ដោយ សួន ចំរើន
ចាប់ពីថ្ងៃបើកកិច្ចប្រជុំដំបូងនៃគណៈរដ្ឋមន្ត្រី អាណត្តិទី៥មក ប្រមុខរាជរដ្ឋាភិបាល លោកនាយករដ្ឋមន្ត្រី ហ៊ុន សែន បានដាក់ចេញនូវវិធានការកំណែទម្រង់ស៊ីជម្រៅ ជាច្រើន ជាពិសេសលើវិស័យ សុខាភិបាល និងវិស័យអប់រំ ដើម្បីបន្តអភិវឌ្ឍប្រទេសឲ្យកាន់តែរីកចម្រើន និងក្លាយជាប្រទេសអភិវឌ្ឍ ដូចប្រទេសជិតខាង និងក្នុងតំបន់។
ក្នុងនោះ រាជរដ្ឋាភិបាលបានដាក់ចេញនូវវិធានការលើកកម្ពស់វិស័យអប់រំមួយចំនួន រួមមាន ការរៀបចំផែនការយុទ្ធសាស្ត្រអប់រំរយៈពេល ៥ឆ្នាំម្តង គោលនយោបាយស្ដីពីការអប់រំបច្ចេកទេស គោលនយោបាយស្ដីពីធនធានមនុស្សក្នុងវិស័យអប់រំ គោលនយោបាយស្ដីពីគ្រូបង្រៀន និងគោលនយោបាយជាតិស្ដីពី ការអភិវឌ្ឍយុវជន ជាដើម។ មិនតែប៉ុណ្ណោះ រាជរដ្ឋាភិបាល ក៏ថែមទាំងបង្កើនចំនួនថវិកាជាតិលើវិស័យអប់រំឲ្យច្រើនលើសក្រសួងណាៗទាំងអស់។ នៅឆ្នាំ២០១៤ នេះ ថវិកាជាតិដែលក្រសួងអប់រំ គ្រោងចំណាយមានចំនួនជាង ៣០០លានដុល្លារសហរដ្ឋអាមេរិក។ បន្ថែមពីនេះ ការផ្តល់ឱកាសឲ្យវិស័យឯកជនបើកគ្រឹះស្ថានអប់រំ ក៏ជាការរួមចំណែកមួយផងដែរក្នុងការជំរុញគុណភាពអប់រំ នៅប្រទេសកម្ពុជា។
ជាក់ស្តែង ក្រសួងអប់រំ យុវជន និងកីឡា បានប្រកាសអនុវត្តនូវគោលនយោបាយកំណែទម្រង់ស៊ីជម្រៅលើវិស័យអប់រំចាប់ពីឆ្នាំនេះតទៅ ដើម្បីធានាគុណភាពអប់រំឲ្យកាន់តែប្រសើរឡើង។ កំណែទម្រង់ដំបូងបំផុតរបស់ក្រសួងអប់រំ គឺការប្រឆាំងអំពើពុករលួយពេលប្រឡង ដោយអនុវត្តពាក្យស្លោក «អ្នកចេះ គឺជាប់» ហើយយើងទាំងអស់គ្នាក៏មានសុទិដ្ឋិនិយមចំពោះកំណែទម្រង់នេះផងដែរ។
ក្រោយពេលទទួលបានលទ្ធផល អំពីការកែទម្រង់នេះ លោក នាយករដ្ឋមន្ត្រី ហ៊ុន សែន បានយកចិត្តទុកដាក់ និងផ្តល់ការលើកទឹកចិត្ត ទៅលើធនធានមនុស្ស ដែលផលិតបានពីការកែទម្រង់នេះ ដោយបានផ្តល់ជារង្វាន់លើកទឹកចិត្តដល់សិស្ស ដែលជាជ័យលាភីកំពូលទាំង១១រូប និងបន្តឧបត្ថម្ភដល់សិស្សមួយចំនួន ដែលបន្តការសិក្សានៅថ្នាក់ឧត្តមសិក្សា ថែមទៀត។
ទន្ទឹមនេះ មន្ត្រីសង្គមស៊ីវិល ក៏បានចូលរួមសាទរ និងសរសើរ រាជរដ្ឋាភិបាល ចំពោះការធ្វើកំណែទម្រង់វិស័យអប់រំនេះផងដែរ។
សូម្បីតែ លោក កែម ឡី អ្នកវិភាគស្ថានការណ៍នយោបាយនៅកម្ពុជា ក៏បានសរសើរចំពោះវិធានការ និងការកែទម្រង់របស់ក្រសួងអប់រំ ក្រោមការគ្រប់គ្រងរបស់លោក ហង់ ជួន ណារ៉ុន ផងដែរ។ លោកលើកឡើងថា៖ «ការចាប់ផ្តើមកំណែទម្រង់របស់ស្ថាប័ននេះ មិនមែនធ្វើឡើងលឿនហួសហេតុពេកនោះទេ ពោលគឺត្រូវតែចាប់ផ្តើមពីពេលនេះតទៅ»។
