ផ្សាយបន្តផ្ទាល់(Live): សម្ដេចតេជោ ហ៊ុន សែន និង ឯកឧត្តម ប្រធានាធិបតី ស្រីលង្កា អញ្ជើញចូលរួមក្នុងវេទិកាធុរកិច្ច កម្ពុជា-ស្រីលង្កា

នាយឧត្តមសេនីយ៍ សៅ សុខា ដឹកក្រុមការងារអន្តរក្រសួង និងស្ថាប័នចំរុះមានការពាក់ព័ន្ធ ចុះត្រួតពិនិត្យដោយផ្ទាល់នូវការបង្ក្រាបបទល្មើសព្រៃឈើ

មណ្ឌលគិរី៖ នៅថ្ងៃទី៦ ខែសីហា ឆ្នាំ២០១៩ នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានដឹកក្រុមការងារអន្តរក្រសួង និងស្ថាប័នចំរុះដែលមានការពាក់ព័ន្ធ អញ្ជើញចុះត្រួតពិនិត្យដោយផ្ទាល់នូវការបង្ក្រាបបទល្មើសព្រៃឈើ។

សូមជម្រាបផងដែរថា ក្រុមការងារបានបង្ក្រាបជាបន្តបន្ទាប់នាពេលកន្លងទៅរួមមាន ការឃាត់រថយន្តវេអងជាងម្ភៃគ្រឿង, ត្រួតពិនិត្យរថយន្តបាកុងដែលកម្លាំងបង្ក្រាបបានជាងម្ភៃគ្រឿង ដែលក្រុមការងារបានកាត់ជាកំណាត់ៗរួចរាល់ ត្រៀមធ្វើការបំផ្ទុះជាមួយម្សៅ TNT ដើម្បីបំផ្លាញចោល និងចុះត្រួតពិនិត្យក្រុមហ៊ុនដីសម្បទានសេដ្ឋកិច្ចមួយចំនួននៅក្នុងស្រុកកោះញែកខេត្តមណ្ឌលគិរី ៕

លោកនាយករដ្ឋមន្រ្តី ហ៊ុន សែន និងប្រធានាធិបតីស្រីលង្កា នឹងអញ្ជើញចូលរួមវេទិកាធុរកិច្ចកម្ពុជា-ស្រីលង្កា

នៅរសៀលថ្ងៃពុធទី៧ ខែសីហា ឆ្នាំ ២០១៩នេះ លោកនាយករដ្ឋមន្រ្តី ហ៊ុន សែន និងលោក ម៉ៃទ្រីប៉ាឡា ស្រ៊ីសេនា (Maithripala Sirisena) ប្រធានាធិបតីនៃសាធារណរដ្ឋប្រជាធិបតេយ្យសង្គមនិយមស្រីលង្កា នឹងអញ្ជើញចូលរួមក្នុងវេទិកាធុរកិច្ច កម្ពុជា-ស្រីលង្កា ដែលត្រូវធ្វើឡើងនៅសណ្ឋាគារសូហ្វីតែល ភ្នំពេញ។

ប្រធានាធិបតីស្រីលង្កា បានអញ្ជើញមកដល់កម្ពុជានៅព្រឹកថ្ងៃទី៧ ខែសីហា ឆ្នាំ២០១៩នេះ ដើម្បីបំពេញទស្សនកិច្ចផ្លូវរដ្ឋនៅរយៈពេល៤ ថ្ងៃចាប់ពីថ្ងៃទី៧ ដល់ថ្ងៃទី១០ ខែសីហា ឆ្នាំ២០១៩ តបតាមការអញ្ជើញរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។ ដំណើរទស្សនកិច្ចលើកដំបូងរបស់ប្រធានាធិបតីស្រីលង្កាមកកាន់កម្ពុជា នាពេលនេះ នឹងរួមចំណែកយ៉ាងសំខាន់ដល់ការពង្រឹងចំណងមិត្តភាព និងពង្រីកកិច្ចសហប្រតិបត្តិការនៅក្នុងវិស័យសេដ្ឋកិច្ច ពាណិជ្ជកម្ម និងវប្បធម៌ រវាងកម្ពុជា និងស្រីលង្កា។

គេហទំព័រ Facebook លោកនាយករដ្ឋមន្ត្រី ហ៊ុន សែន នឹងផ្សាយ (Live) ពិធីនេះនៅម៉ោង៣:០០នាទីរសៀល ពីសណ្ឋាគារសូហ្វីតែល ភ្នំពេញ៕`

កាកបាទក្រហមកម្ពុជា ជាស្ថាប័នមួយជំនួយការឱ្យអាជ្ញាធរសាធារណ: ដែលបានជួយសម្រាលទុក្ខលំបាកដល់ប្រជាពលរដ្ឋ ងាយរងគ្រោះ

