ប្រសាសន៍សំខាន់ៗរបស់សម្តេចតេជោ ហ៊ុន សែន ក្នុងឱកាសអញ្ជើញជាអធិបតីបើកពិធីបុណ្យទន្លេ នៅខេត្តបាត់ដំបង

(FN-បាត់ដំបង)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅល្ងាចថ្ងៃសៅរ៍ ទី១៤ ខែមីនា ឆ្នាំ២០២០នេះ បានអញ្ជើញជាអធិបតីភាពប្រកាស បើកពិធីបុណ្យទន្លេលើកទី៦ នៅក្នុងខេត្តបាត់ដំបង។ ពិធីនេះក៏មានការអញ្ជើញចូលរួមពីមន្ត្រីជាន់ខ្ពស់នៃរាជរដ្ឋាភិបាលកម្ពុជា តំណាងស្ថានទូតប្រទេសជាមិត្ត ព្រមទាំងមន្ត្រីរាជការ កងកម្លាំងប្រដាប់ និងប្រជាពលរដ្ឋយ៉ាងច្រើនកុះករ។

ប្រសាសន៍សំខាន់ៗរបស់សម្តេចតេជោ ហ៊ុន សែន ថ្លែងក្នុងឱកាសអញ្ជើញជាអធិបតីបើកពិធីបុណ្យទន្លេ៖
* សម្តេចតេជោ ហ៊ុន សែន បានថ្លែងកោតសរសើរ និងវាយតម្លៃខ្ពស់ចំពោះគណៈកម្មការអន្តរក្រសួងក្រសួងទេសចរណ៍ក្រសួងស្ថាប័នពាក់ព័ន្ធរដ្ឋបាលខេត្តបាត់ដំបង និងវិស័យឯកជនដែលបានរួមសហការគ្នាយ៉ាងសកម្មរៀបចំពិធីបុណ្យដ៏មានសារៈសំខាន់នេះ។
* សម្តេចតេជោ ហ៊ុន សែន ថ្លែងថា ការរៀបចំឲ្យមានបុណ្យទន្លេជារៀងរាល់ឆ្នាំ គឺជាការបង្ហាញអំពីសករាជនុពលទេសចរណ៍តាមដងទន្លេកម្ពុជា ជាពិសេសខេត្តបាត់ដំបង ដែលស្ថិតនៅប៉ែកពាយ័ព្យ និងចំកណ្ដាលនៃបណ្ដាខេត្តសំខាន់ៗនៃប្រទេសកម្ពុជា ហើយក៏ជាខេត្តដែលសំបូរបេតិកភណ្ឌវប្បធម៌ និងតំបន់ទេសចរណ៍ធម្មជាតិរមណីយដ្ឋានទេសចរណ៍ធម្មជាតិវប្បធម៌ប្រវត្តិសាស្ត្រ និងកសិទេសចរណ៍សំណង់ស្ថាបត្យកម្មដ៏ប្រណីតជាច្រើនកន្លែង ដែលបន្សល់ទុកដោយអាណានិគមបារាំងនិងកំពុងទាក់ទាញភ្ញៀវចម្រុះជាតិសាសន៍បានមកកម្សាន្តនិងសិក្សាស្វែងយល់។
* សម្តេចតេជោ ហ៊ុន សែន បានថ្លែងថា បច្ចុប្បន្នវិស័យទេសចរណ៍កម្ពុជាកំពុងមានការរីកចម្រើនគួរឲ្យកត់សម្គាល់ក្នុងរយៈពេលមួយទសវត្សរ៍ចុងក្រោយនេះ ធ្វើឲ្យកម្ពុជាក្លាយជាគោលដៅទេសចរណ៍ប្រកបដោយភាពទាក់ទាញដើម្បីរួមចំណែកក្នុងការអភិវឌ្ឍសង្គមជាតិ។
* សម្តេចតេជោ ហ៊ុន សែន បានថ្លែងថា នៅក្នុងឆ្នាំ២០១៩ ចំនួនភ្ញៀវទេសចរអន្តរជាតិមកកម្ពុជាមានប្រមាណ ៦លាន ៦សែននាក់ កើនឡើងបីដងធៀបនឹង១០ឆ្នាំមុន ដែលមានចំនួនប្រមាណ២ លាន ១សែន៦ម៉ឺន នាក់ប៉ុណ្ណោះ។
* សម្តេចតេជោ ហ៊ុន សែន ថ្លែងថា ការរីករាលដាលនៃជំងឺ Covid-19 បានបង្កឲ្យមានផលប៉ះពាល់លើវិស័យសេដ្ឋកិច្ចជាសកល និងវិស័យទ្រទ្រង់សំខាន់ៗដូចជា វិស័យសេវាកម្ម ដែលក្នុងនោះមានវិស័យទេសចរណ៍ផងងដែរ។ នៅដើមឆ្នាំ២០២០ នេះ ភ្ញៀវទេសចរអន្តរជាតិមកកម្ពុជា បានធ្លាក់ចុះ ៣០,៥ភាគរយ ក្នុងនោះភ្ញៀវទេសចរចិនបានធ្លាក់ចុះក្នុងរង្វង់ ៤០ភាគរយ ធៀបនឹងរយៈពេលដូចគ្នាទៅនឹងឆ្នាំ២០១៩