ផ្ទុយទៅវិញ ក្រុមប្រឆាំងផ្កាប់មុខ ដែលតែងតែធ្វើការរិៈគន់ជាប្រចាំ បានប្រើប្រាស់គ្រប់មធ្យោបាយ ដើម្បីបំភ្លៃការពិត ហើយតែងតែធ្វើការវាយតម្លៃតាមរបៀបខ្មៅងងឹត មើលឃើញតែជ្រុងមួយនៃកំហុសតែ ប៉ុណ្ណោះ។
ការធ្វើកំណែទម្រង់ដំបូងបំផុតរបស់ក្រសួងអប់រំនៅនាពេលនេះ បែរជាមិនទទួលបានការស្វាគមន៍ ដោយបុគ្គលិកម្នាក់របស់វិទ្យុបរទេសមួយ ផ្សាយជាខេមរៈភាសា នៅក្នុងបទវិភាគរបស់ខ្លួន ដែលបានផ្សាយនៅយប់ថ្ងៃទី៣១ ខែសីហា ឆ្នាំ២០១៤ ទៅវិញ។ បុគ្គលិកនោះ បានលើកឡើងថា « ទោះជាយ៉ាងណាក្តី យុទ្ធសាស្ត្រ គោលនយោបាយ និងបរិមាណថវិកា(របស់រាជរដ្ឋាភិបាល លើវិស័យអប់រំ)នេះ ទំនងជាមិនធ្វើឲ្យការអប់រំនៅកម្ពុជា មានគុណភាពខ្ពស់នោះឡើយ» ។ ការលើកឡើងរបស់បុគ្គលិកម្នាក់នេះ គឺហាក់បីដូចជាបុគ្គលម្នាក់ដែលមានគំនិតទុទិដ្ឋិនិយមបំផុតសម្រាប់វិស័យអប់រំនៅកម្ពុជា បើទោះបីជាក្រសួងអប់រំ និងរាជរដ្ឋាភិបាល បានឈានមួយជំហ៊ានរួចទៅហើយ ដើម្បីធ្វើកំណែទម្រង់លើវិស័យនេះ។ និយាយនេះ មិនមានន័យថាជាការរារាំងសិទ្ធិបញ្ចេញមតិរបស់បុគ្គលនោះទេ ប៉ុន្តែការយល់ឃើញរបៀបឆ្វេងនិយមហួសហេតុ ក៏ជាការបន្ទុចបង្អាក់ចំពោះអ្នកដែលខិតខំប្រឹងប្រែង ធ្វើផងដែរ។
ចំណុចសំខាន់ នៃកំណែទម្រង់លើវិស័យអប់រំ នៅក្នុងជំហ៊ានដំបូងនេះ គឺជាការពញ្ញាក់ស្មារតី ក៏ដូចជាការជម្រុញឲ្យសិស្សខិតខំប្រឹងប្រែងរៀនសូត្រដោយខ្លួនឯង ដើម្បីទទួលបានចំណេះដឹងពិតៗ សក្តិសមជាទំពាំងស្នងឬស្សី សម្រាប់អនាគតប្រទេសជាតិ។ ទី២ ក៏ជាការដាស់តឿនដល់អាណាព្យាបាលសិស្សទាំងអស់ ឲ្យមានការទទួលស្គាល់ និងជម្រុញពួកគេឲ្យចូលរួមក្នុងការលុបបំបាត់អំពើពុករលួយក្នុងសង្គម និងទី៣ លោកគ្រូ អ្នកគ្រូ ដែលបានបំពេញភារៈកិច្ចនៅក្នុងពេលប្រលង បានព្រមទទួលយកនូវការកែទម្រង់នេះ ដើម្បីឲ្យមានយុត្តិធម៌នៅក្នុងសង្គមផងដែរ។
កំណែទម្រង់លើវិស័យអប់រំលើកនេះ ត្រូវគេចាត់ទុកថា ជាកំណែទម្រង់ប្រវត្តិសាស្ត្រក្នុងវិស័យអប់រំនៅកម្ពុជា។តើហេតុអ្វីបានជាបុគ្គលិកវិទ្យុបរទេសមួយនោះ មិនទទួលស្គាល់ទៅវិញ? ឬមួយនេះជាចរិត របស់វិទ្យុក្រុមប្រឆាំង? ប៉ុន្តែ កន្លងមក គេតែងតែប្រកាសថា ជាវិទ្យុឯករាជ្យ ឬមិនប្រកាន់និន្នាការនយោបាយ តើនេះជាការពិតឬយ៉ាងណា?
