កាកបាទក្រហមកម្ពុជា បាននាំយកអំណោយមនុស្សធម៌​ចំនួន១គ្រួសារ​ ចូលរួមរំលែកទុក្ខ​ ​ជាមួយគ្រួសារសព​ ដែលស្លាប់​ដោយសារ​បេះដូង​ចំហ

កាលពីថ្ងៃទី២៦ ខែមេសា ឆ្នាំ២០១៧ លោក រស់ ហេង ប្រធានកិត្តិយសអនុសាខាកាកបាទក្រហមកម្ពុជា ស្រុកសង្គមថ្មី បាននាំយកអំណោយមនុស្សធម៌ចំនួន១គ្រួសារ ចូលរួមរំលែកទុក្ខយ៉ាងក្រៀមក្រំជាមួយគ្រួសារសព ដែលស្លាប់ដោយសារបេះដូងចំហ ដោយគ្រួសារមានជីវភាពខ្វះខាត នៅភូមិប្រធាតុ ឃុំចំរើន ស្រុកសង្គមថ្មី ខេត្តព្រះវិហារ។

ក្នុងឱកាសនោះលោកប្រធានកិត្តិយសអនុសាខាកាកបាទក្រហមកម្ពុជា ស្រុកសង្គមថ្មី បានសម្តែងនូវការសោកស្តាយចំពោះការបាត់បង់សាច់ញាតិជាទីស្រឡាញ់ របស់គ្រួសារសព និងសូមបួងសួងដល់វិញ្ញាណក្ខន្ធសព សូមបានទៅកាន់សុគតិភពកុំបីឃ្លៀងឃ្លាតឡើយ។

សម្ភារៈដែលអនុសាខាកាកបាទក្រហមបានផ្តល់ជូនរួមមាន៖ អង្ករ២០គីឡូក្រាម មី១កេស ត្រីខ ១០កំប៉ុង ទឹកស៊ីអ៊ីវ១ យួរ ទឹកបរិសុទ្ធ១យួរ ក្រមា១ សារុង១ មុង១ ភួយ១ ខោអាវ២ កញ្ចប់ ថវិកាមួយចំនួន និងថវិកាសប្បុរសជន មានលោក សៀង សារិត ប្រធានមន្ទីរមុខងារសាធារណៈខេត្តព្រះវិហារ ចំនួន ២០០,០០០ រៀលផងដែរ៕

លោក​នាយករ​ដ្ឋមន្ត្រី ហ៊ុន សែន៖ ខ្ញុំមិន​ទុកឱ្យ​កុមារ និង​យុវជន​កម្ពុជា​អភ័ព្វដូច​ខ្ញុំទេ!​

លោកនាយករដ្ឋមន្ត្រី ហ៊ុន សែន បានមានប្រសាសន៍ថា លោកមិនទុកឱ្យកុមារ និង យុវជនអភ័ព្វដូចរូបលោកទេ។ លោកនាយករដ្ឋមន្ត្រីបានលើកឡើងថា ដោយសារតែអត់សាលារៀន លោកត្រូវធ្វើដំណើរ ចាកចេញពីឪពុកម្តាយ តាំងពីអាយុ១៣ឆ្នាំ ហើយនៅពេលមេឃភ្លៀងម្តងៗពិតជាកំសត់ណាស់ ទៅរស់នៅវត្ត លោកវ៉ៃម្តងៗឈឺណាស់។

