សិក្ខាសាលា​ដើម្បីស្វែង​យល់​បេតិកភណ្ឌ​វប្បធម៌​តំបន់​មេគង្គ ត្រូវ​បាន​រៀប​ចំឡើង​នៅតំបន់​រមណីយ​ដ្ឋានអង្គរ

អ្នកជំនាញខាងបេតិកភណ្ឌវប្បធម៌ ចំនួន១០រូប ដែលមាន២រូបមកពីប្រទេសនីមួយៗ នៃប្រទេសទាំង៥នៅអាស៊ីអាគ្នេយ៍ ពោល គឺកម្ពុជា ថៃ មីយ៉ាន់ម៉ា ឡាវ និងវៀតណាម ព្រមទាំងប្រទេសឥណ្ឌូនេស៊ី បានមកជួបជុំគ្នាជាមួយអ្នកជំនាញជប៉ុន នៃសាកលវិទ្យាល័យ សូហ្វីយ៉ា និងអ្នកជំនាញនៃអាជ្ញាធរជាតិអប្សរា នៅតំបន់សៀមរាប-អង្គរ ដើម្បីពិភាក្សាផ្លាស់ប្តូរបទពិសោធន៍លើកិច្ចការអភិរក្សមរតកបេតិកភណ្ឌតាមរយៈសិក្ខាសាលាអន្តរជាតិ ដែលហៅថា “សិក្ខាសាលាដើម្បីស្វែងយល់បេតិកភណ្ឌវប្បធម៌តំបន់មេគង្គ”។

នៅក្នុងជំនួបជាមួយឯកឧត្តមបណ្ឌិត ស៊ុ ម៉ាប់ អគ្គនាយកអាជ្ញាធរជាតិអប្សរា កាលពីរសៀលថ្ងៃទី១២ ខែសីហា ឆ្នាំ២០១៦នេះ លោកសាស្រ្តាចារ្យ Ishizawa Yoshiaki តំណាងសាកលវិទ្យាល័យសូហ្វីយ៉ា នៃប្រទេសជប៉ុន ដែលជាអ្នកដឹកនាំរៀបចំកម្មវិធីនេះ បានថ្លែងអំណរគុណចំពោះអាជ្ញាធរជាតិអប្សរាដែលបានគាំទ្រ និងសហការគ្រប់បែបយ៉ាងចំពោះកម្មវិធីនេះ។ មិនតែប៉ុណ្ណោះ អាជ្ញាធរជាតិអប្សរា ក៏បានបញ្ជូនអ្នកជំនាញផ្សេងៗ ចូលរួមដោយផ្ទាល់ ដើម្បីធ្វើបទបង្ហាញផ្តល់បទពិសោធន៍ដល់សិក្ខាកាមទាំងអស់ ដែលបានចូលរួមក្នុងកម្មវិធីសិក្ខាសាលានេះ ។ លោក សាស្រ្តាចារ្យ ក៏បានរំលេចឱ្យឃើញពីភាពជោគជ័យ ដែលសម្រេចបានលើការងារអភិរក្សជួសជុលប្រាង្គប្រាសាទកន្លងមក ធ្វើឱ្យអាជ្ញាធរជាតិអប្សរា មានសមត្ថភាពគ្រប់គ្រាន់ដើម្បីចែករំលែកបទពិសោធន៍ទាំងនេះ ដល់ប្រទេសផ្សេងៗទៀតក្នុងតំបន់ ក៏ដូចជាពិភពលោក ។ មិនតែប៉ុននោះ កម្ពុជា ជាប្រទេសសម្បូរណ៍ដោយប្រាង្គប្រាសាទសិលា ដែលទទួលបាននូវការចាប់អារម្មណ៍យ៉ាងខ្លាំងពីមនុស្សក្នុងពិភពលោក ដូចនេះហើយសិក្ខាសាលាដែលបានរៀបចំក្នុងពេលនេះ ក៏ជាឱកាសល្អមួយបង្ហាញដល់អ្នកជំនាញក្នុងការស្វែងយល់បន្ថែមទៀត ដើម្បីយកជាគំរូទៅរៀបចំនៅតាមបណ្តារមណីយដ្ឋានបេតិកភណ្ឌពិភពលោកនៅបណ្តាប្រទេសផ្សេងៗទៀត។

ជាកិច្ចស្វាគមន៍ ឯកឧត្តមបណ្ឌិត ស៊ុ ម៉ាប់ អគ្គនាយកអាជ្ញាធរជាតិអប្សរា បានថ្លែងអំណរគុណចំពោះសាកលវិទ្យាល័យសូហ្វីយ៉ា ជាពិសេសលោកសាស្រ្តាចារ្យ Ishizawa Yoshiaki ដែលតែងតែជួយលើកិច្ចការអភិរក្ស ជួសជុលប្រាង្គបា្រសាទក្នុងតំបន់អង្គរ ក៏ដូចជាការៀបចំឱ្យមានកម្មវិធីសិក្ខាសាលាក្នុងពេលនេះជាដើម។ ក្នុងនាម អាជ្ញាធរជាតិអប្សរា ឯកឧត្តមអគ្គនាយក ក៏បានទាញចំណាប់អារម្មណ៍សិក្ខាកាមដែលបានចូលជួបក្នុងឱកាសនេះ ឱ្យបានស្វែងយល់ពីការខិតខំរបស់អាជ្ញាធរជាតិអប្សរាពាក់ព័ន្ធនឹងកិច្ចការអភិរក្ស ជួសជុលបេតិកភណ្ឌ ជាពិសេសកិច្ចសហការអន្តរជាតិក្នុងរយៈពេលជាង២០ឆ្នាំ ជាមួយដៃគូរអន្តរជាតិនានា។ ក្នុងក្របខ័ណ្ឌកិច្ចសហការអន្តរជាតិ នេះហើយ គណៈកម្មការ អាយស៊ីស៊ី-អង្គរ ត្រូវបានទទួលស្គាល់ជាបន្តបន្ទាប់លើកឆាកអន្តរជាតិ និងប្រទេសមួយចំនួន ចាត់ទុកអាយស៊ីស៊ី-អង្គរ ជាគំរូក្នុងកិច្ចការអភិរក្ស ជួសជុល តំបន់រមណីយដ្ឋានបេតិកភណ្ឌពិភពលោកផ្សេងៗ ទៀតដូចជានៅប្រទេសស៊ីរី និងប្រទេសអាហ្គានីស្ថាន ជាដើម។

