អ្នកប្រើប្រាស់បណ្តាញសង្គមFacebook : បើសិនជាគ្មានសម្ដេចវិបុលបញ្ញា សុខ អាន ម្ល៉ោះបញ្ហាជម្លោះព្រំដែនកម្ពុជា-ថៃ និងរឿងក្ដីប្រាសាទព្រះហារ ក៏កម្ពុជាមិនអាចឈ្នះក្ដីនៅតុលាការយុត្តិធម៌អន្ដរជាតិដែរ

អ្នកប្រើប្រាស់បណ្តាញសង្គមហ្វេសប៊ុកនៅយប់ថ្ងៃទី១៥ ខែមីនា ឆ្នាំ ២០១៧នេះ បានបង្ហោះខ្លឹមសារជាការរំលឹកគុណចំពោះលោកឧបនាយករដ្ឋមន្ត្រី សុខ អាន ដែលបានលះបង់អស់ពីកម្លាំងកាយចិត្ត បញ្ញា ស្មារតី ដើម្បីបុព្វហេតុជាតិ មាតុភូមិ ជាពិសេសការឈ្នះក្តីក្នុងរឿងក្តីប្រាសាទព្រះវិហារកាលពីពេលកន្លងទៅ ដោយទេពកោសល្យការទូតដ៏ប៉ិនប្រសប់របស់លោក។
ខាងក្រោមនេះជាសាររបស់អ្នកប្រើប្រាស់បណ្តាញសង្គមហ្វេសប៊ុក៖

បើសិនជាគ្មានសម្ដេចវិបុលបញ្ញា សុខ អាន ម្ល៉ោះបញ្ហាជម្លោះព្រំដែនកម្ពុជា-ថៃ និងរឿងក្ដីប្រាសាទព្រះហារ ក៏កម្ពុជាមិនអាចឈ្នះក្ដីនៅតុលាការយុត្តិធម៌អន្ដរជាតិដែរ ជាពិសេសតំបន់ប្រាសាទព្រះវិហារ និងប្រាសាទព្រះវិហារ ក៏មិនក្លាយទៅជាបេតិកភណ្ឌអន្ដរជាតិបានដែរ។
បើគ្មានសម្ដេចវិបុលបញ្ញា សុខ អាន ដែលបានបង្កើតឱ្យមាននូវអាជ្ញាធរជាតិអប្សរាទេ ក៏ប្រាសាទអង្គរវត្តក៏មិនអាចទទួលបាននូវកំណើនភ្ញៀវទេសចរអន្ដរជាតិពី៤ម៉ឺននាក់ រហូតជាច្រើនលាននាក់ដូចសពថ្ងៃនេះដែរ។
ស្នាដៃធំៗដែលសម្ដេចវិបុលបញ្ញា បានធ្វើដើម្បីជាតិ គឺសម្ដេចជាស្ថាបនិកបង្កើតឱ្យមាននូវសាលាភូមិន្ទរដ្ឋបាល រាជបណ្ឌិតសភា និងវិជ្ជាជីវៈតុលាការ អាជ្ញាធរប្រេងកាត និងជាថ្នាក់ដឹកនាំប្រកបដោយព្រហ្មវិហារធម៌យ៉ាងធំធេងចំពោះជាតិ។ នេះជាសមិទ្ធផលដែលមិនអាចកាត់ថ្លៃបានឡើយ។ ហើយម្យ៉ាងនេះក៏ជាស្នាដៃមួយដែលសម្រាប់ខ្មែរជំនាន់ក្រោយ។
សម្ដេចវិបុលបញ្ញា សុខ អាន ក៏បានលះបង់កម្លាំងកាយចិត្ត ក្នុងការតតាំងក្ដីជាមួយនឹងក្រុមហ៊ុនដ៏ល្បីរបស់សហរដ្ឋអាមេរិក ពាក់ព័ន្ធនឹងរឿងក្បាលអ្នកតារបស់ខ្មែរ រហូតដល់សម្ដេចឈ្នះក្ដី និងបានប្រគល់ជូនកម្ពុជាវិញផងដែរ។
ដូច្នេះគ្រាន់តែរៀបរាប់នូវគុណតម្លៃដ៏ថ្លៃថ្នាទាំងនេះ គឺលោកសាកសមណាស់នឹងទទួលបាននូវគោរមងារនេះ ជាពិសេសក៏ត្រូវបានប្រវត្តិសាស្ដ្រកម្ពុជាកត់ត្រាទុកផងដែរ។
យើងសូមគោរពចូលរួមរំលែកទុក្ខយ៉ាងក្រៀមក្រំ!

