បាត់ដំបង៖ នៅរសៀលថ្ងៃទី១៥ ខែមិថុនា ឆ្នាំ២០២០ លោក អ៊ុយ រី ប្រធានក្រុមប្រឹក្សាខេត្ត និងលោក ងួន រតនៈ អភិបាល នៃគណៈអភិបាលខេត្ត បានអញ្ជើញជាអធិបតីភាពក្នុងពិធីពិធីប្រកាសផ្សព្វផ្សាយ និងដាក់ឱ្យដំណើរការមន្ទីរសុខាភិបាលនៃរដ្ឋបាលខេត្តបាត់ដំបង ដែលមានការអញ្ជើញចូលរួមពី សមាជិក សមាជិកា ក្រុមប្រឹក្សាខេត្ត លោក លោកស្រី អភិបាលរង នៃគណៈអភិបាលខេត្ត លោក លោកស្រីនាយក នាយករង រដ្ឋ បាលសាលាខេត្ត នាយក នាយករង ទីចាត់ការ អង្គភាព ចំណុះរចនាសម្ព័ន្ធខេត្ត លោក លោកស្រី ប្រធាន អនុប្រ ធានមន្ទីរ អង្គភាពនានាជុំវិញខេត្ត លោក អភិបាល អភិ បាលរងក្រុង ស្រុក និងអ្នកពាក់ព័ន្ធជាច្រើនរូបទៀត។
លោក ងួន រតនៈ បានថ្លែងបញ្ជាក់ថា បន្ទាប់ពីរាជរដ្ឋា ភិបាលបានដាក់ចេញនូវអនុក្រឹត្យស្តីពីការប្រគល់មុខងារការគ្រប់គ្រង និងការផ្តល់សេវាសុខាភិបាលទៅឱ្យរដ្ឋបា លរាជធានី ខេត្ត នាចុងឆ្នាំ២០១៩ កន្លងមក បើទោះយើងកំពុងបញ្ហាស្ថានភាពលំបាកដោយសារការរីករាលដាលជម្ញឺកូវីដ១៩ រដ្ឋបាលខេត្តនៅតែបន្តអនុវត្តគោលនយោ បាយការដាក់ចេញការកំណែទ្ររបស់រាជរដ្ឋាភិបាលលើការងារការផ្ទេរមុខងារលើកវិស័យសុខាភិបាលផងដែរ។
លោកអភិបាលខេត្ត បានបញ្ជាក់ថា ចំពោះការផ្សព្វផ្សាយនេះដើម្បីបង្ហាញជូនដល់ថ្នាក់ដឹកនាំនៃរដ្ឋបាលខេត្ត រួមទាំងប្រធានមន្ទីរ មន្ត្រីរាជការ និងបុគ្គលិកសុខាភិបាលពីការអនុវត្តតួនាទី និងភារកិច្ចលើការគ្រប់គ្រង និងការផ្តល់សេវាសុខាភិបាលជូនប្រជាពលរដ្ឋ ប្រកបដោយការ ទទួលខុសត្រូវមានប្រសិទ្ធភាព តម្លាភាព ស្របតាម គោលការណ៍និងនីតិវិធីថ្មីៗ ដូចបានកំណត់ក្នុងលិខិតបទដ្ឋានគតិយុត្តពាក់ព័ន្ធនិងការផ្ទេរមុខងារក្នុងវិស័យសុខាភិបាល មកស្ថិតក្រោមការគ្រប់គ្រងរបស់រដ្ឋបាលខេត្ត។ ប្រធានមន្ទីរសុខាភិបាលក៏ត្រូវមានការទទួល ខុសត្រូវ និងគណនេយ្យភាពចំពោះក្រុមប្រឹក្សា និងគណៈអភិបាលខេត្ត ក្នុងការគ្រប់គ្រងការចាត់ចែងការគាំទ្រ ផ្នែកបច្ចេកទេស និងការតាមដានត្រួតពិនិត្យលើការផ្តល់សេវាសុខាភិបាលដែលបានប្រគល់ទៅឱ្យរដ្ឋបាលខេត្ត។
សូមបញ្ជាក់បន្ថែមថា ពិធីប្រកាសផ្សព្វផ្សាយ និងដាក់ឱ្យដំណើរការមន្ទីរសុខាភិបាលនៃរដ្ឋបាលខេត្ត ឱ្យមកស្ថិតក្រោមរចនាសម្ព័ន្ធខេត្តនាពេលនេះ មានបុគ្គលិកចំនួនប្រមាណ ១៣០០ នាក់ ព្រមទាំងធនធាន និងការទទួល ខុសត្រូវមករដ្ឋបាលខេត្តផងដែរ៕