ឯកឧត្តមអគ្គនាយក ក៏បានជូនពរដល់អង្គសិក្ខាសាលាឱ្យទទួលជោគជ័យតាមផែនការ ហើយក៏បានសន្យា សហការ បញ្ជូនអ្នកជំនាញ ដើម្បីចូលរួម និងសម្របសម្រួលចំពោះគ្រប់កម្មវិធីដែលត្រូវចុះកម្មសិក្សា តាមបណ្តាប្រាង្គប្រាសាទ ក្នុងរមណីយដ្ឋានអង្គរ។

សូមបញ្ជាក់ថា នេះជាសិក្ខាសាលាលើកទី៥ហើយ ដែលបានរៀបចំឡើងនៅមជ្ឈមណ្ឌលអាស៊ីសិក្សាស្រាវជ្រាវ និងបណ្តុះបណ្តាលធនធានមនុស្ស នៃសាកលវិទ្យាល័យសូហ្វីយ៉ា ដែលមានទីតាំងនៅតំបន់សៀមរាប-អង្គរ។ សិក្ខាសាលា ដែលមានរយៈពេល៨ថ្ងៃនេះ បានចាប់ផ្តើមពីថ្ងៃទី១១ ដល់ថ្ងៃទី១៨ ខែសីហា ឆ្នាំ២០១៦ សិក្ខាកាមដែលបានចូលរួមទាំងអស់នឹងបានផ្លាស់ប្តូរព័ត៌មានទូទៅទាក់ទងនឹងបញ្ហារួមទាំងឡាយនៅតំបន់អាស៊ីអាគ្នេយ៍ មានដូចជា ភាពគំរាមគំហែងពីធម្មជាតិ ភាពទ្រុឌទ្រោមនៃគ្រឿងសំណង់ វិធីសាស្រ្តការពាររមណីយដ្ឋានប្រវត្តិសាស្រ្តជាដើម៕

លោក ស្វាយ ស៊ីថា ចុះពង្រឹងការអនុវត្តការងាររបស់មន្ត្រីនៅឃុំកុមារាជា ក្នុងស្រុកបាទី ខេត្តតាកែវ

បន្ទាប់ពីបានចុះទៅបើកវេទិកាសាធារណៈជាមួយប្រជា​ពលរដ្ឋ​ កាលពីថ្ងៃអាទិត្យ ទី០៧ ខែសីហា ឆ្នាំ២០១៦ នៅក្នុងឃុំកុមារាជា ដើម្បីពង្រឹងការងាររបស់សមត្ថកិច្ច និង​អាជ្ញាធរមូលដ្ឋាន ពិសេស​ការជំ​រុញ​ឲ្យ​អនុវត្ត​វិធាន​ការតឹង​រឹង  ក្នុង​ការលុបបំបាត់ការសេព ប្រើប្រាស់ ​ការ​ជួញ​ដូរគ្រឿងញៀន ល្បែងស៊ីសង ចោរកម្ម និងបងតូចបងធំរួចមក នៅថ្ងៃទី៩ ខែសីហា ឆ្នាំ២០១៦ លោក ស្វាយ ស៊ីថា និង​ក្រុម​ការងារ បានចុះទៅពិនិត្យមើលការអនុវត្តការងារជាក់ស្តែង នៅក្នុងភូមិមួយចំនួន នៃ​ឃុំ​កុមារាជា ជាពិសេសតាមដានការអនុវត្តការងាររបស់អាជ្ញាធរមូលដ្ឋាន និងមន្ត្រីប៉ុស្តិ៍​នគរ​បាល​ឃុំ ដែលបានធ្វើការប្តេជ្ញាចិត្តពង្រឹងការងារឱ្យបានល្អ ក្នុងវេទិកាសាធារណៈ កាលពី​ពេល​កន្លង​មក​នោះ។

ការចុះទៅជួប​ផ្ទាល់រវាងលោក ស្វាយ ស៊ីថា រដ្ឋលេខាធិការ ប្រធានអង្គភាពព័ត៌មាន និងប្រតិកម្ម​រហ័ស​នៃទីស្តី​ការគណៈរដ្ឋមន្ត្រី និងជាប្រធានក្រុមការងារថ្នាក់ជាតិចុះមូលដ្ឋានឃុំកុមារាជា ជាមួយ​ប្រជា​ពលរដ្ឋ​ និងមន្ត្រី​ពាក់ព័ន្ធ គឺលោក បាន​សម្រប​សម្រួលការងារមួយ​ចំ​នួនជាមួយ​នគរបាល​បុស្តិ៍ ជំ​រុញ​ឲ្យ​អនុវត្តឲ្យ​មាន​ប្រសិទ្ធភាព​នូវ​គោល​នយោបាយ​ភូមិ​ឃុំ​មាន​សុវត្ថិភាព គឺត្រូវ​​ទប់​ស្កាត់ និង​បញ្ចប់​មិន​ឲ្យ​មាននូវ​ក្រុមបងតូចបងធំ នឹងអ្នកប្រើប្រាស់អាវុធខុសច្បាប់ ដែលបាន​យកឈ្មោះ​ថ្នាក់​ដឹកនាំ​មកប្រើផងដែរ។

ក្រៅពីពង្រឹងការដោះស្រាយបញ្ហាអសកម្មក្នុងឃុំ លោក ស្វាយ ស៊ីថា ក៏បានជួបសំណេះ​សំ​ណាល​ជាមួយលោកគ្រូអ្នកគ្រូ និងបានទទួលយកសំណូមពររបស់លោកគ្រូអ្នកគ្រូ សាលា​បឋម​សិក្សា​ក្រាំងពង្រ ក្នុងឃុំកុមារាជា ដែលស្នើឱ្យជួយស្តារអណ្តូងទឹកក្នុងសាលារៀននេះ ដែលនៅខ្វះ​ខាត​ថវិកាបដិភាគចំនួន ៥៥០.០០០ រៀល។ ក្រៅ​ពី​នេះ លោក ស្វាយ ស៊ីថា ក៏បានដឹកនាំ​ក្រុម​ការងារ​មួយចំនួនចុះមើលផ្លូវដែលក្រុមហ៊ុនឯកជនដឹកដីធ្វើឱ្យខូច ពិបាក​ដល់​ការ​ធ្វើ​ដំ​ណើររបស់​ប្រជា​ពល​រដ្ឋ​ក្នុង​ភូមិច្បារមន​ ហើយដែល​បញ្ហា​នេះត្រូវ​បានប្រជាជនស្នើសុំ​ឱ្យជួយដោះស្រាយជា​បន្ទាន់ និង​បន្តចុះទៅ​ពិនិត្យ​មើលផ្លូវ និងកន្លែងបង្ហូរទឹកចេញ ក្នុងភូមិត្រពាំងផ្លុងផងដែរ។

