លិខិតមិត្តអ្នកអាន៖ «មានតែតុលាការទេដែលអាចបញ្ចប់ការតវ៉ាគ្មានហេតុផលនិងខ្វះភាពឡូហ្សិករបស់អតីតបុគ្គលិកណាហ្គាវើល»

រហូតមកទល់ពេលនេះ  ដំណោះស្រាយវិវាទការងាររវាងក្រុមហ៊ុនណាហ្គាវើលដ៏ និងអតីតបុគ្គលិក២០០នាក់នៅតែបន្តអូសបន្លាយដោះស្រាយមិនចេញ បើទោះបីជាកិច្ចចរចារកដំណោះស្រាយក្រោមការសម្របសម្រួលពីក្រសួងការងារបានធ្វើឡើងជាច្រើនលើកហើយក៏ដោយ។ 

ចំណុចគន្លឹះដែលធ្វើឲ្យរាំងស្ទះដល់កិច្ចចរចានេះគឺការទាមទាររបស់សហជីពកម្មករឲ្យក្រុមហ៊ុនទទួលយកអតីតបុគ្គលិកទាំង២០០នាក់ចុងក្រោយដែលមិនព្រមទទួលយកសំណង ឲ្យចូលធ្វើការវិញ ចំណែឯភាគីនិយោជកបដិសេធមិនព្រមទទួលយកកម្មករទាំងនោះចូលធ្វើការវិញជា ដាច់ខាត។ 

ឥឡូវនេះ យើងសាកល្បងស្វែងយល់ពីជម្រៅនៃវិវាទការងារមួយនេះ។ 

ជាទូទៅ នៅក្នុងវិវាទការងារ សហជីពកម្មករច្រើនតែទាមទារឲ្យនិយោជកគោរពលក្ខខណ្ឌការងារ ឬទាមទារឲ្យនិយោជកផ្តល់អត្ថប្រយោជន៍ផ្សេងៗឲ្យបានត្រឹមត្រូវតាមច្បាប់ស្តីពីការងារ និងជាពិសេសពេលនិយោជក បញ្ឈប់កិច្ចសន្យាការងារ ត្រូវផ្តល់សំណងនិងអត្ថប្រយោជន៍ទាំងឡាយឲ្យស្របតាមច្បាប់ការងារជាដើម។ ប៉ុន្តែ ចម្លែកអ្វីតែអតីតបុគ្គលិកក្រុមហ៊ុនណាហ្គាវើលដ៏មួយក្រុមនេះ បែរជានៅក្រាញននៀលទាមទារឲ្យនិយោជកយកខ្លួនចូលធ្វើការវិញ បន្ទាប់ពីក្រុមហ៊ុនបញ្ឈប់ពីការងារ? 

ការទាមទារបែបនេះត្រូវបានគេមើលឃើញថា ខ្វះភាពឡូហ្សិក និងហាក់មានរបៀបវារៈនៅពីក្រោយខ្នងហើយចំណុចដែលគួរពិចារណាមានដូចតទៅ៖

ទី១៖ អតីតបុគ្គលិកទាំងអស់នោះធ្លាប់បានរិះគន់ក្រុមហ៊ុនណាហ្គាវើលដ៏ថាជាក្រុមហ៊ុនបរទេសជិះជាន់កម្មករខ្មែរ និងជាក្រុមហ៊ុនដែលមិនបានផ្តល់ប្រយោជន៍ពិតប្រាកដដល់បុគ្គលិកកម្មករ។ 

ត្រង់នេះ សំណួរដែលចោទ ឡើងគឺ តើហេតុអ្វីបានជាពួកគេនៅក្រាញននៀល ចង់ធ្វើការនៅក្នុងក្រុមហ៊ុនមួយដែលខ្លួនរិះគន់យ៉ាង

ខ្លាំងបែបនេះទៅវិញ? បើក្រុមហ៊ុននេះអាក្រក់ គួរតែពួកគេត្រេកអរពេលក្រុមហ៊ុនបញ្ឈប់ពួកគេពីការងារដោយផ្តល់សំណងនិងអត្ថប្រយោជន៍គ្រប់បែបយ៉ាងតាមច្បាប់ការងារដើម្បីពួកគេអាចទៅរកការងារថ្មីធ្វើនៅក្រុមហ៊ុន ណាដែលខ្លួនស្រឡាញ់ ពេញចិត្ត។

 «នៅលើពិភពលោកយើងនេះ តើមានបុគ្គលិកកម្មករណាននៀលទាមទារចង់ធ្វើការនៅកន្លែងដែលខ្លួនយល់ឃើញថា ជិះជាន់និងគ្មាន ប្រយោជន៍ដល់ខ្លួនបែបនេះ? ចម្លើយគឺគ្មានទេ។  ដូច្នេះ ករណីអតីតក្រុមហ៊ុនណាហ្គាវើលដ៏ គឺជារឿងដ៍ចម្លែកនិងច្បាស់ណាស់ពិតជាមានអ្វីនៅពីក្រោយខ្នងហើយ។

ទី២៖ តើមានច្បាប់ណា ឬ មាត្រាណាចែងអំពីការបង្ខិតបង្ខំឲ្យនិយោជកត្រូវទទួលយកបុគ្គលិកកម្មករដែលគេមិនពេញចិត្តអោយចូលធ្វើការវិញដែរឬទេ? ទោះច្បាប់ការងារនៅក្នុងប្រទេសណាក៍ដោយ 

ក៏មិនដែលបានចែងយ៉ាងដូច្នេះដែរពីព្រោះការជ្រើសរើសបុគ្គលិកគឺជាសិទ្ធិរបស់និយោជកដោយគ្មាននរណាអាចបង្ខិតបង្ខំបានឡើយ ជាពិសេសនិយោជិតឬសហជីពមិនអាចបង្ខំឲ្យនិយោជកទទួលយកខ្លួនទៅធ្វើការដោយគ្មានការយល់ព្រមពីនិយោជកឡើយ។ បើដូច្នេះ តើសំអាងលើអ្វីដែលសហជីពទាមទារឲ្យនិយោជកក្រុមហ៊ុនណាហ្គាវើលដ៏ទទួលយកអតីតបុគ្គលិកដែលត្រូវបានគេបញ្ឈប់ឲ្យចូលធ្វើការវិញ? 

ទី៣៖ បើគិតពីពេលវេលាដែលអតីតបុគ្គលិកណាហ្គាវើលដ៏ទាំងនោះតវ៉ា គឺមានរយៈជាច្រើនខែមកហើយ។ តើហេតុអ្វីបានជាពួកគេនៅក្រាញននៀលចង់បានការងារនៅក្នុងក្រុមហ៊ុនដែលគេមិនស្វាគមន៍ដោយប្រើរយៈពេលយូរយ៉ាងនេះ? តើពួកគេបានថវិកាមកពីណាដើម្បីចិញ្ចឹមគ្រួសារបើការងារក៏គ្មាន ចំណែកឯពេលវេលាត្រូវចំណាយទាំងស្រុងទៅលើការតវ៉ាទៅហើយនោះ? តើនរណាជាអ្នកចិញ្ចឹមការតវ៉ានេះ? ហើយពួកគេមានបំណងអ្វី? 

ទី៤៖ ទីលានប្រជាធិបតេយ្យត្រូវបានបង្កើតឡើងសម្រាប់ឲ្យប្រជាពលរដ្ឋ កម្មករ និយោជិត សម្តែងមតិ ប៉ុន្តែ ពួកគេមិនព្រមទៅតវ៉ានៅទីនោះឡើយ បែរជាមកតវ៉ាកន្លែងក្រុមហ៊ុនដែលនាំដល់ការរំខានដល់ដំណើរការរបស់ក្រុមហ៊ុន និងធ្វើឲ្យប៉ះពាល់សណ្តាប់ធ្នាប់សាធារណៈយ៉ាងខ្លាំង។ តើហេតុអ្វីបានជាពួកគេធ្វើយ៉ាងដូច្នេះ? តើជាការតវ៉ាដើម្បីរកដំណោះស្រាយការងារ ឬក៏ជាចេតនានៃការ បង្កការរំខាននិងអុកឡុក? 

ទី៥៖ ក្រសួងការងារបានសម្របសម្រួលឲ្យមានជំនួបចរចារកដំណោះស្រាយចំនួន ៨លើកមកហើយ តែនៅតែគ្មានបានលទ្ធផល

អ្វីឡើយពីព្រោះជារៀងរាល់លើក ដំណោះស្រាយត្រូវបានរាំងស្ទះនៅត្រង់ការទាមទារឲ្យក្រុមហ៊ុនទទួល យកអតីតបុគ្គលិកទាំងនោះចូលធ្វើការវិញ។ 

ដូច្នេះ ទំនងជាដល់ពេលដែលគួរត្រូវប្រើជម្រើសចុងក្រោយហើយ នោះគឺការបញ្ជូនសំណុំរឿងទៅតុលាការដើម្បីសម្រេចសេចក្តី ពីព្រោះយន្តការ ករុមប្រឹក្សាអាជ្ញាកណ្តាលនិងការសម្របសម្រួលរបស់ក្រសួងការងារត្រូវបានប្រើអស់លទ្ធភាពហើយនៅតែមិនអាចដោះស្រាយបាន។ ក្នុងន័យនេះ មានតែតុលាការទេដែលអាចកាត់សេចក្តីជាចុងក្រោយ។ 

សរុបមកវិញ បើគ្មានរបៀបវារៈនៅពីក្រោយខ្នងទេ ការតវ៉ានេះក៍មិនអាចអូសបន្លាយរហូតដល់ពេលនេះបានឡើយ។ ការអត់ធ្មត់របស់អាជ្ញាធរមានសមត្ថកិច្ច និងកិច្ឋខិតខំប្រឹងប្រែងរបស់ក្រសួងការងារដើម្បីសម្របសម្រួលក៏បានធ្វើដល់កម្រិត ហើយដែរ ប៉ុន្តែនៅតែគ្មានដំណោះស្រាយដោយសារតែចេតនាចង់បង្កការរាំងស្ទះពីសំណាក់អតីតបុគ្គលិកមួយក្រុមនេះ។ 

