ឧត្តរមានជ័យ ៖ នៅព្រឹកថ្ងៃទី២២ ខែវិច្ឆិកា ឆ្នាំ២០២១ លោក ឌី រ៉ាដូ អភិបាលរងខេត្ត តំណាងដ៏ខ្ពង់ខ្ពស់ លោក ប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ បានអញ្ជើញជាអធិបតីក្នុងពិធីបើកសិក្ខាសាលាសមាហរណកម្មកម្មវិធីវិនិយោគឃុំ-សង្កាត់ នៅក្រុង-ស្រុក ឆ្នាំ២០២១ នៅសាលប្រជុំធំសាលាស្រុកត្រពាំងប្រាសាទ ខេត្តឧត្តរមានជ័យ។
ដោយក្នុងនោះក៏មានការអញ្ជើញចូលរួមពី លោក លោកស្រី អភិបាល ស្រុកត្រពាំងប្រាសាទ អនុប្រធានមន្ទីរផែនការខេត្ត នាយកទីចាត់ការផែនការ និងវិនិយោគខេត្ត តំណាងមន្ទីរ-អង្គភាពជុំវិញខេត្ត ក្រុមការងារកសាងផែនការខេត្ត តំណាងគណៈកម្មាធិការពិគ្រោះយោបល់ស្រ្តី និងកុមារ ស្រុក ក្រុមប្រឹក្សាស្រុក និងឃុំ មេឃុំ ស្មៀន អង្គការដៃគូអភិវឌ្ឍ និងអ្នកពាក់ព័ន្ធនានា។
គោលបំណងចម្បងនៃអង្គសិក្ខាសាលាដ៏មានសារៈសំខាន់នេះ គឺដើម្បីបង្ហាញអំពីតម្រូវការអភិវឌ្ឍមូលដ្ឋាន និងសម្របសម្រួល បន្ស៊ីនូវតម្រូវការអភិវឌ្ឍទាំងនោះជាមួយគម្រោង និងធនធានរបស់ដៃគូអភិវឌ្ឍ រដ្ឋបាលខត្ត មន្ទីរអង្គភាព អង្គការសង្គមស៊ីវិល វិស័យឯកជន និងអ្នកពាក់ព័ន្ធនានា ដើម្បីឈានទៅដល់ការឆ្លើយតបនឹងតម្រូវការរបស់ប្រជាពលរដ្ឋក្នុងមូលដ្ឋានប្រកបដោយប្រសិទ្ធភាព។
ជាលទ្ធផលរំពឹងទុក ក្នុងអង្គសិក្ខាសាលានេះ រដ្ឋបាលស្រុក រដ្ឋបាលឃុំ-សង្កាត់ ដៃគូអភិវឌ្ឍ រដ្ឋបាលខត្ត មន្ទីរអង្គភាព អង្គការសង្គមស៊ីវិល វិស័យឯកជន និងអ្នកពាក់ព័ន្ធនានា បានយល់ដឹងអំពីទស្សនៈ គោលបំណង តម្រូវការគម្រោងអភិវឌ្ឍ និងលទ្ធភាពថវិកាពីគ្នាទៅវិញទៅមកដោយតម្លាភាព ហើយនឹងអាចឈានដល់ការសម្របសម្រួលគ្នា ដើម្បីឱ្យមានការវិនិយោគ ក៏ដូចជាការអភិវឌ្ឍនៅតាមមូលដ្ឋាន ប្រព្រឹត្តទៅបានដោយរលូន មានសង្គតិភាព និងមានប្រសិទ្ធភាពខ្ពស់៕
