រដ្ឋមន្ត្រីក្រសួងពាណិជ្ជកម្ម ស្នើសុំសហភាពអន្តរជាតិកីឡាទោចក្រយាន (UCI) ជួយសម្រេចចក្ខុវិស័យដណ្ដើមយកមេដាយក្នុងព្រឹត្តិការណ៍ SEA Games ២០២៣

ទីក្រុងអេហ្គល ប្រទេសស្វីស៖ លោក ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន នៅថ្ងៃទី២៧ ខែសីហា ឆ្នាំ២០១៩ បានដឹកនាំគណៈប្រតិភូកម្ពុជា ទៅបំពេញទស្សនកិច្ចនៅសហភាពអន្តរជាតិកីឡាទោចក្រយាន (Union Cycliste Internationale – UCI) ដែលជាសហព័ន្ធពិភពលោកទទួលបន្ទុកកីឡាទោចក្រយាន។ ការមកបំពេញទស្សនកិច្ចលើកនេះ គឺដើម្បីពិភាក្សាការងារក្នុងគោលបំណងអភិវឌ្ឍន៍វិស័យកីឡាទោចក្រយាននៅកម្ពុជា។ ការអញ្ជើញមករបស់លោករដ្ឋមន្ត្រី និងជាប្រធានសហព័ន្ធខ្មែរកីឡាទោចក្រយាន ត្រូវបានទទួលដោយលោកស្រី អាមីណា ឡានណាយ៉ា (Amina Lanaya) អគ្គនាយករបស់ UCI និងមន្ត្រី UCI មួយចំនួនផ្សេងទៀត។

ជាកិច្ចចាប់ផ្ដើម លោករដ្ឋមន្ត្រី ប្រធានសហព័ន្ធខ្មែរកីឡាទោចក្រយាន បានជម្រាបជូនលោកស្រី Amina Lanaya ថា កីឡាទោចក្រយានជាកីឡាមួយដែលមានប្រជាប្រិយភាពនៅក្នុងស្រទាប់មហាជននៅកម្ពុជា ប៉ុន្តែសម្រាប់ការប្រកួតនៅក្នុងព្រឹត្តិការណ៍នានា សមត្ថភាពរបស់កម្ពុជា នៅមានកម្រិតនៅឡើយ។ តែទោះជាយ៉ាងណា កម្ពុជានឹងធ្វើជាម្ចាស់ផ្ទះសម្រាប់ព្រឹត្តិការណ៍ប្រកួតកីឡាប្រជាជាតិអាស៊ីអាគ្នេយ៍ ក្នុងឆ្នាំ២០២៣ (SEA Games 2023) ហើយនោះជាចក្ខុវិស័យរបស់សហព័ន្ធក្នុងការពង្រឹងសមត្ថភាពដើម្បីដណ្ដើមមេដាយក្នុងព្រឹត្តិការណ៍នោះ។ ក្នុងជំនួបជាមួយ UCI ក្នុងពេលនោះ លោកបានស្នើសុំឲ្យ UCI ជួយដល់ការអភិវឌ្ឍសមត្ថភាពមន្ត្រីសហព័ន្ធកីឡាករ អាជ្ញាកណ្ដាល ក៏ដូចជាជំនួយជាកង់ និងឧបករណ៍ដទៃទៀត។

ជាកិច្ចឆ្លើយតប លោកស្រី Amina Lanaya បានថ្លែងអំណរគុណចំពោះការអញ្ជើញមករបស់ លោករដ្ឋមន្ត្រី ដោយនេះជាលើកទីមួយហើយ ដែលគណៈប្រតិភូកម្ពុជាបានមកបំពេញទស្សនកិច្ចនៅ UCI។ លោកស្រី បានកោតសរសើរយ៉ាងស្មោះស្ម័គ្រចំពោះការប្តេជ្ញាចិត្តរបស់លោករដ្ឋមន្ត្រី ក្នុងការអភិវឌ្ឍវិស័យទោចក្រយាននៅកម្ពុជា ជាពិសេសចំពោះចក្ខុវិស័យដ៏ហ្មត់ចត់ ដើម្បីដណ្ដើមយកមេដាយក្នុងព្រឹត្តិការណ៍ SEA Games 2023។ លោកស្រីអគ្គនាយក បានជម្រាបជូនបន្ថែមថា UCI ទទួលភារកិច្ចគ្រប់គ្រងលើកីឡាប្រណាំងកង់ច្រើនប្រភេទ ដូចជា ការប្រណាំងលើដងវិថី លើផ្លូវកង់ កង់ប្រណាំងលើភ្នំ កង់ BMX ។ល។ លោកស្រីក៏បានជម្រាបជូនអំពីកម្មវិធីមួយចំនួនរបស់ UCI ដែលកម្ពុជាអាចស្នើមក UCI ក្នុងគោលបំណងពង្រឹងស្ថាប័ន សមត្ថភាពកីឡាករ ចំណេះដឹងគ្រូបង្វឹក និងអាជ្ញាកណ្ដាល ក៏ដូចជាឧបករណ៍មួយចំនួនទៀត ក្នុងគោលបំណងជួយដល់កម្ពុជាសម្រេចបានចក្ខុវិស័យរបស់ខ្លួន។