រាជរដ្ឋាភិបាល ​ចេញ​សេចក្តី​សម្រេច​បង្កើត​គណៈកម្មការ និង​អនុគណៈកម្មការ​រៀប​ចំ​បុណ្យ​សព លោកឧបនាយករដ្ឋមន្ត្រី​ សុខ អាន!

រាជរដ្ឋាភិបាល ចេញសេចក្តីជូនដំណឹងអំពីមរណភាពរបស់លោកឧបនាយករដ្ឋមន្រ្តី សុខ អាន

នៅយប់ថ្ងៃទី១៥ ខែមីនា ឆ្នាំ២០១៧នេះ រាជរដ្ឋាភិបាលកម្ពុជា បានចេញសេចក្តីជូនដំណឹង ស្តីពីមរណភាពរបស់លោកឧបនាយករដ្ឋមន្រ្តី សុខ អាន។

សេចក្តីជូនដំណឹង បានបញ្ជាក់ថា រាជរដ្ឋាភិបាលនៃព្រះរាជាណាចក្រកម្ពុជា មានសេចក្តី​សោក​​ស្តាយ សូមជូនដំណឹងដល់មន្រ្តីរាជការ កងកម្លាំងប្រដាប់អាវុធគ្រប់ប្រភេទ និងសាធារ​ណ​ជនឱ្យបានជ្រាបថា សម្តេចវិបុលបញ្ញា សុខ អាន សមាជិករដ្ឋសភា ឧបនាយករដ្ឋមន្រ្តី និង ជារដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានទទួលមរណភាពនៅថ្ងៃ ៣រោជ ខែផល្គុន ឆ្នាំ វក អដ្ឋស័ក ព.ស ២៥៦០ ត្រូវនឹងថ្ងៃទី១៥ ខែមីនា ឆ្នាំ២០១៧ វេលាម៉ោង ១៨ និង៣២នាទី នៅមន្ទីរពេទ្យទីក្រុងប៉េកាំង សាធារណរដ្ឋប្រជាមានិតចិន ដោយរោគាពាធ ក្នុងជន្មាយុ ៦៦ឆ្នាំ៕

ជីវប្រវត្តិសង្ខេប សម្តេចវិបុលបញ្ញា សុខ អាន

លោកឧបនាយករដ្ឋមន្រ្តី សុខ អាន បានទទួលមរណភាពហើយ ក្នុងជន្មានុ៦៦ឆ្នាំ

លោកឧបនាយករដ្ឋមន្រ្តី សុខ អាន រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី បានទទួល​មរណភាពហើយ នៅថ្ងៃទី១៥ ខែមីនា ឆ្នាំ២០១៧ នៅវេលា ម៉ោង ១៨:៣២នាទី (ម៉ោង​នៅភ្នំពេញ) ដោយរោគាពាធ ក្នុងជន្មាយុ ៦៦ឆ្នាំ។ នេះបើយោងតាមសេចក្តីជូនដំណឹងមរណភាព ដែលប្រកាសឱ្យដឹងដោយក្រុមគ្រួសារសព។

សេចក្តីជូនដំណឹង បានជម្រាបជូនថា៖

លោកជំទាវ អាន្នី សុខអាន ព្រមទាំងបុត្រាបុត្រីបង្កើត បុត្រីបុត្រាប្រសារ ចៅប្រុស ចៅស្រី និងក្រុមគ្រួសារ មានទុក្ខជាទម្ងន់ដោយ សម្តេចវិបុលបញ្ញា សុខ អាន សមាជិករដ្ឋសភា ឧបនាយករដ្ឋមន្ត្រី និងជារដ្ឋមន្ត្រីទទួលបន្ទុក ទីស្តីការគណៈរដ្ឋមន្ត្រី ដែលត្រូវជាស្វាមី ជាឪពុក ឪពុកក្មេក ជីតា បានទទួលមរណភាព នៅថ្ងៃ ៣រោជ ខែផល្គុន ឆ្នាំវក អដ្ឋស័ក ព.ស២៥៦០ ត្រូវនឹងថ្ងៃទី១៥ ខែមីនា ឆ្នាំ២០១៧ នៅវេលា ម៉ោង ១៨:៣២នាទី (ម៉ោងនៅភ្នំពេញ) ដោយរោគាពាធ ក្នុងជន្មាយុ ៦៦ឆ្នាំ។