បន្ទាប់​មក លោក ស្វាយ ស៊ីថា ក៏បានចុះសួរសុខទុក្ខ និងទទួល​យក​សំណូមពរ​ពីប្រជាជន​មួយ​ចំនួន ដូចជានៅភូមិថ្មី ភូមិត្រពាំងផ្លុង និងភូមិសេរីមានជោគ។ល។ និង​ថែម​ទាំងបាន​បរិច្ចាគ​នូវ​ថវិកា​ផ្ទាល់​ខ្លួន​ជូន​ដល់​ប្រជា​ពលរដ្ឋ​នៅ​តាម​ខ្នង​ផ្ទះ​ជា​ច្រើន​គ្រួសារ ដែល​ជាកាយវិការ​ដ៏ប្រពៃ​ក្នុង​វប្បធម៌​នៃ​ការ​ចែក​រំ​លែក​គ្នា​ទៅ​វិញ​ទៅ​មក​ ក៏ដូចជា​ការអនុវត្ត​នូវ​កាតព្វ​កិច្ច​ជា​ថ្នាក់ដឹកនាំ​ក្រុម​ការងារ ឬ​ក្នុង​នាមជាមន្ត្រី​ល្អជាមួយ​ប្រជាពលរដ្ឋ​​​​ ក្នុង​ស្មារតី​រួម​គ្នា​គិត រួម​គ្នា​ធ្វើ និង​រួម​គ្នា​ទទួល​ខុសត្រូវ ដើម្បី​ភាព​រីក​ចំ​រើន និងការ​លើក​កំ​ពស់​ជី​វភាព​រស់​នៅ​​របស់​ប្រជា​ពលរដ្ឋ​ក្នុង​មូលដ្ឋាន​។

ក្រៅ​ពី​នេះ លោក និងក្រុមការងារ បានចុះពិនិត្យមើលការងារ​ដាំដុះរបស់ប្រជាជន​ក្នុងភូមិ​ព្រៃ​ស្លែង ក្រោយពីក្រុមការងារបាន​​ចែកជូនកូនដំណាំដល់ប្រជាពលរដ្ឋ ដែលរួមមាន ដូចជា កូនម្រុំ កូនដូង​ក្រអូប និងកូន​ឬស្សី​ផ្អែមនាពេលកន្លងមក។ លោក ស្វាយ ស៊ីថា ក៏បានចុះត្រួតពិនិត្យ និង​សំណេះសំណាលការងារ ក៏ដូចជាលើកទឹកចិត្ត​ដល់ប្រជាការពារក្នុងភូមិព្រៃស្លែង ឱ្យខិតខំបំពេញ​ការងារ​របស់ខ្លួនឱ្យបានល្អ ក្នុងការការពារសុខសុវត្ថិភាពជូនប្រជាពលរដ្ឋក្នុងភូមិ និង​ថែម​ទាំង​បានជួប​ជុំ​​ពិសារអាហារ​សាមគ្គីជាមួយ​ប្រជា​ការ​ពារ​ភូមិ​ ដែល​ម្ហូប​អាហារ​ទាំង​នោះចម្អិន​ផ្ទាល់​ដោយ​ស្នាដៃក្រុម​ប្រជា​ការពារ​ភូមិ ក្នុង​បរិយាកាសរីករាយ និង​ស្និទ្ធស្នាលបំ​ផុត៕

អត្ថបទ៖ ក្រុម​ការងារ​ថ្នាក់​ជាតិចុះ​មូលដ្ឋាន​ឃុំកុមារាជា​

ទស្សនៈវិភាគ៖ តើនរណានឹងត្រូវឈរឈ្មោះ​ជាបេក្ខភាព​នាយករដ្ឋមន្ដ្រី សម្រាប់បក្ស​ប្រឆាំង នៅអាណត្តិក្រោយនេះ?