លោករដ្ឋមន្ត្រី បានថ្លែងអំណរគុណចំពោះការណែនាំរបស់លោកស្រីអគ្គនាយក ដោយការមកជួបលើកនេះ នឹងបង្កើតជាទំនាក់ទំនងយូរអង្វែងរវាងសហព័ន្ធខ្មែរកីឡាទោចក្រយាន និងសហព័ន្ធពិភពលោក UCI។ ចំពោះសំណើនានា សហព័ន្ធខ្មែរកីឡាទោចក្រយាន នឹងពិនិត្យលើកម្មវិធីដែល UCI ជម្រាបជូន ដើម្បីលើកសំណើនានា សំដៅពង្រឹងបន្ថែមការអភិវឌ្ឍកីឡាទោចក្រយាន ដើម្បីអាចប្រកួតប្រជែងបានក្នុងព្រឹត្តិការណ៍ពិភពលោក និងតំបន់។ ក្រៅពីជំនួបជាមួយលោកស្រីអគ្គនាយក UCI គណៈប្រតិភូកម្ពុជាក៏បានជួបជាមួយមន្ត្រី UCI ផ្សេងទៀត រួមមានលោកស្រី បឺលីនដា ថាលីង (Belinda Tarling) ប្រធានផ្នែកអប់រំ និងគ្រប់គ្រងសមត្ថភាព និងមន្ត្រីផ្នែកទំនាក់ទំនងអន្តរជាតិរបស់ UCI ផងដែរ៕

វីដេអូ៖ លេាក ហ៊ុន សែន សុខ ចិត្ត ចុះ ចេញ ពី តំ ណែង ជា នាយក រដ្ឋ ម ន្ត្រី បេីសិនទណ្ឌិត សម រង្សុី ចូលមកកម្ពុជាហេីយចាប់ខ្លួនមិនបានក្នុងរយៈពេល២៤ម៉ោង!

លោកឧបនាយករដ្ឋមន្ត្រី ទៀ បាញ់ ថ្លែងសន្ទរកថាសំខាន់ៗ ក្នុងពិធីអញ្ជើញជាអធិបតីនៃកិច្ចប្រជុំរដ្ឋមន្រ្តីសុខាភិបាលអាស៊ានលើកទី១៤ លើទឹកដីអង្គរសៀមរាប

នៅថ្ងៃទី២៩ ខែសីហា ឆ្នាំ២០១៩ កម្ពុជាបានធ្វើជាម្ចាស់ផ្ទះ នៃកិច្ចប្រជុំរដ្ឋមន្រ្តីសុខាភិបាលអាស៊ាន លើកទី១៤ និងកិច្ចប្រជុំពាក់ព័ន្ធ ចាប់ពីថ្ងៃទី២៦ ដល់ថ្ងៃទី៣០ ខែសីហា ឆ្នាំ២០១៩ នៅខេត្តសៀមរាប ក្រោមអធិបតីភាពលោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តំណាងលោកនាយករដ្ឋមន្រ្ដី ហ៊ុន សែន ដែលមានការចូលរួមពីថ្នាក់រដ្ឋមន្រ្តីសុខាភិបាល នៃប្រទេសសមាជិកអាស៊ានទាំង១០ អាស៊ានបូកបី(ចិន ជប៉ុន កូរ៉េ) អគ្គលេខាធិការអាស៊ាន និងប្រតិភូអមដំណើរជាច្រើនទៀត។