នៅពេលដែលយន្តការសម្របសម្រួលត្រូវបានប្រើអស់លទ្ធភាពហើយនៅតែមិនអាចរកច្រកចេញ បានដោយសារតែលក្ខខណ្ឌ មិនសមស្របនិងមិនសមហេតុផលនៃការទាមទារ មានតែវិធានការ

ច្បាប់ទេ ពោលគឺយន្តការតុលាការតែមួយគត់ដែលអាចសម្រេចបិទបញ្ចប់រឿងនេះបាន៕

ដោយៈ អ្នកនយោបាយតុកាហ្វេ

ពិធីបើកកិច្ចប្រជុំកំពូលលើកទី៤ ស្តីពីបញ្ហាទឹក នៅតំបន់អាស៊ី-ប៉ាស៊ីហ្វីក

កិច្ចប្រជុំកំពូលលើកទី៤ ស្តីពីបញ្ហាទឹក នៅតំបន់អាស៊ី-ប៉ាស៊ីហ្វីក ក្រោមមូលបទ ធនធានទឹកសម្រាប់ការអភិវឌ្ឍប្រកបដោយចីរភាព : ឧត្តមានុវត្តន៍ និងអ្នកបន្តវេនជំនាន់ក្រោយ បានប្រារព្វពិធីបើកជាផ្លូវការ នៅព្រឹកថ្ងៃទី២៣មេសា នៅសាល Komamoto Jo ក្នុងទីក្រុងគូម៉ាម៉ូតូ ខេត្តគូម៉ាម៉ាតូ ប្រទេសជប៉ុន។ ព្រះចៅអធិរាជជប៉ុន សម្តេច ឯកឧត្តម ប្រមុខរដ្ឋ ប្រមុចរដ្ឋាភិបាល នៃប្រទេសមួយចំនួន បានយាង និងអញ្ជើញចូលរួមក្នុងប្រជុំកំពូលដ៏មានសារសំខាន់នេះ ដោយផ្ទាល់ និងប្រព័ន្ធវីដេអូអនឡាញ។ ទីក្រុងគូម៉ាម៉ូតូ គឺជាទីក្រុងធំទី១២ របស់ប្រទេសជប៉ុន មានផ្ទៃក្រឡាជាង ៣៩០គីឡូម៉ែក្រឡា និងមានប្រជាជនរស់នៅប្រមាណ ៧៣៧ពាន់៦៤០នាក់។

ប្រមុខរដ្ឋាភិបាល នៃប្រទេសជប៉ុន កម្ពុជា ឡាវ ទូវ៉ាលូ នេប៉ាល់ រួមទាំងបណ្តារដ្ឋមន្រ្តី នៃប្រទេសក្នុងតំបន់អាស៊ី-ប៉ាស៊ីហ្វីក បានអញ្ជើញចូលរួមកិច្ចប្រជុំកំពូលដ៏មានសារសំខាន់នោះ ដែលមានប្រទេសជប៉ុនធ្វើជាម្ចាស់ផ្ទះ។ នៅក្នុងពិធីបើកកិច្ចប្រជុំកំពូលរបស់ខ្លួន ព្រះចៅអធិរាជជប៉ុន មានព្រះរាជបន្ទួលថា ទឹកពិតជាមានទំនាក់ទំនងខ្លាំងណាស់ សម្រាប់មនុស្សសត្វ ដែលរស់នៅលើភពផែនដី នៃលោកយើងនេះ។ ខេត្តគូម៉ាម៉ូតូ គឺជាខេត្តមួយរបស់ប្រទេសជប៉ុន ដែលមានប្រភពទឹកក្រោមដីដ៏ល្អ សម្រាប់បម្រើមនុស្ស សត្វ ពិសេសការស្រោចស្របលើវិស័យកសិកម្ម។ កាលពីខែកក្កដា ឆ្នាំ២០២០ តំបន់នេះគួម៉ាម៉ូតូ បានទទួលរងគ្រោះយ់ាងខ្លាំងពីគ្រោះរញ្ជួយដី។ ព្រះអង្គសូមថ្លែងអំណរគុពជូនចំពោះរដ្ឋាភិបាល និងថ្នាក់ដឹកនាំជប៉ុន ដែលខិតខំស្តារឡើងវិញ ក្រុងគួម៉ាម៉ូតូ ឲ្យមានសោភ័ណភាពស្រស់បំព្រង។

សូមបញ្ជាក់ថា កិច្ចប្រជុំកំពូល ស្តីពីបញ្ហាទឹក នៅតំបន់អាស៊ី-ប៉ាស៊ីហ្វីក (APWS) ត្រូវបានបង្កើតឡើងជាលើកដំបូង ក្នុងអំឡុងពេលវេទិកាទឹកពិភពលោក លើកទី៤ ដែលធ្វើឡើងនៅទីក្រុងម៉ិកស៊ិកកូ ប្រទេសម៉ិចស៊ិកកូ ក្នុងឆ្នាំ២០០៦ នៅពេលដែលអតីតនាយករដ្ឋមន្រ្តីជប៉ុន Ryutaro Hshimoto បានអំពាវនាវឲ្យមានការបង្កើតវទិកាទឹក នៅតំបន់អាស៊ី-ប៉ាស៊ីហ្វីក(APWS) ជាវេទិកាមួយដើម្បីរួមចំណែកដល់ការអភិវឌ្ឍសេដ្ឋកិច្ច សង្គម ប្រកបដោយចីរភាព នៃតំបន់អាស៊ីប៉ាស៊ីហ្វីក អំពីទស្សនទានស្តីអំពីទឹក។ ចាប់តាំងពីឆ្នាំ២០០៧ មានកិច្ចប្រជុំកំពូលស្តីពីទឹក នៅក្នុងតំបន់អាស៊ី-ប៉ាស៊ីហ្វីក (APWS) ចំនួន៣លើករួចមកហើយ ក្នុងឆ្នាំ២០០៧ លើកទី១ ប្រារព្វនៅប្រទេសជប៉ុន ក្រោមមូលបទ សន្តិសុខទឹក ភាពជាមេដឹកនាំ និងការ ប្តេជ្ញាចិត្ត លើកទី២ ក្នុងឆ្នាំ២០១៣ នៅប្រទេសថៃ ក្រោមមូលបទ សន្តិសុខទឹក ភាពជាមេដឹកនាំ និងការប្តេជ្ញាចិត្ត ដោយផ្តោតលើបញ្ហាប្រឈមគ្រោះមហន្តរាយពីទឹក លើកទី៣ ឆ្នាំ ២០១៧ នៅប្រទេសមីយ៉ាន់ម៉ារ ក្រោមមូលបទ សន្តិសុខទឹក សម្រាប់ការអភិវឌ្ឍដោយចីរភាព។

គោលបំណងសំខាន់នៃកិច្ចប្រជុំកំពូលលើកទី៤ គឺដើម្បីចែករំលែកទស្សនៈទាន ការប្រមើលមើលទៅមុខ នៃដំណោះស្រាយ និងការអនុវត្ត ជូនចំពោះប្រមុខរដ្ឋ ប្រមុខរដ្ឋាភិបាល ដែលគាំទ្រដល់ការសំរេចចិត្តជាគោលនយោបាយ ក្នុងការពន្លឿនសកម្មភាពឲ្យសម្រេចបាន នូវការលូតលាស់ប្រកបដោយគុណភាព ឆ្ពោះទៅកាន់សង្គមមួយ ដែលមានភាពធន់ ប្រកបដោយបរិយាប័ណ្ណ និងដោយចីរភាព ដោយដោះស្រាយនូវរាល់បញ្ហា ដែល ពាក់ព័ន្ធនិងទឹក ក្រោយពេលដែលស្ថានភាពជំងឺកូវីដ១៩ បានប្រសើរឡើងវិញ ក្នុងតំបន់ អាស៊ី-ប៉ាស៊ីហ្វីក។ ជម្រុញកិច្ចសហការ និងភាពជាដៃគូបន្ថែមទៀត ដើម្បីប្រើប្រាស់ហេដ្ឋារចនាសម្ព័ន្ធ ប្រកបដោយគុណភាព ដើម្បីគាំទ្រការលូតលាស់ប្រកបដោយចីរភាព។

លទ្ធផលរំពឹងទុក កិច្ចប្រជុំកំពូលលើកទី៤ នឹងរួមវិភាគទានយ៉ាងសំខាន់ ឆ្ពោះទៅសម្រេចបាននូវគោលដៅអភិវឌ្ឍប្រកបដោយចីរភាព។ កិច្ចប្រជុំកំពូលលើកទី៤ ស្តីពីបញ្ហាទឹក នៅតំបន់អាស៊ី-ប៉ាស៊ីហ្វីក ក្រោមមូលបទ ធនធានទឹកសម្រាប់ការអភិវឌ្ឍប្រកបដោយចីរភាព: ឧត្តមានុវត្តន៍ និងអ្នកបន្តវេនជំនាន់ក្រោយ បានឈានទៅចេញសេចក្តីប្រកាសទីក្រុងគូម៉ាម៉ូតូ ក្នុងនោះមេដឹកនាំទាំងអស់ បានទទួលស្គាល់ និងគាំទ្រគំនិតផ្តួចផ្តើមរបស់ជប៉ុន ដែលត្រូវបានប្រកាសនៅក្នុងកិច្ចប្រជុំកំពូលលើកទី៤ ស្តីពីទឹក នៅក្នុងតំបន់អាស៊ី-ប៉ាស៊ីហ្វីក ដោយរដ្ឋាភិបាលជប៉ុន ថាជាលទ្ធផលមួយ ក្នុងចំណោមលទ្ធផលនានា ដើម្បីដោះស្រាយបញ្ហាប្រឈមនានា ពាក់ព័ន្ធនឹងទឹក។