ជាការពិតណាស់ រយៈកាលកន្លងមកនេះ គណបក្សសង្រ្គោះជាតិ បានដើរទៅដល់ផ្លូវទាល់ ដែលចង់បកក្រោយក៏មិនបាន ទៅមុខក៏មិនរួច ហើយចង់លុបបំបាត់នូវចំណុច អវិជ្ជមាន របស់ខ្លួន ដែលបានភូតភរ កុហក បោកប្រាស់ប្រជាពលរដ្ឋក៏មិនបាន នោះក៏ព្រោះតែទង្វើ គ្មានទំនួលខុសត្រូវ និងអសីលធម៌របស់មេដឹកនាំគណបក្សសង្រ្គោះជាតិ ដែលបានប្រព្រឹត្តកាលពីពេលកន្លងមក។
បើនិយាយដល់ការបោះឆ្នោតវិញ គឺការបោះឆ្នោតឃុំ សង្កាត់ សល់តែជិតមួយឆ្នាំ ហើយការបោះឆ្នោតជាតិ គឺនៅសល់ត្រឹមតែ ២ឆ្នាំទៀតប៉ុណ្ណោះ ការបោះឆ្នោតសកលនឹងឈានចូលមកដល់ ប៉ុន្ដែបើក្រឡេកមើលទៅគណបក្សប្រឆាំង គឺកំពុងតែមានសភាពយ៉ាប់ ដោយមេដឹកនាំមួយកំពុងគេចខ្លួន និងមួយទៀតកំពុងសម្ងំខ្លួន ដូច្នេះមានសំណួរពីរដែលត្រូវបានចោទសួរថា តើក្នុងអាណត្តិក្រោយនេះលោក សម រង្ស៊ី ឬលោក កឹម សុខា ដែលជាអ្នកដឹកនាំក្បាលម៉ាស៊ីនរបស់បក្សនេះ? តើនរណានឹងត្រូវឈរឈ្មោះជាបេក្ខភាពនាយករដ្ឋមន្ដ្រី ក្នុងការចូលរួមបោះឆ្នោតអាណត្តិក្រោយ តើជាលោក សម រង្ស៊ី ឬជាលោក កឹម សុខា ?
បើនិយាយពីលោក សម រង្ស៊ី ដែលជាប្រធានកំពុងនិរទ្ទេសខ្លួនទៅក្រៅប្រទេស ដើម្បីគេចវេសពីប្រព័ន្ធតុលាការនោះ គឺគេសង្កេតឃើញជាទូទៅថា លោក សម រង្ស៊ី មានចរិតមួយគឺតែងតែអំពាវនាវឱ្យអន្ដរជាតិ ឱ្យបរទេសដាក់ការគាបសង្កត់ ឬផ្ដាច់ជំនួយ និងអំពាវនាវកុំឱ្យវិនិយោគិនបរទេស មកវិនិយោគនៅប្រទេសកម្ពុជា ហើយនៅពេលថ្មីៗនេះ លោក សម រង្ស៊ី ដែលក្នុងនាមលោកជា ប្រធានគណបក្សសង្រ្គោះជាតិ ថែមទាំងបានស្នើឱ្យសភានៃសហគមន៍អឺរ៉ុបបិទទីផ្សារនាំសម្លៀកបំពាក់កាត់ដេរ ពីកម្ពុជាទៅអឺរ៉ុបផងដែរ។
ការស្នើរបស់លោក សម រង្ស៊ី បែបនេះ គឺត្រូវបានប្រតិកម្មយ៉ាងខ្លាំងពីសំណាក់រាជរដ្ឋាភិបាល ជាពិសេសបណ្ដាអ្នកលេងហ្វេសប៊ុកជាច្រើន បានរិះគន់ព្រោងព្រាត ចំពោះការលើកឡើងរបស់លោក សម រង្ស៊ី ក្នុងន័យថា អ្នកដែលរងគ្រោះពិតប្រាកដនៃការបិទទីផ្សារអឺរ៉ុប គឺជាកម្មករ កម្មការិនី និងក្រុមគ្រួសាររបស់ពួកគេ, ទង្វើនេះត្រូវបានប្រជាជនមើលឃើញថា លោក សម រង្ស៊ី បំផ្លាញឆ្នាំងបាយរបស់ពួកគេ។
បើនិយាយចំពោះលោក កឹម សុខា មានរឿងពីក្រោយឆាកដ៏ស្មោកគ្រោក និងអសីលធម៌មានស្រីរាប់មិនអស់។ ក្រោយពីមានការបែកធ្លាយរឿងនេះមក លោក កឹម សុខា ក៏បង្កើតនូវគោលការណ៍ថ្មីសម្រាប់ខ្លួនឯងគឺ កុំឈ្លោះ កុំឆ្លើយ កុំឆ្លង ហើយគោលការណ៍ថ្មីនេះ ត្រូវបានគេសង្កេតឃើញថា លោក កឹម សុខា មិនអាចឈ្លោះ មិនអាចឆ្លើយ និងមិនអាចឆ្លងបានទេ ពីព្រោះថានេះជារឿងពិតដែលមិនអាចប្រកែកបាន និងមានមនុស្សរាប់លានបានដឹងរឿងនេះផងដែរ។
បច្ចុប្បន្ននេះលោកអនុប្រធាន កឹម សុខា បានលាក់ខ្លួន ពួនអាត្មានៅក្នុងស្នាក់ការគណបក្ស ដោយមិនហ៊ានដើរចេញ សូម្បីតែមួយជំហាន និងពន្លឺថ្ងៃខានបានឃើញអស់ជាច្រើនខែដែរ។
អ្នកតាមដានស្ថានការណ៍នយោបាយ មើលឃើញប្រហាក់ប្រហែលគ្នាថា លោក សម រង្ស៊ី គឺមិនអាចទៅរួចនោះទេ ពីព្រោះថា គាត់គឺមិនអាចវិលចូលស្រុកវិញ ដូចកាលបោះឆ្នោតអាណត្តិមុន ដែលត្រូវបាននាយករដ្ឋមន្ដ្រី ហ៊ុន សែន ស្នើសុំទៅព្រះមហាក្សត្រ សុំឱ្យមានការលើកលែងទោសចំពោះលោក សម រង្ស៊ី ប៉ុន្ដែនៅពេលនេះ គឺមិនដូចជាពេលមុនទៀតទេ ព្រោះនាយករដ្ឋមន្រ្តី ហ៊ុន សែន បានបង្ហាញនូវជំហរមួយចំពោះលោក សម រង្ស៊ី យ៉ាងច្បាស់ថា លោកមិនស្នើសុំលើកលេងទោសឱ្យលោក សម រង្ស៊ី នោះទេ ប្រសិនបើលោកស្នើសុំឱ្យលោក សម រង្ស៊ី បានវិលត្រឡប់មកកម្ពុជាវិញ លោកនឹងកាត់ដៃស្ដាំរបស់លោកចោល។
ដូចគ្នាផងដែរ លោក កឹម សុខា ក្នុងពេលនេះក៏មានបណ្ដឹងជាប់នឹងខ្លួនក្រោមបទចោទប្រកាន់ពីរ គឺបទសញ្ចារកម្ម (មាត្រា២៨៤) និងបទបដិសេធក្នុង ការចូលខ្លួន (មាត្រា៥៣៨) នៃក្រមព្រហ្មទណ្ឌ ដូច្នេះក្រោមបទចោទទាំងពីរនេះ ក៏សបញ្ជាក់ថា បំណងចង់ក្លាយជាប្រធាន និងជាបេក្ខភាពនាយករដ្ឋមន្ដ្រី ដូចកាលដែលលោកធ្វើជាប្រធានបក្សសិទ្ធិមនុស្ស អាចនឹងមិនចេញជារូបរាងបានឡើយ ប៉ុន្ដែគេក៏មិនទាន់អាចសន្និដ្ឋានទាំងស្រុងដែរថា តើលោក កឹម សុខា នឹងមិនមានច្រកចេញឬទេ។ ក្នុងរយៈពេលអវត្តមានរបស់លោក សម រង្ស៊ី គឺគណបក្សសង្រ្គោះជាតិ ត្រូវបានលោក កឹម សុខា គ្រប់គ្រងទាំងស្រុង ហើយដូចពាក្យចាស់មួយបានពោលថា ស្នេហ៍មិនឈ្នះសិ្នទ្ធ។ ដូច្នេះតើនៅផ្ទៃក្នុងបក្សសង្រ្គោះជាតិ នឹងមានការប្រែប្រួលបែបណាចំពោះតំណែងជាប្រធានបក្ស?
តើបន្ដទុកជូនលោក សម រង្ស៊ី ឬត្រូវជូនទៅលោក កឹម សុខា ដើម្បីដឹកនាំបក្សនេះបន្ដទៅមុខទៀត?។ មួយវិញទៀត អ្នកវិភាគយល់ឃើញថា តើធនធានមនុស្ស របស់គណបក្សសង្រ្គោះជាតិ មានតែមនុស្សពីរនាក់ហ្នឹងមែនដែរឬទេ? ដូច្នេះគឺដល់ពេលមនុស្សមួយចំនួន ដែលមានឥទ្ធិពល ក្នុងគណបក្ស គួរតែពិចារណាពីបេក្ខជនថ្មី។ ល្មមដល់ពេលដែលគណបក្សប្រឆាំង ត្រូវជ្រើសរើសធនធានមនុស្សថ្មីហើយ ព្រោះគណបក្សនេះមិនមានកម្លាំង និងធនធានមនុស្សដឹកនាំ ការប្រកួតប្រជែងជាមួយគណបក្សកាន់អំណាចនោះទេ។ បើមិនដូច្នេះទេគណបក្សសង្រ្គោះជាតិ គួរតែចាប់យកគណបក្សដទៃ ដែលខ្លួនគិតថា អាចសង្រ្គោះជាតិគណបក្សសង្រ្គោះជាតិបាន៕