តាមរបាយការណ៍របស់ក្រសួងសុខាភិបាល បានអោយដឹងថា៖ កិច្ចប្រជុំនេះ ត្រូវបានរៀបចំរៀងរាល់ពីរឆ្នាំម្តង ជាលក្ខណៈប្តូរវេនដែលរួមមាន៖
១-កិច្ចប្រជុំត្រៀមឧត្តមមន្រ្តីសុខាភិបាលអាស៊ាន អាស៊ានបូកបី និងអាស៊ាន-ចិន
២-កិច្ចប្រជុំរដ្ឋមន្ត្រីសុខាភិបាលអាស៊ាន អាស៊ានបូកបី និងអាស៊ាន-ចិន ក្រោមប្រធានបទ«លើកកម្ពស់សុខភាពប្រជាជនអាស៊ានទាំងមូល»។

កិច្ចប្រជុំនេះបានពិភាក្សាផ្តោតលើប្រធានបទសំខាន់ៗចំនួនបួនគឺ៖
១/ការប្រយុទ្ធប្រឆាំងនឹងឱសថក្លែងក្លាយ និងអន់គុណភាព
២/ការធានានិរន្តរភាពហិរញ្ញប្បទាន សេវាថែទាំសុខភាព
៣/ការពង្រឹងសមត្ថភាព ក្នុងការអនុវត្ត និយ័តកម្មសុខភាពអន្តរជាតិរបស់អង្គការសុខភាពពិភពលោក

៤/នវានុវត្តន៍ នៃការពង្រឹងសេវាថែទាំសុខភាពក្នុងសុន្ទរកថា ដែលថ្លែងដោយ លោកឧបនាយករដ្ឋមន្រ្ដី ទៀ បាញ់ មានខ្លឹមសារសំខាន់ៗថា កម្ពុជាពិតជាមានកិត្តិយសដ៏ឧត្តុងឧត្តម ក្នុងការធ្វើជាម្ចាស់ផ្ទះរៀបចំកិច្ចប្រជុំដ៏មានសារៈសំខាន់នេះ ស្របពេលនឹងការប្រារព្ធខួបលើកទី៥០ឆ្នាំ នៃការបង្កើតអាស៊ាន ដែលប្រទេសសមាជិកអាស៊ានទាំងអស់ បានខិតខំប្រឹងប្រែងរួមគ្នា ដើម្បីឈានទៅសម្រេចបាននូវចក្ខុវិស័យសហគមន៍អាស៊ានឆ្នាំ២០២៥។

លោកឧបនាយករដ្ឋមន្រ្ដី ទៀ បាញ់ បានថ្លែងថា របបសន្តិសុខសង្គម ផ្នែកថែទាំសុខភាព ក៏ត្រូវបានពង្រីកការគ្របដណ្តប់ដល់មន្ត្រីសាធារណៈ អតីតមន្រ្តីរាជការ និងអតីតយុទ្ធជន ព្រមទាំងរួមចំណែកដោះស្រាយបញ្ហាកង្វះអាហារូបត្ថម្ភដល់កុមារ ក្នុងគ្រួសារក្រីក្រ ចាប់តាំងពីកូនក្នុងផ្ទៃ រហូតដល់អាយុ០២ឆ្នាំ ដើម្បីជំរុញការលូតលាស់ ទាំងកាយសម្បទា និងបញ្ញាស្មារតី។

លោកឧបនាយករដ្ឋមន្រ្ដី ទៀ បាញ់ ដែលតំណាងឲ្យលោកនាយករដ្ឋមន្រ្ដី បានថ្លែងទៀតថា បញ្ហាឱសថក្លែងក្លាយ និងអន់គុណភាព គឺជាបញ្ហាប្រឈមយ៉ាងធ្ងន់ធ្ងរ ដែលប្រទេសសមាជិកអាស៊ានទាំងអស់ ត្រូវរួមគ្នាដោះស្រាយជាបន្ទាន់ ទាំងនៅក្នុងប្រទេសតំបន់ និងសកលលោក។