រួមជាមួយអ្នកចូលរួមផ្សេងទៀត នៅក្នុងកិច្ចប្រជុំកំពូលលើកទី៤ ស្តីពីបញ្ហាទឹក ក្នុងតំបន់អាស៊ី-ប៉ាស៊ីហ្វីកនេះ និងដោយមានការសម្របសម្រួលជាមួយកិច្ចសន្ទនា Bonn Water វេទិកាទឹកពិភពលោក ដំណើរការទឹក Dushanbe និងដំណើរការត្រៀមរៀបចំសំខាន់ៗផ្សេងទៀត រាល់ការពិភាក្សាទាំងអស់ នៅក្នុងកិច្ចប្រជុំកំពូលនេះ និងចែករំលែកនៅក្នុងដំណើរការ នៃកិច្ចពិភាក្សាជាសាកលនានាពាក់ព័ន្ធនឹងទឹក រួមទាំងក្នុងសន្និសីទសហប្រជាជាតិ សម្រាប់ការពិនិត្យឡើងវិញពាក់កណ្តាល អាណត្តិ នៃទសវត្សរ៍សកម្មភាពទឹក ដែលនឹងរៀបចំក្នុងខែមិនា ឆ្នាំ២០២៣ ក៏ដូចជាវេទិកានយោបាយកម្រិតខ្ពស់សម្រាប់ការអភិវឌ្ឍដោយចីរភាព ដែលជាវេទិកាសកលសម្រាប់ការកាត់បន្ថយហានិភ័យគ្រោះមហន្តរាយ អនុសញ្ញាក្របខណ្ឌសហប្រជាជាតិ ស្តីពីការប្រែប្រួលអាកាសធាតុ នៅឯកិច្ចប្រជុំ G7 និងG20។ មេដឹកនាំទាំងអស់ ក៏បានអំពាវនាវឲ្យសេចក្តីប្រកាសនេះ ត្រូវបានគេយកទៅពិចារណា និងជាឯកសារដែលត្រូវបានគិតគូរបន្ត។

សម្តេចតេជោ ហ៊ុន សែន បានចែករំលែកទស្សនទានចំនួន៤ ដើម្បីដោះស្រាយបញ្ហាប្រឈមនាំដល់វិនាសសកម្មធនធានទឹក និងដើម្បីគ្រប់គ្រងឱ្យបានប្រកបដោយចីរភាពសម្រាប់បច្ចុប្បន្ន និងទៅអនាគត រួមមាន៖

១៖ បន្តជំរុញការអភិវឌ្ឍនិងសមាហរណកម្ម បណ្ដាញហេដ្ឋារចនាសម្ព័ន្ធ សំដៅគាំទ្រដល់ការគ្រប់គ្រងធនធានទឹក ទាំងក្នុងប្រទេស តំបន់ និងសកលលោក។

២៖ បន្តជំរុញការអភិវឌ្ឍសកម្មភាពសង្គម-សេដ្ឋកិច្ច ប្រកបដោយការទទួលខុសត្រូវ និងការគាំទ្រដល់ការអភិវឌ្ឍបៃតង,ជាពិសេស សម្រាប់វិស័យកសិកម្មដែលជាវិស័យប្រើប្រាស់ទឹកច្រើន។

៣៖ ជំរុញ និងលើកកម្ពស់កិច្ចសហប្រតិបត្តិការលើផ្នែកឌីជីថលរបស់យើង ដើម្បីចាប់យកវឌ្ឍន-ភាពនៃការអភិវឌ្ឍបច្ចេកវិទ្យាឌីជីថល ក្នុងការប្រើប្រាស់ និងការគ្រប់គ្រងទឹក ប្រកបដោយប្រសិទ្ធ-ភាព និងប្រសិទ្ធផល។

៤៖ ការបន្តគាំទ្រដល់កម្មវិធី គំនិតផ្ដួចផ្តើម និងសកម្មភាពនានា គាំទ្រដល់ការលើកកម្ពស់ចីរភាពសង្គមក្នុងការប្រើប្រាស់ និងការគ្រប់គ្រងទឹក សំដៅធានាឱ្យបានថា ប្រជាជនសកលលោកគ្រប់រូបទទួលបានទឹកមកប្រើប្រាស់ តាមតម្រូវការ។

សម្តេចតេជោ ហ៊ុន សែន ក៏បានលើកឡើងដែរថា ការប្រើប្រាស់ធនធានទឹកប្រកបដោយប្រសិទ្ធភាព និងស័ក្តិសិទ្ធិភាព គឺចាំបាច់ណាស់សម្រាប់ការអភិវឌ្ឍសង្គម-សេដ្ឋកិច្ចប្រកបដោយចីរភាព។ ជាក់ស្តែងនៅក្នុងរបៀបវារៈឆ្នាំ២០៣០ របស់សហប្រជាជាតិសម្រាប់ការអភិវឌ្ឍប្រកបដោយចីរភាព ធនធានទឹកត្រូវបានកំណត់នៅគោលដៅទី៦ ស្តីពី «ការធានាឱ្យមាននិងការគ្រប់គ្រងទឹកនិងអនាម័យប្រកបដោយចីរភាព សម្រាប់ប្រជាជនគ្រប់រូប»។

សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា ក៏បានគូសរំលេចដែរថា កម្ពុជា ចាត់ទុកទឹកជា «មាស-ស» ដែលជាកម្លាំងចលករជំរុញការអភិវឌ្ឍ និងវឌ្ឍនភាពសេដ្ឋកិច្ចសង្គមប្រកបដោយចីរភាព និងបរិយាបន្ន។ មិនតែប៉ុណ្ណោះរាជរដ្ឋាភិបាលកម្ពុជា តែងទទួលស្គាល់អំពីសារសំខាន់ជាយុទ្ធសាស្ត្រ និងផ្តល់អាទិភាពខ្ពស់ចំពោះវិស័យធនធានទឹក សំដៅជំរុញការគ្រប់គ្រងធនធានទឹកឱ្យកាន់តែប្រសើរធានាបាននូវសន្តិសុខទឹកក្នុងក្របខណ្ឌទូទាំងប្រទេស។

សម្តេចតេជោ ហ៊ុន សែន បានប្រកាសបង្ហាញនូវជំហររបស់កម្ពុជាក្នុងកិច្ចប្រជុំនោះដែរថា កម្ពុជា នឹងបន្តកិច្ចសហការជាមួយគ្រប់ភាគីពាក់ព័ន្ធក្រោមយន្តការតំបន់ និងសកល ដើម្បីពង្រឹង និងលើកកម្ពស់អភិបាលកិច្ច និងការគ្រប់គ្រងធនធានទឹកនិងអាងទន្លេឆ្លងដែន ឱ្យកាន់តែមានប្រសិទ្ធភាពថែមទៀត ក្នុងការឈានទៅសម្រេចគោលដៅ «ទឹកដើម្បីការអភិវឌ្ឍប្រកបដោយចីរភាព»។

សូមបញ្ជាក់ថា កិច្ចប្រជុំកំពូលស្ដីពីបញ្ហាទឹកនៅតំបន់អាស៊ី-ប៉ាស៊ីហ្វិកលើកទី៤ ធ្វើឡើងក្រោមមូលបទ «ទឹកសម្រាប់ការអភិវឌ្ឍប្រកបដោយចីរភាព៖ ឧត្តមានុវត្តន៍ និងអ្នកបន្តវេនជំនាន់ក្រោយ»។

កិច្ចប្រជុំកំពូលស្តីពីបញ្ហាទឹកនៅតំបន់អាស៊ី-ប៉ាស៊ីហ្វិកលើកទី៤ ធ្វើឡើងក្នុងគោលបំណងចែករំលែកទស្សនទាន ការប្រមើមើលទៅមុខនៃដំណោះស្រាយ និងការអនុវត្ត ជូនចំពោះប្រមុខរដ្ឋ ប្រមុខរដ្ឋាភិបាល ដែលគាំទ្រដល់ការសម្រេចចិត្តជាគោលនយោបាយ ក្នុងការពន្លឿនសកម្មភាពឱ្យសម្រេចបាននូវការលូតលាស់ប្រកបដោយគុណភាព ឆ្ពោះទៅកាន់សង្គមមួយដែលមានភាពធន់ ប្រកបដោយបរិយាប័ន្ន និងដោយចីរភាព ដោយដោះស្រាយនូវរាល់បញ្ហាដែលពាក់ព័ន្ធនឹងទឹក ក្រោយពេលដែលស្ថានភាពជម្ងឺកូវីដ-១៩ បានប្រសើរឡើងវិញ ក្នុងតំបន់អាស៊ី-បាស៊ីហ្វិក។

កិច្ចប្រជុំក៏មានគោលបំណងជំរុញកិច្ចសហការ និងភាពជាដៃគូបន្ថែមទៀត ដើម្បីប្រើប្រាស់ហេដ្ឋារចនាសម្ព័ន្ធប្រកបដោយគុណភាព ដើម្បីគាំទ្រការលូតលាស់ប្រកបដោយគុណភាព។

កិច្ចប្រជុំកំពូលលើកទី៤នេះ ត្រូវបានគេរំពឹងថា នឹងរួមវិភាគទានយ៉ាងសំខាន់ ឆ្ពោះទៅសម្រេចបាននូវគោលដៅអភិវឌ្ឍន៍ប្រកបដោយចីរភាព៕

សម្ដេចតេជោ ហ៊ុន សែន អញ្ជើញទទួលជួបពិភាក្សាការងារជាមួយនាយករដ្ឋមន្ត្រីឡាវ

នៅទីក្រុងកូម៉ាម៉ូតូ ប្រទេសជប៉ុន នាព្រឹកថ្ងៃទី២៣ ខែមេសា ឆ្នាំ២០២២នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានទទួលជួបពិភាក្សាការងារជាមួយ​ ឯកឧត្ដម ផនខាំ វីផាវ៉ាន់ (Phankham Viphavanh) នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ នៅមុនកិច្ចប្រជុំកំពូលស្ដីអំពីបញ្ហាទឹកតំបន់អាស៊ីប៉ាស៊ីហ្វិកលើកទី៤។ 

