ថ្លែងសុន្ទរកថានាថ្ងៃទី១០ ខែធ្នូ ឆ្នាំ២០១៣ នៅក្នុងមិទ្ទិញអបអរសាទរទិវាជនពិការកម្ពុជាលើកទី១៥ និងទិវាជនពិការអន្តរជាតិលើកទី៣១ ថ្ងៃទី៣ ខែធ្នូ ឆ្នាំ២០១៣ នៅសាលមហោស្រពកោះពេជ្រ ក្រោមប្រធានបទ «លុបបំបាត់ឧបសគ្គនានា និងផ្តល់ឱកាសដល់ជនពិការដើម្បីសង្គមមួយសំរាប់យើងទាំងអសគ្នា» សម្តេចអគ្គមហាសេនាបតីតេជោ ហ៊ុន សែន បានឧទ្ទិសទិវានៃជនពិការដោយត្រូវប្រែក្លាយការឈឺចាប់ពីពិការភាពនេះ ឲ្យទៅជាឱកាសមាននៃការបង្កើនសមត្ថភាព ការរឹតចំណងសាមគ្គីភាព និងស្មារតីម្ចាស់ការ ក៏ដូចជាប្រកាសឲ្យដឹងអំពីការអនុញ្ញាតិឲ្យក្រសួងអប់រំធ្វើការជ្រើសរើសគ្រូបង្រៀនក្រមខណ្ឌរដ្ឋ គឺចំនួន ៦០០០នាក់ ក្នុងឆ្នាំ២០១៤។
សម្តេចតេជោនាយករដ្ឋមន្ត្រីមានប្រសាសន៍ថា «ខ្ញុំសូមឧទ្ទិសទិវានេះជាការប្រែក្លាយសេចក្តីឈឺចាប់ដោយពិការភាពទៅជា «ឱកាសមាស» នៃការបង្កើនសមត្ថភាព និងទេពកោសល្យថ្មីៗ ការលើកកម្ពស់សិទ្ធិ ការរឹតចំណងសាមគ្គីភាព កិច្ចសហការគ្នា និងស្មារតីម្ចាស់ការរបស់ជនពិការ»។ សម្តេចនាយករដ្ឋមន្ត្រីថ្លែងថា ខ្ញុំសូមថ្លែងនូវការ គាំទ្រចំពោះការបន្តកិច្ចខិតខំប្រឹងប្រែងលើកកម្ពស់សមត្ថភាព ជំនាញវិជ្ជាជីវៈ និងលើកទឹកចិត្ត ព្រមទាំងការផ្តល់តម្លៃ និងសេចក្តីថ្លៃថ្នូរដល់ជនពិការគ្រប់រូបក្នុងនាមជាមនុស្សជាតិ។ នៅក្នុងសុន្ទរកថា សម្តេចនាយករដ្ឋមន្ត្រីបានស្នើឲ្យក្រសួងអប់រំយុវជន និងកីឡា និងក្រសួងសង្គមកិច្ច អតីតយុទ្ធជន និងយុវនីតិសម្បទាពិនិត្យអំពីការបញ្ចូលគ្រូបង្រៀននៅតាមបណ្តាអង្គការនានា ចូលជាក្របខណ្ឌគ្រូបង្រៀនរបស់រដ្ឋបានទទួលប្រាក់បៀវត្សពីរដ្ឋ ដូចដែលធ្លាប់បានអនុវត្តន៍នៅអង្គការគ្រួសារថ្មី ដោយបញ្ចូលជាគ្រូក្របខណ្ឌរដ្ឋរួចហើយនោះ។ សម្តេចតេជោ ហ៊ុន សែន បានមានប្រសាសន៍ថា ការដាក់បញ្ចូលគ្រូបង្រៀននៅតាមអង្គការនានាចូលទៅក្នុងក្របខណ្ឌរដ្ឋនោះ ក្នុងគោលបំណងឲ្យពួកគេទទួលបានប្រាក់ខែពីរដ្ឋផង និងបានទទួលប្រាក់ឧបត្ថម្ភពីអង្គការផងដែរ។
