ពិធីប្រគល់សញ្ញាបត្រមធ្យមសិក្សាចំណេះទូទៅ និងសាសនាឥស្លាមជូនសិស្សជ័យលាភីនៃវិទ្យាស្ថានអប់រំឥស្លាមសិក្សាកម្ពុជា

កំពង់ឆ្នាំង៖ នាថ្ងៃទី១៤ ខែកុម្ភៈ ឆ្នាំ២០២២ នៅវិទ្យាស្ថានអប់រំឥស្លាមសិក្សាកម្ពុជា ស្រុកកំពង់ត្រឡាច មានរៀបចំពិធីប្រគល់សញ្ញាបត្រមធ្យមសិក្សាចំណេះទូទៅ និងសាសនាឥស្លាមជូនសិស្សជ័យលាភីនៃវិទ្យាស្ថានអប់រំឥស្លាមសិក្សាកម្ពុជា១១៦នាក់ ក្រោមអធិបតីភាពលោក ឈិន សេងងួន អភិបាលរងខេត្តកំពង់ឆ្នាំង តំណាងលោក ស៊ុន សុវណ្ណារិទ្ធិ អភិបាលនៃគណៈអភិបាលខេត្តកំពង់ឆ្នាំង។

នៅក្នុងនោះ ក៏មានការចូលរួមពីលោក ម៉ម ម៉ាល័យ សមាជិកក្រុមប្រឹក្សាខេត្ត ព្រមទាំងមានការចូលរួមពីសំណាក់អាជ្ញាធរស្រុកកំពង់ត្រឡាច លោក សេកអាឌូឡាហ្ស៊ី អាលីអាល់ម៉ូហាណាឌី តំណាងសប្បុរសជននៃរដ្ឋកាតា និងលោក លោកស្រីការិយាល័យជំនាញពាក់ព័ន្ធផងដែរ។

គួរបញ្ជាក់ថា ការរៀបចំពិធីប្រគល់សញ្ញាបត្រមធ្យមសិក្សាចំណេះទូទៅ និងសាសនាឥស្លាមជូនដល់សិស្សជ័យលាភីនៃវិទ្យាស្ថានអប់រំឥស្លាមសិក្សាកម្ពុជាចំនួន១១៦នាក់នោះ ដោយក្នុងនោះបានប្រគល់សញ្ញាបត្រមធ្យមសិក្សាបឋមភូមិជំនាន់ទី៦ និងទី៧ ចំនួន៧៨នាក់ សម្រាប់ឆ្នាំសិក្សា២០១៩,២០២០ និង២០២១ និងសញ្ញាបត្រមធ្យមសិក្សាទុតិយភូមិជំនាន់ទី៣ និងជំនាន់ទី៤ ចំនួន៣៨នាក់ ឆ្នាំសិក្សា២០១៩,២០២០, និងឆ្នាំសិក្សា២០២១៕