បើយើងប្រើប្រាស់ឱសថអន់គុណភាពព្យាបាលជំងឺ អាចធ្វើឱ្យជំងឺកាន់តែធ្ងន់ធ្ងរ ហើយអាចប៉ះពាល់ដល់អាយុជីវិត និងធ្វើឱ្យខាតបង់ថវិកាផ្ទាល់ខ្លួន ក៏ដូចជាខាតបង់ថវិការដ្ឋផងដែរ។ ឱសថក្លែងក្លាយ និងអន់គុណភាព បានបង្កគ្រោះថ្នាក់ខ្ពស់ដល់សុខភាព, សុវត្ថិភាពសង្គម និងធ្វើឱ្យរាំងស្ទះដល់កំណើនសេដ្ឋកិច្ចជាតិ។ បច្ចុប្បន្នបញ្ហាឱសថក្លែងក្លាយ និងអន់គុណភាព កំពុងរីករាលដាលគួរឱ្យព្រួយបារម្ភ ទាំងនៅក្នុងតំបន់ និងពិភពលោក ជាពិសេសការផ្សព្វផ្សាយលក់ឱសថ តាមប្រព័ន្ធអនឡាញ គ្មានប្រភពច្បាស់លាស់ និងមិនមានការចុះបញ្ជីការត្រឹមត្រូវ។

នៅក្នុងសុន្ទរថា ដែលថ្លែងដោយលោកឧបនាយករដ្ឋមន្រ្ដី ទៀ បាញ់ នោះគឺបានផ្ដល់នូវអនុសាសន៍សំខាន់ៗចំនួន០៦គឺ៖
១) ប្រទេសសមាជិកអាស៊ានទាំងអស់ ត្រូវរួមគ្នាលើកកម្ពស់ និងជំរុញការអនុវត្តសកម្មភាព ដើម្បីធ្វើសុខដុមនីយកម្មវិស័យសុខាភិបាល នៅក្នុងតំបន់អាស៊ានទាំងមូលឱ្យកាន់តែល្អប្រសើរ តាមរយៈការកាត់បន្ថយគម្លាតផ្នែកគុណភាពសេវាសុខាភិបាល។

២) អាស៊ានត្រូវរួមគ្នាត្រៀមលក្ខណៈឆ្លើយតបទៅនឹងគ្រោះមហន្តរាយផ្នែកសុខភាពសាធារណៈ ជាពិសេសការ ផ្ទុះឡើងនៃជំងឺឆ្លង នៅក្នុងតំបន់អាស៊ាន និងគ្រោះមហន្តរាយនានា ដែលបង្កឡើងដោយសារការផ្លាស់ប្តូរអាកាសធាតុ។

៣) អាស៊ានត្រូវរួមគ្នាកាត់បន្ថយគម្លាត នៃបច្ចេកវិទ្យាវេជ្ជសាស្ត្រ តាមរយៈការជួយបំពេញឱ្យគ្នាទៅវិញទៅមក នូវចំណុចខ្វះខាត, ជួយកសាងសមត្ថភាពបច្ចេកទេស បច្ចេកវិទ្យាទំនើប និងធនធានមនុស្ស ជាពិសេសត្រូវបំពាក់បំប៉ននូវចំណេះដឹង និងជំនាញបច្ចេកទេស សមស្របតាមនិយាមអន្តរជាតិ និងបច្ចេកវិទ្យាទំនើប ដើម្បីផ្តល់សេវាជូនប្រជាជន ប្រកបដោយប្រសិទ្ធភាពខ្ពស់ និងភាពជឿជាក់។

៤) អាស៊ានត្រូវចូលរួមជាមួយភាគីពាក់ព័ន្ធទាំងអស់ នៃវិស័យសុខាភិបាល, ចែករំលែកនូវព័ត៌មានចំណេះដឹងបទពិសោធន៍ បច្ចេកវិទ្យា និងបច្ចេកទេសជាប្រចាំ ដើម្បីរិះរកវិធីសាស្ត្រ និងតម្រូវការចាំបាច់សម្រាប់អនុវត្តរួមគ្នា ឆ្លើយតបបានទាន់ពេលវេលាចំពោះគ្រោះមហន្តរាយនានា នៅក្នុងប្រទេសអាស៊ាន និងនៅក្នុងតំបន់។