នៅក្នុងជំនួបនោះ សម្ដេចតេជោ​ ហ៊ុន សែន ពិតជារីករាយដែលបានជួបជាមួយនឹង​ ឯកឧត្តមនាយករដ្ឋមន្ត្រីឡាវសារជាថ្មីម្ដងទៀត បន្ទាប់ពីបានជួបនៅទីក្រុងភ្នំពេញនាពេលកន្លងមក។ នាយករដ្ឋមន្ត្រីនៃទាំងពីរក៏បានជូនពរគ្នាទៅវិញទៅមកក្នុងឱកាសពិធីបុណ្យចូលឆ្នាំថ្មីកន្លងទៅថ្មីៗនេះដែលប្រទេសទាំងពីរបានប្រារព្វឡើងដូចគ្នា។ 

ក្នុងជំនួបនេះ សម្ដេចតេជោនាយករដ្ឋមន្ត្រី​ បានគូសបញ្ជាក់ពីការសន្យាក្នុងការផ្ដល់ជំនួយ ជាពិសេសជាជំនួយរថយន្តផ្នែកវេជ្ជសាស្ត្រ ដែលបានដោះស្រាយដល់រដ្ឋាភិបាលឡាវរួចមកហើយនោះ។ ឯកឧត្តមនាយករដ្ឋមន្ត្រីឡាវ បានអរគុណចំពោះសម្ដេចតេជោនាយករដ្ឋមន្ត្រី នូវអ្វីដែលរាជរដ្ឋាភិបាលកម្ពុជាបានជួយដល់រដ្ឋាភិបាលឡាវ ដូចជាការជួយផ្ដល់នូវវ៉ាក់សាំងប្រឆាំងកូវីដ១៩  ជារថយន្តដឹកវ៉ាក់សាំង covid 19 រួមទាំងថវិកាមួយចំនួនទៀតផងដែរ ដើម្បីដោះស្រាយ និងទប់ស្កាត់ផលប៉ះពាល់ដោយសារជំងឺកូវីដ19នេះ។ ឯកឧត្តមនាយករដ្ឋមន្ត្រីឡាវ បានមានប្រសាសន៍ថា អ្វីដែលយើងបានពិភាក្សាក្នុងជំនួបនៅទីក្រុងភ្នំពេញនោះ ពេលនេះរដ្ឋាភិបាលទាំងពីរកំពុងជំរុញការអនុវត្តជាបន្តបន្ទាប់។ ឯកឧត្តមក៏បានគូសបញ្ជាក់ថា ប្រជាជនឡាវក៏បានសម្ដែងនូវការពេញចិត្តចំពោះអ្វីដែលរាជរដ្ឋាភិបាលកម្ពុជាបានជួយដល់រដ្ឋាភិបាលឡាវនារយៈពេលកន្លងមក ជាពិសេសក្នុងការប្រយុទ្ធប្រឆាំងនឹងជំងឺកូវី១៩ នេះ។ 

ឯកឧត្តម ផនខាំ វីផាវ៉ាន់ (Phankham Viphavanh)​ ក៏បានមានប្រសាសន៍អំពីកិច្ចសហប្រតិបត្តិការរវាងប្រទេសទាំងពីរ ដោយ ឯកឧត្តមបានប្ដេជ្ញាចិត្តក្នុងការអនុវត្ត អ្វីជាសេចក្តីសម្រេច ដែលបានឯកភាពគ្នានាពេលកន្លងមក ជាពិសេសការបញ្ចប់នូវឯកសារមេពាក់ព័ន្ធទៅនឹងព្រំដែននៃប្រទេសទាំងពីរ។ ឯកឧត្តមក៏បានគូសបញ្ជាក់ពីកិច្ចសហប្រតិបត្តិការអន្តរជាតិរវាងប្រទេសទាំងពីរ  ហើយឯកឧត្តមបានស្នើសុំឲ្យកម្ពុជាបន្តក្នុងការផ្លាស់ប្ដូរមតិយោបល់គ្នាទៅវិញទៅមក។ នៅក្នុងឱកាសនោះផងដែរ ឯកឧត្តមក៏បានមានប្រសាសន៍ គាំទ្រចំពោះការបោះឆ្នោតឃុំសង្កាត់នៅក្នុងប្រទេសកម្ពុជាដែលនឹងប្រព្រឹត្តទៅនៅខែមិថុនានាពេលខាងមុខនេះ ។ ឯកឧត្តម បានថ្លែងនូវការស្វាគមន៍ចំពោះដំណើរអញ្ជើញបំពេញទស្សនកិច្ចរបស់សម្ដេចតេជោនាយករដ្ឋមន្ត្រី នាពេលខាងមុខទៅកាន់ប្រទេសឡាវ។ 

សម្ដេចតេជោ ហ៊ុន សែន បានមានប្រសាសន៍ថា នេះ គឺជាជំនួបមួយដែលមានសារៈសំខាន់ក្នុងនាមជាប្រទេសជិតខាង ក្នុងនាមប្រទេសបងប្អូនគ្នា ហើយកន្លងទៅថ្មីៗនេះប្រទេសយើងទាំងពីរក៏បានជូនពរក្នុងឱកាសបុណ្យចូលឆ្នាំថ្មីទៅវិញទៅមក។ សម្ដេចតេជោពិតជារីករាយដែលបានមើលឃើញពីលទ្ធផលអ្វីដែលយើងបានអនុវត្តនិងសម្រេចជាមួយគ្នាកន្លងមកនេះ ហើយទាំងអស់នេះ នឹងធ្វើអោយទំនាក់ទំនង និងកិច្ចសហប្រតិបត្តិការរវាងប្រទេសយើងទាំងពីរកាន់តែប្រសើរឡើងបន្ថែមទៀត។ 

សម្ដេចតេជោនាយករដ្ឋមន្ត្រី បានមានប្រសាសន៍ទៀតថា សម្ដេចពិតជាមានមោទនភាពចំពោះ ទំនាក់ទំនងរវាងប្រទេសទាំងពីរ។ សម្ដេចតេជោក៏បានជម្រាបជូនឯកឧត្តមនាយករដ្ឋមន្ត្រីឡាវ ដើម្បីអោយត្រៀមរៀបចំនូវឯកសារពាក់ព័ន្ធសម្រាប់កិច្ចប្រជុំខាងមុខនៅពេលដែលសម្ដេចអញ្ជើញបំពេញទស្សនៈកិច្ចទៅកាន់ប្រទេសឡានោះ ។ ឯកឧត្តមនាយករដ្ឋមន្ត្រីឡាវបានឯកភាពទាំងស្រុងនូវអ្វីដែលសម្តេចតេជោបានមានប្រសាសន៍លើកឡើង ជាពិសេសទាក់ទងទៅនឹងទំនាក់ទំនងទ្វេភាគី ហើយឯកឧត្តមក៏បានអបអរសាទរចំពោះកម្ពុជាដែលទទួលធ្វើជាប្រធានអាស៊ាននៅឆ្នាំនេះ និងបានដើរតួនាទីយ៉ាងសកម្មក្នុងការដឹកនាំអាស៊ានកន្លងទៅនេះ។ 

ឯកឧត្តមនាយករដ្ឋមន្ត្រីឡាវបានមានប្រសាសន៍លើកឡើងទៀតថាឯកឧត្តមនឹងគ្រោងទៅទស្សនកិច្ចនៅខេត្តពីរដែលជាប់ព្រំដែនកម្ពុជា ជាពិសេសខេត្តចំប៉ាសាក់ និងចំប៉ាលើ ក្នុងគោលបំណងដើម្បីពង្រឹងនូវកិច្ចសហប្រតិបត្តិការ ខេត្តនិងខេត្ត និងបណ្ដាព្រំប្រទល់ជាមួយកម្ពុជា ដើម្បីបញ្ជាក់ពីគោលនយោបាយរបស់ប្រទេសទាំងពីរ ក្នុងការជំរុញលើកកម្ពស់​ និងបម្រើផលប្រយោជន៍ប្រជាជននៃប្រទេសទាំងពីរ ។ ឯកឧត្តមនាយករដ្ឋមន្ត្រីឡាវ ក៏បានស្នើសុំឲ្យមានការសាងសង់ស្ពានតភ្ជាប់រវាងប្រទេសទាំងពីរផងដែរ ដើម្បីឲ្យទំនាក់ទំនងរវាងប្រជាជន និងប្រជាជនកាន់តែជិតស្និទ្ធនឹងគ្នា  ក៏ប៉ុន្តែទាក់ទងនឹងការសាងសង់ស្ពាននេះ ឯកឧត្តមរង់ចាំការពិភាក្សាជាមួយរដ្ឋមន្ត្រីក្រសួងសាធារណការឡាវសិន។ ហើយទាក់ទងទៅនឹងគម្រោងនៃការកសាងស្ពាននេះ សម្ដេចតេជោបានមានប្រសាសន៍ថា វាជារឿងដ៏ល្អបំផុត សម្រាប់ផ្សារភ្ជាប់ទំនាក់ទំនង រវាងប្រទេសទាំងពីរឲ្យកាន់តែមានភាពល្អប្រសើរឡើង។ ឯកឧត្តមនាយករដ្ឋមន្ត្រីឡាវ ក៏បានស្នើឲ្យមានការផ្លាស់ប្ដូរទស្សនៈកិច្ច មេបញ្ជាការកងទ័ពនៃប្រទេសទាំងពីរ ហើយក្នុងនោះឯកឧត្តមនាយករដ្ឋមន្ត្រីឡាវ ក៏បានអញ្ជើញ​ ឯកឧត្តម ហ៊ុន ម៉ាណែត ទៅទស្សនកិច្ចនៅប្រទេសឡាវនាពេលខាងមុខនេះ ។ ហើយជាការឆ្លើយតប សម្ដេចតេជោ ក៏បានឯកភាពហើយបានមានប្រសាសន៍ថាជារឿងដ៏ល្អណាស់ដែល ឯកឧត្តមបានអញ្ជើញ​ មេបញ្ជាការកងទ័ពជើងគោក​ របស់កម្ពុជាទៅបំពេញទស្សនកិច្ចនៅប្រទេសឡាវនោះ គឺពិតជាមានសារៈសំខាន់ក្នុងការពង្រឹងទំនាក់ទំនង រវាងកងទ័ពនៃប្រទេសទាំងពីរឱ្យកាន់តែរឹងមាំបន្ថែមទៀត៕