ម្យ៉ាងទៀត វាដូចជាជួនពេលគ្នាណាស់ ដែលពួកគេរួមកម្លាំងគ្នា ជាមួយបក្សប្រឆាំង ដើម្បីវាយប្រហារមកលើរាជរដ្ឋាភិបាល ដោយមន្ត្រីគណបក្សប្រឆាំង បានធ្វើជាលិខិតកោះហៅរដ្ឋមន្ត្រីក្រសួងអប់រំ ដើម្បីទៅចោទសួរផ្ទាល់មាត់នៅរដ្ឋសភា នាថ្ងៃទី១៧ ខែកញ្ញា ឆ្នាំ២០១៤ ខាងមុខនេះ ថែមទៀត។ ចំណុចនេះ បញ្ជាក់ថា គណបក្សប្រឆាំងនៅកម្ពុជា គឺពិតជាក្រុមប្រឆាំងតែមួយ របស់វិទ្យុបរទេស ផ្សាយជាខេមរៈភាសាមួយនេះ យ៉ាងពិតប្រាកដ។ ក្រុមនេះមិនដែលបង្ហាញនូវឆន្ទៈចូលរួមអបអរសាទរចំពោះសមិទ្ធផលទាំងឡាយ ដែលរាជរដ្ឋាភិបាល សម្រេចបាននោះទេ ។ ដោយមានសុច្ឆន្ទៈពិតប្រាកដក្នុងការកែទម្រង់វិស័យអប់រំនៅកម្ពុជា លោក រដ្ឋមន្ត្រី ហង់ ជួន ណារ៉ុន បានប្រកាសថា លោកនឹងទៅឆ្លងបំភ្លឺក្នុងរដ្ឋសភាតាមការកោះហៅរបស់បក្សប្រឆាំង។ គេនៅរង់ចាំមើល ថា តើអ្នកតំណាងរាស្ត្របក្សប្រឆាំងដែលជាអ្នកផ្តើមការចោទសួរ មានគំនិតផ្ចាញ់ផ្ចាលបែបណានៅលើបញ្ហាដែលពួកក្រុមខ្លួនមានចេតនាបង្កទំនាស់ និងការរិះគន់នានាលើវិស័យអប់រំនោះ? ទោះជាយ៉ាងណា រាជរដ្ឋាភិបាលអាណត្តិទី៥ នៅតែខិតខំប្រឹងប្រែងបន្តនូវកំណែទម្រង់ស៊ីជម្រៅជាបន្តទៀតដោយអត់ធ្មត់ ហើយអ្នកដែលមិនបានធ្វើក៏ចេះតែ បានត្រឹមតែរិៈគន់ ជាបន្តទៀតដែរ ប៉ុន្តែ ពួកគេគួរយល់នូវកំហុសរបស់ខ្លួន ដូចសុភាសិតខ្មែរ តែងពោលថា « បើមិនជួយចូក ជួយចែវ កុំយកជើងរាទឹក » ។
ជារួម រាល់ការងារទាំងអស់មិនអាចសម្រេចលទ្ធផលបានតែក្នុងរយៈពេលមួយខ្លីនោះទេ។ មានតែបុគ្គលដែលមានគំនិតខ្លី ឬបុគ្គលដែលមានគំនិតទុទ្ទិដ្ឋិនិយមប៉ុណ្ណោះ ដែលមើលអំពើល្អ និងការខិតខំប្រឹងប្រែង របស់អ្នកដ៏ទៃ សុទ្ធតែជាបន្លានៅក្នុងកែវភ្នែករបស់ខ្លួន។ យ៉ាងណាមិញ អ្នកគ្រប់គ្រងវិទ្យុបរទេសមួយ គួរតែធ្វើការត្រួតពិនិត្យនូវខ្លឹមសារនៃអត្ថបទផ្សាយរបស់បុគ្គលិកខ្លួនជាមុន មុននឹងសម្រេចផ្សព្វផ្សាយ ដើម្បីផ្ទៀងផ្ទាត់នូវផលប៉ះពាល់ក្នុងសង្គម ថាតើជាការចូលរួមចំណែកដល់ការរីកចម្រើនរបស់សង្គម ឬជាការទិតៀនដើម្បីតែប្រឆាំង?
No comments:
Post a Comment