អតីតអ្នកនយោបាយមកពីគណបក្សហ្វ៊ុនស៊ិនប៉ិច ដែលធ្វើនយោបាយតាំងពីមានកៅអីក្នុងរដ្ឋសភា
រហូតរកតែជើងកៅអីមួយគ្មាន លោក លឺ ឡាយស្រេង បានស្នើឲ្យមានច្បាប់ការពារនាយករដ្ឋមន្ត្រីផុតអាណត្តិ
ដែលវាជារឿងមិនអាចទៅរួច និងមិនឆ្លុះបញ្ចាំងពីតថភាពនយោបាយពិតជាក់ស្តែងនៅកម្ពុជា។
ការស្នើរបស់លោក លឺ ឡាយស្រេង
ធ្វើឡើងចំពេលដែលគណបក្សសង្គ្រោះជាតិកំពុងជួបគ្រោះធំ
ដែលអាចនឹងរងការពិន័យផ្អាកសកម្មភាពរយៈពេល ៥ឆ្នាំយ៉ាងតិច
ឬអាចនឹងត្រូវរំលាយចោល ប្រសិនបើត្រូវបានគេរកឃើញថា
បានប្រព្រឹត្តទោសកំហុសណាមួយ ដូចដែលមានចែងនៅក្នុងច្បាប់ស្តីពីគណបក្សនយោបាយ
ដែលអង្គនីតិបញ្ញត្តិ បាននិងកំពុងធ្វើវិសោធនកម្ម ហើយដែលនឹងត្រូវបានប្រកាសដាក់ឲ្យប្រើប្រាស់ជាផ្លូវការក្នុងពេលដ៏ខ្លីខាងមុខនេះ។
អ្នកវិភាគលើកឡើងថា ក្នុងស្ថានភាពបែបនេះ លោក លឺ
ឡាយស្រេង ដែលជាសំណល់មកពីការបែកបាក់ខ្ទេចខ្ទីរបស់គណបក្សហ្វ៊ុនស៊ិនប៉ិច មិនគួរលើកយកច្បាប់ស្តីពីការពារនាយករដ្ឋមន្ត្រីផុតអាណត្តិ
ស្នើទៅលោកនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា ដែលកំពុងមានប្រៀបឈ្នះទៅលើសមរភូមិប្រជាធិបតេយ្យ
និងកំពុងទទួលបានការគាំទ្រយ៉ាងច្រើនលើសលប់ពីប្រជាពលរដ្ឋគ្រប់មជ្ឈដ្ឋានទាំងក្នុង
និងក្រៅប្រទេសនោះទេ។ ជាក់ស្តែង យោងតាមលទ្ធផលការបោះឆ្នោតឃុំសង្កាត់ឆ្នាំ២០១៧
បានបង្ហាញពីកំណើននៃសន្ទុះគាំទ្រគណបក្សប្រជាជនកម្ពុជាមានការកើនឡើងយ៉ាងគំហុក
ពោលគឺកើនឡើងជាង ៣០ម៉ឺនសម្លេង បើធៀបនឹងការបោះឆ្នោតឆ្នាំ២០១៣។
អ្នកវិភាគយល់ថា លោក លឺ ឡាយស្រេង អាចចាត់ទុកថា ជាអ្នកចាស់ទុំម្នាក់
ក៏ប៉ុន្តែមិនមែនជាបុគ្គលចាស់ទុំខាងនយោបាយឡើយ។ ពីព្រោះថា ការសរសេរសំបុត្ររបស់លោក
ផ្ញើជូនលោកនាយករដ្ឋមន្ត្រី និងលោក កឹម សុខា ប្រធានបក្សប្រឆាំង ស្នើឱ្យបង្កើតច្បាប់ស្តីពីការពារនាយករដ្ឋមន្ត្រីផុតអាណត្តិរបស់គាត់
គឺផ្ទុយស្រឡះពីបរិបទ តថភាពនយោបាយនៅកម្ពុជា
និងសន្ទុះនៃការគាំទ្ររបស់ប្រជាពលរដ្ឋមកលើរាជរដ្ឋាភិបាល
ដែលដឹកនាំដោយគណបក្សប្រជាជនកម្ពុជា និងលោកនាយករដ្ឋមន្ត្រី ហ៊ុន សែន។
អ្វីដែលលោក លឺ ឡាយស្រេង ស្នើឡើង
គឺកំពុងធ្វើសកម្មភាពក្នុងគោលដៅបម្រើគណបក្សប្រឆាំង តាំងរយៈវាយបំបាកគោលជំហរគណបក្សកាន់អំណាច ហើយបង្កើតការយល់ច្រឡំដល់អ្នកបោះឆ្នោត និងប្រជាពលរដ្ឋទូទៅឱ្យពិចារណាឡើងវិញក្នុងការបោះឆ្នោតគាំទ្រគណបក្សកាន់អំណាចនោះ។
ហេតុដូច្នេះ ហើយបានជាលោកនាយករដ្ឋមន្ត្រី ហ៊ុន សែន ឆ្លើយបតវិញយ៉ាងជូរចត់