សម្តេចតេជោ ហ៊ុន សែន អញ្ជើញទៅដល់អាកាសយានដ្ឋាន Aso Kumamuto ទីក្រុងគូម៉ាម៉ូតូ ប្រទេសជប៉ុន ប្រកបដោយសុវត្តិភាព

 សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា បានអញ្ជើញទៅដល់ទីក្រុង Kumamuto ប្រទេសជប៉ុន ប្រកបដោយសុវត្តិភាព កាលពីវេលាម៉ោង១៤ និង១៥នាទី ម៉ោងនៅទីក្រុងតូក្យូ ប្រទេសជប៉ុន ត្រូវនិងម៉ោង១២និង១៥ ម៉ោងនៅរាជធានីភ្នំពេញ ព្រះរាជាណាចក្រកម្ពុជា ដើម្បីចូលរួមកិច្ចប្រជុំកំពូលលើកទី៤ ស្តីពីបញ្ហាទឹក នៅតំបន់អាស៊ី-ប៉ាស៊ីហ្វីក ដែលគ្រោងធ្វើឡើងនៅថ្ងៃទី២៣មេសាស្អែក។ នៅអាកាសយានដ្ឋាន Aso Kumamuto ទីក្រុង Kumamuto ប្រទេសជប៉ុន វត្តមាននៃការអញ្ជើញដល់របស់សម្តេចតេជោនាយករដ្ឋមន្រ្តី និងគណៈប្រតិភូជាន់ខ្ពស់ រាជរដ្ឋាភិបាលកម្ពុជា ត្រូវបានការធ្វើគារវកិច្ចស្វាគមន៍យ៉ាងកក់ក្តៅបំផុត ពីឯកឧត្តម មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ និងពេញសមត្ថភាព នៃប្រទេសជប៉ុន ប្រចាំព្រះរាជា ណាចក្រកម្ពុជា ឯកឧត្តម ទុយ រី ឯកអគ្គរាជទូតវិសាមញ និងពេញសមត្ថភាព នៃព្រះរាជាណាចក្រកម្ពុជា ប្រចាំប្រទេសជប៉ុន ឯកឧត្តម អូនីស៊ិ កាហ្សឺកហ្វូមិ អភិបាល ក្រុងគូម៉ាម៉ូតូ ឯកឧត្តមអនុរដ្ឋមន្រ្តី ក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន ព្រមទាំងវត្តមាន ឯកឧត្តម លោកជំទាវ ជាឥស្សរជនជាន់ខ្ពស់រដ្ឋាភិបាលជប៉ុន ខេត្តគូម៉ាម៉ូតូ និងឥស្សរជនការទូត នៃព្រះរាជាណាចក្រកម្ពុជា ប្រចាំប្រទេសជប៉ុន ជាច្រើនរូប។

ដោយឡែកនៅសណ្ឋាគារ Kumamoto Castle វត្តមាននៃការអញ្ជើញដល់របស់សម្តេចតេជោ និងគណៈប្រតិភូជាន់ខ្ពស់រាជរដ្ឋាភិបាលកម្ពុជា ត្រូវបានការធ្វើគារវកិច្ចស្វាគមន៍យ៉ាងស្និទ្ធស្នាលរ៉ាក់ទាក់បំផុត ពីសិស្ស និស្សិត កម្មសិក្សាការី និងបងប្អូនសហគមន៍ខ្មែរ ដែលកំពុងសិក្សា ធ្វើការ និងស្នាក់នៅប្រទេសជប៉ុន ប្រមាណ ជាង១០០នាក់។ សម្តេចតេជោនាយករដ្ឋមន្រ្តី បានសំដែងនូវសេចក្តីសប្បាយរីករាយដោយបានជួបដោយផ្ទាល់ ជាមួយបងប្អូនកូនក្មួយចៅៗ ជាសិស្ស និស្សិត កម្មសិក្សាការី និងបងប្អូនសហគមន៍ខ្មែរ ដែលកំពុងសិក្សា ធ្វើការ និងស្នាក់នៅប្រទេសជប៉ុន ដែលនេះបង្ហាញឲ្យឃើញពីការគោរពស្រឡាញ់ រវាងថ្នាក់ដឹកនាំនិងប្រជាពលរដ្ឋខ្លួន ដែលកំពុងឃ្លាតឆ្ងាយពីមាតុ ប្រទេស ទៅបំពេញការសិក្សា រកស៊ីទទួលទាន ស្នាក់នៅប្រទេសជប៉ុន។
តាមទូរលេខដែលបញ្ជាក់ដោយក្រសួងការបរទេស បានឲ្យដឹងថា នៅកម្ពុជាមានជនជាតិជប៉ុនស្នាក់នៅប្រទេសកម្ពុជា មានចំនួន ៤ ២១៦នាក់ គិតត្រឹមខែមករាឆ្នាំ២០២១ ដោយឡែកសិស្ស និស្សិត កម្ពុជាសិក្សាអាហារូបករណ៍បង់ថ្លៃ នៅប្រទេសជប៉ុនចំនួន ៦៩៣នាក់ និងមានពលរដ្ឋកម្ពុជារស់នៅ និងប្រកបរបរអាជីវកម្មនៅក្នុងប្រទេសជប៉ុន មានចំនួន ៥ ២០៣នាក់ គិតត្រឹមខែមិថុនាឆ្នាំ២០២០។
តាមកម្មវិធីដែលបានគ្រោងទុក សម្តេចតេជោនាយករដ្ឋមន្រ្តី និងអញ្ជើញកិច្ចប្រជុំកំពូលលើកទី៤ ស្តីពីបញ្ហាទឹក នៅតំបន់អាស៊ី-ប៉ាស៊ីហ្វីក នៅទីក្រុងគូម៉ាម៉ូតូ ប្រទេសជប៉ុន នៅថ្ងៃទី២៣មេសា ជាមួយប្រមុខរដ្ឋាភិបាល នៃប្រទេសជប៉ុន ប្រទេសទូវ៉ាលូ ឡាវ នេប៉ាល់ និងបណ្តារដ្ឋមន្រ្តី មកពីប្រទេសក្នុងតំបន់អាស៊ី ប៉ាស៊ីហ្វីក ជាច្រើនរូបទៀត។ ជាមួយគ្នានេះ សម្តេចតេជោ និងជួបសន្ទនាការងារទ្វេភាគី ជាមួយសមភាគីជប៉ុន ឯកឧត្តម គីស៊ីដា ហ្វីមីអូ នាយករដ្ឋមន្រ្តីជប៉ុន ហើយនៅក្នុងជំនួបទ្វេភាគីនោះ ប្រមុខរដ្ឋាភិបាលនៃប្រទេសទាំងពីរកម្ពុជា ជប៉ុន និងធ្វើជាសាក្សីនៃពិធីចុះហត្ថលេខាលើអនុស្សារណៈ នៃការយោគយល់គ្នា រវាងក្រសួងធនធានទឹក និងឧតុនិយម នៃព្រះរាជាណាចក្រកម្ពុជា ជាមួយនិងក្រសួងដែនដី ហេដ្ឋារចនាសម្ព័ន្ធដឹកជញ្ជូន និងទេសចរណ៍ជប៉ុន ដែលចុះហត្ថលេខារវាង ឯកឧត្តម លឹម គានហោ រដ្ឋមន្រ្តីក្រសួង ធន ធានទឹក និងឧតុនិយមកម្ពុជា ជាមួយឯកឧត្តម សាយតុ តេត្យុអុ (Saito Tetsuo) រដ្ឋមន្រ្តីក្រសួងដែនដី ហេដ្ឋារចនាសម្ព័ន្ធដឹកជញ្ជូន និងទេសចរណ៍ជប៉ុន។ ជាមួយគ្នានេះ សម្តេចតេជោ និងជួបសន្ទនាការងារទ្វេភាគីជាមួយ ឯកឧត្តម ផនខាំ វីផាវ៉ាន់ នាយករដ្ឋមន្រ្តី នៃសាធារណរដ្ឋប្រជាធិបតេយ្យប្រជាមានិតឡាវ និងជួបសន្ទានជាមួយ ឯកឧត្តមអភិបាលខេត្តគួម៉ាម៉ូតូ និងបណ្តាមេដឹកនាំក្រុមហ៊ុនធំៗ របស់ប្រទេសជប៉ុនផងដែរ៕

វិភាគអន្តរជាតិ៖ តើ Donbas ជាសមរភូមិសង្រ្គាមផ្ដាច់ព្រ័ត្ររបស់លោក ពូទីន នៅអ៊ុយក្រែន ឬ?