៥) អាស៊ានត្រូវរួមគ្នាប្រយុទ្ធប្រឆាំង នឹងឱសថក្លែងក្លាយ និងអន់គុណភាព តាមរយៈកិច្ចសហប្រតិបត្តិការអន្តរវិស័យ, ការបន្តពង្រឹងក្របខណ្ឌច្បាប់, ការលើកកម្ពស់សមត្ថភាពមន្ត្រីបច្ចេកទេស តាមដានស្រាវជ្រាវជាប់ជាប្រចាំ និងការបន្តពង្រឹងយន្តការអភិបាលកិច្ចល្អ។

៦) អាស៊ានត្រូវរួមគ្នាជាមួយដៃគូអភិវឌ្ឍន៍ និងអង្គការសុខភាពពិភពលោក ដើម្បីជំរុញការអនុវត្តយន្តការថ្នាក់តំបន់ និងសកលលោក ដែលមានស្រាប់ និងបង្កើតយន្តការ ឬគោលការណ៍ណែនាំថ្មីៗបន្ថែមទៀត សម្រាប់ការធ្វើសុខដុមនីយកម្មវិស័យសុខាភិបាល ព្រមទាំងជួយគាំទ្រផ្នែកបច្ចេកទេស និងថវិកា សម្រាប់ការទប់ស្កាត់ឱសថក្លែងក្លាយ និងអន់គុណភាព៕

មេទ័ពខ្មែរ នឹងពង្រឹងសមត្ថភាពកងទ័ពជើងទឹកឱ្យកាន់តែរឹងមាំ ដើម្បីការពារបូរណភាពទឹកដី និងការពារដែនសមុទ្រកម្ពុជា

នាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះ នៃកងយោធពលខេមរភូមិន្ទ បានប្រាប់ទៅភាគីអាមេរិក លោកនាយឧត្តមនាវី ដេវីត សុន ជាមេបញ្ជាការឥណ្ឌូ-ប៉ាស៊ីហ្វិក របស់អាមេរិកថា នៅពេលខាងមុខនេះ កងយោធពលខេមរភូមិន្ទ នឹងអភិវឌ្ឍន៍កងទ័ពជើងទឹក ហើយកងទ័ពជើងទឹកកម្ពុជា នឹងទទួលបាននាវាមួយចំនួន ដើម្បីពង្រឹងសមត្ថភាព ការពារបូរណភាពទឹកដី និងការពារដែនសមុទ្ររបស់ខ្លួន។

ការបញ្ជាក់បែបនេះរបស់នាយឧត្តមសេនីយ៍ ឥត សារ៉ាត់ បានធ្វើឡើងនៅថ្ងៃទី២៩ ខែសីហា ឆ្នាំ២០១៩នេះ បន្ទាប់ពីនាយឧត្តមសេនីយ៍ បានដឹកនាំគណៈប្រតិភូអគ្គបញ្ជាការ នៃកងយោធពលខេមរភូមិន្ទ ក្រសួងការពារជាតិ ត្រឡប់ពីចូលរួមក្នុងកិច្ចប្រជុំកំពូលថ្នាក់អគ្គបញ្ជាការ នៃការការពារជាតិតំបន់ឥណ្ឌូ-ប៉ាស៊ីហ្វិក នៅទីក្រុងបាងកក ប្រទេសថៃ រយៈ៣ថ្ងៃ ក្រោមប្រធានបទ «កិច្ចសហប្រតិបត្តិការដោយសេរី និងបើកទូលាយនូវឥណ្ឌូ-ប៉ាស៊ីហ្វិក» ដែលមានប្រទេសចំនួន៣២បានចូលរួម។

នាយឧត្តមសេនីយ៍ ឥត សារ៉ាត់ បានបញ្ជាក់យ៉ាងដូច្នេះថា «នៅពេលខាងមុខនេះ កងយោធពលខេមរភូមិន្ទ នឹងធ្វើការអភិវឌ្ឍន៍កងទ័ពជើងទឹក ក្នុងនោះក៏មានការអភិវឌ្ឍន៍ផែ អភិវឌ្ឍន៍អ៊ូរ គឺជាកន្លែងសម្រាប់ជួសជុលថែទាំនាវាព្រោះថា ក្នុងពេលខាងមុខនេះ កងទ័ពជើងទឹក នឹងទទួលបាននាវាមួយចំនួន ដើម្បីពង្រឹងសមត្ថភាព ការពារបូរណភាពទឹកដី និងការពារដែនសមុទ្ររបស់ខ្លួន អញ្ចឹងទេការធ្វើទាំងអស់នេះ គឺកងយោធពលខេមរភូមិន្ទ ជាអ្នកធ្វើដោយខ្លួនឯងសុទ្ធសាធ មិនមានប្រទេសណាជួយឡើយ គឺជារបស់កម្ពុជា មិនមែនជារបស់អ្នកណាដូចដែលប្រព័ន្ធផ្សព្វផ្សាយដែលបានលើកឡើងនោះទេ»។