សម្តេចតេជោ ហ៊ុន សែន ចំណាយជិត ១លានដុល្លារ សាងសង់អគារសិក្សាជាង ៦០បន្ទប់ នៅក្នុងខេត្តកំពង់ឆ្នាំង

(កំពង់ឆ្នាំង)៖ ក្នុងដំណើរចុះមកសំណេះសំណាល ជាមួយមន្រ្តីរាជការ និងកងកម្លាំងប្រដាប់អាវុធ នៅសាលាខេត្តកំពុងឆ្នាំង នាថ្ងៃទី០៩ ខែសីហា ឆ្នាំ២០១៦ នេះ ប្រមុខរាជរដ្ឋាភិបាលកម្ពុជា បានសម្រេចជួយសាងសង់ អគារសិក្សាតាមសាលានានា ក្នុងខេត្តកំពង់ឆ្នាំងសរុបជាង ៦០បន្ទប់ ដែលមានតម្លៃសរុបជិត ១លានដុល្លារអាមេរិក។ នេះបើតាមការបញ្ជាក់របស់ សម្តេចតេជោ ហ៊ុន សែន ក្នុងកិច្ចផ្តើមសំណេះសំណាលជាមួយមន្រ្តីរាជការ នៅសាលាខេត្តពោធិ៍សាត់ នារសៀលថ្ងៃដដែលនេះ ។

ការសម្រេចផ្តល់អគារសិក្សានេះ បានធ្វើឡើងបន្ទាប់ពី សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានចុះជួបសំណេះសំណាល និងស្តាប់ដោយផ្ទាល់នូវតម្រូវការ របស់លោកគ្រូ អ្នកគ្រូ រួមទាំងសិស្សានុសិស្សផងដែរ។ ក្នុងជំនួបចុះដោយផ្ទាល់នេះ គេបានសង្កេតឃើញថា សម្តេចតេជោ ហ៊ុន សែន ទទួលបានការស្វាគមន៍ដោយក្តីរីករាយ និងរំភើបបំផុតពីគ្រូៗ និងសិស្សានុសិស្ស។ រីករាយដោយសារពួកគេចាត់ទុកជំនួបនេះ គឺជាជំនួប ដ៏កម្រកើតមានសម្រាប់ពួកគេ ។

សាលាដែលទទួល បានការជួយសាងសង់ អគារសិក្សាពីប្រមុខរាជរដ្ឋាភិបាលកម្ពុជា រួមមាន៖

សាលាគរុកោសល្យ និងវិក្រិត្យការខេត្តកំពង់ឆ្នាំង ទទួលបានអគារសិក្សាថ្មី ១ខ្នង ចំនួន ២ជាន់ ស្មើ ១២បន្ទប់
វិទ្យាល័យព្រះបាទសុរាម្រិត ទទួលបានអគារសិក្សា ១ខ្នង កំពស់ ៣ជាន់ ស្មើនឹង ១៨បន្ទប់
វិទ្យាល័យ ហ៊ុន សែន រលាប្អៀ ក្នុងស្រុករលាប្អៀ ១ខ្នង កំពស់ ២ជាន់ ស្មើនឹង ១២ បន្ទប់
វិទ្យាល័យបរិបូណ៍ខាងត្បូង ក្នុងស្រុករលាប្អៀ ខេត្តកំពង់ឆ្នាំង ទទួលបានអគារសិក្សា ១ខ្នង កំពស់ ២ជាន់ ស្មើនឹង ១២បន្ទប់ រួមទាំងធ្វើបណ្ណាល័យ ទីចាត់ការ ១ខ្នង ៣បន្ទប់ របងសាលា បង្គន់អនាម័យ និងតារាងបាល់ទាត់ រួមទាំងជីកស្រះទឹកធំមួយ
វិទ្យាល័យបរិបូរណ៍ ក្នុងស្រុកបរិបូរណ៍ ទទួលបានអគារសិក្សាចំនួន ២ខ្នង ដោយ ១ខ្នង មាន ២ជាន់ ស្មើនឹង ១២បន្ទប់ រួមទាំងទីចាត់ការ១ មានបីបន្ទប់ ។ សម្តេចតេជោ ក៏បានឲ្យជីកស្រះ ១ហិកតាកន្លះ ដ៏ធំមួយ សម្រាប់សាលារៀនប្រើប្រាស់ និងសហគមន៍ នៅក្បែរសាលាបានប្រើប្រាស់ផងដែរ ។
តាមការចុះជួប និងសំណេះសំណាលដោយផ្ទាល់នេះ សម្តេចតេជោ ហ៊ុន សែន បានគូសបញ្ជាក់ថា វិស័យអប់រំនៅកម្ពុជា កំពុងបោះជំហានទៅមុខគួរឲ្យកោតសរសើរ ។ សម្តេចតេជោ រំពឹងថា តាមរយៈការផ្តល់អគារសិក្សាថ្មីៗទាំងនេះ នឹងជួយសម្រួលសេចក្តីត្រូវការចាំបាច់របស់សាលារៀន និងបានជួយដល់សិស្សានុសិស្ស បន្តការសិក្សារៀនសូត្រ នៅតាមបណ្តាខេត្តឲ្យកាន់តែងាយស្រួល ។

សូមបញ្ជាក់ថា នៅក្នុងដំណើរចុះមកសំណេះសំណាល ជាមួយមន្រ្តីរាជការ កងកម្លាំងប្រដាប់អាវុធនៅខេត្តកំពុង ក្រៅពីចុះទៅតាមសាលារៀនហើយនោះ សម្តេចតេជោ ហ៊ុន សែន ក៏បានចូលសួរសុខទុក្ខសំណេះសំណាល ជាមួយអាជីវករនៅផ្សារលើ ក្នុងទីរួមខេត្តកំពង់ឆ្នាំង ព្រមទាំងអញ្ជើញទៅសួរសុខទុក្ខអ្នកជំងឺ នៅក្នុងមន្ទីរពេទ្យបង្អែកខេត្តកំពង់ឆ្នាំង ផងដែរ។ ក្នុងដំណើរចុះសំណេះសំណាលជាមួយអាជីវករ សម្តេចតេជោ បានសម្រេចឲ្យពួកគេបន្តលក់នៅក្នុងផ្សារ រហូតដល់ឆ្នាំ ២០៤០ ទៅតាមសំណើរបស់ពួកគេ ។