(កៀវ)៖ អភិបាលតំបន់លូហាន់ក៍ (Luhansk) លោក សឺហ៉ី ហៃដៃ (Serhiy Haidai) បាននិយាយថា កងកម្លាំងរុស្ស៊ី នាពេលឥឡូវនេះ បានវាយដណ្ដើមគ្រប់គ្រងបាន ៨០ភាគរយនៃតំបន់នេះហើយ ដែលជាតំបន់មួយក្នុងចំណោមតំបន់ចំនួនពីរ ដែលបង្កើតបានជាតំបន់ដុនបាស់ (Donbas) ស្ថិតនៅភាគខាងកើតប្រទេសអ៊ុយក្រែន។

មុនពេលរុស្ស៊ីឈ្លានពានអ៊ុយក្រែនកាលពីថ្ងៃទី២៤ ខែកុម្ភៈកន្លងទៅនេះ រដ្ឋាភិបាលទីក្រុងកៀវគ្រប់គ្រង ៦០ភាគរយនៃតំបន់ Luhansk។ បើតាម ក្រុមអ្នកជំនាញ សមរភូមិសង្រ្គាមក្នុងតំបន់ដុនបាស់ ពិតជាមានសារៈសំខាន់ចំពោះលោក ពូទីន ពីព្រោះថាជ័យជម្នះនៅក្នុងសមរភូមិភាគខាងកើតនេះ នឹងកំណត់ពីជោគជ័យដ៏ធំសម្បើមនៃសង្រ្គាមរវាងរុស្ស៉ី និងអ៊ុយក្រែនដែលអូសបន្លាយពេលអស់ ៥៦ថ្ងៃមកនេះ។ ប៉ុន្តែហេតុអ្វីបានជាតំបន់ដុនបាស់ មានសារៈសំខាន់សម្រាប់លោក ពូទីន?

ទីភ្នាក់ស៊ើបការណ៍សម្ងាត់អាមេរិកបានឱ្យដឹងថាលោក ពូទីន អាចនឹងយកថ្ងៃទី៩ ខែឧសភាខាងមុខ ដែលជាថ្ងៃបុណ្យជាតិនៃទិវាជ័យជម្នះរបស់ កងទ័ពរុស្ស៉ីលើកងទ័ពណាហ្ស៊ីអាល្លឺម៉ង់ ក្នុងសង្រ្គាមលោកលើកទី២ គឺជាកាលកំណត់នៃសង្រ្គាមនៅអ៊ុយក្រែន។ វាមិនមែនជាកាលកំណត់ដើម្បីឈ្នះ សង្រ្គាមដែលនឹងកើតឡើងនៅពេលបន្ទាប់នោះទេ តែនៅថ្ងៃនោះ លោក ពូទីន ត្រូវតែមានជ័យជម្នះមួយដើម្បីយកមកប្រាប់ប្រជាជនរុស្ស៉ី។ ដុនបាស់ ស្ថិតនៅភាគខាងកើតនៃប្រទេសអ៊ុយក្រែន ជាប់ព្រំដែនជាមួយរុស្ស៉ី គឺជាទីដែលមានប្រជាជននិយាយភាសារុស្ស៉ីភាគច្រើនរស់នៅ និងសម្បូរទៅដោយ ធនធានធម្មជាតិ ហើយបើគេចាំមិនភ្លេចទេ នៅក្នុងសុន្ទរកថាប្រកាសសង្រ្គាមលើអ៊ុយក្រែន លោក ពូទីនបានប្រកាសត្រង់ៗថាកងទ័ពរុស្ស៉ីនឹងការពារ ប្រជាជននិយាយភាសាររុស្ស៉ី និងរំដោះតំបន់ដុនបាស់ពីក្រុមអ្នកជាតិនិយមអ៊ុយក្រែនដែលលោកផ្ទាល់ចាត់ទុកថាជា «ពួកណាហ្ស៊ី»។

ជាការពិតណាស់, មកទល់នឹងពេលនេះសង្រ្គាមរបស់លោក ពូទីននៅអ៊ុយក្រែន ត្រូវបានគេមើលឃើញថាដំណើរការផ្ទុយពីអ្វីដែលលោកចង់បាន ពោលគឺ មិនអាចវាយចូលកាន់កាប់រដ្ឋធានីកៀវ, សង្រ្គាមកាន់តែជួយពង្រឹងគំនិតស្នេហាជាតិនៃកងទ័ព និងប្រជាជនអ៊ុយក្រែន ហើយកាន់តែធ្វើឱ្យ NATO និងបណ្ដាប្រទេសលោកខាងលិចរួបរួមគ្នាជាថ្មី។ ដូច្នេះហើយ ទើបថាសមរភូមិសង្រ្គាមដុនបាស់មានសារៈសំខាន់ ដ្បិតវាអាចឱ្យលោក ពូទីន ប៉ះប៉ូវការខកបំណងទាំងនេះជាមួយការប្រកាសប្រាប់ប្រជាជនរុស្ស៉ីថាលោកមិនដែលចង់គ្រប់គ្រងទីក្រុងកៀវទេ ដោយលោកផ្ដោតលើតំបន់ដុនបាស់ ប៉ុណ្ណោះ។

នៅថ្ងៃទី៩ ខែឧសភា, លោក ពូទីនអាចនឹងឈរលើវេទិកានៅឯទីលានក្រហមក្នុងទីក្រុងមូស្គូ ដើម្បីថ្លែងសារស្ដីពីតំបន់ដុនបាស់ នោះគឺលោកអាចនឹង ប្រកាសពីការរំដោះតំបន់ដុនបាស់បានទាំងស្រុងពីកណ្ដាប់ដៃពួកណាហ្ស៊ី ហើយមិនតែប៉ុណ្ណោះ លោកក៏ទំនងជាអនុញ្ញាតឱ្យតំបន់មួយនេះរៀបចំ ការបោះឆ្នោតប្រជាមតិចូលរួមជាមួយរុស្ស៉ី ដូចជាតំបន់គ្រីមៀកាលពីឆ្នាំ២០១៤។ គេនៅចាំបានថា នៅក្រោយការប្រារព្ធទិវាជ័យជម្នះកាលពីឆ្នាំ២០២១ លោក ពូទីនបានចេញផ្សាយអត្ថបទមួយដោយលើកឡើងថាប្រជាជនរុស្ស៉ី និងអ៊ុយក្រែនគឺជាប្រជាជនតែមួយ។ ដោយឡែក ជ័យជម្នះដែលអាចនឹង ធ្លាក់ក្នុងដៃលោក ពូទីនដែរនោះ គឺទីក្រុងកំពង់ផែម៉ារីយូប៉ូល។ ប្រសិនបើរុស្ស៉ីកាន់កាប់ទីក្រុងនេះបាន នោះកងទ័ពរុស្ស៉ីអាចនឹងបង្កើតច្រករបៀងមួយ រវាងទឹកដីដែលពួកគេគ្រប់គ្រងក្នុងតំបន់ដុនបាស់ និងតំបន់គ្រីមៀ ដែលអាចនឹងជួយពង្រឹងការគ្រប់គ្រងទឹកដីអ៊ុយក្រែនមួយផ្នែកធំរបស់ទីក្រុងមូស្គូ ហើយនេះអាចសំខាន់ជាងយកបានទីក្រុងកៀវទៅទៀត។ ពីព្រោះថាវាចំណេញដល់យុទ្ធសាស្ត្រពង្រីកឥទ្ធិពលរបស់រុស្ស៉ីផង និងធ្វើឱ្យប៉ះពាល់ដល់ យុទ្ធសាស្ត្រ, សេដ្ឋកិច្ច និងអធិបតេយ្យភាពរបស់អ៊ុយក្រែនផងដែរ។

ម្លោះហើយ ដើម្បីអាចយកជ័យជម្នះឱ្យបានមុនថ្ងៃទី៩ ខែឧសភា, អំណេះតទៅ សង្រ្គាមក្នុងតំបន់ដុនបាស់នឹងក្លាយជាសង្រ្គាមយ៉ាងបង្ហូរឈាម ដោយ កងទ័ពរុស្ស៉ីនឹងប្រើកម្លាំងពេញទំហឹងវាយផ្ដាច់ព្រ័ត្រយកតំបន់មួយនេះ ខណៈប្រធានាធិបតីអ៊ុយក្រែន លោក ហ្សេលេនស្គីបានបញ្ជាក់ថាអ៊ុយក្រែននឹង មិនបោះបង់ទឹកដីក្នុងតំបន់ភាគខាងកើត ជាថ្នូរនឹងការបញ្ចប់សង្រ្គាមជាដាច់ខាត។ ដ្បិតលោកជឿថាប្រសិនបើរុស្ស៉ីយកបានតំបន់ដុនបាស់ នោះលោក ពូទីន អាចនឹងត្រឡប់ទៅរកទីក្រុងកៀវសាជាថ្មី៕

ប្រភព៖ CNN (ថ្ងៃព្រហស្បតិ៍ ទី២១ ខែមេសា ឆ្នាំ២០២២)

ដោយ ៖ Fresh News

អង្គភាពព័ត៌មាន និងប្រតិកម្មរហ័សបញ្ចេញផ្សាយនូវវីដេអូថ្មីក្រោមចំណងជើងថា៖ «ក្តីសប្បាយរីករាយរបស់យុវជនខ្មែរដែលរៀមច្បងរបស់ខ្លួនមិនធ្លាប់ជួបប្រទះក្នុងប្រវត្តិសាស្ត្រ ៥០០ឆ្នាំចុងក្រោយ»

បន្ទាប់ពីពិធីបុណ្យចូលឆ្នាំថ្មីរយៈពេល ៣ថ្ងៃ ទើបតែបានបិទបញ្ចប់ទៅប្រកបដោយបរិយាកាសសប្បាយរីករាយនិងគគ្រឹកគ្រេង ហើយដែលប្រជាពលរដ្ឋខ្មែរនៅគ្រប់ទិសទី ជាពិសេសយុវជនយុវនារីបានប្រារព្ធពិធីចូលឆ្នាំតាមប្រពៃណីជាតិរបស់ខ្លួនយ៉ាងអឹកអធឹកជាទីបំផុត។ អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានផលិតនូវវីដេអូផ្លូវការថ្មីមួយទៀត ក្រោមចំណងជើងថា  «ក្តីសប្បាយរីករាយរបស់យុវជនខ្មែរដែលរៀមច្បងរបស់ខ្លួនមិនធ្លាប់ជួបប្រទះក្នុងប្រវត្តិសាស្ត្រ ៥០០ឆ្នាំចុងក្រោយ» ដើម្បីផ្សព្វផ្សាយជូនសាធារណជន។

