែលមិនត្រូវបន្តដឹកនាំធ្វើបាតុកម្មខុសច្បាប់យ៉ាងអានាធិបតេយ្យបែបនេះឡើយ។
ទង្វើអានាធិបតេយ្យ ដឹកនាំដោយ នាង ឈឹម ស៊ីថរ ត្រូវបានអ្នកធ្វើដំណើរនៅតាមដងផ្លូវ បានលើកឡើងជាសំណូមពរថា អាជ្ញាធរមានសមត្ថកិច្ចត្រូវតែចាត់វិធានការច្បាប់ ដែលមិនគួរបន្តបណ្តែតបណ្តោយឱ្យពួកគេដើរស្រែកតវ៉ា តាមទីសាធារណៈយ៉ាងអានាធិបតេយ្យបែបនេះទេ។ មិនត្រឹមតែប៉ុណ្ណោះ ប្រជាពលរដ្ឋមួយចំនួនទៀតបាននិយាយថា សមត្ថកិច្ចរបស់រាជរដ្ឋាភិបាលត្រូវតែឆាប់បំផ្លាញក្រុមនេះ តាមវិធានការច្បាប់ឱ្យបានទាន់ពេលវេលា ដែលពុំគួរទុកឱ្យពួកគេប៉ុនប៉ងប្រព្រឹត្តតាមទង្វើរបស់ក្រុមគណបក្សប្រឆាំងដែលបានបង្កភាពវឹកវរចលាចលសង្គមដូចព្រឹត្តិការណ៍កាលពីអំឡុងឆ្នាំ២០១៣នោះឡើយ៕
Friday, September 09, 2022
វិភាគអន្តរជាតិ៖ តើវិស័យឧស្ម័នរុស្ស៉ី អាចដកដង្ហើមបាន ដោយគ្មានអឺរ៉ុប ឬ?
(វ៉ាស៊ីនតោន)៖ ការព្រួយបារម្ភរបស់បណ្ដាប្រទេសក្នុងតំបន់អឺរ៉ុបថាប្រធានាធិបតីរុស្ស៉ី លោក វ្ល៉ាឌីមៀ ពូទីននឹងប្រើថាមពលជាអាវុធសងសឹក បានក្លាយជាការពិតហើយ បន្ទាប់ពីវិមានក្រឹមឡាំង កាលពីថ្ងៃទី៥ ខែកញ្ញានេះបានប្រកាសកាត់ផ្ដាច់ការផ្គត់ផ្គង់ឧស្ម័នពីរុស្ស៉ីតាមរយៈបំពង់បង្ហូរឧស្ម័ន Nord Stream 1 ទៅកាន់អឺរ៉ុប រហូតទាល់តែ ទណ្ឌកម្មប្រឆាំងមកលើទីក្រុងមូស្គូត្រូវបានដកចេញទៅវិញ។
ការសម្រេចចិត្តខាងលើរបស់វិមានក្រឹមឡាំងធ្វើឡើងចំពេលដែលវិបត្តិថាមពលនៅទូទាំងតំបន់អឺរ៉ុបមានសភាពកាន់តែធ្ងន់ធ្ងរ ដោយរដ្ឋាភិបាលនៃប្រទេសអឺរ៉ុបមួយចំនួន កំពុងប្រឈមមុខនឹងបាតុកម្មតវ៉ាជុំវិញការខ្វះខាតថាមពល ក្រោយបានដាក់ចេញវិធានការរឹតត្បិតជាច្រើនលើការប្រើប្រាស់ឧស្ម័នសំដៅស្ដុកទុកថាមពលទាំងនេះដើម្បី ឆ្លងឱ្យផុត «រដូវរងា» ដែលនឹងចូលមកដល់នៅប៉ុន្មានខែខាងមុខ។
ចាប់តាំងពីសង្រ្គាមនៅអ៊ុយក្រែនផ្ទុះឡើង រុស្ស៉ីបានចាប់ផ្ដើមកាត់បន្ថយការផ្គត់ផ្គង់ឧស្ម័នទៅកាន់អឺរ៉ុបរួចទៅហើយ ដែលនេះបានជំរុញឱ្យប្រទេសអឺរ៉ុបតួយ៉ាងដូចជាអាល្លឺម៉ង់ ដែលពឹងផ្អែកខ្លាំងជាងគេលើការនាំចូលឧស្ម័នពីរុស្ស៉ី ចាប់ផ្ដើមស្វែងរកអ្នកផ្គត់ផ្គង់ថ្មី និងបានដាក់ចេញវិធានការដើម្បីកាត់បន្ថយការពឹងផ្អែកលើឧស្ម័នរុស្ស៉ី។ ចំណែកឯ រុស្ស៉ី វិញក៏បានបង្វែរការលក់ឧស្ម័នទៅឱ្យឥណ្ឌា និងជាពិសេសគឺចិន ដែលត្រូវបានគេរាយការណ៍ថាបានបង្កើនការទិញឧស្ម័នពីរុស្ស៉ីយ៉ាងច្រើនសន្ធឹកសន្ធាប់។ ក៏ប៉ុន្តែ ខណៈអឺរ៉ុប ប្រឈមមុខនឹងវិបត្តិថាមពល ចុះសេដ្ឋកិច្ចរុស្ស៉ីដែលមួយភាគធំពឹងផ្អែកលើការនាំចេញឧស្ម័នទៅកាន់ទីផ្សារអឺរ៉ុបនឹងទៅជាយ៉ាងណាវិញ? ហើយថាតើចិនអាចនឹងក្លាយជា ទីផ្សារធំជំនួសអឺរ៉ុបសម្រាប់រុស្ស៉ីបានដែរ ឬទេ?
