នៅព្រឹកថ្ងៃទី១៦ ខែកុម្ភៈ ឆ្នាំ២០២១នេះ ក្រសួងសុខាភិបាលបន្តប្រកាសថា មិនមានរកឃើញករណីឆ្លងជំងឺកូវីដ១៩ ថ្មីនោះទេ ខណៈអ្នកជាសះស្បើយក៏គ្មានដែរ។
រយៈពេល៤ថ្ងៃជាប់គ្នាហើយ ដែលក្រសួងសុខាភិបាល ប្រកាសមិនមានរកឃើញអ្នកឆ្លងកូវីដ១៩ថ្មី នៅកម្ពុជា។
សូមជម្រាបថា គិតត្រឹមម៉ោង៧៖០០នាទីព្រឹកថ្ងៃទី១៦ ខែកុម្ភៈ ឆ្នាំ២០២១នេះ នៅកម្ពុជាបានរកឃើញអ្នកឆ្លងកូវីដ១៩ សរុបចំនួន ៤៧៩នាក់ ក្នុងនោះអ្នកព្យាបាលជាសះស្បើយចំនួន ៤៦៩នាក់ និងអ្នកជំងឺចំនួន ១០នាក់កំពុងសម្រាកនៅមន្ទីរពេទ្យ៕
ក្រសួងធនធានទឹក និងឧតុនិយម នៅថ្ងៃទី១៦ ខែកុម្ភៈ ឆ្នាំ២០២១នេះ បានចេញសេចក្តីជូនដំណឹង ស្តីពីស្ថានភាពធាតុអាកាសនៅកម្ពុជា ចាប់ពីថ្ងៃទី១៧ ដល់ ២៣ ខែធ្នូ ឆ្នាំ២០២១។
ក្រសួងបានបញ្ជាក់ថា ទ្រនុងសម្ពាធខ្ពស់ បាននិងកំពុងមានឥទ្ធិពលមកលើប្រទេសកម្ពុជា ពេញក្នុងមួយសប្តាហ៍នេះ។ ស្ថានភាពបែបនេះ នឹងធ្វើឲ្យ៖
១៖ បណ្តាខេត្តនៅតំបន់វាលទំនាបកណ្តាល៖
* សីតុណ្ហភាពអប្បបរមា មានពី១៨-២១ អង្សាសេ
* សីតុណ្ហភាពអតិបរមា មានពី៣០ -៣៣ អង្សាសេ
* ថ្ងៃទី១៨-១៩ ខែកុម្ភៈ មានខ្យល់កន្ត្រាក់ល្បឿនបង្គួរ នៅទំនាបកណ្តាល។
២៖ បណ្តាខេត្តជាប់ជួរភ្នំដងរែក និងខ្ពស់រាបឦសាន
* សីតុណ្ហភាពអប្បបរមា មានពី១៧-២០អង្សាសេ
* សីតុណ្ហភាពអតិបរមា មានពី៣០-៣៣អង្សាសេ
* នៅថ្ងៃទី១៧-២០ ខែកុម្ភៈ មានខ្យល់កន្ត្រាក់ល្បឿនខ្លាំង នៅខ្ពង់រាបខាងកើត។
៣៖ តំបន់មាត់សមុទ្រ
* សីតុណ្ហភាពអប្បបរមា មានពី ១៩-២២ °C
* សីតុណ្ហភាពអតិបរមា មានពី ២៩-៣២ °C
* នៅថ្ងៃទី១៨-១៩ ខែកុម្ភៈ មានខ្យល់កន្ត្រាក់ល្បឿនបង្គួរ ជាមួយនិងរលកមានកម្ពស់មធ្យមនៅ
ខេត្តកោះកុង និងតំបន់ឆ្នេរ។
ជាមួយគ្នានេះ ក្រសួងបានអំពាវនាវដល់ប្រជាពលរដ្ឋ និងពិសេសវីរៈកងទ័ពរស់នៅតំបន់ជួរភ្នំដងរែក ខ្ពង់រាបខាងកើត និងតំបន់មាត់សមុទ្រ សូមបង្កើនការយកចិត្តទុកដាក់ថែរក្សា សុខភាពចំពោះអាកាសធាតុត្រជាក់បន្តិចបន្តួច នាពេលព្រឹក ជាមួយនឹងខ្យល់កន្ត្រាក់ និងរលកសមុទ្រ មានកម្ពស់ជាមធ្យម ៕
នៅថ្ងៃទី១២ ខែកុម្ភៈ ឆ្នាំ២០២១នេះ អង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី បានបញ្ចេញផ្សាយនូវវីដេអូថ្មីមួយដែលទើបនឹងផលិតរួចរាល់ មានចំណងជើងថា «វ៉ាក់សាំងប្រឆាំងកូវីដ-១៩ ជាក្តីសង្ឃឹមសម្រាប់ការងើបឡើងវិញនៃសេដ្ឋកិច្ចកម្ពុជា»។