វីដេអូថ្មីនេះ ផលិតឡើង ដើម្បីរំលេចឱ្យឃើញនូវបរិយាកាសដ៏សប្បាយរីករាយ ដែលព្រះរាជាណាចក្រកម្ពុជាយើង បានប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរប្រកបដោយជោគជ័យ ដែលពលរដ្ឋបានចូលរួមដើរកម្សាន្ត ជួបជុំក្រុមគ្រួសារស្ទើរតែគ្រប់ទីកន្លែងរមណីដ្ឋានទេសចរណ៍ និងកន្លែងទីប្រជុំជន និងវត្តអារាម ដោយមិនព្រួយបារម្ភខ្លាំងពីការឆ្លងរាលដាលនៃជំងឺកូវីដ-១៩ ដោយសារតែការដឹកនាំដ៏ត្រឹមត្រូវ និងប៉ិនប្រសប់បំផុតរបស់សម្តេចតេជោ ហ៊ុន សែន លើនយោបាយវ៉ាក់សាំង។ ភាពសប្បាយរីករាយនៃពិធីបុណ្យចូលឆ្នាំថ្មី ក៏ជាការផ្សារភ្ជាប់រវាងយុវជននិងប្រវត្តិសាស្ត្រ ហើយ ដែលនឹងបង្កបរិយាកាសល្អដល់ដំណើរការឆ្ពោះទៅរកការបោះឆ្នោតឃុំ-សង្កាត់ឆ្នាំ២០២២ នាពេលខាងមុខនេះផងដែរ។

លើសពីឆ្នាំណាៗទាំងអស់ ឆ្នាំខាល ចត្វាស័ក ព.ស ២៥៦៦នេះ អាចចាត់ទុកជាពិធីបុណ្យចូលឆ្នាំដែលមានបរិយាកាសសប្បាយរីករាយបំផុតមួយ បន្ទាប់ពីបានអាក់ខានអស់រយៈពេលពីរឆ្នាំដោយសារតែវិបត្តិនៃជំងឺរាតត្បាតសាកលកូវីដ-១៩ ជាពិសេសបរិយាកាសសប្បាយរីករាយឆ្នាំនេះ មានសភាពគគ្រឹកគគ្រេងលើសពីបណ្តាឆ្នាំកាលពីមុនពេលកើតមានកូវីដ-១៩ ទៅទៀត។ ភាពសប្បាយរីករាយរបស់ប្រជាពលរដ្ឋនិងយុវជនខ្មែរបានកើតឡើងខណៈពេលដែល ពិភពលោកកំពុងបន្តញាំញីដោយជំងឺឆ្លងសាកលកូវីដ-១៩ នៅមិនទាន់ចប់នៅឡើយ។ ប៉ុន្តែផ្ទុយទៅវិញ ប្រជាពលរដ្ឋនិងយុវជនខ្មែរបែរជាអាចប្រារព្ធពិធីបុណ្យចូលឆ្នាំថ្មីរបស់ខ្លួនបានយ៉ាងសប្បាយរីករាយបំផុត។ 

មានមូលហេតុចម្បងចំនួន៤ដែលប្រជាពលរដ្ឋ និងយុវជនខ្មែរស្គាល់ភាពសប្បាយរីករាយបែបនេះ ក្នុងនោះ គឺសន្តិភាពដែលជាកត្តាកំណត់ចាំបាច់និងចម្បងបំផុតដើម្បីធានាឲ្យប្រជាពលរដ្ឋនិងយុវជនខ្មែរអាចស្គាល់ភាពសប្បាយរីករាយដោយគ្មានការព្រួយបារម្ភពីសង្គ្រាម ឬអសន្តិសុខផ្ទាល់ខ្លួនឡើយ។ ខុសពីយុវជនជំនាន់មុនៗដែល កុមារភាពនិងយុវវ័យរបស់ពួកគេត្រូវបានបំផ្លាញដោយសង្គ្រាមនិងរបបប្រល័យពូជសាសន៍ ធ្វើឲ្យជីវិតពួកគេរស់ក្នុងភាពភ័យខ្លាច អត់ឃ្លាននិងប្រឈមមុខនឹងសេចក្តីស្លាប់គ្រប់ពេលវេលាដោយគ្រាប់ផ្លោង ដោយការកាប់សម្លាប់ ដោយពលកម្មបាក់កម្លាំង ឬដោយដាច់ពោះព្រោះអត់អាហារ។ ប៉ុន្តែ យុវជនសម័យនេះមិនដែលខ្វល់ខ្វាយអំពីបញ្ហាទាំងអស់នោះទៀតឡើយ។ ពួកគេគិតតែពីរៀនសូត្រយកសញ្ញាបត្រខ្ពស់ រស់ក្នុងជីវភាពសមរម្យ និងថ្លៃថ្នូរក្នុងសង្គមដ៏សម្បូរបែបទាំងចំណីអាហារនិងបច្ចេកវិទ្យាទំនើបៗដែលរៀមច្បងរបស់ពួកគេមិនដែលបានស្គាល់នោះឡើយនៅក្នុងប្រវត្តិសាស្ត្រ ៥០០ឆ្នាំចុងក្រោយនេះ។ 

ភាពសប្បាយរីករាយរបស់ប្រជាពលរដ្ឋនិងយុវជនខ្មែរក្នុងឆ្នាំនេះបានកើតឡើងដោយសារតែកម្ពុជាទទួលបានជោគជ័យយ៉ាងធំធេងក្នុងការគ្រប់គ្រងជំងឺកូវីដ -១៩។ ជោគជ័យនេះបានមកពីការគិតត្រូវ សម្រេចចិត្តត្រូវ និងការដាក់ចេញវិធានការប្រកបដោយប្រសិទ្ធភាព ដោយមានការចូលរួមយ៉ាងសកម្មពីប្រជាពលរដ្ឋនិងយុវជនគ្រប់មជ្ឈដ្ឋាន។ 

វាមិនមែនជារឿងប្រឌិត ប៉ុន្តែគឺជាសច្ចធម៌ប្រវត្តិសាស្ត្រដែលគ្មានអ្នកណាអាចបដិសេធបានឡើយ។ ប្រកែកមិនបានពីព្រោះនៅក្នុងប្រវត្តិសាស្ត្រ ៥០០ឆ្នាំចុងក្រោយនេះ គ្មានពេលវេលាណាមួយដែលកម្ពុជាមានសន្តិភាពពេញលេញនិងយូរអង្វែងដូចសម័យបច្ចុប្បន្នឡើយ។ ក្នុងប្រវត្តិសាស្ត្រ ៥០០ឆ្នាំចុងក្រោយនេះ គ្មានពេលវេលាណាមួយដែលប្រទេសកម្ពុជាបានស្គាល់នូវការអភិវឌ្ឍន៍ខ្លាំងដូចសម័យបច្ចុប្បន្ននេះដែរ។ ក្នុងប្រវត្តិសាស្ត្រ ៥០០ ឆ្នាំចុងក្រោយនេះ គ្មានពេលវេលាណាមួយដែលប្រទេសកម្ពុជាបានស្គាល់ការអភិវឌ្ឍផ្នែកហេដ្ឋារចនាសម្ព័ន្ធគមនាគមន៍ និងទេសចរណ៍ដូចសម័យបច្ចុប្បន្ននេះឡើយ ហើយក៏គ្មានសម័យកាលណាមួយដែលប្រជាពលរដ្ឋនិងយុវជនខ្មែរស្គាល់ភាពសម្បូរសប្បាយដូចសម័យបច្ចុប្បន្ននោះដែរ។ 

សមិទ្ធផលទាំងអស់នេះមិនមែនកើតឡើងដោយចៃដន្យនោះឡើយ ប៉ុន្តែវាពិតជាបានកើតចេញពីពលីកម្ម និងកិច្ចខិតខំប្រឹងប្រែងមិនខ្លាចនឿយហត់របស់រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជាប្រមុខ។ ស្នាដៃជាប្រវត្តិសាស្ត្រនេះគឺជាសមិទ្ធផលប្រវត្តិសាស្ត្រដែលយុវជននិងយុវនារីក្នុងជំនាន់ថ្មីមិនត្រឹមតែត្រូវចងចាំទុកក្នុងចិត្តប៉ុណ្ណោះទេ ប៉ុន្តែត្រូវរួមគ្នាថែរក្សាការពារអោយបានគង់វង្សជារៀងរហូត ពីព្រោះវាគឺជាសមិទ្ធផលដែលមិនធ្លាប់កើតមានឡើយនៅក្នុងប្រវត្តិសាស្ត្រ ៥០០ឆ្នាំរបស់ជាតិយើង៕

សូមអញ្ជើញទស្សនាវីដេអូ៖

វិភាគអន្តរជាតិ៖ តើអាវុធលោកខាងលិច នឹងជួយឱ្យអ៊ុយក្រែនឈ្នះរុស្ស៉ី ក្នុងតំបន់ដុនបាស់ ឬ?