ទោះយ៉ាងនេះក្តី នាយឧត្តមសេនីយ៍ ឥត សារ៉ាត់ ក៏មិនទាន់បានបញ្ជាក់ឱ្យច្បាស់លាស់នូវចំនួននាវា ព្រមទាំងទំហំ កម្រិត និងផលិតរបស់ប្រទេសណាមួយឱ្យច្បាស់លាស់នោះទេ ចំពោះកិច្ចការអភិវឌ្ឍន៍ កងទ័ពជើងទឹក គឺរង់ចាំដល់ថ្ងៃនោះទាំងអស់គ្នានឹងដឹង។ នាយឧត្តមសេនីយ៍ ឥត សារ៉ាត់ បានបញ្ជាក់ទៀតថា នៅក្នុងកិច្ចប្រជុំលើកនេះ កម្ពុជាទទួលបានលទ្ធផលជាទីគាប់ចិត្ត ជាពិសេសធ្វើឱ្យមុខមាត់របស់កងយោធពលខេមរភូមិន្ទកម្ពុជា នៅលើឆាកអន្តរជាតិ អ្វីដែលកាន់តែពិសេសជាងនេះទៅទៀតនោះ គឺថ្នាក់ដឹកនាំ នៃកងយោធពលខេមរភូមិន្ទ បានស្គាល់មេដឹកនាំ នៃអគ្គមេបញ្ជាការរបស់ប្រទេសនានា នៅក្នុងតំបន់ឥណ្ឌូ-ប៉ាស៊ីហ្វិកទាំង៣២ប្រទេស ផងដែរ។

បន្ថែមពីនេះ កងយោធពលខេមរភូមិន្ទកម្ពុជា បានជជែកពិភាក្សាគ្នា និងស្តាប់នូវយុទ្ធសាស្ត្រផ្សេងៗ របស់ថ្នាក់ដឹកនាំកងទ័ព របស់ប្រទេសនៅក្នុងតំបន់ឥណ្ឌូ-ប៉ាស៊ីហ្វិក ព្រមទាំងការចែករំលែកបទពិសោធន៍ពីបណ្តាប្រទេសមួយចំនួនជុំវិញ បញ្ហាសភាពការណ៍នៅក្នុងតំបន់ឥណ្ឌូ-ប៉ាស៊ីហ្វិកទាំងមូលផងដែរ ៕

កម្ពុជា ទទួលរងឥទ្ធិពលនៃព្យុះ Podul ជាព្យុះទី១២ ភ្លៀងធ្លាក់ខ្លាំង ធ្វើឲ្យទឹកទន្លេមេគង្គហក់ឡើងជិតដល់កម្រិតត្រូវប្រុងប្រយ័ត្ន

ក្រសួងធនធានទឹក និងឧតុនិយម បានចេញសេចក្តីជូនដំណឹងថ្មី អំពីស្ថានភាពទឹកទន្លេមេគង្គ ដោយបានបញ្ជាក់ថា ដោយសារឥទ្ធិពលព្យុះទី១២ Podul ធ្វើឲ្យមានភ្លៀងធ្លាក់ខ្លាំង នៅប្រទេសវៀតណាម ថៃ និងកម្ពុជាផងដែរ ដែលនាំឲ្យទឹកទន្លេមេគង្គបន្តហក់ឡើង ជិតដល់កម្រិតដែលត្រូវប្រុងប្រយ័ត្ន។
តាមការព្យាករបង្ហាញថា៖
* នៅស្ទឹងត្រែង ទឹកអាចឡើងដល់១០.៥០ម៉ែត្រ។
* នៅក្រចេះ ទឹកអាចឡើងដល់ ២១ម៉ែត្រ។
* នៅកំពង់ចាម ទឹកអាចឡើងដល់១៣.៥០ម៉ែត្រ។
* នៅចតុមុខ ទឹកអាចឡើងដល់ ៨ម៉ែត្រ។
* ទន្ទឹមនឹងនេះ ទឹកទន្លេនៅ (3S) ទន្លេសេកុង ទន្លេសេសាន និងទន្លេស្រែពក ក៏ហក់ឡើងដែរ។