វីដេអូនេះ មានរយៈពេលប្រមាណជិត១៦នាទី បានរំលេចជូនសាធារណៈជនជាតិ និងអន្តរជាតិអោយបានឃើញនូវជោគជ័យដ៍ធំធេងថ្មី ដែលទទួលបានក្រោមការដឹកនាំ ចាត់ចែងដ៍ម៉ឺងម៉ាត់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងការគ្រប់គ្រង និងទប់ស្កាត់បានប្រកបដោយប្រសិទ្ធិភាពខ្ពស់នូវជំងឺរាតត្បាតកូវីដ-១៩ផង និងការធានាបាននូវដំណើរការអភិវឌ្ឍប្រទេស កាន់តែរីកចម្រើនថែមទៀតផង។
ខ្លឹមសារនៃវីដេអូរបស់អង្គភាពព័ត៌មាន និងប្រតិកម្មរហ័ស បានគូសបញ្ជាក់ថា រហូតមកដល់ពេលនេះ មានបណ្តាប្រទេសយ៉ាងតិចចំនួន១៦ហើយនៅជុំវិញពិភពលោកដែលបានសម្រេចអនុញ្ញាតជាផ្លូវការឲ្យប្រើប្រាស់វ៉ាក់សាំងរបស់ចិនទាំងពីរប្រភេទ គឺ Sinopharm និង Sinovax ។ បណ្តាប្រទេសជាច្រើនទៀត រាប់ទាំងប្រទេសអភិវឌ្ឍជឿនលឿនមួយចំនួនផងដែរក៏កំពុងពិចារណាប្រើប្រាស់វ៉ាក់សាំងរបស់ចិនដែរ។ ប្រមុខដឹកនាំកម្ពុជាក៏បានប្រកាសឲ្យដឹងពីផែនការនៃកិច្ចខិតខំប្រឹងប្រែងរបស់រាជរដ្ឋាភិបាលដើម្បីស្វែងរកវ៉ាកសាំងពីប្រភពផ្សេងៗទៀតដូចជាពីប្រទេសឥណ្ឌា រុស្ស៊ី ជាដើម ដើម្បីចាក់ជូនប្រជាពលរដ្ឋខ្មែរថែមទៀត។
ប្រជាពលរដ្ឋខ្មែរដែលធុញទ្រាន់នឹងជំងឺកូវីដ-១៩ បានសម្តែងនូវការអបអរសាទរចំពោះវត្តមានវ៉ាក់សាំងនៅលើទឹកដីកម្ពុជា ហើយពួកគេពិតជាប្រាថ្នាចង់ចាក់វ៉ាក់សាំងឲ្យបានឆាប់ដើម្បីការពារខ្លួន និងក្រុមគ្រួសារកុំឲ្យឆ្លងជំងឺដ៏កាចសាហាវនេះ។ បានចាក់វ៉ាក់សាំងប្រឆាំងកូវីដ-១៩ គឺប្រៀបដូចជាមានអាវក្រោះការពារខ្លួនដ៏មានប្រសិទ្ធភាព ដែលអាចកម្ចាត់រោគរាតត្បាតដ៏សាហាវនេះមិនឲ្យយាយីជីវិតពួកគេបានឡើយ។ មានជីវិតមានក្តីសង្ឃឹម មានការអភិវឌ្ឍន៍ មានកំណើនសេដ្ឋកិច្ចជាតិ និងគ្រួសារ៕
សូមទស្សនាវីដេអូ ដូចតទៅ៖
នៅថ្ងៃទី៨ ខែកុម្ភៈ ឆ្នាំ២០២១នេះ អង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី បានបញ្ចេញផ្សាយនូវវីដេអូថ្មីមួយដែលទើបនឹងផលិតរួចរាល់ មានចំណងជើងថា «កូវីដ-១៩ មិនបានបង្អាក់ដំណើរការអភិវឌ្ឍប្រទេសកម្ពុជាទេ!» ។
លោកនាយករដ្ឋមន្រ្តី ហ៊ុន សែន បានឯកភាពតាមសំណើ ឱ្យអ្នកសារព័ត៌មានទាំងអស់ទទួលបានការចាក់វ៉ាក់សាំងកូវីដ១៩ ដោយសារតែមុខរបរអ្នកសារព័ត៌មាននេះត្រូវជួបប្រទះនឹងមនុស្សច្រើននៅក្នុងវិជ្ជាជីវៈរបស់ខ្លួន។ លោកបានថ្លែងដូចនេះនៅរសៀលថ្ងៃទី៧ ខែកុម្ភៈ ឆ្នាំ២០២១ ក្នុងឱកាសអញ្ជើញធ្វើសន្និសីទ បន្ទាប់ពីពិធីប្រគល់-ទទួលអំណោយដ៏ថ្លៃថ្លាវ៉ាក់សាំង (SARS-CoV-2Sinopharm)ពីរដ្ឋាភិបាល និងប្រជាជននៃសាធារណរដ្ឋប្រជាមានិតចិនដើម្បីទប់ស្កាត់ការរីករាលដាលនៃជំងឺកូវីដ-១៩នៅអាកាសយានដ្ឋានអន្តរជាតិភ្នំពេញ។