* សម្តេចតេជោ ហ៊ុន សែន ថ្លែងថា វិស័យទេសចរណ៍ គឺជាមាសបៃតងនិងជាសសរស្ដម្ភនៃខឿនសេដ្ឋកិច្ចជាតិ។ ចំណូលដុលពីទេសចរណ៍អន្តរជាតិឆ្នាំ ២០១៩ មានចំនួន ៤៩១៩លានដុល្លារអាមេរិក ឬស្មើនឹងជិត ១៣ភាគរយ នៃផសស។
* សម្តេចតេជោ ហ៊ុន សែន ថ្លែងថា បើគិតជាតម្លៃបន្ថែមវិញវិស័យទេសចរណ៍ចូលរួមចំណែកប្រមាណ ៤.៤ភាគរយនៃផ.សក្នុងឆ្នាំ២០១៩ ហើយក៏ជាអនុវិស័យធំជាងគេទី៤ នៅក្នុងវិស័យសេវាកម្មបន្ទាប់ពីអនុវិស័យពាណិជ្ជកម្មដឹកជញ្ជូន និងទូរគមនាគមន៍ និងអចលនទ្រព្យ។ វិស័យទេសចរណ៍បានបង្កើតមុខរបរ និងការងារទេសចរណ៍ដោយផ្ទាល់ប្រមាណជាង ៦៣ម៉ឺននាក់ នឹងការងារដោយប្រយោលរាប់សិបម៉ឺននាក់បន្ថែមទៀត។
* សម្តេចតេជោ ហ៊ុន សែន បានថ្លែងថា នៅដើមឆ្នាំ២០២០នេះ ភ្ញៀវទេសចរអន្តរជាតិមកកម្ពុជាបានធ្លាក់ចុះប្រមាណ ៣០,៥% ក្នុងនោះភ្ញៀវទេសចរចិនបានធ្លាក់ចុះក្នុងរង្វង់ ៤០ភាគរយធៀបនឹងរយៈពេលដូចគ្នាទៅនឹងឆ្នាំ២០១៩។
* សម្តេចតេជោ បានថ្លែងថា យោងតាមទិន្នន័យនេះបើធៀបជាមួយនឹងគោលដៅទេសចរណ៍ក្នុងតំបន់ប្រទេសជិតខាងកម្ពុជា អត្រានៃការធ្លាក់ចុះចំនួនភ្ញៀវទេសចរអន្តរជាតិមកកម្ពុជាគឺនៅមានកម្រិតស្រាលនៅឡើយ។
* សម្តេចតេជោ ហ៊ុន សែន បានថ្លែងថា ដើម្បីជួយសម្រួលនូវបញ្ហាលំបាករបស់អាជីវករវិនិយោគិននិងក្មួយៗជាកម្មករនិយោជិត នៅក្នុងវិស័យទេសចរណ៍ដែលបណ្ដាលមកពីជម្ងឺរាតត្បាតសកល ក្នុងនាមរាជរដ្ឋាភិបាលខ្ញុំបានដាក់ចេញនូវវិធានការរយៈពេលខ្លីមួយចំនួនដូចជាការលើកលែងពន្ធ ការជំរុញនូវសកម្មភាពទេសចរក្នុងស្រុក ទៅកាន់ខេត្តសៀមរាប ការធ្វើដំណើររួមគ្នាតាមផ្លូវគោក ផ្លូវទឹក និងផ្លូវអាកាសជាពិសេសជាមួយប្រទេសជិតខាង (ដូចជាបាងកក-សៀមរាប និងហូជីមិញ-សៀមរាប) ការរៀបចំសកម្មភាព និងព្រឹត្តិការណ៍ទាក់ទាញ ការពន្យារយៈពេលសម្រាប់សំបុត្រចូលទស្សនាអង្គរ ការរៀបចំវគ្គបណ្ដុះបណ្ដាលជូនដល់ក្មួយៗកម្មករនិយោជិត ដែលបានបាត់បង់ការងារ និងវិធានការមួយចំនួនទៀតដើម្បីកាត់បន្ថយ ផលប៉ះពាល់លើអាជីវកម្មសណ្ឋាគារ និងផ្ទះសំណាក់ សំដៅរក្សាលំនឹង និងអាជីវកម្មនិងជួយដល់ក្មួយៗកម្មករនិយោជិត ដែលបាត់បង់ការងារឲ្យទទួលបាន ការបណ្ដុះបណ្ដាលជាមួយប្រាក់បំណាច់សមរម្យ។