កំពង់ឆ្នាំង៖ លោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញជួបសំណេះសំណាល សាកសួរសុខទុក្ខ និងផ្តល់អំណោយមនុស្សធម៌កាកបាទក្រហមកម្ពុជា ចែកជូន អ្នករស់នៅជាមួយមេរោគអេដស៍ ចាស់ជរាគ្មានទីពឹង ស្ត្រីមេម៉ាយ កុមារកំព្រា ជនពិការ ចំនួន១.២៧៥គ្រួសារ នៅខេត្តកំពង់ឆ្នាំង នៅថ្ងៃទី០៧ ខែសីហា ឆ្នាំ២០១៩ក្នុងពិធីសំណេះសំណាល សាកសួរសុខទុក្ខ និងផ្តល់អំណោយមនុស្សធម៌កាកបាទក្រហមកម្ពុជានេះ បានធ្វើឡើងនៅភូមិសេះស្លាប់ ឃុំឆ្នុកទ្រូ ស្រុកបរិបូរណ៌ ខេត្តកំពង់ឆ្នាំង។

សូមជម្រាបផងដែរថា កាកបាទក្រហមកម្ពុជា ជាស្ថាប័នមួយជំនួយការឱ្យអាជ្ញាធរសាធារណ: ដែលបានជួយសម្រាលទុក្ខលំបាកដល់ប្រជាពលរដ្ឋ ងាយរងគ្រោះ-រងគ្រោះដោយយថាហេតុផ្សេងៗ ជាពិសេស ជួយចាស់ជរាគ្មានទីពឹង កុមារកំព្រា ជនពិការ ស្ដ្រីមេម៉ាយ និងគ្រោះមហន្ដរាយផ្សេងៗទៀត ដោយមិនប្រកាន់និន្នាការនយោបាយ សាសនា ពូជសាសន៍អ្វីឡើយ។

ក្នុងឱកាសនោះ គ្រួសារនីមួយៗទទួលបានអង្ករ៣០គីឡូក្រាម មី១កេស ត្រីខ១០កំប៉ុង ឃីត១(មុង១ ភួយ១ សារុង១ ក្រមា១ អាវយឺត១)ទឹកសុទ្ធ១ដប នំបុ័ង១ដើម។
ជាមួយគ្នានេះ គ្រួសារនីមួយៗ នៅទទួលបានក្រណាត់ស១ដុំ និងថវិកា ១ម៉ឺនរៀល ជាអំណោយរបស់លោកនាយករដ្ឋមន្ត្រី ហ៊ុន សែន និងលោកស្រីកិត្តិព្រឹទ្ធបណ្ឌិតបន្ថែមទៀតផងដែរ។
ដោយឡែកសិស្សានុសិស្សចំនួន ២១៥នាក់ក្នុងម្នាក់ៗទទួលបានសៀវភៅ២ក្បាល ប៊ិច១ដើម និងថវិកា ១ម៉ឺនរៀល៕

ក្រសួងពាណិជ្ជកម្មជូនដំណឹងស្តីពីការរៀបចំពិព័រណ៍ទំនិញ លើកទី៤៨ ប្រចាំឆ្នាំ២០១៩ នៅសាធារណរដ្ឋឥណ្ឌា

ក្រសួងពាណិជ្ជកម្ម បានចេញសេចក្តីជូនដំណឹងស្តីពីការរៀបចំពិព័រណ៍ទំនិញ លើកទី៤៨ ប្រចាំឆ្នាំ២០១៩ នៅសាធារណរដ្ឋឥណ្ឌា ដែលនឹងប្រព្រឹត្តទៅនៅថ្ងៃទី១៦-២០ ខែតុលា ឆ្នាំ២០១៩ នៅមជ្ឈមណ្ឌលពិព័រណ៍ឥណ្ឌា នៅទីក្រុងដេលី សាធារណរដ្ឋឥណ្ឌា។

សូមអានសេចក្តីជូនដំណឹងខាងក្រោម៖

ក្រសួងសុខាភិបាល រកឃើញវ៉ាក់សាំង ២មុខ លក់តាមប្រព័ន្ធ Facebook គ្មានការត្រួតពិនិត្យគុណភាព និងប្រកាសឲ្យឈប់ប្រើប្រាស់ និងចាយចែកបន្ត

ក្រសួងសុខាភិបាល បានរកឃើញវ៉ាក់សាំងចំនួន២មុខ ដែលកំពុងលក់គ្មានប្រភពច្បាស់លាស់ គ្មានបញ្ជិកា គ្មានការត្រួតពិនិត្យ និងគ្មានច្បាប់អនុញ្ញាត ពីក្រសួងសុខាភិបាល, ដូច្នេះក្រសួងអំពាវនាវដល់មន្ដ្រីពាក់ព័ន្ធ និងប្រជាពលរដ្ឋ បញ្ឈប់ការប្រើប្រាស់ និងចែកចាយលក់បន្ដ ដើម្បីចៀសផុតគ្រោះថ្នាក់ដល់អាយុជីវិត ។