ការវិភាគថ្មីចុងក្រោយមួយរបស់សាកលវិទ្យាល័យ យែល (Yale) របស់សហរដ្ឋអាមេរិកបានឱ្យដឹងថាបំពង់ឧស្ម័ន Power of Siberia 1 ដែលតភ្ជាប់រវាងតំបន់ស៊ីបេរីរបស់រុស្ស៉ី និងចិន នៅមិនទាន់អាចធ្វើប្រតិបត្តិការបានពេញលេញនៅឡើយទេ ដែលនេះមានន័យថាបំពង់ឧស្ម័ននេះមិនអាចសម្របខ្លួនទៅនឹងទីផ្សារបានភា្លមៗនោះទេ។ មិនតែប៉ុណ្ណោះ វាក៏នៅតែមានការខ្វែងគំនិតគ្នាលើបញ្ហាតម្លៃដែរ ដោយភាគីចិនចង់ទិញឧស្ម័នក្នុងតម្លៃថោក បើធៀបទៅនឹងតម្លៃឧស្ម័នដែលបណ្ដាប្រទេសអឺរ៉ុបខាងលិចបង់ឱ្យរុស្ស៉ី។ បើតាម ការវិភាគនេះដដែល ទោះបីជាមានការព្យាយាមងាកទៅរកទីផ្សារចិនក៏ដោយ ក៏ក្នុងរយៈពេលខ្លី ឧស្ម័នរុស្ស៉ីមួយភាគធំមិនអាចបង្ហូរទៅកាន់ប្រទេសចិន ក្នុងទំហំស្មើគ្នានឹង ទីផ្សារអឺរ៉ុបឡើយ។ កាលពីឆ្នាំ២០២១ ចិនបានទិញឧស្ម័នពីរុស្ស៉ីត្រឹមតែ ១៦.៥ពាន់លានម៉ែត្រគូបប៉ុណ្ណោះពីរុស្ស៉ី ខណៈក្នុងរយៈពេលដូចគ្នានេះ អឺរ៉ុបបានទិញឧស្ម័នពីរុស្ស៉ី ដល់ទៅ ១៧០ពាន់លានម៉ែត្រគូបឯណោះ។ ប៉ុន្តែ ការវាយតម្លៃពីភាពខុសគ្នានេះមានការលំបាកយ៉ាងខ្លាំងក្នុងឆ្នាំ២០២២នេះ ដ្បិតចិនមិនបានបញ្ចេញទិន្នន័យថ្មីនៃការនាំចូល ឧស្ម័នឡើយ ហើយម្យ៉ាងវិញទៀត ចិនកំពុងព្យាយាមស្វែងរកអ្នកផ្គត់ផ្គត់ចម្រុះ។ ដូច្នេះវាមិនអាចទៅរួចឡើយដែលមេដឹកនាំចិនបង្កើនការពឹងផ្អែកតែទៅលើការនាំចូលពីដៃគូ តែមួយគត់ដូចជារុស្ស៉ី នៅក្នុងវិស័យដ៏សំខាន់មួយនេះ។ ជាឧទាហរណ៍ ការនំាចូលឧស្ម័នធម្មជាតិរាវ ឬ LNG របស់ចិនមានមួយធំមានប្រភពមកពីសហរដ្ឋអាមរិក និងអូស្ត្រាលី ដែលជាប្រភពនាំចូលឧស្ម័នដ៏សំខាន់របស់ចិនពីឆ្នាំ២០២០ ដល់ឆ្នាំ២០២១ ជាមួយការផ្គត់ផ្គង់ឧស្ម័ន LNG ៣០.៧លានតោន ឬស្មើនឹងជាង ៤២.៣ពាន់លានម៉ែត្រគូប។
លើសពីនេះទៅទៀត ចិនក៏មានបំពង់បង្ហូរឧស្ម័នធម្មជាតិដែលតភ្ជាប់ពីតំបន់អាស៊ីកណ្ដាលផងដែរ នោះគឺពីប្រទេសតួកម៉េនីស្ថាន។ កាលពីឆ្នាំ២០២១ តម្រូវការឧស្ម័នរបស់ ចិនមាន ៣៦៥ពាន់លានម៉ែត្រគូប ហើយការនាំចូលឧស្ម័នពីរុស្ស៉ីមាន ១៦.៥ពាន់លានម៉ែត្រគូបដែលនេះជាចំនួនដ៏តិចតួចបំផុត បើធៀបទៅនឹងទីផ្សារអឺរ៉ុប។ ពោលគឺចិន មិនមែនពឹងផ្អែកតែទៅលើការនាំចូលឧស្ម័នតែពីរុស្ស៉ីនោះទេ រីឯរុស្ស៉ីវិញក៏នឹងពិបាកក្នុងការស្វែងរកអ្នកទិញឧស្ម័នរបស់ខ្លួនជំនួសអឺរ៉ុបបានដែរក្នុងរយៈពេលខ្លី។