លោកនាយករដ្ឋមន្រ្តី ហ៊ុន សែន ក៏បានណែនាំឱ្យបងប្អូនអ្នកសារព័ត៌មានធ្វើការសហការចុះឈ្មោះជាមួយក្រសួងសុខាភិបាលដើម្បីទទួលបានការចាក់វ៉ាក់សាំងនេះ ហើយលោកក៏ជំរុញឱ្យក្រសួងសុខាភិបាលធ្វើការផ្សព្វផ្សាយនិងសិក្សាអំពីលក្ខខណ្ឌទាំង១៤ចំណុចដែលមនុស្សអាចទទួលបានវ៉ាក់សាំងបាន៕
លោកនាយករដ្ឋមន្រ្តី ហ៊ុន សែន បានថ្លែងថា ដោយសារតែផ្លែផ្កានៃកិច្ចសហប្រតិបត្តិការល្អរវាងកម្ពុជានិងចិននោះហើយ ទើបប្រទេសកម្ពុជាយើងមានឱកាសបានទទួលជំនួយវ៉ាក់សាំងកូវីដ១៩ពេលនេះក្នុងពេលដែលប្រទេសជាច្រើនពុំទាន់បានទទួលវ៉ាក់សាំង។ លោកបានថ្លែងដូចនេះនៅរសៀលថ្ងៃទី៧ ខែកុម្ភៈ ឆ្នាំ២០២១ ក្នុងឱកាសអញ្ជើញធ្វើសន្និសីទ បន្ទាប់ពីពិធីប្រគល់-ទទួលអំណោយដ៏ថ្លៃថ្លាវ៉ាក់សាំង (SARS-CoV-2Sinopharm)ពីរដ្ឋាភិបាល និងប្រជាជននៃសាធារណរដ្ឋប្រជាមានិតចិនដើម្បីទប់ស្កាត់ការរីករាលដាលនៃជំងឺកូវីដ-១៩នៅអាកាសយានដ្ឋានអន្តរជាតិភ្នំពេញ។
លោកនាយករដ្ឋមន្រ្តី ហ៊ុន សែន បានបញ្ជាក់ថា បើគ្មានចំណងមិត្តភាពរឹងមាំរវាងកម្ពុជានិងចិន ថ្ងៃនេះយើងក៏ពុំបានទទួលបានវ៉ាក់សាំងកូវីដ១៩នោះដែរ ដែលចំណុចនេះហើយគឺជាមោទនភាពរបស់កម្ពុជាក្នុងការធ្វើជាដៃគូសហប្រតិបត្តិការ និងជាមិត្តរបស់ចិន។
លោកនាយករដ្ឋមន្រ្តី ហ៊ុន សែន ក៏បានថ្លែងអំណរគុណដល់លោកប្រធានាធិបតីចិន ស៊ី ជីនពីង លោកនាយករដ្ឋមន្រ្តីចិន លី ខឺឈាង និងរដ្ឋមន្រ្តីក្រសួងការបរទេស និងក្រសួងការពារជាតិចិន និងប្រជាជនចិនទាំងអស់ដែលបានផ្តល់ជំនួយវ៉ាក់សាំងមកដល់កម្ពុជា៕
លោកនាយករដ្ឋមន្រ្តី ហ៊ុន សែន បានថ្លែងថា ការផ្តល់ជំនួយវ៉ាក់សាំងកូវីដ១៩របស់ចិននាពេលនេះ បានឆ្លុះបញ្ចាំងពីចំណងមិត្តភាពដែកថែបនៃប្រទេសទាំងពីរ និងជាដៃគូសហប្រតិបត្តិការគ្រប់ជ្រុងជ្រោយលើគ្រប់វិស័យ។ លោកបានថ្លែងដូចនេះនៅរសៀលថ្ងៃទី៧ ខែកុម្ភៈ ឆ្នាំ២០២១ ក្នុងឱកាសអញ្ជើញធ្វើសន្និសីទ ក្នុងពិធីប្រគល់-ទទួលអំណោយដ៏ថ្លៃថ្លាវ៉ាក់សាំង (SARS-CoV-2Sinopharm)ពីរដ្ឋាភិបាល និងប្រជាជននៃសាធារណរដ្ឋប្រជាមានិតចិនដើម្បីទប់ស្កាត់ការរីករាលដាលនៃជំងឺកូវីដ-១៩នៅអាកាសយានដ្ឋានអន្តរជាតិភ្នំពេញ។
លោកនាយករដ្ឋមន្រ្តី ហ៊ុន សែន បានលើកឡើងពីពាក្យស្លោកមួយថា ស្គាល់មិត្តក្នុងគ្រាក្រដែលនេះបានឆ្លុះបញ្ចាំងពីការជួយគ្នាក្នុងពេលដែលកម្ពុជាកំពុងជួបប្រទះនូវវិបត្តិកូវីដ១៩។ លោកបានបន្តថា វ៉ាក់សាំងកូវីដ១៩នាពេលនេះគឺជាតម្រូវការជាយុទ្ធសាស្រ្តដើម្បីការពារអាយុជីវិតប្រជាពលរដ្ឋ និងដើម្បីលើកកម្ពស់សុខភាពសាធារណៈផងដែរ៕