(វ៉ាស៊ីនតោន)៖ មេដឹកនាំសហរដ្ឋអាមេរិក ចក្រភពអង់គ្លេស និងកាណាដា បានសន្យាថានឹងបញ្ជូនកាំភ្លើងធំបន្ថែមទៅឱ្យអ៊ុយក្រែន ដែលកំពុង ប្រឈមមុខនឹងការវាយលុកសាជាថី្មពីសំណាក់កងទ័ពរុស្ស៉ី នៅឯតំបន់ភាគខាងកើតនៃប្រទេស។ ការសន្យាខាងលើធ្វើឡើងនៅក្នុងកិច្ចប្រជុំតាម ប្រព័ន្ធវីដេអូ កាលពីថ្ងៃអង្គារ ទី១៩ ខែមេសានេះ ដែលមានការចូលរួមពីប្រធានាធិបតីអាមេរិក លោក ចូ បៃដិន, នាយករដ្ឋមន្ត្រីអង់គ្លេស លោក បូរីស ចនសុន និងនាយករដ្ឋមន្ត្រីកាណាដា លោក ចាស្ទីន ឌ្រូដូ ព្រមទាំងមេដឹកនាំនៃប្រទេសជាសម្ព័ន្ធមិត្តជាច្រើនរូបទៀត។

បើតាមប្រភពជាច្រើនពីក្រុមមន្ត្រីអាមេរិក, លោក ចូ បៃដិន ក៏ត្រូវបានគេរំពឹងដែរថានឹងប្រកាស នៅប៉ុន្មានថ្ងៃខាងមុខនេះពីការផ្ដល់ជំនួយយោធា បន្ថែម មានទំហំទឹកប្រាក់ប្រហែលនឹងជំនួយយោធា ៨០០លានដុល្លារ ដែលរដ្ឋបាលរបស់លោកប្រកាសផ្ដល់ឱ្យអ៊ុយក្រែនកាលពីសប្ដាហ៍មុន។ ប្រសិនបើជំនួយយោធាថ្មីនេះត្រូវបានប្រកាសមែន នោះវានឹងធ្វើឱ្យកញ្ចប់ជំនួយយោធាដែលអាមេរិកផ្ដល់ឱ្យអ៊ុយក្រែន កើនដល់ជាង ៣ពាន់លានដុល្លារ ចាប់តាំងពីសង្រ្គាមផ្ទុះឡើងកាលពីថ្ងៃទី២៤ ខែកុម្ភៈមក។

ចាប់តាំងពីសង្រ្គាមផ្ទុះឡើងមក, សហរដ្ឋអាមេរិក និងបណ្ដាប្រទេសជាសមាជិក NATO បានបញ្ជូនអាវុធដូចទឹកបាក់ទំនប់ទៅឱ្យអ៊ុយក្រែន ក្នុងនោះរួមមានមីស៊ីលប្រឆាំងរថក្រោះ Javelin, មីស៊ីលប្រឆាំងយន្ដហោះចម្បាំង Stinger និងដ្រូនពិឃាដ (Switchblade) ព្រមទាំងគ្រោងនឹង កាំភ្លើងធំ Howitzer។ បើគ្មានអាវុធទាំងនេះទេ ម្ល៉េះលោក ពូទីនអាចនឹងសម្រេចគោលដៅតាមផែនការ ហើយអ៊ុយក្រែនក៏ប្រហែលជាមិនអាច តស៊ូប្រយុទ្ធជាមួយកងទ័ពរុស្ស៉ីមកទល់នឹងថ្ងៃនេះដែរ។

ប៉ុន្តែ អ្វីដែលសំខាន់គឺនៅត្រង់ថាកងទ័ពអ៊ុយក្រែន មិនទាន់អាចចេះប្រើអាវុធទំនើបៗមួយចំនួនរបស់លោកខាងលិចបានស្ទាត់នោះទេ តួយ៉ាង ដូចជាកំាភ្លើងធំ Howitzer ដែលកងទ័ពអាមេរិកត្រូវបានគេរាយការណ៍ថានឹងត្រូវបង្រៀនកងទ័ពអ៊ុយក្រែនឱ្យចេះប្រើកាំភ្លើងធំប្រភេទនេះ ហើយ សព្វថ្ងៃអ្វីដែលអ៊ុយក្រែនត្រូវការ នោះគឺអាវុធធុនធ្ងន់។ ដូច្នេះខណៈរុស្ស៉ីចាប់ផ្ដើមដំណាក់ទី២ នៃសង្រ្គាមដោយបើកការវាយលុកលើ តំបន់ដុនបាស់នៅភាគខាងកើតអ៊ុយក្រែន, ថាតើអាវុធទាំងនេះគឺគ្រប់គ្រាន់ជួយឱ្យអ៊ុយក្រែនទប់ទល់ជាមួយរុស្ស៉ីដូចក្នុងសង្រ្គាមដំណាក់កាលទី១ ដែរឬក៏យ៉ាងណា។

* តើអ្វីដែលអ៊ុយក្រែនចង់បាន ហើយអ្វីដែលកំពុងបញ្ជូនមកឱ្យ?

នៅចំពោះមុខសង្រ្គាមដំណាក់កាលទី២ ជាមួយរុស្ស៉ី នៅឯតំបន់ដុនបាស់, អ្វីដែលអ៊ុយក្រែនត្រូវការបំផុតនៅពេលនេះ នោះគឺប្រព័ន្ធអាវុធធុនធ្ងន់ ក្នុងនោះរួមមានយន្ដហោះចម្បាំង ដែលអាមេរិក និងបណ្ដាប្រទេសនៅអឺរ៉ុបនៅតែស្ទាក់ស្ទើរក្នុងការបញ្ជូនឱ្យកងទ័ពអ៊ុយក្រែន ពីព្រោះពួកគេខ្លាច សង្រ្គាមរាលដាលកាន់តែធំ ផ្ទុះទៅជាសង្រ្គាមនុយក្លេអ៊ែរ ឬសង្រ្គាមលោកថ្មីណាមួយ។

មកទល់នឹងបច្ចុប្បន្ន, អាវុធដែលត្រូវបានបញ្ជូនដល់ដៃកងទ័ពអ៊ុយក្រែន គឺជាប្រភេទអាវុធការពារខ្លួនតែប៉ុណ្ណោះ ដូចជាមីស៊ីលប្រឆាំងរថក្រោះ Javelin និងមីស៊ីលប្រឆាំងយន្ដហោះចម្បាំង Stinger ដែលអាវុធទាំងនេះត្រូវបានគេរាយការណ៍ថាបានបង្ហាញឫទ្ធានុភាព ដោយអាចជួយឱ្យ អ៊ុយក្រែនការពាររដ្ឋធានីកៀវ និងបង្កការខាតបង់ធ្ងន់ធ្ងរដល់កងទ័ពរុស្ស៉ី។ ប្រសិទ្ធភាពនៃអាវុធទាំងនេះក៏បានស្ដែងឡើងឱ្យឃើញកាន់តែច្បាស់ ផងដែរ តាមរយៈប្រតិកម្មរបស់រុស្ស៉ីដែលបានព្រមានឱ្យសហរដ្ឋអាមេរិក និង NATO បញ្ឈប់ការបញ្ជូនអាវុធឱ្យអ៊ុយក្រែន។

តែទោះជាយ៉ាងណាក៏ដោយ, បើសង្រ្គាមនៅតែអូសបន្លាយ ថាតើសហរដ្ឋអាមេរិក និងសម្ព័ន្ធមិត្តអាចនឹងមានអាវុធគ្រប់គ្រាន់បញ្ជូនឱ្យអ៊ុយក្រែន ទៀតបានដែរឬទេ ហើយគេត្រូវការចំណាយពេលប៉ុន្មាន? ជាក់ស្ដែង មីស៊ីល Javelin ដែលសហរដ្ឋអាមេរិកយកចេញពីឃ្លាំងមកជួយអ៊ុយក្រែន បានដល់ចំនួនកំណត់ ហើយប្រទេសមួយចំនួនដូចជាអាល្លឺម៉ង់ ក៏បានប្រកាសដែរថាអាវុធដែលខ្លួនដកចេញពីឃ្លាំងបញ្ជូនឱ្យទីក្រុងកៀវបានដល់ ចំនួនកំណត់ហើយ ព្រោះទុកសម្រាប់ការពារខ្លួនឯង បើទោះជាពួកគេសន្យាបន្តផ្ដល់ការគាំទ្រដល់អ៊ុយក្រែនក៏ដោយ។

កាលពីសប្ដាហ៍មុន, ប្រធានាធិបតីអាមេរិក លោក ចូ បៃដិន បានចេញបញ្ជាឱ្យក្រុមហ៊ុនផលិតសព្វាវុធអាមេរិកធំៗ បង្កើនការផលិតអាវុធដើម្បី បំពេញតាមតម្រូវការរបស់អ៊ុយក្រែន។ ដូច្នេះនៅមុនពេលអាវុធទាំងនោះត្រូវបញ្ជូនទៅដល់ តើអ៊ុយក្រែនត្រូវប្រឈមមុខនឹងកងទ័ពរុស្ស៉ី នៅភាគខាងកើតអ៊ុយក្រែនដោយរបៀបណា? ខណៈក្រុមអ្នកជំនាញជាច្រើនព្រមានថា កងទ័ពរុស្ស៉ីក៏បានរៀនពីបរាជ័យរបស់ខ្លួនក្នុងសង្រ្គាម ដំណាក់កាលទី១ ផងដែរ។

គួរបញ្ជាក់ថា កងទ័ពរុស្ស៉ីកាលពីថ្ងៃអង្គារនេះត្រូវបានគេរាយការណ៍ថាបានវាយដណ្ដើមបានទីក្រុងក្រេមីនណា (Kreminna) នៃតំបន់ ភាគខាងកើតប្រទេសអ៊ុយក្រែន។ Kreminna ដែលមានប្រជាជនរស់នៅច្រើនជាង ១៨,០០០នាក់ នៅមុនសង្រ្គាមជាមួយរុស្ស៉ីផ្ទុះឡើង គឺជាទីក្រុងដំបូងគេដែលត្រូវកងទ័ពរុស្ស៉ីវាយយកបាន ចាប់តាំងពីម៉ូស្គូចាប់ផ្ដើមដំណាក់កាលពី២ នៃសង្រ្គាមដោយផ្ដោតលើតំបន់ដុនបាស់ នៃភាគខាងកើតអ៊ុយក្រែន៕

ប្រភព៖ Al Jazeera, Vox (ថ្ងៃពុធ ទី២០ ខែមេសា ឆ្នាំ២០២២)

ដោយៈ Fresh News