យល់ដូចគ្នានេះដែរ លោក នីកូស សាហ្វូស (Nikos Tsafos) ជាអ្នកជំនាញខាងថាមពលម្នាក់បានធ្វើការសន្និដ្ឋានថា «រុស្ស៉ីនឹងមិនអាចមានទីផ្សារថាមពលដ៏ធំក្នុងតំបន់អាស៊ី ទេ បើធៀបទៅនឹងទីផ្សារអឺរ៉ុប»។ លោកបន្ថែមថា «ការបង្វែរឧស្ម័នរបស់រុស្ស៉ីទៅកាន់ទីផ្សារអាស៊ី ពិតណាស់វានឹងដំណើរការ ក៏ប៉ុន្តែអាស៊ីនឹងមិនអាចក្លាយជាទីផ្សារលក់ឧស្ម័ន ជំនួសអឺរ៉ុបបានក្នុងពេលដ៏ខ្លីឡើយ។ ពីព្រោះថាបើចង់យកអាស៊ីជំនួសអឺរ៉ុប នោះរុស្ស៉ីត្រូវការរយៈពេលវែង និងត្រូវសម្រេចឱ្យបានជាមុនសិននូវការសាងសង់ហេដ្ឋារចនាសម្ព័ន្ធ ផ្គត់ផ្គង់ឧស្ម័នដ៏ធំសម្បើមមួយ។
គួរបញ្ជាក់ថា សម្រាប់ចិន ការអភិវឌ្ឍបំពង់ឧស្ម័នជាមួយរុស្ស៉ី គឺជាផ្នែកមួយដ៏សំខាន់នៃ «ភាពជាដៃគូយុទ្ធសាស្ត្រទូលំទូលាយ» រវាងប្រទេសទាំង២ ហើយក៏ជាមធ្យោបាយ ដោះស្រាយកង្វល់របស់ចិនផងដែរ។ អស់រយៈពេលជាច្រើនឆ្នាំមកហើយ ចិនពឹងផ្អែកលើការនាំចូលឥន្ធនៈផូស៊ីល ជាពិសេសគឺប្រេង មកពី និងឆ្លងកាត់តាមច្រកសមុទ្រ ម៉ាឡាកា (Malacca) ជាទីដែលកងទ័ពជើងទឹកអាមេរិកកំពុងរក្សាវត្តមាននៅទីនោះ។ បានន័យថាប្រសិនបើអាមេរិកបិទខ្ទប់ច្រកសមុទ្រម៉ាឡាកាដោយប្រការណាមួយ នោះ ចិនអាចនឹងប្រឈមមុខនឹងការខ្វះខាតថាមពល ដែលធ្វើឱ្យខូចខាតធ្ងន់ធ្ងរដល់សេដ្ឋកិច្ចរបស់ខ្លួន។ តែទោះជាបែបនេះក្ដី ការវិវឌ្ឍទំនាក់ទំនងរកស៊ីឧស្ម័នរវាងចិន និងរុស្ស៉ី នឹងមិនអាចកែប្រែធម្មជាតិពិតនៃវិសមភាពក្នុងភាពជាដៃគូរវាងប៉េកាំង និងមូស្គូបានទេ ដូចដែលគេកំពុងឃើញក្នុងពេលបច្ចុប្បន្ន នោះគឺរុស្ស៉ីត្រូវការចិនជាទីផ្សារនាំចេញ ខ្លាំងជាងចិនត្រូវការរុស្ស៉ីជាអ្នកផ្គត់ផ្គង់។
ស្ថានភាពសព្វថ្ងៃ ទាំងរុស្ស៉ី និងអឺរ៉ុបសុទ្ធតែកំពុងប្រឈមនឹងបញ្ហាស្មុគស្មាញ ដ្បិតម្ខាងជាអ្នកលក់ ម្ខាងជាម៉ូយ ដោយក្នុងរយៈពេលខ្លី រុស្ស៉ីមិនអាចធ្វើពិពិធកម្មទីផ្សារឧស្ម័ន ហើយអ៉ឺរ៉ុបក៏ដូចគ្នាដែរ គឺមិនអាចរកអ្នកផ្គត់ផ្គង់ឧស្ម័នជំនួសរុស្ស៉ីទេ។ តែអ្វីដែលគេអាចនិយាយបាន នោះគឺទំនាក់ទំនងថាមពលជាមួយរុស្ស៉ី នឹងកាន់តែផ្ដល់ជម្រើស កាន់តែច្រើនសម្រាប់ចិនក្នុងការទិញឧស្ម័នក្នុងតម្លៃថោក៕
ដោយៈ Fresh News
Subscribe to:
Posts (Atom)