* សម្តេចតេជោ បានថ្លែងថា វិធានការដែលត្រូវបានដាក់ចេញនាពេលនេះគឺជាកញ្ចប់វិធានការ រយៈពេលខ្លីជុំទីមួយប៉ុណ្ណោះ ហើយសម្តេចនឹងបន្តដាក់ចេញនូវវិធានការកែទម្រង់ជាកញ្ចប់ថ្មីមួយទៀត នៅក្នុងវេទិការាជរដ្ឋាភិបាលនិងផ្នែកឯកជនដែលគ្រោងនឹងប្រព្រឹត្តទៅនៅថ្ងៃទី១ ខែមេសាឆ្នាំ ២០២០នេះ។
* សម្តេចតេជោ ហ៊ុន សែន ប្រាប់ឱ្យថែរក្សាដីព្រលានយន្តហោះនៅក្នុងខេត្តបាត់ដំបង ដែលថ្ងៃមុខនឹងត្រូវធ្វើព្រលានយន្តហោះ ដើម្បីបម្រើសេចក្តីត្រូវការអភិវឌ្ឍ។
* សម្តេចតេជោ ហ៊ុន សែន បានថ្លែងថា ព្រលានយន្តហោះនេះ បើមិនអាចធ្វើជាព្រលានអន្តរជាតិ ក៏អាចប្រើសម្រាប់ហោះហើរនៅក្នុងស្រុក។
* សម្តេចតេជោ ហ៊ុន សែន បានថ្លែងថា ជំងឺកូវីត១៩ អាចធ្វើឱ្យខេត្តបាត់ដំបងប៉ះពាល់តិចតួចលើវិស័យទេសចរណ៍ តែមិនប៉ះពាល់វិស័យកសិកម្ម និងឧស្សាហកម្មនោះឡើយ។
* សម្តេចតេជោ ហ៊ុន សែន បង្ហាញឆន្ទៈក្នុងការសាងសង់ផ្លូវមួយខ្សែតភ្ជាប់ពីខេត្តបាត់ដំបង ទៅខេត្តសៀមរាប។
* សម្តេចតេជោ អំពាវនាវឲ្យប្រជាពលរដ្ឋចូលរួមប្រយុទ្ធប្រឆាំងនឹងព័ត៌មានក្លែងក្លាយ។
* សម្តេចតេជោ ហ៊ុន សែន បានថ្លែងថា គិត្រឹមម៉ោង២ថ្ងៃទី១៤ ខែមីនា ឆ្នាំ២០២០ មានប្រទេសចំនួន ១៤៦ប្រទេស និងដែនដី ព្រមទាំងនាវាព្រីនដាយមិនផងដែរ បានរងការវាយប្រហារដោយជំងឺកូវីត១៩។
* សម្តេចតេជោ ហ៊ុន សែន បានថ្លែងថា ទឹកដីចិន មិនមែនជាដែននៃការផ្ទុះជំងឺកូវីត១៩ទៀតនោះឡើយ។
* សម្តេចតេជោ ហ៊ុន សែន អបអរសាទរជាមួយរដ្ឋាភិបាលចិន ដែលយកជ័យជម្នះលើជំងឺកូវីត១៩ និងឈានទៅជួយប្រទេសដទៃ។
* សម្តេចតេជោ ហ៊ុន សែន បានថ្លែងថា មកដល់ពេលនេះមានពលរដ្ឋខ្មែរតែម្នាក់គត់ កើតជំងឺកូវីត១៩។ តែបានរកឃើញជនជាតិបរទេសរហូតដល់ទៅ៧នាក់។
* សម្តេចតេជោ ហ៊ុន សែន បានថ្លែងថា កម្ពុជាបានធ្វើការយ៉ាងជិតស្និទ្ធជាមួយដៃគូទាំងអស់ ជាពិសេសអង្គការសុខភាពពិភពលោក។
* សម្តេចតេជោ ហ៊ុន សែន បានថ្លែងថា រាជរដ្ឋាភិបាលគ្មានហេតុផលទៅលាក់បាំងករណីកើតជំងឺកូវីតនោះឡើយ។ ផ្ទុយទៅវិញរាជរដ្ឋាភិបាលមានតែអំពាវនាវឱ្យពលរដ្ឋបង្ហាញមុខបើមានករណីសង្ស័យលើជំងឺកូវីត។
* សម្តេចតេជោ ហ៊ុន សែន បានថ្លែងថា ប្រទេសកម្ពុជាក្រ តែបេះដូងមិនក្រនោះឡើយ
* សម្តេចតេជោ ហ៊ុន សែន បានថ្លែងសុំការយោគយល់ពីបណ្តាស្ថានទូតមួយចំនួន ចំពោះការបដិសេធមិនឱ្យយកអ្នកដំណើរលើនាវាចត នៅកំពង់ចាម មកស្នាក់នៅតាមសណ្ឋាគារលំដាប់ផ្កាយនៅរាជធានីភ្នំពេញ។