រហូតមកដល់ថ្ងៃទី០៩ ខែសីហា ឆ្នាំ២០១៦ នេះ ខេត្តចំនួន ១២ហើយ ដែល សម្តេចតេជោ ហ៊ុន សែន បានចុះទៅដល់ ដើម្បីពិនិត្យសមិទ្ធផលការងារ ដែលសម្រេចបាន និងការងារត្រូវធ្វើបន្ត ក៏ដូចជាជួបសំណេះសំណាល ជាមួយមន្រ្តីរាជការ និងកងកម្លាំងប្រដាប់អាវុធ ។ ខេត្តទាំង១២ នេះរួមមាន៖ បាត់ដំបង បន្ទាយមានជ័យ សៀមរាប កំពង់ធំ ស្ទឹងត្រែង ក្រចេះ កំពត កែប ព្រះសីហនុ កំពង់ស្ពឺ កំពង់ឆ្នាំង និងពោធិ៍សាត់ ។

ដំណើរចុះមកតាមខេត្តនេះ សម្តេចនាយករដ្ឋមន្រ្តី ក៏តែងបានចូលជួបសំណេះសំណាល ជាមួយសិស្សានុសិស្ស និងក្រុមអាជីវករ ហើយតែងបានផ្តល់អគារសិក្សា និងបានដោះស្រាយ បញ្ហាទុក្ខលំបាកជូនក្រុមអាជីវករផងដែរ ៕

សម្តេចកិត្តិ​ព្រឹទ្ធបណ្ឌិត ប៊ុន រ៉ានី ហ៊ុនសែន បានអញ្ជើញ​ចុះសួរសុខទុក្ខ និងសំណេះសំណាលជាមួយ កុមារខ្សោយសតិបញ្ញា កុមារពិការ កុមារផ្ទុក​មេរោគអេដស៍ និងកុមារកំព្រា ២៥០នាក់

នៅព្រឹកថ្ងៃទី ១០ ខែសីហា ឆ្នាំ២០១៦ នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញចុះសួរសុខទុក្ខ និងសំណេះសំណាលជាមួយ កុមារខ្សោយសតិបញ្ញា កុមារពិការ កុមារផ្ទុកមេរោគអេដស៍ និងកុមារកំព្រា ២៥០នាក់ គ្រូ បុគ្គលិក និងពេទ្យ ចំនួន ៩១នាក់ នៅបុរីទារក និង កុមារជាតិ ស្ថិតនៅភូមិតំណាក់៣ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ដោយចូលរួមក្នុងកម្មវិធីនេះមានកុមារ បុគ្គលិកមកពី អង្គការសាលាទន្សាយ អង្គការហេបភីទ្រី និងអង្គការជំនួយនៃក្តីសង្ឃឹមសម្រាប់សហគមន៍ដែលមានទីតាំងបណ្តោះអាសន្ននៅអនុវិទ្យាល័យអនុវត្តន៍ក្រុងតាខ្មៅ ខេត្តកណ្តាល។
សម្តេចកិត្តិព្រឹទ្ធបណ្ឌិត បានអញ្ជើញចុះជួបសំណេះសំណាល សួរសុខទុក្ខ ផ្តល់ក្តីអាណិត ស្រឡាញ់ មេត្តា ករុណា និងពិនិត្យសកម្មភាពប្រចាំថ្ងៃរបស់កុមារដែលនៅតាមបន្ទប់លេងល្បែងកម្សាន្ត បន្ទប់ស្តារនិតិសម្បទា បន្ទប់រស់នៅរបស់ពួកគេ ដែលជាការលើកទឹកចិត្តយ៉ាងធំធេងដល់កុមារពិការ កុមារកំព្រាទាំងនោះ។
សម្តេចកិត្តិព្រឹទ្ធបណ្ឌិត បានថ្លែងអំណរគុណ និងកោតសរសើរចំពោះ លោកគ្រូ អ្នកគ្រូ បុគ្គលិកទាំងអស់ ពិសេស អ្នកស្ម័គ្រចិត្តបរទេស ដែលបានបរិច្ចាគកម្លាំងកាយ-ចិត្ត ចូលរួមមើលថែទាំកុមារទាំងនេះ ដោយក្តីអាណិត ស្រឡាញ់ ពិតៗ។ ចំពោះកុមារមកពី អង្គការជំនួយនៃក្តីសង្ឃឹមសម្រាប់សហគមន៍ ដែលរស់នៅតាមផ្ទះជាមួយឪពុកម្តាយ សូមបន្តចូលរួមលើកទឹកចិត្តឱ្យកុមារៗជាកូនរបស់ខ្លួន បានមកទទួលការអប់រំ បណ្តុះបណ្តាល ពីអង្គការឱ្យបានទៀងទាត់។
សម្តេចកិត្តិព្រឹទ្ធបណ្ឌិត បានឧបត្ថម្ភកុមារចំនួន ២៥០នាក់ ម្នាក់ៗ ទទួលបាន មុង១ ភួយ១ និងថវិកា ២០,០០០រៀល ដែលក្នុងនោះ មកពី បុរីទារក និងកុមារជាតិ ចំនួន ១២៥នាក់ មកពីអង្គការសាលាទន្សាយ ៤៥នាក់ មកពីអង្គការហេបភីទ្រី ១០នាក់ និងមកពីអង្គការជំនួយនៃក្តីសង្ឃឹមសម្រាប់សហគមន៍ ចំនួន ៧០នាក់ និងឧបត្ថម្ភបុគ្គលិក គ្រូ និងពេទ្យ ចំនួន ៩១នាក់ ម្នាក់ៗទទួលបាន មុង១ ភួយ១ សារុង១ ក្រមា១ និងថវិកា ១០០,០០០រៀល ក្នុងនោះមកពី បុរីទារក និងកុមារជាតិ ចំនួន ៥៦នាក់ មកពី អង្គការសាលាទន្សាយ ១៣នាក់ មកពីអង្គការហេបភីទ្រី ១០នាក់ និងមកពីអង្គការជំនួយនៃក្តីសង្ឃឹមសម្រាប់សហគមន៍ ចំនួន ១២នាក់ ព្រមទាំង ឧបត្ថម្ភអ្នកស្ម័គ្រចិត្តជនជាតិបរទេសនៃបុរីទារក និងកុមារជាតិ ចំនួន ២៥នាក់ ម្នាកៗ ថវិកា ១០០,០០០រៀល។
អង្គការចំនួនពីរ ក្នុងនោះ បុរីទារក និង កុមារជាតិ ទទួលបានការឧបត្ថម្ភជា ថវិកា ១០,០០០,០០០រៀល អង្ករ ២តោន មី ៥០កេស ត្រីខ ២០កេស សៀង(ប្រៃ, ផ្អែម) ១០០គីឡូក្រាម ឆៃប៉ូវ(ប្រៃ, ផ្អែម) ១០០គីឡូក្រាម ទឹកក្រូច ៣០កេស ទឹកបរិសុទ្ធ ៥០កេស នំធុង ២០ធុង ផ្លែប៉ោម ១០កេស ផ្លែទំពាំងបាយជូ ១០កេស ម្សៅសាប៊ូ ៦០គីឡូក្រាម សាប៊ូដុំ ៣៦០ដុំ ថ្នាំបាញ់មូស ៦០ដប ទឹកជូតឥដ្ឋ ២០ធុងតូច ឆ្នាំង ៣២ឆ្នាំង ខ្ទះធំ ២ខ្ទះ ចានដែកធំបោកខោអាវ ២ចានដែក វែកសម្ល ១៥វែក វែកឆាធំ ២វែក ពូក(មានស្រោម) ទំហំ ២ម៉ែត្រ x ២,៥ម៉ែត្រ ចំនួន ២០ពូក និងខ្នើយកើយចំនួន ១២៥ខ្នើយ។
ដោយឡែក អង្គការជំនួយនៃក្តីសង្ឃឹមសម្រាប់សហគមន៍ ដែលមកពីក្រុងតាខ្មៅ ខេត្តកណ្តាល ទទួលបាន ថវិកា ៥,០០០,០០០រៀល មី ១០កេស ត្រីខ ២កេស ទឹកក្រូច ៥កេស ទឹកបរិសុទ្ធ ១០កេស ផ្លែប៉ោម ២កេស និងផ្លែទំពាំងបាយជូ ២កេស៕