គួរបញ្ជាក់ថាលោកនាយករដ្ឋមន្ត្រី ហ៊ុន សែន បានមានប្រសាសន៍ដូច្នេះ នៅព្រឹកថ្ងៃទី២៧ ខែមេសា ឆ្នាំ២០១៧នេះ ក្នុងឱកាសអញ្ជើញប្រគល់វិញ្ញាបនបត្រ និងសញ្ញាបត្រជូនសិស្សថ្នាក់វិជ្ជាជីវៈ និស្សិតថ្នាក់បរិញ្ញាបត្ររង ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ នៃសាកលវិទ្យាល័យធនធានមនុស្ស នៅវិទ្យាស្ថានជាតិអប់រំ។
លោកបន្តថា ដោយសារបទពិសោធន៍ជូរចត់ នៃអតីតកាលរបស់ខ្លួន បានជានៅពេលមានឱកាសដឹកនាំប្រទេស លោកបានគិតថា សាលារៀន គឺជាគោលដៅធំបំផុត ដែលលោកត្រូវតែធ្វើឱ្យខានតែបាន ដើម្បីបង្ខិតសាលាចូលទៅកាន់ក្បែរផ្ទះកូនសិស្ស។ លោកនាយករដ្ឋមន្ត្រី បន្ថែមថា ឥឡូវនេះបញ្ហាធំរបស់យើងគឺធ្វើយ៉ាងណាឱ្យមាតាបិតា អាណាព្យាបាល ខិតខំចុះឈ្មោះឱ្យកូនចូលរៀននៅពេលដែលកូនដល់អាយុចូលរៀន និងខិតខំយ៉ាងណាកុំឱ្យកូនបោះបង់ចោលសាលា។ លោកលើកឡើងថា យើងកំពុងតែធ្វើវិនិយោគបន្ថែមទៀត ទៅលើវិស័យអប់រំ និងសិក្សាធិការ សាលារៀនថ្មីៗក៏បាននឹងកំពុងកើត បន្តបន្ទាប់ សាលាចាស់ត្រូវធ្វើជំនួសដោយសាលាថ្មី ជាតំរូវការចាំបាច់ខានមិនបាននូវតំរូវការការរីកលូតលាស់នៃប្រទេសរបស់យើង។ ទោះយ៉ាងណាលោកនាយករដ្ឋមន្ត្រី បានទទួលស្គាល់ថា មានគ្រួសារខ្លះតំរូវឱ្យកូនបោះបង់ការសិក្សា ដើម្បីជួយទៅដល់កិច្ចការឱ្យពុកម្តាយ តែរឿងនេះយើងត្រូវខិតខំពន្យល់មាតាបិតា ឱ្យយល់អំពីសារៈសំខាន់នៃការបណ្តុះបណ្តាលកូនចៅ។
លោកនាយករដ្ឋមន្ត្រី ហ៊ុន សែន បញ្ជាក់ថា យុវជនបច្ចុប្បន្ន មិនកំសត់ដូចយុវជន រឺជំទង់ជំនាន់លោកនោះទេ។ សូម្បីនៅវត្តជំនាន់នេះក៏ខុសពីជំនាន់មុនដែរ ជំនាន់មុននៅវត្តនៅភ្នំពេញគ្មានទឹក គ្មានភ្លើង ត្រូវទៅដងទឹក រែកទឹក អូសទឹកទៀត តែ ឥឡូវយុវជនយើងមានឱកាសធំណាស់ មានសន្តិភាពហើយ មានហេដ្ឋារចនាសម្ព័ន្ធ និងមាន សាលានៅគ្រប់ទីកន្លែង៕

លោក សៅ ប្រសិដ្ឋ ប្រធាន​គណៈកម្មាធិការអនុសាខា បាន​អញ្ជើញ​ចុះ​សួរសុខទុក្ខ​និងនាំយក​អំណោយមនុស្សធម៌ ចែក​ជូន​​គ្រួ​សារ​​ក្រីក្រមានជំងឺប្រចាំកាយ