ដំណឹងនេះចាត់ទុកជាសេចក្តីជូនដំណឹងចំពោះ សម្តេច ទ្រង់ ឯកឧត្តម លោកជំទាវ លោកឧកញ៉ា លោក លោកស្រី នាងកញ្ញា និងញាតិមិត្តជិតឆ្ងាយ នៃសព សម្តេចវិបុលបញ្ញា សុខ អាន មេត្តាជ្រាបតាមការគួរ។ កម្មវិធីបុណ្យសពនឹងមានទូលថ្វាយ និងជម្រាបជូនជ្រាបជាក្រោយ​៕

លោកនាយករដ្ឋមន្ត្រី ហ៊ុន សែន នឹងអញ្ជើញធ្វើជាអធិបតីភាព នៅក្នុងកិច្ចប្រជុំតុមូលចិនលើកទី៥ នៅខេត្តសៀមរាប

លោកនាយករដ្ឋមន្ត្រី ហ៊ុន សែន នឹងអញ្ជើញធ្វើជាអធិបតីភាពក្នុងពិធីបើកកិច្ចប្រជុំតុមូលចិនលើកទី៥ ដែលនឹងប្រព្រឹត្តិទៅនៅក្នុងខេត្តសៀមរាប ចាប់ពីថ្ងៃទី ២០ ដល់ ថ្ងៃទី២៣ ខែមីនា ឆ្នាំ២០១៧នេះ បើតាមសេចក្តីជូនដំណឹងរបស់ក្រសួងពាណិជ្ជកម្មកម្ពុជា ចេញផ្សាយកាលពីថ្ងៃទី ១៣ មិនា ២០១៧។

ក្រសួងពាណិជ្ជកម្មបានឱ្យដឹងថា នៅក្នុងឋានៈជាប្រធានសម្របសម្រួលក្រុមប្រទេសអភិវឌ្ឍ តិចតួច (LDCs) ប្រចាំនៅអង្គការពាណិជ្ជកម្មពិភពលោក (WTO) ព្រះរាជាណាចក្រកម្ពុជានឹងធ្វើជាម្ចាស់ផ្ទះរៀបចំកិច្ចប្រជុំតុមូលចិនលើកទី៥ ស្តីពីការចូលជាសមាជិកអង្គការ WTO ក្រោមប្រធានបទ«ការអនុវត្តល្អបំផុតស្តីពីការចូលជាសមាជិករបស់ប្រទេសអភិវឌ្ឍតិចតួច» ដើម្បីចែករំលែកចំណេះដឹង និងបទពិសោធន៍ល្អៗជូនក្រុមប្រទេស LDCs ដ៏ទៃទៀត ដែលបានស្នើសុំចូលជាសមាជិក WTO ឱ្យទទួលបានជោគជ័យដូចប្រទេសកម្ពុជា និងបណ្តាប្រទេសអភិវឌ្ឍ តិចតួចចំនួន៨ផ្សេងទៀត។
សេចក្តីជូនដំណឹងរបស់ក្រសួងពាណិជ្ជកម្មបានឱ្យដឹងទៀតថា កិច្ចប្រជុំតុមូលចិននេះត្រូវបានផ្តល់មូលនិធិដោយរដ្ឋាភិបាលនៃសាធារណរដ្ឋប្រជាមានិតចិន និងរៀបចំដោយលេខាធិការដ្ឋានអង្គការពាណិជ្ជកម្មពិភពលោក សហការជាមួយនឹងប្រទេសកម្ពុជាដើម្បីជួយពង្រឹងសមត្ថភាពប្រទេស LDCs ដែលបានដាក់ពាក្យស្នើសុំចូលជាសមាជិកអង្គការពាណិជ្ជកម្មពិភពលោក ដោយអនុលោមតាមមាត្រា ១២នៃកិច្ចព្រមព្រៀងម៉ារ៉ាកេស ស្តីពីការបង្កើតអង្គការពាណិជ្ជកម្មពិភពលោក (WTO) ហើយកំពុងរង់ចាំការអនុម័តពីសន្និសីទថ្នាក់រដ្ឋមន្ត្រីលើកទី១១ ដែលនឹងរៀបចំឡើងចាប់ពីថ្ងៃទី ១០ ដល់ ១៤ ធ្នូ ២០១៧ ក្នុងទីក្រុង Buenos Aires ប្រទេសអាហ្សង់ទីន។
ក្រសួងពាណិជ្ជកម្មកម្ពុជាបានឱ្យដឹងទៀតថា សម្រាប់កិច្ចប្រជុំតុមូលចិនឆ្នាំ២០១៧នេះនឹងមានការចូលរួមពីថ្នាក់ដឹកនាំនៃរាជរដ្ឋាភិបាលកម្ពុជា, គណៈប្រតិភូមន្ត្រីជាន់ខ្ពស់នៃប្រទេសចិន និងបណ្តាប្រទេសអភិវឌ្ឍតិចតួចច្រើនជាង២០ប្រទេស ហើយនឹងលើកយកប្រធានបទសំខាន់ៗមួយចំនួន ពាក់ព័ន្ធនឹងបទពិសោធន៍នៃការត្រៀមខ្លួនចូលជាសមាជិក និងក្រោយពេលក្លាយជាសមាជិក WTO ដូចជា៖ លក្ខខណ្ឌតម្រូវ, បញ្ហាប្រឈម និងកាលានុវត្តភាព ព្រមទាំងកាតព្វកិច្ចដែលត្រូវបំពេញចំពោះមុខ។
គួររម្លឹកថា កម្ពុជាបានក្លាយជាប្រធាននៃក្រុមប្រទេសអភិវឌ្ឍន៍តិចតួច (LDCs) ជាផ្លូវការ កាលពីថ្ងៃទី២០ ខែកុម្ភៈ ឆ្នាំ២០១៧ សម្រាប់អណត្តិដែលមានរយៈពេល ១ឆ្នាំ គិតចាប់ពីពាក់កណ្តាល ខែកុម្ភៈ ឆ្នាំ២០១៧ ដល់ពាក់កណ្តាលខែកុម្ភៈឆ្នាំ២០១៨។ ក្រុមនេះមានសមាជិកចំនួន ៣៦ និងប្រទេសសង្កេតការណ៍ចំនួន៨ ហើយពិធីផ្ទេរតំណែង បានធ្វើឡើងនៅអង្គការពាណិជ្ជកម្មពិភពលោកប្រទេសស្វីស៕