* សម្តេចតេជោ ហ៊ុន សែន បានពន្យល់ថា អ្នកដំណើរលើនាវានៅកំពង់ចាម គឺខុសគ្នានឹងអ្នកដំណើរលើនាវា Westerdam ព្រោះអ្នកលើនាវានេះមិនមានជំងឺកូវីតនោះឡើយ។
* សម្តេចតេជោ ហ៊ុន សែន បានថ្លែងថា មានមន្ត្រីទូតមួយបានព្រមានអភិបាលខេត្តកំពង់ចាមថាអ្នកលើនាវាអាចធ្វើបាតុកម្មប្រឆាំងការមិនឱ្យគេទៅដេកនៅសណ្ឋាគារ។
* សម្តេចតេជោ ហ៊ុន សែន ផ្ញើសារថា ចង់ធ្វើអីក៏ធ្វើទៅ តែទឹកដីនេះគឺទឹកដីកម្ពុជា។ សម្តេចតេជោ ហ៊ុន សែន ថ្លែងថា សម្តេចមិនអាចជ្រើសយកតាមជម្រើស ពលរដ្ឋទូតប្រទេសនោះ ត្រឹមពីរបីនាក់ ហើយបោះបង់ចោលពលរដ្ឋកម្ពុជាប្រមាណ១៦លាននាក់នោះឡើយ។
* សម្តេចតេជោ ហ៊ុន សែន ឆ្លើយតបថា ក្រុមមនុស្សឌឺដងរឿងហាមមិនឱ្យពលរដ្ឋប្រទេសបារាំង អេស្បាញ អាល្លឺម៉ង់ អ៉ីតាលី និងអាមេរិកចូលកម្ពុជាថា ជាមនុស្សគ្មានឈាមជ័រជាខ្មែរ។
* សម្តេចតេជោ ហ៊ុន សែន បានថ្លែងថា ការហាមមិនឱ្យប្រទេសទាំង៥នេះចូលមកប្រទេសកម្ពុជា ព្រោះប្រទេសទាំងនេះកំពុងដាក់ប្រទេស និងតំបន់ខ្លះក្នុងភាពអាសន្ន។
* សម្តេចតេជោ ហ៊ុន សែន បានថ្លែងថា ពិភពលោកនាពេលបច្ចុប្បន្នពោរពេញដោយភាពរើសអើង។
* សម្តេចតេជោ ហ៊ុន សែន បានថ្លែងថា ការបិទឱ្យប្រទេសចំនួន៥នេះចូលមកកម្ពុជាមិនមែនជាការរើសអើងនោះទេ គ្រាន់តែជាវិធានការការពារជំងឺកូវីតប៉ុណ្ណោះ។
* សម្តេចតេជោ ហ៊ុន សែន បានថ្លែងថា កម្ពុជាអាចពិចារណាដាក់ប្រទេសអ៉ីរ៉ង់ ជាប្រទេសហាមចូលកម្ពុជា។
* សម្តេចតេជោ ហ៊ុន សែន អំពាវនាវជាថ្មីម្តងទៀត ដល់ប្រជាពលរដ្ឋចូលរួមទប់ស្កាត់ការឆ្លងជំងឺកូវីត១៩។
* សម្តេចតេជោ ហ៊ុន សែន បានថ្លែងថា វប្បធម៌ប្រទេសកាន់ព្រះពុទ្ធសាសនា កំពុងយកទៅប្រើដោយប្រទេសកាន់គ្រីស្តសាសនា។
* សម្តេចតេជោ ហ៊ុន សែន ស្នើឱ្យគ្រប់ស្ថានីយទូរទស្សន៍ចាក់ផ្សាយវីដេអូអប់រំពីការឆ្លងជំងឺកូវីត១៩។
* សម្តេចតេជោ ហ៊ុន សែន បានបង្ហាញក្តីរីករាយដោយឃើញពលរដ្ឋប្រើប្រាស់ក្រមាការពារសុខភាព។
* សម្តេចតេជោ ហ៊ុន សែន បន្តបំផុសប្រជាពលរដ្ឋខ្មែរប្រើក្រមាខ្មែរ ដើម្បីថែសុខភាព
* សម្តេចតេជោ ហ៊ុន សែន បានសួរទៅក្រុមអ្នកចោទរាជរដ្ឋាភិបាលថាលាក់បាំងករណីជំងឺកូវីត១៩ ហ៊ានស្បថដែរទេ?
* សម្តេចតេជោ ហ៊ុន សែន បានថ្លែងថា ជំងឺកូវីត១៩ បានទៅដល់កាំជណ្តើររបស់ក្រុមមនុស្សបំភ្លៃរឿងជំងឺកូវីតនៅក្រៅប្រទេសហើយ។
* សម្តេចតេជោ ហ៊ុន សែន បានបញ្ចប់ការថ្លែងសុន្ទរកថានៅវេលាម៉ោង ១៩៖០៩នាទីយប់ថ្ងៃដដែល,៕