កាលពីថ្ងៃទី ២៦ ខែមេសា ឆ្នាំ ២០១៧ អនុ​សាខា​កាក​បាទ​ក្រហមកម្ពុជា ស្រុកពាមជរ ដឹកនាំដោយ លោក សៅ ប្រសិដ្ឋ ប្រធាន​គណៈកម្មាធិការអនុសាខា និងសហការី បាន​អញ្ជើញ​ចុះ​សួរសុខទុក្ខនិងនាំយកអំណោយមនុស្សធម៌ ចែកជូន​គ្រួ​សារ​​ក្រីក្រមានជំងឺប្រចាំកាយ ឈ្មោះ សួន រិទ្ធ មាន​ប្រពន្ធ​ឈ្មោះ ដាំ ម៉ច បច្ចុប្បន្ន រស់នៅភូមិ ពោធិ៍ខ្ពស់ ឃុំឫស្សី ស្រុក​ពាមជរ ខេត្តព្រៃវែង។

លោកប្រធានអនុសាខា បាននាំយកនូវ​ប្រសាសន៍ផ្តាំផ្ញើ​សាក​សួរសុខទុក្ខ ពីសំណាក់ លោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និង លោក ជា សុមេធី ប្រធាន​គណៈ​កម្មាធិការសាខា ដែលតែងយកចិត្តទុក្ខដាក់គិតគូរអំពី សុខទុក្ខរបស់បងប្អូនប្រជាពលរដ្ឋដែលជួបការលំបាក ពោល​ទី​ណាមានទុក្ខទីនោះមានកាកបាទក្រហមកម្ពុជា។

អំណោយដែលបានផ្តល់ជូនរួមមាន៖ អង្ករ ៥០គីឡូក្រាម ទឹកត្រី​១យួរ ទឹកស៊ីអ៊ីវ១យួរ អំបិល១គីឡូក្រាម ស្ករស​១​គីឡូក្រាម ទឹកសុទ្ធ ២យួរ ត្រីខ ១យួរ ទឹកដោះគោឆៅ ១ឡូ មី ១កេះ និងថវិកា ចំនួន ១០០,០០០រៀល។

ក្នុងឱកាស​នោះ​សប្បុរស បានជួយ ឧបត្ថម្ភ​ថវិកា ចំនួន ៣០០,០០០ រៀល ដើម្បីចូល​រួមជួយ​សាង​សង់​ជម្រកស្នាក់នៅ​បណ្តោះអាសន្ន​ជូន​គាត់៕

ប្រធាន​មន្ទីរការ​ងារ និង​បណ្ដុះ​បណ្ដាល​វិជ្ជាជីវៈ ត្រូវ​បាន​ប្រកាស​តែងតាំង​ជាប្រធាន​មន្ទីរ​ថ្មី ​ជំនួស​លោក នូ នីម ដែល​ចូល​និវត្តន៍

នៅថ្ងៃទី២៧ ខែមេសា ឆ្នាំ២០១៧នេះ លោក ឃួង ស្រេង អភិបាលរងធានីភ្នំពេញ តំណាងឱ្យលោក ប៉ា សុជាតិវង្ស អភិបាលនៃគណៈអភិបាលរាជធានីភ្នំពេញ  បានអញ្ជើញចូលរួមក្នុងពិធីប្រកាសចូលកាន់តំណែងប្រធានមន្ទីរការងារ និងបណ្ដុះបណ្ដាលវិជ្ជាជីវៈ រាជធានីភ្នំពេញ ក្រោមអធិបតីភាព លោក អ៊ិត សំហេង រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ រាជធានីភ្នំពេញ។

នេះបើយោងតាមលិខិតលេខ ៥៧៩ មស.គត ចុះថ្ងៃទី២០ ខែកុម្ភៈ ឆ្នាំ២០១៧ របស់ក្រសួងមុខងារសាធារណៈ លោក ជួន វុឌ្ឍី ជាអនុប្រធានមន្ទីរការងារ និងបណ្ដុះបណ្ដាលវិជ្ជាជីវៈ ត្រូវបានប្រកាសតែងតាំងជាប្រធានមន្ទីរថ្មី ជំនួសលោក នូ នីម ដែលចូលនិវត្តន៍៕