សម្ដេចបានមានប្រសាសន៍ថា ឆ្នាំ២០១៤ រាជរដ្ឋាភិបាលបានសម្រេចឲ្យជ្រើសរើសគ្រូបង្រៀនក្រមខណ្ឌរដ្ឋគឺចំនួន ៦០០០នាក់ ដែលឆ្នាំមុនៗជ្រើសរើសតែ ៥០០០នាក់ប៉ុណ្ណោះ ហើយនៅឆ្នាំ២០១៥ ការជ្រើសរើសគ្រូបង្រៀនគឺមានចំនួន ៧០០០នាក់ ដូចនេះយើងអាចបញ្ចូលគ្រូៗ ដែលស្ថិតនៅតាមអង្គការនានាទូទាំងប្រទេសឲ្យចូលជាក្របខណ្ឌគ្រូតែម្តង មិនអាចបញ្ចូលអង្គការមួយ ហើយអង្គការមួយទៀតមិនបញ្ចូលនោះទេ។ សម្ដេចនាយករដ្ឋមន្ដ្រីក៏បានស្នើឲ្យក្រសួងអប់រំយុវជន និងកីឡា រៀបចំចងក្រងនូវឯកសារអក្សរស្ទាប និងភាសាសញ្ញាសម្រាប់ជនពិការដែលអង្គការគ្រួសារថ្មីបានបង្កើតឡើង សម្រាប់បង្រៀនកុមារពិការភ្នែកដើម្បីឲ្យឯកសារនេះត្រូវបានបោះពុម្ព និងមានការទទួលស្គាល់ពីក្រសួងអប់រំ ដោយត្រូវធ្វើឯកភាពវូបនីយកម្មនៃសញ្ញាភាសា គ រួចហើយរៀបចំឲ្យទៅជាសញ្ញារួម។ សម្តេចតេជោ ហ៊ុន សែន បានលើកឡើងថា ការធ្វើបែបនេះនឹងជួយធ្វើឲ្យជនពិការ គ ថ្លង់ អាចធ្វើការទំនាក់ទំនងជាមួយអ្នកមិនពិការបាន និងអ្នកមិនពិការក៏អាចធ្វើទំនាក់ទំនងជាមួយអ្នកពិការបានទូលំទូលាយ ផងដែរ។ សម្តេចតេជោ ហ៊ុន សែន បានមានប្រសាសន៍ថា ក្នុងនីតិកាលទី៥ នៃរដ្ឋសភានេះរាជរដ្ឋាភិបាលផ្តោតការយកចិត្តទុកដាក់បន្ថែមទៀត ដើម្បីជួយដល់ជនពិការ ដោយបានបន្តអនុវត្តន៍ច្បាប់ស្តីពីកិច្ចការពារ និងលើកកម្ពស់សិទ្ធិជនពិការ ការជំរុញកិច្ចការពារលើកកម្ពស់សិទ្ធិ និងសុខុមាលភាពជនពិការ ស្របតាមអនុសញ្ញាអង្គការសហប្រជាជាតិស្តីពីសិទ្ធិជនពិការ ព្រមទាំងការពង្រឹងគុណភាព និងប្រសិទ្ធភាព នៃសេវារបស់មូលនិធិជនពិការ។ «ខ្ញុំ សូមសំដែងនូវការគាំទ្រចំពោះសកម្មភាពទាំងឡាយដែលកំពុងអនុវត្តន៍នៅ លើទឹកដីកម្ពុជា ក្នុងទិសដៅដោះស្រាយតម្រូវការចាំបាច់ជាមូលដ្ឋានរបស់ជនពិការឲ្យ បានជាផលប្រយោជន៍ដល់ជនពិការគ្រប់សញ្ជាតិគ្រប់ពណ៌សម្បុរ ដែលកំពុងរស់នៅលើទឹកដីនៃកម្ពុជា»។
សម្តេចតេជោនាយករដ្ឋមន្ត្រីបានថ្លែងឲ្យដឹងថា កម្ពុជាកំពុងតែគាំទ្រ និងជំរុញដល់ការអនុវត្តអនុសញ្ញាអូតាវ៉ាស្តីពីការហាមប្រាមការប្រើប្រាស់ ការរក្សាទុក ការផលិត ការផ្ទេរគ្រាប់មីនប្រឆាំងមនុស្ស និងការបំផ្លាញគ្រាប់មីន ការអនុវត្តក្របខណ្ឌការងារទសវត្សរ៍ប៊ីវ៉ាកូ និងប៊ីវ៉ាកូបូក ៥ ទសវត្សរ៍ថ្មីនៃជនពិការប្រចាំអាស៊ីនិងប៉ាស៊ីហ្វិក ផែនការយុទ្ធសាស្ត្រអ៊ីនឈាន់សម្រាប់ជនពិការឆ្នាំ ២០១៣-២០២២ និងអនុសញ្ញាស្តីពីសិទ្ធិជនពិការ ។