ផ្សាយបន្តផ្ទាល់ (Live) ពិធីបុណ្យទន្លេលើកទី៦ ក្រោមប្រធានបទ ” ទន្លេនៃសន្តិភាព ទន្លេនៃវិបុលភាព” នៅខេត្តបាត់ដំបង

ផ្សាយបន្តផ្ទាល់ (Live) ពិធីបុណ្យទន្លេលើកទី៦ ក្រោមប្រធានបទ ” ទន្លេនៃសន្តិភាព ទន្លេនៃវិបុលភាព” នៅខេត្តបាត់ដំបង ក្រោមអធិបតីភាពដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា
6th River Festival on “ River of Peace, River of Prosperity ” Battambang Province, 14 March 2020
រសៀលថ្ងៃសៅរ៍ ៦រោច ខែផល្គុន ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៤ ខែមីនា ឆ្នាំ២០២០

#ហ៊ុនសែន #RiverFestival​ #ទន្លេលើកទី៦ #បាត់ដំបង #Cambodia

(Video)៖ សេចក្តីថ្លែងការណ៍របស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ ចំពោះមតិយោបល់របស់ ឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ដែលបានលើកឡើងពាក់ព័ន្ធនឹងដំណើរការកាត់ក្តី លោក កឹម សុខា នៅសាលាដំបូងរាជធានីភ្នំពេញ កាលពីថ្ងៃទី ១២ ខែមីនា ឆ្នាំ២០២០

ក្រសួងទេសចរណ៍ និងរដ្ឋបាលខេត្តបាត់ដំបង រៀបចំពិធីក្រុងពាលីសុំសេចក្តីសុខ ដើម្បីរៀបចំបុណ្យនៅខេត្តបាត់ដំបង ឲ្យរលូន និងជោគជ័យ

បាត់ដំបង៖ នៅថ្ងៃទី១២ ខែមីនា ឆ្នាំ២០២០នេះ លោក ថោង ខុន រដ្ឋមន្ត្រីក្រសួងទេសចរណ៍ និងលោក ងួន រតនៈ អភិបាលនៃគណៈអភិបាលខេត្តបាត់ដំបង បានរៀបចំពិធីក្រុងពាលីសុំម្ចាស់ទឺកម្ចាស់ដី ដើម្បីឲ្យដំណើរការរៀបចំពិធីបុណ្យទន្លេលើកទី៦ នៅខេត្តបាត់ដំបង ប្រព្រឹត្តទៅដោយរលូន និងទទួលបានជោគជ័យ។