សម្តេចតេជោ ហ៊ុន សែន៖ ចំណងមិត្តភាព និង សហប្រតិបត្តិការកម្ពុជា និងឥណ្ឌូនេស៊ីកាន់តែរឹងមាំ

យោងតាមទំព័រហ្វេសប៊ុករបស់សម្តេចតេជោ បានឱ្យដឹង
ថាបន្ទាប់ពីបានអញ្ជើញវិលត្រឡប់ការជួបសំណេះ
សំណាលជាមួយមន្រ្តីរាជការ កងកម្លាំងប្រដាប់អាវុធ និងក្មួយៗសិស្សានុសិស្សនៅខេត្តកំពង់ឆ្នាំង និង ខេត្តពោធិ៍សាត់រួចមក នៅរសៀលថ្ងៃទី១០ ខែសីហា នេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជា ណាចក្រកម្ពុជា បានអនុញ្ញាតអោយលោក រីយ៉ាមីហ្សាដ រីយ៉ាគូឌូ (Ryamizard Ryacudu) រដ្ឋមន្ត្រីការពារជាតិ ប្រទេសឥណ្ឌូនេស៊ីចូលជួបសំដែងការគួរសម និងពិភាក្សាការងារ នៅវិមានសន្តិភាព។

លោក Ryamizard Ryacudu មកកម្ពុជាលើកនេះជាលើកទី៣ហើយ ដែលលើកទី១ គឺនៅសម័យ អ៊ុន
តាក់( UNTAC) ក្នុងពេលរក្សាសន្តិសុខ និងរៀបចំការបោះឆ្នោតកាលពីឆ្នាំ ១៩៩៣។ លោក Ryamizard Ryacudu បានឃើញការរីកចម្រើនយ៉ាងខ្លាំងរបស់កម្ពុជា និងបានកោតសរសើរ សម្តេចតេជោ ដែលបានដឹកនាំរំដោះ និងកសាងប្រទេសកម្ពុជារីកលូតលាស់ដល់សព្វថ្ងៃ។
លោក Ryamizard បានបញ្ជាក់ផងដែរអំពីចំណុច សំខាន់៣នៃកិច្ចសហការដែលត្រូវ ១)ពង្រឹងនិងជំរុញការចុះ MOU អោយបានឆាប់ ២)ការទប់ស្កាត់ ISIS និង ៣)ការ ត្រួតពិនិត្យដែនសមុទ្រ។
សម្តេចតេជោ បានបញ្ជាក់ថា សហប្រតិបត្តិការលើវិស័យការពារជាតិរបស់ប្រទេសទាំងពីរគឺមានរយៈពេលជាង ១០ ឆ្នាំមកហើយ។ កន្លងទៅឥណ្ឌូនេស៊ីបានផ្តល់ជំនួយសម្ភារៈ និងបានជួយបណ្តុះបណ្តាលហ្វឹកហ្វឺនដល់នាយទាហាន
ពិសេសកម្ពុជាផងដែរ។
សម្តេចតេជោ ហ៊ុន សែន បានថ្លែងអំណរគុណ ដល់ ប្រទេសឥណ្ឌូនេស៊ី ដែលបានដើរតួនាទីយ៉ាងសំខាន់ នៅក្នុងការស្វែងរកសន្តិភាពសំរាប់ប្រទេសកម្ពុជា ក្នុងទស្សវត្សរ៍ ៨០ និងដើម ៩០ ដោយសារពេលនោះ ប្រទេសឥណ្ឌូនេស៊ីគឺជាសហប្រធាននៃសន្និសីទទីក្រុងប៉ារីស រួមទាំងតួនាទីក្នុងការរក្សាសន្តិភាព អំឡុងសម័យអ៊ុនតាក់។ ក្រសួងការពារជាតិនៃប្រទេសទាំងពីរនឹងចុះហត្ថលេខាលើ
អនុស្សារណៈយោគយល់គ្នាបន្ថែមទៀតដែលបើកអោយ
មានកិច្ចសហប្រតិបត្តិការទូលំទូលាយលើវិស័ការពារជាតិ។
នៅថ្ងៃទី ១៩ ខែសីហា ខាងមុខនេះ សម្តេចតេជោ ហ៊ុន សែន នឹងដឹកនាំគណប្រតិភូទៅបំពេញទស្សនៈកិច្ចនៅប្រទេស Timor-Leste ដែលចំខួបលើកទី ៤៦ នៃថ្ងៃបង្កើតកងទ័ព នៃប្រទេសនេះ ក្នុងនោះគឺកម្ពុជាគាំទ្រ Timor-Leste ដើម្បីចូលជាសមាជិកអាស៊ានផងដែរ។
កិច្ចពិភាក្សារវាងសម្តេចតេជោ ហ៊ុន សែន និង លោក Ryamizard Ryacudu នៅថ្ងៃនេះគឺបានរឹតបន្តឹង នូវចំណងមិត្តភាព និងសហប្រតិបត្តិការកាន់តែ ល្អរឹងមាំរវាងកម្ពុជា និង ឥណ្ឌូនេស៊ី ៕