លោ​កនាយក​រដ្ឋមន្ត្រី ហ៊ុន សែន អញ្ជើញ​ប្រគល់​សញ្ញាបត្រដល់​និស្សិត​សាកលវិទ្យាល័យ​ធន​ធានមនុស្ស ១,៦២៥នាក់

នៅថ្ងៃទី២៧ ខែមេសា ឆ្នាំ២០១៧នេះ លោកនាយករដ្ឋមន្ត្រីហ៊ុន សែន បានអញ្ជើញប្រគល់សញ្ញាបត្រដល់និស្សិតសាកលវិទ្យាល័យធនធានមនុស្សចំនួន ១,៦២៥នាក់ នៅវិទ្យាស្ថានជាតិអប់រំ។ និស្សិតដែលបានទទួលសញ្ញាបត្រថ្ងៃនេះរួមមាន ជំនាញវិជ្ជាជីវៈ បរិញ្ញាបត្រជាន់ខ្ពស់ បរិញ្ញាបត្រ និងបរិញ្ញាបត្ររង ដែលបានបញ្ចប់ការសិក្សាឆ្នាំ ២០១៤-២០១៥ ។

នៅក្នុងឱកាសនេះ លោកនាយករដ្ឋមន្រ្តី បានកោតសរសើរចំពោះសាកលវិទ្យាល័យធនធានមនុស្សដែលបានប្រែក្លាយពីអង្គការក្រៅរដ្ឋាភិបាលទៅជាសាកលវិទ្យាល័យដ៏ធំមួយក្នុងប្រទេសកម្ពុជា ក្នុងការរួមចំណែកបណ្តុះបណ្តាលធនធានមនុស្សនៅកម្ពុជា។ ជាពិសេសសាកលវិទ្យាល័យបានពង្រីកវិសាលភាពរបស់ខ្លួនជាបន្តបន្ទាប់ ទាំងហេដ្ឋារចនាសម្ព័ន្ធ និង អគារសិក្សាជាដើម។

សូមជម្រាបផងដែរថា នេះជាលើកទី១៤ហើយ ដែលលោកនាយករដ្ឋមន្ត្រី ហ៊ុន សែន បានអញ្ជើញប្រគល់សញ្ញាបត្រដល់សាកលវិទ្យាល័យធនធានមនុស្ស។ លោកក៏បានអរគុណចំពោះសាកលវិទ្យាល័យដែលបានបង្កើតការបណ្តុះបណ្តាលជំនាញវិជ្ជាជីវៈផ្សេងៗ ក្រៅពីបរិញ្ញាបត្រ អនុបណ្ឌិត ដល់និស្សិតដែលបានប្រឡងធ្លាក់បាក់ឌុបជំនាញឯកទេសផ្សេងៗ។ ការបណ្តុះបណ្តាលធនធានមនុស្សគឺជាវិស័យអាទិភាពធំបំផុតក្នុងការអភិវឌ្ឍប្រទេស ក្នុងចំណោមវិស័យសំខាន់ៗចំនួន៤ដូចគឺ៖ ១-ធនធានមនុស្ស ២-ធនធានទឹក ៣-ហេដ្ឋារចនាសម្ព័ន្ធផ្លូវ និង ៤-អគ្គិសនី ។

លោកនាយករដ្ឋមន្ត្រី ហ៊ុន សែន ក៏បានជំរុញនិងលើកទឹកចិត្តយុវជនខិតខំសិក្សារៀនសូត្រពីព្រោះចំណេះដឹងអាចឱ្យយើងងាយស្រួលក្នុងការស្វែងរការងារធ្វើ ទាំងនៅក្នុង និងនៅក្រៅប្រទេស។ រាជរដ្ឋាភិបាលកម្ពុជាតែងតែសម្របសម្រួលជាមួយប្រទេសមួយចំនួននៅពេលដែលបុគ្គលិក និងពលករកម្ពុជាទៅធ្វើការងារធ្វើនៅទីនោះ ដើម្បីឱ្យបានងាយស្រួល ស្របច្បាប់និងទទួលបាននូវអត្ថប្រយោជន៍ល្អៗជាច្រើន៕