ជាមួយគ្នានេះ ក្រសួងបានអំពាវនាវដល់ក្រសួង ស្ថាប័នពាក់ព័ន្ធ អាជ្ញាធរដែនដី បងប្អូនប្រជាពលរដ្ឋ ដែលរស់នៅតាមដងទន្លេ សូមមានការប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ជាយថាហេតុ និងសូមមានវិធានការប្រមូល និងថែរក្សាទឹកទុក ដើម្បីប្រើប្រាស់នៅពេលខាងមុខ ៕

លោកនាយករដ្ឋមន្ត្រី ហ៊ុន សែន អញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រ

នៅព្រឹកថ្ងៃសុក្រ ទី៣០ ខែសីហា ឆ្នាំ២០១៩នេះ លោកនាយករដ្ឋមន្ត្រី ហ៊ុន សែន កំពុងអញ្ជើញដឹកនាំកិច្ចប្រជុំពេញអង្គគណៈរដ្ឋមន្រ្តី ដែលប្រព្រឹត្តទៅនៅវិមានសន្តិភាព រាជធានីភ្នំពេញ។
សំរាប់របៀបវារៈនៃកិច្ចប្រជុំក្នុងសប្តាហ៍នេះមានដូចខាងក្រោម៖

១)សេចក្តីព្រាងច្បាប់ស្តីពីសំណង់។
២)សេចក្តីព្រាងឯកសារកម្មវិធីវិនិយោគសាធារណៈ៣ឆ្នាំរំកិល២០២០-២០២២។
៣)សេចក្តីព្រាងរបាយការណ៍ស្វ័យវាយតម្លៃស្តីពីការត្រួតពិនិត្យឡើងវិញនៃការអនុវត្តអនុសញ្ញាអង្គការសហប្រជាជាតិប្រឆាំងអំពើពុករលួយ(អ៊ុនកាក់, UNCAC) ជុំទី២នៅកម្ពុជា។
៤)បញ្ហាផ្សេងៗ សំណើសុំការយល់ព្រមពីគណៈរដ្ឋមន្រ្តី ដើម្បីសុំការអនុម័តយល់ព្រមពីស្ថាប័ននីតិប្បញ្ញត្តិលើ៖
៤.១-កិច្ចព្រមព្រៀងរវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃតំបន់រដ្ឋបាលពិសេសហុងកុងនៃសាធារណរដ្ឋប្រជាមានិតចិន ស្តីពីការជៀសវាងការយកពន្ធត្រួតគ្នា និងការបង្ការការកិបកេងបន្លំពន្ធពាក់ព័ន្ធនឹងពន្ធលើប្រាក់ចំណូល។
៤.២- ពិធីសារទី២ ស្តីពីការកំណត់ច្រកទ្វាព្រំដែនឆ្លងកាត់នៃកិច្ចព្រមព្រៀងក្របខណ្ឌអាស៊ានស្តីពីកិច្ចសម្របសម្រួលការដឹកជញ្ជូនឆ្លងកាត់ទំនិញ៕