ភស្តុតាង​ជាច្រើនបង្ហាញថា " បក្ស​សង្គ្រោះជាតិ​ក្លែង​ស្នាមមេដៃ បោកប្រាស់​ទាំងព្រះ​មហាក្សត្រ និងប្រជា​ពលរដ្ឋ"

នៅរសៀលថ្ងៃទី០៥ ខែសីហា ឆ្នាំ២០១៦នេះ គណៈកម្មការធ្វើកោសល្យវិច្ច័យ លើស្នាមមេដៃប្រជាពលរដ្ឋ ដែលបានដាក់ថ្វាយព្រះមហាក្សត្រ បានធ្វើសន្និសីទកាសែត ស្តីពីលទ្ធផលការធ្វើកោសល្យវិច្ច័យ លើស្នាមមេដៃប្រជាពលរដ្ឋ នៅក្នុងញត្តិ របស់គណបក្សសង្រ្គោះជាតិ ដែលដាក់ថ្វាយព្រះមហាក្សត្រនាពេលកន្លងទៅ នៅទីស្តីការក្រសួងមហាផ្ទៃ។

នៅក្នុងសន្និសីទរបស់នាយឧត្តម ខៀវ សុភ័គ បានឱ្យដឹងថា គិតត្រឹមថ្ងៃទី០៥ ខែសីហា ឆ្នាំ២០១៦នេះ ក្រសួងមហាផ្ទៃ បានធ្វើកោសល្យវិច្ច័យលើស្នាមមេដៃ ៦ម៉ឺន ក្នុងចំណោមស្នាមមេដៃជាង១៧ម៉ឺន របស់ CNRP ដោយក្នុងនោះ រកឃើញថា អត់អាស័យដ្ឋានសោះ ២៦៩៥៣នាក់ មានឈ្មោះ គ្មានស្នាមមេដៃ១៨៨ឈ្មោះ និងមានស្នាមមេដៃ តែអត់ឈ្មោះចំនួន៩ និងមនុស្សម្នាក់ធ្វើការផ្តិតម្រាមដៃរបស់ខ្លួនដល់៧ម្រាមដៃ។ ចំពោះទម្រង់និងខ្លឹមសារនៅក្នុងញត្តិគឺមានលក្ខណៈដូចគ្នាទាំងអស់។
នាយឧត្ដមសេនីយ៍ ខៀវ សុភ័គ បានបញ្ជាក់ថែមទៀតថា ប្រជាពលរដ្ឋ១២៧នាក់ ចេញមុខតវ៉ាចោទប្រកាន់ថា សកម្មជន CNRP បានបោកប្រាស់ពួកគេឱ្យផ្តិតមេដៃដើម្បីទទួលបានជំនួយ ស្នើសុំធ្វើផ្លូវថ្នល់ ស្នើសុំជីកស្រៈ ស្នើសុំទំនិញចុះថោក និងមានមូលហេតុផ្សេងៗមួយ ចំនួនទៀត ប៉ុន្តែយកទៅបម្រើហេតុផលនយោបាយទៅវិញ។
នាយឧត្ដមសេនីយ៍ ខៀវ សុភ័គ បានបញ្ជាក់បន្ថែមទៀតថា នៅក្នុងញត្តិនោះ ត្រូវបានពិនិត្យឃើញថាមានភាពមិនប្រក្រតីមួយចំនួនដូចជា មានឈ្មោះប្រជាពលរដ្ឋចំនួន ១៦២៣ នាក់ គ្មានវត្តមាននៅក្នុងមូលដ្ឋានរស់នៅឡើយក្នុងពេលធ្វើញត្តិនោះ ហើយប្រជាពលរដ្ឋចំនួន ៤៤៥នាក់ បានផ្ទេរទីលំនៅ និង៧៧នាក់បានស្លាប់បាត់បង់ជីវិត។ រហូតមកដល់ពេលនេះ មានសកម្មជនគណបក្សសង្រ្គោះជាតិ ២៥១នាក់ ត្រូវបានហៅមកធ្វើការណែនាំឱ្យបញ្ឈប់សកម្មភាពរឿងដើរបោកប្រាស់ប្រជាពលរដ្ឋឱ្យផ្តិតមេដៃលើញត្តិ ព្រមទាំងធ្វើកំណត់ហេតុ ។
ដោយឡែក នាយឧត្តមសេនីយ៍ កង សុខន ក៏បានបញ្ជាក់ផងដែរថា ក្រសួងមហាផ្ទៃ នឹងចាត់ឲ្យអគ្គស្នងការនគរបាលជាតិ ធ្វើការស៊ើបអង្កេតបន្តទៀតលើលទ្ធផលនៃការស៊ើបអង្កេតរបស់ គណៈកម្មការកោសល្យវិច្ច័យ របស់ក្រសួងមហាផ្ទៃដើម្បីបញ្ជាក់ពីភាពត្រឹមត្រូវថែមទៀត។
សូមរំលឹកថា កាលពីថ្ងៃទី៣០ ខែឧសភា ឆ្នាំ២០១៦ កន្លងទៅ តំណាងរាស្រ្តគណបក្សប្រឆាំង បានដាក់ញត្តិអមដោយស្នាមមេដៃរបស់ប្រជាពលរដ្ឋចំនួនជាង ១៧ម៉ឹនស្នាមមេដៃ ថ្វាយព្រះ មហាក្សត្រដើម្បីទាមទារដោះលែងមន្រ្តីសិទ្ធិមនុស្ស និងអគ្គលេខាធិការរងគ.ជ.បនិងអំពាវនាវឱ្យទម្លាក់ការចោទប្រកាន់ទៅលើថ្នាក់ដឹកនាំគណបក្សសង្រ្គោះជាតិផងដែរ៕