ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរណ៍
និងជាប្រធានគណៈកម្មាការជាតិអូឡាំពិកកម្ពុជា ក្នុងពិធីប្រគល់ប្រាក់រង្វាន់លើកទឹកចិត្តរបស់
សម្តេចអគ្គមហាសេនាបតីតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ដល់កីឡាករ
កីឡាការនីជ័យលាភីការប្រកួតកីឡា SEA Games លើកទី២៨នៅ សឹង្ហបូរី
នៅទីស្នាក់ការគណៈកម្មាធិការជាតិអូឡាំពិកកម្ពុជា នៅថ្ងៃទី ៣១ ខែកក្កដា ឆ្នាំ២០១៥នេះ
បានមានប្រសាសន៍ថា ការប្រកួតកីឡាស៊ីហ្គេម លើកទី២៨ នៅសឹង្ហបូរីកន្លងទៅថ្មីៗនេះ
ក្នុងចំណោម ២២ប្រភេទកីឡា គឺមានតែ៥ប្រភេទកីឡា ដែលកម្ពុជាទទួលបានមេដាយគឺ៖ សីដក់ឈឺនឡូន
មេដាយមាស១, និងសំរឹទ្ធ១, កីឡាប្រដាល់សកលមេដាយប្រាក់១, កីឡាប៉េតង់ មេដាយប្រាក់៤ និងសំរឹទ្ធ៥, កីឡាតេក្វាន់ដូ មេដាយសំរឹទ្ធ២ និងកីឡាវាយកូនបាល់
មេដាយសំរឹទ្ធ១។ «លទ្ធផលជ័យលាភីទាំងនេះ
បានផ្តល់ចំណាត់ថ្នាក់កម្ពុជា ឈរលើលេខរៀងទី០៨ ក្នុងចំណោម១១ប្រទេសស្ថិតនៅលើ ប្រទេសឡាវ
ប្រ៊ុយណេ និងទីម័រខាងកើត ដែលកម្ពុជាពុំធ្លាប់ទទួលបានក្នុងប្រវត្តិកីឡាSEA Games ២០ឆ្នាំមកហើយ តាំងពីឆ្នាំ១៩៩៥»។
ឯកឧត្តម ថោង ខុន បានគូសបញ្ជាក់ថា ចំពោះការប្រកួតកីឡាស៊ីហ្គេម
លើកទី២៨ នៅសឹង្ហបូរីកន្លងទៅថ្មីៗនេះ កម្ពុជាបានរៀបចំបញ្ជូនប្រតិភូកីឡាទៅចូលរួមចំនួន
២៥៦នាក់ លើ២២ប្រភេទកីឡាក្នុងនោះរួមមាន៖ កីឡាករ ចំនួន ១៤៨នាក់, កីឡាការិនី ចំនួន ២៨នាក់, គ្រូបង្វឹក ចំនួន៤២នាក់ និងថ្នាក់ដឹកនាំមន្ត្រីបំរើការចំនួន
៣៨នាក់ ចំពោះការប្រកួតនេះ កម្ពុជាទទួលបាន ៖ មេដាយមាសចំនួន ១ វិញ្ញាសាត្រូវនឹង
៨គ្រឿង, មេដាយប្រាក់ចំនួន ៥វិញ្ញាសាត្រូវនឹង
៧គ្រឿង និង មេដាយសំរិទ្ធចំនួន ៩វិញ្ញាសាត្រូវនឹង ២២គ្រឿង។
ឯកឧត្តម ថោង ខុន បានលើកឡើងថា ដើម្បីជាការលើកទឹកចិត្តដល់កីឡាករកីឡាការិនីកម្ពុជា
សម្តេចតេជោនាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត តែងតែ ជួយឧបត្ថម្ភប្រាក់រង្វាន់ផ្ទាល់ដល់កីឡាករ
កីឡាការិនី និងគ្រូបង្វឹក។ ជាមួយគ្នានេះដែរសំរាប់ ជ័យលាភីការប្រកួតកីឡាSEA Games លើកទី២៨នេះ សម្តេចទាំងពីរបានផ្តល់ប្រាក់រង្វាន់
សំរាប់កីឡាករ កីឡាការិនីដែលបានមេដាយមាសទទួលបាន ៥០០០ដុល្លារ, កីឡាករ កីឡាការិនីមេដាយប្រាក់ទទួលបាន ៣០០០ដុល្លារ, កីឡាករ កីឡាការិនីមេដាយសំរឹទ្ធទទួលបាន
២០០០ដុល្លារ ចំណែកឯគ្រូបង្វឹកទទួលបានស្មើកីឡាករ កីឡាការិនីរបស់ខ្លួន ដែលដណ្តើមបានមេដាយខ្ពស់បំផុត។គ្រូជំនួយទទួលបាន
៧០% នៃថវិកាដែលគ្រូបង្វឹកទទួលបាន។
ឯកឧត្តម ថោង ខុន បានបន្តថា «អ្វីដែលយើងទាំងអស់គ្នាកាន់តែរំភើបជាងនេះទៅទៀតគឺ
សម្តេចតេជោ បានសម្រេចតម្លើងប្រាក់ឧបត្ថម្ភរបបប្រចាំខែ និងរបបអាហារសំរាប់ក្រុមជម្រើសជាតិទ្វេមួយជាពីរ
ដែលប្រការនេះបានជំរុញទឹកចិត្តកីឡាករ កីឡាការិនីអោយខិតខំប្រឹងប្រែងហ្វឹកហាត់ និងការប្រកួតឈានទៅដណ្តើមបានមេដាយជូនជាតិមាតុភូមិ
នាពេលនេះ»៕
No comments:
Post a Comment