TOP NEWS: សម្តេចតេជោ ហ៊ុន សែន យល់ព្រមភ្នាល់ជាមួយ សម រង្ស៉ី «បើសិន សម រង្ស៉ី ចូលម

កម្ពុជាហើយចាប់មិនបានក្នុងរយៈពេល២៤ម៉ោង, សម្តេចសុខចិត្តចុះចេញពីតំណែង»
(ភ្នំពេញ)៖ ឆ្លើយតបនឹងការលើកឡើងរបស់ទណ្ឌិត សម រង្ស៉ី នៅថ្ងៃទី២៩ ខែសីហា ឆ្នាំ២០១៩ ដែលបានបបួលសម្តេចតេជោ ហ៊ុន សែន ភ្នាល់ថា បើសិន សម រង្ស៉ី ហ៊ានចូលមកប្រទេសកម្ពុជាវិញ នៅថ្ងៃទី០៩ ខែវិច្ឆិកា ឆ្នាំ២០១៩ខាងមុខនោះសម្តេចតេជោ យល់ព្រមចុះចេញពីតំណែងទេ ?
នៅព្រឹកថ្ងៃទី៣០​ ខែសីហា ឆ្នាំ២០១៩នេះ សម្តេចតេជោ ហ៊ុន ​សែន បានធ្វើកិច្ចសម្ភាសន៍ពិសេសជាមួយលោក លឹម ជាវុត្ថា នាយកប្រតិបត្តិអង្គភាពព័ត៌មាន Fresh News ដើម្បីឆ្លើយតបនឹងការបបួលរបស់ទណ្ឌិត សម រង្ស៉ី។​ សម្តេចតេជោ បានមានប្រសាសន៍យ៉ាងដូច្នេះថា៖

«ខ្ញុំយល់ព្រមទទួលការភ្នាល់ជាមួយអាម្សៀ រង្ស៉ី ប្រសិនបើអ្នកឯងជាន់ទឹកដីខ្មែរនៅថ្ងៃទី៩ ខែវិច្ឆិកា ឆ្នាំ២០១៩ហើយ ខ្ញុំចាប់អ្នកឯងមិនបានក្នុងរយៈពេល ២៤ម៉ោង ខ្ញុំនឹងសុខចិត្តចុះចេញពីតំណែង។ ប៉ុន្តែបើខ្ញុំចាប់ខ្លួនអ្នកឯងបានវិញ អ្នកឯងនឹងត្រូវបញ្ចប់ជីវិតនយោបាយ ព្រមទាំងរំលាយអង្គការចាត់តាំងទាំងឡាយណា ដែលអ្នកឯងបានបង្កើតឡើង។ ផ្ទុយទៅវិញប្រសិនបើអ្នកឯងមិនក្លាហានហ៊ានចូលមកកម្ពុជាវិញទេ នោះអ្នកឯងនឹងត្រូវបញ្ចប់ជីវិតនយោបាយ និងរំលាយអង្គការចាត់តាំងដែលអ្នកឯងបង្កើត។ តើអ្នកឯងហ៊ាន ឬមិនហ៊ានចំពោះការភ្នាល់នេះ?
ចំណុចមួយទៀតលើការស្បថ ប្រសិនបើអ្នកណាម្នាក់មិនគោរពលើការសន្យានៃការភ្នាល់នេះ ខ្ញុំសូមឲ្យវត្ថុស័ក្តិសិទ្ធិលើលោកផ្តាច់ជីវិតអ្នកដែលមិនគោរពការសន្យា និងក្រុមគ្រួសារទាំងពូជតែម្តង។ តើអ្នកឯងហ៊ាន ឬមិនហ៊ាន ? ចំពោះការភ្នាល់នេះខ្ញុំសូមប្រជាពលរដ្ឋខ្មែរទូទាំងប្រទេសធ្វើជាសាក្សីចំពោះការភ្នាល់ និងសូមឲ្យ Fresh News ធ្វើជាអ្នកផ្សព្វផ្សាយលើការភ្នាល់នេះ»។
ការយល់ព្រមទទួលភ្នាល់ជាមួយទណ្ឌិត សម រង្ស៉ី នៅពេលនេះធ្វើឡើងបន្ទាប់ពីទណ្ឌិតរូបនេះ បានសរសេរបង្ហោះតាម Facebook និងគេហទំព័ររបស់ខ្លួន ជាមួយខ្លឹមសារថា៖ «បើលោក ហ៊ុន សែន មិនជឿថាខ្ញុំនឹងវិលត្រឡប់មកប្រទេសកម្ពុជាវិញមែន នៅថ្ងៃ០៩ វិច្ឆិកា ២០១៩ នេះទេ តើលោក ហ៊ុន សែន យល់ព្រម ចុះចេញពីតំណែង ភ្លាមមួយរំពេចទេ នៅពេលដែលខ្ញុំមកជាន់ទឹកដីប្រទេសកម្ពុជាយ៉ាងជាក់ស្តែង នៅថ្ងៃ ០៩ វិច្ឆិកា ២០១៩ ខាងមុខនេះ?»៕
ប្រភពFreshnews