ក្រសួងទេសចរណ៍ ធ្វើការណែនាំជុំវិញការពង្រឹងគុណភាពសេវាកម្មអាជីវកម្មទេសចរណ៍សម្រាប់ការអបអរពិធីបុណ្យទន្លេលើកទី០៣

យោងតាមសេចក្តីជូនដំណឹងរបស់ក្រសួងទេសចរណ៍ បានឱ្យដឹងថា ដើម្បីពង្រឹងគុណភាព​សេវា​​កម្ម​ឧស្សាហកម្មទេសចរណ៍ ក្នុងគោលដៅធានាឱ្យបាននូវសុខុមាលភាពរបស់ភ្ញៀវ​ទេស​ចរ នៅក្នុងពិធីអបអរសាទរបុណ្យទន្លេលើកទី០៣ ចាប់ពីថ្ងៃទី២៤-២៦ ខែមីនា ឆ្នាំ២០១៧ នៅ ខេត្តស្ទឹងត្រែង ក្រសួង បានធ្វើការណែនាំ​ដល់ប្រតិបត្តិករទេសចរណ៍ ដែល​ប្រកបអា​ជីវ​កម្ម​​ទេស​​​ចរណ៍ និងភាគីពាក់ព័ន្ធទាំងអស់។

នៅក្នុងសេចក្តីជូនដំណឹងរបស់ក្រសួងទេសចរណ៍ បានធ្វើការណែនាំទៅលើចំណុចមួយចំនួន ដូចជា៖ អំពីសោភ័ណភាពទូទៅ អំពីចំណត អំពីមុខសេវាកម្មនិងតម្លៃ អំពីបុគ្គលិក ការថែរក្សា អនាម័យសេវាកម្ម ការគ្រប់គ្រងសំណល់ បង្គន់អនាម័យ ការណែនាំបន្ថែមអំពីមធ្យោបាយដឹក ជញ្ជូនភ្ញៀវទេសចរជាដើម៕

សូមអានសេចក្តីជូនដំណឹងខាងក្រោម៖