តាមសេចក្ដីប្រកាសព័ត៌មាន ដែលទទួលបាននៅថ្ងៃទី៧ ខែសីហា ឆ្នាំ២០១៩នេះ បានឱ្យដឹងថា វ៉ាងសាំងទាំងពីរប្រភេទនោះ គឺ Abbayrab និង INDIRAB ដែលកំពុងលក់តាមបណ្ដាញសង្គមហ្វេសប៊ុក មានគណនីឈ្មោះ «ឱសថ អនឡាញ ខេមបូឌា page»៕

ព័ត៌មានលម្អិត សូមអានសេចក្ដីប្រកាសរបស់ក្រសួងសុខាភិបាល ដែលមានដូចខាងក្រោមនេះ៖

ឧបនាយករដ្ឋមន្ដ្រី ស ខេង អញ្ជើញប្រកាសផ្សព្វផ្សាយតួលេខបណ្ដោះអាសន្ន ជំរឿនទូទៅប្រជាជននៅកម្ពុជា

លោកឧបនាយករដ្ឋមន្ដ្រី ស ខេង រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិ ជំរឿនទូទៅប្រជាជននៅកម្ពុជា ឆ្នាំ២០១៩ នៅព្រឹកថ្ងៃទី៧ ខែសីហា ឆ្នាំ២០១៩នេះ អញ្ជើញប្រកាសផ្សព្វផ្សាយ លទ្ធផលបណ្តោះអាសន្នជំរឿនទូទៅប្រជាជន នៅកម្ពុជាឆ្នាំ២០១៩។ ពិធីនេះ ក៏មានការចូលរួមពី លោកទេសរដ្ឋមន្ដ្រី ឆាយ ថន រដ្ឋមន្ដ្រីក្រសួងផែនការ និងមន្ដ្រីពាក់ព័ន្ធជាច្រើនរូបទៀតផងដែរ។

សូមបញ្ជាក់ថា ការធ្វើជំរឿនទូទៅប្រជាជនកម្ពុជា ឆ្នាំ២០១៩ បានធ្វើឡើងដោយមានរយៈពេល១១ថ្ងៃ ចាប់ពីថ្ងៃទី០៣ ដល់១៣ ខែមីនា ឆ្នាំ២០១៩កន្លងទៅ។

នេះជាការធ្វើជំរឿនលើកទី៣ នៅក្នុងប្រវត្តិសាស្ត្រកម្ពុជា ដែលជាទូទៅធ្វើឡើងរៀងរាល់១០ឆ្នាំម្ដង ដើម្បីទទួលបានទិន្នន័យប្រជាសាស្ត្រជាក់លាក់ សម្រាប់ប្រើប្រាស់រៀបចំតាក់តែងគោលនយោបាយ ឲ្យបានត្រឹមត្រូវ និងដើម្បីធ្វើជាសូចនាករ ក្នុងការតាមដានត្រួតពិនិត្យផែនការ យុទ្ធសាស្ត្រអភិវឌ្ឍន៍ជាតិ និងគោលដៅអភិវឌ្ឍន៍ ប្រកបដោយចីរភាពរបស់កម្ពុជា ២០១៦-២០៣០ ដោយមិនទុកឲ្យនរណាម្នាក់ឯកោឡើយ។

រដ្ឋាភិបាលកម្ពុជា ចាត់ទុកការធ្វើជំរឿនប្រជាជនទូទៅ មានសារសំខាន់ខ្លាំងណាស់ និងជាប្រភពតែមួយគត់ ដែលអាចផ្តល់ទិន្នន័យពេញលេញ និងច្បាស់លាស់ព្រមទាំងបានកំណត់ចរិកលក្ខណៈ ស្ថានភាពរស់នៅពិតប្រាកដ របស់ប្រជាជននៅទូទាំងប្រទេស។

ការធ្វើជំរឿនប្រជាជនកម្ពុជា អាចឲ្យយើងបានទិន្នន័យប្រជាសាស្ត្រពិតប្រាកដរបស់ប្រទេស និងជួយឲ្យរដ្ឋាភិបាលអាចរៀបចំតាក់តែង គោលនយោបាយបានត្រឹមត្រូវ ព្រមទាំងការអនុវត្តកម្មវិធីផ្សេងៗ ឲ្យទទួលបានតុល្យភាព នៃការអភិវឌ្ឍសម្រាប់ប្រជាពលរដ្ឋទូទាំងប្រទេស ៕