ដោយចាត់ទុកអ្វីដែលលោក លឺ ឡាយ ស្រេង ស្នើឡើងគឺ “ដ៏ស្មោកគ្រោក
វាជាការប្រមាថដ៏ធ្ងន់ធ្ងរមកលើគណបក្សប្រជាជន និងជាឧបាយកលទុច្ចរិត”។ តាមការពិត
មនុស្សទូទៅក៏គេមើលឃើញតាំងពីក្នុងពោះវៀនរបស់លោក លឺ ឡាយស្រេង ម្លេះថាកំពុងគិតអ្វី
ក្នុងគោលបំណងអ្វីនោះ។
ទោះប្រជាពលរដ្ឋធម្មតា ក៏គេគិតថាមិនអាចទៅរួចដែរ ព្រោះគ្មានគណបក្សដែលកំពុងកាន់អំណាចណាមួយយល់ព្រមទេ
មិនថាតែនៅប្រទេសកម្ពុជា ឬប្រទេសដទៃផ្សេងទៀតក្នុងពិភពលោក។ ករណីនៅកម្ពុជា
បើយល់ព្រម គឺមានន័យថា គណបក្សកាន់អំណាចសុំចុះចាញ់
ដែលវាមិនឆ្លុះបញ្ចាំងទៅនឹងលទ្ធផលការបោះឆ្នោតឆ្នាំ២០១៧ ថ្មីៗនេះ។
អ្នកវិភាគនយោបាយមើលឃើញថា
ការស្នើរបស់លោក លឺ ឡាយស្រេង គឺជាសេនារីយ៉ូចាស់ ដែលគណបក្សប្រឆាំងបានយកមកប្រើកាលពីឆ្នាំ២០១៤
ដែលកាលណោះទណ្ឌិត សម រង្ស៊ី បានលើកយកបញ្ហានេះទៅពិភាក្សាជាមួយលោកនាយករដ្ឋមន្ត្រី
ហ៊ុន សែន ដូចដែលលោកបានផ្តល់បទសម្ភាសន៍ពិសេសដល់សារព័ត៌មានក្នុងស្រុកកាលពីថ្ងៃទី១៥
ខែកក្កដា ឆ្នាំ២០១៧ ថ្មីៗនេះអញ្ចឹង។
បើតាមលោកនាយករដ្ឋមន្ត្រី ហ៊ុន សែន ការស្នើច្បាប់ការពារនាយករដ្ឋមន្ត្រីផុតអាណត្តិ
គឺជាឧបាយកលទុច្ចរិត និងជាទង្វើដ៏លាមកនៃការប៉ុនប៉ងចង់កម្ទេចចោលត្រកូលហ៊ុន
ដើម្បីឲ្យប្រជាជនមើលឃើញដោយច្រឡំថា
នាយករដ្ឋមន្ត្រីដែលកំពុងស្ថិតក្នុងតំណែងបច្ចុប្បន្ន បាននឹងកំពុងធ្វើខុសអ្វីមួយយ៉ាងធ្ងន់ធ្ងរ
ទើបបានជាចង់ឲ្យមានច្បាប់បែបនេះ
ក្នុងពេលដែលគណបក្សប្រជាជនកម្ពុជាបាននឹងកំពុងកសាងស្នាដៃធំៗជាច្រើនជាប្រវត្តិសាស្ត្រ
សម្រាប់មាតុភូមិ ប៉ុន្តែពួកគេ (ក្រុមប្រឆាំង) រីករាយនឹងបំផ្លិចបំផ្លាញ
កេរ្តិ៍ឈ្មោះជាតិ បង្កការចលាចល ញុះញង់បំផ្លិចបំផ្លាញសមិទ្ធផលជាតិ
ព្យាយាមនាំកម្ពុជាចូលក្នុង ភ្នក់ភ្លើងសង្គ្រាម និងបំផ្លាញការអភិវឌ្ឍប្រទេស។
ក្រោយពីមានប្រតិកម្មត្រង់ៗ ចំៗរបស់លោកនាយករដ្ឋមន្ត្រី ហ៊ុន
សែន រួចមក ប្រជាពលរដ្ឋទូទៅ បានផ្ទុះសំណើច និងលាន់មាត់គ្រប់ៗគ្នាថា លោក លឺ ឡាយស្រេង
គួរទុកពេលវេលាចុងក្រោយរបស់ខ្លួនគិតគួរអំពីថាត្រូវឱ្យថ្នាក់ដឹកនាំបក្សប្រឆាំងធ្វើអ្វី
ក្រោយចាញ់ការបោះឆ្នោតឆ្នាំ២០១៨ ខាងមុខ ឬក៏យកទៅឱ្យជួយរៀបចំ
ថែទាំតំបន់ផ្នូរសពរបស់លោកនៅភ្នំស្រង់នោះ ទើបវាល្អជាជាង។ លោក លឺ ឡាយស្រេង ចាស់ហើយ
វង្វេងវង្វន់ហើយ ដើរក្រោយស្ថានការណ៍នយបាយនៅកម្ពុជាហើយ កុំមកតាំងខ្លួនជា ចាស់ព្រឹទ្ធាចារ្យអី
មិនអាចទៅរួច “បើត្រឹមចាស់វង្វេង” បាន៕
No comments:
Post a Comment