សម្តេចតេជោថ្លែងថា ជនពិការគឺទទួលផលវិបាកទាំងផ្លូវកាយ និងផ្លូវចិត្ត ដែលចាំបាច់ត្រូវមានកិច្ចសម្របសម្រួលពិសេសនានា ដើម្បីឲ្យពួកគាត់អាចរស់នៅក្នុងសេចក្តីថ្លៃថ្នូរក្នុងនាមជា មនុស្សជាតិ។ សម្តេចតេជោថ្លែងថា ចំពោះមុខនេះ កម្ពុជាបានត្រៀមជាស្រេចក្នុងសហការ ជាមួយគណៈកម្មាធិការអង្គការសហប្រជាជាតិប្រចាំតំបន់អាស៊ី-ប៉ាស៊ីហ្វិក ក្នុងការកៀរគររាល់ការឧបត្ថម្ភគាំទ្រ ដើម្បីអនុវត្តន៍ទសវត្សរ៍ជនពិការប្រចាំតំបន់អាស៊ី-ប៉ាស៊ីហ្វិក ឆ្នាំ២០១៣-២០២២ យុទ្ធសាស្ត្រអ៊ីនឈាន់ «ធ្វើឲ្យសិទ្ធិក្លាយជាការពិត»។
សម្តេចបានផ្ដល់នូវអនុសាសន៍ជាក់ស្ដែងមួយចំនួនបន្ថែមទៀត ដើម្បីធ្វើជាមូលដ្ឋាននៃការអនុវត្ដ និងជាការចែករំលែកនូវគំនិតថ្មីៗបន្ថែមទៀតសំរាប់អនុវត្តបន្ត ក្នុងនោះរួមមាន៖ត្រូវបន្ដពង្រឹងពង្រីកវិធានការទប់ស្កាត់ពិការភាព ឱ្យមានប្រសិទ្ធភាពថែមទៀត តាមរយៈការបន្ដ កាត់បន្ថយភាពងាយរងគ្រោះនៅក្នុងសង្គម ទប់ស្កាត់អំពើហិង្សា គ្រោះថ្នាក់ចរាចរណ៍ គ្រោះថ្នាក់ការងារ ការពង្រឹងប្រព័ន្ធសុខាភិបាល ការដោះមីន និងកាកសំណល់ជាតិផ្ទុះសល់ពីសង្គ្រាម ពង្រឹងសេវាស្ដារលទ្ធភាព ពលកម្ម អប់រំ ផ្សព្វផ្សាយការបង្ការពិការភាពឱ្យបានកាន់តែទូលំទូលាយ, ត្រូវបន្ដជំរុញការអនុវត្ដច្បាប់ស្ដីពីកិច្ចការពារ និង លើកកម្ពស់សិទ្ធិជនពិការ និងលិខិតបទដ្ឋាន គតិយុត្តិក្រោមច្បាប់នានាឱ្យមានប្រសិទ្ធភាពខ្ពស់, ត្រូវចូលរួមអនុវត្ដអនុសញាអន្ដរជាតិនានា ដែលព្រះរាជាណាចក្រកម្ពុជា បានចូលជាភាគីដូចជា អនុសញ្ញាអូតាស្ដីពីការហាមប្រាម ការប្រើប្រាស់ ការរក្សាទុកការផលិត និងការផ្ទេរគ្រាប់មីនប្រឆាំងមនុស្ស, ត្រូវបន្ដពង្រឹងពង្រីកសេវាស្ដារលទ្ធភាពពលកម្មកាយសម្បទាជូនជនពិការ ឱ្យមាននិរន្ដរភាព តាមរយៈការពង្រឹងកិច្ចសហប្រតិបត្ដិការជាមួយអង្គការជាតិ អន្ដរជាតិ និងដៃគូអភិវឌ្ឍន៍នានា ដើម្បីកៀរគរ ប្រភពធនធានក្នុងការដំណើរការកម្មវិធី និងការផ្ដល់សេវាតាមមជ្ឈមណ្ឌលស្ដារលទ្ធភាពពលកម្មកាយសម្បទា ទូទាំងប្រទេស ,ត្រូវបន្ដពង្រឹងពង្រីកស្មារតីម្ចាស់ការរបស់ជនពិការផ្ទាល់ ដែលជាកត្ដាគន្លឹះនៃការងារជនពិការ ,ត្រូវបន្ដការកៀរគរប្រភពធនធាន