លោកនាយករដ្ឋមន្រ្តី ហ៊ុន សែន ថ្លែងថា កម្ពុជាបាន និងកំពុងផ្ដោតការយកចិត្តទុកដាក់លើការងារអាទិភាពចំនួន៣ ដើម្បីប្រែក្លាយជាប្រទេសមានចំណូលមធ្យមកម្រិតខ្ពស់

(ហាណូយ,វៀតណាម)៖ លោកនាយករដ្ឋមន្រ្តី ហ៊ុន សែន នៅរសៀលថ្ងៃទី៣០ ខែមីនា ឆ្នាំ២០១៨នេះ បានអញ្ជើញដឹកនាំប្រតិភូជាន់ខ្ពស់កម្ពុជា ចូលរួមក្នុងកិច្ចប្រជុំកំពូលធុរៈកិច្ច មហាអនុតំបន់មេគង្គ នៅទីក្រុងហាណូយ ប្រទេសវៀតណាម។ ថ្លែងនៅក្នុងកិច្ចដ៏មានសារៈសំខាន់នេះ លោកនាយករដ្ឋមន្រ្តី ហ៊ុន សែន បានលើកឡើងពីការងារអាទិភាពចំនួន៣ ដែលរាជរដ្ឋាភិបាលកម្ពុជា បាននឹងកំពុងយកចិត្តទុកដាក់ សំដៅប្រែក្លាយនាវាកម្ពុជា ទៅជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០។

ការងារអាទិភាពទាំង៣នោះរួមមាន៖
ទី១- កសាងហេដ្ឋារចនាសម្ព័ន្ធរូបវន្ដ ជាពិសេសផ្ដោតលើការអភិវឌ្ឍរបៀងសេដ្ឋកិច្ច សំដៅតភ្ជាប់ប៉ូលសេដ្ឋកិច្ចក្នុងស្រុក និងតំបន់ ដោយប្រកាន់យកនូវអភិក្រម នៃអភិវឌ្ឍប្រព័ន្ធដឹកជញ្ជូនពហុមុខ
ទី២- អភិវឌ្ឍហេដ្ឋារចនាសម្ព័ន្ធផ្នែកទន់ តាមរយៈធ្វើឱ្យប្រសើរនូវប្រព័ន្ធឡូជីស្ទិក និងសេវាកម្ម ដើម្បីប្រែក្លាយកម្ពុជា ទៅជាមជ្ឈមណ្ឌលឡូជីស្ទិក នៃមហាអនុតំបន់មេគង្គ ដោយបន្ដជំរុញកិច្ចខិតខំប្រឹងប្រែង ក្នុងការអនុវត្ដកិច្ចព្រមព្រៀង ដឹកជញ្ជូនឆ្លងកាត់ព្រំដែន
ទី៣- ការអភិវឌ្ឍធនធានមនុស្ស តាមរយៈការលើកកម្ពស់ កិច្ចសហប្រតិបត្តិការជាមួយវិស័យឯកជន ជាពិសេសផ្ដោតលើកម្មវិធីសិក្សា អប់រំ ផ្នែកវិទ្យាសាស្ដ្រ បច្ចេកវិទ្យា វិស្វកម្ម និងគណិតវិទ្យា និងកម្មវិធីបណ្ដុះបណ្ដាលបច្ចេកទេស និងវិជ្ជាជីវៈ។