ពិធីបុណ្យទន្លេលើកទី៦នេះ នឹងចាប់ផ្តើមនៅថ្ងៃស្អែក ដែលមានរយៈពេល ០៣ថ្ងៃ ចាប់ពីថ្ងៃទី ១៣ ១៤ ១៥ ខែមីនា ឆ្នាំ២០២០ ដែលក្នុងនោះ មានរៀបចំជាព្រឹត្តិការណ៍មុនពិធី (Pre Event) និងសកម្មភាពជាច្រើន រួមមាន៖
-ពិធីដាំដើមឈើ (ព្រឹកថ្ងៃទី ១២ មីនា)
-សិក្ខាសាលាស្តីពីការពង្រឹងគុណភាពសេវាកម្មទេសចរណ៍ (ព្រឹកថ្ងៃទី ១២ មីនា)
-កីឡាជិះកង់កម្សាន្ត ១០គម
-រត់ប្រណាំងកំសាន្ត
-ការប្រកួតកីឡាបាល់ទាត់ បាល់ទះមិត្តភាព
-កីឡាប៉េតង់
-ប្រដាល់គុណខ្មែរអន្តរជាតិ
-កីឡាចំបាប់បុរាណ
-កីឡាទាញព្រាត់
-ការប្រកួតអុកចត្រង្គ
-ការតាំងពិព័រណ៍កសិទេសចរណ៍ ផលិតផលសហគ្រាសធុនតូច និងមធ្យម ផលិតផលបរទេស
-មហោស្រពម្ហូបអាហារ និងភេសជ្ជៈ
-ការសំដែងទស្សនីយភាពសិល្បៈវប្បធម៌ និងការប្រគំតន្ត្រី
-ការបាញ់កាំជ្រួចអបអរសាទរបុណ្យទន្លេ។

គួរកត់សំគាល់ លោកនាយករដ្ឋមន្រ្ដី ហ៊ុន សែន និងលោកស្រី ប៊ុន រ៉ានី ហ៊ុនសែន នឹងអញ្ជើញជាអធិបតីភាព ក្នុងពិធីបើកបុណ្យទន្លេលើកទី៦ នៅខេត្តបាត់ដំបងនេះ នាថ្ងៃទី១៤ ខែមីនា ឆ្នាំ២០២០ ខាងមុខនេះផងដែរ ៕

ក្រសួងការបរទេសកម្ពុជា៖ ការលើកឡើងរបស់ លោក Patrick Murphy ពាក់ព័ន្ធនឹងសវនាការ លោក កឹម សុខា គឺផ្ទុយទៅនឹងស្មារតីថ្មីរបស់ថ្នាក់ដឹកនាំប្រទេសទាំងពីរ

(ភ្នំពេញ)៖ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ នៅថ្ងៃទី១៣ ខែមីនា ឆ្នាំ២០២០នេះ បានចេញសេចក្តីថ្លែងការណ៍មួយ សម្តែងការខកចិត្តជាខ្លាំងចំពោះមតិយោបល់របស់ លោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ដែលបានលើកឡើងពាក់ព័ន្ធនឹងដំណើរការកាត់ក្តី លោក កឹម សុខា នៅសាលាដំបូងរាជធានីភ្នំពេញកាលពីថ្ងៃទី១២ ខែមីនា ឆ្នាំ២០២០។

អ្នកនាំពាក្យក្រសួងការបរទេសកម្ពុជា បានចាត់ទុកថា ការថ្លែងបែបនេះ គឺជាការប្រព្រឹត្តផ្ទុយទៅនឹងស្មារតីថ្មីរបស់ថ្នាក់ដឹកនាំ នៃប្រទេសទាំងពីរក្នុងការធ្វើឱ្យប្រសើរឡើងនូវការយោគយល់គ្នានិងការគោរពគ្នាទៅវិញទៅមក ក៏ដូចជាការបើកទំព័រថ្មីនៃកិច្ចសហប្រតិបត្តិការជាក់ស្តែងលើគ្រប់វិស័យ ក្នុងពេលដែលប្រទេសទាំងពីរកំពុងប្រារព្ធធ្វើពិធីអបអរសាទរខួបចំណងមិត្តភាព៧០ឆ្នាំរបស់ខ្លួននៅក្នុងឆ្នាំនេះ។

សេចក្តីថ្លែងការណ៍របស់អ្នកនាំពាក្យក្រសួងការបរទេសកម្ពុជា បានធ្វើឡើងបន្ទាប់ពី អគ្គរដ្ឋទូតសហរដ្ឋអាមេរិក លោក Patrick Murphy ដែលបានចូលស្ដាប់សវនាការ លោក កឹម សុខា ពីម្សិលមិញ បានលើកឡើងថា សហរដ្ឋអាមេរិកមានការរំខានចិត្តដោយខាងព្រះរាជអាជ្ញាបានលើកឡើងនូវរឿងមិនពិតដែលត្រូវបានប្រឌិតរឿងទាក់ទងនឹងសហរដ្ឋអាមេរិក។