អ្នកឧកញ៉ា គិត ម៉េង ប្រធាន​សភាពាណិជ្ជកម្ម​កម្ពុជា​ អញ្ជើញ​ចូលរួម​កិច្ច​ប្រជុំ​លើកទី​៧០​ក្រុង​ម៉ានីល ប្រទេស​​​​ហ្វី​លីពីន

​នៅ​ថ្ងៃ​ទី​ ២៧ ខែ​មេសា ឆ្នាំ ២០១៧ អ្នកឧកញ៉ា គិត ម៉េង ប្រធាន​​សភាពាណិជ្ជកម្ម​កម្ពុជា​ និង​ជា​ប្រធាន​ក្រុម​ប្រឹក្សា​ពិគ្រោះ​យោបល់​​​​អាស៊ាន-កម្ពុជា អញ្ជើញ​ចូលរួម​កិច្ច​ប្រជុំ​លើក​ទី​​៧០​របស់​​ក្រុម​ប្រឹក្សា​ពិគ្រោះយោបល់​អាស៊ាន​ ​ក្រុង​ម៉ានីល ប្រទេស​​​​ហ្វី​លីពីន។

ក្រុមប្រឹក្សា​ពិគ្រោះយោបល់​ធុរកិច្ច​អាស៊ាន​ បង្កើត​ឡើង​ដោយ​មាន​តំណាង​ពីវិស័យ​ឯកជន​របស់​អាស៊ាន​ទាំង​១០​ប្រទេស ជា​សមាជិក​ក្រុមប្រឹក្សា។ ក្រុមប្រឹក្សា​នេះ ជួប​ប្រជុំ​ជា​ទៀតទាត់​ដើម្បី​ពិភាក្សា​អំពី​បញ្ហា​ប្រឈម​នានា ​របស់​វិស័យ​ឯក​ជននៅ​ក្នុង​ក្របខណ្ឌ​អាស៊ាន​ ដើម្បី​ផ្តល់​ជា​អនុសាសន៍​ និង​ស្វែង​រក​ដំណោះ​​ស្រាយ​ពី​ថ្នាក់​ដឹកនាំ​អាស៊ាន៕

ក្រសួងធនធានទឹក ធ្វើការសាងសង់ប្រព័ន្ធប្រឡាយ​សំរោងលើចំនួន​ ០២ខ្សែ​ សម្រាប់​បម្រើឱ្យការ​ដាំដុះរបស់​បងប្អូន​ប្រជាកសិករ​

ប្រព័ន្ធប្រឡាយសំរោងលើចំនួន ០២ខ្សែ កំពុងត្រូវបានក្រសួងធនធានទឹក និងឧតុនិយម ធ្វើការសាងសង់ឡើង សម្រាប់បម្រើឱ្យការដាំដុះរបស់បងប្អូនប្រជាសិករ នៅក្នុងឃុំសំរោងលើ ស្រុកអង្គស្នួល ខេត្តកណ្តាល ។

ការសាងសង់ប្រព័ន្ធប្រឡាយសំរោងលើ ខ្សែទី១ មានប្រវែង ១.៣០០ ម៉ែត្រ ដោយបំពាក់នូវសំណង់សិល្បការចំនួន០២ កន្លែង និងខ្សែទី ២ ប្រវែង ៥.៤៥០ ម៉ែត្រ ដោយបំពាក់នូវសំណង់សិល្បការចំនួន០៧ កន្លែង ។ ក្រោយពេលសាងសង់រួច ប្រឡាយទាំង ០២ ខាងលើ  នឹងផ្តល់ទឹកស្រោចស្រពលើផ្ទៃដីស្រូវវស្សាចំនួន  ៤០៨ ហិកតា  ស្រូវប្រាំង ៤០៨ហិកតា និងដំណាំរួមផ្សំចំនួន ៣៥ ហិកតាផងដែរ៕