លោកនាយករដ្ឋមន្រ្តី ហ៊ុន សែន បានបញ្ជាក់បន្ថែមថា កំណើនសេដ្ឋកិច្ចពិភពលោក កំពុងមានលក្ខណៈល្អប្រសើរ ដែលបានងើបឡើងនៅឆ្នាំ២០១៧ និងបន្ដកើនឡើងថែមទៀត នៅឆ្នាំ២០១៨ និងឆ្នាំ២០១៩។ ស្របគ្នានេះ សេដ្ឋកិច្ចប្រទេសមហាតំបន់មេគង្គ ក៏មានសន្ទុះគួរជាទីមោទនៈ ក៏ប៉ុន្ដែលទ្ធភាពកំណើន នៃអតិផរណា និងអត្រាការប្រាក់ ដែលបណ្ដាលមកពីកំណើនតម្រូវការ និងទំនោរគាំពារ សេដ្ឋកិច្ចក្នុងស្រុក របស់ប្រទេសមួយចំនួន កំពុងបង្កផលប៉ះពាល់ ដល់ពាណិជ្ជកម្ម និងការវិនិយោគផ្ទាល់ពីបរទេសផងដែរ។
លោកនាយករដ្ឋមន្រ្តី ហ៊ុន សែន បានបញ្ជាក់ទៀតថា ក្នុងបរិការណ៍នេះប្រទេសមហាអនុតំបន់មេគង្គ ចាំបាច់ត្រូវបង្កើនល្បឿននៃសមាហរណកម្ម និងការតភ្ជាប់តំបន់ ដោយផ្ដោតលើវិស័យអាទិភាពមួយចំនួនបន្ថែមទៀត ដូចជាវិស័យហរិញ្ញវត្ថុ ពាណិជ្ជកម្ម តាមប្រព័ន្ធអេឡិចត្រូនិច និងការអភិវឌ្ឍទីក្រុង នៅតាមតំបន់ជាប់ព្រំដែន។ ការពង្រឹងវិសាលភាព នៃកិច្ចសហប្រតិបត្តិការ កិច្ចការរបស់យើង នឹងផ្ដល់នូវលំហូរសម្រាប់កំណើនសេដ្ឋកិច្ចតំបន់ ក្នុងពេលអនាគត តាមរយៈការតភ្ជាប់ក្របខណ្ឌ មហាអនុតំបន់មេគង្គ និងតាមរយៈកាលានុវត្ដភាព ពីគំនិតផ្ដួចផ្ដើមតំបន់ផ្សេងទៀត។

ជាមួយគ្នានេះដែរ ប្រមុខរាជរដ្ឋាភិបាលកម្ពុជា បានទាញនូវចំណាប់អារម្មណ៍ លើបញ្ហានៅប្រឈមមុខមួយចំនួន ដែលទាមទារឱ្យមានការគិតគូរ និងដោះស្រាយរួមមាន៖
១- ការមិនទាន់ទាញយកប្រយោជន៍ អស់ពីសក្ដានុពល ដែលមាននៅតាមរបៀងសេដ្ឋកិច្ច ដ៏រស់រវើករបស់មហាអនុតំបន់មេគង្គ
២- បញ្ហាប្រឈមនៃកំណើន នគរូបនីយកម្ម ដោយសារការអភិវឌ្ឍដ៏ឆាប់រហ័សនៅក្នុងតំបន់
៣- ការកកស្ទះ នៅតាមច្រកព្រំដែន ដែលបណ្ដាលមកពីសកម្មភាពពាណិជ្ជកម្ម និងធុរកិច្ច
៤- ប្រព័ន្ធហេដ្ឋារចនាសម្ព័ន្ធ និងកិច្ចសម្រួលពាណិជ្ជកម្មបច្ចុប្បន្ន នៅមិនទាន់ឆ្លើយតបបាន ទៅនឹងកំណើននៃតម្រូវការ
៥- ការបន្ដពឹងផ្អែកទៅលើធនធានធម្មជាតិ និងកម្លាំងពលកម្មមានតម្លៃទាប ក្នុងការទាក់ទាញ ការវិនិយោគ និងធុរកិច្ច និងមិនអាចរក្សាបានឡើយ នូវកំណើនប្រកបចីរភាព និងបរិយាប័ន្ន។

លោកនាយករដ្ឋមន្ដ្រី ហ៊ុន សែន ក៏បានថ្លែងអំណរគុណចំពោះ រដ្ឋាភិបាលវៀតណាម ធនាគារអភិវឌ្ឍន៍អាស៊ី និងសភាពាណិជ្ជកម្ម នៃប្រទេសមហាអនុមេគង្គ ដែលបានរៀបចំ កិច្ចប្រជុំកំពូលធុរកិច្ចនៅថ្ងៃនេះឡើង សម្រាប់ការផ្លាស់ប្ដូរមតិអំពីកម្លាំងចលករថ្មីៗ ក្នុងការបន្ដរុញច្រាន កំណើនសេដ្ឋកិច្ចប្រទេសមហាអនុតំបន់មេគង្គ៕