អ្នកនាំពាក្យក្រសួងការបរទេសកម្ពុជា បានលើកឡើងថា ការថ្លែងយោបល់បែបនេះ គឺជាការធ្វើឲ្យប៉ះពាល់ធ្ងន់ធ្ងរដល់ប្រព័ន្ធតុលាការកម្ពុជា ដែលជាស្ថាប័នឯករាជ្យនិងដាច់ដោយឡែក ដូចដែលមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា និងជាការបង្ហាញឲ្យឃើញពីឥរិយាបទគ្មានការទូត និងខ្វះការគោរពចំពោះអធិបតេយ្យរបស់កម្ពុជា ដែលជាប្រទេសម្ចាស់ផ្ទះ។

យោងតាមបទដ្ឋាននៃទំនាក់ទំនងអន្តរជាតិ ការបញ្ចេញយោបល់បែបនេះ គឺជាការរំលោភបំពានលើមាត្រាទី៤១ នៃអនុសញ្ញាទីក្រុងវីយ៉ែន ឆ្នាំ១៩៦១ ស្តីពីទំនាក់ទំនងការទូត និងមាត្រាទី២ (៧) នៃធម្មនុញ្ញអង្គការសហប្រជាជាតិ ដែលគ្រប់អ្នកការទូតតំណាងមកពីប្រទេសនានា ទោះបីប្រទេសនោះជាប្រទេសធំ ឬតូច ត្រូវតែគោរពឲ្យបានពេញលេញ។ នេះបើតាមអ្នកនាំពាក្យក្រសួងការបរទេសកម្ពុជា៕

ខាងក្រោមនេះជាសេចក្តីថ្លែងការណ៍របស់ អ្នកនាំពាក្យក្រសួងការបរទេសកម្ពុជា៖

លោកនាយករដ្ឋមន្រ្ដី ហ៊ុន សែន ទាត់ចោលការផ្សាយព័ត៌មានក្លែងក្លាយរបស់ទូរទស្សន៍បរទេសមួយ ដែលថាលោកឆ្លង Covid-19

លោកនាយករដ្ឋមន្រ្ដី ហ៊ុន សែន នៅព្រឹកថ្ងៃទី១៣ ខែមីនា ឆ្នាំ២០២០នេះ ក្នុងឱកាសដែលអញ្ជើញចូលរួម បើកសម័យប្រជុំរដ្ឋសភាជាវិសាមញ្ញ នីតិកាលទី៦ លោកបានចេញមកទាត់ចោលនូវការផ្សាយព័ត៌មានក្លែងក្លាយ ផ្សាយដោយទូរទស្សន៍បរទេសមួយ ដែលថាលោកបានឆ្លង ឬប្រហែលឆ្លងជំងឺ Covid-19 ។

លោកនាយករដ្ឋមន្ត្រី បានបញ្ជាក់យ៉ាងច្បាស់ថាសុខភាពរបស់លោកនៅល្អមាំមួន និងមិនមានការឆ្លងជំងឺ Covid-19 ដូចការចុះផ្សាយបំភ្លៃរបស់ទូរទស្សន៍បរទេសនោះទេ ពោលគឺ នៅព្រឹកថ្ងៃនេះលោកបានបង្ហាញវត្តមាន ក្នុងសម័យប្រជុំរដ្ឋសភាជាវិសាមញ្ញ នីតិកាលទី៦ ហើយថ្ងៃស្អែកលោកនឹងអញ្ជើញទៅចូលរួមបុណ្យទន្លេ នាខេត្តបាត់ដំបងផងដែរ។

ជាថ្មីម្តងទៀត លោកនាយករដ្ឋមន្រ្ដី ហ៊ុន សែន បានជំរុញឲ្យមានការប្រឆាំងជាដាច់ខាតនូវព័ត៌មានក្លែងក្លាយ ដែលវាជាជំងឺកាចសាហាវ ជាងជំងឺ Covid-19 ទៅទៀត។

លោកនាយករដ្ឋមន្រ្ដី ហ៊ុន សែន បានសរសេរក្នុង Facebook ផ្លូវការរបស់លោកយ៉ាងដូច្នេះថា «មានទូរទស្សន៍បរទេសមួយបានផ្សាយថា ខ្ញុំបានឬប្រហែលឆ្លង កូវីត១៩ទៅហើយ។