ដើម្បីអភិវឌ្ឍវិស័យសុខុមាលភាពជនពិការ ,ត្រូវលើកទឹកចិត្ដឱ្យមានការចូលរួមពីវិស័យឯកជន រោងចក្រ សហគ្រាស និងគ្រឹះស្ថានទាំងអស់ ក្នុងការងារជនពិការ ការអនុវត្ដដោយស្ម័គ្រចិត្ដ ភ្ញាក់រលឹកនូវកាតព្វកិច្ចដែលមានចែងក្នុងច្បាប់ស្ដីពីកិច្ចការពារ និងលើកកម្ពស់សិទ្ធិជនពិការ និងគាំទ្រដល់ការធ្វើសមាហរណកម្មជនពិការ ដោយដាក់បញ្ចូលបញ្ហាពិការភាព ទៅក្នុងសកម្មភាពរបស់ខ្លួន ហើយបង្ករលក្ខណៈឱ្យជនពិការទទួលបាននូវការធ្វើសមាហរណកម្មក្នុងកម្រិតអតិបរមា។ គ្រប់ស្ថានីយ៍វិទ្យុ របស់រដ្ឋ និងឯកជនព្រមទាំងគ្រប់ភ្នាក់ងារសារព័ត៌មាន សូមជួយផ្សព្វផ្សាយឱ្យបានទូលំទូលាយនូវការយកចិត្តទុកដាក់និង ការលើកស្ទួយសុខុមាលភាពជនពិការនៅកម្ពុជា ពិសេសត្រូវមានការបកប្រែជាភាសាសញ្ញានៅតាមបណ្តា ស្ថានីយ៍ទូរទស្សន៏ ដើម្បីសម្រួលដល់ជនពិការក្នុងការទទួលព័ត៌មានផ្សេងៗ។
សូមបញ្ជាក់ថា ការប្រារព្ធទិវាជនពិការកម្ពុជាលើកទី១៥ និងជនពិការអន្តរជាតិលើកទី៣១ មានគោលបំណងបង្ហាញពីសមិទ្ធផលនានា លើវិស័យសុខមាលភាពជនពិការវិស័យពិការភាព ពិសេសការលើកកំពស់សិទ្ធិជនពិការឱ្យស្របតាមអនុសញ្ញាស្តីពីជនពិការ ទស្សវត្សជនពិការឆ្នាំ២០១៣-២០២២ ដែលហៅយុទ្ធសាស្ត្រអ៊ីឈាន់ ធ្វើឱ្យសិទ្ធក្លាយជាការពិត ។
ឯកឧត្តម វង សូត រដ្ឋមន្រី្តក្រសួងសង្គមកិច្ច អតីតយុទ្ធជននិងយុវនីតិសម្បទា បានសំដែងអំណរព្រះគុណយ៉ាងជ្រាលជ្រៅចំពោះ ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាពិសេសសម្តេចតេជោ និងសម្តេចកិតិ្តព្រឹទ្ធបណ្ឌិតដែលបានធ្វើសកម្មភាពជាច្រើន ដើម្បីបុព្វហេតុជនពិការកម្ពុជា។ បន្ថែមលើនេះទៀត សម្តេចបាន ជួយជាសំភារៈថវិកា ដល់មណ្ឌលស្តារលទ្ធភាពពលកម្ម មជ្ឈមណ្ឌលកុមារពិការ គ-ថ្លង់ កសាងតំបន់អភិវឌ្ឍន៏លំនៅឋានជនពិការនៅតំបន់តាកែនកោះស្លា ខេត្តកំពត,ស្រុកគូលេនខេត្តសៀមរាប និងភ្នំឆ័ត្រ ខេត្តបន្ទាយមានជ័យ និងបានដាក់បញ្ជូលគម្រោងទាំងនេះទៅក្នុងគម្រោងវិនិយោគសាធារណៈរបស់ រដ្ឋទៀតផង។
យោងជំរឿនទូទៅប្រជារាស្ត្រឆ្នាំ២០០៨ប្រទេសកម្ពុជាមានជនពិការ ចំនួន១៩២ពាន់៥៣៨នាក់ស្មើនិង១,៤៤%នៃចំនួនប្រជាជនសរុប៕
No comments:
Post a Comment