ពេលនេះខ្ញុំ កំពុងអង្គុយប្រជុំរដ្ឋសភា និងថ្ងៃស្អែកត្រូវចេញទៅខេត្តបាត់ដំបង ដែលខ្ញុំត្រូវនៅទីនោះរហូតព្រឹកថ្ងៃអាទិត្យ ទី១៥ ខែមីនា ឆ្នាំ២០២០។ កូវីត១៩ វាកាចសាហាវណាស់ទៅហើយ តែព័ត៌មានក្លែងក្លាយវាកាចសាហាវជាងជម្ងឺនេះ ទៅទៀតដែលយើងចាំបាច់ត្រូវតែប្រយុទ្ធប្រឆាំងជាមួយជម្ងឺដ៏គ្រោះថ្នាក់នេះ។

សូមបងប្អូនជនរួមជាតិ ចូលរួមទប់ស្កាត់ ការរីករាលដាលនូវជម្ងឺឆ្លងនេះតាមរយៈវិធានការអនាម័យ ដោយចាប់ផ្តើមពីមនុស្សម្នាក់ៗ គ្រួសារនីមួយៗ ភូមិនីមួយៗ ដើម្បីធានាថា នៅកម្ពុជាយើងគ្មានជម្ងឺឆ្លងបន្ថែមទៀត លើចំនួនដែលបានឆ្លងរួចមកហើយ ចំនួន៥នាក់ក្នុងនោះជនជាតិខ្មែរ១នាក់ អង់គ្លេស៣នាក់ និង ចិន១នាក់ ដែលបានព្យាបាលជាសះស្បើយរួចហើយ» ៕

រដ្ឋសភាបើកសម័យប្រជុំវិសាមញ្ញ ដើម្បីពិភាក្សា និងអនុម័ត សេចក្តីព្រាងច្បាប់បង្កើតក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងសេចក្តីព្រាងច្បាប់៥ទៀត

(ភ្នំពេញ)៖ នៅព្រឹកថ្ងៃទី១៣ ខែមីនា ឆ្នាំ២០២០នេះ រដ្ឋសភា បានបើកសម័យប្រជុំរដ្ឋសភាជាវិសាមញ្ញ នីតិកាលទី៦ ដើម្បីពិភាក្សា និងអនុម័តលើ សេចក្តីព្រាងច្បាប់បង្កើតក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ និងសេចក្តីព្រាងច្បាប់៥ទៀត។

កិច្ចប្រជុំនេះ ដឹកនាំដោយ លោក ហេង សំរិន ប្រធានរដ្ឋសភា ដោយមានការចូលរួមពីលោកនាយករដ្ឋមន្រ្តី ហ៊ុន សែន រួមទាំងសមាជិករដ្ឋសភា និងតំណាងរាជរដ្ឋាភិបាលផងដែរ។

សេចក្តីព្រាងច្បាប់ ទាំង៦ ដែលលើកមកពិភាក្សា និងអនុម័តនាពេលនេះ រួមមាន៖
១៖ សេចក្តីព្រាងច្បាប់ស្តីពី ការបង្កើតក្រសួងឧស្សាហកម្ម វិទ្យាសាស្រ្ត បច្ចេកវិទ្យា និង នវានុវត្តន៍។
២៖ សេចក្តីព្រាងច្បាប់ស្តីពី ការអនុម័តយល់ព្រមលើពិធីសារទីពីរ ស្តីពីវិសោធនកម្ម កិច្ចព្រមព្រៀងវិនិយោគទូលំទូលាយអាស៊ាន។
៣៖ សេចក្តីព្រាងច្បាប់ស្តីពី ការអនុម័តយល់ព្រមលើពិធីសារទីបី ស្តីពីវិសោធនកម្ម កិច្ចព្រមព្រៀងវិនិយោគទូលំទូលាយអាស៊ាន។
៤៖ សេចក្តីព្រាងច្បាប់ស្តីពី ការអនុម័តយល់ព្រមលើពិធីសារទី១ ធ្វើវិសោធនកម្ម កិច្ចព្រមព្រៀង ស្តីពីពាណិជ្ជកម្មទំនិញអាស៊ាន។
៥៖ សេចក្តីព្រាងច្បាប់ស្តីពី ការអនុម័តយល់ព្រមលើសន្ធិសញ្ញាស្តីពីការផ្ទេរទណ្ឌិត រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។
៦៖ សេចក្តីព្រាងច្បាប់ស្តីពី ការអនុម័តយល់ព្រមលើសន្ធិសញ្ញាស្តីពីការជួយគ្នា ទៅវិញទៅមកផ្នែកច្បាប់ ក្នុងវិស័យព្រហ្មទណ្ឌរវាងព្រះរាជាណាចក្រកម្ពុជា និងសាធារណរដ្ឋសង្គម និយមវៀតណាម៕